Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

“HYLLI I DRITËS” DHUNOHET NGA “YLLI KUQ I REALIZMIT SOCIALIST”

by

Nga Fritz RADOVANI/1 Hylli i drites Fishta

YJET  E  POPULLIT  SHQIPTAR  QË  NUK  FIKEN  KURRMA !/

1911 Rropatej në tabutin e vdekjes gjithë ajo perandori Otomane, e nuk ishte e zonja me marrë as më dhanë kjoftë as amanetet e fundit nder kështjellat e robnueme persa e sa shekuj që vetem, një copë hanë e cungueme tundej nder hunjë ku nguleshin njerzit…

Edhe dielli dukej si i marrun nga pluhuni i kuajve që vraponin drejt ranës së Arabisë.

Shndriste Maja e Bratilës nga bryma e freskët e Prillit, ku Dedë Gjo’ Luli i Hotit kishte ngulë shtizen e latueme me duert e veta dhe, po priste At Mati Prennushin dhe At Buon Gjeçaj me shpalosë nga gjokset e Tyne Flamurin e Gjergj Kastriotit, që per gat 500 vjet turqit e kishin ngjyrosë me gjakun e paster të Martirëve të Atdheut dhe të Fesë… Ishin bash Ata Françeskanë që të zbathun gjindeshin nder shpella e shtigje me Kryq e penë, per me ruejtë nder zemra të Malsorëve trima “Besen, Burrninë e Bujarinë Shqiptare”!

1913 Solli mbi muret e Rozafës një dritë që shndriste, po ma fort vetonte e shkrepte e që, mbarë Shkodra nen gjylet e malazezëve vrapoi tue këndue Hymnin e Flamurit… Po, ishte Flamuri i Gjergj Kastriotit që shndriste nga Ai “Hyll’ i Dritës”, që vetë At Gjergji i Fishtës kishte ravizue me shkronjat e Alfabetit të vet një brilant mbi qiellin e Shkodres. Një brilant që nuk thehej as thermohej, nuk shkyhej as shkrryhej, nuk digjej as fikej po, vezullonte bash si dikur gurt e thepisun në Perkrenaren e Gjergjit të Pavdekshem…

E nga balkoni i kompanjelit u ndigjue një za: “Flamuri i Shqipnisë e ka per nder me u gjuejtë me topa…!” Europa veshtroi e heshti… Harroi se Flamuri në kompanjel ishte vue në unazen e vet nga duertë e Fratit të zbathun që Bjeshkët e Nêmuna pat çue peshë dhe, atë turk të pashpirtë që e ngulte nder hunjë e pat ba naten me ikë me ujq’ e zagar.

Ishte ajo ditë kur qyqet e kulumrijat vajtonin mbi shtizat e zbrituna pergjysë nder ata seli të sulltanëve të Stambollit, ku mrrutat e zeshkta nga tymi marramendës i largonin të keq sulltanëve vrastar e katila të shtrimë si shtazët e egra të hapun shalësh nder shilte.

“Hylli i Dritës” vezullonte edhe kur gjylet binin mbi kompanjelin e Kishës së Madhe!

“HYLLI I DRITËS”… Thërriste: “Perpara Burra, o gjallë o dekë per Atdhé e Fé!”…

E Burrat flut’ronin si orla mbi kokat e ushtrisë anmike! “Pasha Zotin iken turqit!..”

Per Ata që e bane me ikë, e bash prej Atyne Burrave me çakçirë e zhgun, po punohet me i harrue tue fillue prej Trimit të pathyeshem të Traboinit, “DED GJO’ LULIT, që me ata dy sy zhgabë që i vezullojshin prej gëzimi, e buzëngërthye nën ata mustakë të bardhë si biluri, me kësulë mbi një sy si bora e Majes së Bratilës, i mbërthyem ndër armët e të Parëve, në atë brez të punuem prej lokes qysh se rrezja e diellit kishte shkrepë ndër ato maje, me ata çakçirë nën të artin xhamadan ku rrahte ORA E SHQIPNISË, aty, po, ishte zëmreku i kombit ku gufonte gjaku i shkuem rrëkajë i Fatosave; aty po, ishte ajo e forta zemër që me duer prej bronxi, ngjiti në atë shtizë të latueme në shekuj atë cohë KUQ E ZI, të qëndisun nga duert e bijave të Rozafës, po, në atë shkam ku asht daltue amaneti i Gjergjit, që për pesë shekuj priti: Agimin e LIRISË…

