Komente – Page 409 – Dielli

Mentor Çoku nderohet me Titullin “Kalorës i urdhrit të Skënderbeut”

July 8, 2015 by dgreca

Presidenti i Republikës së Shqipërisë, Bujar Nishani akordoi më datë 22.06.2015, dekretin nr.9142 që Mentor Çokut (1914-1996) (pas vdekjes) i ndahet Titulli “Kalorës i urdhrit të Skënderbeut” me motivacionin: “Në shenjë vlerësimi dhe mirënjohjeje për veprimtarinë e tij të shquar atdhetare, si dhe për ndihmesën e çmuar e të pamohueshme dhënë gjatë gjithë jetës për triumfin e demokracisë mbi diktaturën komuniste në Shqipëri.”
Ditë më përpara, në ambientet e Presidencës së Republikës së Shqipërisë, Presidenti i Republikës, Bujar Nishani dorëzoi dekoratën “Kalorës i urdhrit të Skënderbeut” të bijës së tij Valbona Miraka-Çoku, në prani të zyrtarëve të Presidencës, dhe familjarëve të tjerë, ku i pranishëm ishte edhe kryetari i komunës së Strugës, Dr. Ziadin Sela.
Titulli “Kalorës i urdhrit të Skënderbeut” u jepet personaliteteve shqiptare dhe të huaja për akte të veçanta heroike në mbrojtjen, forcimin dhe përparimin e Republikës së Shqipërisë.

