Nga Mimoza Dajçi/

$320 milion dollarë ka kushtuar projekti për ndërtimin e hapjes së një qendre akulli në rrugën Kingsbridge në Bronx, pranë ambjenteve të godinës Kingsbridge Armory. Një godinë e hershme, në pamje të parë si kështjellë, e tashmë me mure të rrënuara, që për rikostruksionin e saj kishin paraqitur shqetësim lokalët. Por u deshën plot 18 vite për t’u miratuar restaurimi i saj. Realizim ky që me pas u shoqërua me kërkesen e një adaptimi të saj në pistë patinazhi, ose me saktë në një godinë të akullt ku do të stërviten e argëtohen qytetarët në Bronx.

Qindra anëtarë të komuniteteve të ndryshme, politikanë e përfaqësues të klerit në Bronx kishin vite që kërkonin nga qeveria amerikane restaurimin dhe kthimin e saj në një projekt të tillë, megjithëse përgjigja shikohej si një projekt me fonde të parealizueshme, përsëri qyetetarët e kësaj zone ngulmonin në të tyren që edhe ne Bronx të hapej një qender e tillë sportive.

Endrra më në fund u realizua.

Një erë e re ndryshimesh po fryn në zonën përreth qytetit të Bronxit. Një zhvillim e hov të madh po merr kjo hapësirë në të gjitha fushat e jetës, populluar me emigrantë nga vende të ndryshme të botës, përfshirë këtu edhe numrin më të madh të shqiptarëve. Në Bronx ndodhen shumë institucione të rëndësishme arsimore, kulturore, sportive e shëndetësore, disa prej tyre janë Fordham University, Lehman College, Monroe College, Yankee Stadium, spitali “Montefiore” etj.

“Ndihem krenar” – shprehet Presidenti i Bashkisë në Bronx Ruben Diaz, Jr. – “që ja arritëm qëllimit e që jam pjesë e këtij suksesi.”

Për këtë projekt ambicioz, një interesim të veçantë kanë treguar gjithashtu edhe Rev. Que e Tim English me përpjekjet e tyre për të përmirësuar e zhvilluar jetesën e popullsisë në Bronx. Ata i sheh kudo në çdo eveniment e të palodhur si gjithmonë. Prezantimi i këtij projekti madhor u paraqit disa ditë më parë në ambjentet e Kishës St. Nicholas of Tolentino në Bronx. Moderatore e këtij takimi ishte Rev. Que English. Të pranishëm ishin përfaqësues të shtetit, politikës shoqërisë civile, nxënës shkollash e banorë të Bronx-it.

Sipas folësve, hapja e një qendre të tillë akulli në Bronx pritet të realizohet si projekt në fund të vitit 2017 dhe është përllogaritur të gjenerojë 1.7 bilion dollarë në të ardhura për një periudhë 99-vjeçare sipas kontratës fillestare, ku do të hapen me këtë rast rreth 270 vende të reja pune, si profesionale sportive, administrative, mirëmbajtje e sigurie. Çdo punonjës do të paguhet si minimum 10 dollarë në orë si dhe do t’i sigurohen benefite shëndetësore. Do të ofrohen pozicione pune me orë të plota, të kufizuara si dhe sezonale. Kush është i/e interesuar, ka shans të mirë për të aplikuar pranë kësaj piste vallëzimi, ku do të zhvillohen sportet e patinazhit, hockey, spektakle të ndryshme, pista vallëzimi, etj.

Legjenda e sportit të Hockey, Z. Mark Messier, i cili do të jetë CEO për Kingsbridge National Ice Center në Bronx, tha: “Jam shumë i lumtur pasi kjo është një kohë historike për Bronx-in dhe New York-un. Përfitoj nga rasti për të falenderuar e përgëzuar Mayor-in Bloomberg për lidershipin e tij në arritjen e këtij vendimi”.

Gjithashtu në stafin e lartë drejtues të kësaj piste, do të jetë edhe fituesja e Medaljes së Artë të lojrave Olimpike, patinatorja Sarah Hughes.

Vetëm një milion dollarë në vit do të shpenzohen për përfitues falas në trajnimet e klasave të ndryshme që do të zhvillohen në këtë qendër, të cilët do të jenë nxënësit e shkollave, studentët e kolegjeve përreth dhe njerëzit me të ardhura të pakta. Hapja e kësaj qendre sportive akulli në Bronx shënon njëherësh edhe historikun e zhvillimeve madhore që përjetojnë banorët përreth tij.

Prezantimi i këtij projekti u paraqit në një monitor të madh vendosur në mes të sallës së Kishës, më pas pati një koncert artistik performuar nga nxënës të shkollave të mesme të muzikës.

Pallati i Akullit me një siperfaqe prej 750,000 sq ft, do të përmbajë 9 pista akulli në ambjente të mbyllura. Pas përfundimit, pritet që Kingsbridge National Ice Center të renditet si qendra më e madhe e llojit të saj në botë.

New York, Nëntor 2013