Archives for May 2015

REVOLTA E SPAÇIT PËRKUJTOHET E NDEROHET NË NJU JORK

May 19, 2015 by dgreca

Pëllumb Lamaj i vlerësuar dhe nderuar nga Asambleja e Shtetit të Nju Jorkut dhe Këshilli i Bashkisë në NY, deklaroi për Diellin: Ky është një homazh për martirët dhe qëndrestarët e Spaçit e Qafë Barit, ky është një vlerësim për të gjithë ish të përndjekurit politikë të Shqipërisë, por ky është edhe një mesazh për klasën politike shqiptare, që për turp nuk ka arritë të dërgojë qoftë dhe një Kryeministër në Spaç! Premtimet e pambajtura ndaj ish të përndjekurëve-demagogji e tranzicionit antidemokratik!/
Nga Dalip Greca/
Të dielën me 17 Maj 2015 në Kolegjin Monroe të Nju Jorkut është organizuar një veprimtari nderuese dhe përkujtimore për heronjët, martirët dhe qëndresatrët e Revoltës së Spaçit dhe Qafë Barit.Në përvjetorin e 42 -të Revoltës së Sapçit, Asmableja e Nju Jorkut me sponsorizim të z. Mark Gjonaj, ansambleisti i Distriktit 80-të, si dhe nga Këshilli i Bashkisë të qytetit të Nju Jork-ut-sponsorizuar nga anëtari i këshillit të Bashkisë për distriktin 15, Ritchie Torres, nderuan me proklamatë qëndrestarin e burgjeve të diktaturës komuniste Pëllumb Lamaj. Proklamatën e ka lexuar dhe më pas dorëzuar ansambleisti i Shtetit të Nju Jorkut, z. Mark Gjonaj.
Në Proklamatën nderuse, vlerësohet qëndresa e antikomunistëve shqiptarë, ish të burgosurve politikë si dhe familjeve të internuara në kampet e vuajtjes.Në të shkruhet se Shqipëria u qeveris për 45 vite nga diktatori i pamëshirshëm Enver Hoxha, në regjimin e të cilit mbi 100 mijë shqiptarë u arrestuan, u burgosën, u torturuan, ndërsa familjet e tyre u internuan ose u burgosën në mënyrë të padrejtë, vetëm pse ata mbështetën të dashurit e tyre në luftën për liri. Në Proklamatë evidentohen fakte të tilla si: 5500 burra dhe gra u egzekutuan, ndërsa 100 mijë u burgosën e u internuan. Në mënyrë specifike, veçohet Spaçi, si burgu më i tmerrshëm në Shqipëri, i ndërtuar në vitin 1968, ku të burgosurit punonin deri në vdekje në minierat e bakrit dhe piritit.
Në proklamatë vlerësohet qëndresa e familjeve të ish të burgosurve politikë, që u keqtrajtuan kampeve të internimit ose u burgosën.
Në përfundim të proklamatës shkruhet: Përfundimisht regjimi komunist u rrëzua dhe ata që i mbijetuan burgjeve u liruan dhe mundën të ribashkoheshin me familjet e tyre. Edhe pse shenjat fizike mund të jenë shëruar, plagët mendore dhe kujtimet e zymta, janë ende gjallë sot, prandaj sponsorizuesit e kësaj proklamate, nderojnë të burgosurit Politikë të Shqipërisë dhe familjet e tyre.
Pëllumb Lamaj, i nderuar me Proklamatë, ndjehet i vlerësuar, jo vetëm si individ, por u është mirënjohës sponsorizuesëve për të gjithë bashkëvuajtësit dhe martirët e qëndresës antikomuniste. Në vlerësimin që i bëhet atij si individ, theksohet fakti se jeta e tij ka kaluar mes vuajtjeve. Lamaj që në moshën 8 vjeçare përjetoi arrestimin e të atit dhe kalvarin e vuajtjeve në internim.Në vend të shkollës, lodrave e ëndrrave, Pëllumbi u përball me terrorin komunist. Nënës së tij i duhej të rropatej