Ilir Levonja – Page 22 – Dielli

Pedagogëve ilegalë, këtyre dashnorëve të errësirës

December 18, 2018 by dgreca

….Kjo rracë e mbrapshtë shtoi serat dhe hormonet e doktoraturave po me shumicë sa sot vendi ynë ka në një masë fiktive 95% kodoshë që presi tu shërbejnë dhe jo ata t’i shërbejnë vendit. Mos u qeshni me broçkullat e Ramës karshi doktoraturës së Monika Kryemadhit, shikoni së pari rreth vetes tuaj se deri aty është kalbëzimi, pasta shefat tuaj a liderët me metodat e leprit karshi lepurit dhe gomarit për punën e veshëve. Edi Rama ka palosur edhe doktoraturat e tij ”shkencore”, mjaft t’i referoheni rrjetit bankar dhe koncesioneve etj…

Nga Ilir Levonja/Dielli

Në internet po qarkullon një dialog mes studentëvet të Kamzës dhe atyre në shesh. Shkurt ata të Kamzës janë zënë gafil nga kërcënimet e pedagogëve dhe ardhja si kuti dhuratë e kryeministrit Edi Rama. Midis të tjerave ata thonë se nuk mund të dalin në protestë pasi nuk lejohen, duhet të dëgjojnë ”dialogun” e kryeministrit. Një dialog që e konfirmon edhe faqja në fb e Ramës dhe ERTV e tij, televizioni më brutal i kohëve të fundit, një tregues që e afron me kuvlinë televizive të viteve të partisë së punës. Dhe ajo çfarë është absurde është makineria e propagandës e cila e quan këtë dialog. Flitet në emër të studentëve etj…, po ashtu siç flitej në emër të popullit në kohën e Enverit.

Unë e kam thënë edhe më parë se diktaturat, këto forma të mbajtjes së pushtetit me dhunë, nuk bëhen vetëm. Enver Hoxha nuk vrau e preu vetëm, por me shokë, me petritat e tij etj. Kësisoj edhe sot Edi Rama, nuk po sundon e shantazhon i vetëm. Eshtë një rracë brenda shoqërisë që kuletën a titullin si profesor e më the e të thashë, e kanë mbi interesat e vendit. Këta janë shtuar shumë këto tri dekada demokraci. Pllisnin e shisnin me shumicë diploma aq sa mundën ritin kërpudhor a fenomenin natyror me dhënie titujsh e diplomash pa brerjen e ndërgjegjes. Pllisnin e pllasin për arsimin shqiptar megjithëse vetë i dërgonin fëmijët e tyre me haraçin më të lartë në katundet e botës, mjaft të diplomoheshin jashtë, si moda më vrastare karshi asaj shtrese prej 140 mijë frymësh që ripej nga blerja e detyruar e dispensave dhe provimet e mbartuara.

Kjo rracë e mbrapshtë shtoi serat dhe hormonet e doktoraturave po me shumicë sa sot vendi ynë ka në një masë fiktive 95% kodoshë që presi tu shërbejnë dhe jo ata t’i shërbejnë vendit. Mos u qeshni me broçkullat e Ramës karshi doktoraturës së Monika Kryemadhit, shikoni së pari rreth vetes tuaj se deri aty është kalbëzimi, pasta shefat tuaj a liderët me metodat e leprit karshi lepurit dhe gomarit për punën e veshëve. Edi Rama ka palosur edhe doktoraturat e tij ”shkencore”, mjaft t’i referoheni rrjetit bankar dhe koncesioneve etj. Janë karvanë me bote ari karshi kënaqësisë suaj perverse karshi asaj doktoraturës së Monës. Pra krimi nuk bëhet i vetëm. Jo, jo, aspak, por me petritët e tij. Dhe ta dini ata janë të shumtë. Kjo një nga arsyet që herë më herë luhen këto lojra me rrethimin e kryeministrisë a konfliktin e dëshiruar me forcat e rendit e plot të tjera. Me mbledhjet urgjente të ”dialogut”. Një turp kombëtar i radhës.

