Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Nishani: Kandidatura e Xhafajt si ministër, e papërshtatshme

by

  • Në Shqipëri presidenti Bujar Nishani tha të Dielën në mbrëmje se ai ishte kundër kandidaturës së zotit Famir Xhafaj për ministër të Brendshëm, i propozuar nga kryeministri Edi Rama pas shkarkimit javën e shkuar të ministrit Sajmir Tahiri. A e konsideroi atë një kandidaturë të papërshtatshme, por saktësoi se Kushtetuta nuk ja njeh atij kompetencën për të refuzuar një kandidaturë për ministër, pas në rast të kundërt ai nuk do ta kishte dekretuar atë. Qëndrimi i tij vjen në një moment tensioni të theksuar politik. Opozita e ka kundërshtuar me forcë kandidaturën e zotit Xhafaj, ndërsa këmbëngul në kërkesën për qeveri teknike. Kryeministri Edi Rama anga ana e tij tha sot se zgjedhjet do të mbahen edhe nëse opozta vendos të mos futet në to./
  • Përmes një deklarate të shpërndarë për mediat, zoti Xhafaj saktëson se ai është shkëputur nga sistemi i Drejtësisë i kohës që në fund të vitit 1985, pra përpara ngjarjeve për të cilat akuzohet, duke nënvizuar gjithashtu se “asnjë ditë të jetës sime, nuk kam shërbyer në strukturat e sistemit të Sigurimit të Shtetit dhe Ministrisë së Brendshme të asaj kohe, dhe as në organet e hetimit që ishin pjesë e Ministrisë së Brendshme./

Përpara se të shprehej direkt për kandidaturën e zotit Xhafaj, presidenti bëri një vlerësim të gjatë të situatës politike në vend. “Opozita është jashtë parlamentit dhe është në një protestë publike, dhe njëkohësisht polarizimi i shoqërisë për fatin e keq është mjaft i theksuar, çka e ngarkon dhe me shumë situatën politike të vendit. Jemi pranë nisjes së fushatës elektorale dhe kjo situatë e tensionuar politike nuk e ndihmon procesin e fushatës dhe të vetë zgjedhjeve në një kohë që opozita ka artikuluar kërkesën për të garantuar zgjedhje të lira”, u shpreh zoti Nishani duke nënvizuar se “në këtë kontekst, të kësaj situate, edhe këto qëndrime e vendimarrje politike të përbërjes së Qeverisë kanë një speficikë të veçantë, dhe më e e veçanta, është te Ministria e Brendshme”.

Sipas presidentit Nishani “për fatin e keq, gjatë viteve të fundit është konstatuar një politizim i skajshëm i Policisë së Shtetit, çka e dëmton në tërësi situatën parazgjedhore”, tha ai duke vënë në dukje përgjegjësinë e policisë për përhapjen e kultivimit të marijuanës apo “konstatimi i lidhjeve të individëve të angazhuar në grupe të krimit të organizuar me politikën”. Kreu i Shtetit theksoi më pas rolin që Ministria e Brendshme ka lidhur me procesin zgjedhor. “Ajo ka përgjegjësi në garantimin e Rendit dhe të Sigurisë. Kemi parasysh përballjen dhe qasjen e fenomeneve të identifikuar dhe nga organizma ndërkombëtar, siç është shitblerja e votës, apo angazhimi i individëve me rekorde kriminale në fushatë. Ka përgjegjësinë për funksionimin e infrastrukturës për pushtetin lokal. Si dhe është prodhuese përmes Drejtorisë së Gjendjes civile, e listave të votuesve”.

Presidenti foli më pas edhe lidhur me “dëshmi publike,shqetësuese, të cilat akuzojnë kandidaturën e ministrit të Brendshëm për ushtrim dhune dhe torturë gjatë procesit hetimor jo vetëm ndaj subjekteve që hetohen por dhe familjarëve të tyre, për më tepër sipas dëshimeve publike, ky hetim fokusohet për shkak të reagimit të subjekteve nën hetim ndaj vdekjes së diktatorit”. Eshtë rasti i dy personave që për të njejtçn çështje, kanë pretenduar në media, se janë keqtrajtuar në mesin e viteve ’80 nga zoti Xhafaj.