Një biografi e shkurtër e Mentor Çokut

Një nga personalitetet më të shquara të Fushëgropës së Ohrit në veçanti dhe të gjithë Shqipërisë Etnike në përgjithësi gjatë shekullit XX, intelektual i madh, patriot i flaktë, veprimtar i palodhur, luftëtarë i paepur për çështjen kombëtare, armik i përbetuar i hordhive sllave dhe i gjakatarëve komunistë shqiptar, pra personalitet i cili tërë jetën e tij i’a kushtoi luftës për liri, të drejta kombëtare dhe bashkim kombëtar të popullit shqiptar.
Si familje me tradita kombëtare, besë e ndershmëri, familja Çoku, pasurinë e vë në dispozicion të çështjes shqiptare, duke fituar respektin dhe simpatinë e bashkëkohësve dhe duke u shquar për burrat trima, të mençur e të drejtë.
Nga dera e familjes Çoku ka dalë edhe Hamdi bej Ohri, babai i Mentorit, i cili një jetë të tërë e shkriju për pavarësinë e Shqipërisë dhe hapjen e shkollave shqipe, prandaj u ndoq, u burgos dhe tre herë u dënua me vdekje nga Porta e Lartë. Ai mori pjesë edhe në aktin e shpalljes së pavarësisë së Shqipërisë dhe mbylli sytë pa parë të bashkuar Ohrin (vendlindjen e tij) dhe trevat e tjera Lindore dhe verilindore me Shqipërinë londineze.
Mentor Çoku lindi në 03 prill të vitit 1914 në qytetin e Elbasanit. U rritë dhe u edukua në një familje me taban kombëtar, e cila njihej në trevat e Dibrës, Ohrit e Strugës, për burrat me nam që i fali kombit, pra familja Çoku.
Mësimet e para, Mentori i mori në qytetin e lindjes Elbasan e më pas në Ohër e Tiranë. Shkollën e mesme e filloi në Beograd e më pas e përfundon në qytetin e Shkodrës, pasi veprimtaria e tij atdhetare ra ndesh me politikën anti shqiptare që qarqet shoviniste serbe zbatonin mbi shqiptarët në Kosovë e Maqedoninë Perëndimore.
Qëndrimet e tij burrërore, Mentori i pasqyronte në shtypin e kohës. Ai punoi si gazetar në shumë gazeta shqiptare që dilnin jashtë Shqipërisë si në Danimarkë, Suedi, Norvegji etj.
Si shumë intelektual shqiptarë, ashtu edhe Mentori, pushtimin e Shqipërisë nga Italia në 7 prill 1939 e priti me indinjatë të thellë edhe pse pushteti italian studentëve shqiptarë që kishin studiuar në Itali u kishte ofruar benificione dhe ofiqe të shumta shtetërore.
Në vitet 1941-1942 merret me riorganizimin e tokave të çliruara nga Mbretëria e Jugosllavisë. Prefektura e Dibrës e zgjedh deputet në kuvendin shqiptar, ku vazhdoi veprimtarinë e tij politike dhe atdhetare. Gjatë vitit 1943 doli hapur kundër regjimit fashistë me deklaratat e tij në parlamentin shqiptar, prandaj edhe doli urdhri për arrestimin e tij. I ndodhur në këto kushte, Mentori u detyrua të kalojë në ilegalitet.
Mori pjesë aktive në Lidhjen e dytë të Prizrenit, duke u angazhuar në dy fronte. Së pari zgjidhet përfaqësues i Strugës dhe Ohrit në parlamentin shqiptar gjatë vitit 1943-44; dhe së dyti gjatë qeshor-tetorit 1944 Mentori së bashku me nacionalistë të tjerë nga Struga e Ohri organizon formacionet luftarake për t’iu kundërvënë çetave çetnike serbo-sllave, të cilët të mveshura me ideologjinë komuniste ishin vërsulur sërish tokave shqiptare për ti pushtuar.
Gjatë luftimeve Mentori plagoset dy herë. Më tej, kur aradhat partizane shqiptare, të drejtuara nga Hoxhët e Mugoshët, u lëshuan si lukuni ujqish në trevat e Maqedonisë shqiptare, Mentor Çoku mendoi se rezistenca do të ishte tejet e vështirë dhe mund të sillte rrjedhoja fatkeqe për shqiptarët. Parashikimi i tij u realizua, vite më pas. Është kjo arsyeja që Mentori shkon në Shqipëri dhe në nëntorin e vitit 1944, së bashku me Mit’hat Frashërin, Hasan Dostin, Bato Rexhibin, Faik Qukun, Vasil Andonin e dhjetëra nacionalistë të tjerë të shquar, merr rrugën e mërgimit.
Me vehte mori bashkëshorten, Zihnien, kurse vajzën e tyre Valbonën, e cila ishte vetëm disa muajshe e lanë në Shqipëri tek dajallarët e saj.
Me tu vendosur në Itali, vazhdon studimet dhe njëkohësisht punon për gazetën italiane “Corriere della Sera” dhe si korrespondent i jashtëm i shtypit turk në Itali. Gjatë vititi 1947, Mentor Çoku themelon “Unionin Islamik në Perëndim”, president i së cilës ishte deri sa vdiq.
Viti 1991 për Mentor Çokun ishte viti i realizimit të ëndrrës së madhe për tu rikthyer në Shqipëri, për të parë vajzën pas rrethë gjysmë shekulli, për të parë shqiptarët të lirë e të çliruar nga kthetrat e komunizmit.
Profesor Mentor Çoku duke shfrytëzuar lidhjet e tij të krijuara ndër vite, mundësoi anëtarësimin e Sindikatës së Pavarur të Minatorëve të Shqipërisë në Internacionalen e Minatorëve të Evropës më 22 prill 1991; mundësoj vendosjen e marrëdhënieve ndërmjet institucioneve fetare islame në Shqipëri dhe atyre në botën arabe, me të cilët kishte raporte të mira. Gjatë korrikut të vitit 1993 Mentori viziton edhe Strugën dhe Ohrin duke shkrirë mallin e akumuluar ndër vite.
Mentori në kohën e pluralizmit politik nuk u bë pjesë e asnjë subjekti politik, por i qëndroi besnik thënies së tij që vazhdimisht e ripërsëriste “Partia ime është Lidhja e Prizrenit”.
Bashkimi i Shoqatave Shqiptare në Itali organizoi në Romë në datë 23 mars 1996, një manifestim paqësor në mbështetje të kërkesave të drejta të popullit të shtypur të Kosovës për vetëvendosje. Në këtë manifestim paqësor, para të Mentor Çoku do tu drejtohej të pranishmëve me fjalët: ”Zonja dhe zotërinj. Është një gjë e rrallë për mua t’u drejtohem, pasi ju jeni djemtë dhe vajzat e mija. Ndoshta, në mes tjerëve, jam veterani emigracionit të viteve 1944-1945, por edhe i 1924 dhe 1925, pasi atëherë kam lanë vendin tim që sundohej dhe sundohet nga sllavët….. Ato vende do të bashkohen në një Shqipëri Etnike. Nuk do të jetë një Shqipëri e madhe, por një Shqipëri Etnike” ….. Më pas vazhdon “Për Kosovë, gjenerata jonë ka pas një qëllim dhe sot me kryenaltësi them se po i dorëzojmë stafetën një rinie plotë vullnet, plotë dhunti dhe plot identitet kombëtar.
Këto ishin fjalët e fundit të Mentorit të incizuara pasi disa ditë më vonë, në 18 prill 1996 i mbylli sytë përgjithmonë në Romë.
Vdekja e tij qe një humbje e rëndë jo vetëm për shqiptarët, por edhe për miqtë e të njohurit e tij në Itali, Evropë e kudo në botë. (Mehmet Latifi/INA)

