Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Quarteti “Iris” solli zërin e Pranverës në Opera “America” në Manhattan

by

Entela Barci, pjese e Quartetit “Iris”, ka një edukim të lartë në fushën e muzikës; pasi ka kryer Master në violë në një nga shkollat e mirënjohura Juilliard School, vazhdon studimet për Ph.D në Stony Brook University. Entela ka dhënë koncerte në metropolitanin e Nju Jorkut si soliste dhe në ansamlbin e orkestrës. Koncertet e saj muzikore janë duartrokitur, që nga Veriu deri në Jug të Amerikës, Europë, Australi etj./
Nga Keze Kozeta Zylo/
Në qendrën kombëtare opera “America” kuarteti Iris string dha nje koncert muzikor të pasur. Artistët instrumentistë të mirënjohur si shqiptarja Entela Barci në violë, Yibin Li në violinë, Muneyoshi Takahashi në violinë dhe Sean Katsuyama në cello intepretuan mjeshtërisht pjesë të ndryshme nga Bethoven si: Introduction, Andante con moto dhe Minuet. Barber: Adagio.
Në pjesën e dytë u interpretuan nga Dvorak, String Quartet No:12 ne F major, Op.96 “American”, Allegro ma non tropo, Lento, Molte vivace. Programi u mbyll me pjesën: Vivace ma non tropo.
Artistët dhe spektatorët i ka përshëndetur znj. Elena Estrin dekanja e Globe Insitute of Technology e cila iu uroi artistëve instrumentistë shumë suksese.
Në këto koncerte shpirti të mbushet me ngazëllim dhe kalon disa orë të këndshme në zemër të Nju Jorkut, larg kafeneve dhe mbledhjeve të shumta pa bukë. Si shqiptare ndihesha shumë krenare që në këtë kuartet merrte pjesë dhe Entela Barci e cila ka një sukses të madh dhe të konsiderueshëm në këtë fushë. Më duhet të kujtojë këtu se ky kuartet interpretoi profesionalisht dhe plot dashuri pjesë të ndryshme në koncertin madhështor me muzikë klasike të organizuar nga TV Alba Life së bashku me një grup artistësh, koncert që hapi siparin e aktiviteteve të 100 vjetorit të Pavarësisë në vitin 2012 në Manhattan si dhe në kuadrin e 4 vjetorit të Pavarësisë së Kosovës në Victor Borge Hall, Scandinavian House, në Manhattan.
Të gjithë muzikantët gjate intepretimit luanin me një elegancë dhe fluturonin me harkun mbi violinë, violë, apo cello dhe ngrinin peshë zemrat e artdashësve që ishin tërhequr si me magnet në këtë aktivitet kaq të bukur.
Entela Barci ka një edukim të lartë në fushën e muzikës e cila pasi ka përfunduar master në violë në një nga shkollat e mirënjohura Juilliard School vazhdon studimet për Ph.D në Stony Brook University. Ajo ka dhënë koncerte në metropolitanin e Nju Jorkut si soliste dhe në ansamlbin e orkestrës. Aktivitetet e saj muzikore janë që nga Veriu deri në Jug të Amerikës, Europë, Australi etj. Si një muzikante dhome Entela ka marrë pjesë në Muzeumin Metropolitan të koncerteve të artit dhe serisë së leksioneve si dhe në serinë e koncerteve irlandeze amerikane. Si një muzikante e orkestrës ka dhënë koncert me Filarmonikën e Nju Xhersit, Haddonfield Symphony, Jupiter Symphony, New Jersey Symphony, SAB Orchestra, ABT Orchestra dhe Lyric Opera e Nju Xhersit. Entela ka dhënë koncerte në disa salla kryesore të Nju Jorkut përfshirë Carnegie Hall, Avery Fisher Hall, Alice Tully Hall, 92nd Street Y dhe Trinity Church. Po ashtu ka qenë në recitalin muzikor në Weill Hall, e cila ishte pjesë e Amici Piano Quartet, complete Brahms dhe Mozart Piano Quartets. Znj. Barci ka marre pjese ne shume festivale të muzikës përfshirë Spoleto Music festival, Tanglewood, Ravinia Music Festival, Aspen Music Festival, Summit Music Festival, Music Acedemy of the West, Banff Centre dhe Clefworks Music Festival.
Në këtë natë të bukur muzikore dhe pas një dimri të zymtë dhe të egër që kaluam në New York, ne në Manhattan dëgjuam zërin e Pranverës me muzikantët e quartetit Iris String, të cilët dukeshin se ishin lajmëtarët e pranverës, një pranvere me ngjyrat e ylberit, si Iris perëndesha e ylberit sipas mitologjise greke, emrin nga e ka marrë dhe kuarteti. Dëgjuam muzikë si nën një dritë blu Hëne pas një nate të gjatë dimri.
Ndonëse të katert vinë nga vende të ndryshme si nga Kina, Japonia, Shqipëria dhe që i kanë filluar studimet qysh në moshën 3 vjeë, ata kanë një harmoni të përsosur miqësore ashtu si në egzekutimet që kryejnë të pjesëve të ndryshme nga kompozitorët e mëdhenj si Bethoveni etj.
Pas duartrokitjeve të gjata muzikantja Yibin Li ftoi të gjithë artdashësit para kamerave të TV Alba Life për koncertin që do të kenë në 6 Maj, 2014, në orën 8 mbasdite në Metropolitan Playhouse. Në faqen e Metropolitan House është publikuar nga Times Square Chronicles se muzikantët e quartetit Iris kanë një efektivitet të lartë në egzekutimin e pjesëve të kompozitorëve më të shquar amerikanë.
U larguam nga Opera “America” në Manhattan duke marrë me vehte zërin e Pranverës dhe duke e shpërndarë si një jehonë të bukur muzikore plot delikatesë, harmoni dhe elegancë si kuarteti “Iris”.

