Adnan Mehmeti

Stamford, 7 prill 2024/

(Dr. Yllka Filipi u zgjodh kryetare, studiuesja e letërsisë Arjeta Ferlushkaj nënkryetare dhe Dr. Bexhet Asani, sekretar i Shoqatës së Shkrimtarëve Shqiptaro-Amerikanë)

Në një atmosferë plotë entuziazëm dhe të kulturuar, Shoqata e Shkrimtarëve Shqiptaro-Amerikanë mbajti zgjedhjet e reja më 7 prill 2024, në bibliotekën e qytetit të Stamford-it. Shumica e anëtarëve të shoqatës erdhën nga e gjithë Amerika për të marrë pjesë në zgjedhje.

Në këto zgjedhje të rëndësishme, Dr. Yllka Filipi u zgjodh kryetare me një shumicë votash nga anëtarët e Shoqatës. Ky moment shënon një kapitull të ri në historinë e Shoqatës, pasi Dr. Yllka Filipi ka qenë në detyrën e sekretares dhe ka shërbyer dy mandate si nënkryetare. Nënkryetare u zgjodh studiuesja e letërsisë Arjeta Ferlushkaj, ndërsa detyra e sekretarit iu besua Dr. Bexhet Asanit. Kryesia e re do të përfaqësojë dhe do të drejtojë Shoqatën me zell dhe përkushtim në 3 vitet në vijim.

Shoqata e Shkrimtarëve Shqiptaro-Amerikanë u themelua në vitin 2001 nga dr. Gjekë Marinaj, i cili njëherit ishte dhe president. Ndërkaq, në vitin 2009 president u zgjodh Adnan Mehmeti, pozitë të cilën e mban aktualisht. Kryetari i parë i Shoqatës ka qenë Naum Prifti, ndërsa për dy mandate radhazi u zgjodhën, Ramiz Gjini, Dalan Luzaj, Raimonda Moisiu dhe Mëhill Velaj.

Zgjedhjet e reja reflektojnë respektin për rregulloren e statutit dhe vazhdimin e rotacionit, duke pasur parasysh dëshirat dhe vullnetin e çdo anëtari të saj. I urojmë kryesisë së re suksese në detyrat e tyre të reja dhe falënderojmë kryesine e mëparshme për kontributin e tyre të pamohueshëm në zhvillimin dhe përparimin e Shoqatës.

Me një akt të ndjeshëm dhe të përulur, ish-kryetari, Mëhill Velaj, i dashur dhe i respektuar nga të gjithë, falënderoi të gjithë anëtarët për kohën e shkëlqyer që kaloi si kryetar në dy mandate, duke premtuar se nuk do të ndalë vrullin e punës edhe në të ardhmen.

Gjatë këtyre zgjedhjeve u mor vendimi që çdo anëtar të paguajë një kuotë vjetore prej $100 për të kontribuar në hapjen dhe mirëmbajtjen e një faqeje elektronike, si dhe për të ndihmuar në botimet e reja letrare. Ky vendim tregon angazhimin për të përhapur letërsinë shqipe në Amerikë dhe të ndihmojë në rritjen e aktiviteteve në avancimin e qëllimeve të tyre kulturore në të ardhmen.

