kryeministri Rama – Page 3 – Dielli

KRYEMINISTRI RAMA SHPALOS”SUKSESET” E QEVERISJES… FULLANI NUK VARET NGA QEVERIA

August 21, 2014 by dgreca

“Nuk do bëj asnjë bilanc imagjinar. Por as nuk do të shmang problematikat. Do tregoj se qeveria po mban angazhimet një e nga një dhe se do përpiqet të rrisë cilësinë në cdo aspekt të jetës së shqiptarëve”. Këto ishin disa nga fjalitë e kryeministrit Edi Rama në konferencën e paralajmëruar për shtyp ku premtoi se do u përgjigjet të gjitha pyetjeve që i janë bërë online. Kryeministrit Rama ka nisur konferencën e tij njëherësh në TV, Twitter&Facebook.
Vijoi fjala me fusha si Ekonomia, Punesimi, Arsimi, Shendetesia, qëndrimi për Presidentin, BSH, opozitën, kryetarin e Bashkisë.
Një përgjigje e kryeministrit erdhi dhe për situatën në Bankën e Shqipërisë pas vjedhjes së thesarit. Sipas kryeministrit, nëse qeveria do të ndërhynte në situatën e BSH do të bënte një faj të madh sepse do të ndërhynte në punët e një institucioni të pavarur, pjesë integrale siç tha ai, e organizmave ndërkombëtare. Nëse kryeministri do kërkonte shkarkimin e Fullanit nga Guvernator, kjo do ishte një kërkesë në boshllëk, njësoj si t’ja kërkonte Presidentit të Reublikës, gjë që sërisht Rama tha se është e pamundur. Kryeministri shtoi se vëmendja mbi situatën në BSH është maksimale dhe është një sfidë për qeveriën dhe Kuvedin.

