Problemi i Luginës së Preshevës trajtohet në Departamentit Amerikan të Shtetit!

October 10, 2015 by dgreca

Washington, DC-8 Tetor 2015/
Në ditën e parë të vizitës zyrtare në SHBA, delegacioni i Luginës së Preshevës i kryesuar nga Kryetarët e Komunave të Preshevës dhe Bujanocit, z. Ragmi Mustafa dhe z. Nagip Arifi, pati një sërë takimesh të rëndësishme. Temë kryesore e këtyre takimeve ka qenë çështja ende e pazgjidhur e shqiptarëve të Luginës së Preshevës.
Delegacioni i Luginës, në përbërje të së cilit përveç kryetarëve të komunave shqiptare ne Luginë janë edhe z. Faton Bislimi nga Liga Qytetare Shqiptaro-Amerikane me bashkëpunëtorët z. Xhevat Latifi, gazetar, dhe z. Sherif Sherifi, avokat, sot u prit në një takim të veçantë nga Drejtori i Byrosë për Evropën Qendrore dhe Lindore në Departamentin e Shtetit, z. Tom Yazdgerdi me bashkëpunëtorët e vet.
Ky takim në Departamentin e Shtetit shënon një kthesë historike për çështjen e Luginës së Preshevës, sepse e vendosë atë në agjendën e politikës së jashtme amerikane si pikë me rëndësi në Ballkan. Kryetari Mustafa dhe Kryetari Arifi shpalosën në mënyrë të argumentuar dhe faktike gjendjen e rendë me të cilën përballën shqiptarët në Luginë, duke përmendur dhe elaboruar çështjen e varfërisë dhe papunësisë së madhe, mungesën e zhvillimit ekonomik, mungesën e të drejtave dhe lirive bazike njerëzore (si atë të përdorimit të simboleve kombëtare, psh), diskriminimin etnik në punësim në institucionet shtetërore, etj. “Serbia tani po përdorë metoda moderne për të larguar sa më shumë shqiptarë nga Lugina,” ka thënë Mustafa. “Ne jemi të trajtuar si qytetarë të dorës së dyte,” ka shtuar Arifi, ndër të tjera. Tutje, ata kanë elaboruar edhe problematiken me materialet shkollore të bllokuara në piken doganore tani e një muaj, si dhe kanë theksuar problematiken e standardeve të dyfishta që Serbia përdore ndaj shqiptareve në krahasim me minoritetet tjera në Serbi. Ndërkohë, aty u diskutua edhe për përballimin dinjitoz të krizës së refugjatëve sirianë nga ana e Komunës së Preshevës dhe asaj të Bujanocit.
Si kundërpërgjigje politike ndaj diskriminimit të vazhdueshëm shtetëror serb ndaj shqiptarëve në Luginë, delegacioni njoftoi z. Yazdgerdi me vendimin e asamblistëve shqiptarë të Luginës për themelimin e Asociacionit të Komunave me Shumicë Shqiptare në Serbi.
Nga ana e tij, z. Yazdgerdi ka shprehë përkrahjen e tij dhe të Departamentit Amerikan të Shtetit për qasjen serioze dhe racionale të lidershipit shqiptar në Luginë, si dhe ka ndarë më delegacionin shqetësimin për problematikën në Luginë. Z. Yazdgeri ka theksuar se krijimi i një asociacioni ne bashkërendon veprimet ndërmjet autoriteteve lokale ne Lugine në suaza të kompetencave të tyre është veprim i pranueshëm. Ai ka shpreh gatishmërinë e administratës amerikane për të vazhduar involvimin diplomatik dhe zhvillimor në Luginë dhe në rajon në përgjithësi. Ai ka falënderuar sinqerisht delegacionin për vizitën e tyre si dhe ka kërkuar që ky komunikim direkt më Washingtonin të vazhdohet edhe në të ardhmen.
Gjatë ditës, delegacioni për çështjen e Luginës, është pritur në takim edhe nga Ambasadorja e Shqipërisë në Washington, znj. Floreta Fader, me të cilën është diskutuar për problematikën shqiptare në Luginë.
Në ditët në vijim, delegacioni do të zhvillojë takime edhe në Kongresin e SHBA-ve, respektivisht me Komisionin Kongresional për të Drejtat e Njeriut “Tom Lantos”. Ky komision që ka bashkudhëheqës nga dy kongresiste, një republikan dhe nje demokrat, mbanë emrin e përkrahësit më të madh të çështjes shqiptare në Kongresin e SHBA-ve, z. Tom Lantos. / XLPress.tv/
8 Tetor, 2015: Washington, DC

