Nga Luan Çipi/
Në datën 10 Shkurt 2015 në sallën Aleks Buda të Akademisë së Shkencave të Shqipërisë, u promovua libri monografik “Spiro Jorgo Koleka (1879-1940) dhe fati tragjik i atdheut”, i Prof. Dr. Bardhosh Gaçes, “Mjeshtër i Madh”.
Aktiviteti u organizua nga Shoqata Atdhetare “Labëria” dhe Akademia e Shkencave, në bashkëpunim me familjarët e fisit Koleka dhe Harito.
Merrnin pjesë akademikë e intelektual të shquar dhe pjesëtarë të ftuar të Shoqatës Labëria nga Tirana, Vlora dhe Himara, profesorë, poetë, shkrimtarë, gazetarë, artistë dhe, sportistë të njohur.
Aktivitetin e hapi Kryetari i Shoqatës Atdhetare “Labëria” Prof. Dr. Ago Nezha dhe referatin kryesor e mbajti shkrimtarin i njohur Profesor, Nasho Jorgaqi, që ka bërë edhe parathënien e librit. Diskutuan edhe përshëndetën edhe historiani Prof. Dr. Paskal Milo dhe studiuesi himarjot Foto Bixhili. Stërmbesa e Spiro Jorgo Kolekës, e bija e Prof. Dr. Tatjana Kolekës (Harito), Ministrja e Teknologjisë dhe Inovacionit, zonja Milena Harito, foli në emër të familjarëve, përshëndeti pjesëmarrësit dhe falënderoi përzemërsisht autorin, Bardhosh Gaçe.
Një përmbledhje të shkurtër të Monografisë për Spiro Jorgo Kolekën e realizoi së fundmi, vet autori Brdhoish Gaçe.
Libri Monografik mbi atdhetarin e shquar Spiro Jorgo Koleka, i iniciuar dhe sponsorizuar nga trashëgimtarët e familjes Koleka, me kujdesin dhe parathënien e shkrimtarit Nasho Jorgaqi dhe me autor Bardhosh Gaçen, ka redaktor dhe korrektor letrar Stavri Sharrëxhi dhe është botuar nga cilësisht nga Shtëpia Botuese “Maluka”, në 224 faqe.
Publicisti, historiani, poeti dhe shkrimtari vlonjat Prof, Dr. Bardhosh Gaçe, Mjeshtër i Madh, në vazhdim të krijimtarisë së tij të shquar për atdhetarët e spikatur vlonjat e mbarëkombëtar, me 20 librat e tij cilësore e voluminoze, kryesisht të estetikës letrare, monografisë historike dhe poezisë për fëmijë, me veprën e re, thellohet dhe më shumë dhe përqendrohet e hedh dritë e njohuri të reja, për një prej bijve të shquar të fisit Koleka të Vunoit të Vlorës, mbështetës i Qeverisë së Ismail Qemalit, diplomat e pjesëmarrës i Luftës së Vlorës më 1920, senator i Krahinës së Vlorës në Kongresin e Lushnjës, deputet e deri diplomat e përfaqësues fuqiplotë e ministër i punëve botore dhe bujqësisë vite më vonë, gjithnjë si pjesëtar i krahut përparimtar i Partisë Popullore me Nolin e Gurakuqi me shokët dhe i mbështetjes demokratike të shoqërisë shqiptare, po më pas edhe si anti Zogist e anti Italian.
Libri monografik mbi jetën e atdhetarit, inxhinierit të ndërtimit, Spiro Jorgo Koleka, paraqet të plotë me fakte, fotografi dhe dokumente, një jetë aktive, plot vuajtje e peripeci edhe veprimtarinë e një himarjoti të shquar. Në këtë monografi, ashtu si në veprën tjetër “HIMARA NË SHEKUJ”, me autor Bardhosh Gaçen, paraqiten edhe më mirë përpjekjet direkte të protagonistit për shqiptari e përparim.
