Idrizi: Nga Fieri u bëj thirrje PD e PS, votoni sa më parë Ligjin e Katërt të Integrimit Europian. Votoni Rezolutën Çame!/

Partia Drejtësi, Integrim dhe Unitet dhe Klubi i Patriotëve të Rinj zhvilluan pasditen e sotshme një takim madhështor në qytetin e Fierit, në kuadër të organizimit të strukturave të Klubit të Patriotëve të Rinj në të gjithë Shqipërinë. I pranishëm në këtë aktivitet ishte dhe kryetari i Partisë Drejtësi, Integrim dhe Unitet, z. Shpëtim Idrizi. Gjatë fjalës së tij, Idrizi theksoi se Klubi i Patriotëve të Rinj është i vetmi grupim rinor i cili ka arritur të tregoi forcën e tij me vepra konkrete dhe jo më fjalë.
Zoti Idrizi u ndal dhe tek Rezoluta për Zgjidhjen e Çështjes Çame duke i bërë dhe një herë thirrje të gjithë deputetëve të Parlametit të Shqipërisë që të mos shohin ngjyrat e flamujeve të partive por të shohin flamurin kombëtar. “I bëjë thirrje të gjithë deputetëve që për ta çuar Shqipërinë në Europë nuk janë 3 ligje, por janë 4 dhe i katërtit është Rezoluta për Çështjen Çame. Le të bëhemi të gjithë bashkë këtë herë, që të votojmë për Shqipërinë dhe për rrugën e saj Europiane” – theksoi zoti Idrizi. Gjithashtu, kryetari i PDIU-së u ndal edhe tek zgjedhjet e 23 qershorit, duke shprehur sigurinë se Partia Drejtësi, Integrim dhe Unitet do të përfaqësohet nga 5 deputet në legjislaturën e ardhshme.

Ndërkaq, kryetari i PDIU-së, dega Fier, zoti Nustret Avdullai shprehu bindjen se nga qarku i Fierit PDIU do të arrij të çojë në Parlamentin e ardhshmë 2 deputet.

Kryetari i Përgjithshëm i Klubit të Patriotëve të Rinj, z. Ardit Bido vuri në pah arritjet e KPR-së gjatë këtyre dy viteve dhe theksoi dhe një herë se janë të rinjtë ata që duhet të çojnë akoma më përpara çështjen kombëtare. “Ndihemi i lumtur që jam sot këtu, mes qindra e mijëra të rinjëve të qytetit të Fierit, duke treguar se ne të rinjtë patriotë jemi këtu për të kërkuar të drejtat e kombit shqiptar sot e jo nesër. Jemi këtu për të mbrojtur kombin tonë dhe për të ngritur zërin ndaj padrejtësive me veprime konkrete e jo me deklarata shtypi nga zyrat.” – mbylli fjalën e tij Kryetari i Përgjithshëm i Klubit të Patriotëve të Rinj, z. Ardit Bido.