Federata Pan-Shqiptare e Amerikes “Vatra” shpreh shqetësime të thella mbi gjendjen politike dhe ekonomike që është krijuar në Kosovë. Deklarata e Aleksandar Jablanovic, Ministrit të Kosovës për Kthim dhe Komunitete, ku i quan nënat shqiptare “egërsira” është ofenduese dhe destabilizuese për Kosovën.
Vatra i sheh kërkesat për shkarkimin e ministrit serb të Qeverisë së Kosovës që ofendoi shqiptarët dhe fatin e kompleksit të minierave të Trepçës si frymëzim i protestave në Prishtinë me 24 dhe 27 janar.
Federata Vatra vëren se populli është i pakënaqur edhe për shumë arsye të tjera. Papunesia e cila shkakton varfëri në popull, është në rritje e sipër. Simbas Agjencisë së Statistikave të Kosovës, 55.9% e të rinjëve të moshave 15-24 vjeç janë të papunësuar. Rinia nuk sheh angazhime serioze nga pushtetarët për përmirësimin e standartit të jetesës. Si rrjedhojë, është shtuar migrimi masiv i rinisë së Kosovës, që fatkeqësisht na kujton fillimin e viteve të 90-ta kur sërbët ushtruan formën e ngadaltë të pastrimit etnik në Kosovë.
Korrupsioni është një faktor tjetër që pengon zhvillimin ekonomik dhe stabilizimin e Kosovës. Simbas indeksit të perceptimit të korrupsionit, në dhjetor të 2014, Transparancy International e ka renditë Kosovën në vendin e 110, duke e barazuar me disa vende nga më të korruptuarat në Afrikë. Pra, përpjekjet kundra korrupsionit nuk kanë treguar asnjë progres. Investorët e huaj nuk rrezikojnë investimet e tyre në një vend me përmasa të mëdha të korrupsionit.
Në lidhje me kompleksin e minierave të Trepçes, Vatra e mbështetë deklaratën e ambasadorit të Britanisë së Madhe, Ian Cliff, i cili në nji ligjeratë në Universtitetin AAB ka theksur, “Trepça është në territorin e Kosovës, dhe ajo që është në territorin e saj është aset i Kosovës. Kjo nuk duhet të jetë temë e dialogut me Serbinë, por duhet të zgjidhet brenda Kosovës.”
Sipas Ambasadorit Cliff, Trepça nuk duhet te jetë në duart e agjencisë së privatizimit, dhe shqiptarët duhet të “lidhin pjesën veriore dhe jugore të saj, dhe të tërheqin ndonjë partner strategjik nga Evropa apo diku tjetër”.
Vatra shpreh dyshime se armiqtë shekullorë të shqiptarëve mundohen me çdo mundesi të infiltrojnë elemente ektremiste në Kosovë që të shkaktojnë destabilizim dhe armiqesi ndërmjet shqiptarëve. Nuk duhet të harrojmë faktin se sërbët dhe grekët u munduan të krijonin opinionin në botë se forcat e Ushtrisë Çlirimtare të Kosovës ishin forca islamike terroriste. Vatra këkon që institucionet shqiptare te kenë kujdes nga ndikimet e fqinjeve dhe grupeve mafioze për ta ndielle një pjesë të rinisë kosovare për ta bërë mish për makinerinë e luftës tek ISIS. Duhet te jemi vigjilentë ndaj elementeve te huaj, c’ka shkon ndesh me harmoninë tone ndërfetare.
Vatra e konsideron të drejtën për të protestuar në menyrë paqesore, si të drejtë demokratike, dhe mbeshtetë deklaratën e Quint-it, të ambasadorëve të Francës, Gjermanisë, Italisë, Britanisë së Madhe, dhe Shteteve të Bashkuara të Amerikes, ku thuhet se e drejta për të demonstruar është vendimtare për një demokraci funksionale, por dhuna dhe vandalizmi ndaj pronës publike dhe private nuk është e pranueshme. Vatra mbështet opinionin e ambasadorës amerikane në Prishtinë, Tracey Ann Jacobson, dhënë Zërit të Amerikës, ku u bën thirrje subjekteve politike shqiptare për zgjidhjen e çështjeve me anë të dialogut.
Vatra e ka mirëpritë lajmin e fundit të kryeministrit të Kosovës, Isa Mustafa, ku paralajmëron largimin e ministrit Jablanovic dhe i bën thirrje Qeverisë së Kosovës që sa ma shpjet të paraqes në parlament projekt-ligjin për Trepçen si pasuri e patundeshme e Kosovës dhe vetëm Kosovës.