BSH-FULLANI
Rama: BSH e pavarur, t’i kërkoj dorëheqjen Fullanit, njësoj si t’ja kërkoja Presidentit
Pyetjes nga paneli i gazetarëve, lidhur me vjedhjen në Bankën e Shqipërisë dhe nëse si kryeministër a do i kërkonte dorëheqjen guvernatorit Ardian Fullani, Rama u përgjigj se Banka e Shqipërisë është një institucion apolitik, tërësisht i pavarur si Presidenca, Gjykata Kushtetuese etj. Ja pergjigja e plote:
“Sa i përket Bankës së Shqipërisë ne nuk kemi heshtur, por nga ana tjetër, ka një ndryshim të rëndësishëm mes qeverisë dhe shoqërisë civile në këtë rast se rolet janë të ndryshme dhe përgjegjësitë janë të ndryshme. Qeveria ka një rol dhe përgjegjësi të posaçme në këtë rast. Kush është ne e kemi thënë qartë dhe prerë në prononcimin e Këshillit të Ministrave se për ne, ky është një akt kriminal i rëndë që përbën një sfidë të trefishtë, sfidë e madhe për prokurorinë që ti shkojë hetimit deri në fund dhe jo në rrugën tradicionale të atyre hetimeve që nuk përfundojnë asnjëherë, por hetim gjithëpërfshirës dhe të nxjerrë nga pikëpamja e vet çdo përgjegjësi. Është në sfidë e madhe padyshim për autoritetin e Bankës dhe për sigurinë e bankës që dua t’jua them qartë dhe prerë është një institucion i pavarur.
Pse s’më pyesni pse nuk i kërkon dorëheqjen kryetarit të Gjykatës Kushtetuese, asaj së Gjykatës së lartë, të Apelit e me radhë. Mund të kem shumë arsye ndonjërit apo tjetrit, do i marr si shembull për ti kërkuar dorëheqjen, por çfarë do të thotë kjo. Si kryeministër s’mund ti kërkoj dorëheqjen kryetarit të një institucioni të pavarur. E para, por nga ana tjetër është një sfidë e madhe për Kuvendin e qeverinë. E kemi thënë qartë në cfarë kemi shkruar e zeza në të bardhë në prononcimin e Këshillit të Ministrave që do të thotë se Kuvendi e qeveria do analizojë, po ndjekim ditë pas dite zhvillimin e asaj situate deri në bashkëpunim të ngushtë me institucionet ndërkombëtare se BSH është pjesë e institucioneve integrale ndërkombëtare që të dalim në konluzionet e duhura. Kjo është një përgjigje që nuk do gëzojë shumëkënd se donte të thoja, që Guvernatori të japë dorëheqjen, por duhet ta kuptojë së kjo do ishte një thirrje në boshllëk.
Pse s’më thoni, a duhet të japë dorëheqjen Presidenti i Republikës?
Për më tepër është e rëndësishme të kuptoni një gjë, ne e kemi të domosdoshme të godasim në shenjë dhe plotësisht në shenjë duke nxjerrë konkluzion të saktë dhe në mënyrë që të mos hyjmë në luftë politike me BSH. E përsëris që është institucion tërësisht i pavarur. Eksperienca me banka të tjera në botë ka treguar që janë eksperienca tërësisht të hidhura për politikën dhe shoqërinë. Nuk i heq asnjë presje shqetësimit tuaj, legjitimitetit të shoqërisë civile dhe gjithë këtij shqetësimi që është krijuar nga një ngjarje absolutisht e rëndë që duhet trajtuar nga ne me vëmendje maksimale dhe kujdes maksimal. Në fund më lejoni tju them që duket shpesh që gabimisht sikur, qeveria duhet të flasë e para, qeveria duhet të flasë e fundit kur është fjala për raste të kësaj natyre se ndryshe mund të bëjë gabim shumë të madh për të ndrequr një gabim të madh, mund të bëjë një faj shumë të madh për të ndrequr një faj të madh”.
Kurse pyetjes se, nëse keni ndonjë opsionin për të ndryshuar kupolën drejtuese të BSH sipas gjykimit tuaj, Rama u pergjigj: Pavarësia në letër të mos bëhet shkak për pandëshkueshmëri
E kam përsëritur deri në mërzi dhe tani jeni familjarë me qasjen, se nuk janë njerëzit që korruptojnë sistemet por sistemet që korruptojnë njerëzit. Të konkludojmë në sistemet më të mira, të ndërhyjmë te kjo, në mënyrë që sistemi të garantojë se njerëzit janë nën kontroll. Ne nuk kemi asnjë arsye, pse të tutemi dhe të ngurrojmë. Parafytyroheni sikur të kishim ndërhyrë, jo shoqëria por institucionet të reagojnë në të njëjtën formë dhe të shkojnë në të njëjtin drejtim do kishin më shumë drejtësi, shoqëri më të mirë, apo do kishim nxjerrë sytë për të vënë vetullat dhe unë gjithmonë kam besuar dhe jam detyruar ti qëndroj këtij besimi se nuk vjen një e mirë duke bërë një gabim, nis një gabim mundohemi ta korrigjojmë më një tjetër, Një shkelje ligji mundohemi ta korigjojmë me një shkelje tjetër ligji. Nëse ne përdorim sot forcën e kartonit për të bërë një goditje që është e paligjshme atëhere ku është problemi? Te ligji në radhë të parë. Ku, cfarë duhet të ndryshojmë në këtë ligj, cfarë duhet të ndryshojmë në sistem dhe pjesë e sistemit është Këshilli Mbikqyrës i BSH. Dhe të shohin cfarë nuk ka funksionuar dhe cfarë duhet të funksionojë ndryshe dhe të bëjmë gjthcka.
Nuk kam arsye të thënë e të pathënë që thonë se duhet të japë dorëheqjen Guvernatori, por nga pozita e Kuvendit e Qeverisë duhet që të hedhim cdo hap në funksion të konsolidimit të mekanizmave të BSH, që pavarësia në letër të mos bëhet shkak për pandëshkueshmëri dhe që pavarësia të jetë e garantuar dhe që jo cdo qeveri të bëjë cfarë të dojë me BSH, kjo do ishte katastrofë
DEKRETET E PRESIDENTIT
Rama: Dekretet do kthehen mbrapsht
Kryeministri Edi Rama i është përgjigjur pyetjes së gazetarëve sa i takon rrëzimit të tre dekreteve nga Presidentit i Republikës. Sipas Ramës, Presidenti përfaqëson zërin e Partisë Demokratike, pasi nxjerr po të njëjtat argumenta. “Nuk e besova dje që Presidenti kishte mbledhur të zgjedhurit vendor për ligjin e ndarjes së re administrative. Ndaj pata përshtypje se zyra e Kryeministrisë kishte patur ndonjë gabim teknik në printim dhe pse mu duk absurde se Presidenti takon të zgjedhur dhe i thotë sesi ju duket kjo gjë.