Po, po, bash AI Burrë, që sot nuk ka as vorr!.. Gati askush nuk e di të vertetën se në qelën e At Matisë, në Gerçë, shkon Imzot Lazër Mjedja dhe organizojnë takimin historik ku përpilohet një dokument i randësishëm: “Memorandumi i Gerçës”, më 23 qershor 1911, që i prinë ngjarjës së madhe të Pavarësisë Kombtare në Vlonë, më 28 nandor 1912. Ky Memorandum u shkrue në gjuhën frenge nga dora e atdhetarit Luigj Gurakuqi dhe u përpilue nga Imzot Lazër Mjedja, Luigj Gurakuqi, At Mati Prennushi, At Buon Gjeçaj, dhe asht nenshkrue nga: Sokol Baci i Grudës, Ded Gjon Luli i Traboinit të Hotit, Dedë Nika Bajraktar i Grudës; Dodë Preçi Bajraktar i Kastratit; Tomë Nika i Shkrelit, Col Dedi i Selcës Këlmendit; Lul Rrapuka i Vuklit të Këlmendit; Llesh Gjergji, Bajraktar i Nikçit; Gjeto Marku i Hotit; Mehmet Shpendi, i pari i Djelmënisë së Shalës; Martin Preka i Shkrelit; Prelë Marku, Bajraktari i Shalës, Avdi Kola Bajraktar i Gimaj, Nik Mëhilli i Shllakut, Pup Çuni Prekalor, Binak Lulashi Toplanas; Bash Bajrami Bajraktar i Nikajve dhe Bec Delia. (Marrë nga libri “Dedë Gjo’ Luli”, autor F.R., 2011)

Porsa “Hylli i Dritës” publikoi këto ngjarje dhe vendimin e “Konferencës së Londres së 1913”, ku “kurva plakë coptoi Tokat Shqiptare nder sllavë…”, revista u mbyllë në 1914!

Rihapja e revistës “Hylli i Dritës” me kambnguljen e At Gjergj Fishtës në 1914, nga një dëshirë e pathyeshme per një Shqipni të Madhe, u përkrah pahezitim nga Imz. Prend Doçi, Imz. Kaçorri, Imz. Koleci, Don Nikoll Gazulli, At Palë Dodaj, Vllaznit Sirdani, At Shtjefen Gjeçovi, At Anton Harapi, dhe afro 50 intelektual laikë me përgatitje dhe prirje Europjane Perëndimore, tue lanë në këte revistë gjurmët që nuk do të shlyhen kurrma!

Penat e Luigj Gurakuqit, Mustafa Krujës, Lluka Karafilit, Zef Palit, Zef Harapit, Mati Logorecit, Gasper Gurakuqit, Mëhill Sulit, Kristo Floqit, dhe Don Ndoc Nikaj apo Imz. Vinçenc Prennushit, edhe sot shndrisin qiellin e Asaj Shqipni që nuk njeh mort…

Aty nga viti 1933, kur Shqiptarëve filluen me i tregue “përralla me mbret”… ishte një nga “detyrat e para të qeverisë”, mbyllja e Revistes “Hylli i Dritës” dhe, bashkë me te edhe e shkollës Françeskane në Shkoder, per të cilën u desht me shkue në Hagë dhe me marrë “çelsat”. Ja pra, një fakt që tregon se kush ishte mbreti i ardhshëm i Shqipnisë, nipi i “dajës Esad” që kur donte me firmosë dokumenta, prej shkollës së madhe që kishte krye në mejtepin turk, fillonte me firmue arabisht… Vdiq edhe ai pa dijtë me shkrue shqip!   

U rrethue me disa universitarë ateista, per me mbulue fëtyren e vertetë anadollake ashtu si ma vonë, kjo metodë do të aplikohej mbas vitit 1944 nga shovenistët sllavokomunistë me sherbëtorin tiran dhe tradhtar Enver Hoxha, dhe pasuesin e tij anadollak Ramiz Alia.

***

1913 – 1944 “HYLLI I DRITËS” u drejtue nga ajka e kulturës sonë kombtare, tue fillue në 1913 e deri sa vdiq nga At Gjergj Fishta. Mbas Tij drejtues ishte At Anton Harapi deri në vitin 1941, kur drejtimin e mori At Gjon Shllaku, deri në vitin 1944, kur u mbyll per mos me u hapë ma, mbasi të dy drejtuesit e fundit u pushkatuen nga E. Hoxha, tue u zbatue kështu urdhni i qeverisë jugosllave, që kishte në mbikqyrje Tokat Shqiptare të Veriut, e shkatrrimin e kulturës së Tyne. Jugu kontrollohej si sot nga shovenistët grek.

