Komunitet – Page 206 – Dielli

MESAZH PËR KOMUNITETIN NË QUEENS E RRETHINA: SIILINI FËMIJËT TUAJ NË SHKOLLËN SHQIPE ”KUQ E ZI”

July 26, 2016 by dgreca

* Për këtë vit do të hapim edhe një klasë të re për shkollën kuq e zi në Astoria-Queens, NY/

* Kërkojmë ndihmën e komunitetit!/

Nga Kristaq Papa/

Të nderuar miq, bashkombas,banorë të Queensit, e veçanrisht të Astorias e rrethinave të saj! Ju njoftoj se fëmijët e Mësonjtores “Kuq e Zi” i mbyllën me sukses mësimet e këtij viti shkollor dhe një pjesë e tyre tani janë me pushime në Shqipëri me gjithë prindërit e tyre. I përgëzoj të gjithë ata që kontribuan. Për vitin e ardhshëm shkollor ne i kemi të gjitha mundësitë për të hapur një klasë të re me fëmijë të moshës 6 deri ne 10 vjeç. Duke falenderuar gjithë prindërit e nxënësve e në veçanti Kryetarin e Bordit të Prindërve Z Altin Bundo,miqtë e shkollës: gazetarin Dalip Greca,Editor Gazetës”Dielli”, gazetë e Federatës Panshqiptare të Amerikësi “Vatra”,Dr Skënder Myrtezani ,Kryetar i degës së Vatrës në Queens, zonjën Nazo Veliu-sekretaren e Vatrës, TV Kultura Shqiptare me pronar Z. Adem Belliu për ndihmën në vazhdimësi që kanë dhënë në konkretizimin me sukses të kësaj nisme atdhetare. Në mënyrë të veçantë falenderojmë, edhe ne emër të prindërve ,z. Kristaq Foto, biznesmen atdhetar, në mjediset e biznesit të të cilit funksionon shkolla. Me anë të këtij mesazhi kërkojmë që të informojmë prindërit për këtë mundësi të re që u krijohet për fëmijët e tyre, që ata të mësojnë të flasin e të shkruajnë, të lexojnë gjuhën e bukur shqipe. Pikërisht informimi është vështirësia më e madhe që ne po ndeshim realisht në punën tonë gjatë dy viteve që funksionon shkolla Shqipe. Pradaj u bëjmë thirrje të gjithë shqiptarëve që banojnë në Queens ,gjithë biznesmenëve e intelektualëve, që kanë mundësi të komunikojnë me bashkëkombasit që të na ndihmojnë duke e kumtuar me gjithë mjetet e mundësitë këtë njoftim. Afrojini fëmijët tuaj dhe të miqëve tuaj pranë shkollës shqipe!Ne duam që të çelim edhe një klasë tjetërër këtë vit shkollor që vjen me fëmijë shqiptarë që duan të mësojnë gjuhën e vendi të tyre.Ju lutem na ndihmoni!

Rregjistrimi do të vazhdoje deri në datën 25 Gusht 2016 ! Për më shumë informacion ,kontaktoni në tel nr 1-917 832 2376 . Ju faleminderit për mirëkuptimin dhe ndihmën tuaj !

***

Po shkepusim nga arkivi i Diellit shkrimin ne celjen e shkolles shqipe ne Astoria, me 7 Mars 2015

