Komente – Page 188 – Dielli

Modeli i Monika Kryemadhit nuk është shembull për rininë shqiptare

June 15, 2017 by dgreca

Nga Elida Buçpapaj/

E dëgjova me vemendje Monika Kryemadhin sot tek Koha për t’u zgjuar.Akuzoi për tirani produktin që doli nga marrëveshja e 18 prillit;denoncoi ferrin që jetojnë qytetarët në zonën e Elbasanit ku është në kryelistë;përgëzoi zërin e fortë të bashkëshortit Ilir Meta në fushatë, pa marrë parasysh se ka shkelur Kushtetutën, sepse president i Republikës është mbi palët dhe institucioni që përfaqëson shpreh unitetin kombëtar.

Kryemadhi i bëri thirrje rinisë të votoi partinë e saj.Në fakt modeli që ofron Monika është në antitezë të plotë me modelin që duhet të ketë rinia shqiptare.Monika Kryemadhi ka 26 vjet në politikë. E ka filluar karierēn me forumin e rinisë socialiste dhe tani është de facto nr.1 i LSI pas marrjes të presidencës nga bashkëshorti i saj.

Monika Kryemadhi nuk ka punuar deri tani asnjë orë punë në jetën e saj. Edhe Ilir Meta po ashtu.Janë 26 vjet politikanë profesionistë që gjithë të ardhurat dhe pasurinë e kanë nga taksat e popullit.

Monika Kryemadhi dhe Ilir Meta janë pjesë e kupolës së klasës politike, pikërisht e asaj klase që Monika Kryemadhi denonconte sot tek emisioni i Bashkim Hoxhës.Për tmerrin, mjerimin dhe varfërinë në Elbasan për të cilin akuzonte Edi Ramën, Monika do të duhej të akuzonte edhe vetveten, Ilir Metën ose bashkëqeverisjet politike 8 vjeçare të LSI, një herë me PD, një herë me PS.

Tiraninë e ka krijuar kupola, kupola ka uzurpuar pushtetin, ku çifti Meta-Kryemadhi është pjesë e saj. Të dy e kanë kthyer LSI në pronësi private që vjel përfitime dhe pushtet për vete dhe enturazhin. LSI është pjesë e keqqeversjes, është një nga shkaktarët e mjerimit të popullit shqiptar.

Populli shqiptar nuk mund ta besojë Monikën sepse arritjet e saj, pasuria e saj janë në përpjestim të zhdrejtë me mirëqenien e popullit. Sa më tepër pasurohet familja Meta-Kryemadhi aq më tepër varfërohet populli. Populli s’ka mirëqenie. Populli ka varfëri.

Monika Kryemadhi ishte e vërtetë vetëm kur tregoi për ferrin që jeton zona e Elbasanit, por si Elbasani është e gjithë Shqipëria, e bashkëqeverisur edhe nga familja Meta-Kryemadhi ose LSI-ja e tyre.

Edhe tirania është produkt i kësaj bashkëqeverisje. PS, LSI,PD. Edhe posti i presidentit gjithashtu. Edhe kreu i LSI.

Në Shqipëri ka uzurpim të pushtetit nga kupola, ku çifti Meta-Kryemadhi, kanë dy copa torte, nëse krahasojmë me krerët e tjerë të partive kryesore.

Prandaj them se modeli që ofron Monika Kryemadhi është ai se si nuk duhet të jetë politikani që për 26 vjet shpërdori pushtetin, ndërsa popullin e la si në zonën e Elbasanit, ku mjerimi dhe skamia është ngritur në piedestal.

Këtë gjendje ferri e dëshmoi vetë Monika me gojën e saj.

Kjo ishte e vetmja e vërtetë që tha, por fajtor bëri Edi Ramën, kur si bashkëfajtor duhej të shpallte bashkëshortin e saj dhe vetë Monika Kryemadhin.

