Keze Kozeta Zylo – Page 16 – Dielli

Manhattani, kuq e zi nga shqiptarët e Diasporës

June 11, 2018 by dgreca

Nga Keze Kozeta Zylo/

34790175_10216865781220041_1810269577859301376_o 1 a marko fotog Vatren 1 DioGuardi

Te Shtunen, 9 Qershor 2018, në Manhattan shqiptarët e Diasporës amerikane parakaluan me krenari në kryeqendrën e botës, Manhattan në rrugën Amerika. Duket sikur po bëhet një ritual vjetor, një ritual shqiptar që ndez Manhattanin me gradaçielat qiellgërvishtëse kuq e zi dhe kjo organizohet me patriotizëm dhe vullnet të mire nga Rënjët shqiptare me president z.Marko Kepi, bashkëpunëtorin e tij të ngushtë Nick Beqi i cili është n/kryetar i organizatës dhe bordi drejtues.

Pjesëmarrësit vinin grupe grupe më së shumti me veshjen kuq e zi, flamujtë shqiptarë dhe amerikanë që i valëvisnin krenar përgjatë rrugës “Amerika”.

Aktivitetin dhe prezantimin për përshëndetjet nga personalitete shqiptare dhe amerikane i moderoi gazetarja e talentuar Kozeta Turishta. Parada shqiptare tha z.Marko Kepi, sivjet i përkushtohet UCK-s e cila luftoi burrërisht me armë në dorë për të çliruar Kosovën e pushtuar nga bisha serbe. Ajo i përkushtohet 10 Vjetorit të Pavarësisë së Kosovës.

Folësit që përshendetën në këtë paradë ishin ish kongresisti amerikan Joe Dio Guardi dhe Shirley Dio Guardi të cilët u nderuan si Ligë Shqiptare, z.Gani Shehu, President i Batalionit “Atlantiku” u nderua nga Rrënjët Shqiptare. U nderuan prindërit e vëllezërve Bytyqi, si Ylli, Agroni dhe Mehmet, të cilët ishin shtetas amerikanë me orgjinë shqiptare dhe dhanë jetën për Kosovën në vitin 1999. Babai i tyre Ahmet Bytyqi mori pllakën e nderimit për të tre fëmijët dëshmorë të Kosovës.

Përshëndetën z.Mark Gjonaj, ish kongresisti amerikan Michael Grimm I cili po kandidon përsëri, Ambasadorja e Kosovës në Washington znj.Vlora Çitaku dhe personalitete të përfshirë në politikën amerikane. Ambasadorja e Shqipërisë mori pllakat e mirënjohjes për familjen Jashari dhe Haradinaj.

Makinat e zbukuruara me logon e shoqatave të tyre, flamujtë dhe muziken me DJ shqiptare i jepnin një nur të bukur Nju Jorkut. Me të drejtë këshilltari i Bashkisë së Nju Jorkut Mark Gjonaj në fjalën e tij përshëndetëse tha se: “Nju Jorku vërtetë është i bukur, por kurrë nuk ka qenë më i bukur se sot!

Makina e parë që filloi parakalimin ishte me logon e organizatës “Rrënjët Shqiptare” e cila ishte me aktivistë të saj dhe pjesëmarrës të ndryshëm. Shoqata “Ana e Malit” ishte mbushur me të rinjte “Freskia” me kostume dhe që kërcyen valle tradicionale si dhe me nxënësit shqiptarë të Shkollës Shqipe “Alba Life” e cila operon në disa lagje të Nju Jorkut dhe që ishte e vetmja shkollë që parakaloi sot në paradë përkrah mësueseve të tyre të dashura.

Parakaluan krenarë në paradë Organizata panshqiptare “Vatra”, me 106 vite histori, organizatat “Plavë Gucia”, “Kraja”, Qendra shqiptare amerikane “Riverdale”, shoqata atdhetare “Dibra”, përfaqësues nga shoqata e ish ushtarakëve “Skënderbej”, Metropolitan building managers of New York, Arbëreshët e Italisë, Motoçiklistët “Free Eagels” të shoqëruar nga policia e shtetit të Nju Jorkut etj…

Parada gjëmoi nga zëri i këngëtarëve të mirënjohur Hajro Cekës, Gezim Nikës, Valbona Peraj etj, ne shoqërimin e Sammy Zeneli, Professional Albanian DJ.

