-Kosova e vlerëson lartë rolin e NATO-s dhe po ashtu aspiron për t’u bërë anëtare e saj/

-Kosova e gatshme t’i avancojë marrëdhëniet me NATO-n/

-Sekretari i Përgjithshëm i NATO-s, Jens Stoltenberg, në Prishtinë takoi autoritetet e Kosovës, presidentin Hashim Thaçi, kryeministrin Isa Mustafa, ministrin e FSK-së, Haki Demolli…/

SPECIALE-Gazeta DIELLI nga korrespondenti në Kosovë Behlul JASHARI/

PRISHTINË, 3 Shkurt 2017/ KFOR-i do të vazhdojë misionin e vet në Kosovë për të siguruar një mjedis të qetë e paqësor, tha sot në Prishtinë Sekretari i Përgjithshëm i NATO-s, Jens Stoltenberg, duke theksuar se stabiliteti në rajon është shumë i rëndësishëm.“NATO është në Kosovë. NATO e ka këtu forcën e vet, KFOR-in, që garanton paqen dhe sigurinë në këtë rajon, si pjesë e angazhimit për ruajtjen e paqes në Evropë”, tha Stoltenberg në një konferencë shtypi bashkë me kryeministrin Isa Mustafa, ndërsa më parë kishte takuar presidentin Hashim Thaçi.Kryeministri Mustafa the se, Kosova e vlerëson lartë rolin e NATO-s dhe po ashtu aspiron për t’u bërë anëtare e saj. “Të gjitha subjektet politike në Kosovë pa marrë parasysh të pozitës apo opozitës, janë deklaruar që Republika e Kosovës është plotësisht e angazhuar për integrimet evropiane dhe ato euroatlantike”, theksoi kryeministri Mustafa.

FJALA A PLOTË E KRYEMINISTRIT TË KOSOVËS ISA MUSTAFA NË KONFERENCËN PËR SHTYP PAS TAKIMIT ME SEKRETARIN E PËRGJITHSHËM TË NATO-S, JENS STOLTENBERG:

Kjo vizitë e lartë e sekretarit të NATO-s në Kosovë, është një nder i madh për Kosovën dhe për institucionet e Republikës së Kosovës.Dëshiroj ta falënderoj për hapat që i ka ndërmarrë NATO-ja për rritjen e bashkëpunimit me Kosovën dhe për interesin e përbashkët që ne të shkojmë përpara me një bashkëpunim të veçantë ashtu siç është përcaktuar në NATO.

Ne me 5 dhjetor të vitit të kaluar, kemi marrë përgjigje në letrën time nga ju z. Sekretar, për bashkëpunim në fusha të rëndësishme për ne, dhe mua më vjen veçanërisht mirë që Kosova do të mund të përfitojë nga bashkëpunimi praktik me NATO-n, nga programet specifike të mbrojtjes së rrjeteve informatike, nga edukimi, trajnimi dhe logjistika, nga programi i ndërtimit të integritetit, nga pjesëmarrja në aktivitetet e NATO-s, shkenca për paqe dhe siguri dhe nga përfshirja e FSK-së në ushtrimet e caktuara.Kosova e vlerëson lartë rolin e NATO-s dhe po ashtu aspiron për t’u bërë anëtare e saj. Të gjitha subjektet politike në Kosovë pa marrë parasysh të pozitës apo opozitës, janë deklaruar që Republika e Kosovës është plotësisht e angazhuar për integrimet evropiane dhe ato euroatlantike dhe unë mendoj se ky është një qëndrim i përbashkët i të gjithë neve në Kosovë dhe i qytetarëve të Republikës së Kosovës.

