Ndue Gjekaj/

Dega e Vatrës Tampa Bay Florida, ka organizuar këto ditë në një nga parqet më të bukura në Clearwater Florida, një veprimtari komunitare e atdhetare kushtuar 112 vjetorit të themelimit të Federatës Pan-Shqiptare të Amerikës Vatra. Kishin ardhur për të festuar vatranë, patriotë, aktivistë të komunitetit shqiptar nga disa qytete të ndryshme të Floridës sidomos nga Tampa Bay e më gjerë.

Aktivitetin e hapi kryetari i degës Vatra Tampa z.Isuf Spahia, i cili falenderoi të pranishmit për pjemarrjen e tyre në këtë aktivitet. Ai ndër të tjera paraqiti para pjesëmarrësve programin e aktiviteteve patriotike të kësaj dege në vijim dhe kërkoi bashkëpunimin e tyre duke vënë theksin tek veprimtaritë atdhetare dhe njohjen me tradita tona historike veçanërisht nga të rinjtë shqiptarë. Amëtari i Krysisë së Vatrës z.Tasim Ruko në një përshëndetje të shkurtër, theksoi se Vatra Tampa, duhet të punojë për zgjerimin e sajë duke afruar rreth vehtes sa më shumë të rinj dhe intelektualë, për ta mbajtur Vatrën gjithmonë të re dhe me botëkuptim bashkohorë. Z. Ruko premtoi rihapjen e shkollës shqipe në muajin shtator, ndërkohë që ka filluar përgatitja e stafit dhe e bazës së nevojshme materiale për shkollën shqipe. Z. Ruko falenderoi përzemërsisht organizatorët e aktivitetit të shkëlqyer patriotik e veçanërisht vatranët: Isuf Spahia, Eva Keta, Islam Sala, Endri Filipi si dhe sponsorin kryesor Asteria Lunch Restorant, me Pronar, Gaz & Rovena Gega, të cilët janë dhe anëtarë të dalluar të Vatrës. Aktivistja e pa lodhur Eva Keta në përshëndetjen e saj ndër të tjera theksoi: Kohët e fundit rreth Vatrës janë afruar më shumë gra e vajza të reja, dhe se në të ardhmen do punojmë dhe më shumë për rritjen e rolit të tyre veçanërisht me fëmijët dhe të rinjtë, për ruajtjen e gjuhës shqipe, kulturës e traditave tona kombëtare. Aktivitetin patriotik e bëri dhe më të bukur pjesëmarrja e këngëtarit prefesionist z. Sali Malaj, tashmë një banues në Tampa Bay dhe gjithnjë i pranishëm midis festave e gëzimeve të komunitetit shqiptarnë Florida.

Muzika shqiptare, këngët e vallet e bukura shqiptare e shoqëruan këtë aktivitet komunitar deri në orët e vona të pasdites në nder e respekt të 112 vjetorit të themelimit të Federatës Pan-Shqiptare të Amerikës Vatra.

Vatra Chicago celebroi Mother’s Day në ambientet e Cafe Mirage dhe nën tingujt e muzikës shqiptare sjellë nga DJ Albert Hide. Një festë e shkëlqyer në nderim dhe mirënjohje për sakrificën e dashurinë që falin nënat e mrekullueshme të kombit tonë. Nënat shqiptare në Diasporë dhe në Chicago janë një shembull i vlerave më të çmuara e më të vyera të kombit tonë. Trashëgimi e gjallë shpirtërore, kombëtare, familjare, komunitare e atdhetare. Ato japin kontributin e tyre në mbarëvajtjen e familjeve të shenjta dhe në shoqëri. Nënat tona të mrekullueshme që na bëjnë të ndihemi krenarë çdo ditë me kontributin, shembullin e figurën e tyre të lartë. Zoti i bekoftë të gjitha nënat shqiptare kudo që janë. Nënat, simbol i jetës, dashurisë, vazhdimësisë, ekzistencës…

† THEOFANI

Nga Mëshira e Perëndisë

Peshkop i Filomilisë

dhe i Peshkopatës Ortodokse Shqiptare të Amerikave

Klerikëve të nderuar dhe besimtarëve të dashur të krishterë ortodoksë, bij dhe bija anëtarë, mbështetës, dashamirës dhe miq të Peshkopatës Ortodokse Shqiptare të Amerikave.

