Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

The Royal Geographical Society: Shqipëria, një nga sekretet e pazbuluara të Europës

by

Nga Zina Tosku/- “Zbulo Shqipërinë” është cilësuar eventi i 18 qershorit ku një panel ekspertësh nga instituti prestigjoz britanik, The Royal Geographical, do të përcjellin njohuritë e brendshme për Shqipërinë, si një prej sekreteve të pazbuluara të Europës.Shqipëria rikthehet sërish në vëmendjen e Europës si një nga sekretet e pazbuluara, tanimë në qendër të vëmendjes së institutit “The Royal Geographical Society”.

Shqipëria ka diçka për të gjithë. Kështu e cilëson instituti “The Royal Geographical Society” Shqipërinë, duke sjellë në vëmendje terrenin e thyer alpin, metropolin, plazhet e pacënuara dhe rrënojat e lashta, si një nga sekretet e pazbuluara të Europës.

Sipas “The Royal Geographical Society”, ky vend i vogël i Ballkanit me një histori të gjatë izolimi si pasojë e një diktature të ashpër fillimisht ka provuar vështirësi ekonomike por tani kanë filluar të lëvizin gjërat për mirë në Shqipëri.

Një trashëgimi shumë e pasur e cila ka lënë shenjën e saj, me thesaret arkitektonike dhe arkeologjike, duke u përfshirë në UNESCO me Sitet e Trashëgimisë Botërore nga periudha osmane, veneciane, greko-romake dhe periudha bizantine. Eksploroni rrënojat e lashta, kodrat e fortifikimeve, kështjellat, monumentet, mozaikë dhe xhamitë.

Shqipëria ka një potencial të madh për aventurë si “Bjeshkët e Nemuna”, Alpet e thyera në veri dhe shfaqet si një nga destinacionet më të mira të Evropës për ngjitje në mal, rafting, etj.
Gjithashtu me mbi 300 km të bregdetit përgjatë deteve Adriatik dhe Jon, Shqipëria krenohet me sofistikimin dhe shkëlqimin e rivierës së saj.

Në lidhje me besimin fetar, për Royal Geographical Society vlerëson se zyrtarisht Shqipëria është ateiste me një popullsi shumë të ndryshme, njerëz mikpritës dhe kuriozë.

Në zonat rurale jeta bujqësore duket se nuk ka ndryshuar në shekuj, por përparimi në qytete është i dukshëm.

Ashtu si gjërat fillojnë të ndryshojnë, Shqipëria në mënyrë të pashmangshme po nxiton të arrrijë të njëjtat standarde të pjesës tjetër të Evropës.
Tani është koha e përkryer për të vizituar Shqipërinë, ajo që është aktualisht një oaz me pamje natyrore e mikpritje miqësore.

Një mbrëmje dedikuar Shqipërisë, do të jetë ajo e 18 qershorit, ku për herë të parë udhëtarët do të kenë mundësi të marrin informacione dhe të bëjnë pyetje rreth Shqipërisë

Shkodra, arkeologjikisht e pazbuluar

by

Nga Astrit Lulushi/Washington/
Në korrik 2014, revista “Archaeology in Europe” njoftoi se një ekip arkeologësh nga Universiteti i Varshavës, Poloni, kishte zbuluar një dush të shekullit XIV, në veriperëndim të Shqipërisë – cilësuar zbulimi më i madh i vitit – banjot turke – hamam, me sistem ngrohje qendrore. Ndërtesa të këtij lloji u bënë të zakonshme në Perandorinë Osmane në shekullin e pesëmbëdhjetë, por objekti i zbuluar në Shqipëri duket se është 100 vjet më i hershëm – kjo e bën zbulimin edhe më interesant, sepse tregon për herë të parë se si sistemi i vjetër romak i ngrohjes së dyshemesë dhe mureve të ndërtesave me ajër të nxehtë, u përshtat nga osmanët.
Një tjetër arritje e rëndësishme në Shkodër nga arkeologët polakë këtë vit, është zbulimi i një shtrese të herëshme të qytetit nga shekullin i III pes., ku arkeologët gjetën një pjatancë prej bronxi që përdorej për ofrimin e sakrificave – fragmente të eshtrave të kafshëve dhe hiri, që ata gjetën, e vërtetojnë këtë.
Shkodra është një nga vendet më të rëndësishme për historinë e Ilirisë, si dhe të gjithë zonës së Ballkanit. Që nga periudha e neolitit (4,500 – 2,000 pes) Shkodra ka qenë një vendbanim i pasur dhe udhëkryq i rëndësishëm tokësor e ujor. Kulmin e shkëlqimit qyteti e arriti në kohët ilire (shekujt 4 – 2 pes), kur ishte kryeqyteti i mbretërisë. Prof. Piotr Dyczek i qendrës kërkimore të Antikitetit në Evropën Jug-Lindore, pranë Universitetit të Varshavës, mendon se arkeologjikisht, Shkodra ende nuk është zbuluar plotësisht dhe kjo është arsyeja pse sot dihet thuajse asgjë në lidhje me historinë e tij ilire e romake, pavarësisht se qyteti është përmendur në burime të shumta antike.(http://blogs.voanews.com/albanian/astritlulush)