Gazetarja e njohur çeke: Në Shqipëri bëra muajin e mjaltit, do të vij sërish

July 7, 2015 by dgreca

Ne Foto: Bára Procházková komenton ekzekutimin e turistëve në Dukagjin, gazetarja e njohur çeke: Në Shqipëri bëra muajin e mjaltit “Do vi sërish edhe pse ndodhi vrasja e 2 bashkëkombasve të mi”./
Bára Procházková është një gazetare e njohur në Çeki.
Drejtuese e një emisioni politik në televizionin CT 24, ajo është një nga njerëzit më publikë në këtë vend.
E dashuruar me djalin që vuri kurorë dhe me bukuritë e alpeve shqiptare, vitin e kaluar ajo zgjodhi të bëjë muajin e mjaltit pikërisht në Shqipëri.
Por teksa përgatitej të vinte sërish në këtë verë, mësoi lajmin për vrasjen e dy bashkëkombasve pikërisht në malësitë ku ajo preferonte të shkonte.
Për gazetarin Roland Qafoku gjatë emisionit “Debati në Channel One”, Procházková tregoi sesi gazetares i duhej nga njëra anë të jepte lajmin e vrasjes së tyre dhe nga ana tjetër i duhej të përçonte në opinionin çek se ajo që ndodhi është një ngjarje e veçuar dhe se Shqipëria është një vend i sigurtë.
“Turistë çekë janë vrarë edhe në shtete të tjera si në Evropë, Azi, e Amerikë, kështu që kjo që ndodhi nuk është një ngjarje që na bën të ndryshojmë mendim për Shqipërinë”.
Gazetarja tejet e njohur në Çeki vlerëson punën e policisë, e cila brenda 30 orëve arriti të vërë në pranga autorin e krimit.
Dhe për t’i përforcuar të gjitha këto që thotë, gazetarja çeke deklaron: “Më prisni në Shqipëri, shumë shpejt do të vi me pushime”.