NË FESTËN E MËSUESIT U HAP E PARA SHKOLLË SHQIPE NË ASTORIA, NY

7 Mars 2015, Astoria, New York/

Sot në ditën e Festës Kombëtare të Mësuesit, në Astoria- Queens, New York, u cel e para shkollë shqipe në historinë 150 vjecare të komunitetit shqiptar të Amerikës. Shkolla shqipe janë hapë, mbyllë, e rihapë, në shumë shtete e qytete të Amerikës, përgjatë një shekulli. Përmendim shkollat në Boston, që më 1911, shkollat e New York-ut, Chikagos, Ohios, Detroitit, por në Astoria, një zonë e dominuar nga komuniteti grek, nuk ka pasë shkollë shqipe.
Një grup shqiptarësh që jetojnë në Astoria, Nju Jork, me në krye Kristaq Papën, ndihmuar nga Kristaq Foto, që lëshoi mjedisin për klasën e parë pranë Kafesë”Kuq e Zi” , dhe një grup aktivistësh shqiptar, që dhanë mbështetjen e duhur, zgjodhën Festën e Mësuesit për ta celë shkollën shqipe.
Së bashku me Adem Belliun, pronarin e TV Kultura Shqiptare, dhe Veiz Belliun, shkuam nga Bronxi në Astoria, që në mëngjes për t’u bërë pjesë e gëzimit të fëmijëve, mësuesëve, prindërve , por dhe ish mësuesëve, që festojnë së bashku këtë festë, atë të Mësuesit dhe hapjen e shkollës shqipe.
Dhoma e vënë në dispozicion për klasën e parë të shkollës shqipe është zbukuruar me flamujë shqiptarë dhe amerikan; në një kënd janë portretet fotografike të Nene Terezes, smail Qemalit, Isa Boletinit, Nolit, Konicës, portrete të artistëve, sic është ai Vace e Zelës etj. Një bibliotekë modestë me libra shqip është në dispozicion të shqiptarëve.
Në këtë festë organizatorët kanë ftuar edhe ish mësues të shkollës shqipe, që tashmë jetojnë në këtë zonë.
Festën e ka hapur inisiatori kësaj lëvizjeje arsimore, Kristaq Papa. 7 Marsi, tha ai,është një festë Kombëtare. Kjo ditë, ka hyrë në Historinë tonë Kombëtare, për shkak të Mësonjëtores së parë në Gjuhën Shqipe të Korçës, që është shkolla e parë në gjuhën shqipe. Ashtu si patrioti Diamanti Terpo, ofroi shtëpinë e tij në Korcë për shkollën shqipe me 7 Mars 1887, sot me 7 Mars 2015, familja e Kristaq Fotos, po na dhuron këtë mjedis për të hapur shkollën shqipe, me qëllim që fëmijët e lindur në Amerikë, të mësojnë gjuhën e bukur të prindërve të tyre, gjuhës së bukur shqipe.
Larg pompoziteteve, ceremonia është e thjeshtë, por është e ngarkuar me emocione. Kristaq Papa ka marrë pranë për ta drejtuar së bashku festën Keti Foto, e bija e Entela e Kristaq Fotos, mbesa e gjyshërve Milika dhe Illo, e cila e ka mësuar gjuhën shqipe falë kontributit familjar, ku flitet ship. Mësuesit që janë në sallë emocionohen kur fëmijët e vegjël, që do të jenë nxënës të kësaj shkolle, u dhurojnë nga një trëndafil. Mësuesit Milika Foto, Leonidha Xuhani, Bujar Bejkollari, Natasha Muzaka, Kujtime Bejkollari, Vita Bano, apo dhe ish mësuesit Kristaq Papa, Veiz Belliu, Adem Belliu si dhe autori i këtyre radhëve ndjehen të respektuar tek marrin lulet dhe përqafimet e fëmijëve. Milika Foto, thotë para kamerave, se pas shumë vitesh në emigracion, për të parën herë po provon emocione sikur të ishet para nxënësve të saj. Bujar Bejkollari, mësues nga Përmeti ndjehet i gëzuar në këtë mjedis festiv dhe i sjell ndërmend vitet e mësuesisë. Ai falenderoj Kristaq Papën për nismën dhe Familjen Foto për dhurimine mjedisit për shkollën shqipe. Mirë do të ishte, propozon ai, që gjithë ky grup veprimatrësh të cështjes Kombëtare, të krijonin një nëndegë të Vatrës, e cila ka dhënë kontributin e vet modest me mbështetjen që i ka dhënë kësaj nisme, qoftë me librat shkollore, por edhe me bibliotekën modeste të dhuruar kësaj qendre shqiptare.
Mark Qehaja nga Tropoja, ka sjellë dy fëmijët e vet, Lizën dhe Denisin. Ai flet i emocionuar në ceremoninë e celjes së shkollës, dhe ofron të gjithë ndihmën e tij që kjo shkollë të ketë të ardhme. Besian Krasniqi, një ndër mbështetësit e kësaj nisme, nuk u ofrohet kamerave, por ndjehet mirë për gjithcka ndodh në këtë mjedis komëbtar. Kristaq Foto, pronar i kafenesë “Kuq e zi”, tregohet modest në dhurimin e këtij mjedisi për shkollën shqipe, por ai uron që kjo klasë- shkollë , nesër të ketë një mjedis më komod dhe të kthehet në një akademi shqipatrësh në një zonë që kurrë nuk ka patur, jo shkollë shqipe, por asnjë institucion fetar a kulturor, ndërkohë që komunitetet e tjerë, vecanërisht komuniteti grek, kanë me dhjetëra shkolla e kisha, ku ruhet gjuha dhe traditat kombëtare.
Fëmijët ndjehen të gëzuar, edhe pse disa nga ata, që nuk kuptojnë shqip, duken paksa të hutuar në ditën e parë, por gjithësesi i gëzohen festës. Nxënësja Liza Qehaja flet mirë shqip dhe mbanë veshur bluzë e shall me simbole kombëtare. Denisi, i vëllai, edhe pse është i pasigurtë në shqipen e tij, gëzohet hapjes së shkollës shqipe; Reon Krasniqi, është i gëzuar, edhe për faktin se babai i tij, Besian Krasniqi, ishte një ndër mbështetsit aktiv të hapjes së shkollës. Ernei Tollja, Naile Tollja, Christian Bombaj, Eleni Sikollo, Odeta dhe Kamela Papaj, Donald Rapaj, Donil Beqo, Eda, Elsa dhe Joana Kulla sot nisin së bashku rrugën e bukur të mësimit të gjuhës shqipe dhe do ta ruajnë në kujtesë si një ndër ditët më të gëzuara. Inxhinier Ilmi Mance, ka ardhur nga Bronxi, po ashtu Jorgji Muzaka, eshte bere pjesë e festës, studiuesi Illo Foto, ndjehet i gëzuar që i biri, Krstaqi, ka dhuruar këtë mjedis për shkollë, Entela, është një ndër organizatoret e festës. Familja pronare e kësaj kafeneje ka dhuruar ëmbëlsira për fëmijët.
Televizioni Kultura Shqiptare e ka filmuar ceremonine festive.
Le t’u urojmë mësuesve dhe nxënësve të shkollës së parë shqipe në Astoria:Gëzuar Ditën e parë të Shkollës Shqipe!
Mësuesëve kudo që janë Gëzuar Festën e Mësuesit!