Hir, Mëshirë, Paqe dhe Gëzim nga Zoti ynë Jesu Krisht dhe nga ne, bekime atërore!

Të dashur besimtarë, bij dhe bija në Krishtin, Festa e shenjtë e Ngjalljes së Zotit tonë Jesu Krisht, e cila ia kalon në madhështi të gjitha festave të tjera, hedh edhe një herë rrezet e saj të dritës, hirit, bekimit dhe shpresës mbi ne dhe mbi të gjithë krijesën, duke ngrohur shpirtrat dhe trupat tanë dhe na ndihmon të kuptojmë se vdekja është mposhtur përgjithmonë dhe jeta e përjetshme na është dhënë të gjithëve.

Në natën mistike të Ngjalljes jemi thirrur t’i afrohemi, me emocione, frikë e drithërime, tingëllimit të këmbanave dhe tingullit të trompetave, të marrim Dritën e Shenjtë dhe ta takojmë Atë, “BIRIN të gjithmonë-ekzistueshëm, së bashku me PERËNDINË Atin dhe SHPIRTIN e SHENJTË; ‘DIELLIN’ e pakrijuar që bashkëkrijoi diellin tonë qiellor” si Gratë Miroprurëse, që erdhën herët në mëngjes te Varri, duke kërkuar të takonin Krijuesin e Jetës. Mijëra besimtarë me qirinj të ndezur shqiptojnë nga thellësia e shpirtit urimin e Pashkëve “Krishti u Ngjall”!

Nata e errët përmbytet me Dritë, hija e trishtuar e vdekjes hiqet; “Lindja e diellit dominon gjithë universin, duke ndriçuar me dritën e paarritshme të Ngjalljes.” “Tani çdo gjë është mbushur me dritë” – dëgjohet nga stenda e psaltëve – “dhe qielli dhe toka dhe ata poshtë”. Pra, Pashka mund të quhet me të drejtë “Festivali i Dritës”, sepse Drita u ngrit përsëri nëpërmjet Krishtit Zot nga errësira e varrit. Kështu që Drita është pjesë e punës së shpëtimit të botës, Krishti Zot, i Ngjallur prej së vdekurish bëhet “ndriçimi i kombeve”, “Drita e vërtetë që ndriçon çdo njeri që vjen në botë”. (Joani 1:9).

Vëllezër dhe motra të dashura në Krishtin Zot,

Ngjallja e Zotit “në të tretën ditë sipas Shkrimeve” (Besorja), përshkruhet nga të katër ungjillorët, të cilët e panë Jesuin të ngjallur prej së vdekurit dhe u bënë rrëfyesit dhe predikuesit të kësaj Mrekullie Hyjnore. Rrëfimet Ungjillore janë shumë të rëndësishme, sepse ato vijnë nga dëshmitarë të drejtpërdrejtë të kësaj Mrekullie Hyjnore me të cilën u mposht vdekja dhe jeta iu dha të gjithë njerëzve. Në këtë kuptim, Apostulli i Shenjtë Pjetër, duke iu drejtuar turmave të mbledhura në Jeruzalem, me rastin e Festës së Rrëshajëve (Pentikostisë), kur Shpirti i Shenjtë zbriti mbi Apostujt e Shenjtë, tha se “Perëndia e ka Ngjallur këtë Jesu, për të Cilin të gjithë jemi dëshmitarë.” (Veprat 2:32).

