Vatra Chicago celebroi 111 vjetorin e Pavarësisë së Shqipërisë dhe ngritjes së flamurit kombëtar mes patriotëve të komunitetit shqiptar në Chicago. Midis të tjerave kryesia e Vatrës theksoi rëndësinë e kësaj feste si festa më e rëndësishme shqiptare dhe theksoi rëndësinë e bashkimit të komunitetit, kryesisht rreth Vatrës e cila është e hapur për anëtarësimin e të gjithëve që duan dhe vlerësojnë këtë organizatë patriotike si më të vjetrën në mërgatën e Amerikës dhe të kontribuojnë për të mirën e kombit dhe komunitetit shqiptar në Amerikë. “ Të bashkuar jemi edhe më të fortë” theksoi kryetarja e Degës Znj. Mirela Kanini. Pastaj atmosfera u ndez me muzikë nga të gjitha trevat sjellë nga DJ i talentuar Albert Hide. Një event që u përcoll me entuziazëm nga komuniteti dhe tregoi edhe njëherë patriotizmin e mbarë shqiptarëve në Chicago. Kryesia e Vatrës i falenderon të gjithë ata që morën pjesë dhe në pritje të takimimeve përsëri në aktivitetet e radhës për komunitetin tonë. Një falenderim i veçantë i takon organizatorëve të eventit z. Ardian Ruci, znj. Aurora Ajdini, znj. Emanuela Cako, z. Artan Nati, z. Shkelzen Cakeri.

Zoti e bekoftë kombin shqiptar.

Sokol Paja/

New York, 25 Nëntor 2023 – Federata Pan-Shqiptare e Amerikës VATRA në bashkëpunim me Shoqatën e Shkrimtarëve Shqiptaro-Amerikanë organizoi një ditë kushtuar letërsisë shqipe. Nën prezantimin e kryetarit të Shoqatës së Shkrimtarëve Shqiptaro-Amerikanë z.Mhill Velaj, anëtari i kryesisë së Vatrës z.Ilir Cubi përshëndeti të pranishmit: “Në emër të Vatrës ju përshëndes dhe uroj suksese. Urimet më të përzemërta krijuesve e shkrimtarëve të pranishëm në këtë aktivitet kaq të rëndësishëm për diasporën shqiptare. Gëzuar Festa e Flamurit Kombëtar të gjithë shqiptarëve” tha ndër të tjera z.Cubi. Në analizën rreth poezive të z.Tahiri, z.Velaj deklaroi se poeti Ilmi Tahiri në librat: “Sytë kah atdheu”, “U ktheva atdhe” dhe “Për ty Kosovë” na ofron një krijimtari të madhe si për nga numri i poezive, masa, vëllimi e cilësia por edhe nga niveli i lartë ideo poetik por edhe ai semantik. Poeti z.Ilmi Tahiri u tha të pranishmëve se sillte për të gjithë bashkëkombësit mallin e mëmëdheut, tokës së bekuar të Kosovës heroike. Ai tha se poezitë i dedikohen heronjve të Kosovës e historisë së lavdishme të kombit tonë. Ceremonia vazhdoi me një ligjëratë kushtuar poetit të mirënjohur Ymer Elshani e titulluar “Historia ime e patreguar” përgatitur nga vajza e tij Teuta Elshani. Në fjalën e saj mes lotëve e dhimbjes, rrëfeu dramën e familjare të masakrimit të familjes së saj nga forcat serbe dhe përpjekjet e vazhdueshme për të botuar krijimtarinë e babait të saj Ymer Elshani. Ajo falënderoi Vatrën si lidere e aktiviteteve kombëtare në Shtetet e Bashkuara të Amerikës, gazetën Dielli dhe dha mesazhe paqe e qëndrese duke apeluar për drejtësi dhe ndëshkim të krimeve serbe në Kosovë. Shkrimtari z.Mhill Velaj në kumtesën kushtuar poetit Ymer Elshani deklaroi se me vizionet e tij humane, poetike, kombëtare, e integruese dha shembullin me të mirë se si duhet përjetuar jeta, lufta, kultura e atdhedashuria. Ky kolos i letërsisë nga Drenica heroike, ishte një autor model i letërsisë për fëmijë, emri i të cilit sot as që përmendet dhe shumë pak njerëz në opinionin publik shqiptar dhe ndërkombëtar e dinë se ai, dhe shtatë anëtarë të tij të familjes, u dogj dhe u masakrua mizorisht nga forcat barbare serbe, në prill të vitit 1999 duke i qendruar besnik idealeve të të parëve të tyre poashtu të dëshmuar në breza për atdhedashuri, tha z.Velaj për poetin Ymer Elshani. Veprimtari i çështjes kombëtare Shaban Lajçi recitoi për të pranishmit poezinë e Ymer Elshanit “Çelësi i artë” duke emocionuar të gjithë pjesëmarrësit. Në fund të ceremonisë letrare poeti Abdyl Hajredini për të gjithë të pranishmit u ndal te aspekte të kritikës e estetikës në letërsinë shqipe dhe prezantoi 100 poezitë e tij në librin “Mos vdis nga errësira”. Shkrimtari Mhill Velaj recitoi një poezi nga libri “Mos vdis nga errësira” kushtuar Kosovës duke ngjallur shumë emocione. Gjithashtu luftëtari i lirisë së Kosovës z.Shpend Gjocaj recitoi për artdashësit e librit poezi nga krijimtaria e tij letrare duke ngjallur emocione të forta.