Presidenti ka të drejtën e tij të kthejë ligjet, por ta dijë se do i kthehet mbrapsht çdo dekret, menjëherë pa humbur kohë, me argumentet e PD që vijnë nga goja e tij. Qoftë ligji për Policinë e Shtetit, për KLD-në, për Magjistraturën, ishin të gjithë argumentat e PD. Kjo është e ripërsëritur dhe për ta ardhur keq. Koha që nga kjo godinë hidheshin gjyle balte mbi presidentin dhe institucionin kanë vdekur bashkë me qeverinë që iku në 23 qershor. Ne nuk sulmojmë Presidentin e Republikës, pasi ai është i pari që sulmon qeverinë në këto 23 vite. Tani kemi president që sulmon qeverinë, dekretet do kthehen menjëherë”
SKANDALI NË SARANDË
Rama: Turp, por rast individual
Skandali në Sarandë, Rama: Turp, por rast individual. Por dhe Noka e Topalli ndërhynin për punësimTIRANE- Kryeministri i vendit, Edi Rama e ka cilësuar një akt të turpshëm skandalin e zbuluar nga News24 e BalkanWeb në zyrat e punës në qytetin e Sarandës, ku sekretari i deputetit të Partisë Socialiste, Koço Kokëdhimës, Argon Cana, i kërkoi favore seksuale një gruaje dhe vajzës së saj të mitur, në këmbim të një vendi pune. Sipas Ramës, ky është një rast individual, dhe se nuk duhet të gjykohet qeveria në lidhje me këtë skandal. Më tej ai shtoi se qëndrimi i qeverisë ka qenë i qartë dhe i menjëhershëm, siç ishte arrestimi i Canës, heqja e tij nga zyrat e Punës, madje dhe largimi nga strukturat e PS-së.
“Nuk ka turp më të madh sesa turpi që pamë, por nuk ka po ashtu dhe turp më të madh për gjithë ata që shohin sesa ta ripërtypin atë turp ta përtypin se i bëjnë opozitë qeverisë, apo duke u përpjekur që rastin ta përgjithësojnë. Është një përgjegjësi konkrete dhe njësoj si në rastin e parë që folëm, qeveria nuk gjykohet se nga çfarë ndodh individualisht me një person në territor apo qeveri, që në përgjegjësi individuale shkel normat ligjore apo ato etike të bashkëjetesës. Qeveria gjykohet se si reagon ndaj rastit. Reagim i ynë ishte i qartë dhe i prerë si asnjë herë më parë. S’dua të hyj në këtë temë, pasi është e neveritshme.”-tha Rama.
Më tej Rama risolli në vëmendjen e të gjithëve, një rast të ngjashëm që ka ndodhur në Shqipëri, ku në qendër të skandalit ishte Ylli Pango, ish-ministër i Kulturës asokohe. “Të gjithë e kujtoni se si u abuzua me një detyrë shumë më të lartë, për një vend pune dhe abuzuesi u mbrojt denoncuesit konkretisht media qe e denoncoi u sulmua dhe u çua deri përpara detyrimit për të pagur gjobë. Dhe abuzuesi u kthye shtatlartë në një detyrë të lartë. Ndërkohë, rasti për të cilin flasim është krejt i qartë për të bërë diferencës, policia e arrestoi, zyra e deputetit u distancua dhe e dënoi aktin dhe PS e përjashtoi nga radhët e anëtarëve të vetë. Ne nuk jemi të ndarë në engjëj dhe djaj. Kjo është një ndarje që mund të jetë në kokën e atyre që vinë dhe janë ende nëpër këmbët tona. Ne jemi të gjithë shqiptar, në të gjitha. Dallimin me ta e kemi parë, pasi besojmë në vlera dhe parime, të cilat janë ato që duhen për të ecur para. Ndaj ne jemi alternativa më e mirë.”-shtoi Rama.
Më tej Rama theksoi se nuk është e habitshme që një deputet në Shqipëri, apo dhe në gjithë vendet e tjera të rajonit të ndërhyjë në forma të ndryshme për të mundësuar punësimin e atyre që kërkojnë punë. Rama solli në vëmendje rastin e emërimeve që bëheshin gjatë qeverisë së kaluar, duke përmendur kështu deputetet Jozefina Topalli, apo dhe Flamur Nokën, sipas të cilit emërimet për punë i bënin me shkresa partie.
“Çdo deputet duhet të ketë zyrë. Në zyrën e çdo deputeti duhet të priten njerëz që ankohen dhe bëjnë kërkesa. Dhe unë e kam një zyrë në Vlorë, por se kam me aq persona, pasi skam mundësi financiare. Nëse nevoja është e madhe, atëherë duhet. Kush nga ju në këtë vend, nuk mund të më thotë se dikush shkon në zyrën e deputetit për punë. Pro ama dhe këtu gjykimi është se kush i bën punësimet, deputetet apo administrata. Deputetet kanë ndërhyrë dhe do ndërhyjnë për të ndihmuar njerëz apo ndërmjetësuar. E rëndësishme është që sa kjo mbetet në kufirin e detyrimit politik dhe sa e kalon kufirin. Kalimi i kufirit është i paarsyetueshëm. Ka pasur deputeti si Jozefina, Noka, që çonin shkresa për emërime. Ku janë këta?! Ranë nga qielli?! Ja pra, janë ata që flasin sot. kemi pasur disa debate me disa degë të PS, të cilat thoshin që këtë do e çojmë këtu, e këtë aty. I kemi thënë se kjo nuk është detyra juaj. Ne do gjykohemi në fund të 4 viteve, dhe jo kur nuk është bërë asnjë vit ende. Duhet ti ndajmë gjërat. Unë besoj, se siç meriton neveri rasti konkret, meritojnë neveri për rastin konkret, për ata që thonë se po na diskriminojmë për të”-përfundoi Rama.
OPOZITA
Rama: Opozita më llafazanë në këto 23 vite
Kjo është opozita më llafazane e këtyre 23 viteve në Parlament. Kështu e komentoi Rama marrëdhënien e qeverisë me opozitën, duke sqaruar dhe heshtjen e tij.
“Besoj se rastet e ushtrimit të dhunës verbale apo fizike, si kulminacion në Parlament nuk meritojnë asgjë tjetër përveç dënimit. Unë dhe ne i kemi dënuar moralisht, por dhe sipas rregullores së parlamentit, pa parë majtas-djathtas të gjithë ata që janë përfshirë në rastet e dhunës dhe në sjellje që nuk i bëjnë asnjë nder Kuvendit dhe popullit shqiptar. Do dëshiroja që raste të tilla të mos përsëriten, por ku ndodhin përgjegjësia është individuale, dhe ajo që i takon shumicës është të sillet me këtë përgjegjësi individuale të sillet me përgjegjësi. Opozitë me llafazane se kjo dhe më prezente me llafe në gjithçka që përfshihet ky popull thashetheme nuk ka, dhe përpjekje për ti mbyllur gojën nuk ka. Opozita është futur në një proces vetëposhtërimi, dhe i mungon një strategji pa platformë dhe pa projekt. Kjo opozitë nuk ka asnjë projekt politikë, dhe vjen e xhiron në boshllëk duke akuzuar. Është një opozitë në hall të madh, dhe halli nuk jemi ne. Mjafton të merrni librin e protokollit të parlamentit, ajo opozitë ka më shumë minutash llafesh me shumë se ndonjë opozitë tjetër.