LULZIM BASHA NE KONVENTEN E DEMOKRATEVE TE AMERIKES

July 25, 2016 by dgreca

Partia Demokratike e Shqiperise ka njoftuar se Kreu i demokrateve shqiptare Lulzim Basha eshte ne Konventen e Demokrateve Amerikane qe nis punimet sot ne Filadelfia.Njëheresh, në ditët e Konventës të Demokratëve, do të ketë takime me personalitete të larta amerikane, me senatorë e kongresmenë amerikanë, me zyrtarë të lartë të Departamentit Amerikan të Shtetit , etj. Kjo Konventë do të shpallin zyrtarisht Hillary Clinton – kandidate e demokratëve për Presidente e Amerikës. E, kjo, do të jetë hera e parë në historinë amerikane që një femër garon për Presidente e SHBA. Ne faqen e facebook-ut qe mban emrin Lulzim Basha, fansat demokarte i kane uruar atij rrugetim te mbare-Tu priftë e mbara Lulzim Basha!, ndersa dje ne nje nga web-sitet me te lexuara, Syri.net, u botoi kete koment :

Pikëpyetjet e udhëtimit të Bashës në Uashington/

Lulzim Basha sapo ka zbritur në Uashington dhe pas pak do të jetë pjesë e natës së parë të Konventës Demokrate, ku do të zyrtarizohet Hillary Klinton si kandidatja e parë femër për President të SHBA-së. Tre gjëra të tërheqin vëmendjen në këtë udhëtim të Lulzim Bashës për në Uashington.