Për shembull, Apostujt e Shenjtë dhe Ungjillorët Luka, Joani dhe Marku raportojnë se “Maria Magdalena, Maria nëna e Jakovit dhe Salomeja dhe të tjerat me to” erdhën te Varri i Jesuit “ditën e pare të javës, pas së shtunës (të dielën), shumë herët në mëngjes”, “ndërsa ishte ende errësirë”, ato “panë gurin e rrokullisur tutje nga Varri” dhe “duke hyrë brenda, nuk e gjetën trupin e Zotit Jesu” (Marku 16:1-4). Ndërsa ato ishin të hutuara për atë që kishte ndodhur, “dhe ja, një djalë qëndroi para tyre, me rroba të shndritshme”, i cili i pyeti: “A po kërkoni Jesuin e Nazaretit, të Kryqëzuarin? Ai u Ngjall! Ai nuk është këtu. Këtu është vendi ku e vendosën” (Marku 16:5-6). Apostujt dhe Ungjillorët e Shenjtë Luka dhe Joani gjithashtu theksojnë një aspekt të rëndësishëm, domethënë se Apostulli i Shenjtë Pjetër “dhe dishepulli tjetër që Jesui e donte” (Apostulli i Shenjtë Joan), vrapuan drejt Varrit, hynë brenda dhe panë “pëlhurën e shtrirë … dhe shaminë që ishte mbi kokën e Tij, të mbështjellë veçmas” (Joani 20:7). Si mund ta kenë parë pëlhurën dhe shaminë dy dishepujt, “ndërsa ishte ende errësirë”, pyetën Etërit e Shenjtë të Kishës, por ishin vetë ata që na dhanë përgjigjen. Kështu, Shën Grigori i Nisës, në veprën e njohur: “Në Ngjalljen e Zotit tonë Jesu Krisht”, shkruan se të gjithë ata që ndoqën Apostullin e Shenjtë Pjetër atë natë, besuan në Ngjallje, sepse Varri i Krishtit ishte i mbushur me Dritë që ishte gjithashtu e dukshme dhe jomateriale: “Të gjithë ata që ishin me Pjetrin – thotë aq bukur Ati i Shenjtë – panë dhe besuan, sepse Varri ishte plot Dritë. Edhe pse ishte natë, ata panë fytyrën brenda Varrit; dhe me shqisat shpirtërore”. Ekzistencën e kësaj Drite Qiellore e mbështet edhe Shën Joani i Damaskut, i cili shprehimisht thotë se Drita që shkëlqeu në Varrin e Krishtit, në atë natë të Ngjalljes, ishte Drita e pakrijuar e PERËNDISË Krijuesit, Drita nga Mali Tabor e parë nga Apostujt e Shenjtë Pjetri, Jakovi dhe Joani, në momentin e Shpërfytyrimit të Shenjtë të Zotit. Kjo “Dritë nga qielli, si vetëtima, mbuloi papritur” Saulin nga Tarsi në rrugën për në Damask dhe e shndërroi atë, nga një persekutues i të Krishterëve, në më të madhin Apostull të Zotit, Pavlin, “Apostullin e Kombeve”. Nëpërmjet kësaj Drite të Shenjtë dhe të ndritshme, kremtimi i Pashkëve bëhet një Festë e Dritës së Perëndisë, e Trinisë së pakrijuar dhe të lavdëruar. Dritë që ndriçon shpirtrat dhe mendjet tona, që të jetojmë në Dritë, të jemi Fëmijë të Dritës, duke pasur Dritën e Ngjalljes së Shpëtimtarit tonë në ne, sepse Ai është Garanti dhe Burimi i Shpëtimit tonë.