Ne e vlerësojmë lartë rolin e KFOR-it dhe e shohim se është në interes të paqes dhe stabilitetit qëndrimi i mëtejmë i KFOR-it në Kosovë, dhe vlerësojmë se prania e KFOR-it është element shumë i rëndësishëm i ndjenjës së sigurisë, sidomos të komuniteteve, por edhe kontribut i paqes në këtë pjesë të Ballkanit Perëndimor.Qeveria e Republikës së Kosovës është thellë e përkushtuar që të gjitha çështjet t’i zgjidhë përmes procesit të dialogut.Dialogu me Serbinë është orientim strategjik i politikave tona për normalizimin e marrëdhënieve me këtë shtet, mirëpo përkundër kësaj qasje, ne kohëve të fundit kemi pasur disa provokime sistematike, për të cilat jemi marrë vesh në Bruksel që t’i kapërcejmë me paqe dhe mirëkuptim dhe që të ndërtojmë një mjedis, në të cilin do të mbizotërojë paqja në këtë pjesë të rajonit.Unë vlerësoj se procesi i dialogut të deritashëm ka dhënë rezultate pozitive dhe ajo mbetet e vetmja alternativë në të ardhmen. Jemi të përkushtuar të punojmë për paqen, sigurinë dhe stabilitetin në rajon. Jemi të interesuar që t’i integrojmë të gjitha serbët në institucionet e Republikës së Kosovës dhe po ashtu ju garantoj se popullata serbe është plotësisht e sigurt në Kosovë dhe askush nuk ka nevojë të shqetësohet për atë, pavarësisht motiveve për të cilat mund të shfaqin këto shqetësime.Ne po bëjmë përpjekje që gjithashtu me të gjitha vendet e Ballkanit Perëndimor të krijojmë marrëdhënie të mira bazuar në interes të përbashkët.Ne i gëzohemi procesit të anëtarësimit të Malit të Zi në NATO dhe këtë e shohim gjithashtu si kontribut të paqes dhe stabilitetit në rajon. Ne do t’i bëjmë të gjitha përpjekjet që me Malin e Zi ta kapërcejmë çështjen e ratifikimit të marrëveshjes për demarkacionin e kufirit dhe konsiderojmë se kjo është çështje e jona, sepse ne me Malin e Zi kemi marrëdhënie të shkëlqyeshme.Po punojmë edhe në fusha të tjera. E njoftova Sekretarin e NATO-s, edhe në fushën e ekonomisë për rezultatet që i kemi arritur në vitet e kaluara dhe për rritjen ekonomike prej mbi 4 për qind që kemi arritur gjatë këtyre dy viteve, për uljen e përgjithshme të papunësisë, për investimet e jashtme direkte, për rolin që ka Marrëveshja për Stabilizim Asocim në integrimet tona evropiane dhe po ashtu për punën që po bëjmë në reformat evropiane.Shpreha po ashtu nevojën që të kemi një mbështetje, ashtu siç e kemi pasur edhe deri më tani, edhe sa i përket transformimit të FSK-së në Forcë të Armatosur të Kosovës, sepse FSK-ja i ka bërë të gjitha përgatitjet. Po ashtu e njoftova Sekretarin e Përgjithshëm se ne kemi biseduar me pjesëtarët e popullatës jo shumicë në Kuvendin e Republikës së Kosovës gjatë këtyre dy viteve të kaluara, mirëpo ky proces po mbahet peng për shkak se nuk kemi përkrahjen e deputetëve serb, jo për shkak të vullnetit të tyre, por konsideroj për shkak të ndikimit të drejtpërdrejt të Serbisë, prandaj edhe transformimi i FSK-së ka mbetur problem i këtij pengu.Ne kemi bërë punë mjaft të rëndësishme edhe në luftën kundër krimit të organizuar dhe korrupsionit, dhe po japim prioritet të veçantë kësaj lufte. Është arritur një efikasitet më i lartë i gjyqësorit dhe prokurorisë në këtë fushë, dhe po ashtu kemi të arritura më të mira edhe tek shërbyesit civil.Kemi evidentuar po ashtu arritje të mira edhe në luftën kundër ekstremizmit të dhunshëm dhe terrorizmit, kemi ndal tërësisht fluksin e shkuarjes dhe të bashkimit të njerëzve tanë në fronte të jashtme, dhe po ashtu kemi arrit një bashkëpunim shumë të mirë me komunitetet fetare, me shoqërinë civile, me shkollat, me bizneset, por edhe me komunitetet tjera, në mënyrë që bashkërisht të punojmë në këtë fushë.Prandaj, z. Sekretar, unë dëshiroj që të vlerësoj lartë dhe të mirëpres vazhdimin e qëndrimit të KFOR-it në Kosovë si mision tepër i rëndësishëm për ne, të vlerësoj lartë krijimin e bazës shumë të rëndësishme të bashkëpunimit në fushën me interes të përbashkët, që është vërtetuar edhe me letrën tuaj, të shpreh vazhdimin e përkushtimit tonë për avancimin e marrëdhënieve me NATO-n në rrafshin politik dhe në rrafshin praktik, të shpreh përkushtimin e vendit tonë për paqe, për stabilitet, dhe marrëdhënie të mira me fqinjët dhe për zgjidhjen dhe normalizimin e problemeve me Serbinë përmes procesit të dialogut, se Kosova në suaza të mundësive të saj do të jetë një aleat i fuqishëm i juaji në luftën kundër ekstremizmit të dhunshëm dhe terrorizmit, dhe se jemi fuqimisht të interesuar të transformojmë Forcat e Sigurisë së Kosovës në Forcë të Armatosur, si forcë e cila  do të jetë mbështetëse aktive e paqes dhe stabilitetit, dhe se është në interes të Republikës së Kosovës pjesëmarrja jonë në operacionet e mbështetjes së paqes, të preferuara nën ombrellën e NATO-s.