Një biografi e shkurtër për Yllka Filipi

Yllka FILIPI është vlerësuar nga kritika me disa çmime të para kombëtare dhe ndërkombëtare, si një zë unikal dhe i guximshëm në letërsinë moderne shqiptare. U lind më 1976 në Fier, ku kaloi edhe fëmijërinë e hershme duke përjetuar e parë nga afër historitë e shumë të përndjekurve e të përsekutuara të regjimit diktatorial komunist degdisur rrethinave, disa prej të cilëve ishin edhe miq të familjes. Këto gjurmë të thella në kujtesën e shkrimtares së ardhshme, do të bëhen remineshencat më të forta në krijimtarinë e mëvonshme artistike të saj. Botimet e para datojnë në vitet e gjimnazit në gazetën kulturoro-artistike, Nesër, 1993. Ka shkruar e botuar që në moshë të re në periodikë të ndryshëm brenda dhe jashtë vendit. Më pas zhvendoset në Tiranë për të kryer Studimet e larta në Fakultetin e Historisë dhe të Filologjisë, dega Letërsi dhe Gjuhë Shqipe 1999. Është specializuar në degën e Letërsisë duke përfunduar Studimet e Thelluara Pasuniversitare, Master Shkencor 2008, pranë këtij Universiteti. Talenti, pasioni dhe puna e palodhur do të kurorëzohen me mbrojtjen e Doktoraturës në fushën e Letërsisë së Krahasuar, në Universitetin e Tiranës me vlerësim maksimal, 2012. Paralelisht ka punuar si lektore në Departamentin e Letërsisë dhe Gjuhës shqipe në Gjimnazet më të njohura të kryeqytetit Qemal Stafa dhe Ismail Qemali dhe prej 12-vjetësh rresht gëzoi respektin e kolegëve dhe mirënjohjen e të rinjve kryeqytetas. Më pas në nëntor të vitit 2011 emigroi në Shtetet e Bashkuara të Amerikës ku ende vazhdon suksesshëm pasionin për letërsinë me shkrime kritike, poezi, prozë dhe ese. Me në mendje dhe në zemër Shqipërinë, aktualisht jeton dhe punon në New Jersey me bashkëshortin e dy fëmijët dhe bashkëpunon midis të tjerash, me gazetën Dielli, Illyria si dhe revistën Kuvendi në Michigan. U.S.A. Është zgjedhur Kryetare e Shoqatës së Shkrimtarëve Shqiptaro-Amerikanë, 2024, Stamford, CT duke u bërë kështu një ambasadore e denjë në tempullin e artit të fjalës shqip në Amerikë.

Dr. Yllka FILIPI është autore e këtyre veprave:

*Trekëndëshi infernal universal, Dante-Migjeni-Kadare, studim krahasues, Albas, 2012

*Post Hekuba vëllim poetik, Ombra GVG, 2011

*Me ipsum ames (roman postmodern), M. Barleti, 2010

*Eternitas (vëllim poetik, ) M. Barleti, 2009

*Eshtra tempujsh, (cikël poezish të zgjedhura,) 2009

*Dante-Kadare, studim kritik, Albas, 2008

Ka fituar këto çmime letrare:

* Nëntor 2017, First International Poetic Price “Faic Konica”, Albanian-American Writers Association, New York

* Dhjetor 2016, First Price Writers Festival “Peter Prifti”, AAWA, New York

•​Dhjetor 2012, Titullin e Lartë, Libri i mendimit kritik, për veprën Dante-Migjeni-Kadare, L.N.SH.P, Albania

•​Qershor 2012 Çmimi poetik Ndërkombëtar “Azem Shkreli II”, Ennepetal, Gjermani

•​Maj 2011 Çmimi i Parë, në Festivalin Ndërkombëtar të poezisë, TPSH, Vushtri, Kosovë

•​Prill 2011 Çmim Special, Fituese në Konkursin Letrar Ndërkombëtar Poetik, Muza Poetike Pegasi Albania 2011.

Krijimtaria e saj është përfshirë në disa antologji si

* 100 Poetë për dashurinë, (Lirika shqiptare dhe botërore) 2012,

* Korsi e hapur, 2012, në 14-gjuhë të botës.

Shoqata e Shkrimtarëve Shqiptaro-Amerikanë

Flamur VEZAJ/

“VATRA”, “ÇUNAT E BOSTONIT” dhe Shoqata Kulturore Atdhetare “LABERIA” falënderuan komunitetin shqiptarë të besimit musliman dhe jo vetëm, që u bashkuan në darkën familjare për Natën e Kadrit!

Në ambientet e klubit social shqiptar “Çunat e Bostonit” në Peabody, ku muret janë zbukuruar me fotografi të personaliteteve të kombit shqiptar dhe me flamuj të shumtë, u mblodhën shumë familje shqiptare të ftuara për iftarin e së premtes së fundit të muajit të Ramazanit!