GREQI: Kthim në kohën e gurit… Ideologjia ka fituar ndaj arsyes

July 6, 2015 by dgreca

Grekët ëndërrojnë ende se kredidhënësit do t’i ndihmojnë pa i kryer obligimet e tyre. Por ëndërra do të përfundojë keq, mendon Rolf Wenkel/Papritur grekët votuan me një shumicë të madhe kundër reformave dhe kursimeve të propozuara nga kredidhënësit. Kompromisi u refuzua, por pa një kompromis nuk mund të ketë as ndihma financiare, pas 30 qershorit. E të mos flasim për paketën e tretë të ndihmave për këtë vend.
Ndonëse shumica e grekëve duan të mbeten në Eurozonë, duket se ata nuk e kanë të qartë se me çfarë rreziku po përballen. Greqisë i mungojnë paratë për të paguar obligimet e saj dhe borxhet prej 3,5 miliardë euro ndaj BQE. Ndërkohë që vetëm BQE mund të ndihmojë këtë vend të shpëtojë nga falimentimi.
Shefi i BQE, Mario Draghi mendon ndërkohë se vendet e BE nuk do ta mbështesin, në qoftë se ai do të ndihmojë Bankën Qendrore greke me kredi. Në rast se këto kredi nuk jepen, ky do të ishte fundi i anëtarësisë së Greqisë në BE.
Edhe pak javë
E qartë është se pa marrëveshje me kreditorët, Greqia do të mund të mbijetonte vetëm edhe disa javë. Çdo ditë e më shumë qytetarët po nxjerin me miliarda euro nga llogartië bankare, sepse ata e kanë humbur besimin ndaj bankave të tyre. Në Greqi nuk janë të cënuara vetëm bankat, por edhe i gjithë sistemi real ekonomik, i cili vuan nga mangësia e mukndësisë së pagesave. Më së largu deri në fund të korrikut, shteti do të falimentojë, sepse nuk do të ketë para për pagesat e rrogave dhe pensioneve.
Greqia mund të jap letra me vlerë, paralelisht me euron, por këto letra do të humbin vlerën shumë shpejt. Ekspertët thonë se Greqia duhet t’i kthehet Dhrahmisë, me shpjegimin se kjo do të ndihmonte Greqinë që të jetë më konkurrente në tregun e mallrave.
Vite të rënda
Kjo mbase është e mundur, por Grekët i presin vite të rënda. Deri në arritjen e sukseseve të para do të kalojnë disa vite dhe kjo nuk është e sigurtë. Deri në stabilizimin e prodhimit vendor, gjërat duhet të importohen. E me një Dhrahmi të dobët, kjo do të ishte gati e pamundur.
“Le Monde diplomatique” kujton me të drejtë edhe një aspekt tjetër: mundësinë e destabilizimit të plotë të këtij vendi. Futja e një monedhe tjetër mund të sjellë deri te thellimi edhe më i madh i humnerës mes të pasurve dhe të varfërve.
Negociatat e reja
Ky mbase është edhe shkaku pse presidentët dhe kryeministrat e vendeve të Eurogrupit kanë pranuar që menjëherë të martën të debatojnë edhe një herë gjendjen. Pushtetmbajtësit në Greqi ndoshta nuk janë fare të interesuar për euron, por e dinë shumë mirë lojën poker. Ata e dinë se BE, NATO dhe OECD kanë nevojë për Greqinë. Teatri me Greqinë do të vazhdojë edhe në verë. Për vendime të rëndësishme kërkohet pëlqimi i të gjitha vendeve anëtare. Kjo detyron vendet anëtare që të bëjnë edhe kompromise. Por bashkëpunimi me këta kaotikët në Athinë do të jetë shumë i vështirë.

Ambasadori Donald Lu në Durrës: Në gjyqësorin shqiptar, raste shokuese korrupsioni