Ndeshja Shqipëri- Serbi, trajneri Çurçiç: Mendojmë vetëm për lojën

October 7, 2015 by dgreca

TIRANË, 7 Tetor/Nga Gjergji Mima/ -Trajneri i Serbisë, Radovan Curçiç dhe kapiteni i Serbisë, Branislav Ivanoviç, mbajtën sot një konferencë për mediat në prag të sfidës së 8 tetorit ndaj Kombëtares shqiptare në “Elbasan Arena”, të vlefshme për elemiatoret e kampionatit Evropian “Francë 2016”.

Konferencën e hapi zv/Presidenti i Federatës serbe, Savo Milosevic, i cili theksoi se gjatë rrugës për në Tiranë, autobusi i Serbisë është goditur me gurë, por tha se autoritetet shqiptare reaguan menjëherë dhe situata u normalizua.

“Ndodhi një incident i vogël rrugës për në Tiranë. U qëllua me gurë autobusi, por nuk pati ndonjë problem. Reaguan autoritetet shqiptare dhe gjithçka është në rregull”, tha Milosevic.

Ndërsa trajneri i Serbisë, Radovan Curçiç u shpreh se, “do mundohemi të mos mendojmë për gjë tjetër në fushë, por vetëm lojën. Sa i përket formacionit të përfaqësueses së Serbisë, trajneri serb tha se, “formacionin do ta shihni nesër në fushë”.

Trajneri serb ka ripërsëritur se përfaqësuesja serbe mendon vetëm për futboll dhe për asgjë tjetër në këtë ndeshje. Sa për motivimime lojtarëve, ai tha se, “ka qenë shumë e lehtë t’i motivosh futbollistët për këtë ndeshje”.

Ai deklaroi se skuadra e tij do të hyjë në fushë për fitore, megjithëse shtoi se Shqipëria ka një skaudër të konsoliduar. “Kombëtarja jonë është ende në formim, ndërsa Shqipëria ka një skuadër të konsoliduar. Shqipëria është një ekip fortë dhe jo më kot është në vendin aktual në grupin tonë”, tha ai.

Lidhur me një shkarkim të tij nëse humbet nesër trajneri Çurçiç në tha se, “Çdo trajner e di që një ditë do të largohet, por unë nuk mendoj se do të iki pas kësaj ndeshjeje”.

Ndërsa kapiteni i Serbisë, Branislav Ivanoviç u shpreh se, “kjo ndeshje e kalon sportin por ne duam ta fitojmë”.

I pyetur për trajnerin e Shqipërisë, Gianni De Biasi, Ivanoviç tha se, “trajneri i Kombëtares shiqptare është një Italian dhe mendoj se ai ka bërë një përgatitje psikologjike si dinë vetëm ata”.

Duke iu përgjigjur interesimit të gazetarëve mbi impaktin e parë në Tiranë, Ivanoviç tha se, “E dimë që kjo ndeshje tejkalon sportin, por ne duam vetëm futbollin dhe do të përpiqemi me çdo mënyrë ta fitojmë këtë ndeshje”. Kapiteni serb shtoi se, ky rast është rasti më i mirë për të ndryshuar mentalitetin mes dy popujve në Ballkan.

Fillon në Shkup Seminari IX Ndërkombëtar i Albanologjisë

October 3, 2015 by dgreca

SHKUP, 3 tetor / – Filloi të Premten me 2 tetor në Shkup Seminari IX Ndërkombëtar i Albanologjisë në Universitetin Shtetëror të Tetovës me temë ”Lokalja dhe universalja në kulturën shqiptare”.Sesionet shkencore, historike, etnokulturore dhe gjuhësore si “Maqedonia një problem historik dhe aktual”, “Kanunet shqiptare”, “Letërsia shqipe e krijuar në Maqedoni si pjesë integrale e letërsisë shqipe” si dhe “Prurjet leksikore, dialektore dhe krahinore në fushë të shqipes” të parashikuara për prezantim dhe debat të japin të kuptosh që ky seminar tanimë ka fituar atributin e vërtetë shkencor, ndërsa Universiteti Shtetëror i Tetovës epitetin e studimit cilësor dhe sfidës ndaj argumenteve dhe fakteve shkencore.

