Komente – Page 289 – Dielli

Përgjimet, pezullohet nga detyra kreu i Policisë Haki Çako

June 7, 2016 by dgreca

Gjykata ka vendosur pezullim nga detyra të drejtorit të Përgjithshëm të Policisë së Shtetit, Haki Çako, me akuzën e shpërdorimit të detyrës në kuadër të hetimit të një pajisjeje përgjimi në Policinë e Shtetit. Me kërkesë të Prokurorisë së Tiranës, gjykata ka vendosur masën e sigurimit “Arrest në shtëpi” me mbikëqyrje elektronike për shtetasit Artion Duka, me funksion Drejtor i Forcave Operacionale (FO) dhe Entiol Xhelilaj, specialist pranë FO-së, të dy të dyshuar për veprat penale të “Shpërdorimit të detyrës” dhe “Veprimeve që pengojnë zbulimin e së vërtetës”. Prokuroria e Tiranës, në kuadër të veprimeve hetimore të deritanishme, dyshon se këta persona, me veprime ose mosveprime, kanë lejuar aktivitet të kundërligjshëm përgjimi. Sipas Prokurorisë, Çako nuk ka marrë masat që i takojnë me ligj për të siguruar hyrjen, administrimin dhe përdorimin e një pajisjeje specifike, “IMSI Catcher”, e cila është sjellë në Shqipëri nga autoritetet italiane, për qëllime trajnimi, siç deklarohet nga të dyshuarit. “Nga hetimi ka rezultuar se gjatë seksioneve të praktikës është ndërhyrë disa herë në segmentin aparat fundor-antenë ligjore. Në hapësirën kohore të këtij veprimi, dyshohet se antena ligjore nuk regjistron aparatet fundore që tentojnë të lidhen me të. Pra, dyshohet se aparate celularë të ndryshëm mund të kenë qenë nën administrimin e paligjshëm të pajisjes ‘IMSI Catcher’”, thuhet në njoftimin e prokurorisë.

Njoftimi i plotë i prokurorisë: Me kërkesë të Prokurorisë së Tiranës, gjykata ka vendosur masën ndaluese “pezullim nga detyra” për Drejtorin e Përgjithshëm të Policisë, Haki Çako, për konsumimin e veprës penale “Shpërdorimi i detyrës” në vijim të hetimit për dyshimet mbi ekzistencën e një pajisje përgjimi, e administruar në kundërshtim me ligjin nga ana e Policisë së Shtetit. Po me kërkesë të Prokurorisë së Tiranës, gjykata ka vendosur masën e sigurimit “Arrest në shtëpi” me mbikëqyrje elektronike për shtetasit Artion Duka, me funksion Drejtor i Forcave Operacionale (FO) dhe Entiol Xhelilaj, specialist pranë FO-së, të dy të dyshuar për veprat penale të “Shpërdorimit të detyrës” dhe “Veprimeve që pengojnë zbulimin e të vërtetës”. Prokuroria e Tiranës, në kuadër të veprimeve hetimore të deritanishme, dyshon se këta persona, me veprime ose mosveprime, kanë lejuar aktivitet të kundërligjshëm përgjimi. Prokuroria e Tiranës po vijon hetimet për të provuar nëse, pas veprimeve të dyshuara si të kundërligjshme, ka edhe zyrtarë të tjerë të lartë shtetërorë. Prokuroria e Tiranës, Njësia Task-Forcë, ka nisur hetimin kryesisht, në bazë të një materiali procedural, sipas të cilit, Policia e Shtetit ka në dispozicion një pajisje përgjimi, “IMSI Catcher”. Sipas informacionit, kjo pajisje ka hyrë në territorin e Republikës së Shqipërisë pa autorizimin përkatës dhe mund të realizojë interceptime telefonike. Prokuroria e Tiranës regjistroi procedimin penal, në kuadër të cilave ka kryer një sërë veprimesh hetimore. Deri në këtë fazë të hetimit, ka rezultuar, në mënyrë të përmbledhur, si vijon: Shtetasi Haki Çako, në detyrën e Drejtorit të Përgjithshëm të Policisë, nuk ka marrë masat që i takojnë me ligj për të siguruar hyrjen, administrimin dhe përdorimin e një pajisje specifike, “IMSI Catcher”, e cila është sjellë në Shqipëri nga autoritetet italiane, për qëllime trajnimi, siç deklarohet nga të dyshuarit. Kjo pajisje ka hyrë në territorin e vendit tonë pa iu nënshtruar regjimit doganor të përkohshëm dhe, për më tepër, pa marrë autorizimin përkatës nga Prokurori i Përgjithshëm, si autoriteti i vetëm që jep lejen për përdorimin e mjeteve të tilla. Nga të dhënat e deklaruara nga të dyshuarit, kjo pajisje ka aftësi, ndër të tjera, që të identifikojë numrat IMEI të telefonave, e cila është një procedurë që i nënshtrohet legjislacionit për interceptimin. Nga hetimi ka rezultuar se gjatë seksioneve të praktikës është ndërhyrë disa herë në segmentin aparat fundor-antenë ligjore. Në hapësirën kohore të këtij veprimi, dyshohet se antena ligjore nuk regjistron aparatet fundore që tentojnë të lidhen me të. Pra, dyshohet se aparate celularë të ndryshëm mund të kenë qenë nën administrimin e paligjshëm të pajisjes “IMSI Catcher”. I dyshuari Çako, ka mbajtur në vijimësi qëndrim mohues ndaj faktit që kjo pajisje mund të jetë përdorur për përgjime të paligjshme. Por disa të dhëna hetimore, kanë krijuar dyshimin te Prokuroria e Tiranës se ky shtetas ka konsumuar veprën penale të “Shpërdorimit të detyrës”.