Ja u drejtoj këtë mllef njerëzor pikërisht atyre pedagogëve të tredhur që u impojnë studentëve këto forma të dhunëshme për mbytjen e demokracisë, mbytjen e vendit. Atyre pedagogëve me kostume jeshilë që i tmerron sekretari i partisë, partia etj. Mos u bëni ilegalë, mos vrisni e dhunoni se nuk ju a ka borxh Shqipëria. Vendi që sot konkretisht, konsideron 2018 si vit të Skënderbeut dhe hedh arka me para në blerjen e filmave nga Anadolli. Vendi i dhimbjes a atdheu është dhimbje siç e quan një Fatos poet shqiptar.

A e kuptoni se po flisni me vete?

December 15, 2018 by dgreca

….Partia është flluskë sapuni, asgjë tjetër. Njëshat çibanë dhe shushunja. Ndaj ngrehuni e mbështesni ata djem e vajza. Nëse nuk e bëni për ata, bëjini për hallet dhe vuajtjet tuaja. Bëjini për vetveten. Bëjeni për vendin./

Ilir-Levonja-300x298

Nga Ilir Levonja/

Eshtë bërë virale në internet një video ku një mesoburrë futet në mes të protestuesve shkodranë dhe lavdëron Edi Ramën. Thotë dy fjalë e ikën duke falënderuar. Kaq kisha, ju faleminderit. Dikush aty pyet gjindjen, po ky a është shnosh?

Dhe dihet më tutje, ca të qeshura. Për më tepër kur vinë nga ai humori i këndshëm e plot filozofi i Shkodrës. Sepse ashtu është vërtetë…, duhet të jesh anormal që të shkosh mes gjindjes, në natë e të ftohtë të lavdërosh Edi Ramën.

Tani kjo pyetje i shkon kaq për shtat situatës, sa pa asnjë gajle mund t’i drejtohemi edhe shoqërisë civile. Por në sensin e kundërt. Për shkak të një tërheqje a sehirbërje kolektive? Po ju, a jeni shnosh? A jeni në rregull që nuk dilni, po jeni tulatur pas tv-ve të pastërmave firmato. Pas kalendarit dhe veprimtarive të Champions League, sikur t’u vinë rrogat a gjithçka e domosdoshme nga rezultati i ndeshjeve të Juventusit a Realit. Jeni tulatur pas serialeve turke duke shikur me kënaqësi bëmat e Mehmet Pushtuesit a flirtet brenda llojit të Shtëpiakeve të dëshpëruara a Yllit të mëngjesit. Llogje që blihen me taksat tuaja ndërkohë që në gjithë hapësirën e lirisë tuaj, nuk gjen sikur 30 minuta një emision për një fermer a një sipërmarrës shqiptar. A jeni shnosh? A i keni të gjitha në vijë? Apo jeni familjarizuar tashmë me mospasjen, rryshfetin dhe skandalet vulgare mbi kompanitë fantazmë që fitojnë milionat tuaja. Dhe që një ministër e pranon me qetësi naive se deshi Zoti dhe ai nuk lëvroi këstin e parë. I dhatë miliona euro me shumicë ca vite më parë një çapkëni nga rrethinat e Miamit, për demontimin e armëve a pajisjeve të tjera ushtarake… Një farë Diveroli, ju kujtohet. E kam fjalën për Gërdecin…, janë paratë tuaja.

Dhe puna e këtij ministri me tenderin e radhës. A jeni shnosh dhe u duket normale që gjithë investimet në infrastrukturë, shëndetësi, shkencë etj., nga paratë tuaja. Se shteti nuk është fabrikë parash, nuk prodhon para. Ua merr juve…, shkojnë në of shore. Majmin buxhetin e një klase politike shushunjë. Kurse ju, kanë si dhuratë memoratoriumet e Migjenit… s’ka drita, s’ka ujë, s’ka të holla për doktor etj.

A jeni shnosh? Duke u mbrojtur mbas ca bindjeve idiote për hatër të një force politike. Të një lideri a ngjyrimi politik. Por nuk keni faj. U ka ngecur në fyt nga e djeshmja ideollogjike, partia është herezi. Nuk dilet në shesh e goditet me gurë.