TURIZMI
Kryeministri e hapi konferencen me temen per turizmin. Sipas tij, numri i turisteve eshte rritur me 14% krahasuar me nje vit me pare.
“Dëshiroj ta filloj nga besoj sektori më i rëndëssihëm në këtë fazë që është turizmi. Nuk do bëj bilanc imagjinar dhe as të bazuar në hyrje e daljet në Shqipëri. Por duke iu referuar vetëm numrit të vizitorëve të huaj, jo rezidentë në Shqipëri, kemi deri tani një rritje të turistëve me 14%, krahasuar me një vit më parë dhe jorezidentë me 1 milionë e 300 mijë, shifër e konsiderueshme, duke pasur parasysh se vendin e preku moti i keq në muajin korrik apo dhe më specifikinë e muajit të Ramazanit. Nuk dua të fsheh problematika të fshehura e të trashëguara, këtë sezon arritëm të kemi plazhe të pastra krahasuar me një vit më parë duke angazhuar një sërë forcash, Forcat e Armatosura që dhe ministrja i kushtoi kohën e vet, tek institucionet publike dhe një numër i vyer vullnetarësh nga Shqipëria e Kosova”.
Sipas Ramës, qeveritë e mëparshme nuk mori përsipër të luante asnjë rol udhëheqës dhe koordinues, duke lejuar që pisllëku dhe ujërat e zeza të bashkëjetojnë me gjithë ata që jetojnë në vijën bregdetare dhe ata që vinë për pushime. “Ka disa muaj që po përgatitet një program i posaçëm, me burime financiare të huaja për të kuruar plagën e madhe të ujërave të zeza në vijën bregdetare, siç është Durrësi apo Himara, e cila përbën një nga pikat më të forta të Jonit. Praktikisht gjendja është alarmante, pasi nuk kemi kanalizime të ujërave të zeza. Po ashtu problem i rëndë është dhe problemi i ujit të pijshëm në zonat bregdetare. Qeveria e kaluar jo vetëm nuk e zgjidhi, por e rëndoi këtë problem edhe më keq.
Nga ana tjetër, ne kemi pasur plazhe shumë të pastra, por nuk kemi zgjidhur problemin e mbetjeve. Ky është një problem që është i trashëguar për shumë vite, dhe nuk mund të zgjidhet brenda 300 ditëve. Ndaj kemi vënë në punë, hartimin e një plani për grumbullimin e mbetjeve. Vazhdojmë të jemi përballë krimit mjedisor, vazhdojmë të shohim që ky është një krim që nuk është vënë ende në kontroll. Ligji i ri që kemi kaluar për Policinë e Shtetit, përfshi dhe policinë e shtetit në këtë aktivitet, do vazhdojmë të shtrëngojmë masat të reja. Në protokollin e Policinë së Shtetit, lidhur me krimin mjedisor do jetë gati në shtator një plan. Sot, jemi përballë një bilanci barbarie vendore të pashembullt dhe të pakrahësuar me vendet e Evropës. Kjo është barbaria e një sistemi vendor, ku ka sunduar korrupsioni dhe barbaria ndaj interesave të territorit.”-tha Rama.
Problem Rruga në hyrje të Pogradecit
Megjithatë kryeministri nënvizoi problematikat në këtë sezon turistik dhe sic theksoi ai, këto janë trashëguar nga qeveria paarardhëse.
“Agjencia Kombëtare e Bregdetit ëshë vënë e tëra në shërbim dhe pse me një numër të vogël njerëzish për rehabilitim zonash. Pamja e përgjithshme është pozitive, por nuk lë vend për asnjë lloj triumfalizmi dhe nuk na shtyn në bilance imagjinare. Problematikat janë ende aty, një e rëndë është një sërë aksesh kombëtare që vazhdojnë të jenë të hapura, puna për të cilat vazhdon me ritme të ulëta sepse jemi në gjendjen kur duhet të mbushim gropën e madhe të borxheve që vendosën kompanitë në situatë të vështirë. Kam parasysh rrugën e Pogradecit, si një rrugë tipike të asaj që na la pas qeveria e deridjeshme përbëjnë një arsye të fortë për të mos qenë tërësisht të kënaqur. Ky është një problem i madh financiar që po e trajtojmë qoftë me FMN, qoftë me BB sepse mungon në buxhetin tonë masa e parave që të mbyllim këto rrugë, për shkak që qeveria paaradhëse i celi me orgjinë e financave pa marrë parasysh fondet që kishte në dispozicion”.
RENDI
Një ndër pikat që kryeministri Rama u ndal gjatë konferencës së tij, padyshim është dhe rendi në vend. Sipas Ramës, gjatë periudhës së verës, Policia e Shtetit bëri të mundur mbarëvajtjen e sezonit turistik me të gjitha mjetet e mundshme.
“Pika e dytë nuk mund të mos jetë rendi. Në muajt e verës rendi rëndohet. U angazhuan 2388 punonjës policie, 201 automjete, 17 mjete lundruese dhe 1 helikopter, për mbarëvajtjen e sezonit turistik. Në këtë shërbim që u pilotua dhe do jetë i strukturuar vitin e ardhshme, u angazhuan 100 efektiv nëpër vijën bregdetare. U siguria një monitorim nga ajri me anë të helikopterit i akseve rrugore, për rritjen e sigurisë dhe garantimin e trafikut. Ra në mënyrë drastike kontrolli në kufi. Puna ne policisë u struktura në mënyrë të tillë që mos të pengohej kalimi në kufi.”-shtoi Rama.
Shifrat e vrasjeve
Duke u ndalur tek situata e rendit në vend, kryeministri Edi Rama theksoi se numri i vrasjeve, duke e krahasuar me vitin e kaluar ka qenë më i ulët. Sipas Ramës, edhe numri i aksidenteve rrugore ka pësuar një ulje me 23 për qind.
“Nuk dua të flasin për shifra sa i takon vrasjeve. Kemi 30 për qind më pak vrasje se në të njëjtën periudhë të 2013, të cilën do ta përmirësojmë akoma më shumë. Tregon se ka një përmirësim të ndjeshëm në këtë aspekt, siç ka një përmirësim të ndjeshëm të vjedhjeve me dhunë apo me armë në zonat turistike që janë rreth 75 për qind më pak se vitin e kaluar. Krahasuar me vitin e kaluar kemi 23 për qind aksidente me pak, 29 viktima më pak, dhe 39 për qind më pak të lënduar nga aksidentet. Kjo lidhet fort me punën e Policisë së Shtetit, sesa lidhet me gjendjen e trashëguar të akseve rrugore.”-bëri me dije kryeministri Rama.
Më tej Rama shtoi se: “Numri i mjeteve të ardhura nga jashtë ka një rritje të qenësishme, krahasuar me një vit më parë. Pushuesit mund të pohojnë dhe vetë se ka një qetësi publike dhe gangrenat e muzikës në këto ambiente janë hequr. Jo se është arritur maksimumi, por është ulur numri i subjekteve që kanë prishur qetësinë e pushuesve pas orarit të caktuar. Problematika vazhdon të jetë e qartë, kemi një polici që është me nivelin më të ulët arsimor në rajon. Kjo sjell si rezultat dhe një nivel sjellje, sado i përmirësuar lë ende për të dëshiruar. Por, jemi besimplotë se puna e bërë në fazën e parë të qeverisjes me anë të rekrutimit të 1 mijë punonjësve që po kalojnë në dy faza në Akademinë e Rendit, do na jap rezultateve jashtëzakonisht të tjera, kur vjen puna tek komunikimi dhe standardet. Problem vazhdon të ngelet numri i policive të angazhuar në territor. Shtimi i numrit është i kushtëzuar për shkak të shpenzimeve tona financiare. Do vazhdojmë të mbështesim transformimin e Policisë së Shtetit.”.
Teknologjia
Kryeministri Rama theksoi se shumë shpejt do të konkretizohet një projekt, në bashkëpunim me Ministrinë e Brendshme. Me anë të këtij projekti do të forcohet bashkëpunimi mes Policisë së Shtetit dhe qytetarëve.
“Një çështje tjetër është teknologjia. Jemi afër një konkretizimi të një teknologjie nga ana e Ministrisë së Brendshme që të fusim në funksion një projekt të ri, që do transformojë marrëdhëniet mes policisë dhe qytetarit. Monitorimi me kamera do vihet në Tiranë dhe pas shumë vitesh do shpëtojmë nga figura e policit në semaforë.”-tha Rama.
Energjia
Ndërprerja e energjisë elektrike vijon të jetë problematike në zonat turistike dhe jo vetëm. Ky fakt u konfirmua dhe nga vetë kreu i Ekzekutivit, Rama.
“Ka qenë një vit i vështirë, trashëgimia është e tmerrshme. Ndërprerjet e energjisë kanë shoqëruar çdo vit sezonin turistik. Janë kryer remonte në gjithë zonën bregdetare, i cili ka qenë 100 për qind më i lartë sesa vitin e kaluar. Gatishmëria teknike ka qenë e plotë, ka pasur raste ndërprerje energjie, por skuadra speciale në ndihmë të pushuesve ka arritur të ndërhyjë në kohë. Problematika është ajo që dimë, vazhdojmë të kemi vjedhje të energjisë elektrike”-tha kryeministri Rama.
EKONOMIA
Sipas kryeministrit Rama niveli i investimeve të huaja është rritur për shkak të politikave qetësuese të qeverisë. “Janë rritur nivelet e zhvillimit ekonomik dhe investimet e huaja. Qeveria është e përgatitur të zbatojë politika qetësuese, siç ishte sektori i manifakturës apo ai i bujqësisë. Programi do shtjellohet në muajin shtator. Një rol të rëndësishëm luan aspekti i rritjes së sigurisë, përmes indikatorëve. Ka rritje të besimit të konsumatorit tek ekonomia. Kemi një rritje të konsiderueshme të eksporteve, e cila dëshmon rritje të besimit.”-shtoi Rama.
Kemi pasur 100 milionë dollarë më shumë të mbledhura. Dhe 12 Gushti ku Mood’s nxorri raportin tjetër konfirmoi rezultatin si mbi masat e marra nga qeveria si dhe nismës për të paguar të gjitha borxhet ndaj biznesit. Po i qëndrojmë një për një të gjitha angazhimeve tona.
Problematika vijon ende për ne, për të lehtësuar më shumë sipërmarrjen dhe rrugën e bërjes biznes në Shqipëri dhe burokracia, mbetet problem serioz i trashëguar. Do bëjmë ndërhyrje të reja në ligjin për administratën publike. Nuk do ketë më nga ato raste ku unë iki në kafe dhe ligji nuk më prek se jam i paprekshëm.
Punësimi
Vijmë të punësimi, temë e debatuar se dhe këtu shifrat janë të limituara se janë në llogaritë e shtetit. Ka llogari tatimore ku janë shifrat dhe zyrat e shumë anatemuara të punës dhe deri më sot kanë ndërmjetësuar e siguruar punësimin e 10 359 persona të papunë. Bëhet fjalë për ata që kanë hyrë në zyrat e punë në punë, por ka të tjerë që kanë hyrë në punë jo përmes zyrave të punës.
Financimi për programin e punësimit do rritet. Lufta ndaj ilegalitetit në punë po vijon intensivisht dhe vetën për qershorin tatimet kanë regjistruar mbi 1 mijë punonjës që mbaheshin ilegalisht në punë.
Problematika është e qartë dhe aty. Administrata përbën një pengesë serioze në rrugën e zhvillimit, por dhe se ende nuk kemi kritere për performancën e punonjësve në punë. Të gjithë punonjësve të tatimeve e doganave do i nënshtrohen provimeve dhe nga ana tjetër do investojmë në mënyrë intensive në rritjen e rrogës kundrejt meritës.
Te financat jemi shumë më lart në mbledhjen e të ardhurave dhe shumë më lart në kontrollin e shtetit mbi aktivitetin financiar dhe kemi kërkuar dhe do kërkojmë me këmbëngulje që prokuroria të luftojë të gjitha punat e evazionit dhe posacërisht evazionin me skemat e TVSH. Është arrestuar një grup i tërë personash që përdornin skema mashtruese me TVSH. Sigurisht ka ende shumë për të bërë. Burimet e reja të rritjes janë dhe burimet ku duhet të shkojnë paratë.