Të dashurit e mi të krishterë ortodoksë,

Pas Kryqëzimit dhe Vdekjes së Tij, Krishti Zot zbriti në ferr për t’u sjellë Lajmin e Mirë të Ngjalljes së Tij të parafjeturve dhe për të ngritur të gjithë “të fjeturit ndër shekuj”. Megjithatë, Ai zbriti si një Fitimtar i Lavdishëm dhe si një Perandor Ngadhënjimtar në mbretërinë e errët të vdekjes, për ta ndriçuar atë me Dritën e Ngjalljes së Tij të Shenjtë, për të “shkelur vdekjen me vdekje” dhe, kështu, për të shfuqizuar vdekjen tonë. Pasi kaloi tre ditë në ferr, Jesui kthehet në Varrin e ri të Golgotës, i veshur me Lavdi dhe i mbuluar me Dritën e madhështisë dhe shkëlqimit të papërshkrueshëm. Trupi i Tij i Shenjtë i Shpërfytyruar bëhet një pishtar që digjet me fuqi, kalon pllakën e rëndë prej guri të Varrit dhe Ngjallja e Tij realizohet nëpërmjet një shpërthimi të Dritës së pakrijuar, e cila ndriçon tërë krijesën dhe gjithë universin.

Kjo Dritë e Ngjalljes shpërndahet pa pushim, për dy mijë vjet, çdo të shtunë të Pashkës mbi Varrin e Shenjtë të Zotit në Jerusalem, kur Perëndia lejon që ajo të shihet jo vetëm nga të përsosurit, por edhe nga ata që janë të papërsosur dhe madje nga jobesimtarët, me qëllim që t’i çojë ata drejt Shpëtimit. Ngjallja e Zotit është, pra, një festë e Dritës, një Mrekulli Hyjnore mbi të gjitha mrekullitë, në të cilën jemi thirrur të gjithë, sepse bashkë me Krishtin e Ngritur ngjallet dhe rilind i gjithë njerëzimi. Në këtë sens kuptojmë fjalët e Apostullit të Shenjtë Pavli drejtuar të Krishterëve në Korinth: “Por tani Krishti u Ngjall prej së vdekurish dhe u bë fryti i parë (i Ngjalljes) i atyre që kanë fjetur… Si në Adamin të gjithë vdesin, po kështu të gjithë në Krishtin do të bëhen të gjallë (do të ngjallen)” (1 Korinthianëve 15:20, 22).

Nëpërmjet Ngjalljes së Tij, Krishti Zot na thërret, pra, në rilindje shpirtërore, në rimarrjen e shenjtërisë dhe pafajësisë së marrë në Pagëzim, në Dritën e Pashkëve që pason kohën e hidhërimit, të pendimit dhe të kreshmimit, të luftës kundër mëkatit. Thirrja liturgjike “Ejani dhe merrni Dritën!” është një nxitje për të gjithë të krishterët që të bëhen “bij të Dritës”, të jetojnë në gëzimin e mësimeve të Zotit tonë Jesu dhe të luftojnë kundër të gjitha prirjeve që përpiqen të refuzojnë të vërtetat shpëtuese ungjillore. Sot flitet e shkruhet gjithnjë e më shumë se shoqëria bashkëkohore po kalon një gjendje të thellë krize shpirtërore që thekson dhe favorizon distancimin e njerëzve nga vlerat fetare dhe morale, të cilat janë bërë, të paktën në disa pjesë të botës, thjesht elemente opsionale. Për shkak të kësaj situate, teologët paralajmërojnë se ekziston rreziku për të përfunduar në një shoqëri të dominuar nga “Neopaganizmi”, një shoqëri që kultivon relativizëm doktrinor sikur “të gjitha fetë janë të mira”. Nga këtu, tek kthimi në botën e errët të bestytnive, tek praktikat okulte dhe rrymat pseudo-shkencore, rruga nuk është shumë e gjatë. Prandaj, si të Krishterë, ne kemi për mision të mos harrojmë se nëpërmjet Ngjalljes së Shenjtë të Birit të Zotit u çliruam përgjithmonë nga prangat e mëkatit, errësirës dhe vdekjes, ku Pashka e Shenjtë ishte guri i themelit të Besimit tonë, kremtimi i së Vërtetës dhe Drita e pakrijuar që shkëlqen përgjithmonë mbi gjithë universin dhe mbi të gjitha qeniet, më shumë se dielli, hëna dhe yjet.

