Shqipëria në “Panama Papers”

April 5, 2016 by dgreca

Shqipëria është përfshirë në megaskandalin “Panama Papers”, i cili është raport i gazetarëve investigativë, që shfaq korrupsionin në dhjetëra vende të botës duke përfshirë edhe liderë botërorë.

Sipas medias shqiptare që u referohet dokumenteve të “Panama Papers”, në skandal janë përfshirë 25 persona dhe 2 kompani nga Shqipëria.

Nga të dhënat rezulton se 3 persona kane qenë përfitues të ardhurash nga kompanitë fiktive në Shqipëri. Po ashtu, 22 persona të tjerë janë pjesë e këtyre kompanive.

Njëra prej kompanive mbi të cilën është hedhur dritë deri tani është “GFI Technologies”, e cila ka si partnerë Assaf Halkinin – avokat izraelit, Isamil Mulletin, sipërmarrës shqiptar, dhe kompaninë kanadeze “Global Fluids International S.A”.

Kjo kompani përmendet nga gazeta izraelite Haaretz, e cila ishte pjesë e rrjetit të investigimit mediatik për raportin “Panama Papers”.

Kompania është regjistruar në Qendrën Kombëtare të Regjistrimit në Shqipëri si “GFI Albania” dhe fitoi koncensionin për markimin e karburanteve që në vitin 2013.

Sipas burimeve mediatike, në muajin shtator te vitit 2015, disa transaksione brenda kompanisë ngritën pikëpyetje të mëdha. Aksioneri më i madh i kompanisë, i shiti aksionet tek kompania ortake shqiptare.

Në fillim të shtatorit, “Global Fluids International S.A. (GFI)”, transferoi pothuajse të gjitha kuotat që kishte te GFI Albania, te aksioneri i dytë “Petroleum Consulting Partners A.G. (PCP)”, i cili kishte fillimisht 25% të kuotave.

Transaksioni ngriti dyshime pasi koncesioni iu dha kompanisë në vitin 2013 , me argumentin se “Global Fluids” ishte kompani e specializuar në këtë fushë, ndaj largimi i saj 2 vjet më vonë dhe shitja e aksioneve tek partneri shqiptar, nuk kaloi pa u vënë re.

Me procesin e markimit, çmimi i karburantit në vend vlerësohet të jetë të paktën 2 lekë më shtrenjtë.

GFI Albania, nëpërmjet një kontrate 10-vjeçare që kushton 150 milionë euro, duhej të ngjyroste naftën (procesi i markimit të karburantit), në përputhje me qëllimin e përdorimit, eliminimin e abuzimit me cilësinë e destinacionit dhe në fund shmangien e taksave të larta për konsumatorin.

Shoqata e Hidrokarbureve në Shqipëri, ka qenë kritike ndaj veprimtarisë së kompanisë “GFI Albania” dhe i është drejtuar Ministrisë së Financave me ankesa shkresore për aktivitetin e kësaj kompanie.

Deri tani nuk ka asnjë reagim zyrtar nga përfaqësuesit e kompanisë “GFI Albania” për përmendjen e saj në dokumentet e publikuara në raportin “Panama Papers”.

Kryeministri i Islandës kërkon shpërndarjen e parlamentit

April 5, 2016 by dgreca

Gunnlaugsson është duke u përballur me presion për shkak të dokumenteve që tregojnë se ai dhe gruaja e tij kanë në pronësi firmën Wintris, jashtë Islandës.

Kjo është bërë e ditur nga të ashtuquajturat Letra të Panamasë, që kanë rrjedhur nga një firmë ligjore në Panama.

Këto letra kanë zbuluar se dhjetëra figura globale kanë të fsheshura shuma të mëdha parash jashtë vendeve të tyre.

Të hënën ka pasur protesta përpara parlamentin në Islandë.

Gunnlaugsson i ka dërguar kërkesën për shpërndarje të parlamentit presidentit Olafur Ragnar Grimsson, pasi opozita ka kërkuar votë të besimit.

Shumë njerëz nuk do të mund të flenë nga Letrat e Panamasë/

Rrjedhja e mbi 11 milionë dokumenteve nga një firmë ligjore në Panama ka zbuluar se si elitat globale, përfshirë bashkëpunëtorë të presidentit rus, Vladimir Putin, kanë të fshehura shuma të mëdha parash.

Në lidhje me këtë çështje, korrespondenti i Radios Evropa e Lirë, Pamir Sahill, ka biseduar me zotin John Christensen, drejtor ekzekutiv i Rrjetit të Drejtësisë Tatimore, që është një mekanizëm i pavarur ndërkombëtar.

