Rajon – Page 121 – Dielli

SHBA-Delegacioni i Grave Deputete nga Kosova – viziton shtetin e Iowas

October 7, 2015 by dgreca

Nga Beqir SINA – New York/

Iowa Sister States, është shumë e ngazëllyer të jetë mikpritëse, e një delegacioni “Botë të hapur” nga Kosova!

DES MOINES – IOWA : Një delegacion i deputeteve të Kuvendit të Republikës së Kosovës, i përbërë, nga deputetet Doruntinë E. Maloku, përfaqësuese e LDK-së, Luljeta Gutaj përfaqësuese e PDK-së, Valdete Bajrami nga Nisma, dhe Jelena Bontiç nga Lista Serbe, vizituan sot, kryeqytetin e Iowas, Des Moines.

Delegacioni nga Kosova po qëndron në Iowa në kuadrin e aktiviteteve“Open World Kosovo – 1-8 Tetor 2015”, ku ato jan pritur nga autoritetet më të larta të këtij shteti, për t’u takuar me Sekretarin e Bujqësisë Bill Northey, dhe grupe të miqsisë SHBA – Kosovë.

Delegacioni kosovar ka pasur mundësinë, qysh në ditën e parë të vizitës për t’u takuar me Gardën Kombëtare, të Ajovës! klubin Johnston Rotary Club, dhe ka vizituar gjithashtu Kopshtin Kombëtarë Botanikë të Ajovës!

Katër gratë deputete të Kuvendit të Kosovës u përzgjodhën në mesin e 30 deputeve gra të këtij kuvendi për të marrë pjesë në programin Open World – programin për lidership i veçantë për parlamentaret nga bota, me ftesë të Ambasadës Amerikane, në Prishtinë.

Delegacioni i cili përbëhet prej 4 anëtarëve të parlamentit për Kosovën, thuhet në dekleratën zyrtare të guvernatorit të Iowas në Des Moines, gjatë vizitës në këtë shtet, do të jetë duke u fokusuar në qeverisjen e vendit. Ata do të takohen gjatë këtyre ditëve me një shumëllojshmëri të gjerë të organizatave, qeveritare dhe jo qeveritare, dhe, njerëzve, të ndryshëm, duke përfshirë ligjvënësit, lobistët, avokatët, gjyqtarët, etj të Iowas.

Në dekleratën zyrtare thuhet se :”Ne shpresojmë për t’i dhënë atyre një ekesperiencë të mirë ku në fokus të përgjithshm do të jet, se si funksionon qeveria jonë dhe se si mund të përfshihet pushteti në jetën e një komuniteti.”

Gjithashtu, njoftohet se Kosova planifikon të hapë Konsullatën e Kosovës në kryeqytetin e Iowas – Des Moines, brenda dy muajve të ardhshëm.

Kosova është shteti më i ri “Motra e Shtetit të Iowa – Iowa Sister State”.

“Guvernatori Terry Branstad njoftoi partneritetin në qershor 2013 pasi ish Kryeministri i Kosovës Hashim Thaçi( z/vendës kryeministër dhe ministër i Jashtëm) vizitoi kryeqytetin e shtetit të Iowas – Des Moines. Marrëdhënia, e dy shteteve Iowas dhe Kosovës, lulëzoi nga Programi i Partneritetit Shtetëror të vendosur në mes të Gardës Kombëtare të Ajovës dhe Forcës së Sigurisë së Kosovës. Adjutant gjeneral major Timothy Orr ka luajtur një rol kyç në promovimin e partneritetit për statusin “Motra e Shtetit të Iowa-së- Iowa Sister State”. Marrëveshja zyrtare u nënshkrua në korrik 2013 midis guvernatorit Branstad të Iowa-s dhe presidentes Atifete Jahjaga e Kosovës, “ shkruan në faqen zyrtare guvernatori i shtetit të Iowas.

