Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

PDIU: GREQIA ARROGANTE; TE MOS NDERHYJE NE PUNET E BRENDSHME TE SHTETIT SHQIPTAR!

by

Deklarata e Ministrisë së Jashtme të Greqisë per ndarjen territoriale te Republikes se ishte një ndërhyrje e papranueshme në çështjet e brendshme të Shqipërisë me një arrogancë që nuk tremb më askënd. Partia Drejtësi, Integrim dhe Unitet përshëndet përgjigjen dinjitoze të ministrit tonë të Jashtëm, z.
Ditmir Bushati. Shqipëria është një vend anëtar i NATO-s dhe kandidat për t’u anëtarësuar në BE, ndaj shteti grek nuk mund të kërcënojë më Shqipërinë, sikurse ka bërë dy dekadat e fundit.
Presioni që vijohet nëpërmjet thirrjes në Athinë të Vangjel Dules nuk duhet të tolerohet. Z. Dule iu rezervua posti i nënkryetarit të Kuvendit, si një mundësi që të rriste peshën e përfaqësimit të
minoritetit grek në Shqipëri. Përkundër këtij shansi, ai tregon edhe një herë se tenton të luaj rolin e Kalit të Trojës në Tiranë, duke keqpërfaqësuar edhe atë pjesë të vogël të minoritetit që e voton.
Deri më tani, për shkak të madhështisë së kombit shqiptar, ne kemi pranuar krijimin e tri bashki artificiale me shumicë shtetas shqiptar të pakicave etnike. Greqia, jo vetëm që nuk njeh minoritetet, por në zonat minoritare ka krijuar mbiprefektura sui generis vetëm dhe vetëm për të pamundësuar zgjedhjen e minoritarëve në krye të njësive vendore. Këtë shembull negativ ne e refuzojmë.

PARTIA E TË PËRNDJEKURËVE LIND NË GREVËN E URISË

by

Ish të përndjekurit në grevë themelojnë Partinë e re Aleanca Nacionaliste Kombëtare/
Nga çadra e grevës së urisë vetëm pak metra larg godinës së Parlamentit që prej kësaj jave do të lindë një parti e re. Të ngujuarëve nga shtresat e ish të përndjekurve u janë dashur 15 ditë izolimi që të të hartojnë të hedhin në publik partinë Aleanca Nacionaliste Kombëtare.
Vetë Fatmir Hoxha organizatori i grevës bëri të ditur formacionin e ri politik.
Ndërsa në çadër po jepen detajet e fundit të formacionit të ri poltik ish të përndjekurit sfidën e parë kanë të enjten përballjen sy më sy me deputet e kuvendit ndaj të cilëve kanë lajëmruar që nuk do ti kursejnë edhe veprimet ekstreme. “Pse janë të trembur, ata kanë vrarë njerëzit tanë. Ne nuk do djegim ata do djegim makinat. Makinat nuk janë të tyre, por janë të vjedhura me gjakun tonë”, thotë Hoxha.
Për të enjten, janë organizuar edhe ish të përndjekur nga qytetete të tjera për t’i bashkuar këtij reagimi në trajtë proteste. Kjo është dita e 15 e grevës së urisë dhe 3 prej grevistëve janë në gjendej jo të mirë shëndetësore dhe për këtë arsye janë dërguar në spital.