Radio Evropa e Lirë: Si e interpretoni rrjedhjen e Letrave të Panamasë (Panama Papers)? A është ky një zbulim i habitshëm?

John Christensen: Mendoj se Letrat e Panamasë janë një nga rrjedhjet më të mëdha të kohës moderne. Janë rrjedhja e parë e madhe nga një firmë ligjore, që ka çuditur shumë njerëz. Miliona letra janë zbuluar dhe vazhdojnë të zbulohen.

Ato përfshijnë njerëz të nivelit shumë të lartë, jo vetëm politikanë, por edhe njerëz të biznesit dhe elita në gjithë botën. Mendoj se kjo rrjedhje është në të njëjtën shkallë me zbulimet e Edward Snowdenit (ish-kontraktor i inteligjencës amerikane, i cili ka publikuar dokumente sekrete të SHBA-së), sepse ajo zbulon nivelin e korrupsionit në mes të elitave globale, politike dhe të pasura.

Ky korrupsion ka vazhduar me dekada. Kjo është hera e parë që kemi një zbulim në këtë shkallë.

Radio Evropa e Lirë: Dhe, kur politikanët dhe elitat bëjnë përpjekje të krijojnë kompani jashtë vendeve të tyre ose t’iu shmangen taksave, a është kjo ligjore?

John Christensen: Le të jemi krejtësisht të qartë. Evazioni fiskal është i paligjshëm në të gjitha rrethanat. Edhe kur shmangia e taksave ndodh përmes strukturave jashtë vendit, pothuajse në të gjitha rastet, edhe kur apelohet në gjykatë, del të jetë e paligjshme.

Mendoj se publiku e di këtë shumë mirë. Publiku e di se kur njerëzit krijojnë struktura jashtë vendit, kompani jashtë vendit ose besim në juridiksionet si ato të Panamasë, kjo është diçka e paligjshme ose korrupsion.

Radio Evropa e Lirë: Pra, kompanitë jashtë vendit janë të paligjshme?

John Christensen: Jo, e keqja është se kompanitë jashtë vendit janë ligjore. Problemi real me kompanitë jashtë është fakti se vendet si Panamaja nuk kërkojnë që pronarët, pronarët e vërtetë të kompanive jashtë vendit të bëjnë të ditur identitetet e tyre.

Kompanitë si Mossack Fonseca, nga e cila kanë rrjedhur Letrat e Panamasë, sigurojnë emrat e aksionarëve dhe emërojnë drejtorët. Këta janë njerëz që japin emrat e tyre për të vepruar si drejtorë ose aksionarë, për të fshehur identitetin e njerëzve të vërtetë. Kjo është ajo pjesa tronditëse në lidhje me kompanitë jashtë vendit, që nuk bëjnë të ditur identitetin e njerëzve të vërtetë që fshihen prapa kompanive jashtë vendit.

Radio Evropa e Lirë: Rrjedhja e letrave është duke vazhduar. A mendoni se do të ketë reagim të madh nga njerëzit në gjithë botën?

John Christensen: Shpresoj shumë që publiku në të gjitha vendet e botës do të nisë të bëjë presion serioz mbi politikanët, që të ndërmarrin hapa. Çfarë hapash kërkojmë ne? Para së gjithash, duam një traktat global ose kërkesë që çdo juridiksion në botë të krijojë një regjistër publik të pronësive të kompanive jashtë vendit dhe të fondacioneve jashtë vendit. Kjo nuk do të ndodhë derisa politikanët të mos detyrohen nga publiku për të ndërmarrë hapa, sepse shumë politikanë janë vetë ose i kanë familjet e tyre të përfshira në struktura jshtë vendit.

Ata do ta bëjnë një gjë të tillë vetëm kur të kenë presion nga publiku, presion real global. Për dekada të tëra, politikanët kanë premtuar se do të ndërmarrin veprime kundër parajsave të taksave dhe nuk kanë bërë asgjë. Tani është koha. Rrjedhjet nga Panamaja janë zile alarmi për pjesën tjetër të botës, që të ndërmarra hapa.

Radio Evropa e Lirë: Si e shihni të ardhmen e këtyre firmave ligjore? A mendoni se elitat financiare dhe politike të botës do të jenë tani më të kujdesshme kur të transferojnë para jashtë vendit?