Viets: Si edhe Gjermania, Kosova gjithashtu ka pasur një moment vendimtar

October 5, 2015 by dgreca

PRISHTINË, 5 Tetor 2015 /B.Jashari/.-Rënia e murit dhe ribashkimi i dy shteteve gjermane ishin momente historike, tha sonte Ambasadorja e Republikës Federale të Gjermanisë në Kosovë, Angelika Viets, gjatë pritjes me rastin e 25 vjetorit.

“Ashtu si edhe Gjermania, Kosova gjithashtu ka pasur një moment vendimtar në të kalaurën e afërt. Në vitin 2008 ky vend u bë i pavarur. Por shpallja e pavarësisë së Kosovës ishte vetëm fillimi i një projekti sfidues: projekti i ndërtimit të një kombi multietnik ku njerëzit mund të jetojnë në paqe dhe prosperitet. Për më tej, një projekt për ta bërë atë ekonomikisht të qëndrueshme”, theksoi Ambasadorja gjermane Viets.

Në pritje, Presidentja kosovare Atifete Jahjaga, në emër të qytetarëve të Republikës së Kosovës dhe emrin personal uroi 25 vjetorin e Ditës së Unitetit Gjerman.

“Që nga 3 tetori i vitit 1990, Gjermania shembi muret, theu kufijtë ideologjikë dhe fizikë. E bashkoi Evropën rreth vlerave dhe aspiratave të lirisë, të demokracisë dhe prosperitetit. Frymëzoi breze të tëra për t’i dhënë fund represionit dhe për t’u rimëkëmbur për të jetësuar idealet e lirisë”, u shpreh Presidentja e Kosovës.

“Ne jemi shumë krenarë për një lidhje të fortë partneriteti dhe miqësie që populli i Kosovës e gëzon me Gjermaninë. Jemi falënderues për roli që ju luajtët në ndalimin e gjenocidit në Kosovë, në stabilizimin e Kosovës përmes pranisë së ushtrisë tuaj paqeruajtëse”, u shpreh ajo.

“I kemi vënë shpresat tona në këmbënguljen tuaj që Ballkani Perëndimor të ecë drejt integrimit evropian dhe në vizionin tuaj që ky integrim do t’i sjellë BE-së vlerë të shtuar, ndërsa për rajonin paqe afatgjate”, tha Jahjaga.(Ndiqni me poshte fjalimet)

***

Fjalimi i ambasadores së Republikës Federale të Gjermanisë, Angelika Viets, me rastin e 25 vjetorit të bashkimit gjerman gjatë pritjes në restorantin Orchide më datë 05.10.2015

Zonja Presidente,

Kryetar i Kuvendit,

Deputetë të Kuvendit,

Kryeministër, Ministra,

Shkelqësi, Zonja dhe Zotërinj,

Është kënaqësi e madhe të ju mirëpres në festimin e Ditës sonë Kombëtare, që sivjet shënon përvjetorin e 25 të ribashikimit gjerman.

Zonja dhe Zotërinj, të dashur bashkvendas

Ju përshendes përzemërsisht. Gëzohem që sot po festojmë bashkërisht 25 vjetorin e bashkimit gjerman.

Data 9 nëntor e vitit të kaluar shënoi 25 vjetorin e rënies së Murit të Berlinit që ishte pika kulmore e protestave prej muajsh nga qytetarët e Gjermanisë lindore – një revolucion paqësor për liri dhe demokraci. Kjo nënkuptoi jo vetëm fundin e ndarjes së detyruar të gjermanëve në lindje dhe në përendim të murit, por gjithashtu ishte një pjesë e procesit që i dha fund ndarjes së kontinentit evropian. Pothuaj një vit më vonë, më datë 3 tetor 1990, ky revolucion paqësor çoi në ribashkimin formal të dy shteteve gjermane.

