Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

30 ditë paraburgim për Azem Sylën

by

Gjykata Themelore në Prishtinë ka aprovuar kërkesën e Prokurorisë për caktimin e 30 ditëve paraburgim për Azem Sylën, ish-deputet i Kuvendit të Kosovës.

“Këtë pasdite, një gjyqtar i EULEX-it mori vendimin për të caktuar masën e paraburgimit prej një muaj, për të pandehurin A .S. Gjyqtari i procedurës paraprake të EULEX-it kishte lëshuar një flet-arrest për të pandehurin më 26 prill 2016”, thuhet në njoftimin e shkurtër të gjykatës.

Syla po dyshohet për krim të organizuar, tjetërsim të pronave, shpëlarje parash dhe falsifikim të dokumenteve.

Deri më tani, lidhur me këtë rast, janë arrestuar gjashtë persona, dhe të njëjtëve u është caktuar masa e paraburgimit prej 30 ditësh.

Ish-deputeti i Kuvendit të Kosovës nga radhët e PDK-së, Azem Syla, të premten është dorëzuar në pikën kufitare ndërmjet Kosovës dhe Shqipërisë në Vërmicë, tek autoritetet kosovare.

Syla, pas dorëzimit, është sjellë në qendrën e ndalimit në Stacionin Qendër të Policisë së Kosovës në Prishtinë nga policia e EULEX-it dhe më pas është dërguar në Pallatin e Drejtësisë, ku edhe është mbajtur seanca e parë dëgjimore ndaj tij.

Në këtë seancë, prokurori i rastit ka kërkuar nga trupi gjykues që Sylës t’i caktohet masa e paraburgimit prej 30 ditësh.

Ndërsa, avokati mbrojtës i ish-deputetit të Kuvendit të Kosovës, Tomë Gashi, vendimin e Gjykatës e ka cilësuar si të padrejtë dhe të ndikuar politikisht.

Gashi ka bërë të ditur se pala mbrojtëse do të paraqesë ankesë në Gjykatën e Apelit.

“Unë, si avokat i tij, këtë aktvendim e konsideroj të ndikuar politikisht, për shkak se nuk ka pasur asnjë arsye ligjore që të njëjtit t’i caktohet masa më e rëndë e paraparë me ligj, kur efekti i njëjtë ka mundur të arrihet me masa më të buta”.

“Ankesa do të paraqitet menjëherë dhe presim që Gjykata e Apelit të jetë më e drejtë në raport me ish-komandantët dhe ushtarët e UÇK-së”, ka deklaruar Gashi.

Prokuroria e Shtetit ka njoftuar se hetimet e rastit “Syla” kanë të bëjnë me “një grup të madh të organizuar kriminal, i cili ka qenë aktiv nga viti 2006 e deri më tani, i përbërë nga qytetarë nga Kosova dhe nga Serbia, i kryesuar nga Azem Syla”.

Ky i fundit deri më tani ka qenë deputet i Kuvendit të Kosovës nga radhët e Partisë Demokratike të Kosovës, njëherësh ish-komandant i lartë i Ushtrisë Çlirimtare të Kosovës.

Nga organet e drejtësisë është thënë se anëtarët e këtij grupi kanë bashkëpunuar, secili me një rol të veçantë, për të privuar Kosovën nga pronat shoqërore në një vlerë përafërsisht prej 30 milionë eurosh.

Avokati Gashi ka deklaruar për Radion Evropa e Lirë se pronat, të cilat janë duke u hetuar në këtë rast, janë konfiskuar përkohësisht.

“Prokurori ka deklaruar se janë konfiskuar përkohësisht pronat që janë objekt i hetimit, që i bie pronat e KBI-së, ‘Kosova Export’, të cilat prokurori mendon se mënyrë të kriminalizuar janë përvetësuar nga këta persona, janë nën hetime”, ka theksuar Gashi.

Luftimi i krimit të organizuar dhe korrupsionit në nivele të larta politike në Kosovë, është konsideruar si një nga sfidat më të mëdha për organet e rendit dhe ato të drejtësisë.

