Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Opozita:Parlamenti të ndërpresë ‘ofensivën’ ndaj institucioneve të pavarura

by

Përfaqësues të opozitës kërkuan të mërkurën që parlamenti të kthehet në rolin e vet kushtetues dhe të ndërpresë ’ofensivën’ ndaj institucioneve të pavarura.

Mesditën e sotme u mblodh Konferenca e Kryetarëve për miratimin e kalendarit trejavor të radhës të punimeve të Kuvendit. Pas mbledhjes, deputeti i Partisë Demokratike, Eduard Halimi, tha se parlamenti duhet të kthehet në rolin e vet kushtetues dhe kontrollues, që qeveria të japë llogari para parlamentit dhe jo parlamenti të kthehet në noter të qeverisë.
Sipas Halimit “kapja e institucioneve, që janë aty për të kontrolluar qeverinë, synon ta kthejë vendin në një çiflig të pronarëve Rama-Meta me qëllim që qytetarët të mos shohin dhe të mos mos kenë kujt t’i kërkojnë llogari”.
“Ky është një qëndrim antikushtetues i këtij parlamenti dhe për sa kohë nuk pati asnjë reflektim nga maxhoranca lidhur me këtë kërkesë të opozitës, kjo e fundit u largua nga mbledhja e Konferencës së Kryetarëve pa e miratuar kalendarin e punimeve”.
Opozita pretendon se parlamenti nuk është në një situatë normale, sa i takon pavarësisë së institucioneve.
“Kapja e tyre do të thotë tronditje e themelit të kushtetutës së vendit. Inspektoriati i Lartë i Deklarimit dhe Kontrollit të Pasurive (ILDKP) është aty që të kontrollojë pasuritë, por në rast se qeveria e merr nën sqetull drejtuesin e këtij institucioni, atëhere vendi nuk shkon drejt reformave të BE-së. Ne i kërkuam parlamentit të ndërpresë ofensivën ndaj institucioneve të pavarura që kontrollojnë qeverinë, të ndërpresë ofensivën ndaj AMA-s dhe ndaj SHISH, si dhe ndaj institucioneve të tjera. Nuk mund të ketë parlament normal në rast se nuk kthehet kushtetueshmëria ndaj institucionit të ILDKP-së, për të cilin është bërë debati në parlament”, tha Halimi.
Ai pohoi se opozita do të vazhdojë të jetë në parlament për t’iu bërë të ditur qytetarëve se çështja e respektimit të institucioneve të pavarura do të jetë pikë kryesore e axhendës parlamentare.

Basha: Kjo qeveri, kampione e zhbërjes dhe e goditjes së ligjit

by

”Ne kemi një qeveri gënjeshtare, kampione e zhbërjes dhe e goditjes së ligjit sikuse edhe e shkurtimeve nga puna”, deklaroi sot Kreu i PD-së, Lulzim Basha.Gjatë mbledhjes së grupit parlamentar demokrat Basha solli si alarmante sigurinë e qytetarëve, ku sipas tij, “rendi nuk është më zgjidhja e sigurisë, por e pasigurisë. Vetëm dy javë e para të këtij muaj, shifrat e krimit janë me të larta se ndonjëherë, vjedhjet kanë arritë kulmin, ndërsa shkalla e zbulushmërisë në rënie”.

Kryetari i Partisë Demokratike, Lulzim Basha analizoi bilancin 6 mujor të qeverisë, duke evidentuar dështimet dhe përkeqësimet në ekonomi, siguri publike, e në gjendjen e demokracisë dhe institucioneve në vend.

“Asnjë qeveri nuk ka startuar me një dështim të këtyre përmasave në 23 vitet e fundit, si qeveria e sotme Rama-Meta, dështimi në raport me premtimet dhe pritshmëritë është vetëm gjysma e së keqes”, u shpreh ai.