ARSIMI
Sipas kryeministrit Edi Rama për here të parë këtë vit mbi 24 mijë maturantë plotësuan formularin A2, dhe për herë të parë kishin të qartë institucionin ku mund te vijonin studimet, jo si me parë ku shkonin pas ‘berihajit nëpër gropat e zeza që qelbnin vendin dhe për të cilat askush nuk bënte asgjë’.
Rama sqaroi se debati i kuotave është i fryrë, pasi janë respektuar kërkesat e universiteteve, duke ulur me 2800 kuota është e bazuar në kritere shumë objektive, lidhur nga numri shumë i vogël i studenteve në disa programe dhe mesatarja qesharake e studenteve në to. Sipas Ramës, mbyllja e disa universiteteve ishte domosdoshmëri për shkak se nuk plotësonin kriteret më minimale. “Për të dal nga gropa duhet të mos e diskutojmë që jemi në gropë. Gjatë analizës se pse janë reduktuar kuotat e studimit, kanë dal se 25 programe kanë më pak se 10 student. 14 programe kanë student me notë mesatare 5.5. ndaj ulja me 2800 kuota mes kërkesës dhe asaj që ka propozuar MAS është shumë e menduar.”-tha Rama.

Investimet
Duke u ndalur tek investimet në sektorin e infrastrukturës, Rama theksoi se gropa financiare e trashëguar nga qeveria e kaluar nuk lë hapësira për investime strategjike, siç është Korridori i Kaltër, aks i cili do lidh Kroacinë, Malin e Zi dhe Shqipërinë, përmes Mesdheut.
“Kam dëgjuar shpesh herë se pse nuk bëhen rrugë të reja. ajo politika rrugë rrugë, jo vetëm ja humbi rrugën Shqipërisë, por dhe e la rrugëve. Kjo ka lidhje me paratë, ka lidhje me gropën që kanë në çdo rrugë ata që ishin më përpara, se nuk i mbuluan rrugët me financim. Ne duhet të gjejmë burimin e financimit. Fondet që kemi në dispozicion qoftë nga FMN dhe donatorë të tjerë, do i vëmë në dispozicion të qeverisë së re, duke nisur nga qendrat që rrisin dhe cilësitë e jetës së periferive. Në3se qeveria e mëparshme hodhi para për të investime për fushata, ne po investojmë për herë të parë në zemrat e zonave ekonomike, në qytetëset dhe aty ku janë komuna që3 janë burimi kryesor i rritjes ekonomike.
Kjo nuk do të thotë se përjashtojmë të tjerët, por stimulojmë zhvillimin. Po investojmë për Elbasanin, Durrësin, Beratin, Burrelin. Investimet që kanë nisur në Elbasan janë të një niveli me më shumë se 20 vite bashkë. Lushnja, vite të tëra pa asnjë investim të rëndësishëm. Po punojmë për disa projekte strategjike, dhe jemi pranë për një marrëveshje për rrugën e Arbrit, dhe shpresojmë që kjo rrugë të përfundoj me sukses për financimin. Projekti tjetër që është një projekt më shumë sesa investim, është Korridori i Kaltër është praktikisht aksi që do të përfshijë pjesën jugore të Kroacisë, Malin e Zi, dhe Shqipërinë në aksin turistik mesdhetar. Këto segmente të ngelura bëjnë bashkë një segment. Ky është plani i madh që nuk realizohet me buxhet, pasi nuk jemi aq të marrë.”-tha Rama.

Pyetje te tjera nga gazetarët

Nuk përmendet shëndetësinë. A do të ndodh e njëjta gjë dhe për spitalet siç u bë dhe për universitetet?
Gjatë sezonit turistik, një rol të rëndësishme luajti dhe sistemi shëndetësor, duke vënë dhe qendra shëndetësore afër pushuesve. Jam i vetëdijshëm që ka ende shumë për tu bërë. Shëndetësia është një sektor me shumë probleme, por gjerat kanë nisur në drejtimin e duhur, siç është QSUT. Ndërkohë, angazhimi ynë është i qartë, pasi do kalojmë në një sistem shëndetësor, jo sipas xhepit, por sipas nevojës do japim shërbimin tonë. Në këtë sektor, nuk është kaq e thjesht dhe e shtruar rruga e eksperiencës dhe e mundësive të mbështetjes nga institucionet ndërkombëtare. Padyshim që në shëndetësi kemi një problem serioz të trashëguar, që është ryshfeti. Dhe për këtë arsye, ky sesioni i ri ku kryefjala do jetë antikorrupsioni në të gjithë sektorët, përmes goditjeve të fenomenin dhe goditjeve të personave të përfshirë në korrupsion, do ketë një proces që do nis dhe do përfshijë të gjithë qytetarët të luftojnë korrupsionin.
Nga radhët e Partisë Socialiste është kërkuar dorëheqja e Kryetarit të Bashkisë së Tiranës. A e ka një emër konkret kryeministri, për këtë post? Jemi përballë një fakti të thjesht dhe të qartë. Kryetarin e Bashkisë e ka zgjedhur gjykata. Kryetari është angazhuar se do ishte në shërbim të qytetarëve, dhe ndërkohë, jo vetëm merret vetëm me politikë e ka lënë Tiranën në rënie të lirë. Dhe rasti që diskutohet këto ditë është rasti spektakolar i një dyfytyrësie; dëgjoni çfarë them unë mos bëni ç’bëj unë
Çfarë prisni nga Konferenca e Berlinit?
Ne jemi në vitin e parë të një Ballkani ku nuk ka asnjë konflikt të hapur dhe jemi në 100 vjetorin e Luftës së Dytë Botërore dhe është një hapësirë e re për zhvillim. Gjëja që është kuptuar nga të gjithë është se kemi një,horizont mundësish. Kemi një rrugë të vështirë, pasi njerëzit në Shqipëri nuk kanë mundësi të presin pafundësisht dhe nuk mund të ushqehen me kapitujt e integrimit,. Duhet të jemi pjesë e Evropës, ndaj dhe ftesa e Kancelares vjen si bazë e kësaj situate. Rajoni si i tërë nuk pret, siç është Korridori i Kaltër, duhet të ketë mbështetje financiare. Kjo është ajo çka jemi përpjekur të themi gjatë gjithë kohës. Dhe kursi i politikës sonë të jashtme ka qenë kjo kryefjala. Jemi në një stacion ku duhet të jemi të gëzuar, por duhet të hapim një proces të ri të marrëdhënieve të reja me BE.
Nëse NATO do ndërhyjë kundër ISIS në Afganistan, a do të marrin pjesë dhe forcat e qeverisë shqiptare?
Ne do të bëjmë gjithçka që na takon, pasi ne jemi një pjesë e NATO dhe nuk jemi prapashtesë e rastit, Dhe do marrim përsipër gjithçka, Do ndihmojmë dhe do marrim pjesë, por se si kjo është një çështje që do varët nga mundësitë tona.
A ka trafikantë e kriminelë në Parlament?
Të flas për grupin parlamentar të PS para se të përpilonim listën kemi kërkuar dëshmi penaliteti. Dhe dëshmi penaliteti janë ato që kush sot ka bërë cfarë dhe kush është i pastër apo i papastër në drejtësi. Kush është i gatshëm të shtojë të tjera, unë nuk kam arsye të besoj asgjë nga ato broçkulla që thotë opozita.
Kompleksi te Liqeni, cfare mendoni per projektin e kullave 17 kate te Bashkise se Tiranes?
Ai nuk është parku te liqeni por vendi ku u betua kryetari aktual i Bashkisë së Tiranës që tha se do jetë një fushë ku të luajnë fëmijët, të rinjtë e madje dhe pleqtë.(Kortezi: news 24, BalkanWeb)