Disa figura të jetës politike e publike, jo rrallë kanë zgjedhur edhe ikjen nga Kosova, menjëherë pas shpalljes së nisjes së hetimeve ndaj tyre apo edhe pas shpalljes së aktgjykimit. Këto raste, kryesisht kanë të bëjnë me keqpërdorim të pozitës zyrtare, korrupsion dhe krim të organizuar.

Kryetarë komunash të Kosovës dhe deputetë të Kuvendit të Kosovës, shpeshherë nuk kanë përfillur ligjet e Kosovës.

Xhabir Zharku, ish-kryetar i Komunës së Kaçanikut nga Partia Demokratike e Kosovës, vazhdon të qëndrojë në arrati, pasi në vitin 2011, ishte shpallur fajtor për një vepër penale duke iu shqiptuar dënim me tri vjet burgim.

Leme Xhema, ish-drejtoreshë e Përgjithshme e Post-Telekomit të Kosovës, në vitin 2008 ishte dënuar me tre vjet burg për përfitime të paligjshme. Por, e njëjta nuk ka qëndruar në burg, duke braktisur Kosovën.

Një rast tjetër i ikjes është edhe ai i përfaqësuesve të kompanisë private shëndetësore të quajtur “Medicus”, ku pas shqiptimit të dënimit Lutfi Dervishi, me profesion doktor, është arratisur nga Kosova.

Ndërkaq, pozitën e kryetarit të Komunës së Prizrenit vazhdon ta mbajë Ramadan Muja, edhe pse gjykata e kishte shpallur fajtor për keqpërdorim dhe korrupsion në këtë komunë.(Arton Konushevci)

Komandanti i FSK-së,vizitë në Shqipëri

by

-Gjenerallejtënant Rrahman Rama u prit në Ministrinë e Mbrojtjes dhe në Shtabin e Përgjithshëm të Forcave të Armatosura të Republikës së Shqipërisë/ TIRANË, 29 Prill 2016/ Komandanti i Forces se Sigursë së Kosovës-FSK, gjenerallejtënant Rrahman Rama, me ftesë të Shefit të Shtabit të Forcave të Armatosura të Republikës së Shqipërisë, general major Jeronim Bazo, u prit sot, me nderime të larta ushtarake shtetërore në Ministrinë e Mbrojtjes, në Tiranë.

Njoftimi i dërguar thekson se, fillimisht, gjeneral Rama i shoqëruar edhe nga gjeneralët Bashkim Jashari dhe Zymer Halimi, Atasheu ushtarak i Kosovës në Tiranë, nënkolonel Enver Dugolli, u pritën në Ministri nga ministresha e Mbrojtjes, zonja Mimi Kodheli. Në takim u bisedua për bashkëpunimin  ndersjellë ndërmjet ministrisë për Forcën e Sigurisë së Kosovës dhe ministrisë së Mbrojtjes të Republikës së Shqipërisë. Nga të dyja palët u  shpreh gatishmeria e plotë për bashkëpunim në fushën e sigurisë në të ardhmen.Më tej, Komandanti i FSK-së, gjenerallejtënant Rrahman Rama me bashkëpunëtorë, zhvilloi takim kokë më kokë me Shefin e Shtabit të Forcave të Armatosura shqiptare, gjeneral major Jeronim Bazo. Në takimin e përbashkët të dy gjeneralëve u bisedua për bashkëpunimin rajonal në këtë fushë, si dhe për bashkëpunimin e ministrisë për FSK dhe Forcës së Sigurisë me ministrinë e Mbrojtjes dhe Forcat e Armatosura të Republikës së Shqipërisë.

Gjithashtu, Komananti i FSK-së, gjeneral Rama dhe delegacioni nga ministria për Forcën e Sigurisë, në përmbërje: gjeneral brigade Bashkim Jashari, shef i Inspektoriatit, gjeneral brigade Zymer Halimi, shef i Drejtorisë për operacione, Faruk Geci, drejtor i Drejtorisë për Politika dhe Plane, Atasheu ushtarak i Kosovës, nënkolonel Enver Dugolli dhe drejtori i Departamentit për Marrëdhënie me Publikun, Ibrahim Shala, zhvilluan një takim të zgjeruar të delegacioneve, kryesuar nga gjeneral Bazo dhe general Rama.

