Patriotët e shquar Qemal e Kozeta Zylo, “Ambasadorë të Kombit” shqiptar në mërgatën e Shteteve të Bashkuara të Amerikës dhuruan 500 dollarë për ndërtesën e re të Federatës Vatra dhe 100 dollarë për gazetën Dielli. Themeluesit e shkollës shqipe dhe televizionit shqiptaro-amerikan “Alba Life” prej afro 2 dekadash kontribuojnë me çdo mjet e çdo kusht për kombin, gjuhën, komunitetin dhe kulturën kombëtare në New York.

Institucioni i Presidentit të Republikës së Shqipërisë, për punën e shquar atdhetare i ka vlerësuar patriotët Qemal e Kozeta Zylo me Titullin e Lartë ” Kalorës i Urdhërit të Flamurit.

Me dhjetëra fëmijë shqiptarë që edukohen në çdo vit prej patriotëve Zylo dhe dhjetëra emisione televizive kushtuar komunitetit shqiptar në Amerikë, përbëjnë një pasuri e kontribut patriotik e kombëtar shumë të çmuar për shqiptarët e Amerikës.

Vatra e Dielli shprehin falënderimin më të përzemërt, respektin më të thellë e mirënjohjen më të veçantë për çiftin Zylo dhe çdo shqiptar që mbështet Vatrën e Diellin si institucionet atdhetare më të fuqishme që udhëheqin prej më shumë se 1 shekull dhe 1 dekadë proceset patriotike dhe veprimtarinë atdhetare në Shtetet e Bashkuara të Amerikës.

Të mbështesësh Vatrën e Diellin është akt i lartë patriotik e vepër e artë atdhetare.

Komuniteti Shqiptar i Floridës së Jugut pati dy evente madhështore këtë nëntor: për herë të parë, ngritjen e flamurit shqiptar në Bashkinë e Hollywood dhe gjithë Floridën e Jugut si dhe celebrimin e festës kombëtare së bashku me Ditën e Falënderimeve (Thanksgiving) më 28 Nëntor. Të dyja këto aktivitete ishin organizuar nga Vatra Miami.

Vatra Miami ndihet krenare që arriti këtë ditë historike. Mesazhi i saj është i qartë: Kur duam njëri-tjetrin, duam më shumë Shqipërinë! Asnjë ditë nuk na bashkon më shumë se Festa e Flamurit, dita e Pavarësisë së Shqipërisë, 28 Nëntori.

Siç ka thënë Mit’hat Frashëri:

“Patriotizmi është mbi të gjitha një ndjenjë madhështore që na shtyn të kërkojmë nderin dhe madhërinë e kombit tonë, sepse në atë madhëri do të gjejmë lumturinë dhe nderin tonë si individë.”

I bekuar qoftë çdo shqiptar, brenda dhe jashtë trojeve, që e ka në zemër këtë amanet të Frashëlliut të fundit!

Në emër të Vatra Miami dhe Klubit Flas Shqip, dëshirojmë të shprehim falënderimet tona të përzemërta për të gjithë ata që ndihmuan në realizimin e këtyre sukseseve të mëdha:

Falënderime të Veçanta:

Kryetarit të Bashkisë së Hollywood dhe stafit të tij, për mikpritjen e veçantë dhe lejimin që flamuri ynë të valëvitej krenar për herë të parë për tre ditë me radhë në qiellin më jugor të kontinentit Amerikan.

Sponsorit gjeneral të Klubit Flas Shqip, z. Doug Saraci, pronar i kompanisë së suksesshme Alyssa’s, i cili mbështeti financiarisht Klubin Flas Shqip dhe premton ndihmë të mëtejshme për zgjerimin e tij.

Prindërve të përkushtuar, si Ilir dhe Suela Dekaj, Lek dhe Adela Dekaj, Lul dhe Ardela Smailaj, Alban dhe Tika Hoti, familjet Zharku dhe Berisha, Nola Belenek, dhe familjen Jakupi, Troni dhe Shehu, që kanë ndihmuar në rritjen e radhëve të klubit dhe kanë qenë ndër të parët që ofruan mbështetje financiare për eventet e nëntorit.

Skulptorit Artur Bejkollari, banues në Miami, i cili krijoi banerin kryesor të eventit si një dhuratë e veçantë për Vatra Miami.

Televizionit Noli TV dhe gazetarit Nazim Saliu, për mbulimin profesional të eventit dhe promovimin e komunitetit tonë.

Përfaqësuesve të Vatrës, z. Sokol Paja dhe z. Marjan Cubi, që na nderuan me pjesëmarrjen dhe mbështetjen e tyre në event.

Mësueses Liljana Rrumbullaku për përkushtimin në përgatitjen dhe realizimin e koncertit të fëmijëve si dhe mësuese Ana Liko për ndihmën me orientimin e të ftuarve përgjatë eventit.

Familjes sime, që më mbështeti pa kushte gjatë gjithë kësaj kohe.

Një falenderim i vecante i shkon orkestrës së Maestro Raif Hyseni dhe Bilbilit të këngës së Shqipërisë së mesme Merita Halili që i dhanë mbrëmjes notat e larta festive.