17 prill, 2014
Manhattan, New York

NE FESTAT E MARSIT ME ANAMALASIT

by

Nga Keze Kozeta Zylo/

Shoqata e mirënjohur “Ana e Malit” nderoi dhe festoi me madhështi 7-8 Marsin, Diten e Shenjtë të Mësuesit dhe Ditën Internacionale të Gruas.  Në mjediset e bukura të restorantit Vanderbilt qindra gra pjesëmarrëse në këtë festë erdhën me lule në duar dhe me sytë dritë për të festuar dhe kaluar disa orë të gëzueshme së bashku.  Hapësira me dritaret nga Oqeani që ishte aq i paqtë si një mendafsh blu reflektonte mahnitshëm në veshjet gjithë shije të grave të bukura që më së shumti ishin të Anës së Malit, Ulqinit.. dhe gjithë Shqipërisë.  Eleganca e shtruarjes së tavolinave me trëndafila të freskëta ngjyrë rozë dhe lule bore mbi to së bashku me zonjat aromë gruaje tregonte qartë se sa kujdes i kishin shtruar të zotët e shtëpisë së Anes së Malit këtij aktiviteti kaq të rëndësishëm, jo vetëm për shoqatën, por dhe për Diasporën.  Në hyrje të sallës të prisnin ngrohtësisht zonja e parë e shoqatës Naile Kurti dhe Besiana, një studente simpatike. 

Mbrëmjen e ka hapur z.Ismet Kurti kryetar i shoqatës “Ana e Malit” i cili ka përshëndetur plot dashamirësi dhe mirënjohje të gjitha gratë.  Z.Kurti tha se:  Sot nuk është ditë e fjalimeve, por sinqersisht u jam mirënjohës dhe falënderues për pjesemarrjen tuaj, angazhimin tuaj, dhe çmoj lart kontributin që ju të nderuara nëna dhuroni për ruajtjen dhe edukimin e familjeve tona këtu në mërgim.  Sot dhe gjithnjë ne duhet të reflektojmë mbi kontributin e gruas në të kaluaren dhe inkurajojmë gratë e reja që të shfrytëzojnë potencialin e tyre për të frymëzuar një të ardhme më të mirë.

Më lejoni që për angazhimin e tyre dhe organizimin e këtij manifestimi të falënderoj arkëtaren e Shoqatës zonjën Mina Salaj anëtaren e bordit zonjën Suada Ceka dhe Zonjën e parë të Shoqatës Naile Kurti.

Shoqata jonë “Ana e Malit” është një ndër shoqatat më aktive në komunitetin tonë e këtë e kemi arritur fal edhe angazhimit që ju bëni në  çdo sferë të jetës e kjo po dëshmohet edhe sot me pjesëmarrjen tuaj.