1. Basha është i pari lider i demokratëve shqiptarë, që merr pjesë në një konventë demokrate në SHBA, kjo për faktin se aleatët tradicional të demokratëve shqiptar në Uashington janë republikanët. Por duke parë reaksionin dhe kundërshtitë që vet republikanët kishin për Donald Trump, siç duket ka bërë që lideri i të djathtës shqiptare të mos mendohet dy herë dhe të pranojë ftesën e ish-Sekretares Clinton, sot kandidate e demokratëve për President të SHBA.

2. Hillary Clinton është pjesë e familjes, që ka ndihmuar më së shumti shqiptarët në këtë çerek shekulli, është ish-Zonja e Parë e Amerikës në kohën e çlirimit të Kosovës. Çdo shqiptar do ta ketë të pamundur të mos i gëzohet rikthimit të Klintonëve në Shtëpinë e Bardhë, këtu nuk mund të bëjë përjashtim as lideri i të djathtës shqiptare Basha. Si Sekretare Shteti, të parin zyrtar të huaj që priti në Uashington ishte ish-Kryeministri Sali Berisha. Gjithashtu ishte edhe zyrtarja më e lartë perëndimore, që vizitoi Shqipërinë me rastin e 100-vjetorit të pavarësisë së shtetit shqiptar, vizitë në të cilën bëri premtimin e madh: “Edhe në 100 vitet e ardhshme, SHBA do të jenë miku juaj më i madh”. Gjithashtu Hillary Clinton është e para Sekretare Shteti, që ka falendëruar dhe uruar një ministër të Jashtëm shqiptar, kur ky i fundit është larguar nga diplomacia. E ka bërë Clinton me Lulzim Bashën. “Ju falenderoj për bashkëpunimin dhe pres të punojmë sërish së bashku në funksionet e reja, që do të merrni”, ishte letra e Sekretarës Clinton, kur Basha u largua nga ministër i Jashtëm.

3. Ka një ftesë për liderin e të djathtës, Basha, kreun e një partie të majtë, Meta, ish-Kryeministrin e majtë Majko, por jo për Kryeministrin aktual të majtë Rama. Arsyeja akoma nuk dihet. Rama është bërë edhe protagonist i panevojshëm, duke sulmuar hapur Donald Trump, gjë që nga mediat amerikane nuk është pritur pozitivisht. Për amerikanët është e paperceptueshme që një Kryeministër i një vendi me demokraci të pastabilizuar dhe pa ndikim në politikën botërore, të mësojë amerikanët se çfarë duhet të bëjnë. Rama duke dashur të jetë sa më afër Clintonëve, me delirin dhe protagonizmin e tij, mund të ketë grisur ftesën që demokratët kishin për të. Clintonët nuk kanë nevojë për Edi Ramën, që të mundin Trump. E vetmja nevojë që ata kanë për Kryeministrin shqiptar, është që ky të sillet si një demokrat në vendin e tij, gjë që nuk po e bën.

SHSHA NË ÇIKAGO ZHVILLON AKTIVITET NË ATDHE

July 25, 2016 by dgreca

Diaspora shqiptare në Amerikë tash e një shekull është vënë në shërbim të çështjes shqiptare,për lirinë dhe pavarësinë e Kosovës,të demokratizimit të Shqipërisë dhe të zgjidhjes së drejtë shqiptare në hapësirën etnike në Maqedoni,Mal të Zi,Preshevë-Medevegjë dhe Çamëri.Në rrugëtimin e shumë organizatave shqiptaro-amerikane në Amerikë,tash sa kohë SHSHA-ja në Çikago është bërë një zë i fuqishëm karshi çështjes shqiptare në Ballkan,ku përmes aktivitetit të programuar ka afruar një varg projektësh politike,ekonomike dhe kulturore për të ndihmuar dhe thelluar marrëdhëniet e miqësisë së përjetshme me Amerikën.