“Në këto rrethana, në këtë kontekst të rëndësisë që ka angazhimi i strukturave të mininistrisë së Brendshme dhe garancive që duhet të japë personi që duhet të drejtojë së pari në respekt të lirive dhe të drejtave themelore të njeriut, të garantimit të paanshëm të ushtrimit të të drejtave themelore, posacërisht në proçeset zgjedhore që janë procese politike të përballjes së alternativave të ndryshme politike, në vlerësimin tim kandidatura e ministrit të Brendshëm është e papërshtatshme. Por Kushtetuta nuk ja jep të drejtën, presidentit të Republikës për të refuzuar një kandidaturë për ministër, pasi i vetmi kusht i cili përcakton Kushtetuta është ai plotësimit të kritereve për të qene deputet”, deklaroi presidenti Nishani due saktësuar se “në rast se kushtetuta do t’ja njihte të drejtën presidentit për të refuzuar kandidaturat e kryeministrit, në bazë të arsyetimeve, unë do ta refuzoja kandidaturën e ministrit të Brendshëm. Por në kushtet kur nuk ja jep këtë të drejtë presidentit, shpresoj dhe besoj se ai institucion të cilit Kushtetuta ja njeh këtë të drejtë, për të vlerësuar kandidaturat, që është parlamenti i Shqipërisë do të gjykojë dhe vlerësojë të gjithë rrethanat dhe specifikën që ka jeta shoqërore, politike e publike, që janë zgjedhjet e ardhshme politike”.

Prej disa ditësh opozita është shprehur publikisht kundër kandidaturës së zotit Xhafaj, madje duke i kërkuar pubkikisht presidentit Nishani mosdekretimin e tij. Kryetari demokrat Lulzim Basha përdori dhe terma të fortë e kërcënues pak ditë më parë kur tha se opozita zotohej se “Fatmir Xhafaj nuk do kalojë pragun e Ministrisë së Brendshme përveçse mbi trupat tanë”. Opozita prej më shumë se katër javësh këmbëngul në krijimin e një qeverie teknike si një kusht të panegociueshëm, ndërsa ka kërcënuar dhe me mospjesmarrjen e saj në procesin zgjedhor.

Te Dielen pasdite duke folur për kërkesat e opozitës, kryeministri Edi Rama, në komunikimin e tij javor përmes Facebook-ut u shpreh se zgjedhjet do të mbahen edhe nëse opozita nuk do të pranojë të futet. “Për të mos lënë asnjë ekuivok, lejomëni t’ju them për çdo rast, që një eventualitet i tillë më dhëmb seriozisht shumë, por seriozisht nuk më tremb aspak. Pavarësisht se mosparaqitja në zgjedhje e partisë më të madhe të opozitës, apo kujtdo partie tjetër parlamentare, është një anomali e rëndë, ne nuk do t’i bashkohemi kurrë një mungese të tillë haluçinante respekti të politikës për popullin. Ne – vijoi zoti Rama – do të respektojmë datën e zgjedhjeve dhe deri në atë datë do të angazhohemi në fushatë si asnjëherë më parë për të dalë përpara gjykimit të sovranit me sa shumë kemi bërë për Shqipërinë, për sa shumë mbetet për të bërë për shqiptarët dhe sa shumë kanë për të humbur Shqipëria dhe shqiptarët nëse kthehemi mbrapa. Jemi në marsin e 2017 dhe nuk jemi në marsin e 1997 dhe orën e përpjekjeve për të bërë shtet dhe ardhmëri për Shqipërinë e gjeneratës tjetër nuk e ndal dot kush dhe asgjë”, theksoi kryeministri.

***

Xhafaj hedh poshtë akuzat për të kaluarën e tij

Në Shqipëri, ministri i Brendshëm i emëruar javën e shkuar në këtë post, hodhi sot poshtë akuzat se gjatë ushtrimit të detyrës si hetues në prokurorinë e Krujës ka ushtruar dhunë dhe ka torturuar dy shtetas, lidhur me një çështje me sfond politik. Të dy personat që kanë akuzuar zotin Xhafaj përmes deklarimeve mediatike, janë shprehur se dhuna ndaj tyre është ushtruar në vitin 1986. Përmes një deklarate të shpërndarë për mediat, zoti Xhafaj saktëson se ai është shkëputur nga sistemi i Drejtësisë i kohës që në fund të vitit 1985, pra përpara ngjarjeve për të cilat akuzohet, duke nënvizuar gjithashtu se “asnjë ditë të jetës sime, nuk kam shërbyer në strukturat e sistemit të Sigurimit të Shtetit dhe Ministrisë së Brendshme të asaj kohe, dhe as në organet e hetimit që ishin pjesë e Ministrisë së Brendshme. Gjithçka ëshë thënë e komentuar këto ditë, janë thjesht shpifje të ulëta në funksion të fushatës politike të ndërmarrë kundër meje”.