Me këto mendime dhe ndjenja ju bëj thirrje të gjithëve të “pastrojmë ndjenjat dhe ndërgjegjen tonë”, të dëbojmë nga mendja dhe shpirti terrin e keqdashjes, egoizmit dhe kënaqësive të kota, të bëhemi bij të Dritës, të besojmë me gjithë shpirtin dhe me gjithë ndërgjegjegjen tonë në Krishtin Zot që u Ngjall prej së vdekurish, si fillimi i ngjalljes sonë, sepse, siç ka shkruar një Atë i Shenjtë i Kishës: “Ai është falja, Ai është Pashka jonë, Pashka e Shpëtimit tonë; Ai është jeta, ngjallja, drita dhe shpëtimi ynë”!

Duke ju uruar të gjithëve festa të bekuara me paqe, shëndet dhe në të gjitha rritje shpirtërore, ju përshëndes ashtu si edhe Apostujt e Shenjtë, drejtuar Grave të shenjta Miroprurëse, me urimin e krishterë: “Krishti u Ngjall”!

I juaji me lutje në Zotin dhe Perëndinë e Ngjallur Jesu Krisht, Shpëtimtarin tonë,

+ THEOFANI

__________________

I Filomilisë

Dhioqeza Ortodokse Shqiptare e Amerikave

Patriarkana Ekumenike

Gjeneral ® Piro Ahmetaj/

I privilegjuar për ftesën si dhe mundësinë për tu mbledhur/bashkëbiseduar rreth VATRËS së shenjtë Shqiptare me Autoritetet drejtuese, personalitete dhe patriotë mendjehapur në selinë e saj në New York, ShBA.

Në pamundësi për të shprehur të gjithë mirënjohjen jo vetëm për mikëpritjen fisnike, para se gjithash për VATRËN, që në memorjen e familjes time, besoj edhe të mbarëshqiptarëve mbetet si Institucion i shenjtëruar për orientimin Euroatlantik jo vetëm në mbrojtje të të drejtave të shqiptarëve në USA, por edhe për lobing-un (Shtepia e Bardhë, Senati, Kongresi dhe DASh), përpjekjet si dhe kontrubutet elitare për zhvillimin e interesave mbarëkombëtare.

Prandaj në këtë datë-ngjarje të historisë kombëtare (112 vjetori), përulemi ndaj themeluesve, dy ikonave mëndjendritur Noli dhe Konica si dhe të shprehim nderimin më të thellë për kontributorët me peshë, një liste të gjatë patriotësh mendjehapur të mbledhur rreth misionit kombëtar të VATRËS;

Me këtë rast përsëris publikisht konsideratat më të larta për vizionin Euroatlantik, përulësinë fisnike, përkushtimin shembullor si dhe përpjekjet gjithëpërfshirëse të Kryetarit, Zotit Elmi Berisha, sekretarit Dr. Pashko Camaj, kryetari i degës së Vatrës në Queens Dr.Skënder Murtezani, si dhe ndaj Editorit të gazetës Dielli, z. Sokol Paja.

Nga ana tjetër, në “kapacitetin e Ekspertit të Sigurisë Kombëtare, Rajonit dhe NATO-s” në vijim mund/do të gjeni një përmbledhje jo vetëm mbi impresionet personale por rreth rrethanave historike, misionit, përpjekjeve, vlerave, kontributeve përgjatë 112 viteve si dhe tre rekomandime vllazërore për ta mbajtur të ndezuar në shekuj jo vetem në ShBA dritën e shënjtëruar të VATRËS.

***

Siç besoj është e mirënjohur në mbarëshqiptarinë, Federata Panshqiptare VATRA është themeluar në 28 Prill 1912. Misioni i VATRËS në 112 vjet mbetet: “garantimin e të drejtave të shqiptarëve në SHBA, si edhe lobimi në Washingtonin zyrtar për njohjen, mbrojtjen, promovimin dhe zhvillimin e interesave mbarëKombëtare”.