Kotzias në Tiranë: Një pjesë e çamëve bashkëpunuan me nazistët, Idrizi: Nazistët i ke në parlamentin grek!

June 6, 2016 by dgreca

Ministri i Jashtëm Ditmir Bushati dhe homologu grek, Nikos Kotzias mbajtën një konferencë të përbashkët për median në ambientet e ministrisë së Jashtme Tiranë ndërsa jashtë vijonte protesta e çamëve.

Sa i takon çështjes çame Bushati nënvizoi se Shqipëria nuk ka pretendime territoriale por kërkon vendosjen në vend të një drejtësie të munguar. Nga ana e tij kryediplomati grek këmbëngul se disa çamë kanë bashkëpunuar me nazistët. Sa i takon heqjes së Ligjit të Luftës tha se ky do të jetë objekt diskutimi dhe në vijim.

Ditmir Bushati: Çështja çame është pjesë e kapitullit që e ka origjinën në Luftën e Dytë Botërore. Jemi vende fqinje dhe është deri diku normale për gjaknxehtësinë që kanë ballkanasit të kemi lexime të ndryshme për këtë çështje por dhe të tjera. Besojmë se një trajtim realist do të zbuste tonet nacionaliste dhe të rivendoste një drejtësi të munguar. Besoj se është momenti i mirë për të qenë më i qartë dhe i drejtëpërdrejtë se nuk bëhet fjalë për pretendime territoriale. Shqipëria nuk ka asnjë lloj pretendimi territorial ndaj Greqisë. Është një vend që ka firmosur aktin final të Helsinkit, e pranon dhe respekton Greqinë si një fqinj dinjitoz. Është mirënjohëse për mbështetjen që ka dhënë për integrimin, por qasja jonë ka të bëjë me respektimin e të drejtave themelore të kësaj popullsie çame dhe pasardhësve të tyre që në fakt ishin shqiptarë çamërie me nënshtetësi greke. Flasim për një proces ku cdo lloj pengese e karakterit diskriminues duhet të hiqet.

Në këtë proces hulumtimi, dialogimi pavarësisht paragjykimeve që ekzistojnë besojmë se është e mundur të marrim shembull nga praktikat më të mira, sic ishin ato gjermano-franceze për nderimet që i bëhen viktimave të Luftës së Parë Botërore, përmes përmendoreve apo simboleve të tjera. Jemi në këtë lloj diskutimi, ku parimi i fqinjësisë së mirë dhe parimit të integritetit territorial dominojnë mbi çdo gjë tjetër.

Kotzias për ligjin e luftës : Greqia beson se me deklaratën e 1987 ne nuk jemi në luftë. Kjo është e vërtetë. Marëveshja e miqësisë në 1996 është e vërtetë. Integrimi i Shqipërisë në NATO dhe prespektiva e hyrjes në BE na bën jo vetëm miq por dhe partnerë. Nëse ekzistojnë dyshime nëse jemi ose jo në gjëndje lufte do të jetë objekt diskutimi që do të zhvillohet dhe do të gjejmë zgjidhje.

