Albanian American Newspaper Devoted to the Intellectual and Cultural Advancement of the Albanians in America | Since 1909
Në një Njoftim të shpërndarë nga Familja Lamaj në SHBA shkruhet: Lajmërojmë mqët, shokët dhe dashamirët se me rastin e vdekjes së më të dashurit tonë ADULLAH (ÇUNI) LAMAJ 10 Gusht 1938- 02 Shkurt 2020 –Familja Lamaj pret vizita ngushëllimi ditën e DIELË me datë 9 Shkurt 2020 duke filluar nga Ora 10.00 AM deri në Ora 4.00 PM(Për burra dhe gra) në restaurantin Royal Regency që gjendet në adresën:
165 Tuckahoe Road
Yonkers, NY 10710
Tel. Kontaktues: 917-468-5835
-Presidenti Trump injoroi doren e zgjatur te Nensi Pelosit, ajo i grisi fjalimin presidentit -/
Presidenti amerikan, Donald Trump ka shtyrë përpara arritjet ekonomike të Shteteve të Bashkuara nën udhëheqësinë e tij, gjatë fjalimit të tretë drejtuar kombit, teksa ka thënë se do të qëndrojë mbrapa përfitimeve shoqërore dhe të atyre për kujdes shëndetësor, nëse fiton një tjetër mandat katërvjeçar.
Trump, i cili ka fituar zgjedhjet presidenciale të vitit 2016 me sloganin “Bëni Amerikën të mrekullueshme sërish”, ka deklaruar në Kongres se ka arritur atë, që ai e cilësuar si “kthim të kombit” nën udhëheqësinë e tij.
“Vendet e punës janë shtuar, të hyrat janë rritur, varfëria ka rënë, krimi ka rënë, vetëbesimi është rritur dhe shteti ynë është jashtëzakonisht i respektuar sërish”, ka thënë ai, para se të prezantonte statistikat për paga, vende të punës dhe tregje të aksioneve.
Trump ka thënë se ka realizuar premtimin e tij gjatë fushatës për të zëvendësuar Marrëveshjen e Amerikës Veriore për Tregti të Lirë, duke pretenduar se ai pakt ka ndikuar në mbylljen e vendeve të punës, andaj Trump ka nënshkruar një marrëveshje të re me Kanadanë dhe Meksikën, një javë më parë.
“Marrëveshja e parë e madhe tregtare në shumë vjet”, ka thënë Trump duke pretenduar se ajo do të ndikojë në hapjen e 100,000 vendeve të reja të punës.
Trump ka diskutuar për ekonominë në 20 minutat e parë të fjalimit të tij para se të niste diskutimin për kujdes shëndetësor dhe imigrim ilegal, dy çështjet tjera kyçe të fjalimit të tij.
Gjyqi kundër Trumpit
Fjalimi i presidentit amerikan këtë vit ka ndodhur në kohën e zhvillimit të gjyqit kundër Trumpit, i cili ka ndarë si Kongresin, ashtu edhe kombin.
Dhoma e Përfaqësuesve, e drejtuar nga demokratët ka miratuar dy akuzat kundër Trumpit, në dhjetor të vitit të kaluar.
Mirëpo Senati i kontrolluar nga republikanët, pritet ta shfajësojë atë më 5 shkurt.
Trump akuzohet për abuzim të pushtetit dhe pengim të punës së Kongresit, pasi dyshohet se ka kushtëzuar ndihmën ushtarake për Ukrainën, në këmbim të hetimeve për rivalin e tij politik, Joe Biden.
Prandaj, tensioni mes dy partive, është ndjerë edhe më shumë gjatë fjalimit të Trumpit.
Teksa i ka dhënë një kopje të fjalimit kryesuesja e Dhomës së Përfaqësuesve, Nancy Pelosi, që ka qenë e ulur mbrapa presidentit, është parë duke i zgjatur dorën Trumpit, mirëpo ai e ka injoruar atë.
Pas fjalimit, Pelosi është parë duke shqyer fjalimin e presidentit.
Pelosi ka qenë në krye të nisjes së procedurave për gjyqin kundër Trumpit, andaj është raportuar se të dy zyrtarët nuk kanë biseduar nga muaji tetor.
Gjatë fjalimit të tij, Trump nuk ka komentuar gjyqin kundër tij.
Demokratët kanë qenë dyshues ndaj shifrave që kanë përmendur Trump, derisa republikanët janë dëgjuar duke brohoritur “katër vjet të tjera”.
Rizgjedhja
Trump synon të rizgjidhet këtë vit si president i SHBA-së, prandaj në fjalimet e tij që po zhvillon në shtetet amerikane, ai është fokusuar në rritjen ekonomike dhe luftimin e imigrimit ilegal.