A jeni shnosh që nuk pyesni një herë veten. Me ndërgjegje se, përse iu dhëmb. Përse jeni shitur aq kollaj dhe personaliteti juaj vlen vetëm një thes miell. A nuk ju trishtojnë ato kronika laboratorësh në universitetet tona. Ca relike kineze, të kohës… kushtet e botës së tretë. A e besoni se alarmante është vjedhja, padrejtësia. Dhe a pajtoheni që paguani ato tarifa për fëmijët tuaj. Ndërkohë që bota është ku është, kurse ne në nivelet e vendeve afrikane. A jeni shnosh? A e kuptoni se po flisni me vete. Dhe se keni arritur aty sa i gëzoheni më shumë milionave të fëmijëve të njëshave, se sa ardhmërisë së fëmijëve tuaj. Biles fëmijëve tuaj, u mblidhni supet, u thoni ato të zakonshmet, po kaq kemi, kaq dimë, kaq kështu e ashtu. Partia është flluskë sapuni, asgjë tjetër. Njëshat çibanë dhe shushunja. Ndaj ngrehuni e mbështesni ata djem e vajza. Nëse nuk e bëni për ata, bëjini për hallet dhe vuajtjet tuaja. Bëjini për vetveten. Bëjeni për vendin.

Check in Edvin, check in!

December 12, 2018 by dgreca

Nga Ilir Levonja/ Dielli

Më thoshte ime më, mos pështy lart biro se të shëmbet fytyrës e mallkuara. Nuk e di nëse ia ka thënë edhe Edi Ramës, e tija, por edhe po t’ia ketë thënë, ka harxhuar frymën. Kjo i shkon për kokë tani, kur u lutet studentëve për dialog. E kam thënë shpesh që ne kemi memorie të vobekët, se, po t’i kthehemi kohës ky që kemi sot kryeministër vetëm dialogun nuk ka njohur. Rekordmeni i bojkotit, e faktuar, nga viti 2009 deri kur erdhi në pushtet. Dialogoi vetëm me mendjen e tij dhe strategët e shushunjizimit të vendit dhe ”reformatorët” e vjedhjes së votave, informalitetit, drogës etj. Dialogoi me kontigjentin e Fushë Krujës, Lezhës, Laçit, Kavajës, a Elbasanit. Një pjese ua bëri gropën, kurse pjesës tjetër, si atij pashait të Elbasanit a Durrësit, nuk ia doli dot. Pra katër vjet bojkot, katër vjet jo dialog e më the e të thashë. Bëjini vet llogaritë se sa ditë pune shqiptarët i kanë paguar një individi që nuk e njohu kurrë dialogun. Madje e shpërbleu duke i dhënë edhe postin e kryeministrit, sepse nuk kishte kapur shifrat me gjashtë numra nga mandati legjendar i kryebashkiakut. Kë? Një të punësuar të pa punë. Një që nuk njihte dialogun. Dhe në konferenca televizive, rrotullonte sytë, i pa rruar, me të vetmin postulat, të fala Sandrit. I vetmi kryeministër që situatës së frikshme në Vlorë, asaj të vrasjeve dhe zhdukjes së trupave, nuk ma bën zemra të them kufomave, në një tubim partie iu përvesh me zë të lartë duke thënë që kokat hëngërshin. Duan të vriten me njëri-tjetrin, le të vriten, ju çfarë keni. Eshtë kualiteti më i neveritshëm i një shtetari karshi shoqërisë të cilin nuk e meriton aspak një vend si Shqipëria. Një kualitet i tillë, i cili paralelisht po ha kokat mes vedi, po të kemi parasysh rastin Sajmir Tahiri, dorëheqjen e ish ministrit të brendshëm Xhafajt, xhuxhin e Durrësit dhe pashain e Elbasanit. E pati shumë të lehtë me ata deputetët e Pukës dhe Lezhës. Me atë të Kavajës, por i ka ngecur sharra në gozhdë me xhuxhin dhe pashain. Një kryeministër që nuk do ta kuptojë se reformat dërdëllitëse janë refuzuar kategorikisht. Një kryeministër që kujton se ka opozitë vetëm Lulin dhe Monikën. Mëndjemadh dhe populist i cili nuk po lë shiringë pa përdorur për botime librash si Kurani dhe ekspozita personale në holle që karriera nuk ia ofroi. I vetmi që në këto 5 vite, 80% të energjive të politikës së jashtëme janë fokusuar në Ankara. Një gen homogjen me traditën neokomuniste të liderit të rajonit të lindjes duke shkuar ndesh me historinë e dhimbshme të shqiptarëve .