Veprimtari i çështjes kombëtare në Shtetet e Bashkuara të Amerikës z.Agim Aliçkaj, një ndër kontributorët më të mëdhenj të zbardhjes së krimeve serbe në Kosovë, në fjalën e tij kërkoi që perëndimi të izolojë e ndëshkojë serbinë barbare. Në përfundim të ceremonisë letrare, për të gjithë të pranishmit Federata Vatra shtroi një koktej në nderim të festës së flamurit kombëtar. Vatra shpreh mirënjohjen të veçantë për poetët të cilët në përfundim të aktivitetit dhuruan librat e tyre për Bibliotekën e Vatrës.

Prof. Thanas Gjika/

Baballarët e atdhetarizmit shqiptar në Amerikë pas përpjekjesh të shumta mundën të krijonin në vitet e para të shekullit të XX Gazetën “Dielli”, Kishën Shqiptare dhe Federatën PanShqiptare Vatra, përmes tyre ata bashkuan emigrantët e varfër të ardhur nga atdheu i robëruar.

Intelektualë të talentuar si Fan Noli, Faik Konica, Kristo Floqi, Kostë Çekrezi, Qerim Paraniti etj me artikuj, poezi, fjalime etj arritën t’i ndërgjegjësonin shqiptarët gjysmëanalfabetë e t’i bënin veprimtarë aktivë në lëvizjen kombëtare.

Me punën e mbarë që kryen Fan Noli, Bahri Omari, Kol Tromara me shokë gjatë viteve të Luftës së Parë Botërore, kur Shqipëria e pushtuar prej ushtrive të Austro-Hungarisë, Italiasë e Francës rrezikohej të zhdukej, arritën që Federatën Panshqiptare Vatra ta kthenin në një organizatë politike që kreu funksionet e një qeverie shqiptare në emigracion. Ajo mbajti me ndihmat e emigrantëve (anëtarëve të saj) delegatë në disa qeveri të Europës. Në fund të L1B në Konferencën e Paqes që u mbajt në Versajë të Parisit, delegatët e Vatrës bashkuan vullnetin e delegatëve të kolonive të tjera shqiptare dhe ia arritën të mbronin tërësinë e territoreve të Shqipërisë Londineze. Jo rastësiht kryeministri i Greqisë, Venizellos, kur u kthye nga Konferenca e Paqes në Athinë deklaroi: “Nuk munda ta fitoja Vorio Epirin, më mundi Vatra e Amerikës”.

Gjatë Luftës së Ftohtë, kur qeveria komuniste shqiptare i mallkonte dhe i dënonte si tradhëtarë ballistët, nacionalistët dhe legalistët, Federata Vatra, e drejtuar prej Fan Nolit, ua hapi dyert këtyre emigrantëve politikë. Me këtë veprim Noli u tregoi shqiptarëve të Amerikës se Vatra si organizatë patriotike duhej t’i pranonte në gjirin e vet bijtë e Shqipërisë pavarësisht nga bindjet e tyre politike, mjafton që ata të mos ishin kriminelë lufte. Dhe përderisa këta emigrantë i kishte pranuar qeveria amerikane, kjo tregonte se ata nuk ishin kriminelë lufte si i kishte shpallur qeveria e Tiranës. Qeveria komuniste e Tiranës nuk ia fali Nolit këtëveprim. Ajo zgjeroi veprimtarinë e Sigurimit të Shtetit midis emigrantëve që kishin familjet e tyre të varfra në Shqipëri dhe filloi përmes tyre luftën kundër Vatrës. Shumë emigrantë ekonomikë u larguan prej Vatrës sepse kishin frikë mos u ndodhte gjë familjarëve të tyre në atdhe. Edhe priftërinjtë ranë nën presionin e kësaj trysnie dhe u larguan nga Vatra. Madje ata nuk nxitën më asnjë emigrant që të bëhej anëtar i kësaj organizate. Peshkop Fan Nolit iu dërgua me anë të punonjësit të Sigurimit Jonuz Mersini më 1958: “Ki kujdes mos e bëj si lopa që pasi ka mbaruar mjelja e derdh kusinë me qumësht duke i rënë me shqelm!” (Rrëfim gojor i J. Mersinit gjatë një takimi në Tiranë më 1973). Noli nuk e ndryshoi qëndrimin ndaj ballistëve, nacionalistëve dhe legalistëve, por thelloi qëndrimin e tij kundër qeverisë së Tiranës dhe diktatorit Enver Hoxha. Më 1961 ai shkroi poemën “Sulltani dhe kabineti”, të cilën e botoi te Dielli 5 korrik 1961. Kjo poemë është krijimi poetik më i gjatë i Nolit. Vetë ai sqaroi se me këtë poezi “shpreha ndjenjën time kundra çdo regjimi diktatorial, që kufizon lirinë e mendimit” ( Nasho Jorgaqi “Jeta e Fan Nolit” Vol 2 OMBRA GVG Tiranë 2005, f.365), pra kuptohet se Noli e përfshinte dhe regjimin diktatorial të Tiranës në kritikën e tij të ashpër.