Gjithashtu Basha, bëri një ekspoze të situatës ekonomike dhe premtimeve të qeverisë, ku sipas tij, “çdo gjë është e errët, mbi 97% e shqiptarëve paguajnë më shumë taksa, në spitale barnat po i blejnë vetë, shqiptarëve u hiqet asistenca dhe u ofrohet puna e detyrueshme. Pagat e mësuesve, pensionistët, fondi i të përndjekurve është dy herë më pak sikurse edhe fondi për kompensimin e pronave”

PD: Edi Rama po shkel vendimin e qeverisë dhe traditën për Ditën e Verës

by

TIRANË, 13 Mars/ Partia Demokratike akuzoi të enjten kryeministrin Edi Rama se po shkel vendimin e qeverisë për Ditën e Verës, duke urdhëruar shkollat në Tiranë që të thërrasin nxënësit nesër në aktivitetin e planifikuar, edhe pse është pushim zyrtar.

“Dita e Verës është pushim zyrtar, por dhe pse ka në fuqi një vendim të tillë, Edi Rama u ka kërkuar shkollave, që tashmë i ka të gjitha nën kontroll partiak, që të mbushin nesër radhët e eventit të tij. Me këtë përpjekje të dëshpëruar, në kohën kur ai vetë dhe qeveria e tij kanë humbur mbështetjen e publikut, kur pakënaqësia dhe protesta kanë zënë vend në gjithë Shqipërinë, Edi Rama kërkon të shfrytëzojë nxënësit e shkollave në Ditën e Verës, për t’u dukur se gëzon mbështetje”, deklaroi zëdhënësja e PD-së, Laura Vorpsi.
Sipas saj, me këtë vendim, kryeministri Rama po shkel një nga premtimet e tij elektorale, më të zëshmin nga ato, kur përbetohej se nxënësit dhe shkollat nën qeverisjen e tij nuk do të shfrytëzoheshin politikisht.

Lulzim Basha: Qeveria nuk reflektoi për mosdhënien e statusit, por thelloi bilancin negativ

by

– Kryetari i PD-së thekson në takimin me Presidentin e Senatit Francez, Jean-Peirre Bel-/