LEVIZJA E LEGALITETIT, MEMORANDUM AMBASADOREVE

by

Shqetesim për prirjen e një pjese të politikës shqiptare për rehabilitimin e simboleve të komunizmit dhe diktatorit Hoxha/
Sot paradite Partia “Lëvizja e Legalitetit” u ka dërguar Ambasadorëve të vendeve anëtare të BE të akredituar në Shqipëri, Institucioneve Europiane dhe Ambasadorit të SHBA në Shqipëri, një Memorandum ku shpreh shqetësimin e saj për prirjen e një pjese të politikës shqiptare për rehabilitimin e simboleve të komunizmit dhe diktatorit Hoxha.
Në këtë Memorandum, krahas shprehjes së mirënjohjes ndaj partnerëve ndërkombëtarë për mbështetjen e tyre ofruar Shqipërisë në rrugën e integrimit Euro-Atlantik, Partia “Lëvizja e Legalitetit” kërkon vazhdimin e kësaj mbështetjeje për dhënien e Statusit të Vendit Kandidat në BE.
PLL gjykon se kjo do të jetë një mjet më shumë për parandalimin e çdo lloj rehabilitimi të diktaturës komuniste dhe diktatorit Hoxha.
Lutemi që të merrni më poshtë tekstin e plotë të këtij memorandumi në shqip, si dhe bashkëngjitur kopjen e letrës origjinale, në anglisht.
Zyra e shtypit e PLL
\
MEMORANDUM

Drejtuar:

Ambasadorëve të vendeve anëtare të BE të akredituar në Shqipëri
Delegacionit të BE në Shqipëri
Ambasadorit të SHBA në Shqipëri
Presidentit të Këshillit Europian
Presidentit të Komisionit Europian
Anëtarëve të Parlamentit Europian
Zyrës së KiE në Shqipëri
Prezencës së OSBE në Shqipëri