Një demokrat(i vetëm) tek socialistët

June 13, 2017 by dgreca

Nga Ilir Levonja/Florida/

festa-14-696x508

ne Foto: Mjeku Halim Kosova, Kandidati per deputet i Demokrateve, ne oborrin e socialisteve/

Nuk e di pse në 26 vjetorin e PS-së mori pjesë vetëm një demokrat. Dhe ky më liberali. Ose më normali midis demokratëve. Mjeku Halim Kosova. Dhe e ka mire kur thotë që, më shumë njoh brenda PS-së se PD-së. Sot PS-ja është një batalion njerëzish me xhaketa të kthyera. Kuadro nga teserat e bashkimeve profesionale, borizanët e propogandës, heronjtë e punës socialiste etj. Ose ekonomisë së përbashkët, ndërrmarrjeve që përfunduan në skrap. Aq sa sot e dëshmon përshembull pamja e atyre vagonave të lodhur të trenave. Që po i shesin lësëistat për qejf të tyre. Shkurt një Smt-ë e braktisur. Që fal një inati pervers karshi Berishës. Mban këmbë e duar lidhur një klasë të re nga etërit dhe militantët e vjetër. Kjo quhet rilindje. Për ata që nuk e dine, se çfarë janë xhaketat e kthyera, pasi tani rrobat janë me shumicë nga gabi deri tek sallonet firmato. Dhe të merresh me kthimin e një pale panatallonave përshembull, është çmënderui etj. Perversitet. Kush po pyet më për rroba.
Xhaketat e kthyera, një metode e djeshme. Pasi i dilte boja teritalit nga përdorimi i gjatë.. Të zinjtë baballarët tanë, punëtorët. Shkonin tek mjeshtrat e gjilpërës dhe hekurit, rrobaqepësit. Dhe ata i shqepnin me kujdes, e i qepnin prapë Se sa i vente kostoja një xhakete, kjo nuk kishte asnjë rëndësi përballë betimit të na rrojë partia. Shkurt i kthenin faqen teritalit. Mallit të lakmuar në socializëm. Çfarë të bënin.
Një pjesë e këtyre xhaketave të kthyera, janë me shumicë sot tek PD-ja. Mirëpo për të na mbushur mendjen se janë me të vërtetë demokratë. Bëjnë karshillëk nga distanca. Madje postojnë statute kundër PS-së. Historisë së saj. Dhe një e më dy përmendin faktin se si kjo parti është pjellë e partisë së punës. Një strategji kjo, kaq efikase sa të bën t’i bjesh murit me kokë. Pasi jemi me shumicë të konsiderueshme si popull që e hamë sapunin për djath. Kaq bukur na driblojnë me top e pa top, sa edhe na dhimbset Halimi i vetëm aty. Edhe na habit. Edhe na vjen për ta përshëndetur, edhe për të qarë. Pasi na është krijuar përshtypja se, një socialist a një demokrat në oborrin e shoqi, shoqit. I ngjan sikur pranisë së një arabi në oborrin e një çifuti dhe anasjelltas. Dhe se kemi për gjë të pyesim, ore vëlla, a hahet buka e socialistit? A hahet buka e demokratit? Vërtetë kush e ka provuar?
Po dashuri (me që jam mashkull) a bëhet me një socialiste?
Shkurt edhe na ha, edhe na kërruhet.
Po nuk kemi se si ja bëjmë. Se na i kanë futur thellë tashmë. Na kanë infektuar qerratenjtë.
Demokrati i vërtetë shkon në festë, e, i uron socialistët. Dhe fal Zotit është mjek. I ndimoftë. Kurse demokratët socialkomunistë. Buçkot, bëjnë statute me gjak, me zi, me krime. Triumfatorë që na i kanë futur sa krahu. Ta mbajmë me shëndet.

Kurti thërret bisedime për krijimin e qeverisë së re

June 13, 2017 by dgreca

Kosovë-Kurti thërret bisedime për krijimin e qeverisë së re të drejtuar nga Vetëvendosje/

“Si kandidati për Kryeministër, me legjitimitetin më të qëndrueshëm të fituar prej votës së qytetarëve, do të ndërmarrë të gjitha masat e nevojshme për të nisur e drejtuar bisedimet me subjektet e tjera politike në kuadër të krijimit të qeverisë së re të Kosovës, që do të hiqte regjimin e vjetër nga pushteti, me drejtësi e pa hakmarrje do ta çlironte shtetin, dhe do t’i hapte rrugën zhvillimit ekonomik të vendit”, theksoi Albin Kurti./

PRISHTINË, 13 Qershor 2017-Gazeta DIELLI/ Kandidati për kryeministër, Albin Kurti, thërret bisedime për krijimin e qeverisë së re të drejtuar nga Vetëvendosje.

