-Kadetja e Forcës së Sigurisë të Kosovës në Akademinë Ushtarake Amerikane emërohet në zingjirin komandues të kadetëve të West Point-it/
NJU JORK, 15 Gusht 2019-Gazeta DIELLI/ Arelena Shala, kadete e Forcës së Sigurisë të Kosovës, në bazë të rezultateve të shkëlqyera gjatë studimeve në Akademinë Ushtarake Amerikane “West Point” në Nju Jork, është emëruar rreshtermajor i Komandës së Regjimentit në zingjirin komandues të kadetëve të Akademisë Ushtarake, si e vetmja kadete ndërkombëtare, në mesin e 4400 kadetëve sa ka Akademia më elitare amerikane.
Kadetët nga Kosova, Arelena Shala dhe Ylli Dalladaku, janë dy kadetë të cilët kanë filluar studimet në këtë akademi në vitin shkollor 2016/2017. Certifikatën e pranimit në këtë akademi asokohe ua pat dhënë solemnisht ambasadori amerikan në Kosovë.
Njoftimi i dërguar sot nga Ministria e Mbrojtjes e Kosovës thekson se, Akademia Ushtarake e SHBA-ve në West Point është një kolegj katërvjeçar, bashkë-edukues, federativ, liberal i arteve, i vendosur 50 milje në veri të Nju Jorkut. Kjo akademi u themelua që në vitin 1802, si kolegji i parë i inxhinierisë në Amerikë, i cili edhe sot vazhdon të jetë institucioni kryesor i zhvillimit udhëheqës në botë, i radhitur vazhdimisht në mesin e kolegjeve më të mira në vend.
Mision i Akademisë Ushtarake Amerikane “West Point” vazhdon të mbetet edukimi, stërvitja dhe frymëzimi i korpusit të kadetëve, në mënyrë që çdo i diplomuar të jetë një drejtues i përkushtuar ndaj Detyrës, Nderit dhe Vendit, si dhe i përgatitur për një karrierë të përsosmërisë profesionale dhe shërbimit ndaj kombit./b.j/