”Seminari ka ndërtuar një traditë solide dhe është një institucion i qëndrueshëm, por për të vazhduar të mbetet i tillë, duhet investuar më shumë”, deklaroi ministri i Arsimit, Abdilaqim Ademi.

”Shkenca dhe kultura janë konceptualisht identitete të veçanta dhe të ndërthurura”, shtoi ai.

”Ndonëse studimet kronologjike dhe historike për shkencën dhe kulturën në botën shqiptare janë në një fazë empirike dhe jo shumë të zhvilluara, megjithatë, nga një vështrim i shpejtë mund të konstatojmë se shkenca , kultura dhe gjuha në rrugëtimin shekullor të kombit shqiptar kanë qenë instrumente të domosdoshme dhe të patjetërsueshme të emancipimit kombëtar”, theksoi ai.

Për rektorin e USHT-së Vullnet Ahmeti takime të tilla konfirmojnë gatishmërinë e universitetit për bashkëpunim në fushën e arsimit dhe aktiviteteve shkencore.

“Ky seminar trajton kontributin e albanologëve të huaj për të studiuar gjuhën shqipe, letërsinë dhe kulturën, marrëdhëniet e gjuhës dhe letërsisë shqipe me gjuhë të tjera, letërsitë dhe kulturat e Evropës dhe botës, historinë kombëtare shqiptare dhe marrëdhëniet me kombet fqinje dhe kulturat e tyre veçanërisht për kultivimin e vlerave të trashëgimisë kulturore të popullit. Rëndësia e këtij takimi shkencor është se ai kontribuon në masë të madhe për të shkëmbyer përvojat në mesin e studiuesve, pjesëmarrësve të seminarit, përmes komunikimit dhe debatit ku do të eliminohen mangësit e mundshme nga hulumtimet shkencore mbi këto çështje me një qëllim pozitiv që shkencat e albanologjisë të përparojnë paralelisht me shkencat e tjera në shumë fusha”, tha Ahmeti.

Seminari i Albanologjisë do t’i zhvillojë punimet në katër sesione shkencore, të historisë, etnokulturës, letërsisë dhe gjuhësisë

BASHA NE GJERMANI, MBESHTETJE NGA PARTIA E KANCELARES

October 2, 2015 by dgreca

Basha: Deputetët gjermanë inkurajuan miratimin me konsensus të ligjit për dekriminalizimin/

CDU e Kancelares Merkel i jep mbështetje të plotë dhe të gjithanshme Partisë Demokratike në aksionin e saj politik dhe në hartimin e programit qeverisës.Lajmin e bëri të ditur Kryetari Partisë Demokratike, Luzim Basha në faqen e tij Facebook.

“Me zyrtarët e lartë gjermanë, ndamë shqetësimet lidhur me zhvillimet në Shqipëri, të cilat po shkojnë në drejtim të kundërt me parimet e vendeve demokratike dhe janë larg përmbushjes së standarteve europiane”, shkruan Basha,

“Kusht i panegociueshëm për fillimin e bisedimeve për anëtarësimin e Shqipërisë në Bashkimin Europian mbetet për partnerët gjermanë, dekriminalizimi i politikës shqiptare. Gjatë takimeve që zhvillova në Berlin, deputetët gjermanë vlerësuan propozimet e Partisë Demokratike dhe inkurajuan miratimin me konsensus të ligjit për dekriminalizimin”, vijoi ai.

“Një tjetër shqetësim i diskutuar në takimet me deputetët gjermanë ishte dhe procesi zgjedhore i 21 qershorit. Deputetët gjermanë dhe kreu i Komisionit për Çështjet Europiane në Bundestag, Gunther Krichbaum, i kanë cilësuar tërësisht të papranueshme për një vend që aspiron të bëhet anëtarë i Bashkimit Europian, shkeljet e konstatuara në raportin e OSBE-ODIHR-i, për zgjedhjet”, bëri të ditur Kreu i PD.

Basha foli edhe për debatin politik të CEZ. “Mega afera CEZ, ishte po ashtu çështje e bisedës. Mora mbështetjen e plotë të partnerëve tanë gjermanë, për iniciativën e Partisë Demokratike, për të angazhuar hetues ndërkombëtarë për zbardhjen e kësaj afere si mënyra më e mirë për një hetim të plotë dhe të besueshëm”, shkruan Basha.