Takimi i parë që i bashkoi pothuaj të gjitha shoqatat e shqiptarëve në USA, për të themeluar një federatë të vetme (VATRA) u zhvillua pothuaj një vitë para pavarësisë (në 24 dhjetor 1911) në Boston, ku mori pjesë edhe shoqata me “Besa-Besën”. Në këtë takim ishin të pranishëm patriotët: Faik Konica, Fan Noli, Kristo Floqi, Marko Adams, Paskal Aleksi dhe Vait Mira .

Përpjekjet dhe takimet vijuan deri në datën 28 prill 1912, datë kur VATRA u regjistrua, pra që shënon edhe datën zyrtare të themelimit të saj. Në proçes-verbalin e takimit thuhet: “Federata Pan-Shqiptare e Amerikës Vatra u themelua prej Shoqërive “Besa-Besën”, “”Flamuri i Krujës”, “Shoqërisë Kombëtare”, “Mirëbërësja” dhe “Skënderbeu”, ndërsa shoqatat “Dallëndyshja” dhe “Malli i Mëmëdheut” nuk ishin të pranishme por konfirmuan anëtarësinë e tyre në këtë federatë/Vatra.

Në këtë takim historik, u ngrit një bord i përkohshëm me patriot të shquar që mbeten të skalitur edhe si bashkë-themelues në memorjen institucionale të VATRËS, si: Fan S. Noli, Llambi Çikozi, Faik Konica, Kristo Floqi, Elia Tromara, Naum Cere, Kosta Kota. Kostandin Çekrezi si dhe vëllezërit Pani nga Dardha. Ndërsa drejtues të gazetës Dielli (nga Fan Noli në 15 shkurt 1909) ishin Kristo Kirka, Paskal Aleksi, Elia Tromara, Kosta Vasili dhe Paskal Aleksi.

Duke konsideruar konfuzionin dhe vakumin politik në Shqipëri gjatë Luftës së I-rë Botërore, VATRA funksionoi në formën e një qeverie shqiptare në mërgim. Në këto momente kritike për kombin, VATRA delegoi/dërgoi Nolin e madh dhe Konicën mendjendritur në Europë për të avokatuar dhe mbrojtur interesat kombëtare të Shqipërisë. Ata qëndruan në Europë derisa lufta përfundoi, ndërsa në këtë periudhë VATRËN e drejtoi patrioti i mirënjohur, Z. Kol Tromara.

Gjatë këtyre viteve me trazira, VATRA shkëlqeu me fushatën lobuese gjatë Konferencës së Paqes në Paris në 1919, duke influencuar vendimin e delegacionit amerikan. Patrioti Kristo Dako iu bashkua delegacionit në 1919, ndërsa Mihal Turtulli dhe Mehmet Konica u aktivizuan në negociatat me Italianët për krijimin e qeverisë provizore shqiptare si dhe përgatitën Kongresin e 1918-s. Po ashtu, në dhjetor 1918, Vatra mbajti fushatën për mbledhjen e fondeve në mbështetje të delegacionit në Konferencën e Paqes, kur shqiptarët në SHBA mblidhën rreth 150.000 dollarë.

Janë të skalitura në memorjen e historisë kombëtare mbështetja kritike në luftën e Vlorës 1920 kundër pushtuesve Italianë (reth 300 paqtriot-luftëtarë nga VATRA u vunë nën komandën e mikut të Nolit, Baba Ahmet Turanit) si dhe pavarësisht oponencës me mbretërinë apo qasjes së Partisë Komuniste, Vatrabët kontribuan edhe në luftën për çlirimin nga okupatoret nazi-fashist.