Më vjen mirë të shoh gra të fuqishme nga çdo fushë të jetës ne mesin tonë. Ne e kemi parë fuqinë transformuese që gratë posedojnë dhe kontributin që ato kanë dhënë dhe mund të japin sa herë që bëhen pjesë aktive e shoqërisë.  Kemi parë se investimi për gruan, nuk është vetëm investim në një individ, por është investim dhe në të ardhmen e fëmijëve tanë.  Sot Shoqata “Ana e Malit” shpreh mirënjohje për të gjitha gratë shqiptare, por në veçanti do të dallojmë disa nga ju për kontributin e tyre në shoqëri dhe shpresojmë që arritjet e tyre të frymëzojnë gjeneratat e reja që të arrijne potencialin e tyre.

Një mirënjohje të veçante u japim mësuesëve të shkollës shqipe këtu në State Island, Brooklyn dhe në Bronx për punën e tyre të shkëlqyer që po bëjnë me fëmijët tanë për të ruajtuar gjuhën tonë të bukur shqipe dhe vogëlushëve tanë po ua mësojnë kulturën, historinë dhe traditatat tona të bukura shqiptare.  Qofshi gjithnjë të lumtura në jetë!  Urime 7-8 Marsin dhe ju dëshiroj argëtim të kandshëm!

Pas fjales se tij z.Kurti ka ftuar znj.Etrita Ibroci një aktiviste e mirënjohur e komunitetit e cila ndër të tjera tha:  Në këto festa të bukura ne nderojmë gratë këtu dhe të gjitha gratë në botë ku punojnë me devotshmëri, përkushtim, pasion dhe dashuri duke frymëzuar miliona gra në botë.  Si një forcë e madhe gratë shqiptare mund të përmirësojnë shumë gjëra në botë.  Ne kemi shembuj si Elena Gjika (Dora D’Istria), Nënë Tereza dhe së fundi Rita Ora që tregojnë se sa shumë një person mund të arrijë.  Si komunitet ne kemi nevojë të suportojmë gratë tona dhe t’i inkurajojmë të rejat të vazhdojnë edukimin më lart.

 

Përshëndetja e Kongresistit Amerikan z.Michael Grimm dhe Asambleistit të shtetit të Nju Jorkut z.Mark Gjonaj

 

Mes duartrokitjesh është pritur kongresisti amerikan z.Michael Gerard Grimm për Staten Island dhe Brooklyn, New York i shoqëruar nga z.Ismet Kurti dhe Marko Kepi president i organizatës “Rrënjët” i cili bashkëpunoi për këtë aktivitet të rëndësishëm.  Kongresisti amerikan është zgjedhur për të dytën herë në Kongresin Amerikan dhe është anëtar i partisë republikane amerikane.  Ai përshëndeti të gjitha gratë, kryetarin e shoqatës z.Ismet Kurti dhe çmoi punën e shoqatës Ana e Malit dhe të gjithë diasporës shqiptare për kontributin që po japin.  Shqiptarët janë njerëz shumë punëtorë dhe çmojnë lirinë, Amerikën dhe e duan shumë vendin nga kanë ardhur.  Unë kam takuar kryeministrin e Shqipërisë, z.Edi Rama, të Kosovës HashimThaci si dhe shumë përfaqësues nga të gjitha trevat shqiptare dhe jam informuar mirë për Shqipërinë.  Kongresisti amerikan foli shkurt dhe tha gjithcka.  Ajo që më ka bërë përshtypje në përgjithësi tek politikanët amerikanë është se nuk përdorin fjalor vulgar që e sheh rëndom tek politikanët tanë, por me mëncuri dhe dipllomaci i ftoi të gjitha gratë dhe shqiptarët që të marrin pjesë në votime.  Nuk ka rëndësi në se votoni për mua apo dikë tjetër, e rëndësishme është që të votoni për vehten dhe pikëpamjet tuaja.  Duke dëgjuar me vëmendje kongresistin amerikan kujtova se sa e sa shqiptarë në Amerike e neglizhojnë votimin, regjistrimin dhe për rrjedhoje mosvotimi dhe mosregjistrimi nuk është pa pasoja.  Kongresisti amerikan lirshëm dhe me humor tha se jam dhe beqar kështuqë pse jo mund të më bjerë fati me ndonjë nikoqire dhe grua shqiptare, për të cilat kam dëgjuar fjalë aq të mira.  Fjala e kongresistit amerikan u ndërpre disa herë nga duartrokitjet.