July 6, 2015 by dgreca

Disa gjyqtarë dhe prokurorë duhet të hiqen menjëherë nga puna dhe në radhët e tyre duhet të ketë arrestime. Ky është opinioni i ambasadorit amerikan në Shqipëri, Donald Lu.
Deklarata e tij, më e ashpra ndaj gjyqësorit shqiptar që pas mbërritjes në vendin tonë, u bë gjatë një konsultimi publik të radhës për reformën në drejtësi, që u zhvillua sot në Universitetin Publik “Aleksandër Moisiu” të Durrësit.
“Muajin e fundit theksova se disa gjyqtarë dhe prokurorë në Shqipëri meritojnë të pushohen nga puna, e disa prej tyre të përfundojnë në burg. Kjo mori vëmendjen e të gjithë medias, por gjithashtu unë thashë se ka gjyqtarë dhe prokurorë të ndershëm që meritojnë të punojnë në një sistem drejtësie të pastër nga korrupsioni. Ne të gjithë kemi nevojë të përpiqemi për gjyqtarë e prokurorë të pastër, siç kemi nevojë të identifikojmë që të dënohen të korruptuarit”, deklaroi Lu.
Ambasadori Lu tha se, në këndvështrimin e tij duhet të kthehet menjëherë besimi i publikut te sistemi i drejtësisë, që po përballet me problemin e rëndë të korrupsionit.
“Një demokraci e pastër dhe funksionale ka institucione dhe një proces të identifikimit të korrupsionit, dënimin e përgjegjësve dhe sigurimin e drejtësisë për njerëzit. Vitet e fundit, asnjë prokuror dhe vetëm 3 gjyqtarë janë dënuar për korrupsion në Shqipëri”, theksoi Lu.
Në fund të diskutimit Ambasadori solli në vëmendje një rast konkret, atë të një gruaje shqiptare të dhunuar nga bashkëshorti, i dënuar më parë për krime seksuale, të cilit gjykata i dha kujdestarinë e 2 nga 3 fëmijët e çiftit, duke thyer zemrën e një nëne dhe besimin e një qytetareje tek drejtësia.(Ne Foto:Ambasadori Lu ne Durres, 6 korrik 2015)