Në emër të tre organizatorëve të darkës foli kryetari i VATRËS dege në Boston, z.Mentor Maksutaj, i cili falënderoi të gjithë që u bashkuan në këtë iftar. “Motra dhe vëllezër, sot falenderojmë Zotin që kemi shëndet të mirë, kemi familje të shëndosha e miq të mirë, me të cilët Zoti na bëri të mundur që të bashkohemi sontë të gjithë si një familje”, tha z.Maksutaj. Ai shprehu mirënjohje dhe falenderim të veçantë për organizatorët e kësaj darkë. “Falenderoj “ÇUNAT E BOSTONIT” Artur e Ardi Boçoven dhe Eno Kumen për mikpritjen në shtëpinë e tyre, pasi janë të gatshëm gjithmonë bashkë me anëtarët e tyre të kontribuojnë për të mirën e komunitetit tonë. Shoqatën Kulturore Atdhetare “LABERIA” për kontributin e veçant në këtë darkë, ku na ka nderuar edhe vet kryetarja Rudina Bardhi. Por e bukura e kësaj darkë është fakti se përveç familjeve të besimit musliman që kanë gatuar ushqime tradicionale për këtë iftar, si burek të ndryshëm, fli, qofte, tavë kosi etj., janë edhe shqiptarë të besimit ortodoks, të krishterë dhe bektashjanë. Pra, harmonia fetare mes shqiptarëve vazhdon të jetë shembull për të gjithë botën”, tha z.Maksutaj duke falenderuar njëherazi edhe vatranët dhe kryesin e VATRËS dege Boston për këtë darkë familjare.

Në fund, por jo më pak të rëndësishme, z.Maksutaj falënderoi të pranishmit, familjet që gatuan dhe sollën ushqime tradicionale, si dhe me përulje për bizneset shqiptare që kontribuan për iftarin. “Falënderoj me përzemërsi “Boxford House of Pizza” në Boxford, “Ellie’s Pizza” në Beverly, “Peabody House of Pizza” po në Peabody, Child Care “Golden Steps” në Weymouth, si dhe kompaninë “Art Painting” në Salem”, mbylli fjalën kryetari z.Maksutaj.

Gjithashtu, gjatë darkës u shpërndan edhe dhurata për fëmijët dhe nga një libër me poezi për fëmijët “Më thuaj, o Gjyshi…” nga autorja Lata Ajdini Musabelliu.

Foto: Subi Çako & etj!

“Vërtetë kemi Bajram dhe Pashkë, por SHQIPTARINE e kemi bashkë”. Kjo shprehje e kolosit të letrave At.Gjergj Fishta, tregon se bashkëjetesa fetare ndër SHQIPTARË me shekuj ka qenë një shembull dhe krenohemi edhe sot!

E për të respektuar besimtarët musliman, “VATRA” dega në Boston bashkë me “Çunat e Bostonit” do të shtrojnë një darkë iftari për të gjithë shqiptarët e besimit islam, të cilët agjërojnë gjatë këtij muaji të shenjtë të Ramazanit!

Jeni të ftuar të gjithë Ju që agjëroni familjarishtë për iftar mbrëmjen e së premtes më 5 Prill 2024 duke filluar nga ora 6:30pm e në vazhdim në adresen:

26 Howley st Floor 2-1 Peabody MA 01960

Ushqimi do të pregaditet vullnetarishtë nga disa familje dhe donacione të ndryshme!

Por nëse keni DESHIRE, edhe JU mund të sillni diçka të gatuar, ushqim ose ëmbëlsira!

Por mund të bëni edhe donacione duke klikuar linkun:

https://www.zeffy.com/…/d4a782b8-54d3-4343-8e31…

Ju lutem na shkruani në inbox këtu ose e-mail vatraboston@gmail.com për të konfirmuar numrin e personave që do të vini për të planifikuar hapësirat dhe ushqimet!

