Ndërkohë që Ministria e Brendshme bën me dije se situata po shkon drejt përmirësimit, pas reshjeve të rëna gjatë 48 orëve të fundit, gjendja në disa fshatra të Krujës paraqitet kritike, duke qenë se Murqina, Bilaj Mallkuçi si dhe Gramza e Derveni, janë të izoluara nga përmbytjet.
Siç raportohet, situata është mjaft e rëndë, pasi shumë familje janë të izoluara nga prania e ujit, ndërsa dhe sipërfaqet e tokës së përmbytur janë mjaft të konsiderueshme. Prej ditës së djeshme familje të tëra janë të izoluara, ndërsa apeli i tyre është të ndërhyjnë strukturat, pasi nuk është prezantuar asnjeri nga pushteti vendor apo dhe qendror.
Duket qartë dhe nga pamjet se për të lëvizur janë improvizuar dhe mjetet lundruese nga vetë banoret . Lumi Ishëm është shkaku i grumbullimit të ujërave sidomos në tre fshatra të njësisë administrative të Bubqit. Dëmet janë të kosiderueshme në të mbjella, bazën ushqimore për bagëtitë.
Nuk ka të dhëna nga sipërfaqet e përmbytura apo dhe shtëpitë e banimit, por nga sa mendohet, afro 300 banesa janë të rrethuara nga uji si dhe 2000 ha tokë e mbuluar nga reshjet e rëna gjatë ditëve të mëparshme.(Raporton per Diellin:Ahmet ZANI)