Rënia e murit dhe ribashkimi i dy shteteve gjermane ishin momente historike. Megjithatë, momenti i ribashkimit ishte gjithashtu fillimi i një nga projekteve më sfiduese që Gjermania e pasluftës kishte për të realizuar – në nivelin politik, ekonomik dhe të shoqërisë. Standaredet e jetesës dhe të pagave duhej të ngriteshin, kompanitë shtetërore u shndërruan në biznese private konkurruese, ndërsa njëkohësisht Gjermania e ribashkuar duhej të diskutonte si të adresojë padrejtësitë e një sistemi politik të ndërtuar mbi shtypje e që kishte shkaktuar aq shumë dhimbje.

25 vjet pas, ne kemi kaluar një rrugë të gjatë. Është rritur një gjeneratë e re që nuk ka njohur një Gjermani të ndarë. Megjithatë, edhe pas 25 vjetësh, projekti akoma nuk është përfunduar.

Zonja dhe Zotërinj

Atë që kemi arritur, ne nuk do të ja dilnim ta bënim pa mbështetjen e miqve dhe fqinjëve tanë, pa të qenit të përfshirë në Bashkimin Evropian, një bashkim që ka bërë të papërfytyrueshme luftën dhe ka sjellë prosperitet në një rajon të tërë. Një Gjermani e ribashkuar nuk do të gëzonte asnjëherë një stabilitet dhe prosperitet të tillë nëse nuk do të ishte për projektin evropian.

Nuk ka asnjë dyshim që sot, projekti evropian po përballet më një numër sfidash: menaxhimi i krizës së Eurozonës, luftimi i papunësisë tek të rinjtë në shumë vende evropiane dhe – natyrisht – përballja me dyndjen më të lartë të refugjatëve që Evropa ka hasur që nga tmerret e Luftës së Dytë botërore.

Vendimi i njerëzve nga rajonet e dërmuara nga lufta dhe të prapambetura ekonomikisht për të ardhur në Gjermani dhe në vendet tjera të BE-së – shpesh përmes rrugëve të vështira dhe të rrezikshme- është një kompliment për vlerat evropiane dhe për shoqëritë tona në BE. Por kjo gjithashtu do të thotë, që ne kemi përgjegjësi të dyfishtë: nga njëra anë, ne duhet t’i trajtojmë njerëzisht të ikurit nga lufta dhe përndjekja politike, edhe nëse njerëzit kërkojnë strehim në numra më të mëdhenj se kurdoherë më parë; dhe nga ana tjetër, ne kemi një përgjegjësi të mbështesim vendet e origjinës për të ndërtuar prespektiva për qytetarët e tyre në mënyrë që njerëzit në rend të parë të mos kenë arsye të ikin.

Zonja dhe Zotërinj,

Ashtu si edhe Gjermania, Kosova gjithashtu ka pasur një moment vendimtar në të kalaurën e afërt. Në vitin 2008 ky vend u bë i pavarur. Por shpallja e pavarësisë së Kosovës ishte vetëm fillimi i një projekti sfidues: projekti i ndërtimit të një kombi multietnik ku njerëzit mund të jetojnë në paqe dhe prosperitet. Për më tej, një projekt për ta bërë atë ekonomikisht të qëndrueshme.

Është arritur shumë në vitet e fundit. Sot, Kosova është një vend i sigurtë, i njohur nga mbi 100 shtete. Vetëm në disa muajt e fundit janë bërë hapa të rendësishëm përpara. Së pari, parlamenti mori vendimin për të krijuar Gjykatën Speciale, e cila do të hetojë krimet e supozuara gjatë kohës së konfliktit. Kjo është një arritje e rendësishme në procesin e ballafaqimit me të kaluarën. Gjithashtu, marrëveshjet aktuale të Brukselit ndërmjet Kosovës dhe Serbisë kanë shënuar një hap thelbësor drejt një normalizimi të raporteve mes dy vendeve. Projekti evropian ka treguar se është e mundur për armiqtë e dikurshëm që të krijojnë raporte të mira fqinjësore – edhepse kjo kërkon kohë dhe guxim politik.