Mbas vendosjes së regjimit Hoxhës, VATRA e shqiptarëve në USA u kthye në një tempull shprese për kundërshtarët e regjimit, të afërmit e tyre dhe mbarëshqiptarët. Gjenden në arkivat e DASh/CIA, përpjekjet dhe sakrificat e VATRËS dhe shqiptarëve në USA për shkëputjen nga blloku Stalinist, rrëzimin e regjimit si dhe orientimin e Shqiptarisë në kampin e vlerave euroatlantike.

Për këdo të interesuar, mund të gjejë informacione/prova zyrtare (tashmë të de-klasifikuara) dhe të përmbledhura mjeshtërisht në librin e z. Albert Lulushi “Operation Valuable Friend = the CIA’s First Paramilitary Strike against Iron Curtain”, të cilat provojnë përpjekjet e VATRA-s në bashkëpunim me ShBA-të për të rrëzuar regjimin komunist si dhe ndryshuar rreshtimin gjeopolitik të kombit Shqiptar.

Në vitet 1990, VATRA dhe zëri Amerikës u shndërruan në oksigjen shprese të levizjes demokratike të vendit që për 45 vjet ishte vrarë, burgosur, varfëruar dhe rraskapitur nga regjimi komunist. Ndërsa nuk mund të lëmë pa përmendur edhe vitin 1999, kur grumbullimet në Washington, New York, etj, pra flamuri kombëtar, zëri dhe kontributet e VATRËS për çlirimin nga pushtimi gjakatar i Millosheviçit do mbeten përjetësisht të skalitura në memorjen e CNN si dhe historisë së mirënjohjes së kombit Shqiptar.

***

Në pamundësi për të përmendur kontributet e jashtëzakonshme në 112 vite, sigurisht mund të themi që në 112 vjet, VATRA mbetet organizimi më gjithëpërfshirës (mbarëkombëtar) dhe me jetëgjatë i shqiptarëve në të dyja anët e atlantikut dhe mbarë kombin shqiptar. Kështu kontributi i Vartës në dobi të mbrojtjes, lobimit dhe promovimit të interesave kombëtare e ka kthyer VATRËN në një tempull të shentëruar të nacionalizmit, patriotizmit dhe shpresës së mbarëshqiptarëve.

Në shtesë, nuk mund të mos e përmendim, (sigurisht me keqardhje) që krahas imazhit, përpjekjeve dhe arritjeve, përgjatë historisë 112 vjeçare, veçanërisht pas viteve 1990, ka patur problematika, ndasi dhe kundërshti, deri përleshje të padenja (demostrim i dhunshëm para godinës së shenjtë të Vatrës në blv. Bronx, NY) duke transferuar edhe në New York, etj klimën dhe paranojat egocentrike, sekserët si dhe konfliktualitetin politik të Tiranës, Prishtinës, etj për sa orientimin, qasjen dhe drejtimin e VATRËS.

Nuk kam kurrësësi dëshirë dhe sigurisht asnjë tagër/status të përfshihen në këtë debat, por vetëm në përulje ndaj imazhit të shenjtëruar të VATRËS, j’u bëj thirrje vëllazërore arsyes fisnike për tu ulur në gjunjë para flamurit dhe interesave kombëtare si dhe menaxhuar mosmarrëveshjet, apo qofshin kundërshtitë vetëm me mekanizma demokratike, në krye të së cilave mbetet vota. Kjo pasi siç të gjithë besoj ta dimë, VOTA ishte ilaçi që i bashkoi kundërshtitë (në ndonje rast deri ekstreme) të Nolit të Shenjtë dhe Konicës mëndjendritur.

Thënë këtë, besoj edhe më fortë se përtej rreshtimeve apo kundërshtive politike (=VATRA u krijua si organizatë jo-politike, ndërsa kujtojmë se Noli dhe Konica kishin pothuaj katërciprisht të kundërt në pikpamjet politike) që mund edhe të ketë dhe që mundet t’ju ndajnë, mbeten ende 1001 arsye të forta që ju/na bashkojnë rreth interesave të mbarë-shqiptarëve si dhe perspektivës Euroatlantike të dy shteteve sovrane (RSh dhe R.Kosovës) si dhe kombit tonë të bekuar. Historia na ka mësuar se nga urrejtja për njëri tjetrin ose kemi dalë të gjithë të humbur ose nuk na ka çuar asgjëkundi, ndërsa mbetet shumë për të bëre me dashuri për ardhmërinë e kombit tonë të përbashkët.

