Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Mustafa: Për Asociacionin është vendosur me Ligj në 27 qershor 2013, jo në 25 gusht 2015

by

Ne Foto: Prishtine 19 Shtator 2015- Kryeministri Isa Mustafa ne konference shtypi-fotografi nga Behlul Jashari/

Nga Behlul Jashari/ PRISHTINË, 19 Shtator 2015/ Do të jetë Gjykata Kushtetuese ajo që përfundimisht do të japë mendimin e saj për marrëveshjet e 25 gushtit në Bruksel, paralajmëron sot kryeministri i Kosovës, Isa Mustafa, derisa konsideron janë sipas ratifikimit me Ligj në Kuvendin e Republikës në vitin 2013 të Marrëveshjes së Parë Ndërkombëtare të Parimeve që Rregullojnë Normalizimin e Marrëdhënieve mes Republikës së Kosovës dhe Republikës së Serbisë dhe të Planit të Zbatimit për këtë Marrëveshje.

Në ‘Facebook’, kryeministri i Kosovës, Mustafa sot pasdite ka shkruar:

“Për arsye thjesht politike, opozita por edhe një pjesë e shoqërisë civile dëshiron të adresoj përgjegjësinë te unë si Kryeministër i vendit dhe te Qeveria, për Parimet e Përgjithshme për Asociacionin.
Ata dëshirojnë të shlyejnë nga kujtesa se Kuvendi i Republikës së Kosovës më 27 Qershor të vitit 2013 ka aprovuar Ligjin për Ratifikimin e Marrëveshjes së Parë Ndërkombëtare të Parimeve që Rregullojnë Normalizimin e Marrëdhënieve mes Republikës së Kosovës dhe Republikës së Serbisë dhe të Planit të Zbatimit për këtë Marrëveshje.
Prej 88 deputetëve sa kanë votuar, 84 kanë votuar për këtë Ligj, 3 kanë votuar kundër dhe një ka abstenuar. Ndër ata që kanë votuar për këtë Ligj kanë qenë edhe 15 deputetë të LDK-së, e cila atëherë ishte në opozitë, dhe 8 deputetë të AAK-së, e cila po ashtu ishte në opozitë.
Në pikën e parë të Marrëveshjes e cila është ratifikuar me Ligj me 2/3 e dyfishta të deputetëve thuhet: ‘Do të krijohet një Asociacion/Bashkësi e komunave me shumicë Serbe në Kosovë. Anëtarësia do të jetë e hapur për çdo komunë tjetër nëse anëtarët janë në pajtim’. Në pikën 4 të kësaj Marrëveshje thuhet: ‘Në përputhje me kompetencat e parapara me Kartën Evropiane për Vetëqeverisjen Lokale dhe ligjin e Kosovës, komunat pjesëmarrëse do të kenë të drejtë të bashkëpunojnë në ushtrimin kolektiv të kompetencave të tyre përmes Bashkësisë/Asociacionit. Asociacioni/Bashkësia do të ketë vështrim të plotë mbi fushat si zhvillimi ekonomik, arsimi, shëndetësia, planifikimi urban dhe rural’. Janë edhe katër pika të tjera të cilat i destinohen Asociacionit në atë dokument. Prandaj, dua të nënvizoj se, për krijimin e Asociacionit është vendosur me Ligj më 27 Qershor të vitit 2013, jo më 25 gusht të vitit 2015.
Ata që sot kërkojnë të tërhiqet nënshkrimi , duhet ta dinë se deputetët e tyre e kanë dhënë votën për këtë Asociacion, me ratifikimin e Marrëveshjes së Parë me Ligj. Prandaj, ata që kërkojnë tërheqje të nënshkrimit, kërkojnë moszbatim të Ligjit për ratifikim të marrëveshjes ndërkombëtare. Dhe rrjedhimisht, të drejtën për të kërkuar moszbatim të Ligjit nuk e ka askush në këtë vend.
Unë ftoj opozitën për qasje konstruktive. Ligji vlen për të gjithë, për pozitën dhe opozitën, për qytetarët dhe për shoqërinë civile. Unë konsideroj se çdo gjë është bërë sipas Marrëveshjes së ratifikuar me Ligj, është bërë sipas ligjeve të Kosovës dhe sipas Kushtetutës së Republikës së Kosovës. Por do të jetë Gjykata Kushtetuese ajo që përfundimisht do të japë mendimin e saj”, përfundon kryeministri Mustafa.