Oda Ekonomike Amerikë-Izrael dhe SHSHA organizuan me sukses konferencën ekonomike për imvestime në ekonomonië e Kosovës dhe projektet që afroi delegacioni shtetëror ishin atraktive për kompanitë,bankat,bizneset dhe afaristët tjerë në Çikago dhe më gjerë.Daniel Shure,përfaqësues i OEAI dhe mik i respektuar i popullit shqiptar,ka ritheksuar se ndaj popullit mik shqiptar në Ballkan do të bëjmë krejt të mundurën që të ndihmojmë zhvillimin ekonomik përmes investimeve amerikane.OEAI-së i ka dyert e hapura për projektet që na vijnë nga Kosova,Shqipëria dhe hapësira etnike në Maqedoni,thuhet në Çikago.

Bashkëpunimi shqiptaro-hebrej do të thellohet edhe në fushat tjera të bashkëpunimit në mes të dy popujve shqiptaro-hebrej dhe të institucioneve të shtetit amerikan,thotë Skënder Karaçica,drejtor ekzekutiv i SHSHA-së.Për të hedhur dritë nga kujtesa historike për praninë dhe shpetimin e hebrejve gjatë Luftës së Dytë Botërore Kosovë-Shqipëri,përfaqësuesit e SHSHA-së afruan një mori të botimeve historike,me kronikat arkivore dhe fotografi miqëve hebrejë dhe kështu u mbyll njëherë e mirë propaganda antishqiptare si vrasës të hebrejve të sajuar nga lobi serbo-grekë.Në sajë të këtij bashkëpunimi,SHSHA -ja tashti është bërë anëtare e bordit të drejtorëve të OEAI-së dhe në shtator në Çikago pritet të organizohet manifestim madhështor me rastin e vënies së Pllakës Përkujtimore në Muzeun Holokaust në Skokie me mbishkrimin:Prania dhe shpetimi i hebrejve gjatë LDB-së Kosovë-Shqipëri dhe Tryeza Tematike investimet amerikane në ekonominë e të dyja vendeve.

Këto ditë vere të pushimeve në Veleshtë të Strugës po qendron sekretari i SHSHA-së Mahmut Skenderi,i cili do të ketë takim pune me Kryesinë e Odës Ekonomike të Maqedonisë Veri-Përendimore me kryetarin Nebi Hoxha në Shkup për bashkërenditjen e aktiviteve në relacionet diaspora shqiptare në Amerikë me institucionet politike,ekonomike dhe intelektuale në hapësirën etnike në Maqedoni.(INA)(Foto-Arkiv-Dielli)

Skënder Karaçica

Executive Director

Albanian-American Association
of Intellectuals Businessmen and Activists
Phone: +1 (708) 983-5394 | Email: S_Karaqica99@Hotmail.Com

SHBA- SHQIPERI:Garda kombëtare e New Jersey-it, dhuroi dy projekte të reja për komunitetin në Shqipëri