Gjithsesi, demonstratat në fillim të këtij viti dhe vala e migrimit dimrin e kaluar tregojnë që Kosova akoma përballet me shumë sfida në të ofruarit e paqes dhe prosperitetit për qytetarët e saj. Progresi i rendësishëm i bërë në fushat e Gjykatës Speciale dhe procesit të normalizimit, lejon tani koncentrimin në zhvillimin ekonomik në masë më të theksuar se deri më parë. Është thelbësore për qeverinë që të luftoj papunësinë e lartë, të tërheq investime të huaja dhe të investoj në arsim. Popullata e re e Kosovës mund të jetë një mundësi e jashtëzakonshme për vendin, por për këtë rinia gjithashtu ka nevojë për mundësi për të ndërtuar një të ardhme më të mire. Pa prespektiva dhe garë të drejtë, edhe më shumë të rinj do të kërkojnë mundësi përtej kufijve të Kosovës.

Gjermania, BE-ja dhe vendet e tjera janë të përkushtuara ta mbështesin Kosovën. Procesi i Berlinit e dëshmon pikërisht këtë. Procesi është nisur vitin e kaluar nga kancelarja Merkel me një konferencë në Berlin dhe është vazhduar këtë vit me Konferencën e Ballkanit Përendimor në Vjenë. Megjithatë, e gjitha që ne mund të bëjmë është të mbështesim. Pronësia duhet të jetë në rajon dhe në vendet e saj veç e veç. Duke parë që janë marrë vendime të vështira si krijimi i Gjykatës Speciale dhe Marrëveshjet e Brukselit, jam e bindur që liderët e Kosovës do të tregojnë gjithashtu guxim politik kur është në pyetje ekonomia.

Ashtu si edhe sfidat ekonomike të ribashkimit gjerman, sfidat ekonomike të një Kosove të pavarur kërkojnë përpjekje kombëtare. Si qeveria ashtu edhe bizneset, shoqëria civile dhe qytetarët duhet të përfshihen në mënyrë aktive në proces. Gjermania do të vazhdojë të përkrah Kosovën dhe projektin e saj kombëtar. Duke punuar së bashku, ne mund të sigurojmë një të ardhme paqësore dhe prosperuese si një anëtare në një rajon të integruar të Ballkanit Përendimor dhe në një Evropë të integruar.

Para përmbylljes së këtij fjalimi, ju lutem më lejoni të shpreh falenderimin tim për sponsorët e organizimit të sontëm: AHP Volkswagen, Ecotrade dhe ExProject.

Një falenderim i ngrohtë për korin muzikor të ushtrisë, të cilët hapen mbrëmjen me një performancë të shkëlqyer. E vlerësoj jashtëzakonisht shumë që po luani sonte këtu, pavarësisht fluturimit nesër në orët e hershme për në Gjermani.

Gjithashtu dëshiroj të falenderoj personelin tim dhe restorantin Orchide për përkushtimin e tyre dhe punën e madhe që ne sonte bashkërisht të mund të kalojmë një mbrëmje të këndshme.

Kam kenaqësinë e madhe të thërras të ngrejmë një dolli për Presidenten e Republikës së Kosovës.

Himn

Për Presidenten!

***

FJALIMI I PRESIDENTES JAHJAGA NË 25 VJETORIN E DITËS SË UNITETIT GJERMAN

Të nderuar përfaqësues të institucioneve të Republikës së Kosovës,
E nderuara Ambasadore Viets,

Zonja dhe Zotërinj,

Në emër të qytetarëve të Republikës së Kosovës dhe emrin tim personal më lejoni që t’ju uroj ju dhe popullit gjerman 25 vjetorin e Ditës së Unitetit Gjerman.

Që nga 3 tetori i vitit 1990, Gjermania shembi muret, theu kufijtë ideologjik dhe fizik. E bashkoi Evropën rreth vlerave dhe aspiratave të lirisë, të demokracisë dhe prosperitetit. Frymëzoi gjeneratat të tëra për t’i dhënë fund represionit dhe për t’u rimëkëmbur për të jetësuar idealet e lirisë.