Prof. Namik Ressuli, tek “Shkrimtarët Shqiptarë”, fq. 12 – 13, shkruen: “Shkrimtarët kryesorë të këtyne shkrimëve janë: Buzuku, Budi, Frangu i Bardhë, Bogdani e Kazazi… a) Lënda është gati krejt fetare pse u shkrua me qellim kryesor që të mbajë të gjallë e të forcojë në katholiket e Veriut fenë katholike, e cila nën pushtimin otoman kish nisur të shkatërrohej e të çdukej;.. Padyshim ky prodhim Verior është më i rëndësishmi i prodhimëve të pjesës së parë të leteraturës Shqipe, si nga pikëpamja e sasisë dhe e gjerësisë si dhe nga pikëpamja e lendës dhe e mbrendisë. Këta shkrimtarë të vjetër të Veriut nuk janë vetëm të parët që filluan njëfarë lëvizje kulturore në vendin tonë, nuk janë vetëm të parët që i dhanë Shqipës një alfabet – alfabetin latin – po janë edhe të parët që mendojnë e punojnë për Atdhenë e Gjuhën e tyre, për Shqipën e Shqipërinë.

Madje, nga kjo pikëpamje kombëtare ky prodhim munt të lidhej drejtë për drejtë me atë që erdhi pas Lidhjës së Prizrenit.”

Pra, të gjitha këto vlera të Veriut duheshin shkatrrue e zhdukë me kulm e thëmel…

U punue barbarisht per këte qellim nga viti 1944 e deri sa ra Muri i Berlinit në 1989.

Ishin pikrisht autorët e Realizmit Socialist, që marrshonin me “pushkë e kazem” per me shkatrrue Shqipninë e Gjergj Kastriotit… Dhe, mbasi vune maskat e demokracisë, vazhduen regresin që po vazhdojnë edhe sot në gjurmët e vjetra … Me hajninë e veprave letrare e historike dhe në pershtatje me krimin e organizuem, zhdukjet e kundershtarëve politik, korrupsionin, agjenturen, imoralitetin… etj, simbas porosive të Ramiz Alisë.

***

1990 – 1991 Shkodra ishte Flamurtare e Demokracisë në Shqipninë e robnueme.

Rinia Shqiptare kerkonte me ngulm: “E duem Shqipninë si gjithë Europa”!

Modeli i Flamurit Shqiptar në Burgun e Spaçit, u ba shembull per të gjithë Shqiptarët.

Flamuri Kuq e Zi valvitej i Lirë dhe i padhunuem nga “ylli sllavokomunist” i Titos…

Anadollaku Ramiz Alia porositë “agjentët e sigurimit të shtetit” nën masken e njohun të “Akademisë së Shkencave”, “Lidhjes së Shkrimtarëve dhe Artistëve të RPSSh” dhe të gjithë levat vllavrasëse të PPSh, “me pasë kujdes nga agjenturat e Vatikanit në Shkoder”!

1992 Me 2 Dhjetor Shqipnia kuadrohet Antare e Konferencës Islamike…

1993 “HYLLI I DRITËS” pushtohet nga “Ylli i kuq i Realizmit Socialist”. Dhunohen,

errsohen dhe shtremnohen materialet shkencore, politike, historike, letrare, poetike, didaktike, polemikat e Autorëve të pavdekshem, dhe thesaret tjera të Visareve të Kombit, që janë perla të çmueshme të Kulturës skalitun nder fletët e arta të “Hyllit të Dritës”!

Pikrisht, kjo ngjet nga ata barbar që krenoheshin per shkatrrimin me “pushkë e kazem”, ndonse, në sirtarët e studjove të veta, kishin veprat e Atyne Kolosëve të “Hyllit të Dritës” prej të cilëve plaçkitnin gjithshka ju vinte perdore, tue fillue nga cili të dishroni ju.., që me ua kontrollue xhepat e mbrendshem të kostumeve si “deputetë”, vazhdojnë me ruejtë nder ta edhe sot të zhublosun flamujt sovjetikë, jugosllav, grekë, turq, francez, italian…

E kur flasin per “demokraci” nuk i vjen turp me shkundë edhe flamurin amerikan!

