Komente – Page 248 – Dielli

Kosova kërkon përkrahjen e shteteve anëtare të OKB

September 23, 2016 by dgreca

-Kryeministri Mustafa kërkon përkrahjen e shteteve anëtare të Kombeve të Bashkuara për Kosovën/Nju Jork, 23 Shtator 2016-Gazeta DIELLI/ Kryeministri i Republikës së Kosovës, Isa Mustafa, në kuadër të vizitës në Nju Jork, po zhvillon takime me drejtues të shteteve të ndryshme të botës.Gjatë ditës, kryeministri Isa Mustafa, ka takuar presidentin e Naurusë, Baron Waqa, të cilin e ka falënderuar për përkrahjen e deritashme, duke kërkuar mbështetje të mëtejme për njohje të reja dhe anëtarësimin e Kosovës në organizata ndërkombëtare.Kryeministri Mustafa, po ashtu, mori pjesë në nënshkrimin e marrëveshjes për vendosjen e marrëdhënieve diplomatike ndërmjet Kosovës dhe Gambisë, e nënshkruar nga ministri i Jashtëm i Kosovës, Enver Hoxhaj dhe ministrja e Jashtme e Gambias, Neneh MacDouall-Gaye.Gjatë një takimi me sekretaren të përgjithshme të Frankofonisë, Michaelle Jean, kryeministri Mustafa kërkoi përkrahjen e Frankofonisë për Kosovën në fuqizimin e subjektivitetit ndërkombëtar dhe për procese tjera zhvillimore.

Kryeministri Mustafa u takua edhe me të dërguarin e posaçëm të SHBA-ve për të drejtat njerëzore të personave LGBTI, Randy W. Berry, ku u theksua përkushtimi i Republikës së Kosovës për garantimin e të drejtave të të gjithë njerëzve pa asnjë dallim.Kryeministri Isa Mustafa, ka mbajtur edhe një ligjëratë në Universitetin prestigjioz St.John’s, ku para shumë studentëve dhe profesorëve ka folur për Kosovën, të kaluarën e saj, zhvillimet e fundit si dhe për progresin e gjithanshëm që po arrihet në Republikën e Kosovës. Kryeministri Mustafa ka diskutuar dhe është përgjigjur në interesimet e shumë pjesëmarrësve, duke sqaruar proceset kryesore që lidhen me marrëdhëniet ndërkombëtare të Kosovës, zhvillimin ekonomik, integrimet euroatlantike e shumë procese të tjera.

Misioni i OSBE-së mbështet sigurinë e gazetarëve në Kosovë

September 23, 2016 by dgreca

-Xhaketat me mbishkrimin PRESS në vend të dukshëm. Misioni i OSBE-së do të siguroj për asociacionet e gazetarëve një Udhëzues për sigurinë e gazetarëve gjatë raportimit në protesta, me këshilla dhe njohuri për raportim nga protestat dhe demonstratat e dhunshme/

PRISHTINË, 23 Shtator 2016-Gazeta DIELLI/ Shefi në largim i Misionit të OSBE-së në Kosovë Jean-Claude Schlumberger, ka pritur sot kryesuesin e Asociacionit të Gazetarëve të Kosovës Shkëlqim Hysenaj dhe atë të Asociacionit të Gazetarëve të Serbisë të regjistruar në Kosovë, Budimir Ničić, me qëllim të dhurimit të 50 jelekëve dhe xhaketave me mbishkrimin ‘PRESS’.

Në kohën e protestave të vazhdueshme në të cilat gazetarët ballafaqohen me situata të vështira ku në disa raste kanë pësuar edhe lëndime, asociacionet e gazetarëve kanë kërkuar që Misioni t’ju sigurojë pajisje mbrojtëse. Këta jelekë dhe xhaketa do t’ju ndihmojnë gazetarëve të raportojnë në mënyrë më të sigurt duke u dalluar nga masa.