I nderuar Zotëri, e nderuara Zonjë,
Të nderuar Shkëlqesitë Tuaja,
Kini mirësinë të na lejoni të ndajmë me Ju një shqetësim serioz që lidhet me ringjalljen e simboleve të ndryshme të ish diktaturës komuniste, të cilat u shpërfaqën qysh kur qeveria aktuale mori pushtetin në shtator 2013.
Këto simbolika patën si zanafillë praninë e portreteve të ish-diktatorit Enver Hoxha në Ceremoninë Zyrtare të mbajtur më 29 nëntor 2013, në varrezat “Dëshmorët e Kombit” në Tiranë.
Që prej 9 janarit 2014, disa deputetë kanë bërë thirrje për krijimin e një Komisioni të Posaçëm për të përkujtuar 70-vjetorin e Çlirimit të vendit me qëllimin e fshehur për të rehabilituar diktaturën komuniste dhe diktatorin Hoxha dhe në të njëjtën kohë për të injoruar kontibutin e forcave jo-komuniste që operonin gjatë LDB kundër Boshtit dhe përkrah Aksit.
Këto thirrje u përsëritën disa herë në vijim dhe në prill të vitit 2014, media raportoi se një grup deputetësh kishin paraqitur, që në fillim të vitit, në Parlament një kërkesë zyrtare për krijimin e këtij Komisioni të Posaçëm Shtetëror.
Më 5 maj 2014, në Ceremoninë Zyrtare të Përkujtimit të Ditës së Dëshmorëve, portretet e ish-diktatorit u shfaqën në qytete të ndryshme të vendit. Në qytetin e Përmetit u shpalosën simbolika të spikatura të diktatorit komunist: si prania e “Pionierëve të Enverit” dhe përdorimi i ‘grushtit lart’ në praninë e një numri të konsiderueshëm deputetësh dhe anëtarësh të qeverisë. Në të njëjtën ditë, në qytetin e Beratit, Ministri i Drejtësisë, bëri homazhe para Monumentit vendor të Dëshmorëve të Kombit, ku një portret i ish-diktatorit Hoxha ishte vendosur në qendër të këtij monumenti.
Më 24 Maj, në 70-vjetorin e të ashtuquajturit “Kongres të Përmetit” që faktikisht i nxiti komunistët të ndërmerrnin një luftë civile gjatë LDB-së, të rrëmbenin pushtetin njëanshmërisht dhe të vendosnin një regjim diktatorial komunist, shumë politikanë të rangjeve të larta morën pjesë në një ceremoni në qytetin e Përmetit, ku thirrjet e qarta në dobi të ish-diktatorit Enver Hoxha dhe simbolikat e diktaturës frikësuan shumë shqiptarë.
Më së fundmi, në qytetin e Korçës, Memoriali i ushtarëve amerikanë që humbën jetën në Shqipëri gjatë LDB-së u dëmtua rëndë nga vandalët, akt i cili ende nuk është zbardhur nga policia dhe nuk është raportuar nga organet zyrtare të Shtetit.
I nderuar Zotëri, e nderuar Zonjë,
Të nderuar Shkëlqesitë Tuaja,
Kjo letër nuk ka për synim t’Ju informojë për çka ndodh në Shqipëri, pasi jemi të bindur se kjo nuk është detyra jonë. As nuk është qëllimi jonë që të ndërhyjmë në marrëdhëniet Tuaja me qeverinë aktuale shqiptare, ngaqë ne e mirëkuptojmë pozicionin Tuaj dhe respektojmë partneritetin që qeveritë Tuaja respektive dhe ju vetë keni zhvilluar me Shqipërinë përgjatë 23 viteve të fundit. Për këtë arsye ne do të jemi gjithmonë mirënjohës për mbështetjen e vazhdueshme që të gjithë aleatët tonë ndërkombëtarë dhe Institucionet Ndërkombëtare, i kanë ofruar Shqipërisë dhe Shqiptarëve në të mirë të lirisë, demokracisë, paqes dhe zhvillimit.
Ne jemi gjithashtu të vetëdijshëm se ishte përgjegjësia e qeverive post-komuniste shqiptare që të mbyllnin kapitullin e diktaturës, dhe që është faji i politikanëve shqiptarë nëse kjo nuk ka ndodhur edhe pas më shumë se 23 vitesh.
Megjithatë, gjendja aktuale meriton një vëmendje të veçantë nga çdo faktor i shoqërisë shqiptare dhe prej partnerëve tanë ndërkombëtarë. Në fakt, ne besojmë fuqimisht se orvatjet për të rehabilituar diktaturën komuniste dhe diktatorin Hoxha nuk janë vetëm një ofendim ndaj mijëra shqiptarëve që u persekutuan e vranë përgjatë epokës komuniste, apo dhjetëra mijëra të tjerëve që kaluan vite të tëra në burgje a kampe përqendrimi. Këto orvatje nuk janë gjithashtu vetëm një ofendim për besimtarët, kishat e xhamiat që u shkatërruan, mbyllën a tjetërsuan gjatë asaj periudhe, dhe as vetëm një ofendim ndaj historisë dhe të vërtetës. Por, çka është më e rëndësishmja, ne jemi të bindur se këto synime për të rehabilituar diktaturën komuniste dhe diktatorin Hoxha, ofendojnë vlerat e lirisë, paqes, demokracisë dhe orientimit Perëndimor, që u ishin ndaluar shqiptarëve gjatë shumë viteve.
Pikërisht për këto vlera të përbashkëta me partnerët tanë Perëndimorë, dhjetëra mijëra jetë shqiptarësh u flijuan apo u rrënuan. Për afro 50 vjet, komunistët luftuan kundra këtyre vlerave dhe kryen krime në emër të vlerave dhe parimeve që i përkasin një tjetër periudhe, një tjetër ideologjie dhe dallueshëm një kampi tjetër.
Shumica e shqiptarëve besojnë e ndajnë ende të njëjtat vlera me aleatët tanë perëndimorë, e për këtë arsye, ne jemi besëplotë se partnerët tanë ndërkombëtarë e kuptojnë rrezikun e rehabilitimit të diktaturës komuniste dhe diktatorit Hoxha. Duket qartë se disa politikanë shqiptarë pretendojnë për qasjen e tyre pro BE dhe NATO, por referencat e tyre në diktaturën dhe diktatorët nuk duhen vlerësuar thjesht si një lëvizje taktike politike, po si një dëshmi e gjallë e shpërfaqjes së vlerave për çka ata realisht besojnë a nuk besojnë.
Përvoja tragjike më shumë se 50-vjeçare e diktaturës komuniste na jep arsye të mjaftueshme për të besuar se rikthimi te vlerat dhe referencat e diktaturës do të dëmtojnë së shpejti jo vetëm paqen dhe stabilitetin e mëtejshëm në Shqipëri e rajon, por edhe interesat gjeostrategjike të vendit tonë dhe aleatëve tanë natyralë.
Prandaj, ne jemi të mendimit se është në interesin tonë të përbashkët për të qenë të vëmendshëm ndaj rreziqeve të rishfaqjes së këtyre simbolikave të diktaturës komuniste, dhe të parandalojmë çdo lloj rehabilitimi të diktaturës e diktatorit Hoxha.
Përveç veprimeve të tjera në këtë drejtim, ne besojmë fuqimisht se ka rëndësi parësore që Shqipërisë t’i jepet këtë muaj Statusi i Vendit Kandidat në BE dhe Ju falenderojmë paraprakisht për mbështetjen tuaj në këtë çështje.
Shpresojmë se Ju do t’i kushtoni vëmendje parësore kësaj letre dhe që do të merrni masat e nevojshme për të përkrahur edhe më tej Shqipërinë dhe shqiptarët në rrugëtimin tonë të vështirë drejt lirisë, demokracisë, paqes, zhvillimit dhe konsolidimit të institucioneve e vlerave.