Integrimi europian i Shqipërisë dhe çështja e statusit të vendit kandidat ishin në qendër të një takimi të Kryetarit të Partisë Demokratike, Lulzim Basha dhe Presidentit të Senatit Francez Jean-Pierre Bel.
Kreu i PD-së, Basha falenderoi Presidentin e Senatit për mbështetjen e vazhdueshme që i ka dhënë Franca Shqipërisë në të gjithë momentet e rëndësishme të integrimit euroatlantik, por i shprehu atij shqetësimin për kursin që ndërmori qeveria e re në dëm të demokracisë, në shkelje të ligjit dhe Kushtetutës, kundër standardeve europiane, çka bëri që të rritej doza e skepticizmit në shumë vende të BE-së, gjë që solli vendimin e dhjetorit të Këshillit të Ministrave, për mosdhënien e statusit.
Qeveria e kishte gati statusin e vendit kandidat, tha Basha, duke e informuar z.Bel për reformat e ndërmarra dhe kriteret e përmbushura nga qeverisja e mëparshme, deri në shtatorin e vitit të kaluar.
Basha shtoi se në këtë drejtim rruga për marrjen e statusit nga qeveria e re ishte edhe më e lehtësuar, pasi Partia Demokratike dhe opozita mbështesin plotësisht dhe pa kushte procesin e integrimit dhe marrjen e statusit.
Por, shtyrja e Ligjit për Nëpunësin Civil nga qeveria me një akt normativ që u shpall anti-kushtetues nga Gjykata, shkarkimet masive në administratë, lufta ndaj institucioneve të pavarura, bënë që statusi i vendit kandidat të mos merrej.
Kryetari i Partisë Demokratike tha se ende më shqetësues është fakti se qeveria nuk e lexoi si duhet vendimin e dhjetorit të Këshillit të Ministrave të Bashkimit Europian. Në vend të angazhimit për reformat e kërkuara, qeveria u angazhua në një proces fajësimi të të ashtuquajturve ekstremistë europianë dhe vijoi thellimin e bilancit negativ, duke zhbërë standardet e arritura dhe duke ndërmarrë sulme të njëpasnjëshme kundër institucioneve kushtetuese dhe vetë ligjit e kushtetutës.
“Qeveria nuk bëri asnjë reflektim pas vendimit të dhjetorit, përkundrazi, vazhdoi me shkarkimet masive të punonjësve të administratës, nuk respektoi vendimin e Gjykatës Kushtetuese, vijon ta keqpërdorë parlamentin si noter të akteve të veta, redukton hapësirën e debatit në Kuvend, uzurpoi kompetencat e Presidentit në rastin e shkarkimit dhe emërimit të kreut të ri të ILDKP-së”, theksoi Basha.
Kryetari i Partisë Demokratike e siguroi z. Bel se opozita është e vendosur për mbrojtjen e demokracisë dhe shtetit ligjor në vend.
Presidenti i Senatit francez u shpreh se integrimi europian është çështje me interes kombëtar dhe kërkon patjetër konsensusin e palëve. Ai tha se vendimi i dhjetorit të Këshillit të Ministrave, ishte një mesazh për të ndërmarrë reformat e duhura për procesin e integrimit.
Duke e ripërsëritur qëndrimin e opozitës në mbështetje të plotë të marrjes së statusit, Basha i tha Bel se “opozita do të dëshironte të debatonte me qeverinë dhe të kishte kundërshti me të për çështje programore të së majtës dhe të së djathtës, dhe jo për shtyllat themelore të shtetit të së drejtës dhe demokracisë që janë vënë seriozisht në rrezik nga mazhoranca aktuale”.
Z.Basha dhe z.Bel konfirmuan marrëdhëniet e mira mes Shqipërisë dhe Francës dhe konsolidimin e një portofoli të pasur raportesh dhe shkëmbimesh mes të dy vendeve

Hapja e dosjeve-LSI mbështet nismën e Avokatit të Popullit

by

TIRANE, 1 Mars- Levizja Socialiste për Integrim shprehet në mbështetje të nismës për hapjen e dosjeve, e inicuar së fundi nga Avokati i Popullit.Në një prononcim për mediat, deputeti i LSI-së, Luan Rama, thekson se nisma, e bazuar edhe në modelin gjerman, do të ketë përkrahjen e kësaj force politike në sallën e parlamentit.

“Kjo është një çështje që për fat të keq ka ardhur dhe riardhur disa herë në axhendat politike dhe në axhendat e Kuvendit. Por, fakti që ende vazhdon të jetë ky problem do të thotë që nuk ka patur një trajtim shterues edhe të çeshtjes që ka të bëjë me lustracionin. Kjo jo thjesht dhe vetëm me ata që kanë qenë bashkëpunetorë të ish-Sigurimit të Shtetit, por unë do ta zgjeroja gamën e përfshirjes në fokusin e këtij ligji për të gjithë ata që kanë probleme me institucionet e ligjit”, shprehet deputeti Rama.
Ai pohon se ende nuk e njeh në detaje iniciativën më të fundit per kete ceshtje, por thote Rama, parimisht kam insistuar dhe jam shprehur për një trajtim ligjor dhe për penalitete për të gjithë ata që kanë mëkate nga e shkuara e largët apo nga e shkuara e afërt. Kjo në funksion të krijimit të një standardi dhe modeli jo vetëm për politikebërësit, por për të gjithë punonjësit e administratës shtetërore, të denjë për një administratë europiane”, shprehet   deputeti i LSI-se, Luan Rama.
Pak ditë më parë Avokati i Popullit, Igli Totozani depozitoi një nismë në Kuvend, ku propozon  miratimin e një ligji për hapjen e dosjeve.(Sipas ATSH-se)