Federata Vatra dhe gazeta Dielli luftuan vazhdimisht në vitet 1913-1940 kundër shtypjes së popullit shqiptar që ra nën zgjedhën sebe. (Agjentura serbo-greke për ta errësuar rolin e Fan Nolit në luftën kundër zgjedhës serbe sajoi aty nga viti 1988 vargjet: “Në do botës t’i vësh zjarrë / merr me vete tre a katër kosovarë”. Mirëpo këto vargje bien ë kundërshtim me gjithë shkrimet publicistike të Nolit ku ai mburri trimëritë e shqiptarëve të Kosovës dhe kërkoi lirinë e tyre nga zgjedha serbe. Këto vargje nuk u botuan kurrv sa qew gjallë Fan Noli e bashkëpunëtorët e tij të afërt).

Federata Vatra dhe Dielli vijuan luftë për mbrojtjen e të drejtave të popullit shqiptar në Jugosllavi gjatë viteve 1945-1999. Drejtuesit e Vatrës dhe botuesit e Diellit kanë luajtur rol të rëndësishëm në luftën për njohjen e Pavarësisë së Kosovës dhe për njohjen gjithnjë e më të gjerë të të drejtave të shqiptarëve në Maqedoninë e Veriut, në Mal të Zi, Serbi e Greqi.

Një veprim që meriton lavdërime prej të gjithë shqiptarëve kudo ku jetojnë është pjesëmarrja e delegacionit të Federatës Vatra më 25 tetor 2023 në meshën Papale te Sheshi i Shën Pjetrit dhe takimi me Fortlumtërinë e Tij Papa Franceskun. Në atë takim kryetari i Vatrës, Dr. Elmi Berisha, duke i dhuruar shtatoren miniaturë të Shenjtores Nënë Tereza, bijë e Kosovës, shqiptoi: “ JU LUTEM NJIHNI KOSOVEN!” (Dielli, October 2023, f. 1, 3)

Sot më 23 nëntor 2023 në Ditën e Falenderimeve vlen ta falenderojmë Fedaratën Vatra për gjiçka ka bërë gjatë historisë së saj në luftën për çlirimin e popullit tonë nga zgjedhat e huaja osmane, serbe, greke, për ndërgjegjësimin tonë për të kuptuar thelbin shtypës e kriminal të regjimit komunist, për emancipimin tonë mendor e moral, etj.

Kushdo që sulmon në faqe interneti e gazeta me artikuj sharës e fyes drejtuesit e Federatës Vatra dhe editorët e gazetës Dielli shpie ujë tek mulliri i armiqve të popullit shqiptar. Vatra është një organizatë atdhetare demokratike që kryen rregullisht kuvendet e saj sipas kanunores. Aty duhen shprehur pakënaqësitë dhe mendimet kritike dhe së fundi vullneti duhet shprehur në procesin e votimit kur zgjidhen anëtarët e Kryesisë së Federatës, e Këshillit të Federatës, e Kabinetit të Kryetarit dhe editorët e Diellit.

Vatra Boston/

Sot, me datë 18 Nëntor 2023, kryesia e përkohshme e VATRËS në Boston, e ngarkuar për ringritjen e Degës së Bostonit, zhvilloi takimin e radhës me disa prej vatranëve më aktivë të Massachusetts!

Takimi u kryesua nga Hirësia e tij Peshkop Theofan Koja. Së bashku me anëtarët e grupit nismëtar Mentor Maksutaj, Flamur Vezaj dhe Jorid Çelaj, at Theofani informoi vatranet, Subi Cako, Lindita Meçe, Gëzim Meçe, Fuat Memelli, Andrea Pani dhe Petrit Alibeaj për organizimin e Kuvendit të VATRËS me 17 dhjetor 2023!

Gjatë takimit, u diskutua për të gjitha rrugët që grupi nismëtar ka ndjekur për të ftuar dhe bashkuar komunitetin shqiptarë të Massachusetts-it dhe jo vetëm pranë VATRËS së NOLIT e KONICËS e shumë patriotëve të tjerë ndër vite!!

Vatranet aktivë të Bostonit, vlerësuan punën e grupit nismëtar për ngritjen e degës numër një, duke shprehur vullnetin dhe gatishmerinë për të organizuar e dalë të bashkuar në Kuvendin e 17 Dhjetorit në Boston!

Rroftë Kombi Shqiptar

Vatra Michigan fton të gjithë shqiptarët e Amerikës e Kanadasë te Festa e Flamurit Kombëtar në Michigan.