Kotzias per cështjen came: Sa i takon çështjes çame është e ditur se kemi një grup shumë të madh çamësh që janë shqiptarë dhe jetojnë në Shqipëri. Për këtë unë uroj që në këtë grup të kem prespektivë, të kenë dhe ata fitimet nga integrimi i Shqipërisë në BE, por janë disa çamë të vjetër, dmth kristianë të myslimanizuar të 1911 të cilët sot janë shtetas grekë. Ekzistojnë dhe disa çamë që bashkëpunuan me pushtuesit gjermanë, dhe kishin bërë ato komisionet e kontrollit dhe të zhvatjes së pasurive, të popullisë që mbetej në zonat e Epirit, të cilët u dënun nga Gjykatat greke në bazë të ligjit grek dhe atyre ndërkombëtarë. Në ndryshim nga njerëzit e tjerë që jepnin llogari në Evropë u larguan nga vendi dhe nuk u ekzekutuan. Unë mendoj se duhet të kemi kujdes kur flasim për këta çamë, sepse nuk nënkuptojmë asnjë grup qytetarësh shqiptarë dhe Shqipërinë. E them këtë sepse disa duan të bëjnë të njëjtë bashkëpunëtorët, ata që merreshin me nazizmin gjerman, me ata që nuk kanë jetuar asnjëherë në Greqi dhe më pas këta ti bëjnë njësoj me të gjithë shqiptarët. Në këtë prizëm ne themi se për ne ekziston problemi. Ne kemi përqasje të ndryshme dhe të gjitha janë të njohura nga pikëpamja e historisë.

Ja si e sqarojne deklaratën e Ministrise se Jashtme te Greqise, Bushati dhe Kotzias

Zoti Bushati cili është komenti juaj për deklaratën që ka paraprirë vizitën e ministrit Kotzias, asaj të ministrisë së Punëve të Jashtme greke që duket se paralajmëronte një veto greke për integrimin e Shqipërisë në BE?

Bushati: Do më lejoni t’ju zhgënjej, por nuk e kam lexuar kështu. Nuk e kam lexuar kështu për disa arsye, jo vetëm për gjithçka tha me shumë korrektesë dhe zemërgjerësi, miku im Kotzias për faktin që nuk besoj se nuk është as në vullnetin, tagrin, dëshirën e Greqisë për të aplikuar një politikë kshtësuese ndaj Shqipërisë, që në fakt nuk e ka aplikuar as në momentet më të vështira të marrëdhënieve shqiptaro-greke. Si kundër nuk besoj se është në interesin e Shqiprisë apo shqiptarëve që jetojnë në rajon për të pasur marrëdhënie të tendosura apo që përcaktohen nga emocionet dhe jo nga racionaliteti me Greqinë. E kam thënë dhe do të vazhdoj ta them, pavarësisht kapacitetit institucional që përfaqësoj se marrëdhëniet me Greqinë janë strategjike dhe me një potencial të lartë dhe që ne duam ta shfrytëzojmë sa më mirë. Unë e vlerësoj dekalratën e ministrisë së jashtme të Greqisë sepse na sjell në vëmendje cështjen e shtetit të së drejtës, reformën në drejtësi dhe në këtë pikëpamje e kam lexuar si inkurajon për ta finalizuar këtë process që Shqipëria të hedhë hapin e radhës për në BE. Është e qartë se shteti fqinj respekton vendimin e gjykatave dhe ku më evidente se kjo cështje nuk duket tjetër vec të respektimi i pozicionit të Shqipërisë nga ana e Greqisë përsa i përkete vendimit të Kushtetueses në atë që quhet çështja e detit.

Kotzias: Falendoroj ministrin Bushati që sqaroi me mënyrën e tij, unë kam bërëq fare deklarata edhe me interpretime të mira qofshin ato. Është një pikëpamje që shkruhet nga qarqe të ministrisë së Jashtme. Unë e vetmja deklaratë që kamë bërë për Shqipërinë është se e duam në BE, se do ta ndihmojmë me aq sa kemi mundësi dhe aq sa ajo dëshiron dhe asgjë tjetër. Mendoj se si gazetar ta them në mënyrë akademike Ditmir, është tjetër gjë dekalrata e Ministrisë së Jashtme dhe tjetër gje deklarata e ministrit të Jashtëm dhe tjetër gjë qarqe të ministrisë thonë se: . Ka shumë ndryshime pesha që bëhet dhe nga kush bëhet. Kam ato çështjet akademike.