TV “Alba Life” gjatë filmimit të paradës mori disa intervista nga zonjusha Rea Ulaj me personalitete të shquara që do të transemetohen së shpejti në kanalet televizive.

Ishte një e shtunë e bukur, një e shtunë shqiptare kuq e zi në Manhattan organizuar nga Rrënjët Shqiptare në New York.

9 qershor, 2018

Manhattan, New York

Ulqinaket, dramë dhe muzikë klasike në Symphpny Space

May 8, 2018 by dgreca

31949854_10213183629397958_8136011648948240384_o

Aktorët e Teatrit “Teuta” Ulqin shfaqën dramën “Nana” dhe muzikë klasike në Symphony Space, Manhattan/

Nga Keze Kozeta Zylo/*

Manhattanin kryqendrën e botes duket sikur po e pushtojnë shqiptarët në muajin e pranverës ashtu sic kanë shpërthyer gjethet e pemëve dhe lulet aromëndjellëse, ashtu po duket dhe me skenat sikur po flasin dhe këndojnë shqip. Pas aktivitetit madhështor të 10 Vjetorit të TV dhe të shkollës Shqipe “Alba Life”, në të gjithë Nju Jorkun dhe më gjerë u shpërnda gazeta mjaft e njohur “Nju Jork Post” që fillonte me titullin mjat domethënës: Ç’kemi Albanian, çka tregonte për futjen e gjuhës shqipe, që do të fillojë me shkollën publike në Bronx në shtator dhe kjo fal politikanit të lartë shqiptar, Këshilltarit në Bashkinë e Nju Jorkut Mark Gjonaj, dhe ja e diela përsëri me dramën shqipe “Nana” dhe koncert klasik.

Symphony Space një nga skenat prestigjioze gjëmoi Shqip! Dashamiresit e artit dhe të muzikës vinin grupe–grupe për të mbështetur artistët e ardhur nga vendi i bukur, qyteti me një kulturë të lashtë, Ulqini. Mbrëmjen artistike e moderoi zonjusha simpatike Etrita Ibroci një aktiviste e mirënjohur e Diasporës. Zonjusha Ibroci iu uroi gjithë aktorëve, muzikantëve dhe këngëtarëve mirëseardhjen dhe falënderoi të gjithë pjesëmarrësit për mbështetjen e tyre. Ajo ftoi në skenë z.Cafo Boga presidenti i Fondacionit kulturor shqiptaro amerikan, organizatori kryesor i sjelljes së aktorëve të Ulqinit për të shfaqur: Claissical Muzic Concert “Belcanto Dalcinio” dhe dramën “Nana” në Symphony Space. Z.Boga tha midis të tjerash se këto organizime gjithmonë promovojnë kulturën, traditën dhe integrohemi së bashku për në botë më të paqshme, më të bukur. Ne së bashku ndërtojmë një të ardhme më të mirë dhe i forcojmë më shumë lidhjet me Atdheun tonë të shtrenjtë, me rrënjët tona me Ulqinin e më gjerë vazhdoi z.Boga…

Me duartrokitje u mirëprit Biri i Kombit Mark Gjonaj, si dhe z.Ismet Karamanaga, udhëheqës i programit, z.Munib Abazoviq regjisor. Në këtë program kishte sjellë përshëndetjen dhe Ambasadorja e Shqipërisë ne Washington znj.Floreta Faber. Zonjusha Ibroci ftoi Ambassadorin e Malit të Zi, z. Željko Stamatović i cili tha se ne jemi me shekuj së bashku dhe duhet të jetojmë në harmoni, kultura dhe arti gjithmonë sjellin paqe.