2017:Sot askush nuk di me folë Gegënisht si “kjoftë për atëherë”: “HYLLI I DRITËS”!

Të parët që luftuen At Fishten me “Lahuten e Malcis” sot janë nder fletët e këtij “Hylli”!

Qellimi kryesor i tyne sot asht “pushtimi kulturor dhe shpartallimi i Shtetit Shqiptar”!

Mos studimi i shkrimtarëve të Veriut nder shkollat Shqiptare, mos botimi i veprave me vlera letrare dhe Atdhetare të Veriut dhe, çensura ndaj Gegënishtes në shtypin e ditës, janë vepra antikombtare që ndihmojnë antishqiptarët në SHKOMTARIZIMIN TONË!

Në gjuhen Gegnishte të “Hyllit të Dritës” kjo quhet vazhdimsi Antishqiptare!

Melbourne, Qershor 2017.

 

Otto von Habsburg: Haradinaj është kalorës fisnik

by

1 Haradinaj
 Ambasadori i parë i Repubikës së Kosovës ne Gjermani, Dr. Vilson Mirdita,  gjatë mandatit të tij ne kuader te vizitave personaliteteve të njohura  shkon ne Poeking am Starnberger See per ta vizituar  ne “Villa Austria” pinjollin e   fundit te familjës perandorake austro-hungareze, Otto von Habsburg, i cili njihej si nje përkrahes i madh i pavarësisë së Kosoves. Në një shkrim të  tij, botuar në shtypin e Tiranës  dhe të  Prishtinës,   Mirdita e përshkruan këtë vizitë si njërën ndër takimet më të rëndësishme gjatë mandatit të tij. Ndër të tjera Mirdita shkruante se Dr. Otto von Habsburg „ edhe përkundër dëshirës së  madhe, për shkak të moshës së shtyer  dhe të shëndetit jo të mirë nuk arriti të realizonte dëshirën e  tij për të vizituar  Kosovën e pavarur, me të cilën, veç tjerash, e lidhte   edhe miqësia e madhe me Ibrahim Rugovën.”
 “Pragun e kësaj ville  para Teje e ka kaluar vetëm një politikan shqiptar, Ibrahim Rugova” i thotë ai diplomatit kosovar. Ne bisedë e sipër rreth problemeve për njohjen e shtetit të Kosovës dhe  të ardhmes europiane të saj Otto von Habsburg  thotë se  misionin e Dr. Rugovës për integrimin e   Kosovës ne Europë mund ta vazhdojë  vetem një politikan dhe ai është  Ramush Haradinaj.  Ne atë kohë me kandidatin e sotem për kryeminister të Kosovës ende merrej Tribunali i Hages, mirëpo për  Otto von Habsburg s’kishte asnjë dyshim: ” Herr Haradinaj ist ein Ritter!” (Zoti Haradinaj është kalores!”)- Xhecat Ukshini

Kosovë-Publikohen rezultatet preliminare të Regjistrit të Diasporës

by

-Hapet fushata sensibilizuese e regjistrit elektronik – platforma elektronike, e cila do të jetë aktive  deri në vitin 2021, kur do të publikohen rezultatet përfundimtare të Regjistrit të Diasporës/1 regjistri prishtine

PRISHTINË, 5 Qershor 2017-Gazeta DIELLI/ Në kuadër të projektit “Ti je pjesë e atdheut”,  Ministria e Diasporës do t’i publikojë rezultatet preliminare të Regjistrit tët Diasporës. Procesi i Regjistrit të Diasporës dhe Mërgatës ka  filluar në janar të vitit 2014 në formën elektronike (online) dhe në formën manuale (me pyetësorë). Rezultatet preliminare kanë dalë nga të dhënat  e të regjistruarve aktivë deri më  31.12.2016.Në këtë ngjarje përveç publikimit të rezultateve, do të hapet edhe fushata sensibilizuese e regjistrit elektronik – platforma elektronike , e cila do të jetë aktive  deri në vitin 2021, kur do të publikohen rezultatet përfundimtare të këtij procesi.Publikimi i rezultateve preliminare të Regjistrit të Diasporës do të bëhet më 10 qershor 2017, në orën 14:00, në hotelin “Sirius”, në Prishtinë./b.j/

Kosova, drejtësi zgjedhore në 11 qershor/

1 Prokurorja

-Prokurorja Pula: Do të reagohet menjëherë ndaj atyre që veprojnë kundër të drejtës së votimit/

Gjakovë/Pejë, 5 Qershor 2017 – Gazeta DIELLI/ Koordinatorja Nacionale e Zgjedhjeve, prokurorja Laura Pula, sot ka marrë pjesë në thyezën e organizuar në Gjakovë dhe Pejë nga Instituti Demokraci për Zhvillim (D4D) në partneritet  me Demokracia në Veprim (DNV), me titull: “Drejtësi zgjedhore në zgjedhjet e 11 qershorit”.