Kotzias: Filozofia jonë e përbashkët, ti zgjidhim problemet dhe të ecim më tutje

Kotzias: Fatkeqësisht në epokën tonë nuk konsiderohet e vetëkuptueshme se kur ekzistojnë probleme të kërkosh edhe zgjidhje. Për dikë që të kërkosh zgjidhje për problemin është vetë problem. Unë do t’ju thoja që problemet janë që ti zgjidhim dhe të ecim më tutje. Kjo është filozofia jonë e përbashkët, zgjidhja. Duhet ti zgjidhim këtë probleme ekzistguese dhe të merremi me projekte të së ardhmes. Duhet të bëjmë rrjete të mëdha, të zhvillojmë energjinë, të forcojmë bashkëpunimin në kulturë dhe arshim. Këto zgjidhje do të promocohen dhe të ecin përpara, me kulturën e dialogut.

Njerëzit që mendojnë se problemet që nuk janë për tu zgjidhur mendojnë se rruga europiane është pa Evropë. Rruga europiane ka nevojë për mirëkutpim europian.

Për këtë propozimi që bëri Bushati për një hartë rrugore por edhe për një përcaktim rrugor është një propozim i mbështëetur nga BE. Ne duhet ta ngremë këtë peshë të ecurisë europiane të ballkaneve perëndimore. Prandaj duhet të mbarojmë me problemet që mbartim nga e shkuara.

Greqia është nga vendet anëtare më të vjetra në BE, ajo ka një përvojë të lartë dhe do të jetë në krah të Shqipërisë për cdo gjë që do ti nevojitet për në BE

Bushati: Mekanizma për të adresuar çështjet mes Shqipërisë dhe Greqisë

Bushati: Dua të falenderoj mikun tim Kotzias për vizitën e sotme në Tiranë së bashku me ekipin e tij. Është hera e disatë që ne takohemi në Tiranë, Athinë, Selanik, bruksel dhe në forumë ndërkombëtare. kemi rreth 1 vit që po punojmë për të adresuar disa prej cështjeve që nuk kanë gjetur ende trajtim si përsa i përket cështjeve që e kanë origjinën tel Lfta e dytë Botërore, cështje që kanë interes praktik për qytetarët, por edhe ato cëshjtje që janë përcaktuese për integrimin në BE.

bashke me mikun Kotzias kemi këmbyer disa ide, apo një përpjekje për të shkuar drejt një platform për të zgjdhur çështjet dy palëshe. Përvec përpjekjeve tonë për platformën e

Rama dakord për një mekanizëm për mënyrën sesi ne do ti adresojmë këto cështje që tani janë listuar. Një mekanizëm që do të mblidhet periodike, do të jetë intenisive për të gjitha cështjet

Nuk mjafton vetëm listimi i cështjeve, i kemi bërë publike në media, por energjitë tonë janë fokusuar sesi do të gjejmë zgjidhje në këto cështje.

Ka shumë pika të përbëshkëta dhe një potencial të madh për ti adresuar dhe ka një vullnet nga ana e qeverive.

Idrizi i përgjigjet Kotzias: Nazistët i ke në parlamentin grek!/

Kreu i PDIU-së, Shpëtim Idrizi, pas deklaratave që kryediplomati grek bëri publikisht në konferencë me Bushatin se çamët bashkëpunuan me nazistët, Idrizi iu përgjigj duke i thënë se ‘nazistët dhe fashistët i ka në parlamentin e vet’.

Duke iu referuar edhe një parulle, ai tha se gjyshi i Kotzias ka qenë bashkëpunëtor i gjermanëve.

“Nuk mund të mos provokoheshim nga fjala e zotit Kotzias i cili duhet ta dijë se nazistët dhe fashistët i ka në parlamentin e Greqisë, pra e kam fjalën për Agimin e Artë.

Për ne pak rëndësi ka çfarë thotë Kotzias, mjaftoi që kishte një parrullë, unë uroj mos jetë e vërtetë, që gjyshi i tij ishte bashkëpunëtor i gjermanëve dhe ne si shqiptarë të Çamërisë nuk kemi problem që ai të jetë ministër i Greqisë”, apeloi Idrizi.