Gjeneral Rama me këtë rast, e njoftoj gjeneralin Bazo mbi procesin që po kalon ministria për FSK dhe Forca e Sigurisë së Kosovës, procesin e bashkëpunimit regjional si dhe procesin e transformimit të FSK-së në Forca të Armatosura. Nga ana e tij general Rama tha se pikërisht në këtë proces është shumë e nevojshme përvoja e Ushtisë shqiptare e cila pothuajse ka kaluar sfida të ngjashme, në rrugën e zhvilimit të saj.

Nga ana e tij, shefi i Ushtrisë shqiptare, gjeneral Bazo tha se e gëzon fakti i sukseseve gjithnjë e më të mëdha të Forcës së Sigurisë, duke u zotuar për një bashkëpunim intenziv në të gjitha fushat e nevojshme dhe se siç u shpreh Ai, ,,Ne do jemi zëri juaj, aty ku ju nuk jeni, dhe do mundohemi të ju mbështesim edhe aty ku ne nuk jemi’’. Gjenerali Bazo tha gjithashtu se mbështetja për Forcën e Sigurisë do të jetë e sinqertë dhe konkrete, për avancimin dhe depertimin e saj në iniciativa rajonale dhe globale në fushën e sigurisë.

Të dy shefat, gjeneral Rama dhe gjeneral Bazo u dakorduan se bashkëpunimi rajonal është në interes të të gjitha vendeve të rajonit dhe se ndërtimi i një klime të mirë të bashkëpunimit, lehtëson edhe integrimin e tyre më të shpejtë, si dhe anëtarësimin me të shpejt në këtë rast të Kosovës, në iniciativa rajonale dhe më gjerë.

Komandanti i Forcës së Sigurisë, gjeneral Rama dhe delegacioni i Ministrisë për Forcën e Sigurisë i shoqëruar edhe nga komandanti i Forcave Tokësore shqiptare, gjeneral brigade Nazmi Cahani vazhdoi vizitën në garnizonin e njësisë Komando dhe atë të Batalionit të Forcave Speciale të Ushtrisë shqiptare, në Zall-herr.

Fillimisht, në Zall-herr, delegacioni i MFSK-së i kryesuar nga gjeneral Rrahman Rama zhvilluan një takim të përbashkët me gjeneralin Cahani, ku u njoftuan me misionin, detyrat dhe aktivitetet e Njësië spëciale si dhe më pastaj patën mundësi të ndjekin një demostrim professional me armë në poligonin për gjuajtje në garnizonin e Zall-herr-it.

Gjatë vizitës në Tiranë, komandanti  i FSK-së, gjeneral Rama me bashkëpunëtore bëri një vizitë të shkurtër në Ambasadën e Republikës së Kosovës në Tiranë, me çrast u pritën nga Ambasadori Ramiz Lladrovci.

Me këtë rast, gjeneral Rama i uroi Ambasadorit Lladrovci detyrën dhe emërimin e tij në postin e Ambasadorit fuqiplotë pranë Ambasadës së Rrepublikës së Kosovës, në Tiranë.

Nga ana e tij, Ambasadori Lladrovci e falenderoj gjeneral Ramën dhe delegacionin e MFSK-së për vizitën si dhe shprehu gatishmërinë për mbështetje diplomatike të FSK-së./b.j/

Kosovë-Shqipëri, dy qeveritë mblidhen në Bibliotekën Kombëtare të Prishtinës

by

Foto Gazeta Dielli – Behlul Jashari: Biblioteka Kombëtare e Kosovës “Pjetër Bogdani”, në Prishtinë, ku Qeveria e Kosovës dhe Këshilli i Ministrave të Shqipërisë do mbajnë mbledhjen e tretë të përbashkët/

