Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Atë Francesco Patton-Një françeskan gazetar, Rojtari i ri i Tokës Shenjte

by

Atë Francesco Patton, rregulltar françeskan trentin nga Italia, 53 vjeç e gazetar publicist, është Rojtari i ri i Tokës Shenjte. Zëvendëson atë Pierbattista Pizzaballa-n, që e ka kryer këtë detyrë për tri mandate rresht.

“Vij me shumë përvuajtëri, në majë të gishtave. Vij me dashuri të madhe për këtë Tokë në zemër. Kërkoj të pranohem e të ndihmohem në kryerjen e shërbimit tim, për të mirën e njerëzve, që jetojnë aty e për të mirën e atyre, që vijnë për studime, për shtegtime, ose thjesht, për të shuar kuriozitetin për këto Vende të Shenjta”: kështu deklaroi atë Patton në mikrofonin e Radio Vatikanit.

Rregulltari shprehu vlerësimin e tij për kujdesin e veçantë, që Papa Françesku tregon për Tokën Shenjte, gjë që ndjehet në të gjitha provincat françeskane, ku mbërrijnë tregimet e sivëllezërve të Rojtarisë. “Besoj – nënvizoi ai në mikrofonin tonë – se siç sugjeron Papa Françesku, ajo është tokë ku ka rëndësi të ndërtohen ura. Për ne, natyrisht, ka kuptim krejt të veçantë, pasi është toka ku u mishërua Zoti, ku Jezusi pësoi mundimet e tij, vdiq e u ringjall. Prandaj, për ne është si të prekim korpin e gjallë të fesë sonë”.

Atë Patton ka qenë dy herë sekretar i përgjithshëm i Kapitullit të françeskanëve (2003 dhe 2009), vizitator i përgjithshëm në vitin 2003, ministër provincial i Provincës françeskane “Shën Vigjili” i Trentos (2008-2016), kryetar i Konferencës së eprorëve provincialë të Italisë e të Shqipërisë (2010-2013). Në Trento, ai ka qenë anëtar i Këshillit Presbiterial Dioqezan dhe i Sekretarisë së Këshillit Baritor Dioqezan të Kryedioqezës së Trentos; pedagog i shkencave të komunikimit shoqëror pranë Studimeve Teologjike Akademike Tridentine; bashkëpunëtor i së përjavshmes dioqezane, i radios dioqezane dhe i Telepace-s për Trenton.

Pjetër Bogdani: Letërkëmbim i Ipeshkvit të Shkodrës dhe Administratorit të Tivarit (1660-1670)

by

Pjetër Bogdani “Letërkëmbim, Ipeshkëv i Shkodrës dhe Administrator i Arkipeshkvisë së Tivarit (1660-1670). Kohëve të fundit doli nga botimi një vepër e re mbi figurën e kryeipeshkvit e atdhetarit të madh shqiptar, imzot Pjetër Bogdanin. “Letërkëmbim, Ipeshkëv i Shkodrës dhe Administrator i Arkipeshkvisë së Tivarit (1660-1670)”: ky titulli i veprës së përgatitur nga Odette Marquet, murgeshë e studiuese franceze, botuar nga Botimet IDK me ndihmën e Kuries Kryeipeshkëvnore të Tivarit e konkretisht të ish kryepeshkopit imzot Zef Gashit.

Vepra ofron një korrespondencë, nga e cila del qartë figura dhe puna e pareshtur e Bariut të vërtetë kombëtar e shpirtëror, Imzot Pjetër Bogdanit, cili jetoi dhe punoi me një përkushtim që kishte si qëllim vetëm të mirën e grigjës, çlirimin e popullit shqiptar nga pushtuesi osman, mbrojtjen dhe kultivimin e identitetit kombëtar, përparimin e gjithanshëm.