Programi i koncertit të muzikës klasike “Belcanto Dolcino”

Belcanto Dolcino merr pjesë në festivalet vjetore të muzikës klasike organizuar nga Fondacioni kulturor shqiptaro amerikan në bashkëpunim me Bashkinë e Ulqinit, ku promovohen talentet e qytetit dhe njëkohësisht krijon lidhje ndërkombëtare me artistët dhe muzikën botërore.

Koncerti i muzikës klasike “Belcanto Dolcino” ishte një koncert i pasur që u realizua nga artistë plot kulturë dhe profesionalizëm. Mezzosoprano si Sanije Matoshi, nën shoqërimin e pianistes Natasa Mitrovic këndoi plot ëmbëlsi si “Lule Bore”, “Dashnor t’u bana”, “Unë ty moj të kam dasht”, “Margjello”.

Eleanor Valkenburg, soprano nën shoqërimin e pianistes Natasa Mitrovic interpretoi si “Long time ago”, “Little Horses”, “I bought me a cat”.

Iliriana Gjoni një pianiste e talentuar interpretoi “Folk songs” bazuar në motive shqiptare.

Baritoni i mirënjohur Ergin Oda me një zë të mëndafshtë nën shoqërimin e pianistit të talentuar Leke Salihu interpretoi “Por Una Cabeza” dhe “Muzik of the Night”.

Natasa Mitrovic luajti në piano “Gavotte et six doubles” dhe “Preludi Giocosi”.

Gjylie Pelingu, soprano këndoi “Vajta kalova”, “Dicitencello vuie” dhe “Agimet Shqiptare” nën shoqërimin e pianistes Fatime Buzuku.

Teatri “Teuta” Ulqini shfaqi Dramën “Nana”

Vetë titulli i dramës të tërheq si me magji, ashtu sic është emri më i shenjtë në botë “Nëna”, “Nana”, “Nona”…

Si nënë, si shkrimtare, shumë personazhe me nënën më erdhën në mendje, libra, poema, këngë, por së pari më erdhi dhe m’u fut në gji nëna ime, ajo erdhi si ëngëll nga qielli me Hëne i Nju Jorkut, që shndriste si flokëargjenda ime…

Në një skene me mjedise të thjeshta të shtëpisë u shfaq nëna që tundte djepin e djalit, duke i kënduar ninulla që kanë qenë aq të njohura për brezat e kaluar, por që mjerisht po zhduken ndër nëna të reja…Rolin e nënës e luante aktorja simpatike, studente e ekonomisë Blerta Kurtovic, ndërsa të djalit të vogël nxënësi me sy si drita Anes Kurti. Rolin e djalit që solli realisht dhimbjen në familjen shqiptare e luajti aktori Muho Uruci. Mimika e fytyrës së djalit, dialogjet midis tij dhe nënës, birit dhe nuses që e luante Albana Kurti Zecevic ishin mjaft mbresëlënëse dhe e lanë publikun të fokusuar pranë skenës.

Është një dramë që ndihet në plazmë të gjakut, sidomos ndër emigrantë ngase janë të ikur nga tokat e tyre, toka që po lihen shkretë dhe djerr, toka që shumë prej tyre janë zënë nga të huajtë dhe do te jetë e dhimbshme kur të mos quhen më toka shqiptare…

Cili është ai shqiptar që nuk po e përjeton këtë dramë?!

Drama “Nana” u realizua bukur, duke sjellë temën familjare, vëmendjen e lexuesit dhe të publikut për sakrificat e nënës, mundin dhe pagjumësinë e saj, peripecitë që krijohen shpesh midis birit dhe familjes, sidomos ikja e bijëve duke i lënë prindërit të jetojnë shpesh në vetmi…

Aktoret si Bashkim Alaj në rolin e plakut të qytetit, Aurora Kurti ne rolin e gruas së moshuar, Jetlira Hodzic në rolin e moshës së re, Benjamin Abazoviq në rolin e shokut të djalit, Mahmudije Nimanbegu në rolin e moshës së mesme bënë një lojë aktoreske të arritur dhe premtojnë shumë në të ardhmen.