Ndërkohë më 3 shkurt në Ajoa është mbajtur rrethi i parë i zgjedhjeve, për të kuptuar se kush nga demokratët mund ta fitojë nominimin për të garuar për president. Në një sondazh të publikuar nga Gallup para fjalimit të Trumpit, është parë se shkalla e përkrahjes ndaj tij është 49 për qind, çka prezanton shifrën më të lartë prej kur ai ka ardhur në pushtet më 2017.
Megjithatë, vetëm 7 për qind e demokratëve miratojnë performancën e tij për dallim nga 94 për qind e republikanëve.
Kjo e dhënë prezanton dallimin më të thellë të regjistruar ndonjëherë nga Gallup mes përkrahësve të partive politike në SHBA.
Imgirimi ilegal
Trump ka përmendur sërish fushatën kundër imigrimit, që i ka ndihmuar të fitojë zgjedhjet e vitit 2016.
Ai ka thënë se administrata e tij ka përparuar në arrestimin e imigrantëve pa dokumente, ose ka parandaluar hyrjen e tyre në SHBA.
Presidenti ka thënë se muri që po ndërtohet në kufirin e SHBA-së me Meksikën do shkojë në 800 kilometra deri në fillim të vitit të ardhshëm.
Ai ka kritikuar politikanët që kanë parandaluar Zyrën për Imigrim dhe Dogana për të dëbuar imigrantët pa dokumente.
Përveç tjerash, Trump ka kritikuar edhe një projektligj të demokratëve që ofrojnë kujdes shëndetësor për imigrantët pa leje, duke thënë se një gjë e tillë është “joshje e madhe për imigrantët ilegalë”, të cilët do të përfitonin nga amerikanët e vjetër.
Trump po ashtu ka shpenzuar kohën më të madhe të fjalimit duke folur për sistemin shëndetësor të shtetit, duke përfshirë uljen e çmimit të ilaçeve.
Irani, Afganistani
Përveç marrëveshjeve, tregtare, presidenti ka përmendur pak edhe politikën e jashtme.
Ai ka thënë se ka gatishmëri për t’iu dhënë fund sanksioneve kundër Iranit, nëse ky shtet braktis armët bërthamore dhe ndalon financimin e terrorizmit.
“Ne mund t’iu ndihmojmë atyre të rrisin ekonominë në kohë shumë të shkurtër, mirëpo ata ose janë shumë krenarë, ose shumë budallenj për të kërkuar ndihmë. Ne jemi këtu. Do të shohim cilën rrugë do ta zgjedhin ata”, ka deklaruar Trump.
Ai po ashtu ka thënë se është duke punuar në marrëveshjen për t’i dhënë fund luftës 18-vjeçare në Afganistan, ashtu që të kthejë në shtëpi forcat amerikane.
Kush ishte shpallur i mbijetuar?
Sipas traditës, në fjalimin drejtuar kombit, një anëtar i kabinetit të presidentit nuk duhet të jetë në sallë.
Ai ose ajo duhet të qëndrojë në një vend sekret për t’u siguruar se qeveria do të vazhdojë punën, në rast se ndodh ndonjë fatkeqësi në sallën ku gjendet presidenti, nën-presidenti dhe liderë tjerë shtetërorë.
Personi që këtë herë është shpallur i mbijetuar, ka qenë Sekretari i Brendshëm, David Bernhardt.(Krenare Cubolli-RFL)
Kryetarja e Kuvendit të Republikës së Kosovës, Dr. Vjosa Osmani, vizitën e parë jashtë ambienteve të Kuvendit, në cilësi të kryeparlamentares, e ka realizuar në Klinikën e Neonatologjisë në SHSKUK.
Gjatë qëndrimit në këtë klinikë, kryeparlamentarja Osmani, ka vizituar ambientet e brendshme të klinikës dhe ka takuar pacientët dhe punëtorët shëndetsorë.
Kryetarja Osmani tha se ka dëshiruar që vizitën e parë ta realizojë pikërisht në vendin ku fillon jeta, pra në Klinikën e Neonatologjisë, duke përcjellë kështu një mesazh dhe simbolikë të veçantë.
Ajo deklaroi se do të punojë për të bërë të pamundurën që shëndetësia të bëhet prioritet i Qeverisë.
“Falënderoj të gjithë doktorët e infermierët që bëjnë të pamundurën për fëmijët. Kam ardhur në vizitën e parë aty ku fillon jeta, për të treguar se prioritetet dhe realizimi i tyre i takon qeverisë, por ne si Kuvend do të bëjmë të pamundurën që shëndetësia të jetë prioritet”, theksoi kryeparlamentarja Osmani, duke shtuar se në qoftë se nuk ndërtohen politika shëndetësore të mirëfillta, atëherë nuk mund të ketë as shtet.
“Neonatologjia është vendi ku unë i kam lindur dy vajzat. Pasi të fillojë ndërtimi i Klinikës së re, do të ketë kushte më të mira. Edhe sot ka mungesa, por ne duhet të punojmë punojmë që këto kushte të përmirësohen”, theksoi Osmani.
