Aktori dhe regjisori Drilon Hoxha, i shoqëruar nga kryetari i degës së Vatrës në Tampa -Clearwater Tahsim Ruko dhe nga Ardian Ramushi, vizituan selinë e Vatrës në mesditën e së hënës, 18 Mars 2019. Ata u pritën nga kryetari i Vatrës Dritan Mishto.Ishin te pranishem edhe Asllan Bushati dhe Gjergj Ivanaj.
Mysafirët u njohën me historinë e Vatrës dhe të Gazetës Dielli nga editori. Kryetari Mishto i njohu me veprimtaritë e Vatrës dhe aktivitetet kushtuar 110 vjetorit të gazetës DIELLI dhe 107 Vjetorit të Federatës Panshqiptare të Amerikës VATRA.
Aktori dhe regjisori Drilon Hoxha shkroi në librin e vizitorëve mbresat nga kjo vizitë dhe përcolli një mesazh për bashkatdhetarët: Kënaqësi e vecantë të njohësh nga afër dhe të prekësh historinë e Federatës Pan-Shqiptare të Amerikës VATRA. Respekt për cfarë ka bërë në 107 vitet e jetës së saj, si një avokate e zonja për t’i dalë zot Kombit. U sygjeroj brezave që të vijnë në këtë Tempull dhe të prekin historinë tonë kombëtare. Patriotizmi këtu është konkret, jo vetëm me fjalë.
Faleminderit Vatrës!
Ardian Ramushi shkroi: ” Provova një kënaqësi të vecantë, u ndjeva krenar për historinë e shqiptarëve të Amerikës, gjurmët e së cilës i gjeta në Vatër. Një histori që ka hyrë në shekullin e dytë që nga themelimi dhe që ka bërë aq shumë për Kombin. Një histori që duhet t’u shërbejë shqiptarëve kudo për të qenë të bashkuar e për të punuar për kombin. Këtu në Vatër merr vlerë shprehja e John F. Kenndy: Mos pyet se ç’do të bëjë atdheu për ty, por ç’mund të bësh ti për të.! Krenar për Vatrën shqiptare të Amerikës.Ti vizitor, që vjen në SHBA mos harro të vish të prekësh në Vatër historinë e shqiptarëve të Amerikës.
Kryetari i Vatrës z. Mishto me bashkëpunëtorët e tij dha një drekë për mysafirët, ku ishin te pranishem edhe: Zef Balaj, Marjan Cubi, Asllan Bushati,Gjergj Ivanaj dhe editori.
Regjisori dhe aktori Drilon Hoxha erdhi në Nju Jork pas një turneu në Michigan, ku u shfaq filmi i tij “Dashuria s’mjafton”. Filmi u shfaq në Ballkan Center në Troy, MI, ku dega e Vatrës atje dha kontributin e saj.(Per me shume fotografi shihni ne FB Gazeta Dielli)