Fundi i dramës solli shumë lot ndër spektatorë, vdekja e birit nga stërmundimet, dhimbjet dhe ardhja e tij në fund të jetës në krahët e nënës ishte tragjedia që e shohim dhe e ndjejmë me sytë tanë. Ai u shtri në krahët e saj që të kujtonte shkrimtarin e famshëm botëror Victor Hygon i cili thotë: “A mother’s arms are made of tenderness and children sleep soundly in them” që përkthehet:

“Krahët e nënës janë bërë me butësi dhe fëmijët flenë ëmbelsisht në to”…

Në këtë rast ai tragjikisht u shtri në krahët e saj dhe dha shpirt po aty, ku kuja e nënës çau qiell e tokë dhe s’kishte hapësirë ta nxinte…

Drama është realizuar mjeshtërisht nga regjisori Munib Abazoviq, ndërsa udhëheqës i programit ishte z.Ismet Karamanaga të cilët dhanë intervistë plot kulturë pranë kamerave të TV “Alba Life”, New York dhe do të transmetohen së shpejti në kanalin televiziv.

Manhattan, New York- 6 Maj 2018

Per me shume fotografi shihni ne Facebook(dielli vatra)

Bamirësi në shtëpinë Filantropisti Richard Lukaj

April 17, 2018 by dgreca

1 ricardi flet 1 orkestra 1 lindita 2 richi 3 rich

Aktivitet bamirësie në shtëpinë e filantropistit shqiptar Richard Lukaj, “Nderi i Kombit”/

Nga Keze Kozeta Zylo/

Gjithmonë më kanë ëtrhequr aktivitetet e ndryshme që janë në shërbim të Diasporës dhe të Kombit, por aktivitetet me program bamirësie më sjellin një ndjesi tjetër, sepse janë shumë më pranë thelbit njerëzor.

Shumë miq te familjes Lukaj kishin ardhur për t’iu bashkuar këtij aktiviteti që prezantonte Fondacionin Polifonik që ka misionin më fisnik dhe më human Paqen duke filluar midis Izraelit dhe vendeve arabe, që natyrisht nis me artin dhe muzikën. Ndërsa dëgjoja me shumë kënaqësi orkestrën që interpretonin artistët e mrekullueshëm dhe të rinj që kishin udhëtuar që nga Izraeli medoemos mendoja se vetëm arti i dalë nga shpirti mund t’i sjellë botës Paqe dhe mirësi… Misioni i tyre të kujtonte thënien e filozofit të famshëm Platonin i cili ka thënë: “Music gives a soul to the universe, wings to the mind, flight to the imagination and life to everything,” që përkthehet: Muzika i jep shpirt universit, krah mendjes, fluturim imagjinatës dhe jetë në cdo gjë…

Fondacioni Polifonik po ndërton ura per te nxitur shoqërine civile duke mbledhur të jetojnë së bashku fëmijë arabe dhe hebrenj në Izrael, përmes muzikës.

Në se disa lider nëpër shtete të ndryshme të botës do t’i dëgjonin herë pas here këta instrumentistë të talentuar, medoemos do ta zbusnin egërsinë e pamëshirshme të tyre dhe do të ktheheshin më njerëzor, por mjerisht ende mbjellin frikë…

Z.Richard Lukaj filantropist i njohur shqiptar dhe në botë ka përshëndetur misionin e tyre plot me qëllime te bukura dhe me mision paqeje si dhe njëkohësisht ka përgëzuar të gjithë të pranishmit që ndodheshin në shtëpinë e tij, të cilët kishin ardhur për të kontribuar. për ta rritur dhe përhapur më shumë në botë emrin e Fondacionit Polifonik.