Pas dëshmive mediatike, opozita e cila prej më shumë se katër javësh po vazhdon protestat poshtë zyrës së kryeministrit Edi Rama, reagoi me ashpërsi duke e quajtur emërimin e zotit Xhafaj “një provokim”, dhe “një akt luftë ndaj opozitës”, duke kërcënuar se nuk do të lejonte hyrjen e tij në zyrën e Ministrit të Brendshëm. Ne deklaratën e tij zoti Xhafaj shprehet se “jam i befasuar edhe nga mënyra që opozita ka zgjedhur për të përdorur historitë e dy emigrantëve, të cilët i ka kthyer në dëshmitarë të rremë, për të provuar një akuzë të rremë, në sallën e gjyqit të rremë të organizuar në selinë e re të Partisë Demokratike”.

Kjo çështje u përmend dje si argument dhe nga presidenti Bujar Nishani, se përse ai e cilësonte “të papërshtatshme” kandidaturën e zotit Xhafaj. Kreu i Shtetit saktësoi se po kryente dekretimin e tij vetëm sepse Kushtetuta nuk i linte hapësirë për të refuzuar propozimet e kryeministrit, ndërsa kërkoi që parlamenti të mund të mbante qëndrim për rastin.

Zoti Xhafaj u propozua nga kryeministri Edi Rama në vend të zotit Saimir Tahiri, si pjesë e disa lëvizjeve që ai bëri në kabinetin e tij duke ndryshuar dhe tre ministra të tjerë. Në një deklaratë për Zërin e Amerikës, ambasadori amerikan në Tiranë, Donald Lu u shpreh se “nëse zoti Xhafaj punon në mënyrë agresive kundër narkotikëve dhe krimit të organizuar, ai do të ketë mbështetjen tonë të plotë”, duke nënvizuar dhe bashkëpunimn e ngushtë që ka patur me të dhe gjatë procesit të Reformës në Drejtësi.

 

 

(Zeri i Amerikes)

DEBATI-Berisha: Jo emërime nga ndërkombëtarët; Xhafaj: Roli i tyre procedurial

by

Ish-kryeministri Berisha, duke folur për reformën në drejtësi në seancën e sotme plenare, akuzoi kryeministrin Rama se përjashtoi opozitën nga procesi.

“Fjala konsensus nuk ekziston për Edi Ramën, që udhëhiqet nga urrejtja më e madhe njerëzore, që celebronte fitoren me 1 milion grushta ndaj opozitës. Mbi këtë bazë Rama ngriti të famshmin komision të ekspertëve të nivelit të lartë”, ka thënë Berisha.
Sipas tij, këta ekspertë ishin njerëz të afërt me kryeministrin dhe figura politike të lidhura me krimin. “Po kush ishin këta ekspertë me në krye kryetarin e partisë komuniste të drejtësisë, mbrojtësin e klaneve të trafikut, Fatmir Xhafaj? Cilët ishin këta ekspertë?”, është shprehur Berisha, i cili ka renditur ekspertët në fjalë.
“Arben Rakipi, njeriu që akuzoi Sali Berishën, që ka poshtëruar institutin e akuzës sepse paraqiti si provë një shishe “Pepsi-Cola”. Ky ishte eksperti i nivelit të lartë. Tjetri ishte Kristaq Kraja, një njeri i shpërfytyruar nga bixhozi dhe rakia”, ka thënë Berisha.
Por sipas tij, ajo që bëri ky grup është edhe më keq. “Pasi mori një valixhe me para, ky grup hartoi një projekt me 70 nene kushtetuese në të cilat u garantua: më i vjetri i gjykatës së lartë do të emërohej në forumin e kontrollit të drejtësisë me 6 milionë lekë rrogë. Opozita shqyrtoi materialin dhe ia dërgoi Venecias, komisioni që kryetari i partisë komuniste të drejtësisë e bllokoi për 1 muaj. E bëri këtë sepse Venecia ua nxorri se çfarë drejtësie donin, që Rama të ishte kryeprokuror dhe gjykatës. Venecia ua rrëzoi variantin këtyre në 88 nene. Në 6 nene, u tha Venecia, ju shkelni konventat e të drejtave të njeriut”, ka thënë Berisha.
Më tej, ai ka sqaruar edhe pozicionin e PD në këtë proces. “Jemi për një rol të rëndësishëm të ndërkombëtarëve në procesin e vetingut, por emërimin e gjykatësve nga ndërkombëtarët nuk e pranojmë. Nuk mund t’i japësh sovranitetin ndërkombëtarëve”, ka sqaruar Berisha.
Ish-kryeministri është shprehur se propozimi i fundit i opozitës, që lejon vetingun por përjashton ndërkombëtarët nga ky proces, në gjykimin e tij është “i shkëlqyer”. “Propozimi i ri i opozitës është i shkëlqyer, por i negociueshëm”, ka thënë ai.