Njëzet e pesë vjet më vonë, ky unitet historik mbetet po aq i rëndësishëm. Sot më shumë se kurrë na duhet një vizion i thyerjes së kufijve dhe shembjes së mureve. Na duhet që t’i rikthejmë idetë që bashkojnë popujt mbi parimet e demokracisë dhe bashkëpunimit.

Sepse, puna jonë e përbashkët, për një Evropë të bashkuar dhe në paqe, nuk ka përfunduar. E kjo punë e papërfunduar ndihet në Kosovë më shumë se kudo tjetër.

Ne jemi shumë krenarë për një lidhje të fortë partneriteti dhe miqësie që populli i Kosovës e gëzon me Gjermaninë. Jemi falënderues për roli që ju luajtët në ndalimin e gjenocidit në Kosovë, në stabilizimin e Kosovës përmes pranisë së ushtrisë tuaj paqeruajtëse.

Atëherë kur hapët dyert për refugjatët që po iknin nga lufta dhe skamja, dhe tash kur po i përkrahni institucionet e Kosovës në vënien e themeleve për një ekonomi stabile të Kosovës.

I kemi vënë shpresat tona në këmbënguljen tuaj që Ballkani Perëndimor të ecë drejt integrimit evropian dhe në vizionin tuaj që ky integrim do t’i sjellë BE-së vlerë të shtuar, ndërsa për rajonin paqe afatgjate.

E kam parasysh që ne na presin shumë obligime të pa përmbushura ende. Por, ne jemi të përkushtuar që së bashku me partnerët tanë, me ju, ta jetësojmë vizionin për Kosovën e sundimit të ligjit, fqinjësisë së mirë, bashkëpunimit rajonal, dhe më së shumti vendit me perspektivë të qartë, ku qytetarët e tij shohin të ardhme.

Ju faleminderit për praninë tuaj të fuqishme në Kosovë, për partneritetin dhe miqësinë!

Gëzuar!

Kosova drejt liberalizimit të vizave

October 3, 2015 by dgreca

-Republika e Kosovës për liberalizim vizash ka plotësuar 87 nga 95 kriteret teknike, e të gjitha do plotësohen deri në fund të nëntorit 2015. Diskutohen çështjet e integrimeve në Bashkimin Evropian/

Nga Behlul Jashari/ PRISHTINË, 3 Tetor 2015/ Kosova drejt liberalizimit të vizave ka plotësuar 87 nga 95 kriteret teknike, e të gjitha do plotësohen deri në fund të nëntorit 2015. Këtë e ka bërë të ditur kryeministi Isa Mustafa pas kthimit nga Nju Jorku dje pasdite në Prishtinë dhe takimeve e bisedave që ka pasur delegacioni kosovar me presidentin e Këshillit Evropian, Donald Tusk, përfaqësuesen e lartë të BE-së për Punë të Jashtme, Federica Mogherini, komisionerin e BE-së për Migrim, Çështje të Brendshme dhe Shtetësi, Dimitris Avramopoulos.

“Kemi diskutuar çështjet e integrimeve tona në Bashkimin Evropian, veçmas procesin liberalizimit të vizave dhe çështje tjera integruese si dhe Marrëveshjen për Stabilizim Asociim”, tha kreu i qeverisë së Kosovës.

“Mund të them se kemi një përkrahje të plotë, nuk mund të flas tani për afatet, veçmas për liberalizimin e vizave, por konsideroj se ne do t’i përmbushim deri në fund të nëntorit të gjitha kriteret”, shtoi ai.

“Nga 95 kritere teknike të cilat janë parashtruar para nesh, i kemi plotësuar krejtësisht 87. Kanë mbetur edhe disa, për të cilat do ta bëjmë tani një Task Forcë dhe do të procedojmë me to deri në fund të nëntorit, në mënyrë që të gjitha kriteret t’i kemi të plotësuara krejtësisht, dhe të presim që të merret vendimi politik në nivel të Bashkimit Evropian”, theksoi kryeministri i Kosovës, Mustafa.