E duke denoncuar gjendjen dramatike të popullsisë nën pushtimin osman, Imzot Bogdani krijon lidhjet me Kongregatën e Shenjtë të Vatikanit, me Raguzën, me Venedikun e me forcat tjera, për të kërkuar ndihmën për t’i bërë ballë dhunës, persekutimeve e për t’i tejkaluar vështirësitë e përditshme, të paimagjinueshme.

Letërkëmbimet zbulojnë edukatorin intelektual, por në të njëjtin kohë e plan edhe bariun besnik. Krahas kujdesit për përforcimin e besimit tek populli i krishterë, imzot Pjetër Bogdani punonte e mendonte edhe për qytetërimin e popullit.

Dokumentat na tregojnë sesi me imzot Pjetër Bogdanin, në këtë pjesë të errët dhe persekutuese të historisë së shqiptarëve lind edhe një frymë e re, ku krahas rezistencës ndaj turkut, shprehet kërshëria për kërkime, libra e meditime. Letërkëmbimi i tij, udhëtimet e tij dhe të gjitha lëvizjet e imzot Pjetër Bogdanin ofrojnë një fotografi të gjendjes së mjerueshme në të cilën gjendej populli e vepronte dhe luftonte kleri, në mbrojtje të tij e të vendit.

Falë punës së përkushtuar e të heshtur të motrës Odette Louise de Jesùs, në këtë vepër zbulojmë gjëra vërtetë të rëndësishme për imzot Pjetër Bogdanin, jetën e tij të shndërruar në një shërbim të pakursyer për të afërmin, për popullin, për vendin, me besim në Zotin, me bindje e përkushtim deri në martirizim.Radio Vatikani)

SHBA, prezantohet anija luftarake e së ardhmes me kapiten James Kirk

by

Përmes një reference të qëllimshme dhe mjaft argëtuese nga kinematografia, Shtetet e Bashkuara të Amerikës i kanëdorëzuar kapitenit James Kirk anijen më të rrezikshme të flotës, sigurisht atë të flotës amerikane dhe jo flotës yjore.

Bëhet fjalë për gjuajtësin më të ri “USS Zumwalt” që nuk kapet nga radarët, një klasë e re anijesh luftarake që do të ndryshojnë mënyrën e luftimit në det. Zyrarisht, anija do të hyjë në detyrë më 15 tetor dhe deri atëherë, kapiteni James Kirk i flotës amerikane dhe jo i “Federatës së Bashkuar të Planeteve”, do të testojë bashkë me ekuipazhin e tij pajisjet tejet të përparuara të gjuajtësit. Anija 185 metra e gjatë dhe 15.700 tonë e rëndë nuk kapet nga radari dhe nuk bën zhurmë gjatë lundrimit.Në bord ajo ka armë të së ardhmes që janë ende në zhvillim, si rrezet e energjisë dhe topi elektromagnetik.Dy anije të tjera si kjo po ndërtohen nga kompania “General Dynamic”, ndërsa kostoja e të trejave bashkë pritet që të arrijë në 22.5 miliardë dollarë.Ndërsa aftësitë e gjuajtësit të ri premtojnë shumë, por nuk janë testuar ende në betejë, nuk ka dyshim që mediat e kanë vlerësuar shumë idenë e dikujt brenda Pentagonit, që çelësat e anijes më të përparuar dhe asaj të së ardhmes në botë t’idorëzohen një kapiteni me emrin James Kirk. Një emër mjaft i njohur nga saga “Star Trek” dhe filmat që e kanë pasuar, ku një kapiten i quajtur James Kirk drejtonte anijen kozmike më të përparuar të “Federatës së Bashkuar të Planeteve”.{SH.K}.

Kosovë-Asociacioni i Gazetarëve mban Kuvendin Zgjedhor

by

PRISHTINË, 21 Maj 2016/Asociacioni i Gazetarëve të Kosovës mbajti sot në Prishtinë Kuvendin Zgjedhor, në të cilin janë zgjedhur strukturat e reja udhëheqëse.Në këtë kuvend morën pjesë 279 votues. Kryetar me 125 vota u zgjodh Shkëlqim Hysenaj nga gazeta “Zëri”. U zgjodhën edhe tetë anëtarë të rinj të Bordit të Asociacioni i Gazetarëve të Kosovës me mandat tre vjeçar.