“Zgjedhja e re qytetare tash duhet të bëhet qeveri e re progresive që zgjidh problemet e vendit tonë. Nëpërmjet 40 Prioriteteve të Republikës dhe marrëdhënies së afërt me popullin, me votën e tyre, qytetarët e vendit jo vetëm kanë afirmuar Lëvizjen Vetëvendosje si partinë më të madhe politike në Kosovë, si partinë e parë në Republikë, por edhe kanë krijuar një situatë krejtësisht të re politike”, deklaroi Kurti në konferencën e sotme për shtyp.Tutje ai tha se Lëvizja Vetëvendosje, si askush tjetër në këto zgjedhje, ka fituar një legjitimitet të madh e të fuqishëm nga qytetarët e Republikës së Kosovës, ndërsa dy koalicionet përballë tha se kanë pësuar humbje të thella.

“Në këto kushte plotësisht të reja politike, dhe bazuar mbi përkrahjen e madhe qytetare, ne deklarojmë se jemi të gatshëm për të ndërmarrë të gjitha përgatitjet e nevojshme për ndërtimin e një qeverie të re të vendit të drejtuar nga Lëvizja Vetëvendosje. Qytetarët kanë votuar për ndryshim, dhe ne e kemi dëgjuar mirë e qartë zërin e tyre. Prandaj, e kemi obligimin që të japim maksimumin tonë për ta çuar përpara vullnetin e tyre”, shtoi Kurti.Ai ka ftuar të gjitha subjektet politike të koalicionit LDK-AKR-Alternativa si dhe të gjithë ata deputetë të koalicionit PDK-AAK-Nisma që janë “kundër vazhdimit të regjimit të vjetër, pra kundër pushtetit të Klanit Pronto, që të na bashkohen në tryezë për të diskutuar mbi situatën e re politike të vendit pas këtyre zgjedhjeve si dhe për programin politik të një qeverie të re të drejtuar nga Lëvizja Vetëvendosje”.

“Lëvizja Vetëvendosje ka marrë një mandat të qartë dhe të fuqishëm prej qytetarëve për të sjell ndryshimin në qeverisje. Si kandidati për Kryeministër, me legjitimitetin më të qëndrueshëm të fituar prej votës së qytetarëve, do të ndërmarrë të gjitha masat e nevojshme për të nisur e drejtuar bisedimet me subjektet e tjera politike në kuadër të krijimit të qeverisë së re të Kosovës, që do të hiqte regjimin e vjetër nga pushteti, me drejtësi e pa hakmarrje do ta çlironte shtetin, dhe do t’i hapte rrugën zhvillimit ekonomik të vendit”, theksoi ai.Në fund, Albun Kurti iu ka bërë thirrje gjitha partive të tjera dhe deputetëve që janë të përcaktuar për t’i sjell vendit ndryshimin, që të bashkohen në këto bisedime për përgatitjet për ndërtimin e një qeverie te re të Republikës së Kosovës.Në zgjedhjet e parakohshme parlametare të së dieles së 11 qershorit në Kosovë, sipas rezultateve preliminare të 99,88% të vendvotimeve të procesuara deri sot në mëngjes nga KQZ, koalicioni i 13 partive shqiptare – Partisë Demokratike të Kosovës, Aleancës për Ardhmërinë e Kosovës, Nismës për Kosovën dhe 10 të tjerave ka 33,98% të votave, Lëvizja Vetëvendosje që garoi e vetme ka 27,12%, ndërsa koalicioni i Lidhjes Demokratike të Kosovës dhe Aleancës Kosova e Re, ku në listë përfshiheshin edhe kandidatët për deputë të subjektit politik më të riut drejt regjistrimit si parti – Alternativa e të Lëvizjes për Drejtësi ka 25,74% të votave. /b.j/