në puën të rënda për të ushqyer pesë fëmijët me babanë në burg.Në shkollë përbuzej me nofkën”Kulak”, kuptimin e së cilës, nëna do t’ia spjegonte si ekuivalente me togfjalshin”Armik i Popullit”! Kjo do të thoshte izolim dhe se për të nuk kishte vend as në organizatën e rinisë dhe as që mund të vazhdonte shkollën e mesme.Sigurimi u orvat ta provokonte që të bëhej bashkëpunëtor, por ai e refuzoi me neveri. E dinte se pas refuzimit do të vinte arrestimi, dhe nuk vonoi. Liria e kufizuar do të burgosej, kur ai ende nuk i kishte mbushur të 20-tat. Me 1 Mars 1979, Sigurimi i vuri prangat në emër të Popullit, duke e akuzuar si Armik të Popullit! U dënua me 15 vjet në burgun famkeq të Spaçit. Ishte ndër më të rinjët e atij burgu, i cilësuar si më i egri ndër burgjet e diktaturës, që vetë Pëllumbi e krahason me ferrin e Dantes. Bashkëvuajtësit, që ishin bashkë me të në veprimtarinë e përkujtimit të 42 vjetorit të Revoltës së Spaçit, e karaktarizojnë Pëllumbin si një nga qëndrestarët me kuarajo dhe trim për kohën e burgimit. Pëllumbi përjetoi revoltën e Majit të vitit 1984 në Qafë-Bari, ku regjimi nuk i kurseu egzekutimet dhe riburgimet. Një pjesë prej të dënuarëve i çuan në Spaç. Pëllumbi guxoi dhe i ndihmoi disa prej tyre me ushqime. Spiunët njoftuan komandën dhe Pëllumbi e pësoi me tortura çnjerëzore, por nuk u thye.
I pyetur nga Gazeta Dielli se çfarë përbënte takimi që po organizohej me 17 Maj 2015 në një nga Universitetet amerikane në Nju Jork, Pëllumb Lamaj, ndër kritikuesit e rreptë të klasës politike shqiptare, tha: Duam të nderojmë heronjët antikomunistë të Spaçit dhe Qafë Barit. Ky është një homazh për martirët dhe qëndrestarët e Spaçit, ky është edhe një mesazh për klasën politike shqiptare, që për turp nuk ka arritë të dërgojë qoftë dhe një Kryeministër në Spaç! Premtimet e pambajtura ndaj ish të përndjekurëve s’është gjë tjetër, veçse demagogji e tranzicionit antidemokratik me një klasë politike të korruptuar dhe komuniste në krye!
Hasan Baja,qëndrestar i burgjeve, një ndër të zhgënjyerit e demokracisë shqiptare, që pat dhënë dorëheqjen për kod moral që më 1995, për moskompromentim me të korruptuarit (ish Komisar i Policisë në Sarandë), shprehet se ndjehet i zemruar me klasën politike shqiptare, që nuk arriti të integroi kundërshtarët e regjimit komunist, ç’ka përbën dështimin e vetë demokracisë së shartuar shqiptare. Lekë Mirakaj, Zija Lepenica, Fatmir Muja, që ndodheshin në auditorin e Monroe College, ku zhvillohej veprimtaria nderuese dhe përkujtimore e Revoltës së Spaçit, ndjehen të nderuar që ata vetë, ish bashkëvuajtësi i tyre, Pëllumb Lamaj, nderohen nga institucionet Amerikane, dhe e gjithë kauza e tyre kundër komunizmit, vlerësohet e çmohet në vendin e demokracisë, por jo në Shqipëri.
Veprimtaria u organizuar nga “Albanian- American Society Foundation and The Sons and Daughters of Albania in America” dhe është mbështetur nga Federata Panshqiptare e Amerikës VATRA, The Women’s Organization “Hope & Peace”,”Clasmsmates Forever”, Albanian American Open Hand Association, Akademia e Nju Jork-ut e të tjera.