“Gazetarët në Kosovë nuk e kanë punën e lehtë dhe shpesh sfidohen deri në atë masë që ballafaqohen me situata të rënda. Puna e gazetarëve bëhet edhe më e rrezikshme kur ata raportojnë nëpër protesta dhe demonstrata të dhunshme. Për të qenë në gjendje që raportimin ta bëjnë në mënyrë më të sigurt, ata duhet që të jenë të identifikueshëm”, tha Schlumberger.

Schlumberger i inkurajoi kryesuesit e asociacioneve të gazetarëve që të vazhdojnë ta mbështesin punën e mediave dhe sigurinë e gazetarëve në të ardhmen. “Sot po ua japim jelekët dhe xhaketat me mbishkrimin PRESS në vend të dukshëm. Shpresoj që do të ju ndihmojnë në punën tuaj, por në të njëjtën kohë shpresoj që të mos ketë shumë situata të tilla nga të cilat do të raportoni”, shtoi ambasadori.

Në muajt në vijim, Misioni i OSBE-së do të siguroj për asociacionet e gazetarëve një Udhëzues për sigurinë e gazetarëve gjatë raportimit në protesta, me këshilla dhe njohuri për raportim nga protestat dhe demonstratat e dhunshme. Udhëzuesi do iu ndihmojë gazetarëve që t’i shmangin lëndimet dhe/apo dëmtimin e pajisjeve gjatë kryerjes së punës së tyre.

Në mandatin e Misionit të OSBE-së në Kosovë është mbrojtja dhe promovimi i të drejtave të njeriut, demokratizimi dhe zhvillimi i sektorit të sigurisë publike. Misioni ndihmon në ruajtjen e lirisë së medias dhe lirisë së shprehjes dhe e mbështet zhvillimin e mediave./b.j/

KOMENT RRETH ZGJEDHJEVE TE FUNDIT NE RUSI

September 23, 2016 by dgreca

Nga Brian Whitmore/ Pergtiti per Dielli Gjon Kadeli/

Menyra se si u zhvilluen ato zgjedhje jane te ngjashme me ato te periudhes Sovjetike te viteve 1970-te.

Tashti shifet qarte, se Rusia, ne menyre efektive, ka nji shtet, vetem me nji parti politike.

Gjate zgjedhjeve, Partija e Bashkueme Ruse qe qeveris vendin ka nen kontroll 343 nga 450 vende qe ka Dhoma e Ulet eParlamentit. Pjesmarrja ne votime ishte ma e vogla qe mbahet mend, dhe pati njoftime, jashzakonisht te shumta, se gjate votimeve u bane shume mashtrime(hile).

Sic duket, mbrenda nji kohe te shkurte, mund te kete edhe nji KGB te re.

Simbas raportit te gazetes ruse Komersant qe ka nji qarkullim te madh, ekzistojne plane per te krijue nji ministri te re te Sigurimit te Shtetit, ne te cilen do te perfshihen Sherbimi Federal i Sigurimit, Sherbimi i Fshehte Nderkombetar dhe pjesa ma e madhe e Sherbimit Federal te Mrojtjes.Menji fjale,rikrijimi i Policise Sekrete qe ekzistonte gjate kohes Sovjetike, nga e cila njerzit kishin shume frige.

Ne ma pak se tri jave, Putini do te mbushi 64 vjete, te njejten moshe qe kishte Leonid Brezhnievi me 1970te, kur Bashkimi Sovjetik po fillonte nji dhjete vjetesh, kur nuk kishte rritje ekonomike dhe ishin shtue persekutimet politke.

Pra,Putini nuk ka ne plan te shkoje ndokun per disa kohe, por do te vazhdoje te sundoje vendin, qe do te thote, krijimi i nji shteti me nji parti, me nji KGB te re dhe me nji udheheqes te moshuem ne Kremlin.Prandaj, megjithse kjo nuk don te thote, patjeter, se historia po persritet,as si tragjedi as si farse; prap se prap, te gjitha te dhanat e kohvet te fundit lajne te kuptohet, se Putini asht tuej e ndryshue menyren e qeverisjes, ne te cilen u bazue, gjate kohes ma te gjate qe nga koha qe u ba udheheqes i Rusise

Sistemi i deritashem, domethane demokracia jo e verte.pluralizmi i kontrolluem dhe grupet burokratike te klaneve te balancueme, nuk ekzistojne ma. Ato po zevensohen, me nji qeverisje nga nji njeri, me grupet elite dhe me procesin e shtypjeve haptazi.