-Qeveria e Kosovës në përgatitje për mbledhjen e përbashkët me Këshillin e Ministrave të Shqipërisë/

-Qeveritë e Shqipërisë e Kosovës në mbledhjen e tretë do të nënshkruajnë, mes tjerash, një marrëveshje me të cilën marrin përsipër edhe obligimet financiare që dalin nga procesi i zbatimit të marrëveshjes për mësimin e gjuhës shqipe në diasporë/

Nga korrespondenti në Kosovë i Gazetës DIELLI -Behlul JASHARI/ 

PRISHTINË, 29 Prill 2016/ Qeveria e Kosovës dhe Këshilli i Ministrave të Shqipërisë do mbajnë mbledhjen e tretë të përbashkët në 3 qershor 2016 në Prishtinë, në ambientet e Bibliotekës Kombëtare, pas të parës historike në Prizren në 11 janar 2014 dhe të dytës në Tiranë në 23 mars 2015.

Kjo u bë e ditur në mbledhjen e sotme të qeverisë së Kosovës,  të 86-tën, të 19-tën në vitin 2016, drejtuar nga kryeministri Isa Mustafa.

“Mbetet çështje deri në fund të javës së ardhshme t’i kemi të përfunduara të gjitha marrëveshjet që mund të lidhen mes dy qeverive. Që të mos kemi vonesa në fillim të javës së ardhshme do të ulemi t’i përgatisim ato”, u shpreh kryeministri Kosovar.

Në mbledhjen e 15 prillit,  qeveria e Kosovës deklaroi nisjen e përgatitjeve për mbledhjen e përbashkët me Këshillin e Ministrave të Shqipërisë dhe paralajmëroi propozimin e grupit të autorizuar përgatitor lidhur me kohën e vendin e mbajtjes mbledhjes së përbashkët.

Kryeministri i Shqipërisë, Edi Rama, dhe kryeministri i Kosovës, Isa Mustafa, në takimin në Prishtinë në 7 prill kanë diskutuar mbi axhendën e mbledhjes së ardhshme të dy qeverive dhe në dakordësi të plotë kanë vlerësuar se procesi i bashkëqeverisjes së problemeve dhe çështjeve të interesit të përbashkët ka dhënë rezultate shumë të mira.

Në mbledhjen e mesit të prillit të qeverisë  së Kosovës u theksua koordinimi me qeverinë e Shqipërisë dhe përgatitjet e nisura për takimin e përbashkët. “Koha për të cilën ne jemi marrë vesh përafërsisht me kryeministrin Rama, është fundi i majit ose java e parë e qershorit”, tha kryeministri Mustafa, duke kërkuar angazhim nga kabineti qeveritar në përgatitjet e mbledhjes së përbashkët të dy qeverive, që të jetë përmbajtjesore dhe t’i kontribuojë thellimit të bashkëpunimit ndërmjet Kosovës e Shqipërisë.

Mbledhja e përbashkët e Këshillit të Ministrave të Republikës së Shqipërisë dhe qeverisë së Republikës së Kosovës, në 11 janar 2014 në Prizren, ndodhi  për të parën herë pas më shumë se 100 vjetëve të shtetit të parë e pas 6 vjetëve të shtetit të dytë të shqiptarëve.

“Modestish mendoj se ajo që na ka bërë bashkë sot, në një tryezë të bashkëqeverisjes strategjike, qeverinë e Shqipërisë dhe qeverinë e Kosovës, është një nismë që ka të bëjë pikë së pari, me kontributin tonë për integrimin shqiptar dhe rajonal në Evropën e bashkuar, si shprehje  e vendosmërisë sonë të përbashkuar për ta jetësuar këtë integrim si hapësirë evropiane të tejkufijve”, theksonte në mbledhjen e parë kryeministri shqiptar Edi Rama.

