Nga Arben Llalla/

Greqia po kërkon të luajë rolin e xhelatit të Ballkanit duke ju vendosur haraç vendeve të varfra që kanë mbetur jashtë anëtarësimit në NATO dhe BE. Ministri i jashtëm i Greqisë Nikos Kotzias para dy ditësh deklaroi se pasi të ndërrohet Kushtetuta e Maqedonisë, identiteti, heqja e përmendoreve mitologjike, e kështu me radhë, do të organizojë party.

Kurse në lidhje me kushtet që i ka vënë Shqipërisë për votën greke për në BE, Kotzias ka deklaruar se po vendosim rregull në Shqipërinë e kaosit.

Deri tani Greqia e ka detyruar qeverinë e Shqipërisë të nxitojë hapat për ndërtimin e varrezave të ushtarëve grekë, dhënien e shtetësisë shqiptare për ish-oficerin e zbulim-kundërzbulimit Anastas Janullatosit, sot me detyrë kryepeshkop i Shqipërisë, eliminimin nga skena politike të partisë PDIU-së, zgjerimin e zonave të njohura si ekskluzive për pakicën greke, zgjidhjen e pikave të kufirit tokësor dhe detar, heqjen e termit “çam” dhe “Çamëria” nga librat shkollorë të historisë e gjeografisë.

Megjithëse qeveria “Rama 2” pothuajse i ka plotësuar kërkesat e Nikos Kotzias, Greqia ende nuk është e gatshme të heqë Ligjin e Luftës me Shqipërinë, apo të japë votën pozitive për çeljen e bisedimeve për anëtarësimin e Shqipërisë në BE.

Kushtet e reja që Greqia do t’i vendosë Shqipërisë për në BE në të ardhmen do jenë edhe më ekstreme. Nëpër sallonet e ministrisë së jashtme të Greqisë po flitet për një projekt-kushtëzimi ndaj Shqipërisë për të njohur Autonominë e Veriut të Epirit, faza e parë për këtë njohje do jetë zgjerimi i zonave të pastërta, ku jeton pakica greke me Korçën dhe Himarën. Më tej, kërkesa vazhdon për tetë vende të sigurta në Kuvendin e Shqipërisë për pakicën greke, dy vende për pakicën bullgare dhe nga një vend për pakicat e tjera, serbe, malazeze, vllehe, egjiptiane dhe rome. Këto do kërkohen në bazë të të Drejtave të Njeriut.

Por, në fillim Greqia do t’i kërkojë Shqipërisë ndryshimin e Kushtetutës, ku ulëse të sigurta në Kuvend t’u garantohen pakicave përjetësisht. Atëherë Shqipëria do të njihet si vend multietnik.

Plani i Greqisë për zgjedhjet e 2019 është fitimi i Bashkisë së Konispolit për të krijuar më tej Asociacionin/Bashkësinë e bashkive që udhëhiqen nga pakica greke si Konispoli, Finiqi, Dropulli, Himara, Saranda.

Përpjekja e Greqisë do jetë frontale dhe e ashpër për të caktuar kandidatë me kombësi greke me logon e partive shqiptare PS, PD dhe LSI për të fituar bashkitë në fjalë edhe më tej këta kryetarë bashkie do shkëputen nga partitë tradicionale shqiptare dhe do themelojnë Asociacionin/Bashkësinë e bashkive greke.

Ashtu siç thotë edhe një fjalë e urtë popullore “Oreksi vjen duke ngrënë” dhe Greqisë oreksi po i shtohet, pasi i kemi plotësuar kërkesat e saj ekstremiste për cungimin e tokës sonë.

Grupimet ekstremiste greke në bashkëpunim me institucionet shtetërore të Greqisë janë duke punuar që ëndërra për Megali Idea dhe Aneksimi i Jugut të Shqipërisë të realizohet me kushtëzimin e votës së Greqisë dhe Qipros për anëtarësimin e Shqipërisë në BE. Deri atëherë duhet të vendosen njerëzit e tyre në drejtimin e disa institucioneve shtetërore të Shqipërisë, të zgjidhet njeriu i tyre nazisti D.Z. në krye të OMONIA-s në qershor 2018, themelimin e një partie të re ekstremiste të pakicës greke pas dështimit të PBDNJ dhe MEGA.