OPOZITA: PETICIONI KUNDËR “ZAJEDNICËS” EDHE SOT, NË DITËN E DYTË, PO NËNSHKRUHET NGA DHJETËRA MIJËRA QYTETARË

Ndërkohë, në Kosovë, peticioni i organizuar nga opozita po vazhdoi të nënshkruhet sot në ditën e dytë, i nisur dje me firmat e liderëve të LVV-së, AAK-së e Nisma-s.

 “17 mijë e 463 nënshkrime kundër ‘Zajednicës’ dhe marrëveshjes për demarkacion me Malin e Zi, u mblodhën vetëm gjatë ditës së parë të peticionit”, ka njoftuar subjekti më i madh opozitar ksovar, Lëvizja Vetëvendosje, sipas të cilit “dhjetëra mijëra qytetarë po e nënshkruajnë peticionin edhe sot në ditën e dytë”.

“Zajednica” është shprehje në gjuhën serbe, që në shqip do thotë “Bashkësi” dhe nënkupton Bashkësinë e komunave me shumicë serbe në Kosovë, për të cilën është nënshkruar marrëveshje me Serbinë, në raundin e 28-të të dialogut në nivel të lartë kryeministror,  në Bruksel, në procesin drejt normalizimit të marrëdhënieve mes dy shteteve.

“Ne qytetarët e Republikës së Kosovës të nënshkruar në këtë peticion, kërkojmë nga Qeveria e Republikës së Kosovës që të tërheqë menjëherë nënshkrimin nga katër marrëveshjet e datës 25 gusht 2015 të nënshkruara me Serbinë si dhe nga marrëveshja për demarkacionin me Malin e Zi”, thuhet mes tjerash në peticion.

Opozita kosovare këtë javë  ka bërë edhe një deklaratë të përbashkët kundër “bosnjëzimit të Kosovës”, ndërsa të enjten edhe ka protestuar në Kuvend dhe ka bllokuar e ndërprerë seancën e parë të sesionit vjeshtor me kërkesë që mos të shtyhet “raportimi i qeverisë së Republikës së Kosovës lidhur me marrëveshjet e arritura në Bruksel më 25 gusht 2015”, i cili ishte në axhendë derisa mungonin raportuesit.

Kosovë- Peticioni kundër “Zajednicës” 17, 463 nënshkrime në 1 ditë

by

PRISHTINË, 19 Shtator 2015/ Në Kosovë, peticioni i organizuar nga opozita po vazhdon të nënshkruhet sot në ditën e dytë, i nisur dje me firmat e liderëve të LVV-së, AAK-së e Nisma-s.

“17 mijë e 463 nënshkrime kundër ‘Zajednicës’ dhe marrëveshjes për demarkacion me Malin e Zi, u mblodhën vetëm gjatë ditës së parë të peticionit”, ka njoftuar subjekti më i madh opozitar ksovar, Lëvizja Vetëvendosje.“Zajednica” është shprehje në gjuhën serbe, që në shqip do thotë “Bashkësi” dhe nënkupton Bashkësinë e komunave me shumicë serbe në Kosovë, për të cilën është nënshkruar marrëveshje me Serbinë, në raundin e 28-të të dialogut në nivel të lartë kryeministror,  në Bruksel, në procesin drejt normalizimit të marrëdhënieve mes dy shteteve.

“Ne qytetarët e Republikës së Kosovës të nënshkruar në këtë peticion, kërkojmë nga Qeveria e Republikës së Kosovës që të tërheqë menjëherë nënshkrimin nga katër marrëveshjet e datës 25 gusht 2015 të nënshkruara me Serbinë si dhe nga marrëveshja për demarkacionin me Malin e Zi”, thuhet mes tjerash në peticion./b.j/

Nisma: Marrëveshjet me Serbinë e ndajnë Kosovën në vija etnike

by

-Entitet të ri politik serb brenda Kosovës, që rrezikon copëtimin e territorit/

PRISHTINË, 18 Shtator 2015/ Nisma për Kosovën sot ka mbajtur mbledhjen e Këshillit Kombëtar, ku është diskutuar për situatën aktuale politike, krijimin e opozitës së bashkuar e në veçanti rreth Peticionit të organizuar nga fronti i bashkuar opozitar, për kundërshtimin e katër marrëveshjeve të nënshkruara me Serbinë, që lidhen me krijimin e Asociacionit/Bashkësisë së komunave me shumicë serbe në Kosovë, barrikadën në Urën e Ibrit në Mitrovicë, Kodin Telefonik shtetëror, për marrëveshjen për energjinë, si dhe marrëveshjen për demarkacionin me Malin e Zi.