Moderator i veprimtarisë përkujtimore kushtuar Revoltës së Spaçit ishte Fredi Tollja, pronar “The Producers Club New York. Në fjalën e hapjes moderatori vlerësoi kundërshtarët e diktaturës komuniste të Shqipërisë, ish të burgosurit politik të regjimit diktatorial, që me sakrificat e tyre, me qëndresën e tyre, sfiduan diktaturën. Tollja, tha se me këtë veprimtari, përkujtojmë dhe nderojmë jetët e ndërprera, nderojmë heroizmin e atyre që guxuan të sfidojnë shtetin komunist në emër të ëndrrës për liri e demokraci.
Esad Rizaj, president i Fondacionit Shoqëria Shqiptaro-Amerikane dhe Bijtë e Bijat e Shqiptarëve në Amerikë, tha se ndjehet i privilegjuar që nderon ish të burgosurin Pëllumb Lamaj dhe të gjithë ish të burgosurit politik të Shqipërisë. Ky, tha ai, është një vlerësim për të gjithë ata që u bugosën,u pushkatuan, u internuan pse luftonin për liri dhe Shqipëri Etnike.
Miqtë e shqiptarëve, amerikanët Stive Kaufman-avokat i njohur dhe profesori Paulo Palombo, në përshëndetjet e tyre kanë vlerësuar qëndresën e antikomunistëve shqiptarë, dhe kanë nderuar ata që dhanë jetën për liri, përballuan torturat, vuajtjet në burgje dhe kampet e internimit.
Një përshëndetje të veçantë ka bërë edhe themeluesja e Shoqatës”Shokët e Klasës përgjithmonë”, Lindita Hoxha.
Lek Mirakaj, një ndër ish të burgosurit politik, e cilësoi nderimin e ish bashkëvuajtësit Pëllumb Lamaj dhe gjithë të burgosurve politikë shqiptar, si një nderim të jashtzakonshëm. Kjo Proklamatë, tha ai, është dekorata më e lartë që i jepet një ish të përndjekuri politik. Më pas ai vlerësoi qëndresën e ish të burgosurve politik dhe në mënyrë të veçantë martirët dhe qëndrestarët e Revoltës antikomuniste Skënder Daja, Dervish Bejko,Sokol Sokoli, Pal Zefi, Tom Ndoja, Hajri Pashaj dhe shumë të tjerë që pas revoltës u ridënuan.
Mimoza Dajçi, presidente e The Women’s Organization “Hope & Peace”, kërkoi që të pranishmit të çoheshin në këmbë dhe me një minut heshtje të nderonin kujtimin e heronjëve të revoltës.Më pas ajo ka përshkruar revoltën e Spaçit, ndërkohë që ka treguar gjendjen e sotme të ish burgosurve politikë. Dajçi tha se ka kaluar afro çerek shekulli, e akoma të dënuarit politik nuk janë reabilituar duke filluar me dëmshpërblimet, strehimin, shëndetin etj.
Edhe pse disa individëve u ka dalë emri në gazetë për të marrë dëmshperblimet e burgut politik akoma nuk po del fondi nëpër banka për tërheqjen e tyre, apo edhe fondet e kësaj shtrese i përdorin për fushatat e tyre partitë politike. Ka zvarritje dhe burokraci pa fund.Strehimi i ish të përndjekurve është i mjerushëm, u ndanë vite më parë gjatë qeverisjes demokratike disa hyrje tek Kafodi e Vasil Shanto dhe kaq, po pjesa dërmuese? Më pas ajo ka trajtuar dhe hapjen e dosjeve të sigurimit dhe ligjin e munguar të lustracionit.
Në këtë veprimtari ishin të pranishëm edhe kryetari i Vatrës dr. Gjon Buçaj me zonjën Nikoleta, zv/kryetari Asllan Bushati, anëtari i Këshillit të Vatrës Zef Balaj,Lek Mirakaj, Zef Përndocaj e të tjerë.(Fotografite i gjeni ne Facebook)