Mesazhi i Myftiu Tërnava për Muajin e shenjtë të Ramazanit

June 5, 2016 by dgreca

Myftiu i Kosovës, Naim Tërnava, ka uruar besimtarët myslimanë me rastin e fillimin e muajit të shenjtë të Ramazanit.

Në mesazhin e tij, Myftiu Tërnava e ka cilesuar Ramazanin “muaj të mëshirës, faljeve e shpëtimit” dhe u ka bërë thirrje besimtarëve që të punojnë për ta bërë botën “më të mirë, më të sigurt, më joshëse”.

Apeli i Ternaves: “Larg vrasjeve, torturave e dhunimeve, larg çdo ekstremizmi, radikalizmi e terrori. Zemrat tona të mbushen me dashuri e mbarësi e jo urrejtje e vrazhdësi. Në këtë mënyrë botën do ta bëjmë më të mirë, më të sigurt, më joshëse për fëmijët tanë, dhe brezat që do të vijnë sepse kështu na mëson Islami”, këshillon Myftiu i Kosovës.

Lexojeni mesazhin e plotë të Myftiut Naim Tërnava:

Të nderuar vëllezër e motra besimtarë!

Nesër, më 6 qershor 2016, është dita e parë e Ramazanit, ndaj më lejoni që në emër të Bashkësisë Islame të Republikës së Kosovës, në emër të organeve dhe institucioneve të saj dhe në emrin tim personal, t’ua uroj të gjithë besimtarëve fillimin e muajit të shenjtë të Ramazanit, duke e lutur Allahun xh.sh., të pranojë agjërimin dhe adhurimet e tjera, të cilat i bëjmë në shenjë Madhërimi ndaj Tij.

Sinqeriteti dhe besnikëria janë vlera të pastra të cilat rezultojnë nga agjërimi i muajit të Ramazanit, ngase këto janë obligime që dalin nga Kurani, me qëllimin e vetëm që përmes agjërimit të arrijmë kënaqësinë dhe devotshmërinë shpirtërore, duke iu përkushtuar gjatë këtij muaji edhe më shumë besimit që e ndien besimtari në shpirtin dhe zemrën e tij.

Vëllezër e motra!

Mëkatet e mëparshme të mos jenë pengesë e pendimit e lutjeve edhe gjatë këtij muaji, që jetës t’i japim kuptim, që agjërimit t’i japim vlerë. Dyert e kësaj feje universale për mbarë botën gjithherë janë të hapura dhe mëshira e të Madhit Zot në raport me njeriun gjithherë është prezente.

Zoti xh. sh. thotë:

“Muaji i Ramazanit që në te (filloi të) shpallet Kurani, që është udhërrëfyes për njerëz dhe sqarues i rrugës së drejtë dhe dallues (i të vërtetës nga gënjeshtra). E kush e përjeton prej jush këtë muaj le të agjërojë…” El-Bekare -185.

Ramazani, ky muaj i mëshirës, po troket në dyert dhe vatrat tona, prej nesër begatitë e këtij muaji do të fillojë t’i shijojnë edhe zemra dhe shpirti i çdo besimtari. Të gjithë myslimanët e botës do të sakrifikojnë nga vetja për të agjëruar dhe madhëruar Allahun edhe më shumë se muajve tjerë, duke u përpjekur të ripërtërijë vlerat më madhore të Ramazanit.

Myslimanët e mbarë botës janë të gëzuar për ardhjen e këtij muaji në të cilin nuk marrin fund begatitë e Allahut, të cilat vetëm mund të përjetohen, por jo edhe të shpjegohen, ngase ky është muaj i mëshirës, lutjeve, pendesës, adhurimit, muaj i Kuranit, muaj i shpëtimit.

Ramazani është mburojë e besimtarit është thirrje mbi dinjitetin dhe përgjegjësinë e cila forcon marrëdhëniet e njeriut me Zotin, me familjen dhe shoqërinë, të cilat i ngrit gjatë këtij muaji në nivel edhe më të lartë me Zotin Krijues.

Allahu xh.sh. thotë: “E kur robët e Mi të pyesin ty për Mua, Unë jam afër, i përgjigjem lutjes kur lutësi më lutet, pra për të qenë ata drejt të udhëzuar, le të më përgjigjen ata Mua dhe le të më besojnë Mua”. El-Be-kare-186.