Sinqerisht i Juaji,

Sulejman Gjana
Kryetar

Basha kërkon mbështetjen e Gjermanisë për statusin e vendit kandidat

by

TIRANË, 4 Qershor-Kryetari i PD, Lulzim Basha gjatë vizitës së tij në Gjermani, u prit të mërkurën nga Andreas Schockenhoff, nënkryetar i grupit parlamentar për politikën e jashtme i CDU-CSU, në Bundestag, i shoqëruar nga Roderich Kieseëetter, raportues për Shqipërinë i grupit parlamentar CDU – CSU.
Po ashtu, kryetari i Partisë Demokratike, u prit në një takim të veçantë edhe nga Kryetari i Komisionit për çështjet e BE, në parlamentin gjerman, Gunther Kirchbaum.
Gjatë bisedës, kryetari i opozitës falënderoi përfaqësuesit e shumicës parlamentare të CDU – CSU, në Bundestag, për mbështetjen që Gjermania i ka dhënë dhe i jep Shqipërisë në rrugën e integrimit europian të saj.
Kryetari i PD-së, Basha theksoi se “PD është e vendosur të mbështesë pa asnjë rezervë dhe pa kushtëzim integrimin europian të Shqipërisë, gjë që e ka dëshmuar gjatë gjithë këtyre muajve dhe kërkoi mbështetjen e Gjermanisë për një vendim pozitiv në mbledhjen e ardhshme të Këshillit Evropian për marrjen e statusit”.
“Perpjekjet shumëvjeçare dhe reformat e ndërmarra bënë të mundur rekomandimin pozitiv të Komisionit Europian, për tre vite me radhë. Ndonëse bllokimi absurd i miratimit të tre ligjeve nga ish – opozitës socialiste, e drejtuar nga Rama, u kthye në një pengesë dhe vonesë për çështjen e statusit. “Shqipëria dhe shqiptarët e meritojnë statusin”, theksoi Basha.
Bashkëbiseduesit, vlerësuan qëndrimin e kryetarit Basha dhe PD, për mbështetje të pakushtëzuar për integrimin europian të Shqipërisë si dhe punën e bërë nga PD, gjatë qeverisjes së vendit, për realizimin e reformave të rëndësishme që bënë të mundur rekomandimet pozitive për marrjen e statusit.
Duke iu referuar situatës aktuale, zyrtarët e lartë gjermanë theksuan se respektimi i shtetit ligjor dhe zbatimi i vendimeve të gjykatave, respektimi i institucioneve të pavarura dhe garantimi i hapësirës institucionale për opozitën si dhe lufta kundër krimit të organizuar, trafiqeve dhe korrupsionit janë standarde europiane të panegociueshme.
“Me shqetësim po ndjekim edhe situatën, në raport me shkarkimet masive në administratën publike të nëpunësve të trajnuar, edhe me kontributin e taksapaguesve gjermanë dhe të BE”, theksuan bashkëbiseduesit gjermanë
Në takime u diskutua për forcimin dhe thellimin e bashkëpunimit mes dy partive simotra CDU dhe PD.(Ilir Vata)