Fushë Krujë, Shtëpia që “mbjellë’ Paqe në Shqipëri

July 6, 2015 by dgreca

Nga Ahmet ZANI/
Konfliktet e lindura gjatë peridhës së gjatë të tranzicionit në Shqipëri, dhe fenomeni i gjakmarrjes, një traditë e cila nga mbetur në mjedisin shqiptar, kanë shkaktuar plagë të rënda në shoqërinë tonë. Ky fenomen është i përhapur konkretisht në zonat rurale dhe sidomos në pjesën veriore të vendit. Në vendin tonë dikur vepronte ligji i Kanunit, ka lënë gjurmë të thella. Ndoshta kjo vjen edhe nga fakti i mosveprimit efikas të shtetit. Kur nuk vepron Ligji, vepron Kanuni. Shteti dhe Ligji, ende nuk po veprojnë për të ndihmuar shtresa që vuajnë nga fenomeni i konflikteve apo më rëndë i gjakmarrjes.
Për t’u ardhur në ndihmë familjeve që vuajnë nga konfliktet e ndryshme në Shqipëri operojnë disa organizata, që kanë krijuar përvojë në zgjidhjen ligjore të këtyre çeshtjeve.Një ndër to është edhe Shtëpia e Paqes në Fushë Krujë.
Shtëpia e Drejtësisë dhe Pajtimit Kombëtar po operon prej nga viti 2009 me qendër në qytetin e Fushë Krujës me një shtrirje gati në tërë vendin. Roli i kësaj organizate ka dhënë frytet e saja duke shuar mjaft konflikte dhe çeshtje konfliktuale tepër problematike. Krijimi i kësaj organizate ka ardhur si kontribut nga disa njerëz që kërkojnë bashkpunim në arritjen e minimizimit të fenomeneve që rëndojnë shoqërinë. Janë persona që kanë kredibilitet në shoqëri, intelektualë dhe aktivistë të cilët ushtrojnë veprimtari aty ku plaga e rëndë e gakmarrjes ka rënduar një pjesë të shoqërisë shqiptare. Këta burra nuk reshtin të dhurojnë paqe të shuajnë konflikte të bëjnë pajtime duke ofruar gëzimin e munguar ku i dhembin atyre familjeve që përjetojnë ankth dhe nuk gëzojnë liri si tërë shoqëria.
Agim Loci drejtor Ekzekutiv i i SHDPK ( Shtëpia e Drejtësisë dhe Pajtimit Kombëtar), dallohet si një nga organizatorët dhe kontribuesit me peshë në këtë fushë, i ndihmuar nga mjaft iniciatorë të tjerë që në vijimësi operojnë aty ku ndihet kjo plagë e shoqërisë.
Z. Loci prej disa kohësh ndodhet në SHBA në disa aktivitete i cili ka treguar për angazhimin e tij dhe ndihmesën nga organizata të këtij vendi për t’i ardhur në ndihmë kësaj organizate në Shqipëri. Ai tha për gazetën se është në bashkëbisedime me partnerë nga Amerika, dhe se po bën përpjekje në përmirsimin e rolit të veprimtarisë së kësaj organizate në vendin tonë. Ai ka organizuar disa veprimtari në Nju Jork dhe ka marrë pjesë në veprimtari të komunitetit atje.Gjithësesi në Shqipëri organizata vazhdon normalisht veprimtarinë e saj.
Rezultatet e kësaj organizate duket sa kanë dhënë efektet pozitive. Misionaret e Paqes punojnë në terren dhe natyrshëm vështirësitë janë prezente, por këta kontribues nuk e kanë ndalur veprimtarinë e tyre duke arritur dhe rezultate konkrete. Sa dëshmon drejtori ekzekutiv Agim Loci mënyra e ndërmjetësimit për të arritur pajtmin është një proçes shumë i vështirë por jo i pamundur. Vështirësitë janë hasur sidomos tek nënat e viktimave duke sjellë në kujtesë dy raste në Kamzë. Më tej ai ka shtuar se shqiptarët po i thërrasin arsyes dhe logjikës duke shtrirë dorën e pajtimit. Po vijojmë me institucionet shtetërore dhe disa organizma bashkpunimin në minimizimin e këtij fenomeni. Në këtë vit priten që 11 familje të arrijnë të shtrijnë dorën e pajtimit, c’ka është sukses për tërë shoqërinë.
Shtrirja e kësaj organizate të misionit të Pajtimit është në Shkodër, ku bashkpunojnë Zef Dani, Simon Tarazaj, Fran Kelmendi, në Lezhë Xhek Bushi nga Kruja dhe Zef Nikolli gjithashtu në Krujë ,Haziz Aruçi, Artur Karaj , Xhavit Cangu, Kujtim Shima, ndërsa në Tiranë Riza Loci , Kujtim Kolaveri dhe grupe të tjera në disa rrethe të vendit. Të gjitha këto pajtime janë nën kujdesin dhe prioritetin e drejtori ekzekutiv Agim Loci i cili për ambjente dhe aktivitete që organizohen ka hapë dyert e shtëpisë së tij në Fushë Krujë.
Në këto prçese pajtimi një rol të veçantë po luajnë dhe punonjëset sociale dhe psikologe që punojnë në terren në bindjen e nënat dhe motrat e viktimave, siç janë Enkelejda Kotarja, Ueda Damjani etj., që duhen përgëzuar për ndihmesën e tyre.
Nga të dhënat rezultojnë se në tërë këta zona ku operon kjo organizatë janë rreth 300 familje të ngujuara që ndahen në tre kategori, nga këta 200 janë në ngujim të plotë, 70 të pjesshëm që dalin me frikën e gjakmarrjes dhe 30 të tjera ruhen plotësisht për t’ju ruajtur konflikteve. Sakaq për fëmijët e ngujuar janë organizuar shumë aktivitete mbreslënëse pranë shtëpisë së Paqes në Fushë Krujë për t’ë larguar sado pak nga vemendja e brezave të rinj frikën dhe dëshpërimin. Një organizatë e tillë është ngritur dhe në Amerikë, ka informuar Loci duke dhënë dhe asistencë dhe bashkpunim ndërinstitucional kundër gjakmarrjes në shërbim të punës në vendin tonë.
Për këtë organizatë kanë dhënë falenderime shumë institucione, individë por më së shumti mbetet institucioneve të mbështesin iniciativën e organizatës Shtëpi e Drejtësisë dhe Pajtimit Kombëtar në Fushë Krujës.
Disa gazetarë të huaj kanë inspektuar zona të vendit tonë aty ku janë famlije të ngujuara për të ndjekur fenomenin e ngujimit ndërsa kanë lënë mbreat e tyre nga misioni i kryer nga kjo organizatë.
Organizata, përmes drejtorit Ekzekutiv dhe akivisteve, ka marrë pjesë për të parën herë ne Paradën Ndërkombëtare të Emigrantëve, organizuar në Nju Jork me 20 Qershor 2015.