Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Presidentja Jahjaga uron per femijen e pare te lindur me 2016

by

Prishtine, 1 Janar 2016- Presidentja e Republikës së Kosovës, Atifete Jahjaga vizitoi sot Klinikën e Gjinekologjisë në Qendrën Klinike Universitare në Prishtinë, nënen që lindi fëmijën e parë në vitin 2016, duke i dëshiruar jetë të gjatë dhe të lumtur djalit dhe nënës, ndërsa, kryetari i Kuvendit, Kadri Veseli, në prag të ndërrimit të moteve qëndroi në Gadime të Epërme të Lipjanit, në familjen e fëmijës së parë të lindur në Kosovë në vitin 2015 dhe i uroi ditëlindjen.
“Vizitova nënën Jetmirën, e cila kishte kaluar një lindje të mirë gjatë natës së mbrëmshme dhe e urova për lindjën e fëmijës. Bebes së vogël i dëshirova jetë të gjatë, fat, shëndet dhe gëzime në jetën e tij së bashku me gjithë familjen e tij. Poashtu, shfrytëzoj edhe njëherë rastin që t’i uroj te gjithë qytetarët e Kosovës për një vit të mbarë dhe të suksesshëm”, deklaroi Jahjaga.
Sipas të dhënave të publikuara vitin e kaluar nga Agjencia e Statistikave të Kosovës, brenda vitit në 2014-tën kishin lindur 25 929 fëmijë. Emrat më të shpeshtë, të rekordit, për vajzat ishin Erina me 199 pagëzime dhe Alea me 182, ndërsa për djemtë Diar me 215 dhe Amar me 180. Bineqë u lindën 756 foshnja, ndërsa treneqë e më shumë u lindën 36 foshnja.(BJ)

Kosovë-Konstituohet Bordi i Drejtorëve i AKP-së

by

-Në mbledhjen e udhëhequr nga Petrit Gashi, Kryesues i Bordit, u diskutua për një varg çështjesh të përcaktuara me axhendë bazuar në mandatin ligjor të AKP-së/
Nga Behlul Jashari/ PRISHTINË, 31 Dhjetor 2015/ Bordi i Drejtorëve të Agjencisë Kosovare të Privatizimit, në përbërje të re, sot ka mbajtur mbledhjen e parë, konstituive, pak ditë pasi emërimit të Bordit nga Kuvendi i Republikës së Kosovës.
Në këtë mbledhje të udhëhequr nga Petrit Gashi, Kryesues i Bordit, u diskutua për një varg çështjesh të përcaktuara me axhendë bazuar në mandatin ligjor të AKP-së.
Bordi në mënyrë unanime miratoi vendimin për bartjen e shumës prej 61.3 milionë euro nga fondet e mirëbesimit të ndërmarrjeve shoqërore në likuidim në buxhetin e Republikës së Kosovës, ashtu siç parashihet me Ligjin e AKP-së, për nevoja të shfrytëzimit nga ana e qeverisë së Kosovës. Këto mjete janë ndarë nga fondet e përcaktuara si tepricë prej procesit të likuidimit të 125 ndërmarrjeve shoqërore.
Gjithashtu, Bordi diskutoi lidhur me zhvillimet e fundit në ndërmarrjen shoqërore “Trepça” nën administrimin e AKP-së, dhe në këtë kuadër shqyrtoi, dhe me pajtimin e të gjithë anëtarëve prezentë të Bordit miratoi kërkesën e ndërmarrjes Trepça për shitjen e koncentratit të plumbit dhe zinkut.
Në këtë takim, anëtarët e Bordit të Drejtorëve u zotuan se do të punojnë me përkushtim dhe profesionalizëm gjatë ushtrimit të mandatit si anëtarë të këtij organi, gjithnjë në përputhje të plotë me Kushtetutën e Republikës së Kosovës, me Ligjin e AKP-së dhe ligjet e tjera në fuqi, me synimin që t’i kontribuojnë zhvillimit ekonomik të vendit.
Bordi përbëhet nga tetë anëtarë: Petrit Gashi, Kryesues dhe drejtorët Bajram Zejnullahu, Hamdi Jaha, Hasime Mazreku-Krasniqi, Haxhi Arifi, Ismail Januzi, Ranko Djokic dhe Skender Komoni.
Kjo ishte mbledhja e 70-të e Bordit të Drejtorëve që nga themelimi i Agjencisë, ndërsa mbledhja e ardhshme do të mbahet në pjesën e dytë të muajit janar 2016.
Për vitin 2016, menaxhmenti i Agjencisë Kosovare të Privatizimit (AKP) ka përcaktuar 20 objektiva kryesore të punës, të cilat do të bëhen të ditura pas miratimit nga Bordi i Drejtorëve.
Në 17 dhjetor, Kuvendi i Kosovës në seancë plenare të përmbylljes së sesionit vjeshtor bëri emërimin e 8 anëtarëve-drejtorëve në Bordin e Agjencisë Kosovare të Privatizimit, pasi miratoi, me procedurë të përshpejtuar, ndryshimin dhe plotësimin e Ligjit për këtë agjenci.
Ndërkohë, gjatë vitit 2015 Agjencia Kosovare e Privatizimit nuk ka realizuar asnjë shitje të aseteve për shkak të mungesës së Bordit të Drejtorëve.
Në konferencën për shtyp e pritjen e fundvitit, në 28 dhjetor, ushtruesi i detyrës së zëvendësdrejtorit menaxhues në Agjencinë Kosovare të Privatizimit, Avni Jashari, prezantoi punën në 2015-tën, ndërsa theksoi përgatitjen e planit të punës lidhur me funksionimin në të ardhmen të Agjencisë në periudhën 2016-2018.