Paralele liderësh mes Shqipërisë e Kosovës

June 13, 2017 by dgreca

Nga Ilir Levonja/Florida/

Fotot e mëposhtme janë ato të liderit të Vetvendosjes në Kosovë, Albin Kurtit. Ai që si askush tjetër ka qënë mall i pare për drejtësinë. Por asnjëherë për çështje korrupsioni. Thjesht e pastër, për të drejtat legjitime të shqiptarëve të Kosovës.
Madje është i vetmi që nuk njeh asnjë flamur tjetër veç atij kuq e zi. I vetmi ndër shqiptarët e Kosovës e të Shqipërisë që flet për bashkimin kombëtar. Si me thënë, na lini të vendosim. Na lini të bëjmë shtet. E ka burgosur Serbia, policia e UNMIK, EULEX a KFOR etj. Madje ka tentuar edhe qeveritë shqiptare aty. Për shkak të rrugëve radikale si bombat tymëse në kuvendin e Kosovës. Njëriu që ka kundërshtuar gjithmonë negociatat me serbët, madje i quan ato të tejkaluara përderisa Kosova është shtet i pavaruar. Duke iu kundërvënë kështu edhe vet Europës. Kujdestares së Kosovës.
Vetvendosja u themelua në 2004. Por u shëndërrua në parti politike në 2010. Dhe ky njeri bëri atë që nuk e imagjinon mendja e politikës. Shiti shtëpinë e vet dhe financoi fushatën elektorale. Nuk e di nëse në atdheun mëmë apo dhe Kosovë, e ka bërë tjetër kush? Dhe nuk e di nëse do e bëj ndonjë në të ardhmen. Ndofta është kjo arsyeja që në zgjedhjet e djeshme, Vetvendosja doli si parti e parë.
Në fund të fundit, Albini dhe shqiptarët e Kosovës, shkundën vendit partitë tradicionale. LDK-ja dhe PDK-ja kanë vetëm emrat. Kur e bën shqiptarët e Kosovës me pak vite shtet, me klasë politike motake. Nuk e di se çfarë i mbetet Shqipërisë amë. Me klasë dhjami të stazhionuar. Na i thoni…
Dhe nuk e di, a njihni ndonjë lider të tillë në Shqipëri. Ndonjë që të shesi shtëpinë. Na i thoni, mos të mbesim injorantë.

“HYLLI I DRITËS” DHUNOHET NGA “YLLI KUQ I REALIZMIT SOCIALIST”

June 10, 2017 by dgreca

Nga Fritz RADOVANI/

YJET E POPULLIT SHQIPTAR QË NUK FIKEN KURRMA !/

1911 Rropatej në tabutin e vdekjes gjithë ajo perandori Otomane, e nuk ishte e zonja me marrë as më dhanë kjoftë as amanetet e fundit nder kështjellat e robnueme persa e sa shekuj që vetem, një copë hanë e cungueme tundej nder hunjë ku nguleshin njerzit…

Edhe dielli dukej si i marrun nga pluhuni i kuajve që vraponin drejt ranës së Arabisë.

Shndriste Maja e Bratilës nga bryma e freskët e Prillit, ku Dedë Gjo’ Luli i Hotit kishte ngulë shtizen e latueme me duert e veta dhe, po priste At Mati Prennushin dhe At Buon Gjeçaj me shpalosë nga gjokset e Tyne Flamurin e Gjergj Kastriotit, që per gat 500 vjet turqit e kishin ngjyrosë me gjakun e paster të Martirëve të Atdheut dhe të Fesë… Ishin bash Ata Françeskanë që të zbathun gjindeshin nder shpella e shtigje me Kryq e penë, per me ruejtë nder zemra të Malsorëve trima “Besen, Burrninë e Bujarinë Shqiptare”!