Vatra Miami dhe Klubi Flas Shqip do të vazhdojnë të kontribuojnë për komunitetin shqiptar, duke rritur numrin e anëtarëve dhe nxënësve, duke rrënjosur gjuhën dhe kulturën tonë në brezat e rinj dhe duke promovuar vlerat kombëtare. Por mbi të gjitha, ne do të vazhdojmë të forcojmë frymën e bashkimit, sepse vetëm të bashkuar si komunitet mund të jemi më të fuqishëm.

Zoti e bekoftë çdo shqiptar dhe çdo cep të botës ku ata jetojnë dhe punojnë!

Bekuar qoftë Shqipëria dhe Amerika, të dyja janë tonat, si valvulat e zemrës!

Me respekt,

Vatra Miami

New York, 27 Nëntor 2024 – Fatmir Gjeka, ministër i të drejtave të njeriut dhe pakicave në qeverinë e Malit të Zi njëkohësisht dhe kryetar i Partisë Demokratike në Mal të Zi vizitoi Federatën Pan-Shqiptare të Amerikës Vatra. Ai u shoqërua nga Astrit Hoxha sekretar shtetëror në Ministrinë e Drejtave të Njeriut dhe Pakicave dhe Naser Nika kryetar i shoqatës shqiptaro-amerikane në Staten Island, NY. Ata u pritën nga sekretari i Vatrës Dr. Pashko Camaj, z.Ilir Cubi anëtari i kryesisë më 30 vite kontribut në Vatër dhe z.Mëhill Gjuraj biznesmen dhe aktivist i çështjes kombëtare në mërgatën e Amerikës. Dr. Camaj në fjalën e mirëseardhjes shpjegoi historinë e Vatrës dhe Diellit dhe kontributin thelbësor në historinë e Shqipërisë dhe shqiptarëve nga Shtetet e Bashkuara të Amerikës deri në trojet etnike. Ministri Gjeka vlerësoi punën e Vatrës si institucion kombëtar dhe tregoi sukseset qeveritare në kabinetin ku prezenca dhe fuqia e shqiptarëve është gjithnjë në rritje. Dr. Camaj në emër të Vatrës shprehu mirënjohje, falenderim e mbështetje faktorit politik shqiptar në Mal të Zi të cilët janë më të fortë se kurrë në mbrojtje të interesave kombëtare dhe prosperitetit të Malit të Zi në rrugën euroatlantike.

Federata Pan-Shqiptare e Amerikës Vatra dhe gazeta Dielli përcjellin ngushëllimet më të dhimbshme për ndarjen nga jeta të patriotit, vatranit, shkrimtarit e atdhetarit Agim Deshnica. Një studiues model, qytetar shembullor, i urtë e vizionar, një aktivist frymëzues dhe kontributor me dekada për çështjen kombëtare, Agim Deshnica la pas një trashëgimi të shkëlqyer atdhetare, letrare e komunitare.

Kryetari i Vatrës Dr. Elmi Berisha në emër të të gjithë vatranëve e gazetës Dielli shpreh keqardhjen për humbjen e patriotit Dishnica, kontributor i madh i çështjes kombëtare në mërgatën e Amerikës.

I përjetshëm kujtimi dhe nderimi.

Pushoftë në parajsën e përjetshme Agim Deshnica!

Pritja dhe nderimet zhvillohen në:

Nicholas Funeral Home, ditën e mërkurë, më 27 nëntor, nga ora 10:00 AM deri në 12:00 PM.

Adresa:

187 Middlesex Ave

Wilmington, MA 01887

Ceremonia e lamtumirës do të mbahet menjëherë pas pritjes.

Vatra Chicago në bashkëpunim me Trojet Entertainment organizoi më 23 Nëntor Festën e Pavarësisë në Chicago në ambientet e Elm West Banquets. Të ftuar ishin këngëtarët Mariola dhe Jurgen Kaçani të cilët e ndezën atmosferen me këngë nga të gjitha trevat. Fjalën e hapjes e mbajti kryetarja e Vatra Chicago zonja Mirela Kanini e cila midis të tjerave tha: Festa e Pavarësisë është festa më e rëndësishme për të gjithë shqiptarët kudo që janë. Ne të diasporës e që jetojmë larg mëmëdheut jo vetëm që nuk e harrojmë kurrë atë por e ndjejmë të nevojshme të jemi pranë njëri tjetrit, të flasim shqip dhe të kërcejmë e këndojmë këngët tona”. Bukurinë mbrëmjes ia shtoi koncerti i vogël i hapjes i realizuar nga fëmijët e Grupit Arbëria. Kryesia e Vatrës po punon me intensitet që të sjellë sa më shumë aktivitete të larmishme patriotike dhe gjithëpërfshirëse për çdo grup moshe për të afruar sa më shumë komunitetin shqiptar me njëri-tjetrin. Zoti i bekoftë të gjithë shqiptarët kudo që janë. Gëzuar ditën e Pavarësisë! Gëzuar ditën e Flamurit!