July 22, 2016 by dgreca

Në kuadër të bashkëpunimit dypalësh ndërmjet Forcave të Armatosura Shqiptare dhe FA të Shteteve të Bashkuara të Amerikës, në ambientet e Shkollës së Mesme Mjedë, këto ditë u zhvillua ceremonia e përurimit të dy projekteve të reja për komunitetin, ai i ristrukturimit të Shkollës së Mesme Mjedë dhe Qendrës Shëndetësore Laç, Vau i Dejës. Realizimi i këtij projekti u bë i mundur në sajë të bashkëpunimit midis ushtarakëve të Forcës Ajrore të Gardës Kombëtare të New York-ut dhe New Jersey-it, si dhe ushtarakëve shqiptarë. Projekti, i cili filloi më 20 qershor 2016, është vijimësi e projekteve të Ndihmës dhe Asistencës Humanitare për komunitetin, (HCA). Në ceremoninë e organizuar me këtë rast, ishin të pranishëm Zv.ministri i Mbrojtjes z. Petro Koci, Shefi i Shtabit të Përgjithshëm të FA, Gjeneralmajor Jeronim Bazo, zv.Ambasadori i SHBA, z.Munis, Komandant i Gardës Kombëtare të New Jersey-it, Gjeneral Brigade Cunnif, Komandanti i Forcës Tokësore, Gjeneral brigade Nazmi Cahani, Drejtoresha e Drejtorisë së Bashkëpunimit Civilo-Ushtarak, kolonele Manushaqe Shehu, Kryetari i Bashkisë së Vaut të Dejës, z. Zef Hila, përfaqësues të zyrës së ODC në Ministrinë e Mbrojtjes, përfaqësues nga Korpusi i Paqes, nxënës, mësues, mjekë dhe infermierë të qendrës, si dhe banorë të shumtë të zonës. Zv.ministri i Mbrojtjes z. Petro Koci, në fjalën e tij përshëndetëse u shpreh se, ishte krenar që merte pjesë në këtë ceremoni të veçantë, në inagurimin e një pojekti të rëndësishëm, që është pjesë e asistencës humanitare për komunitetin. Ai theksoi se ky projekt realizohet me ndihmën e Gardës Kombëtare të New York-

ut dhe Gardës Kombëtare të New Jersey-it.” Kjo, vijoi më tej zv. ministri Koçi dëshmon se, bashkëpunimi, sidomos ai ushtarak mes SHBA-së dhe Shqipërisë, është në nivelet më të larta se sa ndonjë herë tjetër”. Gjithashtu pjesmarrësit i përshëndeti dhe Gjeneral brigade Cunnif, i cili falënderoi të gjithë specialistët dhe ushtarakët që realizuan këtë projekt të rëndësishëm për komunitetin. “Është nder për mua që jam këtu dhe mar pjesë në këtë ceremoni. Mbështetja dhe lidershipi që keni ofruar ju gjatë gjithë këtij procesi janë të lavdërueshëm dhe për këtë ju falënderoj. Partneriteti në projekte asistence humanitare janë mbështetje e drejtpërdrejtë e thelbit të strategjisë sonë kombëtare dhe nismave për bashkëpunim në fushën e sigurisë, si dhe ofrojnë mundësi të rëndësishme trajnimi për personelin ushtarakë amerikan, duke i përmbushur njëkohësisht nevojat bazë ekonomike dhe sociale të popullit shqiptar”, u shpreh ndër të tjera gjeneral brigade Cunnif. Më tej gjeneral Cunnif, pasi vlerësoi punën e bërë në realizimin me sukses të këtyre dy projekteve, të cilat do ti shërbejnë komunitetit në përmirësimin e jetës sociale dhe ekonomike, vuri në dukje faktin se Qendra Shëndetësore, e vetmja në këtë zonë, do ofrojë shërbim 24 orë dhe do u shërbejë më shumë se 13 mijë banorëve, dhe përfundimi i ristrukturimit