 Këshilli Kombëtar i Nisma për Kosovën vlerëson se këto marrëveshje me Serbinë e ndajnë Kosovën në vija etnike, duke krijuar një entitet të ri politik serb brenda Kosovës që rrezikon copëtimin e territorit, mos funksionimin e shtetit, dhe pengojnë zhvillimin ekonomik të Kosovës.

 “Këshilli Kombëtar dhe kryetarët e degëve të Nisma për Kosovën, i japin mbështetje të fuqishme peticionit të organizuar nga opozita e bashkuar (LVV, AAK dhe Nisma) dhe do të vazhdojmë së bashku deri në ndalimin e politikave të dëmshme që po i bëhën vendit nga qeverisja aktuale”, thuhet në komunikatën e dërguar.

“Nisma për Kosovën nuk do të ndalet në asnjë moment, sepse këtu bëhet fjalë për të ardhmen e vendit, dhe kërkon po ashtu nga qytetarët që këtë situatë në vend, që e ka sjell koalicioni LDK-PDK, ta ndjejnë si një goditje ndaj qytetarit dhe ndaj shtetit të Kosovës”, shprehet partia e tretë opozitare kosovare./b.j/

Betohen kadetët e rinj të FSK-së në Kosovë

by

– Komandanti i Gardës Kombëtare të Ajovës, gjeneral brigade Timoty Orr, ka  përshëndetur dhe uruar kadetët e rinj të FSK-së/ -Dy kadetë nga Shqipëria/

PRISHTINË, 18 Shtator2015/ Në ambientet e kazermës “Adem Jashari” të Komandës së Forcave Tokësore (KFT), në Prishtinë, sot u zhvillua ceremonia e dhënies së betimit të kadetëve të rinj të Qendrës për Studime Universitare të FSK-së, brezi 2015, shënimi i 10 vjetorit të themelimit të Qendrës për Studime Universitare dhe përurimi i objektit të ri të saj.

 “Dita e sotme është e një rëndësie të veçantë për Qendrën për Studimeve Universitare dhe për Forcën e Sigurisë të Kosovës”, tha ministri i FSK-së, Haki Demolli pasi përshëndeti pjesëmarrësit.

 “E veçanta tjetër është edhe shkollimi i dy kadetëve nga Shqipëria, që  do të jenë oficerë të ushtrisë shqiptare. Është ky fakt që e ka ngritë më lartë shkallën e bashkëpunimit të FSK-së, me ushtrinë e Shqipërisë. Një bashkëpunim të tillë ne e kemi zhvilluar edhe me vendet tjera. Ne kemi dërguar kadetët tanë për studime në akademitë ushtarake të Maqedonisë, Kroacisë dhe Turqisë. Ky fakt na bën të ndihemi mirë dhe krenarë, për shkallën e bashkëpunimit në mes të vendeve të rajonit, në shkollimin e kadetëve nëpër akademitë e  mbrojtjes, mbi parimet dhe standardet e NATO-s”, u shpreh ministri Demolli.Komandanti i Gardës Kombëtare të Ajovës, gjeneral brigade Timoty Orr, ka  përshëndetur dhe uruar kadetët e rinj të FSK-së. Pas përfundimit të ceremonisë, familjarët së bashku me kadetët, vizituan ambientet e QSU-së, ku u njoftuan me kushtet e kësaj qendre, në të cilën kadetët do të mësojnë dhe qëndrojnë për katër vjet gjatë studimeve./b.j/

Thaçi takon ambasadorët e UNESCO-s në Paris

by

Paris, 18 shtator 2015/ Zëvendëskryeministri i parë i Kosovës dhe ministër i Punëve të Jashtme, Hashim Thaçi, pas Londrës ka vazhduar vizitën në Francë.Në Paris, zëvendëskryeministri Thaçi ka zhvilluar takime të shumta me ambasadorë të shteteve të ndryshme të botës, që janë anëtare të UNESCO-s.

Ai i ka falënderuar ambasadorët për përkrahjen që po i japin procesit të anëtarësimit të Kosovës në këtë organizatë të rëndësishme të OKB-së dhe ka treguar që edhe Kuvajti e Luksemburgu janë nënshkruar në kërkesën e Kosovës për anëtarësim në UNESCO.”Kosova është angazhuar në një fushatë pozitive, sistematike dhe të fokusuar në promovimin e zhvillimit tonë social, kulturor dhe ekonomik, derisa shumica e shteteve kanë shprehur mirënjohje për qasjen tonë”, ka thënë zëvendëskryeministri Thaçi.Ditë më parë, zëvendëskryeministri Thaçi ka qëndruar edhe në Britani të Madhe, ku po ashtu ka marr mbështetje për anëtarësimin e Kosovës në UNESCO./b.j/