Sot kërkon dialog…?! Një ironi e plotë e fatit! Një shuplakë…

Check in Edvin, check in… Bëji gati valixhet.

______

Dy fjalë studentëve! Kujdes me studiot televizive… qëndrojuni kërkesave tuaja dhe mos shpjegoni lart e poshtë se çfarë kërkoni. Nuk ka studio më të mirë se sa sheshi. Studiot janë po aq të shitura sa faktori politik. Një numër i tyre, i analistave shqiptarë, siç e kanë nisur, shumë shpejt do jenë imazhi i mishit pastërma. Kjo për shkak të rreshtimit, posedimit dhe bërjes palë me informalitetin. Shumë nga shqiptarët prej kohësh ishin futur në një pezmatim social, pasi nuk shikonin dhe nuk gjejnë një alternativë të besueshme tek opozitarizmi. Këtë e thonë edhe plot nga ju. Madje shumë syresh besonin në ca aleanca të mirëkalkuluara të rrotacionit tetëvjeçar të pushtetit. Ndaj protesta juaj dëshmoi rizgjmin, të kundërtën e mendjeve të fjetura, të budallepsura, të frikësuara nga pamundësia dhe rryshfeti. Ky rizgjim ju ka kthyer në lot shprese, besimi, duke ia kaluar edhe altarëve të shenjtë, ndaj natën, në të ftohtë, njerëzit u afrohen e u sjellin ushqime, batanije, zjarr. E kuptoni edhe ju sot se, ky kryeministër ishte i bindur në atë që ka opozitë vetëm Lulin dhe Monikën, pasi Metën e nxorri në pension duke e bërë president.

Ndaj mos u tërhiqni. Zbytheni…

Dhe diçka të fundit. Shumë të tjerë duan t’ju shohin si lëvizje më vete. Bëjeni… dhjetori tashmë ka një histori të mbarsur.

Bëjini se, më mirë një lëvizje e re, naive në mirësi, se sa derra të stazhionur të stanjacionit dhe shpërbërjes.

Orët e fundit të Edi Ramës

December 11, 2018 by dgreca

Nga Ilir Levonja/

Sapo shikon një tekst të tillë…, ”vazhdojeni sa të doni protestën, por është hera e parë në botë që protestuesit nuk ulen në bisedime”, ia ndjen grahmën fundit. Ky është një nga ato pasazhet idote, e të zakonshme të Edi Ramës në atë farsën e komukimit live në FB.

O Zot, mbaja mendjen mbushur kryeministrit, se vetëm ai nuk e ka kuptuar akoma fundin e një qeverisje. Mbaja se vetëm ai nuk e kishte menduar kështu zbythjen nga karrika. Mbaja në ato shifra me 10 mijë a 20 mijë studentë protestues, kur Shqipëria sipas tij ka rreth 140 mijë studentë.

Çudi si nuk po poston foto nga qielli?

Foto nga sipër… si ato në protestat e Lulit.

Bravo Edo, ashtu vazhdo… thuaja troç, plasja, vazhdoni, shkundni tokën me këmbë, ulërini se asgjë nuk do të merrni. Ti nuk je rasti i parë i shtetarit që injoron masën. Shembujt janë me shumicë dërrmuese. Kjo nga ajo kultura e mendjembushurit se i pari i atij vendi është Zoti vet. Këtu jam me kokëfortësinë tënde. Sepse po e shoh me sytë e mi se vitalitet, sa gjak i ri po i shkund vërtetë rrugët a bulevardet e Tiranës. Dhe ta themi shkoqur vendi ynë e kishte më se të domosdoshme. Por dhëntë Zoti që ti nuk del nga politika pa u lagur, kaq.