Të bashkohemi pranë VATRES si një familje

Në vitin 1908 ,në qytetin e Vlorës u krijua Klubi Atdhetar “Labëria”, shoqata e parë patriotike në Shqipëri, nismë e një grupi patriotësh të njohur në këtë qytet . Themelimi i Klubit Atdhetar “Labëria”, është rrjedhojë e natyrshme e aktivitetit 30 vjecar të Ismail Qemalit dhe e mjaft emrave të tjerë të shquar, të lëvizjes atdhetare të fundshekullit XIX dhe fillimit të shekullit XX. “Klubi Labëria”, vlerësohet si pararojë e krijimit të klimës së përshtatshme për shpalljen e pavarësisë kombëtare, si përfaqësuesja më e denjë e aspiratave patriotike të kohës.

Në vijim të Klubit Labëria, në vitin 1991 u krijua Shoqata Atdhetare Kulturore LABËRIA ”Nderi i Kombit”

Në Boston, lëvizja për krijimin e kësaj shoqate filloi afro 3 muaj më parë nga Znj. Rudina Bardhi. Ajo vendosi kontakte me një grup dashamirësish nga komuniteti lab në Boston dhe qytete të tjera. U krijua një grup nismëtar që mori përsipër përgatitjen dhe organizimin e kësaj dege. Në mbledhjet dhe takimet deri në orë të vona të natës nuk kishte si të mungonte pakëz nga ajo që ndizte muhabetin e pastaj vinte natyrshëm dëshira: t’ja marrim njëherë ashtu hollë –hollë.. Lindi pa e kuptuar grupi lab që na shoqeroi në vazhdim. Ishim te “Çunat e Bostonit “, një organizim i shkëlqyer shqipëtar me një aktivitet të madh,me një ambjent që nuk I mungon asgjë nga Shqipëria, as shkolla shqipe. Ata u bënë Kumbari i grupit Lab.

Grupi nismëtar dhe ai Lab u ftuan në darken e 7-8 Marsit të organizuar nga Çunat e Bostonit.Aty do të bëhej e njohur nisma për shoqatën tonë si dhe grupi lab do të performonte tri këngë.U kalua prova e parë me sukses.

Një sallë e mbushur plot, mbi 260 vetë. Në cdo tavolinë ne vendosëm nga një listë me informacionet e nevojshme dhe me ftesën për t’ju bashkuar Shoqatës Labëria. Në përfundim nga këto lista të plotësuara individualisht prej tyre u anëtarësuan mbi 60 vetë, shumë nga këta me bazë familjare.

Data 23 Mars 2024, nuk na la të merrnim frymë, erdhi shpejt. E ku tjetër mund të mblidheshim në Kuvendin e Parë, përvecse në shtëpinë e shqipëtarisë, te Çunat e Bostonit. Radhë me flamujt e Shqipërisë , Amerikës,Çunave të Bostonit, Labërisë,e të Vatrës.Harta e Shqipërisë Etnike qëndronte hijerënde. Stema e Shoqatës Labëria me simbolin e Kaonise, demi me dy degë lisi rrethuar vezullonte. Hyrja e lirë, ndarja nepër tavolina e lire.

Me shumë vonesë e filluam, por e falëm veten si hera e parë. Nuk do ta lejojmë më të ndodhë në të ardhmen..Kishim pak frikë se kemi edhe ca zakone pak si të rënda, mos na fillonin me dolli pa mbaruar procedurën.

Tre nga të zotët e shtëpisë nuk na lanë të prisnim.Eno,Arti dhe Ardi përpara flamurëve , çelën takimin. Artian Rreza me mikrofonin në dorë shpërtheu: Po ju prezantoj një zonjë. Ajo është RUDINA BARDHI. Është një pjesë e flamurit tone. Është një shqiponjë e shqipëtarisë. Ajo me grupin e saj na bëri të mundur sonte, krijimin e Shoqatës Atdhetare, Kulturore Labëria,”Nderi i Kombit”. E ftoj ate këtu përpara jush dhe dua një duartrokitje të fortë, të fortë fare ama. Ska nevojë të shkruaj une se cfare ndodhi. Edhe duartrokitjet ishin labe, jehonë që nga malet e labërisë që hahen me retë.