Statusi, ambasadorët e BE thirrje për bashkëpunim mes palëve

by

Qeveria dhe opozita duhet të gjejnë frymën e bashkëpunimit, pasi marrja e statusit kandidat varet nga kjo çështje, deklaroi sot Massimo Gaiani, ambasadori italian në vendin tone, gjatë një aktiviteti në Fototekën “Marubi” ne Shkodër.
“Raporti i Komisionit Europian do të jetë teknik”, tha ambasadori Galiani, i cili, duke u ndalur tek protestat që po zhvillohen nga të larguarit nga puna dhe ish- të përndjekurit, theksoi se ato zhvillohen për një qëllim të caktuar.
Ndërsa ambasadorja çeke, Bronislava Tomasova, ka komentuar situatën politikë në Shqipëri duke theksuar se në cdo vend ka pozitë dhe opozitë, por forcat politike bashkëpunojnë. Tomasova komentoi gjatë në një takim me studentë në zyrën e Bashkimit Europian në Shkoder.
Tomasova theksoi se, polarizimi i shoqërisë dobëson pozitat e saj në integrimin në Bashkimin Europian. “Jeni në dijeni që Komisioni Europian po punon për përgatitjen e një raporti që pritet të lançohet javën tjetër në qershor në kuadër të takimit të nivelit të lartë të dialogut politik. Siç e kam theksuar dhe më parë polarizimi i shoqërisë dhe siç e nënvizova, është një shenjë dobësie e shoqërisë shqiptare se ky fenomen e dobëson procesin e integrimit dhe përpjekjet që bën Shqipëria në procesin e integrimit. Shqipëria do ishte më afër BE nëse ky element i shoqërisë do ishte eliminuar. Në çdo shoqëri demokratike ka një pjesë që qeveris dhe një pjesë që bën opozitën dhe është e vërtetë që mes opozitës dhe pozitës ka disa elementë, subjekte që bëjnë pikën e kundërshtisë mes palëve”.

“Por, ka dhe fusha të tjera për të cilat qeveria dhe opozita bashkëpunojnë. Bashkëpunimi i nevojitet gjithmonë sepse nuk duhet që qeveria të thotë gjithmonë A dhe opozita të thotë B, pra mes tyre duhet të ekzistojë një frymë më e madhe bashkëpunimi. Duhet që politikanët të përfaqësojnë më shumë interesat e vendit se ato personale dhe për këtë është e nevojshme një ndjenjë e fortë bashkëpunimi në shoqëri”, tha Tomasova.

Ndërsa ambasadori polak, Marek Jeziroski, i pranishëm në një aktivitet në Korçë, tha se, Shqipëria ka bërë hapa të rëndësishme drejt statusit. Jeziroski theksoi se Polonia do të ofrojë mbështetjen e saj dhe do ta përkrahë Shqipërinë në këtë nismë, duke shtuar se vendi është në rrugën e BE-së.

“Shqipëria është në prag të një vendimi në qershor. Në dhjetor u identifikuan disa prioritete”, tha Jeziroski, duke shtuar se partitë politike duhet të konfirmojnë që janë për integrimin. “Ka nevojë për bashkëpunim midis palëve”, shtoi ambasadori Marek Jeziroski.