Ditën e premte më 4 qershor 2021 në New York, juristi i mirënjohur, eksperti i së Drejtës Kushtetuese Jordan Daci, vizitoi Federatën Panshqiptare të Amerikës Vatra. Ai u prit nga sekretarja Nazo Veliu, arkëtari i Vatrës Marjan Cubi, kryeredaktori i Diellit Dalip Greca, anëtari i Kryesisë së Vatrës Mark Mrnaçaj, ish Nënkryetari i Vatrës Asllan Bushati, anëtarët e Këshillit të Vatrës dr. Paulin Marku e Sokol Paja, vatrani Saimir Burgaj dhe gazetari Orest Çipa. Fjalën e mirëseardhjes e mbajti sekretarja Nazo Veliu, ndërsa dr. Paulin Marku bëri një prezantim rreth aktivitetit profesional të mikut të ri të Vatrës z.Daci. “Është një nder i veçantë të jesh në Vatër. Atë që ka bërë Vatra nuk e ka bërë asnjë organizatë tjetër shqiptare. Vatra ka qenë lidhje e fortë e shqiptarëve me Amerikën. Ju faleminderit për punën e jashtëzakonshme që bëni në Vatër. Shqiptarët i kanë sytë te Vatra dhe Uashingtoni” – deklaroi në fjalën përshëndetëse z.Daci. Shqiptarët rrezikojnë të mos jenë më faktor në Ballkan pas shpopullimit të Shqipërisë si pasojë e keqqeverisjes ku më shumë se 300 mijë familje nuk kanë të mundur miniumin jetik në Shqipëri – u shpreh i shqetësuar juristi Jordan Daci. Ai kërkoi që vatranët dhe shqiptarët e Amerikës të jenë sa më aktiv pasi situata në Shqipëri po përkeqësohet çdo ditë. Sipas Dacit, në Shqipëri ka filluar një frymë antiamerikanizmi që shqiptarët i dëmton. Kontributi juaj është jetik për Shqipërinë. Shpopullimi dhe pakësimi i popullsisë na defaktorizon si shqiptarë në Ballkan. Është domosdoshmëri ndalja e shpopullimit të Shqipërisë përsëriti me shqetësim juristi Jordan Daci. Shoqëria shqiptare ka nevojë politikisht për përfshirje dhe ekuilibra interesash. Prania amerikane në Shqipëri është më e madhe dhe më e fortë se kurrë. Ata kanë ardhur për të mos ikur më nga Shqipëria si pasojë e investimeve strategjike në fushën e sigurisë kombëtare, rajonale dhe globale – përfundoi fjalën e tij juristi Daci. Kryeredaktori i gazetës Dielli z.Dalip Greca e pyeti profesor Dacin për Zgjedhjet Lokale të vitit 2019, Zgjedhjet Parlamentare të 2021 dhe Komisionin Parlamentar të shkarkimit të Presidentit të Republikës Meta. “Zgjedhjet u projektuan që më përpara për tu manipuluar. Vota u ble dhe u manipulua. Në Shqipëri ka 30 vjet që nuk njihen zgjedhjet. Ne jemi larg standardeve për të bërë gjykatat hetime për zgjedhjet. Opozita duhet të bindë njerëzit se zgjedhjet u manipuluan dhe opozita duhet të frymëzojë njerëzit që ta votojnë. Kreu i shtetit Meta edhe pse kishte të drejtë përballë një sistemi të tërë, disa deklarata dhe sidomos përplasja me ambasadoren amerikane ishin të tepruara. Nuk ka shkelje për ta shkarkuar presidentin Meta. Nuk ka shkelje të rënda. Parlamenti është legjitim dhe Komisioni i Venecias në rastin e anullimit të dekretit e dha opinionin e saj se nuk kishte shkelje të rënda të kryera nga Presidenti – saktësoi juristi Daci. Më tej eksperti i të Drejtës Kushtetuese Daci bëri thirrje që figura të larta kombëtare si At Gjergj Fishta të studiohen dhe të promovohen sa më shumë nga shqiptarët e Amerikës pasi janë personalitete që na lartësojnë si komb. Z.Burgaj diskutoi mbi kushtetutshmërinë e shkarkimit të Presidentit Meta, z.Bushati diskutoi rreth çështjes së sigurisë kombëtare në tërë shqiptarinë, z.Cubi zgjoi interesin e diskutimit rreth antiamerikanizmit në Shqipëri. Z.Mrnaçaj dhe z.Çipa diskutuan rreth atmosferës politike në Shqipëri me sfond situatën e shkarkimit të Presidentit të Republikës Meta. Në fund të takimit miqësor z.Greca i bëri një ekspoze të gjerë rreth rolit të Vatrës në çështjen kombëtare që nga shpallja e Pavarësisë e deri në ditët e sotme.