Që nga viti 2011 Fondacioni Polifonik ka ndihmuar në krijimin e një baze të njejtë përmes një zëri të përbashkët. Të rinjtë arabë dhe hebrenj kanë marrë aksese të barabarta në arsimimin muzikor, në oportunitete të ndryshme si dhe kanë dhënë koncerte së bashku. Gjithashtu që prej vitit 2006 mbi 25 000 arabë dhe hebrenj kanë zbuluar muzikën dhe kanë gjetur shpresën nëpërmjet Fondacionit Polifonik

Në këtë aktivitet bamiresie interpretuan artistë të mirënjohur shqiptarë si Lindita Mezini Lole e cila interpretoi mjeshtërisht duet me këngën popullore shqiptare Lule bore së bashku me Laila Lukaj një artiste e re plot talent që premton shumë në të ardhmen, nën shoqërimin në piano nga Ida Tili Trebicka. Me plot profesionalizem interpretoi në klarinet mjeshtri Igli Tuga.

Kuarteti Polifonik i harqeve në koncertin e bamirësisë kishte ndjesi magjie, ngase sillte brenda nesh botën e tyre të madhe sa rruzulli Ata ishin si katër pëllumba Paqeje që kishin fluturuar nga Izraeli dhe kishin gjetur një folezë shpirtërore në shtëpinë e shqiptarit Richard Lukaj, origjina e të cilit Shqipëria, i kishte sjellë botës gruan më të famshme të rruzullit, Shenjtoren Gonxhe Bojaxhiun, Nënë Terezën.

Dhe kjo s’është rastësi!…

14 prill, 2018

Greenwich, Connecticut

Van Gogu shqiptar

March 22, 2018 by dgreca

(Rreth filmit dokumentar “Zois” që u shfaq në festivalin ndërkombëtar në New York)

Tabllotë e pikturuara nga Zoi Shyti jane si sytë e yjeve që vetëm shkëlqejnë…/

Nga Keze Kozeta Zylo/

Në mjediset e qendrës kinematografike “Kaufman Center” në Zukor Theater u shfaq filmi dokumentar për artistin e shquar, Zoi Shyti fitues i disa çmimeve ndërkombëtare. Në festivalin ndërkombëtar të filmit që konkurrojnë 189 filma, filmi dokumentar për Zoi Shytin është nominuar me tri çmime.

Filmi dokumentar është realizuar nga regjisori Bujar Alimani, producentët Damian Pervizi dhe Dritan Haxhia, drejtor të fotografisë Dritan Haxhia, edituar nga Sabir Kanaqi, kurse muzika është kompozuar nga Fatrin Krajka dhe zërimi nga Elvis Ikonomi.Filmi fokusohet në një histori sa tronditëse aq dhe të magjishme, ngase përshkruan rrugën e mundimshme të një artisti të madh që u arratis nga diktatura komuniste në vitin 1964 dhe erdhi në tokën e ëndrrave.

Drama dhe arti janë pjesë e shpirtit dhe e botës plot imagjinatë të një artisti të madh si Zoi Shyti.

Filmi dokumentar më së shumti sillte skena nga shtëpia e tij e cila ishte e veshur vetëm me piktura dhe nuk shikoje asnjë milimetër bosh në mur midis tablove të mahnitshme. Duke dëgjuar dhe shikuar filmin dokumentar realizuar me mjeshtëri nga djem të talentuar, si dhe duke pasur fatin ta intervistojë direkt për TV “Alba Life”, pashë nga afër një botë të pasur artisti, krejtësisht unike për nga historia e tij, preka nga afër “tablotë” në “Galerinë e Arteve” që mban emrin e një artisti të kalibrit botëror Zoi Shyti.

M’u duk se takova Van Gogun shqiptar, por në diemensione vuajtjeje të tjera nga vuajtjet personale të piktorit hollandez, sepse Zoi jetonte nën një shtet diktatorial, iu internua nëna dhe anëtarë të familjes për shkak të arratisjes së tij…

Përjetova dramën e një artisti të vërtetë që kaloi kufirin shqiptar për në Greqi dhe prej andej në Amerikë. Veprat artistike të tij kanë shetitur në vendet më të rëndësishme të botës që mbajnë në shpirt e në zemër kryeveprat e artit botëror duke filluar nga Washingtoni, Parisi, Londër, New York, Meksiko etj… Me një edukim shumë të lartë që mori në tokën e premtuar nga “University of Pennsylvania” (best fine art schools), arriti të japë mësim në Firence, Meksikë, San Fancisko dhe të bëhet zë i dritës së artit botëror, por dhe i Kombit të tij.

