Këshilltari i Nishanit, Klevis Balliu, takime në SHBA me kongresmenin Golden dhe senatorët Murphy dhe Bonaçiç/

Këshilltari i presidentit Nishani ka patur javën e fundit një sërë takimesh në Uashington e Nju Jork, ku u prit nga kongresmeni Golden, senatorët Murphy e Bonaçiç si dhe një numër anëtarësh të Asamblesë së Shtetit të Nju Jorkut. Zoti Balliu u takua edhe me shefen e Departamentit Amerikan të Shtetit për trafikimin e qenieve njerëzore, zonjën Susan Coppedge.

Senatori Golden: Administrata “Trump” do t’i kushtojë rëndësinë e duhur Shqipërisë dhe Ballkanit…..

Këshilltari për Marrëdhëniet Ndërkombëtare i Presidentit Bujar Nishani, Klevis Balliu, këtë javë zhvilloi një tur takimesh në Uashington e Nju-Jork ku u takua, me senatorë, kongresmenë dhe anëtarë të Asamblesë së Nju-Jorkut. Gjatë takimeve, u diskutua kriza politike e Shqipërisë si dhe u nda shqetësimi ndërkombëtar për shndërrimin e vendit tonë në një adresë fatkeqe të prodhimit dhe trafikimit të narkotrafikëve. Këshilltari i presidentit Nishani, Klevis Balliu shprehu shqetësimin për situatën paraelektorale në vend, çka po e bën të pamundur mbajtjen në Shqipëri të zgjedhjeve të lira e të ndershme. Ai theksoi se sipas denoncimeve dhe raporteve të organizatave të specializuara ndërkombëtare, duket se qeveria është e implikuar në këtë trafik, prandaj edhe për këtë arsye mbase është e nevojshme krijimi i një qeverie teknike, e cila do te siguronte stabilitet dhe do të krijonte parakushtet për mbajtjen e zgjedhjeve të lira e të ndershme.Gjatë takimit me senatorin Martin Golden, ky i fundit konfirmoi faktin se “SHBA mbështet plotësisht çdo zgjidhje politike që do të çonte vendin në zgjedhje të lira. Senatori Golden u shpreh se në Uashington, momentalisht jemi në një administratë në tranzicion, por jam i bindur se administrata “Trump” do t’i kushtojë rëndësinë e duhur Shqipërisë dhe Ballkanit. Administrata Trump do të jetë një administratë e cila do të përmirësojë gabimet e së kaluarës” tha ndër të tjera senatori Golden.

Këshilltari i presidentit Nishani, Klevis Balliu u takua edhe me Senatorin e shtetit Konektikat Chris Murphy, si dhe senatorin e Nju Jorkut John Bonacic. Pas ekspozesë së Balliut mbi gjendjen në Shqipëri dhe krizën që po vë në rrezik stabilitetin e vendit, senatorët u shprehën se “SHBA është e interesuar për intensifikimin e luftës kundër trafikut të drogës”. Ata theksuan se SHBA do të vijojë të informohet edhe më tej mbi çështjet e ngritura nga këshilltari i presidentit Nishani, në mënyrë që Shqipëria të ndihmohet të ecë përpara drejt demokratizimit të plotë të saj.

Gjatë vizitës së tij në Nju Jork, Klevis Balliu u takua me disa anëtarë të Asamblesë së Shtetit të Nju Jorkut, me të cilët ndau mendime lidhur me ndihmën që mund të japin autoritetet amerikane për daljen e Shqipërisë nga kriza e rëndë politike, financiare dhe e sigurisë.

Takimi me këshilltarin e kongresmenit Eliot Engëll/Këshilltari i presidentit Nishani takoi në Uashington DC këshilltarin për marrëdhëniet ndërkombëtare të kongresmenit Eliot Engel, zotin Jason stainbaun. Gjatë takimit, këshilltari i presidentit e informoi zotin Stainbaun mbi situatën e rëndë ku ndodhet sot Shqipëria për shkak të mbjelljes masive të trafikut të drogës dhe reperkusioneve që sjell kjo ekonomi e kriminalizuar. Gjithashtu zoti Balliu shprehu shqetësimin se në rast se do shkohet ne zgjedhje pa opozitën, vendi mund të kalojë në destabilitet, çka do të ishte një kthesë mbrapa në procesin e vështirë të anëtarësimit të vendit në Shqipëri.

Takimi me Susan Coppedge/Klevis Balliu, këshilltari i Presidentit Nishani për marrëdhëniet ndërkombëtare, takoi në Uashington shefen e Departamentit Amerikan të Shtetit për trafikimin e qenieve njerëzore, zonjën Susan Coppedge. Gjatë takimit, zoti Balliu e informoi zonjën Coppedge mbi përmasat shqetësuese që ka marrë trafiku i drogës në Shqipëri dhe shprehu shpresën në një angazhim më të madh të Departamentit të Shtetit për çështjen e drogës pasi nëpërmjet saj po trafikohen edhe qenie njerëzore. Zonja Coppedge mirëpriti ekspozenë e zotit balliu dhe deklaroi se do t’i kushtojë vëmendjen e duhur çështjes së trafikut masiv të drogës në Shqipëri.