E kishte nevojë Shqipëria jonë edhe për të ndrequr një mentalitet të mbrapsht që rëndom e has mes studiove, intelektualëve a kuadrove të rryshfetit dhe të informalitetit total. Aq sa ta shpifin me tema të tilla televizive si dhe çfarë kërkojnë studentët. A është apo s’është politike protesta e tyre? A ka aq buxhet Shqipëria sa të përmbushi kërkesat e stdenteve etj? Përse nuk negociojnë studentët etj? Një farsë sociale e gjitha. Sepse çdo protestë karshi një ligji, që në rastin konkret është pjesë e të ashtuquajturës reformë në arsim, ka tagrin e plotë të quhet sa ekonomike po aq edhe politike. Sepse është pikërisht politika ajo që ndërmerr reforma. Politika ajo që sjell edhe krizat. Ndaj është naive të kërkosh të mësosh se çfarë kërkojnë studentët. Por kjo duket më se normale studiove tuaja. Atyre që i pinë gjakun buxhetit të brishtë të shqiptarëve. Intelektualëve të rremë, por miliarderë. Një farsë sociale edhe kur diskutojnë pamundësinë e buxhetit për të përmbushur kërkesat e studentëve për thjesht kushte më të mira, tarifa më të ulta, të përafërta me vendet e rajonit dhe me gjerë. Është farsë sepse nivelet e ulta të buxhetit qëndrojnë për shkakun e thjeshtë të informalitetit, korrupsionit fantastik me tenderimet etj. Vetëm në Shqipëri ndodh që 5 metër rrugë të ndërtohen me të njëjtin fond që përshembull Kroacia ndërton 5 kilometër.

Buxheti jonë është një fole mjalti, përmes tij ti dhe sëra jote janë bërë kalorës të parasë. Sikur të ardhurat tuaja informale dhe sojit e sorollopit rreth teje t’i nënshtrohen një procesi filtrimi, buxheti i shqiptarëve do ishte i njëllojtë me atë Hollandës. Por kjo nuk ndodh. Pasi një bateri e tërë intelektualësh informal e quajnë, lëvizje a manovër populiste. E quajnë gjyq publik. Dhe na kujtojnë xhaxhin, na kujtojnë se po bëjmë atë që bëri Enveri. Megjithëse janë raste të pakrahsueshme në raport me kohën dhe demokracinë. Eshtë vazhda e asaj kulturës farsë, që na mban në kuadrin e fjalëve, në kuadrin e llogjeve. Mirëpo duket se ky brez, e ka kuptuar këtë. Të vjen mirë. Madje ta kenë dhënë shpjegimin pse nuk negociojnë. Eshtë një kalbëzim total social dhe mirë e kanë, i panegociueshëm. Po ti vazhdo kokë mbushur… se sa më shumë kështu, orët e lirisë së vërtetë po afrohen. E kam fjalën për shtetin e së të drejtës dhe lirive të individit. Jo shtetin e shokëve, grupeve, të fortëve…, i thuaj atij apo këtij, na kaq dhe bëje për mua etj. Një shtet dhe Shqipëri pa ty.

Të qofshin këto orët e fundit Edi… veç mos harro shallvaret dhe atletet addidas. Gruevski e pati një mik në Hungari. Por edhe ti e ke një në Turqi. Bëhu gati, check in…

Sot edhe unë jam student

December 7, 2018 by dgreca

Nesër është edhe 8 dhjetori, ajo që përkon me përvjetorin e radhës të protestave studentore të viteve nëntëdhjetë. Kësisoj me këtë protestën e radhës dhe ndofta me të tjerat që mund të vijojnë, e bën këtë muaj një simbol të protestave të vërteta në raport me qytetarinë e europës dhe vendeve të tjera të demokracive perëndimore. /

Nga Ilir Levonja/ Florida-USA/

1) Në një pankartë diku mes gjindjes, shkruhej, e ardhmja është e jona. Atë e mbante një vajzë, një studente. Një rob i së ardhmes. Në kokë ndofta i vlonin kalkulimet me tarifat. Ndofta dhe pandehma se i kish nderur apo jo në ballkonin e dhomës së konviktit ato pak tesha të sapolara. Ajo pankartë dalldisej me ovacionet. Edhe vajza me gjindjen. Por çfarë është e rëndësishme të thuhet, është ekzaktësisht thelbi mbi të ardhmen. Filozofia…, apo kapja në kohën e duhur e fateve të vendit tënd. Koha kur lindin liderët. Nuk e di se kjo lëvizje, a kjo protestë do nxjerri një të tillë. Nisur nga rrethanat, brishtësia e paqes në rajon, protestat e jelekë të verdhë në Francë, ndryshimet drastike politike në disa vende të rajonit, krizën ekonomike të fqinjëve ku edhe është sistemuar një shumicë dërrmuese e shqiptarëve, por Shqipëria e ka më se të domosdoshme. Dhe ndofta ajo pankartë është një syth vërtetë pranveror. Se për atë Zot, kur shikon akoma në krye të parlamentit një ish ministër të diktaturës, madje me hetime të pazbardhura për vrasjet e Shkodrës, protestat e prillit, etj. Kur shikon se si akoma një parti komuniste me një mal dosje krimesh mbi shpinë, tubon, kur duhej të ishte e jashtëligjëshme etj. Kur shikon se si në plot njëzetë e tetë vite, sekretarët e nomlekaturës flasin për anëtarësim, reforma, mirëqenie. Dhe mbajnë pushtetin diku drejt për drejtë dhe diku përmes sejmenëve etj. Për atë Zot të vjen për të vjellë. Një ironi therëse e këtyre afro tri dekadave ndaj sot vendi ynë është në një krizë identiteti dhe anarshi sociale.