I ftuar nga Presidenti i Shteteve të Bashkuara të Amerikës, Barack Obama, kryeministri i Kosovës Mustafa ka marrë pjesë në Samitin Global të Liderëve Kundër ISIS-it dhe Kundër Ekstremizmit të Dhunshëm, ndërsa është pritur në takime me zyrtarë të lartë të Administratës së SHBA-ve.

“Gjatë 5 ditëve të vizitës, kemi zhvilluar dhjetëra takime dhe aktivitete të nivelit të lartë, të cilat besoj se kanë dhënë fryte të rëndësishme për Kosovën, veçanërisht në raport me rolin e saj në bashkësinë ndërkombëtare”, vlerësoi Mustafa.

Presdienti Obama, Rusia po forcon ISIS

October 3, 2015 by dgreca

Kur dukej se marrëdhëniet mes Shteteve të Bashkuara të Amerikës dhe Rusisë e kishin krisur akullin disa vjeçar mes dy vendeve, ka qenë vetë Presidenti Obama, i cili në një dalje për mediat nga Shtëpia e Bardhë, i ka cilësuar sulmet e nisura nga Moska mbi Siri, si një mbështetje dhe forcim që i bëhet Shtetit Islamik. “Arsyeja pse Asadi është akoma në pushtet, është sepse Rusia dhe Irani kanë qenë të gatshëm për ta mbështetur. Putin shkoi në Siri, sepse miku i tij Asad është i dobët. Nuk u mjaftua vetëm me dërgimin e parave, por u desh të dërgonte dhe njerëz. Vetëm Rusia dhe Irani janë me Asadin, e gjithë bota është kundër tij”, ka deklaruar Presidenti Obama përpara gazetarëve. Ndër të tjera, Obama ka kundërshtuar me forcë dhe “teorinë ruse”, sipas së cilës, cilido që kundërshton Asadin është terrorist. Për Presidentin amerikan, fakti që Rusia nuk bën dallimin mes ISIS dhe opozitës së moderuar sunite, është rruga drejtë shkatërrimit.