Punimet e ndryshme shfaqeshin herë pas here në ekran dhe ato që të ngeleshin në mendje ishin projekti për gruan më të famshme në botë shenjtoren Nënë Terezën e cila i shërbeu njerëzimit deri në frymën e fundit. Portreti i shenjtores Nëna Terezë është sa delikate po aq dhe e paepur për t’ju shërbyer të varfërve. Piktori me penelin e tij sjellë po aq të gjallë figurën e Gjergj Kastriot Skëderbeut të heroit Kombëtar dhuruar bashkisë së Parisit në nderim të emrit të një sheshi “Skanderbeg” në Paris. Tablotë me ngjyra marramendëse sjellin shpirtin e lirë të një pikturi dhe poeti universal.

Syri shetit në ekran sa nga ngjyrat e tablove tek momentet reale të takimit me nënën e dashur pas 28 viteve. Takimi i përmalluar me nënën e tij të internuar për shkak të arratisjes të të birit ishte tejet i dhimbshëm, ato të kujtonin copëza tragjedish nga shumë emigrantë të arratisur dhe të ikur pas viteve 90 që për arsye të ndryshme nuk patën mundësi t’ju hidhnin një grusht dhe nënave të tyre…

Portretin e nënës së tij e kishte sjellë të gjallë, të bukur, edhe dritëhijet dukeshin sikur kishin bashkuar diell e hënë në sytë e saj gjithë dritë… Nëna është portret ndriçues dhe aromatizon me lulet që i ka pikturuar përpara duarve. Momenti i shfaqjes së nënës dhe të birit nën tingujt e një muzike të përmallshme dhe të përvuajtshme kompozuar mjeshtërisht nga Fatrin Krajka, një kompozitor që premton shumë të bënte ta përjetoje atë vuajtje shpirtërore në gjithë përmasat njerëzore, dramën e ndarjes forcërisht, nënë e bir… Përqafimi i nënës me të birin, muzika dhe rënia e lotit si tingull dhimbjeje kishin hyrë në një rezonancë të plotë me spektatorin, ishin një trinity hyjnore…

Portreti i nënës është trajtuar gjerësisht që nga antikiteti e deri në ditët e sotme, por meqë si autore e shkrimit e vleresoj artistin si një Van Gog medoemos më vjen ndërmend portreti i nënës së Vang Gogut, një pikturë e vitit 1888, Anna Carbentus Van Gogh, e nxjerrë nga një fotografi bardhë e zi. Ai ndau emocionalisht disa nga veprat e tij që ai mendonte dhe se nëna e tij do të vlerësonte më shumë me lule dhe mjedise natyrore.

Në këtë pikturë, Van Gogh kap natyrën dinjitoze dhe krenare të nënës së tij.

Ndërsa shikon të gjithë dokumentarin më duket se ecin paralelisht si Zoi Shyti dhe Van Gogu i cili dhe ky i fundit pati një jetë shumë të veshtirë për arsye të sëmundjeve të tij, por edhe trajtimit nga njerëz të ndryshëm që donin ta privonin nga arti dhe jetoi për mjaft kohë në varfëri të tejskajshme.