Rudina Bardhi u lind dhe rrit në Vlore. Babai i saj ishte nga Vlora dhe nëna nga Progonati. Është e martuar me dy fëmije.Ajo studioi në Universitetin e Tiranës për Fizikë. U zhvendos në Boston në vitin 1999..Këtu ajo vazhdoi studimet në universitete prstigjioze si Duke University and Microsoft. Punoi në institucione të rëndësishme dhe ka mbajtur pozicione të larta në fushën e teknologjisë së informacionit dhe Compliance për kompani shumë të njohura këtu në Boston.

Edhe pse ka qënë larg Shqipërisë për një kohë të gjatë, ajo kurrë nuk i ka harruar rrënjët e saj dhe dashurinë për vendin e saj, vecanerisht Labërinë. Për vite të tëra ajo ka kontribuar për të mbajtur gjallë gjuhën dhe kulturën tonë shqipëtare këtu në Boston.Kjo është Kryetarja e parë e Shoqatës Labëria ”Nderi Kombit”, Dega Boston.

Nën peshën e emocioneve e mori fjalën Rudina. Nisi me falenderimet sipas zakonit, për miqtë. Nga dega e Vatrës, kryetari Z.Mentor Maksutaj, nga Suhareka dhe disa anëtarë të tjerë të Vatrës me familjet e tyre, Z. Faton Limani , Udhëheqës i organizatës së Studentëve Shqipëtarë të Harvardit, Çunat e Bostonit, Grupin Nismëtar, ,Familjen e saj dhe të gjithë komunitetin shqipëtar, që me thirrjen e parë erdhën në këtë festë.

Qëllimi i Shoqatës Labëria –vazhdoi ajo ,është…..më shumë dëgjoheshin në mikrofon zërat e gëzuar të fëmijëve që vraponin rrotul flamujve. Nje regji origjinale perfekte. Ky është qëllimi I shoqatës sonë, janë keta fëmijë, këta të rinj e të reja dhe familjet e tyre. Ata na kërkojnë neve t’ju mësojmë atyre, gjuhën, zakonet, traditat, veshjet tradicionale, këngët e vallet tona të bukura që dhe ata t’i trashëgojnë në breza.

Prezantoi kryesinë dhe shprehu besimin se me ata ,do të bashkojë dhe udhëheqë familjet shqipëtare në aktivitete origjinale të traditës sonë. Anëtarët e ekipit të saj janë nga Vlora, Lushnja, Nivica, Progonati, Berati e Tepelena.Lebër te denjë.Secili prej tyre do të prezantohet së shpejti në faqet e shoqatës sonë në social media

Më e reja është Izabela Xhalia nga Tepelena.Studjon në Emmanuel College për Financë , në Boston. Ashtu e bukur dhe e turpëshme ajo tha se nata e sotme është shumë impresionuese. Më besuan edhe mua të bëj dicka për labërinë si koordinatore e aktiviteteve të degës. Takova këtu Profesor Limanin që është edhe shefi i Katerdrës së Gjuhës Shqipe të Harvardit. Gjuha jonë është vendosur aty si lëndë me zgjedhje vitin e kaluar. Ai me dashamirësi më sygjeroi të stujoj fort që të arrij nivelet e duhura dhe të studjoj në Harvard. Po që Fatoni është i dashuruar me këngën labe dhe ka për grupin lab një plan të afërt.Nuk po e themi tani por ju e kuptoni vetë. Pasuri e UNESCO , nuk është një shaka.

Drejtuesi për kulturën Z. Julian Balilaj ftoi dhe prezantoi grupin lab I cili këndoi disa këngë që u duartrokitën nga pjesëmarrësit.Pa vështirësi intonohen dhe I tërheq kënga Merqezin,Haxhiun,Dritanin,Neviolin,Turin. Edhe iso ja doli këtë radhë.