Konflikt mes Shqiperise dhe Greqise, Deti dhe Nafta ne mes

May 19, 2015 by dgreca

Çeshtja e naftes ne detin shqiptar, ku Gjykata Kushtetuese ia rrezoi qeverise se ish Kryeminstrit demokrat Berishes marreveshjen mes Shqiperise dhe Greqise ka çuar ne nje konflikt te ri.Greqia duke ditur se ka nafte ne ate zone ka filluar kerkimet pa asnje marreveshje nga pala shqiptare. Tirana ka bere mire qe ka kercenuar. E përditshmja greke Kathimerini pohon se sipas burimeve diplomatike greke, Tirana ka pretendime territoriale ndaj Athinës.
Në një shkrim të sotëm, gazeta shkruan se Tirana i ka dërguar Athinës zyrtare një notë proteste për kërkimet për hidrokarbure që po bën ajo në detin Jon, pasi Tirana pretendon se kërkimet po bëhen në ujëra territoriale shqiptare. Gazeta shkruan, referuar burimeve diplomatike, se Tirana ka pretendime territoriale ndaj Athinës. Madje, kjo notë proteste është një lëvizje e qartë për të vënë në pikëpyetje kufinjtë mes dy vendeve. Pas kësaj situate qendron Turqia, thotë gazeta, e cila, sipas saj, po e nxit Shqipërinë të punojë kundër interesave greke. Madje, vizita e presidentit turk, Rexhep Taip Erdogan i ka shërbyer këtij tensioni. Ai është takuar edhe “me zyrtarë të Partisë nacionaliste për Drejtësi, Integrim dhe Unitet”, shkruan gazeta greke.
Por pavarësisht nga kjo paranojë greke që e sheh të keqen tek Turqia , shkruan laps, gjithçka nuk po shkon si duhet në marëdhëniet shqiptaro helene. Agjensia prestigjioze elajmeve Reuters njoftonte se ministri i Energjisë, Damian Gjiknuri ka hapur garën për kompanitë e interesuara për të kërkuar naftë në det. Bëhet fjalë për kërkime në zonën Joni 5. Sipas agjencisë Reuters, kjo zonë e ofruar për kërkime nga Shqipëria, është edhe zona ku Greqia po kërkon për naftë.
Reuters thekson se pikërisht kërkimet për naftë kanë shënuar një fërkim mes Greqisë dhe Shqipërisë. Por kete rradhe Athina ka perballe nje Ramë te forte e kryeneç e jo nje Berishe lodhur.(KJ)

