Situata parazgjedhore mjaft e nderë tregon se Partia Socialiste, që kryeson sot qeverinë e Republikës së Shqipërisë i ka kurdisur planet pa marrë parasysh kërkesat e opozitës e në vecanti ato të të përndjekurve të ndërgjegjes, forcës më brilante të shoqërisë sonë. Mirëpo rëndësia që kanë posti i Presidentit dhe ai i Kryetarit te Gjykatës Kushtetuese për ecurinë e reformës në drejtësi, na shtyn të shprehim disa mendime pse personalitete të shquar të opozitës shqiptare nga radhët e të përndjekurve të ndërgjegjes, si shkrimtari i talentuar Visar Zhiti dhe analisti i mprehtë avokati Spartak Ngjela duhet të caktohen dhe të zgjidhen sa më parë në postet e rëndësishme të Presidentit dhe të Kryetarit të Gjykatës Kushtetuese.Deri sot të përndjekurit e ndërgjegjes janë mbajtur larg nga pushteti, prandaj Shqipëria është kthyer në një vend prej të cilit duan të ikin të gjithë të rinjtë, sepse aty mungon morali dhe vlerësimi i së vërtetës, sepse këtë mund ta sjellin vetëm ata që kanë vuajtur prej diktaturës komuniste dhe jo ish komunistët, ish sigurimsat e bijtë e tyre që kanë veshur rroba blu ose rozë.

Zgjedhja e këtij personaliteti shqiptar, që ngjan aq shumë me Vaclav Havelin e Republikës Çeke, do të krijonte një imazh tjetër për Shqipërinë në planin ndërkombëtar, kurse në plan kombëtar do të tregonte se partitë politike, sidomos PS-ja, po ecin drejt emancipimit.