John Christensen: Le të shohim. Politinakët, tregtarët e drogës dhe të gjithë njerëzit e tjerë që kanë përdorur kompani jashtë vendit, kanë qenë të kujdesshëm. Ata kanë operuar në atë mënyrë që firmat ligjore të mbrojnë identitetin e tyre.

Kjo do të bëjë që shumë njerëz të mos flenë në javët e ardhshme, sepse ata e dinë se nuk do të mund të mbështeten më në firmat ligjore. Mendoj se kriminelët dhe eliatat e biznesesve, ashtu si edhe elitat e pasura në gjithë botën, që u janë shmangur tatimeve dhe nuk i kanë zbuluar konfliktet politike të interesit, nuk do të mund të flenë, sepse niveli i sekretit që kanë pasur për dekada të tëra, nuk mund të garantohet më.

Shqipëri-Greqi, Ligji i luftës në mes

April 5, 2016 by dgreca

Marrëdhëniet Shqipëri-Greqi, Bushati: Ligji i luftës pengesë kryesore/

Heqja e ligjit të luftës do të çlironte energji pozitive në marrëdhëniet mes Greqinë. Ky është qëndrimi i Ministrit të Punëve të Jashtme të vendit tonë, Ditmir Bushati.

Kryediplomati shqiptar, i pranishëm në komisionin për punët e Jashtme raportoi sot mbi vizitën e tij në vendin helen.

Bushati tha se marrëdhënia me Greqinë kushtëzohet nga tre elementë kryesorë. “Kryefjalë është ligji i luftës, i cili është vendosur pas luftës së dytë botërore. Kjo do të çlironte pozitivitetin e munguar mes vendeve”, nënvizoi Bushati.

Ai shtoi se pjesë e qenësishme e ligjit të luftës lidhet dhe me çështjen çame, një çështje të diskutuar tej mase nga pala shqiptare.

“Çështja çame për herë të parë ka dal në skenë në vitin 1991, u diskutua deri në 1993, pastaj fjeti deri në 2000. U rihap në atë kohë nga kryeministri Meta, pastaj u rikthye në vëmendjen në vitin 2013 si një çështje kryesore e programit qeverisës. Bisedimet tona me Greqinë janë të ndara me tre pjesë. Së pari, Lufta e Dytë Botërore. Heqja e ligjit të luftës që ka jo vetëm efekte politike por edhe ligjore, pasi mban të bllokuar pronat e shqiptarëve të çamërisë. Tek kjo ndarje kemi listuar çështjen çame”, tha ministri Bushati.

Elementi i dytë nga ku kushtëzohet marrëdhënia me vendin helen, sipas Ministrit Bushati lidhet me minoritetin grek në vendin tonë, por dhe atë shqiptarë matan kufijve. “Në këtë drejtim, pala shqiptare ka garantuar të gjitha kushtet, që minoriteti grek në vendin tonë të jetë plotësisht i integruar. Ne kërkojmë të njëjtën gjë nga pala greke”, u shpreh Bushati.

Elementi i tretë lidhet me marrëveshjen detare, atë të sigurimeve shoqërore, por dhe njohjes së lejes së drejtimit shqiptarë nga pala greke. Sipas Bushatit, në këtë drejtim janë bërë hapa përpara, por ky ngërç nuk lidhet me faktin se përballë tryezës është Greqia.

“Ky mbetet një problem i hapur edhe me Italinë, që kemi dhe marrëdhënie më pak të tensionuara. Dua t’ju kujtoi se mesdheu vijon të mbetet problematik sa i takon ndarjes kufitare. Ne kemi kërkuar që çështja të ndiqet sipas modeleve të mira ndërkombëtare dhe po presim, që Italia të gjejë gjuhën e përbashkët me Greqinë për të vijuar tentativat. Sa i takon sigurimeve shoqërore mbetet i njëjti problem dhe me Italinë”, shtoi Bushati.

Deputeti i Partisë Socialiste, Taulant Balla gjatë proçesit të pyetjeve dhe përgjigjeve u shpreh se qeveria e shkuar duhet të hetohet për marrëveshjen e vjetër të detit.(Kortezi Arbi Fortuzi, ATSH)

Basha reagon për projektin e sheshit “Skënderbej”

April 5, 2016 by dgreca

TIRANE, 5 Prill/ATSH/- Pas prezantimit të projektit të sheshit “Skënderbej”, ka reaguar kryetari i Partisë Demokratike Lulzim Basha. Në një postim në ‘Facebook’, Basha tha se se qeveria vazhdon me fasada betoni ndërsa papunësia rritet.