S’ka dyshim se veprimtaria aktive e Spiro Jorgo Kolekës është më shumë e rëndësishme në shkallë kombëtare por njëkohësisht sidomos është e spikatur, domethënëse dhe vendimtare për kundërvënien ndaj sillogeve verioepirote, që ngulmonin, nëpërmjet renegatëve Niko e Spiro Milo, në ato vite të vështira të Pavarësisë Kombëtare, për mos ta bashkuar Himarën me Shqipërinë. Në ato ditë kritike të vitit 1921 ish kryeministri Iliaz Vrioni dhe Ministri i Brendshëm Mehdi Frashëri ngarkuan si delegat fuqiplotë për zgjidhjen e “çështjes së Himarës”, deputetin e Vlorës, z. Spiro Jorgo Koleka. Ishte pikërisht autoriteti, kompetenca, zgjuarsia dhe diplomacia e Spiro Jorgo Kolekës, që diti të përcaktoi kompromiset e nevojshme me lëshime logjike në 10 pika mirëkuptimi dhe që pas shumë përpjekjesh, arriti në rrugë paqësore të bindi edhe pjesën himarjote kundërshtare e progreke, për vazhdimin normal të bashkëjetesës shqiptare në këtë krahinë të trazuar e të turbulluar nga politika shoviniste greke, me rrezik eminent shkëputje nga Shqipëria.
Pas kësaj në Himarë u vendos administrata shqiptare dhe u përzu Niko Milo e kompani, duke goditur rëndë politikën shoviniste greke për helenizim. Ishte koha kur vetë himarjotët i kërkuan Këshillit Kombëtar Shqiptar bashkimin në front me vëllezërit e tyre shekullor. Ky qëndrim, në kushtet e testimit popullor të “vetëvendosjes”, ishte i rëndësishëm dhe vendimtar, kur në Lidhjen e Kombeve, në Konferencën e Ambasadorëve të Londrës të vitit 1913, u përcaktuan përfundimisht kufijtë e Shqipërisë.
Promovohet libri për gjyqin e Ramush Haradinajt në Hagë
-“Haga e Ramush Haradinaj” është botimi i radhës i UET Press që u promovua sot në Universitetin Europian të Tiranës. Libri ka për autor Michael O’Reilly, koordinatori i ekipit mbrojtës të Ramush Haradinajt në Hagë. O’Reilly e Haradinaj ishin vetë të pranishëm në ceremoni, krahas shumë personaliteteve të tjerë të jetë publike në Shqipëri e Kosovë.
Presidenti i UET, Adrian Civici në fjalën hapëse të ceremonisë vlerësoi librin duke thënë se ai nuk është një botim thjesht për një personazh, por për një kauzë kombëtare.
“Ky është libër për mënyrën se si me shumë dinjitet, një problem dhe një keqkuptim i madh përsa i përket lëvizjes për liri dhe pavarësi të shqiptarëve në Kosovë, u keqpërdor apo u keqinterpretua në arenën ndërkombëtare”,- tha Civici.
Për autorin e librit, Michel O’Reilly ishte hera e parë që vizitonte Shqipërinë.
Në fjalën e tij para të pranishmëve, teksa shprehu falenderimet për UET Press që solli në shqip librin e tij ai tha se “ka qenë një kënaqësi për mua të shkruaj këtë libër që ia dedikoj kujtimit të Shkëlzen, Luan dhe Enver Haradinaj. Duke punuar me shumë udhëheqës vendesh, nuk më ka qëlluar shpesh të ndeshem me një individ, që të ketë të kombinuar kapacitetet intelektuale dhe aftësisë qeverisëse sikundër Ramush Haradinaj i ka.
Largimi i tij në 2005 ishte një tragjedi për Kosovën, por sot është sërish mundësia që Haradinaj të jetë në krye të vendit. Shpresoj që kjo të ndodh”.Vetë protagonisti i librit, Ramush Haradinaj, në fjalën e tij risolli para të pranishmëve sakrificën e popullit të Kosovës për liri dhe pavarësi.“Mendoj se ka ndodhur drejtësia me luftën, me lirinë e Kosovës.