Në fjalën e saj të mbajtur para pjesëmarrësve, prokurorja Pula ka thënë Prokurori i Shtetit ka ndërtuar një sistem dhe praktike të mirë, e cila do te avancohet edhe me shumë në zgjedhjet e 11 qershorit, për të krijuar një ambient të sigurt, ku qytetarët do të ndihen të lirë për të zhvilluar procesin e zgjedhjeve. Ajo tha se me qëllim të ngritjes se bashkëpunimit ndërinstitucional, Prokurori i Shtetit ka nënshkruar Memorandum Bashkëpunimi me KQZ-në, PZAP-in, Policin e Kosovës, Këshillin Gjyqësor të Kosovës, ku janë krijuar procedura standarde të veprimit me qëllim të specifikimit të veprimeve të përbashkëta në të gjitha rastet që ndodhin gjatë procesit zgjedhor.

Koordinatorja Pula po ashtu ka thënë se për zgjedhjet e 11 qershorit janë angazhuar 100 prokurorë dhe numër i mjaftueshëm i stafit mbështetës në tërë Republikën e Kosovës dhe së bashku me hetuesit nga Policia e Kosovës do të veprojnë menjëherë në ndalimin e personave të cilët do të veprojnë kundër të drejtës së votimit.

Sipas prokurores Laura Pula, Kodi i Ri Penal parasheh 11 vepra penale kundër të drejtës se votimit, të cilat konsiderohen krime të renda dhe parashihen dënime të ashpra, andaj për të gjithë shkelësit e mundshëm do të merren të gjitha masat e parapara ligjore.

Në fund të fjalës së saj, prokurorja Pula ka ftuar që çdo parregullsi të raportohet tek vëzhguesit, komisionerët, stafi përcjellës i KQZ-së, Policia e Kosovës dhe Prokurori i Shtetit, nga se si njësi mobile do të reagojnë menjëherë, posa të dyshohet së është keqpërdorë e drejta e votës.

***
Kosova angazhime për zgjedhje demokratike/
-Shefi i Misionit Vëzhgues nga BE: Votuesit e Kosovës meritojnë më mirë. Është obligim i akterëve politikë të Kosovës të demonstrojnë se janë të gatshëm të përmbushin standardet demokratike evropiane/
 
PRISHTINË, 5 Qershor 2017-Gazeta DIELLI/ Shefi i Misionit nga BE të Vëzhgimit të Zgjedhjeve të parakohshme parlamentare të 11 qershorit në Kosovë, Alojz Peterle, sot, lëshoi këtë deklaratë:
 “Gjatë vizitës time të fundit në Kosovë, jam takuar me një gamë të gjerë të bashkëbiseduesve, të cilët mirëpritën punën e Misionit të Vëzhgimit të Zgjedhjeve nga Bashkimi Evropian dhe shprehën angazhimin e tyre për zgjedhje demokratike. Gjithashtu kam bërë thirrje për të gjitha palët pjesëmarrëse të shfrytëzojnë mundësinë që në zgjedhjet e 11 qershorit të tregojnë pjekuri demokratike. Dua të jem absolutisht i qartë se çfarë do të thotë kjo.
 Çdo frikësim i kandidatëve dhe familjeve të tyre është i papranueshëm. E drejta e të qenit kandidat dhe mundësia e të bërit fushatë në mënyrë të lirë janë parakushtet absolute të zgjedhjeve demokratike. Të gjithë akterët politikë duhte të demonstrojnë përkushtimin e tyre ndaj principeve demokratike duke refuzuar fuqimisht të gjitha format e frikësimit, dhunës dhe presionit. Gjithashtu u bëj thirrje policisë dhe prokurorëve që të hetojnë incidentet e tilla në mënyrë të menjëherëshme dhe rigoroze.
 Policia, autoritetet dhe udhëheqësit politikë duhet të sigurojnë që votuesit dhe kandidatët të mund të ushtrojnë të drejtën e tyre demokratike pa dhunë.
 Media ka rol thelbësor në nxitjen e debatit publik në alternativat e ndryshme politike. Përpjekjet e raportuara të partive politike të ndërhyjnë dhe imponojnë kushte në qasje te debatet zgjedhore, gjë që është në dëm të elektoratit, janë duke rezultuar në vështirësi për mediat në organizim të debateve të drejta dhe gjithëpërfshirëse në përputhje me ligjin.
 Nuk është shumë vonë të ndryshojmë këto trende negative të cilat rrezikojnë njollosjen e gjithë procesit zgjedhor. Votuesit e Kosovës meritojnë më mirë. Është obligim i akterëve politikë të Kosovës të demonstrojnë se janë të gatshëm të përmbushin standardet demokratike evropiane. Kjo është çështje e përgjegjësisë kolektive. Udhëheqësit e partive politike të Kosovës duhet t’i përgjigjen kësaj sfide”, përfundoi deklaratën Shefi i Misionit të Vëzhgimit të Zgjedhjeve nga Bashkimi Evropian.Misioni i Vëzhgimit të Zgjedhjeve nga BE, që ka vëzhgues afatgjatë duke mbuluar 38 komuna në Kosovë, do të vazhdojë të përcjellë të gjitha aspektet e procesit zgjedhor, duke i kushtuar vëmendje të veçantë këtyre çështjeve./b.j/