9 persona të vrarë dhe 21 të arrestuar në Kumanovë ishin nga Kosova

May 19, 2015 by dgreca

Nga Bekim Bislimi/
Bazuar në informatat të cilat deri me tash i kanë institucionet e Kosovës, gjatë përleshjes së armatosur në Kumanovë të Maqedonisë, janë vrarë 9 dhe janë arrestuar 21 shtetas të Kosovës.
Autoritetet e Maqedonisë nuk kanë bashkëpunuar mjaftueshëm lidhur me shkëmbimin e informacioneve, ndërkohë që Ministria e Punëve të Brendshme e Kosovës dhe Policia e Kosovës nuk kanë poseduar asnjë informatë të mëhershme, e cila do të paralajmëronte përleshjen në Kumanovë.
Kështu kanë thënë drejtuesit e Ministrisë së Punëve të Brendshme dhe të Policisë së Kosovës, në raportimin e tyre para Komisionit parlamentar për Punë të Brendshme, Siguri dhe Mbikëqyrjen e Forcës së Sigurisë së Kosovës.
Drejtori i përgjithshëm i Policisë së Kosovës, Shpend Maxhuni ka theksuar se Kosova ka qenë në pozitë të palakmueshme për sa u përket informatave nga Maqedonia dhe se një situatë e tillë po vazhdon ende. Për më tepër, sipas tij, autoritetet e Kosovës nuk kanë mundësi që në mënyrë zyrtare t’i njoftojnë as familjet e personave të vrarë, lidhur me vrasjen e të afërmve të tyre.
“Të vetmet informacione që ne i kemi marrë kanë qenë ato që kanë të bëjnë me verifikimin e identitetit të personave dhe kjo është bërë pas një presioni që ne kemi bërë ndaj autoriteteve maqedonase, pas kërkesave të pareshtura, pothuajse në baza ditore, pas incidentit”.
“Përfundimisht, i kanë dërguar informacionet, shënimet gjenerale, të atyre njerëzve në përgjithësi, të cilat ne, përmes sistemeve tona i kemi verifikuar dhe kanë rezultuar si të tilla”, ka theksuar Maxhuni.
Ai ka shtuar se në bazë të verifikimit të informacioneve që i kanë bërë autoritetet e Kosovës, e të cilat i kanë marrë nga autoritetet maqedonase, rezultojnë të jenë 9 shtetas të Kosovës të vrarë dhe 21 të arrestuar.
Ndryshe, mediet në Kosovë, menjëherë pas ngjarjeve në Kumanovë, patën raportuar se Agjensioni Kosovar i Intelegjencës, paraprakisht e kishte lajmëruar kreun e Kosovës, lidhur me konfliktin e mundshëm në Maqedoni.
Anëtarët e Komisionit parlamentar për Punë të Brendshme, Siguri dhe Mbikëqyrjen e Forcës së Sigurisë së Kosovës, kanë insistuar në atë se ka pasur paralajmërime për incidentet e mundshme në Maqedoni dhe kanë shprehur habinë se si nuk janë vërejtur lëvizjet e qytetarëve nga Kosova në Maqedoni.
Ministri i Punëve të Brendshme në qeverinë e Kosovës, Skënder Hyseni, të hënën, e ka mohuar një gjë të tillë.
Ai ka theksuar se as ministria që ai drejton e as policia, nuk kanë pasur asnjë informacion të mëhershëm, që do të shërbente për të tërhequr vëmendjen për ato që më pas kanë ndodhur.
Ministri Hyseni, ka bërë thirrje për një hetim ndërkombëtar të asaj që ka ndodhur në Kumanovë.
Ajo që ka ndodhur atje është nën përgjegjësinë ekskluzive të autoriteteve të Maqedonisë dhe unë sërish po insistoj – është qëndrim i imi personal në këtë rast- që do të duhej lejuar një hetim ndërkombëtar, kompleks, që të evitohen të gjitha mundësitë e spekulimeve, të natyrës çfarë i kemi parë”, tha ministri Hyseni.
Ai ka shtuar se është i gatshëm ta ndajë me qytetarët e Kosovës çdo informacion të cilin e kanë institucionet e Kosovës dhe sipas tij “Kosova, qeveria dhe institucionet, nuk fshehin asgjë dhe nuk kanë sponsorizuar asgjë.