Sulmet ajrore amerikane vrasin krerët e ISIS të lidhur me ngjarjet e Parisit

by

Nga sulmet ajrore të udhëhequra prej Shteteve të Bashkuara kanë mbetur të vrarë 10 krerë të lartë të Shtetit Islamik gjatë muajit të fundit, përfshi edhe nga ata që kanë pasur lidhje me sulmet e muajit të kaluar në Paris. Lajmi bëhet i ditur nga zëdhënësi i koalicionit anti-ISIS të drejtuar nga SHBA-të, Steve Warren, gjatë kësaj të marte. “Gjatë muajit të kaluar kemi vrarë 10 figura të larta të grupit xhihadist me sulme të koordinuara, përfshi disa ideatorë të sulmeve në vendet e Perëndimit, prej të cilëve edhe nga ata që kanë pasur lidhje me sulmet e Parisit”, tha koloneli i ushtrisë amerikane. “Këta të tjerët kishin bërë përgatitje për sulme të tjera në Perëndim”, shtoi ai. Njëri prej të vrarëve besohet të jetë Abdul Qader Hakim, i cili ndihmonte në operacionet e jashtme të militantëve xhihadistë, e që kishte lidhje me agresorët e sulmeve të Parisit, tha më tej Warren. Ai është vrarë në qytetin verior iraken të Mosulit më 26 dhjetor. Ndërkohë, një sulm ajror i koalicionit i datës 24 dhjetor në Siri la të vdekur Charaffe al Mouadan, një anëtar i Shtetit Islamik me bazë në Siri, por që kishte lidhje të drejtpërdrejta me Abdelhamid Abaaoud, “trurin” e dyshuar të sulmeve të koordinuara me bomba dhe të shtëna armësh në Paris, më 13 nëntor, ku mbetën të vdekur 130 persona. Mouadan ishte duke planifikuar sulme të tjera në Perëndim, shtoi më tej Warren. Efekti i sulmeve ajrore ndaj udhëheqësisë së Shtetit Islamik mund të shihet më së miri gjatë sukseseve të fundit në fushëbetejën kundër grupit xhihadist. Ushtria irakene bëri të ditur së fundi triumfin e parë madhor kundër militantëve sunitë të linjës së ashpër ultranacionaliste, duke deklaruar rimarrjen e kontrollit të Ramadit, një qytet në perëndim të Baghdadit që kishte rënë në duart e ISIS gjatë muajit maj. “Disa pjesë të këtij suksesi i atribuohet faktit se organizata po humbet udhëheqësit e saj”, deklaroi Warren, i cili nuk harroi të paralajmëronte se “çakalli ka ende dhëmbë”.