Edhe në politikë duhet t’i lihet vend të rinjve si dhe të kujtoheni për Diasporen

by

Nga Lek Gjoka/Florida/

 Zhurmë e madhe dhe akuza ndaj kreut të Partisë Demokratike të Shqipërisë zotit Basha ka përfshirë sot kampin demokrak.

Disa lidër të kësaj Partie kritike të kryetarit aktual që kur PD-ja ishte në  çadër janë lënë jashtë listës se deputetëve në votimet e Qërshorit janë hedhur në një sulm jo ndaj liderit socialist Rama që e kanë për detyrë si anëtar të forumeve drejtuese por në mënyrë të pakuptimtë ndaj vete Partisë së tyrë.

Madje me paturpësi dalin në një konferencë shtypi ku shpalosin platformën e tyrë për largimin e kryetarit Basha. Sigurisht jam dakord që gjithë antarët e partive politike mund të kenë një mendim ndryshe nga  kryetari por në një situatë të tillë kur i gjithë bota demokratike u shqetësua për mos marrjen pjese të demokratëve në zgjedhjet e ardhshme janë të pakuptimta deklaratat e Topallit, Imamit, Patosit, Bode, etj që t’i fryjnë zjarrit të përplasjes në kampin demokrat.

Në qoftë se Basha ka bërë gabime nuk është fundi i botës se disa ish depute nuk do të marrin me të mirat  materiale që i afrohen nga të qenurit deputet (që në fakt një pjese prej tyre janë të përlyer në oferta korruptive) por të luftojnë me mish e me shpirte që Partia e tyrë të fitoje sa më shumë deputete dhe të iu marrë nga duart qeverisjen socialistëve. Partitë politike në Shqipëri duhet t’ju japin deren edhe rinisë . Madje duhët t’i hedhin sytë edhe tek diaspora shqiptare në Evropë dhe Amerikë.

Si nuk u kujtua kurrë zonja Topalli si kryetare parlamenti  së qindra mijëra shqiptarë kanë braktisur e po braktisin Shqipërinë për faj të politikave korruptive të qeverisjes plot korrupsion të politikanëve shqiptarë nuk duan t’a harrojnë vendin nga kanë ardhur, të drejtat për të votuar si qytetar i Shqipërisë apo kur  për vete, familjen dhe klanin tënd e ke në rregull çdo gjë nuk ke pse të shqetësoheni për “turmën” popull. Tani që t’u preken interesat përsonale deklaron në mënyrë të paturpshme se vdiq Partia Demokratike e 91-isht. Jo asnjë Parti nuk vdes as kur lideri zevendesohët por kështu po ju lehtësoni fitoren kampit të majtë dhe për ketë nuk është faji as i popullit që nuk do t’i votojë, as faji i Bashës se nuk caktoi juve në listën e deputeteve por faji i ju të gjithëve që nuk luftoni për të mirën popullit, dhe të Partisë suaj por thjeshtë për interesa personale dhe klanore.