Ndoshta, gjendja nuk do te kthehet sic ishte gjate periudhes Sovjetike te 70tave, por periudha e re e Putinit, asht tuej hi ne nji faze te re ma shtypse

Gjendje e jashtëzakonshme në Sharllotë

September 22, 2016 by dgreca

Dhuna ka vazhduar për të dytën natë, pasi protestat mbi vrasjen e një afrikano-amerikani kanë dalë jashtë kontrollit.

Një protestues është në gjendje kritike, pas një incidenti me armë midis civilëve, thanë autoritetet e qytetit.

Protestuesit janë të zemëruar me vrasjen e Keith Lamont Scott, 43 vjeç, të martën nga policia.

Policia ka thënë se Scottit i është kërkuar disa herë të lëshojë armën e dorës përpara se është qëlluar, por familja e tij ka këmbëngulur se ai ka qenë i paarmatosur dhe duke lexuar libër në atë kohë. Dëshmitarët kanë thënë se ai i ka pasur duart lart.

Guvernatori i Karolinës së Veriut, Pat McCrory, ka shpallur gjendje të jashtëzakonshme pasi protestuesit kanë sulmuar gazetarët dhe njerëz të tjerë, kanë thyer dritare dhe kanë vendosur zjarre të vogla.

Kryetarja e Sharllotës, Jennifer Roberts, apeloi për qetësi, duke thënë se Sharllota ka qenë gjithmonë vendi ku njerëzit mund të kenë dialog paqësor.

“Ne nuk jemi kështu”, tha ajo në një intervistë për televizionin CNN.

Protestuesit fillimisht kanë qenë të qetë, por më pas kanë nisur të hedhin shishe dhe fishekzjarre në drejtim të policëve, të cilët janë përgjigjur me gaz lotsjellës.

Forca vdekjeprurëse e policisë kundër afrikano-amerikanëve ka qenë shkak i protestave në gjithë SHBA-në, që dy vjet.

Një tjetër afrikano-amerikan, Terence Critcher, është vrarë nga policia në Tulsa të Oklahomas të premten.

Presidenti i Shteteve të Bashkuara, Barack Obama, ka biseduar në telefon me kryetarët e Sharllotës dhe Tulsës.

Shtëpia e Bardhë tha se të tre liderët janë pajtuar se protestat duhet të jenë të qeta dhe se presidenti ka ofruar çdo ndihmë të nevojshme për të dyja qytetet.

Kandidatja demokrate për presidente të SHBA-së, Hillary Clinton, tha se vrasjet “janë të padurueshme dhe duhet të bëhen të patolerueshme”.

Kandidati republikan, Donald Trump, reagoi në Twitter, duke thënë se “situata në Tulsa dhe Sharllotë është tragjike”. “Duhet të bëhemi bashkë për ta bërë Amerikën të sigurt përsëri”, tha Trump.

Gazeta Washington Post ka raportuar për më shumë se 700 vrasje të të dyshuarve për vepra penale nga ana e policies këtë vit; 163 prej tyre kanë qenë afrikano-amerikanë.

Aktivistët e të drejtave të njeriut kanë bërë thirrje për bojkotimin e bizneseve me pronarë të bardhë në Sharllotë.

Ata thonë se numri i madh i afrikano-amerikanëve të vrarë nga policia është simptomë e racizimit në Shtetet e Bashkuara. Po sipas tyre, afrikano-amerikanët përballen me mungesa të mëdha të vendeve të punës dhe të mundësive në arsim.