“Rrisin taksat dhe falimentojnë biznesin e mbyllin vende pune. Rrisin faturat e energjisë dhe të ujit, vjedhin të ardhurat, ndërkaq hiqen si çlirimtarët e Kastriotit. Por çfarë është realisht “investimi” në shesh? Shkatërrim i gjelbërimit, tender për xhepat e tyre dhe dy kulla betoni për oligarkinë dhe veten e tyre. Ky është meraku i madh i pashait të korrupsionit dhe jo vetmia e Gjergj Kastriotit”, shkruan Basha.

Ndërkaq, kreu i opozitës ka vijuar bashkëbisedimin me fermerë, mjekë, mësues inxhinierë e profesionistë të tjerë në Fier

Banorët e fshatit Fermë, Radostinë, Dermenas, etj shprehën shqetësimin për infrastrukturën rrugore, kanalet e vaditjes dhe kullimit në të cilat nuk është vënë asnjëherë dorë, mungesën e subvencioneve dhe shërbimin e munguar shëndetësor.

Basha ndërsa ka shpalosur programin për bujqësinë ka theksuar se ashtu siç infrastruktura u kthye në prioritet të investimeve në vitet 2005-2013, në qeverisjen e tij prioritet do të jetë bujqësia.

“Synimi ynë është që në vitin e parë në qeverisje ne të jemi me 150 milionë euro me buxhet për bujqësinë, për të subvencionuar bujqësinë, për të subvencionuar punën, bujkun, jo grumbulluesin, jo 4-5 veta që kanë lidhje me qeverinë. Po drejtpërdrejtë bujkun dhe blegtorin”, tha ai.

Arsimi, shëndetësia, taksat e larta dhe tarifat ishin në qendër të bashkëbisedimit që Basha zhvilloi me mjekë dhe mësues, inxhinierë, avokatë, noterë etj.

Skandali i ‘Panama papers’, Prokuroria Shqiptare: Po bashkëpunojmë me institucionet e tjera

April 5, 2016 by dgreca

Kush është GFI Albania që kontrollon monopolin e markimit të naftës?/

Prokuroria shqiptare po bashkëpunon me institucionet e tjera në lidhje me informacionet që vjinë nga mediat botërore që edhe segmente të jetës shqiptare që janë të përfshirë në çështjet e shfrytëzimit apo shpërdorimit për qëllime të pasurimit të paligjshëm në parajsat fiskale, informon zyrtarisht organi hetimor.

Bashkëpunimi me institucionet e tjera ligjzbatuese konsiston në qartësimin e situatës mbi përfshirjen e mundshme në çështjen “Panama Papers” të kompanive ose shtetasve shqiptarë apo të huaj që operojnë në tregun financiar shqiptar”.

Deri tani mes 11 milionë dokumenteve të zbuluara nga “dosja Panama” janë 2 kompani nga Shqipëria, 3 përfitues dhe 22 aksionerë.Publike është bërë vetëm emri kompanisë që ka marrë markimin e naftës në Shqipëri, GFI.

“Panama Papers” – Skandali i parajsës fiskale, GFI Albania, kompania shqiptare që fshehu pasurinë/

GFI Technologies është një nga kompanitë shqiptare që figuron në megaskandalin e publikuar nga mediat ndërkomëbtare, ku liderë shtetesh, biznesmenë, sportitë dhe artistë kanë shmangur taksat dhe kanë pastruar para nëpërmjet firmës juridike panameze Mossack Fonseca.Kompania është regjistruar në Karaibe në ishullin Anguilla në maj të 2013 me qëllim investimin në sipërmarrjet shqiptare të teknologjisë së lartë.

Sipas të dhënave shqiptari Ismail Mulati (në media përflitet si Ismail Mulleti), një avokat izraelit Assaf Halkin dhe një firmë kanadeze me emrin Global Fluids International janë pronarë të kompanisë.

GFI Albania, kompani e specializuar në shënimin dhe monitorimin e hidrokarbureve, ndali punën e saj në Shqipëri më 10 dhjetor të 2015 për shkak të dështimit të autoritetit kontraktues në këtë rast Ministria e Financave për të përmbushur detyrimet e tyre kontraktuale.

Gjithsesi Halkin në raport është i lidhur ngushtë me një tjetër avokat të profilit të lartë në Izrael me emrin Dov Weisglass, i cili ka qenë edhe shefi i zyrës së kryeministrit Ariel Sharon.