KRYEMINISTRI RAMA I SHMANGET MARRJES ZYRTARE TË PETICIONIT

May 13, 2014 by dgreca

*Ky mesazh u është dërguar 5300 nënshkruesve online/
Të nderuar Miq dhe Kolegë,/
Iniciatorët e peticionit ishin në Shqipëri nga data 4-11 maj në kuadrin e aktiviteteve lobuese në Peshkopi, Tiranë dhe Vlorë. Qëllimi kryesor i vizitës ishte dorëzimi formal i peticionit Kryeministrit z. Edi Rama.
Në Peshkopi më 5 Maj ata organizuan një takim me qytetarë në të cilin morën pjesë edhe Kryetari i Bashkisë Peshkopi z. Ilir Krosi, dhe Kryetari i Komunës së Dibrës së Madhe, z. Ruzhdi Lata. Delegacioni u prit edhe nga Prefekti i Qarkut të Dibrës z. Melaim Damzi.
Në Tiranë delegacioni zhvilloi bisedime konstruktive me Presidentin e Republikës z. Bujar Nishani, Kryetarin e Kuvendit z. Ilir Meta, dhe Ministrin e Transportit dhe Infrastrukturës z. Edmond Haxhinasto.
Në Tiranë delegacioni organizoi edhe Tryezën e Rrumbullakët për Dibrën në të cilën, përveç deputetëve të Dibrës dhe deputetëve me origjinë dibrane, morrën pjesë edhe përfaqësues të shoqatave dibrane në Tiranë, intelektualë dhe diplomatë të shquar dibranë dhe përfaqësues të mediave.
Ajo që spikati në takimet me drejtues të pushtetit lokal të Peshkopisë dhe Dibrës së Madhe dhe deputetët e Dibrës është se përsa i përket Rrugës së Arbërit, të dyja Dibrat dhe të gjitha partitë politike përbëjnë një front të bashkuar. Leitmotivi i bisedimeve ishte se Dibra është injoruar që nga fillimi i shtetit shqiptar dhe veçanërisht në 24 vitet e fundit.
Për fat të keq, me gjithë përpjekjet e tyre të vazhdueshme që nga shtatori 2013, Kryeministri Rama nuk ra dakord të pres delegacionin që të merte në dorëzim peticionin. Për këtë qëndrim të z. Rama, përgjegjësi ka edhe Ministri i Financave, deputeti i Dibrës z. Shkëlqim Cani, i cili megjithëse e nënshkroi peticionin para zgjedhjeve, para vizitës së delegacionit në Tiranë është shprehur me shkrim se nuk e shikon të arsyeshme dorëzimin formal të peticionit.
Për hir të premtimit të bërë më 18 Mars 2013, intelektualët dibranë janë te gatshëm të kthehen në Tiranë në çdo kohë që të ftohen nga z. Rama.
Qëndrimi i z. Rama i ka vënë në pozitë të vështirë organizatorët e peticionit për shumë arsyje, veçanërisht pasi u duhet të përballen me mediat e huaja që janë të interesuara të mësojnë se si u pritën nga Tirana zyrtare.
Iniciatorët e peticionit nuk do të pushojnë së ushtruari presion me mjete demokratike mbi qeverinë deri sa të përfundojë plotësisht Rruga e Arbërit. Po kështu, po qe se heshtja nga Zyra e Kryeministrit në lidhje me kërkesën për të bërë një dorëzim formal do të vazhdojë në mënyre të pa justifikueshme, ata do të gjejnë një formë për t’ja dorëzuar peticionin z. Rama në një kohë që ata do ta konsiderojnë të arsyeshme.
Siç duket, 6500 nënshkrime online dhe në formularë nuk i duken shumë z. Rama. Prandaj, që ta ngremë zërin e Dibrës edhe më me force, do t’ju lutemi të inkurajoni sa më shumë njerëz të nënshkruajnë online ose në formularë. Nuk thonë kot, Zoti është me shumicën.

Kryeministri Rama, Audiencë tek Papa Françesku

April 24, 2014 by dgreca

Kryeministri shqiptar, Edi Rama, u prit sot nga Papa Françesku, në Selinë e Shenjtë në Vatikan. Siç bën të ditur vetë Kryeministri nëpërmjet një postimi në rrjetet sociale, audienca me Papa Françeskun, ka zgjatur një orë. “Audienca me Papa Franceskun, një orë e mrekullueshme përballë thjeshtësisë së Njeriut”, shkruan Rama. Kjo është hera e parë që kreu i Qeverisë sonë takohet me kreun e Selisë së Shenjtë, ndërkohë që viziton për të tretën herë Italinë në tetë muaj qeverisje. Sakaq, zyra e shtypit e qeverisë nuk ka informuar nëse axhenda e Kryeministrit në Itali do të vijojë me takime apo aktivitete të tjera.

QEVERIA SHQIPTARE”JO” ZYRTARISHT ARMEVE KIMIKE TE SIRISE NE SHQIPERI

November 15, 2013 by dgreca

Ne Foto: Pamje nga protesta ne Tirane/

Qeveria shqiptare i thotë zyrtarisht jo ardhjes së armëve kimike të Sirisë në Shqipëri. Pas protestave në rrugë të qindra e mijëra qytetarëve shqiptarë, kryesisht të rinj kryeministri Edi Rama është sinkronizuar me qëndrimin e tyre, duke refuzuar kështu kërkesën e partnerit dhe aleatit tonë strategjik, Shtetet e Bashkuara të Amerikës. Në një rrëfim të gjatë për opinionin publik dhe ata që protestonin përballë Kryeministrisë, Rama tha se nuk do të mund të merrte kurrë, për asnjë arsye asnjë vendim që do të cënonte apo vinte në rrezik jetën e qytetarëve.

“Lërini në marrinë e tyre ata që duan ta bëjnë përsëri lëmsh mendjen e këtij populli duke nxitur një antiamerikanizëm që na turpëron si komb, si vend, si shoqëri, si shqiptarë e si qytetarë; ata që duan t’ju helmojnë e çorodisin përditë me shpifje, gënjeshtra e mllefe gjithëfarë, siç kanë bërë me vite këtyre anëve; ata që duan t’ju ngopin me lugën bosh të injorancës e të ligësisë së tyre të njohur ndaj këtij vendi. E për t’i ndarë gjërat duke ndarë edhe gjënë për të cilën ju protestoni, ka vetëm një pikë ku unë u ndala pa mundur ta kapërcej dot në diskutimet me partnerët tanë: Pamundësia për t’u përfshirë brenda afatit të përcaktuar, edhe të një a dy vendeve të tjera në zinxhirin e operacionit të shkatërrimit të armëve kimike – jo thjesht financiarisht apo me ekspertizë sepse të tilla ka, por flas për pjesëmarrje direkte. Nëse disa vende të tjera do të kishin përparuar në kohë për t’u bërë pjesë e operacionit, unë do të isha gati sot t’ju thosha ja plani ynë, ja marrëveshja me partnerët, ja sa pak do rrezikojmë dhe sa shumë do të fitojmë moralisht si komb po edhe fizikisht si vend, duke u bërë pjesë. E askush s’do thoshte as pse vetëm Shqipëria dhe as që ky operacion kërkon një vend të varfër e të ndotur si Shqipëria e sotme. Por fatkeqësisht, ky element kaq i rëndësishëm për ju njësoj si për mua, sot mungon. Dhe prandaj, me besnikërinë e plotë ndaj Shqipërisë dhe respektin më të madh ndaj miqve e partnerëve tanë të pazëvendësueshëm, ata e kanë marrë vendimin tim e mësojeni tani edhe ju: Shqipëria e ka të pamundur të përfshihet në këtë operacion” deklaroi ai.

Menjëherë pas kësaj qindra protestues të përfshirë kanë shpërthyer në gëzim para Kryeministrisë.

Ndërkaq ai sulmoi ata që tentuan të hedhin baltë mbi procesin e diskutimeve me aleatët, duke e akuzuar atë se kishte mashtruar shqiptarët dhe se e kishte marrë tashmë vendimin për sjelljen e këtyre lëndëve në Shqipëri.