Xhafaj: Ndërkombëtarët, rol procedurial. Opozita, frikë nga reforma

Duke iu përgjigjur akuzave të ish-kryeministrit Berisha, kryetari i komisionit të posaçëm të reformës në drejtësi, Fatmir Xhafaj ka mbrojtur punën e ekspertëve të nivelit të lartë.
“Jam i nderuar që kam punuar me grupin e ekspertëve. Por nuk jam vetëm unë i nderuar, është edhe Komisioni i Venecias, edhe partnerët ndërkombëtarë. Ju harroni që ata ekspertë janë profesorë në këtë vend, që përgatisin brezat e ardhshëm të juristëve. Komisioni i Venecias i përgëzon anëtarët e komisionit ad hoc për punën në reformimin e gjyqësorit. Nuk ka vlerë ç’thotë Berisha, vlerë ka ç’thotë KV”, ka thënë Xhafaj.
Sipas tij, veç kësaj “Komisioni i Venecias beson se projekt ndryshimet mund të finalizohen pa vonesë”, por opozita ka probleme të tjera.
“Problemin e parë ju e keni me vetingun, me pastrimin e drejtësisë nga elementët e korruptuar e të lidhur me botën e krimit. Problemin e dytë e keni me prokurorinë speciale, me BKH-në, që thoni se i ka ndryshuar Venecia. Jo, nuk i ka ndryshuar. Shumë njerëz nga ju tremben nga këto. Kjo është e vërteta, një e vërtetë e hidhur”, ka thënë Xhafaj.
Më tej deputeti socialist ka hedhur poshtë pretendimet e opozitës se ndërkombëtarët do të emërojnë gjyqtarët.
“Që ndërkombëtarët do të emërojnë gjyqtarët, gënjeshtër më të madhe nuk ka. Ata do të vlerësojnë vetëm 21 vetët që do të bëjnë vetingun dhe nuk do të kenë rol vendimmarrës, por rol procedurial”, ka shtuar Xhafaj.
Në vijim të fjalës së tij, kreu i komisionit ka sqaruar edhe krahasimin e reformës në vendin tonë me ato analoge në Kroaci e Rumani, ku vetingu nuk është kryer. “Nuk e kanë Rumania e Kroacia? Nuk e kanë sepse nuk u është dashur të bëjnë veting”, ka sqaruar Xhafaj.

Blushi: Pasojat e dështimit të reformës i paguajnë qytetarët/

Deputeti Ben Blushi, duke folur në seancë plenare ka deklaruar se reforma në drejtësi është shumë afër dështimit.

Blushi ka theksuar se, situata konfliktuale për këtë proces ka bërë që të krijohet një përçmim nga ndërkombëtarët për klasën politike shqiptare. Por, më e rëndësishme në këtë aspekt, ka vijuar Blushi, është pasoja që do të ketë një dështim eventual.
“Nëse reforma në drejtësi nuk kalon nuk do të ndodhë asgjë. Jemi prapë ne që jemi pas një jave, pas 10 ditësh apo pas një vit. Çështja është kush paguan koston e mungesës së drejtësisë në Shqipëri”, ka thënë Blushi. Dhe këtë kosto, sipas tij e paguajnë qytetarët.
“Një grua dje po ecte në mes të Tiranës me dy fëmijë, del një i çmendur, e përplas me makinë dhe i merr jetën. A ka kjo lidhje me reformën në drejtësi? Ka. Sepse gjykatësi e liroi autorin për bakshish thonë dhe tani ai i mori jetën”, ka thënë Blushi.
Ai ka thënë më tej se, qeveria aktuale u ka marrë qytetarëve të gjitha të drejtat e zgjedhjes, duke vendosur njerëzit e saj në pikat kyçe të qeverisjes.
“Shkojmë në Kavajë. Kush e qeveris Kavajën sot? Një njeri që ka dalë nga burgu dhe qeveris nga shtëpia. Dhe ky njeri do lirohet, të jeni të bindur. Kjo është drejtësia? Po Dibrën kush e qeveris? Një deputet këtu përdori armën për punë personale dhe do të kthehet këtu që të votojë reformën në drejtësi. Ky është standardi se si veprohet në Shqipëri”, ka thënë Blushi dhe kjo sipas tij, “është pasojë e paaftësisë së Lulit dhe Edit për t’u marrë vesh”.
Situata e bën të nevojshme sipas Blushit zgjedhjen e presidentit nga populli dhe peticioni i tij, siç ka thënë ai, po gjen mbështetje. “Peticioni online është firmosur nga 10 mijë vetë”, ka shtuar Blushi.
/ Top Channel