Pas Kongresistit amerikan z.Michael Grimm fjalën e ka marrë asambleisti i shtetit të Nju Jorkut z.Mark Gjonaj, shqiptari i parë i zgjedhur në këtë detyrë kaq të rëndësishme.  Z.Mark Gjonaj të befason me vëmendjen e tij dhe kujdesin që tregon për të gjitha organizatat në aktivitete të ndryshme.  Z.Gjonaj është një politikan plot perspektive dhe në se vazhdon me këtë temp, pohoj me plot gojën se e ka të sigurtë përsëri fitoren, pse jo dhe në shtëpinë e Bardhë.  Ardhja e z.Gjonaj në çdo aktivitet bashkon Diasporën dhe sjell frymë të re.  Z.Gjonaj përshëndeti të gjitha gratë pjesëmarrëse dhe me humor solli një episod nga familja e tij.  Ne vazhdoi Gjonaj duhet t’i respektojmë gratë në maksimum për kontributin e tyre, kujdesin mëmësor karshi fëmijëve, edukimin e gjithanshëm që u bëjnë fëmijeve të tyre dhe kudo.  Ato janë pasuri e paçmuar botërore.  Ishte interesante t’i shikoje dy politikanë anëtarë të partive të ndryshme dhe të respektonin dhe të cmonin njeri-tjetrin aq shumë.  Të dy së bashku, Grimm dhe Gjonaj shkuan kokë më kokë dhe takuan gratë, por jo vetëm kaq por dhe komunikuan fare thjesht me to.

Fotografët fiksonin momente të takimit të tyre me gratë.

 

Dr.Zylo Watkins, Emmie Salaj dhe Haxhire Redzovic u vlerësuan me çmime mirënjohjeje

 

Zonjusha Salije Rexha me plot profesionalizëm prezantoi zonjat para pjesëmarrësve të cilat ishin përzgjedhur nga Shoqata për t’i vlerësuar për kontributin e tyre.  Ajo lexoi një biografi të shkurter për punën e secilës, të cilën e filloi me Dr.Zylo Watkins e cila ka lindur në Tiranë dhe ka 20 vjet në Amerikë. Ka mbrojtur doktoraturën nga PennStateUniversity për letersi dhe gjuhën spanjisht.  Dr.Zylo Watkins ka dhjetë vjet që jep mësim në Universitet duke filluar me PennState, KeanUniversity, Montclair dhe së fundi është në College of Staten Island.  Përvec kësaj ajo ka një kontribut të vyer për Shkollat Shqipe në Staten Island dhe Brooklyn dhe ka përgatitur mjaft materiale për aktivitete të ndryshme si me 7 Marsin, festën e abetares, etj.  Ka bashkëpunuar dhe ka prezantuar mjaft aktivitete të rëndësishme si për festën e Pavarësisë së Shqipërisë, për çështjen e Pavarësisë së Kosovës në simpoziumin që është organizuar në BramsonORT College në Brooklyn, ku folësi kryesor ishte kongresisti amerikan Joe Di Guardi.  Ajo është vlerësuar me çertifikatë mirënjohje në Ditën e Mësuesit nga shoqata “Dibra” dhe është e fokusuar t’ju mësojë në shkollë gjuhën shqipe fëmijëve të komunitetit shqiptar që janë lindur dhe rritur në Diasporë.

Prezantimi ka vazhduar me znj.Emmie Salaj e cila punon në një korporatë lluksoze Bulgari Coorporation në Amerikë si zv/presidente e saj në Ameriken e Veriut.  Ka Master në studimin profesional në kozmetikë, marketing nga Instituti i modës dhe teknologjisë.  Ajo është në këtë kompani nga viti 2012.  Më parë ka qenë zv/presidente e marketingut për Ralf Lauren, një divizion i L’Oreal USA.  Ajo ka arritur shumë suksese në inisiativa të ndryshme si në World Polo dhe Big Pony Collegiate Tour.  Ka qenë menaxhere në disa vende dhe njëkohësisht ajo është një vizionare dhe lidere frymëzuese e kompanive ku jep vetëm rezultat.

Ajo ka vazhduar studimet e mëtejshme në Angli, Francë, Kinë dhe Tokio.  Gjithashtu ka diplomën në Anglisht dhe komunikim nga BaruchCollege.

Ajo është një anëtare aktiviste e grave ekzekutive të kozmetikës dhe është në Bordin e produkteve të kujdesit personal.

Eshtë e specializuar në kozmetikë, kujdesin e lëkurës, në media marketing, në reklama të ndryshme, në produkte e mjaft të tjera.