Pas mbledhjes, në ceremoninë e organizuar te Shtëpia e Lidhjes Shqiptare të Prizrenit u bë nënshkrimi zyrtar i Dokumentit për bashkëpunim dhe partneritet strategjik ndërmjet dy shteteve dhe marrëveshjeve tjera mes dy qeverive, të Shqipërisë e Kosovës.

Qeveritë e Shqipërisë dhe Kosovës janë takuar sërish, në një mbledhje tjetër, të dytë, në 23 mars 2015 në Tiranë, nën moton “Një tokë, një popull, një ëndërr”, ku u firmosën 5 marrëveshje, 4 memorandume, 2 protokolle dhe një deklaratë e përbashkët për zonat e lira ndërkufitare.

Duke paralajmëruar mbledhjen e tretë, kryeministri kosovar Mustafa ka theksuar se, “do të vazhdojmë me takime të përbashkëta të dy qeverive dhe do të punojmë bashkërisht në përgatitjen e takimit të ardhshëm, në të cilin do të bëjmë një vlerësim të punëve të deritanishme, por edhe të aktiviteteve të cilat ne kemi interes t’i zhvillojmë si aktivitete të përbashkëta sepse vlerësojmë se bashkëpunimi me Shqipërinë është i interesit të veçantë për Republikën e Kosovës”.

Qeveritë e Shqipërisë e Kosovës në mbledhjen e tretë të përbashkët do të nënshkruajnë, mes tjerash, një marrëveshje me të cilën marrin përsipër edhe obligimet financiare që dalin nga procesi i zbatimit të marrëveshjes për mësimin e gjuhës shqipe në diasporë. Dakordimi për këtë bëhej i ditur në 26 prill  në një njoftim të dërguar nga Ministria e Diasporës në qeverinë e Kosovës.

Njoftimi theksonte se, në Tiranë, menjëherë pas përfundimit të takimit të grupit të punës për zbatimin e marrëveshjes mes qeverisë së Kosovës dhe asaj të Shqipërisë për mësimin e gjuhës shqipe në diasporë, ministri kosovar i Diasporës,Valon Murati, u prit në një takim edhe nga Lindita Nikolla, ministre e Arsimit dhe e Sportit e Republikës së Shqipërisë. 

Vëmendja e këtij takimi është përqendruar në lidhje me përmbushjen e detyrave që dalin nga Marrëveshja e përbashkët për unifikimin e mësimit të gjuhës shqipe në diasporë.

Në mbledhjen e dy qeverive, në Tiranë, në 23 mars 2015, është nënshkruar edhe Marrëveshja e Bashkëpunimit ndërmjet Ministrisë së Arsimit dhe Sportit të Republikës së Shqipërisë dhe Ministrisë së Diasporës së Republikës së Kosovës dhe Ministrisë së Arsimit, Shkencës dhe Teknologjisë së Republikës së Kosovës “Për Organizimin e Përbashkët të Mësimit të Gjuhës Shqipe dhe të Kulturës Shqiptare në Diasporë dhe në Mërgatë”.

Arben Frroku i arrestuar prej 6 Marsit, PD akuzon qeverine

by

Partia Demokratike akuzon qeverinë se si në rastin e Mark Frrokut kanë vonuar të dhënat për Arben Frrokun, i cili sipas saj është arrestuar më 6 mars.Në një dalje për median nga Enkelejd Alibeaj janë të njëjtët persona si në rastin e Mark Frrokut që i shërbyen krimit dhe shkelën ligjin me urdhrin e Ministrit të Brendshëm Saimir Tahiri dhe lejen e Edi Ramës

Deklaratë e kreut të Departamentit të Rendit dhe Sigurisë, Alibeaj

Lajmi i ndalimit të Arben Frrokut, i dënuar me burgim të përjetshëm për vrasjen e komisarit Lamaj, nxjerr zbuluar bashkëpunimin e dyfishtë të pikave kyçe të policisë, me bekimin e Tahirit dhe Edi Ramës, në arratisjen e të dënuarit dhe me tej në favorizimin e tij për të shmangur drejtësinë.

