Shqipëria do mbetet përjetësisht e verbër në në ekonomi, në kulturë, në civilizim, në tregëti, në emnacipim kombëtar, në vëmendje e në prestigj, nëqoftëse merret me rrugë fshatrash e nuk respekton gjeopolitikën, domethënë qendrat gjeopolitike të rëndesës. Për shembull, nëqoftëse nuk arrin të ndërtojë një “Suez” që të lidhë Romën me Stambollin. Një amanet që na e ka lënë 100 vjet më parë edhe Ismail Qemal Vlora, Babai i Kombit Shqiptar./

Nga Zeno Jahaj/

Në Prizren, në kryeqendrën kombëtare ku u bë prova e parë gjenerale e një qeverie shqiptare në kohët moderne, miku i ftuar, Kryeministri turk, jo në një konferencë shkencore, as në një deklaratë zyrtare, përkundrazi, në një sofër tradicionale, tha se Kosovën e donte shumë, aq shumë sa ajo për të është Turqi. Kryeministri i Shqipërisë, i ftuar edhe ai, jo privatisht, jo si byrazer, por si Kryeministër, natyrisht që do të respektonte afeksionin e mikut turk. Nuk bëhet fjalë që i zoti i shtëpisë të mos ndjehej mirë. Kaq ishte gjithë historia.

“Tungjatjeta vëlla,” “Ç’kemi vëlla” i përshëndesim të gjithë, përveç vëllezërve. Vëllezërve s’kemi pse ua kujtojmë që i kemi vëllezër.

Otomanët nuk e kishin dhe as nuk mund ta kishin kurrë forcën t’i bënin vëllezër shqiptarët apo ballkanasit e tjerë, jo për 500, por as për një mijë vjet. Se kombet nuk bëhen vëllezër, edhe sikur t’i mbash me bukë 500 vjet, pa le më t’i shtypësh 500 vjet.

Turqia ka sot të tjera mundësi e nesër do të ketë akoma më shumë mundësi. Turqisë i ka ardhur koha të ribëhet, në mos kryeqendër, të paktën një nga dy-tre qendrat që do ekuilibrojnë kontinentin e ca më tej. Por me orë e balanca të tjera, jo me orë e balanca perandorake.

Shqipëria mjaft ka gabuar me balancat. Nuk na falet të gabojmë më tej.

Shqipëria do mbetet përjetësisht e verbër në në ekonomi, në kulturë, në civilizim, në tregëti, në emnacipim kombëtar, në vëmendje e në prestigj, nëqoftëse merret me rrugë fshatrash e nuk respekton gjeopolitikën, domethënë qendrat gjeopolitike të rëndesës. Për shembull, nëqoftëse nuk arrin të ndërtojë një “Suez” që të lidhë Romën me Stambollin. Një amanet që na e ka lënë 100 vjet më parë edhe Ismail Qemal Vlora, Babai i Kombit Shqiptar.

Për këtë, po, ia vlen të kthejmë kokën pas.