1913 Solli mbi muret e Rozafës një dritë që shndriste, po ma fort vetonte e shkrepte e që, mbarë Shkodra nen gjylet e malazezëve vrapoi tue këndue Hymnin e Flamurit… Po, ishte Flamuri i Gjergj Kastriotit që shndriste nga Ai “Hyll’ i Dritës”, që vetë At Gjergji i Fishtës kishte ravizue me shkronjat e Alfabetit të vet një brilant mbi qiellin e Shkodres. Një brilant që nuk thehej as thermohej, nuk shkyhej as shkrryhej, nuk digjej as fikej po, vezullonte bash si dikur gurt e thepisun në Perkrenaren e Gjergjit të Pavdekshem…

E nga balkoni i kompanjelit u ndigjue një za: “Flamuri i Shqipnisë e ka per nder me u gjuejtë me topa…!” Europa veshtroi e heshti… Harroi se Flamuri në kompanjel ishte vue në unazen e vet nga duertë e Fratit të zbathun që Bjeshkët e Nêmuna pat çue peshë dhe, atë turk të pashpirtë që e ngulte nder hunjë e pat ba naten me ikë me ujq’ e zagar.

Ishte ajo ditë kur qyqet e kulumrijat vajtonin mbi shtizat e zbrituna pergjysë nder ata seli të sulltanëve të Stambollit, ku mrrutat e zeshkta nga tymi marramendës i largonin të keq sulltanëve vrastar e katila të shtrimë si shtazët e egra të hapun shalësh nder shilte.

“Hylli i Dritës” vezullonte edhe kur gjylet binin mbi kompanjelin e Kishës së Madhe!

“HYLLI I DRITËS”… Thërriste: “Perpara Burra, o gjallë o dekë per Atdhé e Fé!”…

E Burrat flut’ronin si orla mbi kokat e ushtrisë anmike! “Pasha Zotin iken turqit!..”

Per Ata që e bane me ikë, e bash prej Atyne Burrave me çakçirë e zhgun, po punohet me i harrue tue fillue prej Trimit të pathyeshem të Traboinit, “DED GJO’ LULIT, që me ata dy sy zhgabë që i vezullojshin prej gëzimi, e buzëngërthye nën ata mustakë të bardhë si biluri, me kësulë mbi një sy si bora e Majes së Bratilës, i mbërthyem ndër armët e të Parëve, në atë brez të punuem prej lokes qysh se rrezja e diellit kishte shkrepë ndër ato maje, me ata çakçirë nën të artin xhamadan ku rrahte ORA E SHQIPNISË, aty, po, ishte zëmreku i kombit ku gufonte gjaku i shkuem rrëkajë i Fatosave; aty po, ishte ajo e forta zemër që me duer prej bronxi, ngjiti në atë shtizë të latueme në shekuj atë cohë KUQ E ZI, të qëndisun nga duert e bijave të Rozafës, po, në atë shkam ku asht daltue amaneti i Gjergjit, që për pesë shekuj priti: Agimin e LIRISË…

Po, po, bash AI Burrë, që sot nuk ka as vorr!.. Gati askush nuk e di të vertetën se në qelën e At Matisë, në Gerçë, shkon Imzot Lazër Mjedja dhe organizojnë takimin historik ku përpilohet një dokument i randësishëm: “Memorandumi i Gerçës”, më 23 qershor 1911, që i prinë ngjarjës së madhe të Pavarësisë Kombtare në Vlonë, më 28 nandor 1912. Ky Memorandum u shkrue në gjuhën frenge nga dora e atdhetarit Luigj Gurakuqi dhe u përpilue nga Imzot Lazër Mjedja, Luigj Gurakuqi, At Mati Prennushi, At Buon Gjeçaj, dhe asht nenshkrue nga: Sokol Baci i Grudës, Ded Gjon Luli i Traboinit të Hotit, Dedë Nika Bajraktar i Grudës; Dodë Preçi Bajraktar i Kastratit; Tomë Nika i Shkrelit, Col Dedi i Selcës Këlmendit; Lul Rrapuka i Vuklit të Këlmendit; Llesh Gjergji, Bajraktar i Nikçit; Gjeto Marku i Hotit; Mehmet Shpendi, i pari i Djelmënisë së Shalës; Martin Preka i Shkrelit; Prelë Marku, Bajraktari i Shalës, Avdi Kola Bajraktar i Gimaj, Nik Mëhilli i Shllakut, Pup Çuni Prekalor, Binak Lulashi Toplanas; Bash Bajrami Bajraktar i Nikajve dhe Bec Delia. (Marrë nga libri “Dedë Gjo’ Luli”, autor F.R., 2011)

Porsa “Hylli i Dritës” publikoi këto ngjarje dhe vendimin e “Konferencës së Londres së 1913”, ku “kurva plakë coptoi Tokat Shqiptare nder sllavë…”, revista u mbyllë në 1914!