Me pas, muzikë, këngë e valle. Lapçen nuk ka nevojë ta përmend se ajo të zgjon vetë. Vazhduam të shijonim ushqimet e përgatitura për këtë darkë. Për ne kishin menduar Çunat e Bostonit, JB Rock and the Wall, Art Painting, Boxford Pizza, Home Town Pizza etj.

Me duartokitje dhe me telefona në duar për foto dhe video u prit Ai, Kurbani kësaj ceremonie. Zakonet e donin aty ku mblidhet labëria. Ferma Laberia kishte menduar për këtë..Dy lebër me kostumet tradicionale e sollën nëparadë dhe bënë prerjen simbolike. Këta njerez ska nevojë t’i pyesësh se nga jane. Kurbani flet vetë, erë Labërie, një natë Shqipërie.

Na ndihmoi ligji për lokalin që duhej të mbyllej mbas mesnate në orën e caktuar se, ndryshe sabahu aty do të na zinte. Aty ne do të mblidhemi cdo herë ,për të bërë gjëra të mira , për të sjellë fëmijet në shkollën shqipe e për të shijuar një darkë “në Shqiperi”, pa paguar avion.Do të jemi bashkë gjithmonë, nuk keni nevojë t’ju dërgojmë ftesa , ejani dhe… Vllazëri të Pandarë, apo jo “Cunat e Bostonit? I madhi Noli e ka ditur mirë: Kur lëngon Shqipëria, zgjohet Labëria..

Boston MA, 23 Shkurt 2024

Teksti dhe fotot Subi Çako.

Të dielën, më 24 mars 2024, shoqata shqiptaro-amerikane “Iliria” e Saint Louis-it, pati të ftuar dr. Ernest Naston. Në takimin e organizuar me këtë rast, morën pjesë e intelektualë, veprimtarë e specialistë të fushve të ndryshme. Takimin e prezantoi kryetari i Shoqatës, Z. Besian Gjika, i cili portretizoi të ftuarin si pedagog, studiues dhe drejtues, duke qenë se Z. Nasto është njëkohësisht nënkryetar i Degës së Federatës “Vatra”, në Çikago. Temën e përgatitur me këtë rast, të pranishmit e ndoqën me shumë interes. Thelbi i saj ishte një përmbledhje konçize e historisë së SHBA-ve, revolucionit, që ka si pikë vlimi rebelimin e 13 kolonive. Ky rebelim solli në fund Deklaratën e Pavarësisë (4 korrik 1776) e cila mishëron filozofinë e motivimit ndaj lirisë, të drejtës dhe të ndjekjes së lumturisë (persuit of happiness). Po aty u përcaktuan dhe konsoliduan të drejtat dhe detyrimet përkatëse të shteteve të sanksionuara në kushtetutë, të cilat kishin kërkuar një kohë të gjatë diskutimi ndërmjet etërve të kombit. Përveç kushtetutës u sqaruan mënyrat e zbatimit të saj për ndarjen e pushteteve e sidomos mënyrat e zgjedhjes për dhomën e përfaqësuesve, senatin, ripërtëritjen ciklike të tij, etj.

Duke qenë se këtë vit zhvillohen zgjedhjet presidenciale, u fol gjerësisht për mënyrën e zgjedhjes, përfaqësimin si dhe organizimet partiake të ndryshme. Pas sqarimit të detajuar të rrugës së zgjedhjeve të organeve e drejtuesve legjislativë u fol edhe për organet ligj-zbatuese, pra të shtetit amerikan si dhe organizimin e përbërjen edhe të organeve në shtetet federale.

Në pjesën e fundit të takimit, Z. Nasto bëri një rezyme të punës së federatës Vatra dhe rëndësisë së bashkëpunimit ndërmjet shoqatave shqiptare në vazhdim. Po ashtu ai iu përgjigj me shumë dëshirë dhe interes pyetjeve të ndryshme që iu bënë nga të pranishmit në aktivitet.

Ky bashkëbisedim i ngrohtë dhe mirëkuptues, vazhdoi edhe gjatë kokteilit të organizuar me këtë rast nga shoqata nën kujdesin e bashkëshortëve Ramadan dhe Arjana Hajdini.