Nga Mimoza Dajçi/

Vatikan, Itali 2016. Rastësia më takoi me shumë bashkatdhetarë e të huaj, besimtarë e mirënjohës të Shenjtores shqiptare Gonxhe Bojaxhi – Mother Teresa. Me disa prej tyre zhvillova intervistë për televizionin shqiptar TV – Kultura Shqiptare në New York. Mes tyre u takova me studiuesin dhe shkrimtarin e njohur Genc Leka dhe bashkëshorten e tij Znj. Lena Leka. Z. Leka është autor i një libri për Nënë Terezën. Vizitova Misionin Shqiptar në Vatikan, qe drejtohet nga ish i burgosuri politik, shkrimtari Visar Zhiti. U takova me Presidentin e Shqipërisë Z. Bujar Nishani, ish Kryeministrin e Shqipërisë Z. Sali Berisha me Znj. Liri Berisha, humanisten dhe poeten e njohur Znj. Rita Saliu. Gazetarin dhe publicistin e palodhur shqiptar Z. Beqir Sina, gazetarin dhe producentin e TV – Kultuara Shqiptare në New York Adem Belliu, producentin e televizionit të Miçiganit Gani Vila, Klerikun e Katedrales “Nënë Tereza” në Kosovë Don Lush Gjergjin – një prej organizatorëve kryesore të Ceremonisë së Shenjterimit të Nënë Terezës në Vatikan, Don Ndue Gjergji nga Miçigani, Don Kastrioti nga Kosova. Artistët që morën pjesë në koncertin Human për Shenjtërimin e Nënë Terezës – violonistin virtuoz Shkëlzen Doli, këngëtaren Inva Mula, etj.

Për kënaqësinë tuaj të dashur lexues po ju paraqes prononcimin e Shefit të Misionit Shqiptar në Vatikan Z. Visar Zhiti, një poezi shkruar për Nënë Terezën nga humanistja, poetja dhe fituesja e Çmimit të Madh “Nënë Tereza” dekoruar nga ish Presidenti Bamir Topi – Znj. Rita Saliu, nje mesazh nga shkrimtarja dhe Kryetarja e Shoqates “Marigona” ne New Jersy Znj. Sabije Veseli, si dhe disa foto ku paraqiten momente nga këto vizita në Vatikan.

Masat e mara nga rendi publik garantuan siguri të lartë për të gjithë besimtarët në këtë event unik, ku prefektja e Romës Paola Basilone ditë më parë kishte bërë publik planin e ri të sigurisë që do të vihej në zbatim për ato ditë, ku u vunë në zbatim rregulla të reja të sigurisë me shtimin e masave kundër rrezikut terrorist. Skuadra të shumta vullnetare të shërbimit mjeko-sanitar kishin ngritur “çadra” shpëtimi në pika e zona të ndryshme në Sheshin Shën Pjetri.

Vatikani ky vend i Shenjtë dhe Roma në tërësi kanë shumë Kisha e Ikona Shenjtorësh, ku çdo turist apo besimtar ka mundësi të njohë nga afër vendet ku ka kaluar dhe ecur vetë Jezu Krishti, siç janë “Shkallët e Shenjta”, të cilat Jezu Krishti i ka përshkruar me gjunjë, apo “Kisha e Kryqit të Shenjtë” ku ndodhen pjesë nga Kryqi dhe varri i Tij, sjellë në Romë nga Shën Helena.   Më datën 3 shtator në Bazilikën e Shën Gjonit në Lateran adhuruesit e Nënë Terezës patën rast të vizitonin eshtrat e Nënë Terezës, si dhe në datat 6-8 shtator në Kuvendin e Shën Gregorit në Romë. Shenjtërimi i Nënë Terezës nga Papa Françesku në Vatikan do të mbetet një nga ngjarjet më të rëndësishme të këtij shekulli, ku çdo shqiptar i madh e i vogël ndihet krenar për Nënë Terezën, bijën e shqipes, motrën dhe Shenjtoren Shqiptare që ju bashkangjit tashmë Shenjtorëve nga e mbarë bota.Humanistja dhe fituesja e Çmimit “Nënë Tereza” Znj. Rita Saliu, dekoruar nga ish Presidenti i Shqipërisë Z. Bamir Topi, përshëndet lexuesin shqiptar me këtë rast me një poezi të saj titulluar: “Nënë Tereza”, të cilën po e ribotojmë më poshtë.