Rihapja e revistës “Hylli i Dritës” me kambnguljen e At Gjergj Fishtës në 1914, nga një dëshirë e pathyeshme per një Shqipni të Madhe, u përkrah pahezitim nga Imz. Prend Doçi, Imz. Kaçorri, Imz. Koleci, Don Nikoll Gazulli, At Palë Dodaj, Vllaznit Sirdani, At Shtjefen Gjeçovi, At Anton Harapi, dhe afro 50 intelektual laikë me përgatitje dhe prirje Europjane Perëndimore, tue lanë në këte revistë gjurmët që nuk do të shlyhen kurrma!

Penat e Luigj Gurakuqit, Mustafa Krujës, Lluka Karafilit, Zef Palit, Zef Harapit, Mati Logorecit, Gasper Gurakuqit, Mëhill Sulit, Kristo Floqit, dhe Don Ndoc Nikaj apo Imz. Vinçenc Prennushit, edhe sot shndrisin qiellin e Asaj Shqipni që nuk njeh mort…

Aty nga viti 1933, kur Shqiptarëve filluen me i tregue “përralla me mbret”… ishte një nga “detyrat e para të qeverisë”, mbyllja e Revistes “Hylli i Dritës” dhe, bashkë me te edhe e shkollës Françeskane në Shkoder, per të cilën u desht me shkue në Hagë dhe me marrë “çelsat”. Ja pra, një fakt që tregon se kush ishte mbreti i ardhshëm i Shqipnisë, nipi i “dajës Esad” që kur donte me firmosë dokumenta, prej shkollës së madhe që kishte krye në mejtepin turk, fillonte me firmue arabisht… Vdiq edhe ai pa dijtë me shkrue shqip!

U rrethue me disa universitarë ateista, per me mbulue fëtyren e vertetë anadollake ashtu si ma vonë, kjo metodë do të aplikohej mbas vitit 1944 nga shovenistët sllavokomunistë me sherbëtorin tiran dhe tradhtar Enver Hoxha, dhe pasuesin e tij anadollak Ramiz Alia.

***

1913 – 1944 “HYLLI I DRITËS” u drejtue nga ajka e kulturës sonë kombtare, tue fillue në 1913 e deri sa vdiq nga At Gjergj Fishta. Mbas Tij drejtues ishte At Anton Harapi deri në vitin 1941, kur drejtimin e mori At Gjon Shllaku, deri në vitin 1944, kur u mbyll per mos me u hapë ma, mbasi të dy drejtuesit e fundit u pushkatuen nga E. Hoxha, tue u zbatue kështu urdhni i qeverisë jugosllave, që kishte në mbikqyrje Tokat Shqiptare të Veriut, e shkatrrimin e kulturës së Tyne. Jugu kontrollohej si sot nga shovenistët grek.

Prof. Namik Ressuli, tek “Shkrimtarët Shqiptarë”, fq. 12 – 13, shkruen: “Shkrimtarët kryesorë të këtyne shkrimëve janë: Buzuku, Budi, Frangu i Bardhë, Bogdani e Kazazi… a) Lënda është gati krejt fetare pse u shkrua me qellim kryesor që të mbajë të gjallë e të forcojë në katholiket e Veriut fenë katholike, e cila nën pushtimin otoman kish nisur të shkatërrohej e të çdukej;.. Padyshim ky prodhim Verior është më i rëndësishmi i prodhimëve të pjesës së parë të leteraturës Shqipe, si nga pikëpamja e sasisë dhe e gjerësisë si dhe nga pikëpamja e lendës dhe e mbrendisë. Këta shkrimtarë të vjetër të Veriut nuk janë vetëm të parët që filluan njëfarë lëvizje kulturore në vendin tonë, nuk janë vetëm të parët që i dhanë Shqipës një alfabet – alfabetin latin – po janë edhe të parët që mendojnë e punojnë për Atdhenë e Gjuhën e tyre, për Shqipën e Shqipërinë.