Ai bëri të ditur se, Partia Demokratike po bashkëpunon ngushtësisht me kristiandemokratët e Kancelares Angela Merkel për hartimin e alternativës së saj; programin qeverisës të demokratëve për zgjedhjet e ardhshme parlamentare. “CDU, po na jep ekspertizën e saj për ofertën tonë të zhvillimit të vendit dhe kthimit të shpresës qytetarëve tanë që të ndërtojnë të ardhmen në Shqipëri dhe jo të shohin si shpresë emigrimin”, përfundon postimin Basha.

ZGJIDHJA ËSHTË JASHTË KUVENDIT

October 2, 2015 by dgreca

Nga Jakup Krasniqi/

Nëse Bisedimet e Brukselit kanë qenë politike, nëse atje është folur për çështjet e brendshme të Kosovës, me një palë jashtë Kosovës, në rastin tonë me Serbinë, atëherë pjesë e bisedimeve është dashur të jetë domosdo edhe opozita në mënyrë që opinioni të ishte i informuar më kohë. Nuk ka asnjë dyshim, bisedimet e zhvilluara në mes qeverisë së Serbisë dhe të Kosovës me ndërmjetësimin e BE-së të zhvilluara në Bruksel, nuk kanë qenë të përgatitura, nuk kanë qenë transparente, nuk janë brenda Dokumentit te Presidentit Ahtisari, janë tepër të dëmshme për funksionimin e shtetit të Kosovës, krijojnë një Bashkësi etnike politike e cila është në kundërshtim flagrant me përmbajtjen dhe frymën e përfundimeve te Konferencës se Vjenës të përmbledhura në Dokumentin Gjithëpërfshirës për Zgjedhjen e Statusit Politik të Kosovës. Të gjitha këto janë dëshmi se Kryeministri i Kosovës që i ka nënshkruar këto marrëveshje, ai ka qenë jashtë mandatit të tij kushtetues, mbase edhe politik. Pasi është jashtë mandatit të tij kushtetues, ai duhet ta dorëzoj mandatin për t’ju hapur udhë zgjedhjeve të parakohshme. Ndoshta ka pasur mundësi t’i ikej zgjedhjeve të parakohshme sikur të kishim Ligjin për Referendumin, ku qytetarët e Kosovës ta shprehnin mendimin e tyre për këto marrëveshje.

Ne një situatë të tillë, zgjidhja e problemit të krijuar pas nënshkrimit të marrëveshjeve, duhet kërkuar jashtë Kuvendit, ne një marrëveshje të liderëve politik të pozitës e të opozitës, të cilët duhet ta gjejnë daljen nga ky ngërç politik. Zgjedhja ndoshta duhet kërkuar në krijimin e një qeverie teknike e cila në një periudhë prej gjashtë muajve duhet të krijonte një ambient të përshtatshëm për mbajtjen e zgjedhjeve të lira, të fshehta, të rregullta e demokratike. Zgjedhje të cilat duheshin ta garantonin në plotëni vullnetin e qytetarëve të Kosovës të shprehur në kutitë e votimit. Ndërsa për marrëveshjet e arritura më 25 gusht 2015 duhet të shpallet një moratorium deri në krijimin e institucioneve që do të dalin nga zgjedhjet e reja. Këto zgjedhje do të kishin dy funksione, përveç zgjedhjeve për Kuvendin e Kosovës do të ishin edhe një lloj Referendumi qytetarëve për marrëveshjet e arritura më 25 gusht 2015. Nëse qytetarët ua dhënë besimin, këtyre që i kanë nënshkruar këto marrëveshje të dëmshme për Kosovën, le ti vazhdojnë. Opozita e bashkuar, sigurisht që nuk do të luftoj kundër vullnetit të shumicës qytetare.

Është e qartë se nga ky ngërç apo nga kjo krizë politike nuk mund të dilet me kryeneçësi politike, por dalja duhet të gjendet në urtinë politike. Po kjo kërkon pjekurinë dhe vullnetin e partive të koalicionit qeverisës, pasi këto institucione që nga fillimi i kanë përcjellë dobësi të shumta, dobësi që po reflektojnë më të madhe edhe në formën e qeverisjes. Natyrisht që për ketë zgjidhje duhet të deklarohet dhe të ndihmojnë partnerët e perëndimit si SHBA-të e BE-ja, të cilët e kishin një rol edhe në krijimin e këtij koalicioni jo parimor. Ky koalicion qeverisës me urtësi politike duhet ta shkurtoj qeverisjen e keqe për ti dhënë udhë zgjedhjeve të parakohshme dhe përfundimin e kësaj krize.