Në përballjen me Hagën kam qenë disi i zënë vetëm, pasi Kosovën dhe Shqipërinë i zuri përditshmëria e problemeve dhe çështjeve, por jo krejt i vetëm, pasi kam pasur një ekip mbrojtje shumë të mirë. Sot është një emocion i madh, një ndjenjë e përzier, por edhe një shpresë që edhe ne do të dimë të kultivojmë vetëveten”,- u shpreh Haradinaj.
I pranishëm në ceremoni, krahas shumë personaliteteve të tjerë ishte edhe Pandeli Majko, ish- kryeministër i Shqipërisë në kohën kur po zhvillohej lufta e Kosovës. Majko vlerësoi figurën e Haradinajt si luftërar, politikan dhe si mik i tij. Në përfundim të ceremonisë iu dha hapësirë studentëve për t’i drejtuar pyetje të ndryshme Haradinajt, aktualisht kryetar i Aleancës për Ardhmërinë e Kosovës dhe një prej pretendentëve për t’u bërë kryeministër në zgjedhjet e 8 qershorit. Ne librin “Haga e Ramush Haradinaj” tregohet gjithë saga e ish-komandantit të UÇK-së në betejën e tij me drejtësinë ndërkombëtare si dhe hidhet dritë mbi shumë akuza të sajuara, me qëllim që ai të dënohej për krime që nuk i kishte kryer./a.gegvataj/
PROMOVOHET NE TIRANE “NUSE NË DERËN E HASMIT” I PANDELI SIMSISË
Nga Prof. Murat Gecaj/ Të martën paradite, në sallën “Tefta Tashko”, të Ministrisë së Turizmit, Kulturës, Rinisë dhe Sporteve, u organizua përurimi i romanit “Nuse në derën e hasmit”, me autor Pierre-Pandeli Simsia, banues familjarisht në Nju Jork. Kishin ardhur familjarë, kolegë e miq të autorit, shkrimtarë, poetë e publicistë, nga media e shkruar dhe ajo elektronike etj.
Tubimin e rastit e hapi Irena Toçi, drejtoreshë e SHB “Toena”, e cila foli shkurt për këtë botim të ri të autorit P.Simsia, në vazhdim të botimeve të mëparshme. Më konkretisht për këtë roman, foli redaktori i tij, shkrimtari Bardhyl Xhama-“Mësues i merituar”. Ai e përshkroi shkurtimisht subjektin, i cili rrëfen për një plagë të rëndë shoqërisë shqiptare, siç është gjakmarrja. Në vazhdimësi, rreth vlerave letrare të kësaj vepre, sidomos për gjuhën e pasur letrare, u ndal shkrimtari tjetër, Gaqo Bushaka. Po kështu, e përshëndetën autorin për librin e tij, shkrimtari Fatos Kongoli dhe publicisti gjerman, Fritz Shulc.
Nga një shënim, në Internet, për përmbajtjen e këtij romani, lexojmë edhe këto radhë: “Në këtë libër do të gjeni grimca të jetës suaj: realitet, dashuri, sakrificë, dhimbje, por mbi të gjitha shpresë dhe njerëz, që dinë të falin. Ngjarjet janë të vendosura në dy realitete: Shqipëri dhe Amerikë, ku personazhet kryesore janë dy të rinj shqiptarë, që jetojnë në Amerikë dhe rastësisht takohen në vagonët e një treni dhe, falë bisedave të tyre, lindi një shkëndijë dashurie. Por romani nuk mbaron këtu. Personazhe dhe rrethana të tjera, shtjellimi i dukurisë së gjakmarrjes, i trajtuar me mjaft mjeshtëri nga autori, do ta mbajë pezull vëmendjen e lexuesit”.
Në mbyllje të kësaj veprimtarie të bukur dhe mbresëlënëse, si folësit e pjesëmarrësit, i falënderoi autori i romanit Panadeli Simsia, për të cilin një diskutant tha se ky “erdhi dhëndërr në shtëpinë e tij”. Pastaj, të pranishmit bënë fotografi së bashku me atë dhe morën pjesë në një koktej të rastit.