Madje, nga kjo pikëpamje kombëtare ky prodhim munt të lidhej drejtë për drejtë me atë që erdhi pas Lidhjës së Prizrenit.”

Pra, të gjitha këto vlera të Veriut duheshin shkatrrue e zhdukë me kulm e thëmel…

U punue barbarisht per këte qellim nga viti 1944 e deri sa ra Muri i Berlinit në 1989.

Ishin pikrisht autorët e Realizmit Socialist, që marrshonin me “pushkë e kazem” per me shkatrrue Shqipninë e Gjergj Kastriotit… Dhe, mbasi vune maskat e demokracisë, vazhduen regresin që po vazhdojnë edhe sot në gjurmët e vjetra … Me hajninë e veprave letrare e historike dhe në pershtatje me krimin e organizuem, zhdukjet e kundershtarëve politik, korrupsionin, agjenturen, imoralitetin… etj, simbas porosive të Ramiz Alisë.

***

1990 – 1991 Shkodra ishte Flamurtare e Demokracisë në Shqipninë e robnueme.

Rinia Shqiptare kerkonte me ngulm: “E duem Shqipninë si gjithë Europa”!

Modeli i Flamurit Shqiptar në Burgun e Spaçit, u ba shembull per të gjithë Shqiptarët.

Flamuri Kuq e Zi valvitej i Lirë dhe i padhunuem nga “ylli sllavokomunist” i Titos…

Anadollaku Ramiz Alia porositë “agjentët e sigurimit të shtetit” nën masken e njohun të “Akademisë së Shkencave”, “Lidhjes së Shkrimtarëve dhe Artistëve të RPSSh” dhe të gjithë levat vllavrasëse të PPSh, “me pasë kujdes nga agjenturat e Vatikanit në Shkoder”!

1992 Me 2 Dhjetor Shqipnia kuadrohet Antare e Konferencës Islamike…

1993 “HYLLI I DRITËS” pushtohet nga “Ylli i kuq i Realizmit Socialist”. Dhunohen,

errsohen dhe shtremnohen materialet shkencore, politike, historike, letrare, poetike, didaktike, polemikat e Autorëve të pavdekshem, dhe thesaret tjera të Visareve të Kombit, që janë perla të çmueshme të Kulturës skalitun nder fletët e arta të “Hyllit të Dritës”!

Pikrisht, kjo ngjet nga ata barbar që krenoheshin per shkatrrimin me “pushkë e kazem”, ndonse, në sirtarët e studjove të veta, kishin veprat e Atyne Kolosëve të “Hyllit të Dritës” prej të cilëve plaçkitnin gjithshka ju vinte perdore, tue fillue nga cili të dishroni ju.., që me ua kontrollue xhepat e mbrendshem të kostumeve si “deputetë”, vazhdojnë me ruejtë nder ta edhe sot të zhublosun flamujt sovjetikë, jugosllav, grekë, turq, francez, italian…

E kur flasin per “demokraci” nuk i vjen turp me shkundë edhe flamurin amerikan!

2017:Sot askush nuk di me folë Gegënisht si “kjoftë për atëherë”: “HYLLI I DRITËS”!

Të parët që luftuen At Fishten me “Lahuten e Malcis” sot janë nder fletët e këtij “Hylli”!

Qellimi kryesor i tyne sot asht “pushtimi kulturor dhe shpartallimi i Shtetit Shqiptar”!

Mos studimi i shkrimtarëve të Veriut nder shkollat Shqiptare, mos botimi i veprave me vlera letrare dhe Atdhetare të Veriut dhe, çensura ndaj Gegënishtes në shtypin e ditës, janë vepra antikombtare që ndihmojnë antishqiptarët në SHKOMTARIZIMIN TONË!

Në gjuhen Gegnishte të “Hyllit të Dritës” kjo quhet vazhdimsi Antishqiptare!

Melbourne, Qershor 2017.