Ndalimi i Frrokut në Holandë është bërë që me 6 mars. Por autoritetet shqiptare, kanë vonuar dërgimin e të dhënave në shtetin e BE.

Të njëjtët persona, i njëjti mekanizëm, që la në sirtar për muaj me radhë kërkesën e Interpol Bruksel për deputetin e Edi Ramës, vëllain e të dënuarit me burgim përjetë, Mark Frroku.

Të njëjtët persona që shërbyen krimin dhe shkelën ligjin duke fshehur kërkesën e Policisë së Brukselit, sigurisht me urdhërin e Tahirit e me lejen e Edi Ramës, edhe këtë radhë, shërbyen krimin duke vonuar dërgimin e të dhënave.

Ishte denoncimi publik i bërë nga z. Berisha që i detyroi Tahirin e Ramën të dërgojnë të dhënat, ku u konfirmua se ishte pikërisht Arben Frroku, i dënuar me burgim të përjetshëm, shtetasi i ndaluar në Holandë me identitet tjetër të falsifikuar.

Edi Rama fillimisht e mbështeti aleatin e tij politik, duke i mundësuar arratisjen. Pak para se të dënohej me burgim të përjetshëm nga Gjykata e Apelit, Frroku iku nga Shqipëria pa lënë asnjë gjurmë në sistemin Tims. Pra me urdhër, policia ka hapur kufijtë për të, dhe i dënuari për vrasjen e komisarit të policisë, avulloi pa lënë asnjë shenjë.

Ky bashkëpunim me krimin, me të dënuarin me burgim të përjetshëm për vrasjen e një oficeri të lartë, është në të vërtetë fytyra e Tahirit, e Ramës dhe e kësaj oligarkie që sundon me krimin e për krimin.

Arben Frroku arrestohet në Holandë, fshihej me identitet të rremë/

Policia e Shtetit duke informuar zyrtarisht për arrestimin e Arben Frrokut, thotë se ka nisur procedurat e ekstradimit të tij nga Holanda.Policia thotë se identifikimi dhe arrestimi i tij është bërë më 17:15 minuta.

Sqarimi i policisë:

Interpol Tirana gjatë ditëve të fundit ka patur disa komunikime me homologët në Holandë në lidhje me këtë çështje, por vetëm sot pasdite, u konfirmua se shtetasi i paraqitur me dokumente të falsifikuara nën emrin “Renato Tsepa”, ishte shtetasi Arben Frroku, i dënuar tashmë nga drejtësia shqiptare. Verifikimi i identitetit të shtetasit Frroku erdhi pas krahasimit të gjurmëve të dërguara nga autoritet e vendit tonë për partnerët holandezë. 

Interpol Haga konfirmoi se gjurmët ishin identike me ato të një shtetasi të arrestuar me dokument (pasaportë) greke të falsifikuar, me gjeneralitetet “Renato TSEPA”, lindur në Korçë. Policia e Shtetit, në bashkëpunim me Prokurorinë e Përgjithshme dhe Ministrinë e Drejtësisë, kanë nisur procedurat e ekstradimit të shtetasit Frroku drejt Shqipërisë, ku pritet të vuajë dënimin sipas vendimit të gjykatës.

Skandaloze: Azem Syla ndodhet në Kosovë, dhe nuk po arrestohet!

by

Gazeta shqiptari.eu ka siguruar informacionin ekskluziv se ku ndodhet Azem Syla.Burime të afrata me të arratisurin nga drejtësia, deputetin Azem Syla, përgënjeshtrojnë pohimet e djeshme në media, se ai mund të ketë arritur në Zvicër apo edhe në ndonjë shtet tjetër, dezinformatë që e mbështeste edhe avokati i tij, sipas detyrës (?), Tomë Gashi.

Por, Azemi ndodhet në Kosovë që nga dje të paktën, dhe nuk po e mendon arrestimin. “Azemi është këndej pari, në Kosovë, dhe as që ka ndërmend ti nënshtrohet arrestit, si komandant i UÇK-së që ishte”, thotë ky burim.