“E këtu tani, u vjen natyrshëm radha paraardhësit tim si edhe atyre që shkruan kapitullin më të turpshëm të marrëdhënieve shqiptaro – amerikane, duke e çarë dje, për herë të parë në dy dekada politikën shqiptare në raport me Shtetet e Bashkuara, dhe duke e kthyer parlamentin në një skenë skizofrenie politike ku partneri ynë më i madh u trajtua njësoj si të ishte Asadi; Dhe ku mbeti pa u thënë vetëm që Asadi do që të shfarosë sirianët, kurse Presidenti Obama do që të shfarosë shqiptarët. Unë e di sa ju dhemb zonja e zotërinj opozitarë jo thjesht humbja e 23 qershorit, po ende më thellë, sa ju dhemb humbja e pushtetit mbi paratë e shqiptarëve dhe goditjet e njëpasnjëshme që po merr bota e ulët e krimeve ekonomike, të cilën e ndërtuar si një mallkim damkosës në trupin e Shqipërisë.Por që dhimbja juaj të ishte kaq e madhe, sa të kapeshit pas Asadit dhe bombave të tij, për të qëlluar me histeri edhe Amerikën përveçse qeverinë e mua personalisht, këtë vërtet nuk ma tha asnjëherë imagjinata. Ashtu siç nuk e mendoja dot se ju, që hodhët verbërisht në erë një copë Shqipërie, duke vrarë 26 shqiptarëve të pafajshëm dhe përvëluar qindra familje, do të guxonit të shkonit aq larg sa të bëni thirrje që të mos na përsëritet Gërdeci! Po pse, Shtetet e Bashkuara e shkaktuan Gërdecin, o “derra të kënaqun” migjenianë që sot luani rolin e “Sokratëve të përvuejtun” për këtë popull të cilin e latë rrugëve, mes plehrave, borxheve e përbuzjes së botës? Po pse, biznes për djalin tim dhe për biznesmenët e panginjur të oborrit tuaj, është ky operacion humanitar o ju që në Gërdec, i çmontonit armët me nëna të dëshpëruara e Lula të vocërr të varfërisë që e mbollët si sëmundje rreth Tiranës e në çdo cep të Shqipërisë? Po pse, çfarë janë Kombet e Bashkuara, çeta juaj e zullumqarëve që vazhdon rend pas një të marri, i cili, pasi e ktheu Shqipërinë në një kosh plehrash importi, nxjerr Lulin e vet të vocërr të zullumeve të mëdha për të kërkuar referendum popullor kundër Amerikës? Nguleni në kokë sot dhe deri kur nuk do ta lini plakun në vetminë e vet, se referendumin popullor kundër plehrave Shqipëria e bëri në 23 qershor! Ku e keni vendimin që thatë se ishte marrë pas shpinës së shqiptarëve dhe do shpallej sot, të premten? Asnjë vendim s’është marrë, sepse asnjë vendim nuk mund të merrte Shqipëria pa ata 1 milionë të cilët e bënë njëherë referendumin kundër plehrave dhe pa ato gra e burra që janë përfaqësuesit e 1 milionë shqiptarëve në parlamentin e vendit. Në këtë pikë dua t’ju them tani gjithë shqiptarëve, të mos lejojnë askënd të tallet me ta përmes krahasimit të shëmtuar mes plehrave që e mbytën Shqipërinë për biznes deri në 23 qershor, dhe lëndëve kimike të një lufte të njerëzimit kundër armiqve të tij të betuar. Ju fola në fillim për pjesën e vështirë të rreshtimit krah për krah me të fortët e botës, si shqiptarë dhe si anëtarë të NATO-s. Teksa po shkoj drejt mbylljes, dua t’ju pyes: A nuk mendoni se pikërisht Shqipëria, po po, kjo Shqipëria jonë e vogël dhe e drobitur nga shumë padrejtësi e fatkeqësi, nuk mundet dot të ishte as e para, as e dyta dhe as tjetra me radhë që të refuzonte përfshirjen në këtë operacion, po duhet të qëndronte, deri në fund, e të përpiqej besnikërisht për krijimin e kushteve më optimale që do të mundësonin përfshirjen e saj(?) – sipas mundësive e nevojave të saj? E pra, unë s’kam dilema për këtë dhe këtë bëra, në emrin tuaj e të Shqipërisë. Ne vërtet jemi të vegjël e të varfër, po ju siguroj se nuk bëhemi as më të mëdhenj as më të pasur, duke u ngutur të sillemi si të mëdhenj pa qenë të tillë dhe duke thirrur, “Shqipëri etnike pa armë kimike!”; As duke u kuturisur të krahasohemi kot më kot me të tjerë, më të mëdhenj e më të fortë se ne, të cilët për arsye krejt të tjera mbajnë qëndrime të tjera nga tonat” tha Rama.

Rama tha se Shqipëria si vend anëtar i NATO-s dhe si vend që nënshkroi rezolutën për Sirinë u radhit krah atyre partnereve që mbështesin paqen dhe demokracinë nëpër botë. Rama konfirmoi se në këtë diskutim, Shqipëria parimisht ishte pro, sepse ishte detyrim i saj për të qenë krah aleatëve të mëdhenj.

“Në 11 shtatorin e saposhkuar, kur i’u drejtova parlamentit për programin e qeverisë së re, e nisa fjalën time me tragjedinë e kullave binjake dhe barbarinë e regjimit vrastar në Siri.Ishte koha kur armët kimike të Asadit kishin bërë një kërdi që tronditi botën dhe çdonjërin nga ne po ashtu. Shtetet e Bashkuara, Franca, Britania e Madhe, shpallën përgatitjen për sulmin ushtarak ndaj Sirisë.Në përputhje të plotë me boshtin strategjik të politikës së jashtme të Shqipërisë, si edhe me programin e ri qeverisës, unë theksova se Shqipëria do të ishte, si gjithnjë, “në krah të Amerikës dhe çdo aleance që Shtetet e Bashkuara do të ngrenë, në çdo front ku kjo luftë mund ta kërkojë”.Rrjedha e mëtejshme e ngjarjeve çoi në Rezolutën e Kombeve të Bashkuara për çarmatosjen pa luftë të regjimit sirian, përmes shkatërrimit të arsenalit kimik të regjimit kriminal të Asadit. Këtë rezolutë e mbështeti plotësisht dhe Shqipëria, në përputhje të plotë me nderin e me dinjitetin tonë si vend i angazhuar botërisht, për të kontribuar për lirinë, demokracinë, paqen, kudo në botë.Më pas, u kontaktuam drejtëpërdrejtë nga aleati dhe partneri ynë i madh, Shtetet e Bashkuara, për të konsideruar në parim pjesëmarrjen bashkë me vende të tjera në operacionin e shkatërrimit të arsenalit kimik të Sirisë. Dhe përgjigja jonë, ashtu si përgjigja e një sërë vendesh të tjera, ishte ajo që imponon historia jonë e këtyre njëzet e tre viteve; boshti strategjik i politikës sonë të jashtme, pa dallime partiake deri dje paradite; detyrimi ynë për të qenë në krah të aleatëve tanë më të mëdhenj, në çdo përpjekje madhore për një botë më të mirë dhe, padyshim, vetë interesi ynë kombëtar që është pazgjidhshmërisht i lidhur me marrëdhënien tonë speciale me Shtetet e Bashkuara:Po, në parim ne jemi të gatshëm të përfshihemi në këtë operacion si pikë mbështetjeje në Mesdhe, por nuk kemi asnjë kapacitet të brendshëm për të marrë pjesë në të drejtëpërdrejtë. Prandaj gjithçka që lidhet me transportin, teknologjinë, ekspertizën, duhet ta marrin përsipër Shtetet e Bashkuara dhe vendet e tjera” sqaroi kryeministri Rama.

Kryeministri sqaroi se nuk foli më herët për fazën e diskutimeve me aleate, për arsye se ky nuk ishte subjekt i një debati publik, por një operacion i komplikuar sa civil aq edhe ushtarak.