Të nderuar besimtarë,

Po hyjmë në muajin e mëshirës, e faljeve, e shpëtimit, muajin ku edhe lutjet drejtuar Zotit pranohen më shumë, muajin e mirësive të panumërta. Ndaj këto të mira – të nderuar Vëllezër e motra – i arrijmë me adhurim, agjërim, lutje drejtuar Zotit, me lexim të Kuranit, me sadaka-ndihmë atyre që kanë nevojë.

Agjërimi i muajit të Ramazanit na porositë duke thënë: ”Nuk është koha që të vdesim në rrugën e Zotit,por është koha që të jetojmë në harmoni të plotë me të gjithë njerëzit, e kjo është rruga e Zotit”.

E kemi obligim fetar që në këtë muaj edhe më shumë të ndihmojmë të varfrit, njerëzit në nevojë, duke begatuar sofrat e tyre edhe më shumë gjatë këtij muaji të shenjët. Duke bashkuar lutjet tona gjatë këtij muaji si asnjëherë më parë, duke u lutur që të marrin fund luftërat, vrasjet e njerëzve të pafajshëm, që në botë të mbretërojë paqja, harmonia dhe bashkëjetesa mes njerëzve.

Larg vrasjeve, torturave e dhunimeve, larg çdo ekstremizmi, radikalizmi e terrori. Zemrat tona të mbushen me dashuri e mbarësi e jo urrejtje e vrazhdësi. Në këtë mënyrë botën do ta bëjmë më të mirë, më të sigurt, më joshëse për fëmijët tanë, dhe brezat që do të vijnë sepse kështu na mëson Islami.

Të nderuar e shumë të respektuar besimtarë,

Më lejoni që në fund t’ua uroj këtë muaj të shenjtë të Ramazanit të gjithë besimtarëve në Kosovë, dhe brenda trojeve tona etnike shqiptare, por edhe të gjithë vëllezërve dhe motrave në mërgatën tanë kudo që ata gjenden.

Zoti na pranoftë agjërimin dhe adhurimet e tjera edhe gjatë këtij muaji të shenjtë të Ramazanit!”, thuhet në mesazhin e Myftiut Tërnava.

Muaji i Ramazanit, kreu i KMSH-së Bruçaj: Agjërim të lehtë

June 5, 2016 by dgreca

Një ditë përpara se të fillojë Muaji i madhërueshëm i Ramazanit, një prej më të shënuarve në kalendarin e fesë Islame, kreu i Komunitetit Mysliman Shqiptar, Skënder Bruçaj ka uruar të gjithë besimtarët shqiptarë, brenda dhe jashtë kufijve, për një muaj Ramazani të begatë.

“Të nderuar besimtarë myslimanë shqiptarë kudo që ndodheni, në Shqipëri, në trevat shqiptare, anembanë botës. Më lejoni që në emër të Komunitetit Mysliman të Shqipërisë, por edhe në emrin tim personal, t’iu përshëndes me paqen dhe sigurinë që vjen prej Krijuesit tonë Mëshirues dhe Mëshirëbërës dhe t’iu uroj gëzuar muajin e begatë të Ramazanit”, uron Bruçaj.
Dita e parë e Ramazanit do të jetë e nesërmja e 6 qershorit, kur edhe do të nisë agjërimi për të gjithë besimtarët myslimanë. Me agjërimin e Ramazanit – sipas fesë Islame, – shprehet më së miri besimi, sinqeriteti, humanizmi, uniteti e bujaria, virtyte këto që duhet të stolisin çdo besimtar në jetën e tij të përditshme. Agjërimi mbart në vetvete sakrificën dhe përkushtimin ndaj Allahut, e qëllimi kryesor është fitimi i kënaqësisë së Zotit.
“Ramazani njihet si muaji i Kur’anit Famëlartë, prandaj le të na shërbejë kjo periudhë e bekuar kohore për njohjen sa më të thellë të mesazhit hyjnor dhe përfaqësimin sa më dinjitoz të vlerave e traditave tona të bukura islame”, thotë më tej Skënder Bruçaj në deklaratën e tij.
Muaji i begatë i Ramazanit na rikujton kujdesin, vëmendjen dhe dashurinë që duhet të kemi për njerëzit që na rrethojnë, në veçanti për ata që kanë nevojë për përkrahjen tonë në përmbushjen e nevojave të tyre jetike, duke u bërë në këtë mënyrë shkak që edhe në shoqërinë tonë të mbretërojë mirësia, begatia, harmonia dhe paqja.