Nënë Tereza

Ngrohtësia e syve tu më thërret

dhe të shoh në ëndërr

me këngën e bekimit tënd

qeshet qielli me dashurin hyjnore

Bekimi i gjithë njerëzimit

Paqja e ngujuar thellë

bëre jetën plot dashuri

diell, qiell, tokë, hënë,

Shërove vetminë e çdo zemre

është kohë e celebrimit

Dashuria që sjell engjëjt

mbi hapësirën qiellore

të tokës arbërore

i jep frymë e shpresë

Të gjitha janë perëndi

që munde të bëjnë

ne jemi gra

ngjallim besimin

për rolin e misionit

frytin puhizën idealin

Kam nevojë për energjinë

e individualitetin

energji e brumuar

për nuanca vërtetësie.

Shënim: Kjo poezi është vlerësuar me disa Çmime nëpër botë.

Shefi i Misionit Shqiptar në Vatikan-Itali, Visar Zhiti ndermjet të tjerave në prononcimin e tij tha: “Sot është një ditë e madhe për të gjithë, është një ngjarje me jehonë botërore. Në shek 21-të mbahet Shenjtërimi i një gruaje që bëri profesion dashurinë dhe vuri jetën në shërbimin e më të varfërve. Eshtë një festë shpirtërore që gëzon çdo njeri, ku ndoshta më shumë të drejtë të gëzojmë kemi ne shqiptarët, pasi Nënë Tereza është bijë e popullit tonë. Shenjtërimi saj është me të vërtetë festë, është një porosi e fortë që vjen nga qielli, ku jeta njerëzore në tokë ka nevojë për më shumë dashuri, më shumë dritë, më shumë punë në shërbim të së mirës dhe Nënë Tereza është emblema e kësaj porosie. Ajo është investitorja më e madhe e buzëqeshjeve, për të cilat ka aq shumë nevojë njeriu. Nëse do të shfletojmë shpejt e shpejt biografinë saj do të shikojmë se i takon një populli ku lindi ishte me shumicë muslimane, lindi në një qytet që do të ishte ortodoks dhe shkoi të punojë si misionare e krishtere në një vend me  besim hindu. Të gjitha këto vende e duan, të gjitha këto vende ajo i bashkoi. Nënë Tereza bashkon sot qiellin me tokën, ajo bashkon sot kohra, vende, i bashkon me atë që Zoti i ka dhëne si të përbashkët gjithë njerëzimit dashurinë. Kjo është finalja dhe kurora që jep Nënë Tereza, të duam më shumë jetën, tek tjetri të shohim veten të shohim Zotin të shohim Krishtin”.

Gjatë ktihimit tim për në Shtetet e Bashkuara të Amerikës, ku tashmë jetoj prej shumë vitesh, u ndodha në të njëjtin avion me familjen Haxhari, të cilët jetojnë në New York, e janë të afërm të superiores – misioneres bamirëse (Motrat e Nënë Terezës) në Maqedoni – Motrës Marjetë, shqiptares që foli në gjuhën shqipe në Sheshin e Shën Pjetrit në Vatikan – Itali, me rastin e Shenjtërimit të Nënë Terezës më datën 4 Shtator 2016.

Ndërsa Kryetarja e Shoqatës së gruas “Marigona” në New Jersi nëpërmjet disa vargjeve të Nënë Terezës përcolli tek ne mesazhin e paqes për Shenjtërimin e Nënë Terezës, gjithashtu ajo së bashku me nënkryetaren e Shoqatës “Marigona” Znj. Gonxhe Meta na kanë dërguar një foto pranë bustit të Nënë Terezës vendosur nga Assamblyman Mark Gjonaj ne New York.

Poezi nga Nene Tereza

Gjej kohë të lexoj

Gjej kohë të jesh mik

Gjej kohë të punosh

Eshtë burim mençurie

Eshtë rruga e lumturisë

Eshtë çmimi i suksesit

Shpirti i saj hyjnor, zemra e saj e madhe e mbushur plot me dashuri dhe respekt për njerëzimin, dora e ngrohtë e saj shpresa e njerëzimit dhe mbi të gjitha humanizmi nuk njeh kufi, ngjyrë, dhe besimin e bëri të veçantë dhe jemi krenare që Vatikani bëri Shenjtërimin e Gonxhe Bojaxhiut Nënë Terezës shqiptare. Nënë Tereza është emblema, krenaria dhe frymëzimi i popullit shqiptar. E Shenjta jonë që i përket popullit hyjnor pellazgo – iliro – shqiptare (mesazhi i Znj. Sabije Veseli)