PRESIDENTI THAÇI PRITI SEKRETARIN STOLTENBERG: KOSOVA E GATSHME T’I AVANCOJË MARRËDHËNIET ME NATO-N

Presidenti i Republikës së Kosovës, Hashim Thaçi, sot e ka pritur Sekretarin e Përgjithshëm të NATO-s, Jens Stoltenberg, me të cilin ka biseduar për avancimin e marrëdhënieve ndërmjet institucioneve të Kosovës dhe NATO-s.Në takim me sekretarin Stoltenberg, presidenti Thaçi ka vlerësuar lart punën e KFOR-it në Kosovë, duke thënë se me përkushtimin e tyre kanë arritur që të jenë institucioni më i besueshëm për qytetarët tanë.“Kosova e vlerëson shumë rolin tuaj dhe gatishmërinë e shprehur për të krijuar një bazë për rritjen e bashkëpunimit tonë. Shteti ynë mbetet i përkushtuar për avancimin e marrëdhënieve me NATO-n, si në rrafshin politik, ashtu edhe praktik”, u shpreh presidenti Thaçi.“Aspirata e vetme e Kosovës mbetet anëtarësimi në BE dhe NATO”, shtoi ai.

Presidenti Thaçi dhe sekretari Stoltenberg kanë biseduar edhe për angazhimin e autoriteteve kosovare në luftën kundër terrorizmit dhe ekstremizmit fetar, për Forcën e Sigurisë së Kosovës, por edhe për dialogun me Serbinë dhe raportet fqinjësore me shtetet e Ballkanit Perëndimor.

MINISTRI I FSK, HAKI DEMOLLI ZHVILLOI TAKIM ME SEKRETARIN E PËRGJITHSHËM TË NATOS, JANS STOLTENBERG

Ministri i Ministrisë për Forcën e Sigurisë së Kosovës, Haki Demolli dhe Komandanti i FSK-së, gjenerallejtënant Rrahman Rama zhvilluan një takim të përbashkët me Sekretarin e përgjithshëm të NATO-s, Jans Stoltenberg.Në takim, u bisedua për situatën e sigurisë në vendin tonë, hapat që duhet ndërmarrë lidhur me ruajtjen e paqes dhe sigurisë si dhe stabilitetit të Kosovës, si dhe zhvillimin e kapaciteteve të institucioneve të sigurisë në Republikën e Kosovës.Nga ana e tij, ministri Demolli e njoftoj Sekretarin e NATO-s, Jans Stoltenberg, mbi zhvillimin dhe profesionalizimin e Forcës së Sigurisë së Kosovës, avancimin e saj në drejtim të krijimit të përmbushjes së misionit të saj në mbështetje të institucioneve dhe qytetarëve të vendit si dhe në krijimin e një ambienti sa më të favorshëm për përfshirjen e komuniteteve pakicë që jetojnë në Kosovë, për shërbim në Forcën e Sigurisë së Kosovës.Gjithashtu, ministri Haki Demolli duke shprehur mirënjohje për angazhimin e NATO-s për paqe në Kosovë përmes trupave të KFOR-it tha se aktualisht Republika e Kosovës është duke u përpjekur seriozisht që të zhvillojë dhe konsolidojë mekanizmat e saj të sigurisë për të ardhmen, gjithnjë bazuar në konsensus politik të brendshëm dhe në koordinim me faktorin ndërkombëtar.Nga ana e tij, Sekretari i përgjithshëm i Aleancës, Stoltenberg deklaroi një mbështetje të pa rezervë për FSK-në përmes Ekipit Këshillues ndërlidhës të NATO-s (EKNN), misionin dhe kapacitetet, duke shprehur konsideratë të lartë për profesionalizmin dhe angazhimin e saj të treguar deri më tani.Gjatë vizitës, Sekretari i Përgjithshëm te NATO-s, Jens Stoltenberg ka takuar edhe  komandantin e KFOR-it, Gjeneral Majorin, Giovanni Fungo, trupat e KFOR-it si dhe përfaqësues evropianë në Kosovë.