2
Isha “njohur” me këtë autor të talentuar librash përmes Internetit. Ndërsa ai, me tipin e tij të njeriut dashamir, të respektueshëm dhe të afrueshëm me të tjerët, në verën e vitit të kaluar, më telefonoi nga Durrësi e më tregoi se kishte ardhur atje me familjen, nga Nju Jorku. Pa e zgjatur, ai u nis menjëherë me bashkëshorten dhe arritën në kryeqytet. Ishte një takim befasues e i mirëpritur për të dyja palët. Tashmë, ne u njohëm nga afër, ku në shoqëri me ne ishte edhe publicisti i njohur e autor i disa librave, Albert Zholi. Sigurisht, me atë rast, bëmë disa fotografi të përbashkëta, që i kemi kujtim, nga ai takim. Shënoj këtu se, kështu, u njoha më mirë dhe me jetën e krijimtarinë letrare të shqiptar-amerikanit Pierre-Pandeli Simsia. Sigurisht, përurimi i romanit, për të cilin folëm më lart, ku isha i pranishëm sot, e forcoi edhe më shumë lidhjen tonë, formuar ndërmjet krijuesish.Pandeliu ka lindur në qytetin e Beratit, më 21 qershor 1960, nga një familje farmacistësh. Gjatë shkollimit të tij në vendlindje, i lindi dashuria për muzikën dhe më fort pasioni për letërsinë. Edhe pas diplomimit për ekonomi-financë, nuk u shkëput asnjëherë nga krijimtaria letrare e publicistike. Pas vitit 1990, emigroi familjarisht në Greqi dhe që nga viti 1997 jetojnë në Nju Jork, fitues të llotarisë amerikane. Atje nisi bashkëpunimin me gazetën shqip-anglisht “Illyria”, por dhe me shtypin në Shqipëri, si: “Koha Jonë”, “Shekulli”, “Sot”, “Tema,”Dita” e “Tirana Observer”. Gjithashtu, bashkëpunon rregullisht me faqe të ndryshme Interneti.Një pasion i veçantë i P.Simsisë është krijmtaria letrare. Pas botimit të tij të parë, pra vëllimit me tregime “Le të jem unë, Zamira…” (Tiranë, 2005), një vit më vonë doli para lexuesve me romanin interesant, “Një dashuri e vrarë”(Tiranë, 2006). Janë shkruar artikuj e janë dhënë mendime vlerësuese për të edhe nga lexues të ndryshëm, ndër të cilët janë shprehur, me shkrim: Afërdita Lika, studentët Arian Delia e Neritan Miftari, Gueset-Dragoti, Tatjana Strumi etj. Përmbajtja kryesore e tij është krimi tepër i shëmtuar i trafikimit të femrave shqiptare, një plagë e re dhe e hapur kjo, për shoqërinë tonë. Më tej, botoi librin me tregime “Kafeja”(Tiranë, 2010) dhe “Faleminderit!”(publicistikë). Me mjaft inters është monografia “Dr.Selahedin Velaj, legjenda vlonjate në Amerikë” (Tiranë, 2012), libër i cili u përurua dhe u vlerësua shumë, gjatë përurimit të tij, në korrikun e vitit të kaluar, në qytetin e Vlorës. Për krijimtarinë e tij është nderuar me disa çmime, në SHBA, si: “Pena e artë”, “Petro Marko” etj. Për këto merita, ai është zgjedhur sekretar i Përgjithshëm i Shoqatës së Shkrimtarëve Shqiptarë-Amerikanë.
…Përurimi i romanit të ri, të kolegut e mikut e, tashmë, shkrimtarit të afirmuar, Pierre-Pandeli Simsia dhe venja e tij në duart e lexuesve shqiptarë, është një arritje e re për të, por dhe prurje tjetër me vlerë, në fushën e letërsisë sonë. Me këtë rast, e përshëndesim dhe e urojmë nga zemra atë: për shëndet të mirë, krijimtari sa më të frytshme, begati dhe lumturi familjare!
Tiranë, 21 maj 2013