Assaf Halkin rezulton partneri i tij në biznes, dhe së bashku kanë regjistruar katër kompani nëpërmjet kompanisë ligjore panameze.

Weisglass ishte pronar i vetëm një prej këtyre kompanive, Talaville Global, e cila është regjistruar në Ishujt e Virgjër Britanikë në maj të vitit 2012. Qëllimi i deklaruar i kësaj kompanie , sipas formularit të regjistrimit të kompanisë, është promovimi i marrëveshjeve të pasurive të patundshme në Evropën Lindore.

Shtatë muaj më vonë, të gjithë aksionet e Talaville global ishin lënë si kolateral për një kredi në banken Raiffeisen me qendër në Vjenë. Në përgjigje të një hetimi nga agjensia e lajmeve izraelite Haaretz,Weisglass dhe Halkin shpjeguan se kompania ishte regjistruar me qëllim marrjen e një kredie nga banka për të investuar në pronat evropiane.

Ata shtuan se veprimtaria e kompanisë është raportuar në organet tatimore në Izrael dhe taksat e kërkuara nga ky shtet janë paguar. Në megaskanalin që ka tronditur të gjithë botën, vendi ynë bën pjesë me 2 kompani, tre përfitues dhe 22 aksionerë.

Kush është GFI Albania që kontrollon monopolin e markimit të naftës?/

Kompania që ka marrë markimin e naftës në Shqipëri është një bashkim i përkohshëm i shoqërive “Global Fluids International” dhe “Petroleum Consulting Partners” A.G. Bashkimi i Kompanive u bë më 7 dhjetor të vitit 2010 dhe synimi ishte marrja e koncesionit.Disa muaj më vonë, pra më 24 gusht, Këshilli i Ministrave i dha lejen kompanisë për kryerjen e shërbimit të markimit dhe monitorimit të karburanteve në Republikën e Shqipërisë, teksa autoriteti kontraktues ishte Ministria e Financave.

Kompania mori në atë kohë bonus 6% të pikëve për rezultatin, teknik e financiar, në procedurën konkurruese përzgjedhëse (propozim i pa-kërkuar), i shoqërisë “Global Fluids International”, SA (GFI), për dhënien me koncesion të këtij shërbimi.

Megjithatë, kontrata përfundimtare nga qeveria shqiptare u miratua më 13 mars të vitit 2013. Marrëveshja u dërgua në Gjykatën Kushtetuese nga Shoqata e Shoqërive te Hidrokarbureve, kërkesë e cila u hodh poshtë.

Në një raport të mëvonshëm, Autoriteti i Konkurrencës bënte me dije se për nënshkrimin e marrëveshjes së koncesionit nuk ishte marrë më parë opinioni i këtij institucioni.

GFI Albania do të merrte në fakt eksluzivitetin e markimit të karburanteve, çka do të thotë se në vend nuk do të vepronte asnjë kompani tjetër dhe rasti ishte monopol i pastër.

Në vendimin e vet nr. 359, datë 04.05.2015, Autoriteti i Konkurrencës vendosi që t’i rekomandonte kompanisë zbatimin me përpikëri të marrëveshjen si dhe “brenda një kohe të përshtatshme të realizojë analizën e plotë ex-post të rezultateve gjatë fazës së parë të monitorimit deri në fund të vitit 2014”.

GFI Albania është themeluar si kompani koncesionare për të zbatuar projektin kombëtar të Markimit të karburanteve dhe të Naftës Bruto, projekt në të cilin do të punësohen rreth 100 punonjës.

Teknologjia e projektit është e bazuar në sistemin Petromark, të zhvilluar nga Global Fluids International (GFI Petromark), një nga kompanitë lider në botë në sistemet e markimit të hidrokarbureve.

Petromark është një sistem markimi dhe identifikimi modern, i sofistikuar dhe plotësisht i integruar. Kompania ndërkombëtare GFI Petromark është krijuar në vitin 2001 dhe është e tëra në pronësi të Eurocontrol Technics Group Inc, një kompani kanadeze e regjistruar në bursën e Sipërmarrjeve në Toronto.

Në faqen e saj në internet, kompania shqiptare nuk bën me dije kush është pronari/ët e saj, por vetëm administratorët. Një prej këtyre administratorëve është nga Izraeli, gjeneral në pension i forcave speciale. Uzyel Ben Itzhak, i cili është gjithashtu një nga themeluesit e kompanisë Global Fluids International në vitin 2001 dhe Administrator i GFI Albania.