të saj, ndihmon stafin mjekësor për t’i shërbyer më mirë banorëve të këtij komuniteti, ashtu si dhe Shkolla e Mesme Mjedë, e ristrukturuar tashmë, do i shërbejë 400 fëmijëve, ku shumë prej tyre janë fëmijë ushtarakësh. “Forcat e Armatosura shqiptare kanë dhënë një mbështetje të fuqishme për realizimin me sukses të këtyre projekteve, të cilat mundësuan makineri të rënda xheniere, mbështetje me trupa xheniere, transportin gjatë gjithë misionit, strehimin e më shumë se 30 personave gjatë gjithë misionit, përkthyes, siguri përmes Policisë Ushtarake si dhe Marrëveshje për Mbështetjen e Dyanshme, për kontrata ushqimi dhe nevojat e transportit, përfshirë këtu dhe mikpritjen e qytetarëve, mundësuan suksesin tonë këtu. Faleminderit”, ka përfunduar përshëndetjen e tij gjeneral Cunnif. Nga ana e tij, zv.ambasadori i SHBA në Shqipëri z.Munis, në emër të popullit amerikan. e konsideroi marjen pjesë në këtë inaugurim, jo thjesht si një inaugurim ndërtese por si një investim për të ardhmen e Mjedës dhe Shqipërisë. Ndërkohë, Kryetari i Bashkisë së Vaut të Dejës, z. Zef Hila, pasi falënderoi të gjithë pjesmarrësit për realizimin e këtyre projekteve të rëndësishme në ndihmë të komunitetit, nënvizoi faktin se, ka shumë për t’u bërë për përmirësimin e shërbimeve, infrastrukturës dhe jetës së qytetarëve tanë, për të ndërtuar shkolla më të mira, duke u shprehur se, këto projekte humanitare i shërbejnë dhe krijojnë lidhje të forta mes SHBA dhe Shqipërisë. Projekti amerikan “Ndihmë dhe Asistencë Humanitare ndaj komuniteteve” (HCA), në Qendrën Shëndetësore të Vaut të Dejës dhe në Shkollën e Mesme Mjedë, Shkodër, u zhvillua dhe realizua në dy faza:
Në fazën e parë (20 qershor deri 01 korrik 2016), u realizuan këto punime: Qendra Shëndetësore, Rikonstruksion i plotë i çatisë, termoizolimi i saj, riparimi i ndarjeve të brendshme, vendosja e dyerve e dritareve duralumini, riparimi i rrjetit elektrik dhe hidraulik, ngritja e fiksimi i rezervuarit të ujit, realizimi i shkarkimeve të jashtme dhe lyerja e ndërtesës nga jashtë. Shkolla e Mesme Mjede: Riparimi i mureve të brendshme, riparimi i dritareve, sistemimi i ambienteve të jashtme, lyerja e një pjese të ambienteve të brendshme, përfshi tualetet. Gjithashtu u bë lyerja, vendosja e dyerve dhe sistemimi i këndeve sportive.. Në fazën e dytë (2 deri 16 korrik 2016), për realizimin e projektit, ju sigurua pjesëmarrësve mbështetje me strehim, akomodim dhe mbështetja logjistike. Fillimisht ushtarakët amerikanë u njohën me zonën, traditat, kulturën, historinë, etj. Mbas punës u zhvilluan aktivitete kulturore-turistike si: Vizitë në Hidrocentralin Vau Dejës, Vizitë në Kalanë e Shurdhahut (në afërsi të Komanit), vizitë në kalanë dhe qytetin e Shkodrës, udhëtim me anije në liqenin e Vau Dejës, etj. Theksojmë se Garda Kombëtare e New Jersey-it, për mëse 20 vite ka realizuar dhjetra projekte në ndihmë të komunitetit në Shqipëri, një pjesë e të cilave janë pasqyruar në gazetën “Dielli”.{SH.K}