2) Nesër është edhe 8 dhjetori, ajo që përkon me përvjetorin e radhës të protestave studentore të viteve nëntëdhjetë. Kësisoj me këtë protestën e radhës dhe ndofta me të tjerat që mund të vijojnë, e bën këtë muaj një simbol të protestave të vërteta në raport me qytetarinë e europës dhe vendeve të tjera të demokracive perëndimore. Duke na larguar disi nga nëntori i kuq i demagogjisë me 28 a 29. Për faktin se është shoqëria civile ajo që proteston dhe jo partia. Partia a partitë tashmë janë një gjendje e degraduar, për më tepër kur shikon se si dosjexhinjtë a sekretarët e partisë dominojnë në gjithçka. Apo kalimi i pushtetit nga baba tek i biri, duke përjashtuar çdo mini element të garës së ideve dhe projekteve. Kjo nuk është demokraci, por dëmdemokraci. Nesër është 8 dhjetori dhe në raport me ato protesta, studentët e atëhershëm iu nështruan kulturës së etërve, grindjes, përçarjes etj., duke ia lënë vendin në dorë një shpure që vinte nga radhët e diktaturës së proletariatit. Mjaft të shaje Enverin dhe ishe demokrat…, le të kishe dënuar vrarë e prerë me ‘të, ishe demokrat. Shumë prej studentëve të asaj kohe iu nështruan ikjes, asaj drame sociale për shkak të mirëqenies, ashtu si pjesa dërrmuese e shqiptarëve. Edhe tani një epedemi e re kërcënon vendin, ajo e ikjes. Dhe kjo është mëse normale pasi sot diktatura e proletariatit është akoma në pushtet, vret, pasurohet dhe i shkelin syrin shoqi shoqit, si trashëgimtarë, si pinjollë. Ndaj nuk është e pashpjegueshme përshembull çfarë Vlora sot përjeton, në lidhje me luftën e frikshme të zhdukjes së personave. Por është dhe thelbi për të kuptuar pse vendi ynë nuk po ndreqet, pse jemi tërë kohës në një tranzicion jo shterues. Ndaj ajo pankartë të jep shpresë…

3) Nëse e keni ndjerë dhe kuptuar të vërtetën, atëherë ta dini se e rëndësishme tani është të mos thyheni. Të prishni kulturën e grindjeve dhe kompromisit qoftë nga e majta apo e djathta. Për të majtën ua them copë, sa kohë ka Ruç, Xhafë, xhuxha, pashallarë si ai Elbasanit, as mos e çoni nëpër mend të ndreqet. Por listat me veresie do keni, lista pa fund. Ndërsa nga e djathta nuk bëhet demokracia me çunin e Fahrisë. Dhe për më tepër do i shikoni nesër në kuvend, do kthehen, se, kanë frikë mos u digjen mandatet. Do kthehen si ato që kanë emrin në ca bordero fiktive. Megjithëse koha e kërkon, ata nuk kanë për t’i djegur mandatet. As me klithmat e Gridës së bukur. Duhet frymë, frymë, shoqëri, gjindje. Këta nuk janë gjë tjetër veçse pjesë e asaj vazhde kulturore mes etërve dhe bijve, sekretarëve dhe kapterëve nga byroja e luftës së klasave. Kësisoj është koha e juaj, e tillë që lum ju që po e përjetoni. Po më shumë se për veten tuaj, vazhdoni dhe bëjeni për hatër të atij dheu, vendit tonë.