Zoi shqiptar e kaloi fëmijërinë në një dramë të vërtetë duke i shpëtuar bombardimit të nazistevë gjermanë duke e nxjerrë atë nga gërmadhat dhe rrënojat që mund t’i shkaktonin humbjen e jetës. Ndersa Van Gogu i shkakton dhimbje vehtes nga depresioni siç i ndodhi në një rast me prerjen e veshit të majtë , më 23 dhjetor dhe e çoi në një shtepi publike, ngase ishte pasionant me një prostitutë që kishte rënë në dashuri këmbë e kokë. Zoi shqiptar respekton vajzën nudo Xhekin e cila kishte pozuar për 6 orë pa lëvizur për ta pikturuar. Portretet nudo të femrave ishin tabllo të realizuara mjeshtërisht nga piktori dhe ndihej qartë se sa i ndjeshëm ishte piktori karshi seksit femër, deliktatesës së saj, bukurisë së virgjër dhe respektit pakufi që ndjente piktori karshi bukurisë hyjnore me emrin grua. Format e përsosura trupore, detajet simbolike, fjalët e tij shprehnin shpirtin e lirë, civilizimin qytetar kur tha se: “Bota pa femrën do të ishte në terr të plotë”…

Van Gogu në pikturën “Sorrow” thotë se: “Dua të bëj vizatime që prekin disa njerëz. Ky portret është një fillim i vogël … ka të paktën diçka drejtpërdrejt nga zemra ime”…

Ai solli portretin e nje gruaje të abadonuar dhe jepte mesazhin se askush s’duhet të lihet vetëm, pra e dashuroi Sorrown ashtu siç qe.

Portreti i gruas pas abortit te Zoit “Van Gogut” shqiptar është shumë e dhimbshme si ndëprerja e një jete që sapo është ngjizur në shenjtërinë e mitrës së gruas dhe e lenë qëllimisht e papërfunduar nga dora e mjeshtrit si vetë aborti i saj… Pafajësia, ëmbëlsia e dashurisë, fati i keq janë të sjella mjeshtërisht në tabllonë “Pas abortit”…

Pamë një film dokumentar të realizuar me profesionalizëm që duhet medoemos të shikohet nga publiku i gjerë shqiptar, sepse tabllotë janë si sytë e yjeve që vetëm shkëlqejnë, thotë Van Gogu:

“Për pjesën time nuk di asgjë me ndonjë siguri, por sytë e yjeve më bëjnë ëndërr”…

Filmi dokumentar me veprat e artit të Zoit, Van Gogut shqiptar është tronditës dhe impresionues, është një film që të ngelet në kujtesë për tërë jetën, sespse sjellë portretin e një artisti të madh të kalibrit botëror si Zoi Shyti, Van Gogu shqiptar…

21 mars, 2018

Staten Island, New York

SOPRANOJA DËSHIRA AHMETI KËRLIU, GRUAJA E VITIT

March 12, 2018 by dgreca

1 ok kerliu diploma 3 Kerliu1 4 Kerliu 1 qemali 5 Kerliu 2 ok Keze Kerliu

Artistja e shquar Dëshira Ahmeti Kërliu vlerëohet si gruaja e vitit nga organizata e gruas “Zëri Ynë”/

Nga Keze Kozeta Zylo/*

Në mjediset e Catering Hall “Grand Marquis” në New Jersey qindra gra u mblodhën së bashku për të festuar ditën ndërkombëtare të gruas. Organizata e gruas “Zëri Ynë” me presidente të saj znj.Leunora Abdulai zhvilluan aktivitetin e bukur për të festuar këtë ditë të rëndësishme në jetën e gruas.Edhe natyra duket sikur merr pjesë në këto festa shqiptarësh, veçanërisht në festat e grave ngase bëhet në harmoni të plotë me bekimin e nënave dhe bukurinë qiellore. Degët e pemëve vallëzonin nga çuçurima e zogjve dhe midis sallës elegante brenda pistës së vallëzimit dhe pendëve të mëndafshta të pulëbardhave pranë oqeanit krijohet një simfoni e madhërishme si vetë zemra e gruas në botë…

Gratë, gjyshet, nënat, vajzat uleshin së bashku nëpër tavolinat e tyre dhe tringëllinin gotat e kristalta duke uruar njera tjetrën: “Gëzuar festat!” Ndonëse të gjitha kemi lënë Atdheun mëmë dhe kemi emigruar dherave të huaj, përsëri organizimet, shoqatat, klubet kanë të mirën e përbashkët, sepse mblidhemi së bashku si motra dhe vëllezër të një gjaku.