Kundërkandidatë për kryetar të Bordit ishin edhe Shkumbin Ahmetgjekaj, i cili mori 100 vota si dhe Enis Veliu, që fitoi 51 vota, ndërsa katër vota ishin të pavlefshme.

Në këtë Kuvend janë bërë edhe disa ndryshime në Statutin e Asociacionit të Gazetarëve të Kosovës./b.j/

Ismail Kadaresë çmimi “Azem Shkreli” dhe titulli “Qytetar Nderi i Pejës”

by

-Shkrimtari i madh shqiptar, Ismail Kadare, ka ardhur në Kosovë me mesazhe optimiste. Se shqiptarët sot janë më afër Evropës si asnjëherë më parë, ka qenë njëri prej tyre/

– Në një karrige të vendosur në mesin e skenës, ai u prit nga shumë qytetarë që kishin mbushur sallën e këtij objekti kulturor, vetëm për ta parë e takuar nga afër kolosin e letrave shqipe.Në mesin të gjithë atyre ishte edhe vajza e Azem Shkrelit, Aida, që kishte ardhur enkas për këtë mbrëmje nga Kanadaja./

PEJË, 21 Maj 2016/ Në Kosovë, në qytetin e Pejës, po mbahet edicioni XIV i takimeve ndërkombëtare letrare “Azem Shkreli”.

Në ceremoninë e zhvilluar sot shkrimtari shqiptar i vlerësuar i majave të universit të përbotshëm letrar, Ismail Kadare, u shpall laureat i çmimit “Azem Shkreli” dhe poashtu iu dha titulli “Qytetar Nderi i Pejës”. “Sot jam vërtetë i prekur të marr këtë çmim, që mban emrin e mikut tim të shtrenjtë, me të cilin kemi pasur gëzime, brenga e zhgënjime të përbashkëta ndër vite. Është ndjenjë e pabesueshme për mua”, tha Kadare duke marrë  çmimin me emrin e poetit shqiptar nga Kosova Azem Shkreli.

Duke u shprehur i nderuar Kadare tha se letërsia është pjesë e pandarë e kulturës shqiptare.

“Dhe këtë kulturë sot ju e keni nderuar. Dikur nuk e kemi paramenduar kohën kur shqiptarët e Shqipërisë do të merrnin çmime në Kosovë, dhe ja që diçka e tillë po ndodhë”, tha Kadare.

Shtypi i sotëm kosovar thekson se, shkrimtari i madh shqiptar, Ismail Kadare, ka ardhur në Kosovë me mesazhe optimiste. Se shqiptarët sot janë më afër Evropës si asnjëherë më parë, ka qenë njëri prej tyre.

Ka kujtuar Kosovën që njohu më shumë se gjysmë shekulli më parë. Atë nga këndvështrimi i poetit Azem Shkreli, emrin e të cilit e mban manifestimi që e ka sjellë të premten mbrëma në Pejë.

Në mbrëmjen e parë të edicionit XIV të takimeve ndërkombëtare letrare “Azem Shkreli”, Kadare ka qenë protagonisti kryesor në skenën e kinoteatrit “Jusuf Gërvalla”, shkruan gazeta Koha Ditore.

Në një karrige të vendosur në mesin e skenës, ai u prit nga shumë qytetarë që kishin mbushur sallën e këtij objekti kulturor, vetëm për ta parë e takuar nga afër kolosin e letrave shqipe.

Në mesin të gjithë atyre ishte edhe vajza e Azem Shkrelit, Aida, që kishte ardhur enkas për këtë mbrëmje nga Kanadaja./b.j/