Uroj që keto zgjedhje të jenë zgjedhjet e fundit pa pjesmarrjen e diasporës shqiptare. Megjithëse kryeministri socialist Rama ka deklaruar publikisht se keto do të jenë zgjedhjet e fundit pa diasporën  por dukë parë që në çdo fushatë zgjedhore thuhen premtime n’tym  dëshiroj që në katër vitet e ardhshme pozita dhe opozita t’i kthejnë sytë nga diaspora jo vetëm për të mirat materiale që dërgojnë në Atdhe por t’a përfshijnë në qeverisje (krijimin e ministrisë së Diasporës), zhvillimin e kombit shqiptar dhe antarësimin e trojeve shqiptare në Bashkimin Evropian.

 Jacksonville Florida

Maj 20117

DR. NASER RUGOVA, KANDIDATI PER DEPUTET ME VIZION PERENDIMOR, QË I DUHET KOSOVËS

by

Mesazh për bashkatdhetarët në  Kosovë për zgjedhjet e 11 Qershorit!/

1 Naser

NGA AGIM REXHAJ/NJU JORK/USA/

Të nderuar miq,

Bashkëkombas dhe bashkëveprimtar,

Zonja dhe zotërinj,

Zgjedhjet e parakohshme parlamentare të 11 qeshorit në Kosovë janë një moment i rëndësishëm për shtetin dhe popullin e Kosovës.

Ne si komunitet shqiptar në SHBA presim shumë nga ky proces zgjedhor, si veprimtarë shumëvjecar dhe si një nga bashkpunëtorët e Presidentit Historik Dr. Ibrahim Rugova, si udhëheqës shumëvjecar i LDK-së në SHBA dhe si nënkryetar i “Vatrës” jam i lumtur që LDK-ja si parti e parë demokratike në trojet shqiptare ka filluar reforma substanciale, freskime dhe ka kandiduar në listën e kandidatëve për deputetë njerëz integritet dhe me virtyte të larta intelektuale dhe kombëtare.  Ndjej obligim që të ju drejtohem miqëve të mij, bashkëveprimtarëve, bashkatdhetarëve të mij në Republikën e Kosovës që fuqishëm ta përkrahin Lidhjen Demokratike të Kosovës dhe posacërisht Dr. Naser Rugovën si kandidat për deputet, një veprimtar, intelektual dhe vizionar i përmasave evropiane. Janë njëmijë e një arsye që ta mbështesim fuqishëm Dr. Naser Rugovën:

Intelektual kalibri, parimor dhe i qëndrueshëm, karizmatik, i guximshëm dhe i pakompromis me të padrejtën, atdhetar dhe burrë urtak sikurse edhe trungu i tij familjar që me shekuj dha atdhetar të shquar. Bashkëpuntor i ngushtë i Presidentit Rugova, ish këshilltar i Kryeministrit, deputet i legjistraturës së pavarësisë, diplomat i lindur, i pastër si loti, i respektuar nga populli, Brukseli e Uashingtoni. Kam pasur nderin dhe kënaqesinë e vecantë të punoj me Dr. Naser Rugovën, në Nju Jork dhe Uashington, në vizita të ndryshme zyrtare dhe debate akademike gjithandej në SHBA, dhe mund të konstatoj me admirim se Dr. Rugova në mënyrë ekselente ka përfaqësuar ngjyrat shtetërore dhe nacionale, me dhjetëra herë na ka bërë krenar të gjithë shqiptareve në SHBA. Ishte ndër veprimtarët e rrallë që na nderoj në maksimum, na priti e përcolli me nderime e respekt maksimal në Kosovë dhe gjithmonë ishte me neve dhe na nderoj me vizita në SHBA. Prandaj në emër të shumë bashkëveprimtarëve të mij në SHBA, me kërkesën e qindra veprimtarëve të shquar të mërgatës, ju bëjë apel të gjithë miqëve, bashkëveprimtarëve, bashkëmendimtarëve dhe antarësisë së gjërë të së djathtës me orientim nacional në Kosovë që fuqishëm ta votojnë Lidhjen Demokratike të Kosovës  me nr.16 dhe Dr. Naser Rugovën me nr.88.

Zoti e bekoftë Republikën e Kosovës dhe miqtë e saj,

Zoti e bekoftë kombin shqiptar,

Sinqerisht,

Agim Rexhaj, Nju Jork, 31 Maj 2017