Ditën e sotme, Shefi i Shtabit të Përgjithshëm të FARSH, Gjeneralmajor Jeronim Bazo,zhvilloi një vizitë në Komandën e Misionit të NATO në Kosovë “KFOR” dhe në Komandën e Forcës së Sigurisë së Kosovës. Në Komandën e Misionit të NATO në Kosovë “KFOR”, Gjeneral Bazo pati takime me komandantin e KFOR, Gjeneralmajor Guglielmo Luigi Miglietta, Shtabin Ndërkombëtar si dhe kontingjentin e FARSH, që shërben në KFOR. Kjo vizitë vjen në kuadër të solidaritetit dhe mbështetjes për KFOR si dhe rritjen e dialogut dhe bashkëpunimit ushtarak me këtë komandë. Gjatë takimeve midis titullarëve dhe Shtabit Ndërkombëtar të KFOR, u diskutua rreth zhvillimeve të fundit në aspektin e situatës së sigurisë në Kosovë. Misioni i KFOR vijon të mbetet i pandryshuar dhe çdo ndryshim në kompozimin e KFOR do të mbështetet mbi një analizë të kujdesshme dhe bazuar nga situata në terren. KFOR vijon të jetë reaguesi i tretë në aspektet e sigurisë në Kosovë dhe ka një bashkëpunim të ngushtë me institucionet e sigurisë së Kosovës dhe Bashkimit Evropian (EULEX), me qëllim ruajtjen e ambientit të sigurt dhe lirinë e lëvizjes në të gjithë Kosovën. Gjeneralmajor Bazo, gjatë takimit me komandantin e KFOR Gjeneral Miglietta, vlerësoi rëndësinë e pranisë së KFOR në Kosovë dhe bashkëpunimin konstruktiv dhe të ngushtë me institucionet e Kosovës dhe organizmat ndërkombëtarë. “KFOR mbetet misioni më i vjetër, më i gjatë dhe më i suksesshmi i NATO, i cili promovon dhe ndan vlerat themelore të vendeve të NATO”, theksoi Gjeneral Bazo. Ndërsa nga ana e tij Gjeneral Miglietta vlerësoi mbështetjen e Shqipërisë për misionin KFOR, sidomos në drejtim të kontributit me personel, bashkëpunimit në nivel ekspertësh dhe shkëmbimin e informacionit. Performanca e kontingjentit shqiptar, i cili kryesisht shërben në Komandën e KFOR, u vlerësua maksimalisht nga lidershipi i KFOR.  Me këtë rast, Gjeneralmajor Bazo pati një takim me kontingjentin e FARSH në këtë mission, ku i falënderoi për gatishmërinë e tyre dhe theksoi rëndësinë e këtij misioni për Kosovën. Gjatë vizitës një ditore në Kosovë, Shefi i Shtabit të Përgjithshëm të FARSH, Gjeneralmajor Jeronim Bazo kreu një vizitë edhe në Komandën e Forcës së Sigurisë së Kosovës, ku pati takime me Ministrin e Forcës së Sigurisë së Kosovës z. Haki Demolli dhe Komandantin e FSK, Gjenerallejtënant Rrahman Rama. Gjatë takimeve, u vlerësua bashkëpunimi ushtarak dypalësh si dhe u diskutua rreth situatës së sigurisë në Kosovë, bashkëpunimit me organizmat ndërkombëtarë dhe rritjes së profesionalizmit dhe modernizimit të Forcës së Sigurisë së Kosovës.  Gjeneral Bazo falënderoi palën kosovare për mbështetjen për projektin pilot në fushën e arsimimit ushtarak, ku aktualisht dy studentë ushtarakë vijojnë studimet në Qendrën Stërvitore Universitare. Gjithashtu, Gjeneralmajor Bazo, gjatë takimit me titullarët më të lartë të Forcës së Sigurisë së Kosovës, vuri theksin në rëndësinë e integrimit të Forcës së Sigurisë së Kosovës në organizmat rajonalë në fushën e sigurisë si dhe pjesëmarrjes në stërvitjet rajonale dhe ndërkombëtare, të cilat përveç promovimit të saj do ndikojnë në rritjen e ndërveprueshmërisë. Ministri i FSK, z. Demolli dhe Komandanti i FSK Gjenerallejtënant Rama, falënderuan Ministrinë e Mbrojtjes dhe Forcat e Armatosura Shqiptare për mbështetjen e deritanishme në fushat e edukimit, trajnimeve, stërvitjeve dhe operacioneve të përbashkëta. {SH.K}.