Bifurkacioni i Nerodimes, një monument shumë i veçantë për Kosovën

June 5, 2016 by dgreca

– Kryeministri i Republikës së Kosovës, Isa Mustafa, mori pjesë në përurimin e funksionalizimit të Bifurkacionit të Nerodimës, ku u shënua edhe Dita Botërore e Mjedisit/

–Mustafa: Përveç infrastrukturës do të hapim perspektivë ekonomike në fshatrat e Ferizajt/

FERIZAJ, 5 Qershor 2016-B.Jashari/ Bifurkacioni i Nerodimes është një monument shumë i veçantë për Kosovën, tha sot kryeministri Isa Mustafa.

“Këtu në ndarjen e këtij lumi në dy lumenj, të cilët na qesin pastaj në dy dete të ndryshëm, në Detin Egje dhe në Detin e Zi, është një rast i veçantë i cili është këtu tek ne në Kosovë. Ne kemi dëshirë që ta kultivojmë, ta mbajmë mirë, të zhvillojmë turizëm, të krijojmë kushte që njerëzit të vijnë dhe ta vizitojnë sepse vërtetë meriton vizita dhe meriton kujdes”, tha kryeministri, duke falënderuar Komunën, Ministrinë e Mjedisit dhe Komisionin Evropian për investimet.

Kryeministri Mustafa, më tej tha se këto investime tani duhet të rikthehen dhe t’u jepet vlera e tyre.

“Të punojmë dhe të japim shembull të mirë se si duhet të kujdesemi në mënyrë që mjedisin ta bëjmë më të përshtatshëm për njerëzit, për qytetarët tanë, për fëmijët tanë dhe për ardhmërinë tonë”, theksoi ai.

Kryeministri i Republikës së Kosovës, Isa Mustafa, mori pjesë në përurimin e funksionalizimit të Bifurkacionit të Nerodimës, ku u shënua edhe Dita Botërore e Mjedisit.

Të pranishëm në këtë aktivitet ishin ministra, deputetë, kryetari i komunës së Ferizajt dhe shumë qytetarë e ambientalistë.

Kryeministri Mustafa tha se Dita Botërore e Mjedisit flet për ndërgjegjësimin e njerëzimit për kujdes ndaj planetit dhe ndaj mjedisit si dhe marrjen e përgjegjësive për mjedisin.

“Edhe motoja e kësaj dite është që ne të kujdesemi për vendin tonë, të kujdesemi për planetin dhe të marrim përgjegjësinë për të. Është edhe ditë e njerëzve sepse është në vullnetin e tyre, në përgjegjësinë e tyre, që ata të marrin masa pozitive që të përmirësojnë ambientin në të cilin jetojnë”, tha kryeministri Mustafa.

Ministri i Mjedisit dhe Planifikimit Hapësinor, Ferid Agani, tha se Dita Botërore e Mjedisit është një datë e veçantë për Kosovën sepse është ditë kur mund të shpalosen të gjitha vlerat e mjedisit të Kosovës, vlera të shënuara edhe në përmasa botërore e të cilat meritojnë të mbrohen në mënyrë institucionale.

Ministri Agani foli edhe për faktin se shumë prej këtyre vlerave janë të kërcënuara si pasojë e proceseve të ndryshme degraduese, duke shprehur përkushtimin e plotë të qeverisë së Kosovës për të punuar edhe më shumë që këto degradime të parandalohen dhe të ndërpriten dhe që këto vlera të mbrohen.

Ministri më tej ka folur për çështjet e shumta globale mjedisore që kanë nevojë për vëmendje urgjente siç janë ndryshimet klimatike, siguria mjedisore dhe zhvillimi i qëndrueshëm mjedisor.

Kryetari i komunës së Ferizajt, Muharrem Sfarqa tha se funksionalizimi i Bifurkacionit të Nerodimes është ngjarje shumë e rëndësishme për Ferizajn dhe Kosovën, pasi që e vendos në rrugë të mirë këtë fenomen të rrallë për të luajtur rolin që ka në pasurinë turistike e natyrore.

Sfarqa tha se funksionalizimi i Bifurkacionit paraqet një prej vendimeve më domethënëse të qeverisë për të ndihmuar Ferizajn që të realizoj synimet zhvillimore të saj.

Ai më tej tha se komuna e Ferizajt, me përkrahjen e qeverisë së Kosovës dhe institucioneve financiare ndërkombëtare, ndodhet në prag të nisjes së investimeve të rëndësishme zhvillimore.