***

Për ta përmbyllur, në kapacitetin e një ndër ekspertëve me eksperiencë, besoj më shumë se modeste në proçesin e reformave në fushën e sigurisë dhe mbrojtjes kombëtare si dhe udhëtimin drejt/pas anëtarësimit në NATO, do të dëshiroja të adresoja edhe tre keshilla vllazërore për Drejtuesit, Protagonistët si dhe gjithë VATRA-nët:

Këshilla nr. 1: duke ruajtur mesazhin e rilindasit Pashko Vasa, të mishëruar në misionin e VATRËS: “Feja (+Partia nga ky kontekst) e Shqiptarit është Shqiptaria”, mbetet domosdoshmëri kritike për ta përditësuar, transformuar, ose me mirë modernizuar konceptin, qasjen, statusin zyrtar, strukturën e organizimit, vendimarrjen, metodologjinë e angazhimeve si dhe cilësinë e përfaqësimit të Shqiptarëve dhe të lobimit interesave kombëtare në USA.

Ndërsa për këdo që mendon, që sigurisht ka ambicie dhe mund të ketë edhe një projekt ndryshe, zgjidhjen e gjen në kombin që mbetet model i lirisë (USA) dhe simbol i demokracisë në mbarë botën. Pra zgjidhjen e gjen vetem te vota e lirë. Me fjalë të tjera të përballen/t me VOTË për t’u bërë shumicë, pra ose të marrë përgjegjësite e drejtimit ose integrohet me integritet dhe vlera komplementare në projektet për zhvillimin dhe modernizimin e VATRES. Zgjidhje tjetër më të mirë nuk ka gjetur gjerëzimi, SHBA/BE dhe shoqëritë demokratike deri më sot për të tejkaluar mosmarrëveshjet në lidhje me sipërmarrjet me peshë kombëtare.

Këshilla nr. 2: Institucionalizimin e përpjekjeve të VATRËS duke nënshkruar Marrëveshje Mirëbesimi (MoU) me respektivisht të gjitha institucionet shtetërore përgjegjëse në Tiranë Prishtinë, Shkup, Podgoricë si dhe faktorët shqiptarë në Preshevë dhe Medvegjë.

Këshilla nr. 3: Ngritja e një bordi të urtësh ose të mënçurish (Wise Group) me personalitete të spikatura, gjithëpërfshirëse, mundësisht sa më të gjithëpranuar në mbarë-Kombin, si një mekanizëm që kurrësesi nuk rivalizon dhe as dublikon, por vetëm do të këshillojë dhe komplementojë përpjekjet lobuese të Autoriteteve drejtuese të VATRËS në Washington si dhe respektivisht kryeqytetet e Shqiptarisë.

Zoti i bekoftë shqiptarët kudo që jetojnë, mirënjohje mbarë kombëtare për VATRËN e shenjtë si dhe partneritetin strategjik me ShBA dhe NATO-n.

Vatranët ftojnë komunitetin shqiptar, shoqatat e ndryshme shqiptare dhe median të bashkohen për të kujtuar së bashku ditën e themelimit të Federatës Pan-Shqiptare VATRA këtu në Boston!

Për nder të 112-vjetorit të themelimit të VATRËS, dega në Boston ka organizuar një konferencë përkujtimore më 28 Prill 2024 (diel) duke filluar nga ora 12:00 pm deri 2 pm në Peabody!

Programin e detajuar të këtij eventi të rëndësishëm, e gjeni në foton bashkangjitur këtij postimi!

Konferenca mbahet në adresën:

25 Howley St. Floor 2, Peabody, MA

Parkimi është falas!

Mirësevini