Ai tashmë gënjeu nëpërmjet mediave që i kontrollon se do të kthehet së shpejti në Kosovë, se madje sot do të vijë për tu dorëzuar, ndërsa që të paktën që nga dje ai ndodhet në Kosovë.

Por, ne treguam edhe dje se ai nuk e ka ndërmend të dorëzohet pa shterimin e resurseve të tij, nga Shqipëria në Serbi!

Azem Syla ka zgjedhur të rezistojë në mënyrën e tij, sikurse dikur sillej me kundërshtarët e Rugovës dhe LDK-së, duke mos i njohur institucionet e Republikës, nuk po i njeh as këto të tashmet, për të cilat donte të mburrej si hero dhe ndërtues i saj, dhe madje të cilës ia kushtoi edhe nj doktoratë të rrejshme.

Azem Syla, nuk po e shfrytëzon ndonjë favor moral si ish-komandant shtabi të UÇK-së, të cilin e konteston si pozitë krahu tjetër i LPK-së nga Gjermani, dhe gjithnjë Ibrahim Kelmendi, si kreu i tij.

Pëkundrazi Syla po përdor mjetet e tij të dhunës, të cilat ia kishin mësuar mirë, Xhavit Haliti, Kadri Veseli e Hashim Thaçi, dhe tash ai po e ushtron presionin kryesor ndaj presidentit të vendit Hashim Thaçit nëpërmjet njerëzve të tij, që ta bëjë shtetin të heqë dorë nga arrestimi, dhe kjo të mbyllet si shumë skandale tjera policore, dhe ky si një kryespektakël me 350 policë, prame prokuror, gjykatës hetues, njësi speciale të dështuara, që marshojnë drejt një njeriu të dyshuar për krime të shumëfishta, dhe gënjehen për vendndodhjen.

Azem Syla duke e ditur se po të arrestohet për të shkuar drejt Hagës, ku do të ndëshkohet nga specialja, e ka vënë në lojë të gjithë arsenalin e tij!

Ai po e shantazhon presidentin Thaçi me publikimin e dosjeve të tij të padëgjuara nga opinioni, pasi sipas llogarive të Syles, ai vetë është më pak i implikuar në krime, se sa klika e Thaçit, Xhavitit dhe Kadrisë, madje ai e sheh rolin e tij, si të një punëmarrësi nga ata, thonë burimet e afërta me Sylën.

Azem Syla ka kërcënuar se nga Haga, kur të fillojë Gjykata speciale me proceset gjyqësore, do ta gjunjëzojë Thaçin, dhe se “fundi i tij do të jetë 100 herë më i zi se i imi (Sylës)!”

Azem Syla tashmë po kërcënon se ai do të kthehet në një superbllac, pasi beson se Nazim Bllaca, ishte një krijesë e Thaçit, apo i mbështetur nga ai për ta rrënuar Sylën me klanin e tij, dhe të tjerët në PDK që flirtonin me të.

Nëse Syla nuk arrestohet është e sigurt se liberalizimi i vizave kaq shumë i trumbetuar nuk do të ndodhë shpejt (veç nëse ndodh sa Syla të jetë në arrati), dhe ky do të jetë një dështim i Qeverisë Mustafa, dhe se kryeministri po tregohet se është në tërësi jashtë loje.

Isa Mustafa në të vërtetë as që donte të ishte i përfshirë në operacionin e arrestimit, vetëm nga frika, por meritat synonte ti merrte, veçmas nëpërmjet disa burizanëve, që do të trumbetonin, se ja Isa ua futi kundërshtarëve më të mëdhenj të Rugovës dhe rugovistëve, çfarë doni, tjetër, ndërsa ky se ‘nxjerr macen pi përsheshit’.

Mos arrestimi i Azem Sylës tregon lëkundshmërinë e Hashim Thaçit, dhe frikën që ia ka futur Syla, në lidhje me specialen, dhe duket se edhe Thaçi do të gënjejë sërish në lidhje me luftën kundër korrupsionit dhe vënien e rendit dhe ligjit. SHQIPTARI.EU