Është Gjuha Shqipe, Ashti I Kombit që na bashkon si dhe largësia nga toka mëmë na bëjnë dhe më të lidhur me njeri tjetrin.

Përshëndetjen në emër të kryesisë së organizates “Zeri Ynë” e solli znj.Leunora Abdulai e cila iu uroi të gjitha zonjave dhe zonjusheve mirëseardhjen dhe iu uroi atyre “Gëzuar festat”. Ajo tha se është bukur që mblidhemi së bashku dhe festojmë festat tona të bukura shqiptare.

Në emër të kryesise ajo vlerësoi si grua të vitit artisten e shquar të Kombit sopranon e mirënjohur Dëshira Ahmeti Kërliu si dhe disa grave iu dha nga një buqetë me lule në shenjë mirënjohjeje. Znj.Abdulai tha se Dëshira Ahmeti Kerliu është një artiste e shquar dhe ne ndihemi krenar si organizatë dhe si gra shqiptare.

Dëshira Ahmeti Kërliu ndihej e emocionuar që u vleresua si gruaja e vitit nga organizata e gruas “Zëri Ynë”, ngase shumica dërrmuese e tyre janë prej Dibrës së Madhe nga e ka dhe origjinën vetë artistja.

Ajo tha se artist nuk bëhesh, por lind dhe këto dhunti nëse i zhvillon me vullnet dhe dëshirë patjetër që një ditë do të arrish atje ku duhet. Kariera ime nuk ka qenë e lehtë, ajo ka qenë me mundime, vështirësi, por dhe plot kënaqësi. Jam e nderuar që jam sopranoja e parë shqiptare në teatrin e Shkupit të Maqedonisësi dhe kam dhënë koncerte në disa skena në Europë dhe në Amerikë. Në New York do të vlerësoja koncertin me divën botërore të artit Inva Mula si dhe me artistë shqiptare, koncert qe e realizuam vitin e kaluar ne Manhattan. Së shpejti në muajin Maj nëManhattan, do të kemi koncertin e radhës me artistin virtuoz botëror Shkelzen Doli dhe kjo më bën të ndihem krenare. Me emocion solli dashurinë e ngrohtë të familjes së saj që e rritën dhe e edukuan në Dibër, por veçanërisht ajo falënderoi gjyshen që e mori qysh fëmijë në gjirin e saj, pasi mamaja i kishte vdekur në moshë shumë të re. Gjyshja e Dëshirës, Nënë Çeka siç e thërrasin të gjithë, është një nënë fisnike, flokët e bardha të saj si bora e bjeshkëve ndrijnë ashtu si sytë e saj që shkëlqenin nga gëzimi i madh kur dëgjonte fjalë miradie nga miqësia, shoqëria, por sidomos mirënjohjen që i shprehte mbesa para publikut. Shkolla Shqipe “Alba Life” është krenare që ka në staffin e saj një artiste të këtij kalibri dhe ndërkohë është dhe drejtore e programit artistik.

Fjala e artistes së shquar u mirëprit me duartrokitje çka tregonin respektin dhe krenarinë për sopranon nga qyteti i Dibrës së Madhe.

TV “Alba Life” gjatë aktivitetit intervistoi artisten Dëshira Ahmeti Kerliu si grua e vitit, znj.Leunora Abdulai si presidente të organizatës “Zëri Ynë” me qendër në Staten Island si dhe nxënësja e Shkollës Shqipe Dea Kerliu recitoi poezinë kushtuar nënës.

Pjesëmarrësit u argëtuan nën tingujt e DJ nga Besar Dika.

Aktiviteti u filmua nga TV “Alba Life” me producent dhe themelues z.Qemal Zylo dhe TV “Dibra” me producent Përparim Papraniku.

Aktiviteti do të transemtohet së shpejti nga TV “Alba Life” në kanalin 30 në paketën digitale “TV Alb”.

10 Mars, 2018

New Jersey