“Ky të dashur miq është një operacion i komplikuar, sa civil aq edhe ushtarak, dhe si i tillë përgatitja e tij nuk mund të jetë subjekt debati publik. Kjo nuk ndodh në asnjë vend serioz, ku qeveria, publiku dhe parlamenti thirren në debat vetëm kur ka një plan operacional e jo gjatë ndërtimit të planit operacional.Por, për më tepër, dua t’ju siguroj sot se në gjithë procesin e diskutimeve intensive të gjithë këtyre javëve, ne jemi përqëndruar me vëmendje e vullnet të madh përmes një grupi teknik, duke kërkuar nga ekspertiza e partnerëve përgjigje për çdo pyetje të ngritur nga ambientalistët, çdo shqetësim të shprehur nga ju, çdo argument ekspertësh apo pseudoekspertësh që ngrinin peshë mendjen tuaj nga ekranet e faqet e gazetave. Ndërsa unë jam përpjekur me shumë vullnet e pasion, të marr jo vetëm sigurinë e plotë për moscënimin e asnjë fijeje floku dhe mosmbetjen e asnjë mbetjeje në territorin shqiptar, po njëkohësisht edhe mirëkuptimin që në këtë përpjekje të madhe të fuqive të mëdha, supet e vogla të Shqipërisë të mos ngarkoheshin përtej mundësive të tyre. Kemi gjetur përgjigje të njëpasnjëshme, kemi marrë garancira të njëpasnjëshme, por është dashur kohë. E ndërkohë, përveç gatishmërisë në parim, siç ju kam thënë, nuk kam marrë asnjë angazhim përfundimtar, për ta çuar këtë çështje për vendim para qeverisë e Kuvendit të Shqipërisë. Sepse kam qenë gjithë kohën i vetëdijshëm se nëse do ta hidhja këtë hap, duhet të kisha bindjen më të plotë jo vetëm tek garancia plotë e sigurisë teknike, por edhe tek përfitimi që shoqëria jonë, vendi ynë, kombi ynë meritonte të nxirrte nga ky kontribut fantastik për mbarë njerëzimin. Më vinte sot përmes dritares thirrja e përsëritur e protestuesve, “E duam Shqipërinë si gjithë Europa!”, dhe lejomëni t’jua them sot, hapur, në sy, se për këtë jam përpjekur tërë këto ditë e netë diskutimesh. Këtë u kam përsëritur papushim miqve tanë të mëdhenj amerikanë dhe europianë, duke u thënë: Na ndihmoni t’i tregojmë Europës se ne jemi pjesë e saj dhe jo një kosh plehrash në mes të Europës!Na ndihmoni të dalim më të pastër e më të fortë nga kjo histori që edhe ne t’ju ndihmojmë me çfarë kemi mundësi!Na ndihmoni të kontribuojmë për të mirën e njerëzimit, duke kontribuar edhe ju për të mirën e njerëzve tanë!” tha ai.

Kryeministri u kujtoi shqiptarëve se aktualisht në vend ndodhen 31 zona mbetjesh kimike që vrasin përditë dhe se në pjesën e diskutimeve me aleatët ai kishte kerkuar të mos shkuleshin nga Shqipëria derisa vendi te pastrohej totalisht nga këto substanca të rrezikshme.

“Dua t’i pyes ata që me plot të drejtë thërrisnin sot, “E duam Shqipërinë si gjithë Europa”, a e dinë që në Shqipëri ka 31 zona të rrezikshme mbetjesh kimike të trashëguara nga e kaluara, të cilat nuk plasin po vrasin ngadalë? Janë zona që dihen prej vitesh, të shenjuara në listën e zezë të planetit, po Shqipëria e varfër, ashtu si çdo vend i varfër në këtë botë, nuk mund të lerë pa paguar rrogat e pensionet për të pastruar mbetje të tilla që kushtojnë qimet e kokës. Një nënë e re nga një pikë e tillë në Elbasan më çonte një mesazh, “O kryeministër, në fshatin tonë ka fëmijë me tumor çdo vit kurse ti do me na i vra krejt fëmijët”. Ky ishte njëri nga mesazhet që u lexova partnerëve tanë gjatë diskutimeve dhe në fund, të gjithë ranë dakord se Shqipëria e meritonte me patjetër që ekspertët më të mirë të botës, bashkë me teknologjinë më të shkëlqyer për mbetjet kimike, të mos shkuleshin nga Shqipëria me të mbaruar punë me mbetjet e Asadit – po të vazhdonin punën në Patos-Marinzë, Ballsh, Fier, Elbasan, Rubik, Laç, Berat, Lushnjë, Bajzë, Rrëshen, Fushë Arrëz, Prrenjas, Burrel, e me radhë të tjera, për të mbaruar punë njëherë e mirë, edhe me mbetjet e rrezikshme të pesëdhjetë vjetëve komunizëm, plus njëzet vjet barbarizëm mjedisor.U kërkova edhe pastrimin e mbetjeve të mëdha inerte në gryka lumenjsh, nëpër rrugët kombëtare e nëpër plazhe dhe pak nga pak, u mirëkuptuam. Po ashtu më në fund u mirëkuptuam edhe për kushtin e panegociueshëm të tërheqjes nga Shqipëria, të të gjitha mbetjeve që do të prodhonte faza e dytë e shkatërrimit të armëve kimike siriane. Sepse o miq, në Shqipëri nuk do të na mbërrinin bombat e famshme të cilat çmontohen në Siri, po lëndët kimike të nxjerra prej tyre (pra jo fishekët po baruti). Ndërsa djegia dhe varrosja e mbetjeve pas trajtimit të lëndëve që do të vinin këtu, të bëheshin gjetkë, në vende të tjera. Kështu mbi tokën e Shqipërisë nuk do të mbetej më absolutisht asnjë thërrime lëndë kimike.Siç po mundohem t’jua rrëfej të vërtetën me përpikmëri ndaj fakteve dhe besnikëri absolute ndaj jush, në gjithë këtë proces unë ju kam përfaqësuar ju dhe Shqipërinë, me respektin më të madh për Shtetet e Bashkuara po edhe përunjësinë më të plotë për interesin tonë kombëtar e publik” tha më tej Rama.

Rama theksoi se situata e krijuar solli edhe reagimin e pabazë dhe të pakuptimtë të atyre që shkaktuan Gërdecin, me 26 viktima të pafajshme dhe që kërkonin të mos kishte më Gërdec.Po ashtu Kryeministri preku edhe kërkesën e PD-së për referendum popullor, të cilin e konsideroi si referendum kundër Amerikës, ndërsa theksoi se përgjigja e këtij referendumi është marrë më 23 qershor.Rama shprehu vlerësimin se protestat në rrjetet sociale dhe në rrugë, kanë qenë e vetmja dallëndyshe e pastër.

“Protesta juaj në rrjetet sociale dhe në rrugët e Tiranës apo Shqipërisë, ka qenë e vetmja dallandyshe shprese në qiellin e mbushur me tymin e zi të urrejtjes, mllefeve, gënjeshtrave, delireve, frikërave që shpërthyen në mesin tonë. Edhe pse ju ka përfshirë në protestë mbingarkesa në shpirt prej gjithë kësaj propagande histerike, unë ndjehem shumë mirë për ju; ndjehem mirë sidomos për shumë prindër që deri dje i frikeshin protestës ndërsa sot dalin në rrugë me gjithë fëmijët e tyre, të pashqetësuar nga forca speciale e gryka pushkësh në dritaret e kryeministrisë; ndjehem mirë për këtë erë të freskët demokratike që solli 23 qershori. Kam plotësisht respekt për kurajon tuaj dhe njoh jo pak ndër ju që ishin përditë bashkë me mua deri në 23 qershor, në rrugën e paharrueshme të përpjekjes për Rilindjen që të ecim më shpejt drejt Shqipërisë që duam. Asnjë problem, nothing personal siç më shkruante dje mikja ime Elsa Lila përpara se të hidhte videon e vet në youtube.Sot nuk është dita për t’ju ndryshuar mendjen, e di këtë dhe nuk ju’a kërkoj. Sot është dita për t’ju thënë bravo sepse pavarësisht se nuk jemi dakord në një gjë kaq të rëndësishme, jemi në një tjetër, gjithmonë shumë të rëndësishme, që Shqipëria siç ka nevojë për qeveritarë të mirë, ka nevojë edhe për protestues të mirë. Por sot është dita që unë t’ju them vetëm këtë:Shtetet e Bashkuara nuk vrasin njerëz, po janë vrarë e vriten, më shumë se të gjithë të tjerët, në fronte lufte për të mirën e njerëzimit” përfundoi fjalimin e tij Kryeminsitri.