TIRANË, 14 Gusht / Nga Nikolla Lena/ – Në qytetin e Prizrenit u organizua një takim për të diskutuar në lidhje me realizimin e projektit për hapjen e një shtegu turistik ndërkufitar Shqipëri- Kosovë – Maqedoni, i cili do të kalojë nëpërmjet zonave të mbrojtura të tre vendeve, duke filluar nga Parku i Shebenik – Jabllanices, Korab- Koritnikut dhe Sharrit.
Në këtë takim morën pjesë përfaqësues të AdZM Kukës, AdZM Librazhd, Agjensionit të Zonave të Mbrojtura Prizren, përfaqësues të Komunës Shtërpce Kosovë, Shërbimit Turistik, komuna Gostivar, përfaqësues të Shërbimit Turistik, komuna Tetovë, përfaqësues të operatorëve turistikë nga të tre vendet.
Ky shteg do të kontribuojë në përgatitjen e paketave turistike të përbashkëta, në promovimin e vlerave natyrore, turistike e etnokulturore të rajonit. Projekti mbështetet nga GIZ, Shqipëri, Kosovë dhe Maqedoni
Korça çel sezonin turistik me Festivalin Ndërkombëtar të Karnavaleve
Nga Nikolla Lena/Korça çel sezonin turistik këtë vit me Festivalin Ndërkombëtar të Karnavaleve që do të nisë më 7 Qershor.Kjo festë e bukur, bazuar në një nga traditat më të spikatura të qytetit të kulturës, fton në Korçë vizitorë nga e gjithë Shqipëria si edhe shumë turistë të huaj të cilët së bashku me qytetarët korçarë, të festojnë e të shijojnë paradën e grupeve të karnavaleve dhe të bëhen pjesë e festimeve.
Me sloganin “Korça qyteti i festave”, Bashkia e Korçës prej vitesh tashmë ofron një paketë të plotë eventesh festive të cilat sjellin në qytet një numur të madh vizitorësh. Sezoni turistik i qytetit malor, kulmon çdo vit në gusht me Festën e Birrës, këtë vit nga data 13-17 gusht.
Karnavalet edhe këtë vit do të sjellin paradën muzikore, gazin dhe harenë e maskave si dhe koloritin e kostumeve të shumta. Rreth 30 grupe pjesëmarrëse do të paraqiten me fabulën e tyre të shoqëruar me koreografi dhe skenar të veçantë. Krahas grupeve nga Korça dhe qytete të tjera të vendit, festivali i përmasave ndërkombëtare do të sjellë edhe karnavalet nga trevat e Ballkanit.
Veç grupeve pjesëmarrëse edhe qytetarët e Korçës veshin maskat dhe kostumet e tyre dhe i bashkohen festimeve.
Korça është një ndër qytetet e para që rizgjoi traditën e karnavaleve duke krijuar në vitin 1992 Shoqatën e Karnavalit si pjesë e Shoqatës Kombëtare të Karnavalit Shqiptar. Në 10 Prill të vitit 1994, në Korçë u organizua Festivali i Parë Ndërkombëtar i Karnavalit në Shqipëri. Një vit më pas u organizua Festivali i Dytë Ndërkombëtar i Karnavalit me përmasa akoma më të mëdha. Që nga ky vit dhe deri sot, grupi i Karnavaleve të Korçës është përfaqësuar në një sërë festivalesh ndërkombëtare të organizuara në vende të ndryshme europiane.
Korça është pjesë e FEEC (Federata e Karnavalit Europian). Në vitin 2013 qyteti i Korçës përfaqësoi Shqipërinë në Festivalin Ndërkombëtar të Karnavaleve, Srumicë- Prilep 2013 në Maqedoni. Në këtë festival merrnin pjesë 57 grupe, që përfaqësonin shtete të ndryshme të botës si Kroacia, Sllovenia, Mali i Zi, Polonia, Ukraina, Belgjika, etj.
Bunkerët si pelegrinazh turistik
Gjatë udhëheqjes gati 50-vjeçare të periudhës komuniste, mbi 700.000 bunkerë u ndërtuan në të gjithë vendin. Mesatarisht mund të llogaritet si një bunker për çdo katër banorë. Këta bunkerë, me një shpërndarje mesatare prej 24 në çdo km katror, janë ende të kudondodhur në Shqipëri. Mund të thuhet që Shqipëria është pothuaj unike me bunkerët e saj, në ndonjë rast të kthyer në vepra arti sepse fantazistët piktorë, i kanë mbuluar me shumë ngjyra.Tashmë ata janë kthyer në një atraksion turistik për vizitorët e huaj që bëhen kurioze të dinë se çfarë janë bunkerët.Një rast i till duhet të tërheq vëmendjen edhe të pushtetit lokal për t’i shfrytëzuar si mundësi burimi turistik.Kuriozët dhe aventurierët drejt gjërave të rralla janë të shumtë dhe kjo mundësi nuk duhet humbur. (N Lena)