Ka përfunduar me zonjën Haxhire Redzovic.  Në vitet e kaluara znj.Redzovic ka ndarë historinë personale në websitin: afterall-this.com e cila qëndron për rrugët pafund të jetës përmes shpresës, frymëzimit dhe suportit.

Ajo është një grua e afirmuar.  Ka përfunduar studimet për kompjuter në BaruchCollege ku 20 vjet më parë ishte e dominuar nga burra.  Ajo ka punuar për 8 vjet në Wall Street.  Ajo filloi si instruktore e teknologjisë dhe shumë shpejt filloi menagere dhe drejtore e Wachovia Securities.  Znj. Salaj jep mësim çdo të dielë, leksione të vallëzimit dhe të këngës, rekordon episode të shfaqjes së gatimit dhe paraqitet në dokumentarët komercialë në Broadway, punon pas skenës në javën e modës së New Yorkut dhe ndryshon stilin sa më shumë të jetë e mundur.  Në 2003 ajo humbi binjakët dhe ka pasur probleme me shëndetin.  Ka qenë dy muaj në reaminacion me veshka pa funksion dhe mushkëri të sëmura, ka bërë transfuzion gjaku dhe dializë, humbi shikimin, ra në koma, dhe më vonë mësoi të ecte përsëri.  Vetëm 20% kishte shpresa shpëtimi nga doktorët.  Ajo i surprizoi doktorët, familjarët me luftën e saj dhe pozitivitetin absolut.  Në vitin 2006 ajo pati një vdekje tragjike të motrës së saj dhe të kunatit.  Ishe shumë vështirë për çdo njeri, por ajo luftoi dhe i mbajti njerëzit me shpirt dhe moral të lartë.  Ajo ka 10 vjet që punon për komunitetin, ajo mëson të rinjtë dhe frymëzon për të ecur më tej.  Të gjithë e dini që është Haxhireja tha zonjusha simpatike Rexha, por unë preferoj ta quaj mami.

 

Zonjat e vlerësuara janë përshëndetur nga Kongresisti Amerikan z.Grimm dhe asambleisti z.Mark Gjonaj.

Aktiviteti është filmuar nga Amir Suka dhe Qemal Zylo per TV Alba Life.

Pjesëmarrësit janë argëtuar nën tingujt e D.J. me drejtues z.Adriatik Çobaj.

Ishte një aktivitet tepër mbresëlënës, realizuar plot kulturë dhe elegancë, që do të mbahet mend gjatë në kujtesën e tyre.

 

9 Mars, 2014

Staten Island, New York

 

 

 

 

 

 

 

Bilbilat e Gjuhës Shqipe në Diasporë

by

Nga Kozeta Zylo/

Me një ditë të bukur plot diell dhe cicërima zogjsh në pemë ku dëgjohej një fëshfërimë e lehtë gjethesh pranë xhamave të dritareve filloi dita e parë e shkollës shqipe në Staten Island të lejuara nga Bordi i edukimit të shtetit të Nju Jorkut.  Në mjediset plot komoditet të një shkolle amerikane të cilët kanë vite që na e kanë vëne në dispozicion të mësimit të gjuhës shqipe erdhën fëmijë, prindër dhe mësues të gëzuar.  Nxënësit e vjetër grupe-grupe takoheshin dhe përqafoheshin me njeri-tjetrin, ndërsa të rinjtë shihnin plot kurreshtje përreth.