Konflikti në Siri dhe qëndrimet Amerikane e Ruse

October 2, 2015 by dgreca

Avionë luftarakë rusë ndërmorën për të dytën ditë goditje ajrore në Siri, që kishin në shenjestër ekstremistë të Shtetit Islamik, por siç njoftojnë vëzhguesit, edhe luftëtarë të opozitës që gëzojnë mbështetjen e Shteteve të Bashkuara. Zëdhënësi i Ministrisë ruse të Mbrojtjes Igor Konashenkov në komentet për shtyp tha se avionë rus goditën mbi dhjetë objektiva të ISIS, përfshirë një qendër komande dhe dy depo municionesh. “Gjatë natës u goditën katër objektiva të tjera të ISIS. Avionë SU-24M dhe SU-25 kryen tetë misione fluturimi. Ata shkatërruan selinë e grupit terrorist dhe depon e municionit pranë Irbilit si dhe një bazë të terroristëve me tre fortifikime pranë qytetit Hama. Një goditje e drejtpërdrejtë ka shkatërruar plotësisht objektin që prodhonte mjete plasëse dhe municion në veri të qytetit Homs”. Por Kremlini pohoi se kishte në shenjestër edhe “një listë” grupesh të tjera përveç ISIS, duke thënë se këto organizata njihen mirë dhe janë identifikuar si objekte sulmesh në koordinim me forcat e armatosura të Sirisë. Në një konferencë për shtyp në Nju Jork, Ministri i Jashtëm rus Sergei Lavrov tha se avionët rusë kanë në shenjestër të njëjtat objektiva si avionët amerikanë dhe të koalicionit. “Nëse duket si terrorist, nëse vepron si terrorist, nësë lufton si terrorist, është terrorist, apo jo? Me sa mbaj mend unë, ne kemi thënë që në fillim se do të luftojmë kundër ISIS dhe grupeve të tjera terroriste. Këtë qëndrim mbajnë edhe amerikanët. Përfaqësuesit e komandës së koalicionit kanë thënë gjithmonë se në shenjestër të tyre janë ISIS, al-Nusra dhe grupe të tjera terroriste. Këtë qëndrim kemi edhe ne. Në këtë pikë ne jemi në të njëjtën pozitë me koalicionin”. Por Koloneli Steve Warrren, zëdhënës i operacionit të forcave amerikane kundër ISIS në Irak dhe Afganistan tha në një tele-konferencë për shtyp nga Bagdati se megjithë deklaratat e Moskës se po sulmon bazat e ISIS, nuk ka luftëtarë të Shtetit Islamik në zonat ku janë përqëndruar sulmet ruse: “Rusët janë shprehur shumë qartë publikisht se do të sulmojnë ISIS. Nuk do të diskutoj se çfarë konkretisht kanë goditur me sulmet e tyre, por ne nuk mendojmë se kanë goditur objektiva të ISIS. Këtu qëndron problemi. Rusët kanë thënë se do të bëjnë një gjë, por po bëjnë diçka krejt tjetër, gjë që e kanë bërë edhe herë të tjera,” tha koloneli. Sekretari amerikan i Shtetit John Kerry ka bërë thirrje për një takim urgjent të ushtrive amerikane dhe ruse për diskutimin e mënyrave për të shmangur goditjet ndaj forcave të njëri-tjetrit në operacionet që kanë ndërmarrë dy vendet në Siri. Rusia i filloi dje sulmet ajrore në Siri, për të goditur Shtetin Islamik, megjithëse grupet e të drejtave të njeriut thonë se synimi i këtyre operacioneve nuk është ende i qartë. Sekretari i Shtetit John Kerry i bëri komente dje në vijim të një takimi me Ministrin e Jashtëm të Rusisë Sergei Lavrov, pasi Moska filloi godjet ajrore mbi ato që i cilëson si objektiva të ISIS. “Kur flitet për goditjet kundër ISIS është një gjë, ajo që na shqetëson ne është se nuk po ndodh kjo”. Moska thotë se synon të spastrojë Sirinë nga ISIS, por mënyra si po zhvillohen operacionet ka ngritur pikëpyetje: “Me sa duket rusët kanë vepruar në zona ku ndoshta ka forca të ISIS, pikërisht këtu qëndron problemi me këtë mënyrë operimi,” tha Shefi i Pentagonit, Ash Carter. Si zoti Kerry, ashtu edhe ministri rus Lavrov thanë zhvilluan një takim konstruktiv, por ata pohuan se nevojitet më shumë punë në mënyrë që të shënohet përparim. “Ne të gjithë duam një Siri demokratike, të bashkuar dhe laike. Duam një Siri ku të mund të ndërtojnë jetët e tyre të gjitha grupet fetare, ku të drejtat e njeriut të garantohen.

Por ne kemi mospajtime lidhur me mënyrat për ta realizuar këtë qëllim,” tha ministri rus. Ministria ruse e Mbrojtjes ka nxjerrë një video ku thotë se shihen operacione ajrore kundër ISIS.Por grupet e të drejtave të njeriut thonë se goditjet ruse kanë vrarë 30 civilë pranë qyteteve Homs dhe Hama, të cilat nuk kontrollohen nga Shteti Islamik, por nga opozita e moderuar siriane.

Rusia këmbëngul se goditjet dëmtuan pajisje ushtarake të ISIS, qendra komande dhe automjete të përdorura nga grupe terrorist. Operacionet që ka ndërmarrë Rusia pritet të acarojnë më tej mosmarrëveshjet mes Uashingtonit dhe Moskës për qëndrimin ndaj konfliktit në Siri.

Republikanët fajësojnë politikat e Presidentit Obama në rajon për këtë situatë. Ndërkaq, Pentagoni ka thënë se koalicioni ku bëjnë pjesë Shtetet e Bashkuara, do të vazhdojë goditjet kundër Shtetit Islamik në Irak dhe Siri.