“Këto investime pritet të përmirësojnë ndjeshëm gjendjen infrastrukturore dhe gjendjen e qytetarëve të komunës së Ferizajt dhe të rrethinës”, tha Sfarqa, duke përmendur fillimin e ndërtimit të Spitalit Rajonal në Ferizaj, zgjidhjen e problemit të hekurudhës, zgjerimin e rrugëve nacionale dhe hyrje daljet e Ferizajt, si dhe investimet në Hidrosistemin e Lepencit, që do t’ia zgjidhin Ferizajt përfundimisht problemet e ujit të pijshëm dhe të ujitjes.

Kryeministri i Republikës së Kosovës, Isa Mustafa, ka vizituar sot edhe fshatrat Dardani dhe Zllatar të komunës së Ferizajt, ku mori pjesë në përurimin e rrugës së re të ndërtuar me standardet më të larta evropiane, me gjatësi 3200 metra dhe gjerësi 6 metra, që lidh këto fshatra me magjistralen Ferizaj-Gjilan.

Kryeministri Mustafa u prit nga qindra banorë të këtyre fshatrave si dhe nga kryetari i Ferizajt, Muharrem Sfarqa, deputetë të Kuvendit të Kosovës, asamblistë komunalë dhe përfaqësues të tjerë locale.

Para të pranishmëve të shumtë, kryeministri Mustafa tha se ndërtimi i kësaj rruge me standard, justifikohet më së miri me pjesëmarrjen e qytetarëve të saj në këtë përurim.

“Në qoftë se një investim nuk përjetohet nga qytetarët, nuk përjetohet nga njerëzit për të cilët bëhet dhe nuk pranohet nga ata, atëherë ai investim nuk e ka edhe vlerën e vet. Unë vlerën më të madhe të kësaj rruge e shoh në ju, në pjesëmarrjen e juaj këtu sot, në këtë numër të madh të njerëzve që e shënojnë këtë sukses, si sukses të tyre”, tha kryeministri.

Më tej, Mustafa tha se këtij suksesi do t’i shtohen edhe suksese të tjera.

“Ne do të bëjmë përpjekje maksimale që edhe zhvillimin ekonomik ta shpërndajmë kështu. Siç po ndërtojmë rrugë do të ndërtojmë edhe fabrika të vogla nëpër vendbanimet e juaja, në mënyrë që ju të gjeni punë këtu, këta të rinj dhe fëmijë që janë këtu të gjejnë ardhmërinë e tyre dhe perspektivën e tyre në këtë vend, në këto fshatra, në këtë komunë, në këtë Kosovë që e duam kaq shumë dhe që se zëvendësojmë me asnjë vend tjetër”, tha kryeministri Mustafa, duke shprehur përkrahjen për kryetarin e komunës edhe për kërkesat që i ka për rrugët e tjera.

Kryetari i komunës së Ferizajt, Muharrem Sfarqa, falënderoi kryeministrin Mustafa për praninë, duke theksuar se ai po i ndërron pamjen jo vetëm Ferizajt por edhe Kosovës përmes investimeve që po bën.

Kryetari Sfarqa tha se pas përfundimit të kësaj rruge, në bashkëpunim me Ministrinë e Infrastrukturës, do të punohet që ky lokalitet të lidhet edhe me Komunat e Gjilanit dhe të Vitisë.

“Vetëm 3 kilometra nga këtu mund të lidhet rruga që shpie në magjistralen Gadime-Gjilan, që do ta lehtësoj qarkullimin e njerëzve dhe të mallrave që lidh komunat tona si dhe me komunën e Vitisë në fshatin Remjan”, tha Sfarqa.

Ai më tutje tha se banorët e këtij lokaliteti duke qenë njerëz punëtorë e të vyeshëm janë bërë pjesë e zhvillimeve dhe e realizimit të planit qeverisës të Komunës së Ferizajt dhe më gjerë.

“Komuna e Ferizajt po bën investime në të gjitha sferat infrastrukturore për t’ua lehtësuar qytetarëve jetën e tyre, për të krijuar një perspektivë për të gjithë, në mënyrë që lëvizjet që ka pas ky lokalitet nga fshati në qytet të ndërpriten sepse edhe Zllatari edhe fshatrat tjera po marrin gjithnjë e më shumë pamjen e fshatrave evropiane”, tha kryetari Sfarqa.