SHQIPËRIA DHE KOSOVA PJESË E MUZEUT TË INSTRUMENTEVE MUZIKORE NË ARIZONË

July 19, 2016 by dgreca

Nga Hajro Hajra/Arizonë/

Në mesin e afro 30 muzeve të instrumenteve muzikore sa ka sot në gjithë botën është edhe Muzeu i instrumenteve Muzikore (Musical Instrument Museum), në kryeqytetin e Arizonës, Feniks (Phoenix), i hapur në prill të vitit 2010. I themeluar nga Robert J. Ulrich (koleksionist i pasionuar i artit të Afrikës dhe entuziast i muzeve të botës), ish-drejtor ekzekutiv dhe kryetar i Korporatës “Target”, ky është më i madhi dhe më i pasuri muze i këtij lloji në gjithë botën. I vendosur në një ndërtesë dykatëshe në kryqëzimin e bulevardeve Tatum dhe Mayo, muzeu ka një sipërfaqe mbi 18 mijë metra2 dhe aty janë ekspozuar mbi 15 mijë instrumente muzikore dhe objekte shoqëruese, si kostume e të tjera, nga afro 200 shtete të botës.

Me një biletë që kushton 20 dollarë, vizitori, para se të fillojë t’i vizitojë kthinat e shumta me eksponate mahnitëse, pajiset me pajimin GuidePort (një lloj radiomarrësi) dhe me kufje, ngase në çdo kënd ekspozues, poshtë emrit të secilit shtet janë vendosur ekrane ku vizitori mund të shohë dhe të dëgjojë (vetëm pasi t’i aktivizojë kufjet) muzikën e atij vendi.

Vëmendjen tonë e tërheq një kënd jo fort i madh i kthinës së madhe të shteteve të Europës (ngase eksponatet janë klasifikuar sipas kontinenteve dhe shteteve të tyre), ku shkruan Kosovo dhe Albania. Aty nuk janë më shumë se 14 eksponate, nga të cilat 13 vegla muzikore dhe 1 vegël pune, furka, për të cilën jepet shpjegimi se puna me të shoqërohet me muzikë karakteristike. Përposhtë secilit instrument muzikor është shënimi me emrin e instrumentit si dhe vendi nga vjen. Për moshën ndërkaq, pothuaj për të gjitha instrumentet thuhet se u përkasin viteve të fundit të shekullit XX.

Në të majtë, poshtë në dysheme është ekspozuar një tepsi (duket të jetë tepsi bakri e kallajisur) dhe shpjegimi se ajo lëshon tinguj kur vërtitet nga gratë myslimane. Është e paqartë nga e ka burimin ky shpjegim, kur dihet se muzika nuk përfaqëson një fe. Edhe për dajren, vendosur në mur thuhet se me të luajnë femrat myslimane dhe rome. Vijnë me radhë dy bilbila (lloj fyelli), çiftelia (Kosovë), sharkia (Shqipëri) e shkruar serbisht Sargija (lexo: shargija), lahuta (Mali i Rrencit, Lezhë), surla (Kukës), zumarja (mbase zurnaja, Lezhë), lahuta (Dukagjin, Shkodër), sharkia (Dibër), daireja (Lezhë, Zadrimë), çiftelia (Lezhë) dhe sharkia dyshe (Lezhë), me shqiponjën dykrenore të gdhendur, ku shpjegohet se shqiponjën me dy kokë e ka përdorur heroi Skënderbeu gjatë luftimeve kundër pushtimit turk. Teksa qëndron para këtyre eksponateve vizitori sheh në ekran dhe dëgjon nëpërmjet kufjeve një këngë të Gollakut, interpretuar nga Grupi Folklorik Hajvalia dhe një grua shqiptare teksa ekzekuton tinguj me tepsi, pamje që ndërrohen në mënyrë alternative. Përveç instrumenteve muzikore aty janë të ekspozuara edhe disa fotografi, një e fillimshekullit XX ku shihen dy femra të reja rome, njëra me violinë, tjetra me daire, një foto e vitit 1923 me dy djem të rinj shqiptarë (njëri me kostume kombëtare), duke i rënë fyellit dhe një foto e një gajdexhiu nga Elbasani e vitit 2006.

Ndonëse të përfaqësuara me një numër fare të vogël veglash muzikore, nga mbi njëqind instrumente që njihen si shqiptare, prania e dy shteteve shqiptare në këtë muze është e një rëndësie të veçantë, sepse vizitori amerikan, por edhe shumë të huaj që e vizitojnë çdo ditë këtë muze, do ta njohin një pjesë modeste të kulturës muzikore të popullit shqiptar, që përfaqësohet këtu bashkë me kulturat muzikore të qindra shteteve të botës.

Ky muze, ndërtimi i të cilit ka kushtuar mbi 250 milion dollarë është themeluar falë donatorëve. Kontributi më i vogël që do të mund të bënin shtetet shqiptare, po edhe koleksionistët privatë të instrumenteve muzikore, do të ishte pasurimi i pjesës shqiptare të muzeut me vegla muzikore të sotme e të djeshme që mungojnë aty, po edhe me vegla të lashta muzikore, qoftë edhe me kopje të instrumenteve që janë zbuluar në trojet shqiptare e që janë përdorur nga parardhësit tanë.