Përgatiti: Valona Tela

TAKIMET E KRYEMINISTRIT TE KOSOVES NE NJU JORK

September 22, 2016 by dgreca

Kryeministri Isa Mustafa mori përkrahjen e SHBA-ve, Kolumbisë dhe shteteve të tjera për Kosovën (VIDEO)/

Nju Jork, 22 shtator 2016-Gazeta DIELLI/

Kryeministri i Republikës së Kosovës, Isa Mustafa, në kuadër të vizitës në Nju Jork, u takua me Ndihmës Sekretaren Amerikane të Shtetit për Çështje të Evropës dhe Euroazisë, Victoria Nuland.
Kryeministri Mustafa e njoftoi për progresin në Kosovë si dhe për zhvillimet e fundit që lidhen me proceset integruese euroatlantike, fuqizimin e shtetësisë e subjektivitetit ndërkombëtar si dhe për zhvillimin e gjithmbarshëm të vendit.
Duke shprehur mirënjohjen e Qeverisë dhe të popullit të Kosovës për përkrahjen e deritashme, kryeministri Mustafa theksoi përkushtimin e Qeverisë së Kosovës për fuqizimin e marrëdhënieve bilaterale me SHBA-të, si partneri kryesor strategjik i Republikës së Kosovës.
Ndihmës Sekretarja Amerikane e Shtetit për Çështje të Evropës dhe Euroazisë, Victoria Nuland, vlerësoi të arriturat në Kosovë, duke shprehur përkrahjen e SHBA-ve për Kosovën.
Gjatë ditës, në selinë e Kombeve të Bashkuara, kryeministri Isa Mustafa ka takuar edhe ministren e Punëve të Jashtme të Kolumbisë, Maria Angela Cuellar.
Kryeministri Mustafa shprehu përkushtimin e Kosovës për fuqizimin e marrëdhënieve ndërmjet dy vendeve, duke kërkuar përkrahjen e Kolumbisë për fuqizimin e subjektivitetit ndërkombëtar të Kosovës.
Kryeministri Isa Mustafa ka marrë pjesë edhe në pritjet e organizuara nga Organizata e Bashkëpunimit Islamik si dhe nga Emiratet e Bashkuara Arabe, ku ka takuar përfaqësues të shumë shteteve dhe organizatave ndërkombëtare, duke kërkuar përkrahjen e tyre për Kosovën.
Në një deklaratë për media, kryeministri Mustafa ka folur për agjendën e takimeve në Nju Jork.
“Agjenda jonë ka të bëjë me forcimin e subjektivitetit shtetëror të Republikës së Kosovës dhe njohjen e Kosovës nga më shumë shtete sa që e kanë njohur deri më tani. Pastaj, vënia e marrëdhënieve bilaterale me shtete të cilat e kanë njohur Kosovën por akoma nuk kemi vendosur marrëdhënie bilaterale dhe anëtarësimi në organizata ndërkombëtare”, tha kryeministri Mustafa.
Duke folur për përkrahjen e ofruar nga SHBA, kryeministri Mustafa tha se ka pasur takime edhe me përfaqësuesit e Departamentit të Shtetit të Shteteve të Bashkuara të Amerikës ku ka ardhur në shprehje interesimi i përhershëm për Kosovën.
Ndërkaq, në pyetjen e gazetarëve lidhur me procesin e shënjimit të vijës kufitare me Malin e Zi, kryeministri Mustafa tha se çështja është shumë qartë.
“Ne duhet t’i përmbushim detyrimet të cilat i kemi dhe detyrimi përfundimtar që tani ka mbetur që ta përmbushim është ratifikimi i marrëveshjes për demarkacionin e kufirit me Malin e Zi . Është një çështje e cila është e patejkalueshme sa i përket përfaqësuesve të Bashkimit Evropian. Por, mund t’ju them se kjo çështje nuk është diskutuar vetëm nga ta, kjo çështje na është shtruar gati në të gjitha takimet që i kemi pas”, tha kryeministri Mustafa, për media./b.j/

Dhunë në SHBA – gjendje e jashtëzakonshme në Sharllotë /

Përgatiti: Valona Tela