Kryeparlamentarja Osmani foli gjithashtu edhe për Ligjin për pagat, duke shtuar se punëtorët shëndetësorë meritojnë paga më të larta, pavarësisht ligjit.
-Vjosa Osmani tha se për të është një nder shumë i madh që të drejtojë për katër vitet e ardhshme institucion më të lartë në Republikën e Kosovës/
PRISHTINË, 3 Shkurt 2020- Korrespondenti në Prishtinë i Gazetës DIELLI, i cili ndodhet sot në Kuvendin e Kosovës njofton: Kuvendi i Republikës së Kosovës në një seancë të jashtëzakonshme, sot në mbrëmje, ka zgjedhur për kryetare të Kuvendit Vjosa Osmanin nga Lidhja Demokratike e Kosovës.
Për zgjedhjen e Vjosa Osmanit në krye të Kuvendit të Republikës së Kosovës kanë votuar 65 deputetë.
Seanca u mbajt me vendim të Kryesisë, pas kërkesës së 42 deputetëve, pasi që kryetari i deritanishëm Glauk Konjufca gjatë seancës së sotme plenare është zgjedhur ministër në Qeverinë e Republikës së Kosovës dhe pozita e kryetarit të Kuvendit ka mbetur e lirë.
Zgjedhjes së Vjosa Osmanit për kryetare të Kuvendit u parapriu propozimi i grupit më të madh parlamentar të dalë nga zgjedhjet e 6 tetorit, atij të Lëvizjes Vetëvendosje.
Kryetarja e këtij grupi, Fatmire Mulhaxha-Kollçaku, e ka propozuar për kryetare të Kuvendit të Republikës së Kosovës deputeten Vjosa Osmani.
Nga 67 deputetë të pranishëm në sallë, deputetja Osmani mori votat e 65 prej tyre.
Me të marrë detyrën, kryetarja e Kuvendit, Vjosa Osmani, në një fjalim të mbajtur para deputetëve dhe kabinetit qeveritar, tha se për të është një nder shumë i madh që të drejtojë për katër vitet e ardhshme institucion më të lartë në Republikën e Kosovës.
Duke falënderuar deputetët e Kuvendit të Republikës së Kosovës për mbështetjen, Osmani tha se do të jetë një Kuvend që do të vulosë dhe do të mbikëqyrë mirë, por edhe rreptë, punën e Qeverisë së Republikës së Kosovës.
“Pritshmëritë tona dhe të qytetarëve janë jashtëzakonisht të mëdha, prandaj shpresoj se do të na bëni të gjithëve krenarë. Ajo që mund të them sot se do ta keni përkrahjen tonë të plotë”, tha kryetarja e Kuvendit të Republikës së Kosovës.
Kryetarja Vjosa Osmani tha se nuk do të jetë përfaqësuese e një partie por përfaqësuese e të gjithëve.
“Shpresoj shumë që debati i lirë, debati demokratik, gjuha korrekte ndaj njëri-tjetrit, respekti i ndërsjellë dhe mirëkuptimi, do të jenë shembulli që do ta japim para qytetarëve të Republikës së Kosovës”, tha kryetarja Vjosa Osmani.
Kryetarja e Kuvendit tha se shpreson që secila grua e zgjedhur nga vota e qytetarit do të merret me problemet e vajzave dhe grave në Kosovë.
***
REAGON OPOZITA: PDK: Zgjedhja e Vjosa Osmanit me votat e Listës Srpska është dëshmi se ky koalicion varet nga Beogradi
Prishtinë, 3 Shkurt 2020 – Partia Demokratike e Kosovës e konsideron të papranueshme thirrjen klandestine dhe pa paralajmërim të seancës për ta zgjedhur kryetaren e re të Kuvendit të Kosovës. Kjo seancë e territ, për të cilën nuk kishte asnjë urgjencë, e thirrur nga Lëvizja Vetëvendosje e LDK, u mbajt pa praninë e opozitës dhe shënon herën e parë të zgjedhjes së kryetarit të Kuvendit pa asnjë deputet opozitar.
Zgjedhja e kryetares së re, e propozuar nga Vetëvendosje dhe e mundësuar me votat e Listës Srpska është e dëmshme për vendin dhe tregon qartë se qeveria VV-LDK jo vetëm që është në koalicion me Listën Srpska, por do të jetë e varur plotësisht nga deputetët e këtij formacioni politik dhe nga vullneti i Beogradit zyrtar. Kjo është edhe një dëshmi se ky është koalicion me Vuçiqin e Radojiçiqin dhe sojin e tyre.
Është për keqardhje se ashtu sikurse filluan pazaret politike për karrige në mes të dy partive, ashtu sonte e përfunduan në mënyrën më të turpshme zgjedhjen e kryetares së Kuvendit të Kosovës, e cila pa votat e Listës Srpska sot nuk do të mund të zgjidhej në këtë pozitë.