Sa shumë janë prej tyre që mezi e presin mësimin e abetares dhe të gjuhës shqipe, edhe pse në komunikim me ta ka shumë vështirësi për të folur lirshëm shqip.  Disa prej tyre kishin shkuar me pushime gjatë verës në Shqipëri dhe ata jo vetëm që kishin përmirësime, por dhe ndihej që ishin ngarkuar me një barrë këshillash nga gjyshërit e tyre.  Ja tha Edia një nxënëse e bukur me prindër nga Dibra se: mua nëna gjithmonë më thotë që unë nuk të kuptoj anglisht duhet të flasim shqip.  Po kështu dhe Fitimi një djalë tjetër plot talent më thotë se ne prindërit dhe gjyshërit në shtepi nuk na lejojnë të flasim gjuhë tjetër vetëm shqip.  Ndërsa nxënësja e re Aurora me sy gjithë dritë që u regjistrua sivjet për herë të parë kishte ardhur me vëllain Aronin dhe me gjyshen përdore.  Gjyshja e vet fisnike më tha se Aurora mezi po priste të vinte sot në shkollë dhe ndjehej shumë e gëzuar se sa shumë do ta lumturonte ajo drejtorin e shkollës, njëherazi dhe miku i babait të vet.   Të rriturit si Brian, Oresti, Marvi, Aroni, Aduson, Irsa, Andri, Rafaeli, Elio, Davit, Almira, Elsa, Edon etj…po tregonin herë në shqip dhe herë në anglisht se si kishin kaluar pushimet e verës dhe njëkohësisht mbresat gjatë dy javëve në shkollën amerikane.             Nxënëset më të vogla në moshë duke filluar me Dean, Vivian etj herë pas here vizatonin ndonjë lule në dërrasë ose ngjyrosnin në fletoret e tyre përkatëse dhe kur i mbaronin kishin mjaft dëshirë t’i shikonin punët e tyre.  Ndërsa Ari një djalë i vogël simpatik i cili u regjistrua për herë të parë kishte dëshirë të rrinte më shumë me gjyshen dhe të ndjente ndihmën e saj.

Hapja e shkollës shqipe filloi me dy himnet kombëtare shqiptar dhe atë amerikan.  Programin e shkollës Shqipe e ka prezantuar Dr.Valbona Watkins, profesore në universitet dhe drejtore e programeve të shkollave shqipe.  Paraqitja e programit të pasur ku përfshihen dhe aktivitete kulturore për të ruajtur traditën shqiptare u mirëprit me duartrokitje nga të gjithë të pranishmit.

Nxënësit, mësuesit dhe prindërit i ka uruar sopranoja e shquar shqiptare Lindita Mezini Lole njëkohësisht mësuese e muzikës në Nju Xhersi e cila së bashku me pianistin e talentuar, prof.Petrika Melo kanë dhënë një kontribut tepër të vyer në shkollat shqipe.  Ndërsa z.Qemal Zylo themeluesi i shkollave dhe president i TV Alba Life iu ka uruar gjithë nxënësve mirëseardhjen dhe ndërkohë ka prezantuar mënyrën e organizimit të shkollave shqipe në Staten Island, Brooklyn dhe më gjerë.  Z.Zylo vlerësoi punën e palodhur të mësueseve që do të japin mësim këtë vit si: Valbona Kostrista, Ornela Melo, Dita Kacubaj, Mimoza Salillari dhe mësueses më të re në punë znj.Liza Pëllumbi të cilat janë dipllomuar në Shqipëri si mësuese dhe disa prej tyre janë në proces për konvertimin e diplomës së tyre nga Bordi i edukimit të Nju Jorkut.  Eshtë tejet emocionante të ndodhesh pranë nxënësve, është ngazellyese t’i shikosh me abetaret shqip përpara duarve të tyre, por ndërkohë nuk ke se si të mos mendosh se sa shumë punë kemi për të bërë përpara.  Kjo për vetë faktin se ka shumë fëmijë në Diasporë që asimilohen, nuk flasin fare shqip .  Dhe kjo duhet të jetë problem i ditës për qeveritë shqiptare dhe të Kosovës, për gjithë organizatat në Diasporë, duke i lënë pritjet dhe përcjelljet plot bujë që ju bëhen qeveritarëve, por ato pritje të kthehen në punë, të kthehen në ndihmë për shkollat shqipe.  Do të dëshiroja të shikoja një qeveritar, nje kryeministër, një president, të ulej pranë bankave të shkollës, apo të merrte shkumësin në dërrasë dhe t’ju shkruante fëmijëve shkronjat shqipe, ashtu siç ka bërë senatori amerikan Golden i cili do të ngelet gjatë në kujtesën e nxënësve.  Do të dëshiroja që një ditë të inagurohej një godinë e shkollës shqipe ku të mësohej çdo ditë rregullisht shqip ashtu siç i kanë shumë komunitete të fuqishme në Diasporë, si hebrenjtë, rusët, kinezët, grekët, ndërsa ne na shkoi jeta me qera në shumë fusha kryesore.

Kjo gjuhë e Shqipërisë që është dhe gjuhë e Perëndisë siç thotë Naim Frashëri do një bashkëpunim dhe vëmendje tejet të posacme për t’i thënë: Stop asimilimit të Gjuhës Shqipe!  Me sa duket atë do ta bëjnë vetëm Bilbilat e Gjuhës Shqipe në Diasporë.

21 shtator, 2013

Staten Island, New York