Kosovë-FSK, e ardhme e ndritshme

by

-Presidentja Jahjaga priti oficerin Ismajl Hoxha, i cili mori çmimin “Shpata e nderit” nga Akademia Mbretërore Ushtarake e Britanisë së Madhe/
PRISHTINË, 28 Dhjetor 2015/ Presidentja e Republikës së Kosovës, Atifete Jahjaga, priti sot në takim komandantin e Forcës së Sigurisë së Kosovës, gjenerallejtënant Rrahman Rama dhe tre kadetët që morën pjesë në Akademinë Mbretërore Ushtarake të Britanisë së Madhe, Ismajl Hoxha, Fitore Fazliu dhe Besfort Kruma.
Presidentja Jahjaga e përgëzoi komandantin e FSK-së gjenerallejtënant Rrahman Rama për suksesin që ka arritur oficeri Hoxha gjatë studimeve një vjeçare në Akademinë Mbretërore Ushtarake të Britanisë së Madhe.
Presidentja Jahjaga theksoi se shpërblimi i oficerit Ismajl Hoxha me “Shpatën e nderit” si studenti më i mirë i Akademisë Mbretërore Ushtarake të Britanisë është porosi e qartë për të ardhmen e ndritshme të Forcës së Sigurisë së Kosovës. Ajo theksoi se nderimi i oficerit Hoxha është vlerësim shumë i rëndësishëm jo vetëm për të edhe për institucionin e FSK-së edhe për Republikën e Kosovës.
Presidentja Jahjaga tha se suksesi i oficerit Hoxha, është motiv shtesë për angazhim edhe më të madh të të gjithë oficerëve të tjerë të Forcës së Sigurisë së Kosovës./b.j/

Kosovë-Kryeministri Mustafa pritje fundviti për median

by

-Marrëveshja për Stabilizim Asociim me Bashkimin Evropian – ngjarja e vitit 2015 e Kosovës/
-Një nga ngjarjet e rëndësishme për Kosovën e Shqipërinë në vitin 2016 është paralajmëruar të jetë inaugurimi i gjithë “autostradës” energjetike/
Nga Behlul Jashari/ PRISHTINË, 22 Dhjetor 2015/ Kryeministri i Republikës së Kosovës, Isa Mustafa, organizoi sot në mbrëmje, në Prishtinë, pritje për përfaqësuesit e mediave, me rastin e festave të fundvitit.
Në pritjen ku ishte edhe korrespondenti në Kosovë i gazetës Dielli, kryeministri Mustafa, me këtë rast, ka falënderuar përfaqësuesit e mediave për prezencën në këtë përfundim të vitit të qeverisjes, një viti që e vlerësoi të rëndësishëm të bashkëpunimit të qeverisë së Kosovës me mediat.
Duke vlerësuar lartë përcjelljen shumë të rëndësishme të mediave, opinionet dhe analizat, kryeministri Mustafa tha se qeveria me shumë kujdes i ka dëgjuar dhe lexuar të gjitha ato dhe pastaj i ka trajtuar në sjelljen e saj qeverisëse.
“Është me rëndësi shumë të madhe që mediat ta bëjnë punën e tyre në mënyrë të pavarur, ajo është një faktor korrigjues edhe për qeverisjen”, tha kryeministri Mustafa, duke vlerësuar lartë kontributin, bashkëpunimin dhe kryerjen në mënyrë profesionale të punës nga ana e mediave.
“Apeloj që të kemi prapë bashkëpunim në vitet në vijim, në mënyrë që të punojmë bashkërisht në të mirën e vendit, të bashkëpunojmë dhe t’i realizojmë objektivat të cilat nuk mund të jenë objektiva të ndara të qeverisë. Janë objektiva të kësaj shoqërie, të mediave, të shoqërisë civile, të qytetarëve dhe si të tilla ne i pranojmë dhe i përqafojmë”, tha kryeministri Mustafa.
Kreu i qeverisë së Kosovës, Isa Mustafa, u ka uruar Vitin e Ri të gjithë përfaqësuesve të mediave, familjeve të tyre, shumë suksese dhe mirëqenie në vitin 2016 dhe në vitet në vijim.
Ngjarja më e rëndësishme e Kosovës e vitit 2015, madje edhe që nga shpallja e pavarësisë në 17 shkurtin historik 2008, vlerësohet Marrëveshja për Stabilizim Asociim e nënshkruar në 27 tetor në Strasburg me Bashkimin Evropian, e cila krijon për herë të parë marrëdhënie kontraktuale.
Një nga ngjarjet e rëndësishme për Kosovën e Shqipërinë në vitin 2016 është paralajmëruar të jetë inaugurimi i gjithë “autostradës” energjetike – linjës interkonektive 400 kV, ndërtimi i së cilës në pjesën kosovare përfundoi dhe u përurua para festës së Vitit të Ri, në 17 dhjetor.