“Qeveria e Kosovës dhe unë si ministër , insistojmë që krizat qeveritare në një vend fqinj, nuk e kemi ndërmend që t’i importojmë në Kosovë, sepse kjo është e rrezikshme politikisht dhe në mënyrë strategjike e gabueshme”, ka thënë Hyseni.
Por, Aida Dërguti, nënkryetare e Kuvendit të Kosovës nga Lëvizja Vetëvendosje dhe anëtare e Komisionit parlamentar për Mbikëqyrjen e Agjensionit Kosovar për Intelegjencë , ka theksuar se menjëherë pas ngjarjeve në Kumanovë, AKI-ja i ka konfirmuar këtij komisioni se me datën 23 shkurt të viti 2015, ‘raporti për këtë grup i është dorëzuar kryeministrit dhe presidentes, ashtu siç e kanë obligim ligjor”.
“Ndërkohë, kanë thënë, gjithashtu, se për ngjarjet. do të thotë, për zhvillimet e mëhershme kanë qenë në dijeni ministri i Punëve të Brendshme, ministri i Drejtësisë, si dhe drejtori i policisë…. Meqë kryeministri e ka pasur këtë raport, që nga data 23 shkurt, a u është drejtuar juve si ministër i Punëve të Brendshme, që të ndërmerrni diçka në këtë drejtim, për indiciet që i ka ky raport?”, ka pyetur Dërguti, ministrin e Brendshëm, Hysenin.
Ky i fundit ka thënë se është në diskrecionin e plotë të kryeministrit dhe të presidentes, por edhe të një anëtari të komisionit për mbikëqyrjen e AKI-së, se çfarë ndan me dikë dhe çfarë nuk ndanë.
“Është në të drejtën ekskluzive tuajën por edhe në përgjegjësinë e juaj në këtë rast, si anëtare e komisionit, se çfarë bën publike nga mbledhjet e mbyllura të trajtimit të AKI-së. Aty ju e mbani përgjegjësinë”.
“Pavarësisht nga kjo që thoni se ju kanë thënë juve dhe unë nuk mund ta marr si valide këtë që e thoni, sepse mënyra se si e trajtuat, e keni humbur besueshmërinë time që të besoj në ato që i thoni se Ministria e Punëve të Brendshme ka qenë e njoftuar. Ministria e Punëve të Brendshme as nuk ka pasur raport e as nuk ka pasur asnjë njoftim nga ato që janë dhënë në opinion”, theksoi Hyseni.
Në anën tjetër, kryetari i Kuvendit të Kosovës, Kadri Veseli, të hënën ka thënë se për shkak të shprehjes së shqetësimeve në Kuvend, lidhur me gjendjen shëndetësore të shtetasve të Kosovës të arrestuar në Maqedoni, të ndërlidhur me rastin e Kumanovës, institucionet e Kosovës janë duke tentuar që të aranzhojnë një vizitë të një organizate joqeveritare, për shtetasit e Kosovës të arrestuar në Maqedoni.
“Ne jemi duke tentuar që ta autorizojmë Këshillin për Mbrojtjen e Lirisë dhe të Drejtave të Njeriut, që t’i lejohet që t’i vizitojë të burgosurit atje dhe në të njëjtën kohë të na e sjellë një raport neve, deputetëve të Kuvendit të Republikës së Kosovës. Keni parasysh se që nga dita e premte – duhet të dihet publikisht – jemi duke pritur një përgjigje zyrtare nga autoritetet maqedonase”, ka theksuar Veseli.
Ai ka shtuar se lidhur me këtë e kanë kontaktuar ambasadorin e Maqedonisë në Prishtinë, por edhe autoritetet e Ministrisë së Drejtësisë të Maqedonisë.

Këshilli Konsultativ i Sigurisë: Situata e sigurisë në Shqipëri, shqetësuese

May 19, 2015 by dgreca

Një raport i fundit i Këshillit Konsultativ të Sigurisë (OSAC)* vë në dukje se situata e sigurisë në Shqipëri është shqetësuese. Raporti i botuar këtë muaj përmbledh situatën e sigurisë në Shqipëri gjatë vitit 2014. Raporti vlerëson se niveli i përgjithshëm i krimit ka vazhduar të rritet gjatë pesë viteve të fundit, në veçanti krime si vjedhjet apo plaçkitjet. Krimi në rrugë vazhdon të jetë i gjithëpranishëm në zonat urbane, në veçanti në orët e natës. Pavarësisht disa arritjeve të forcave të sigurisë kundër trafikut të armëve dhe drogës, krimi i organizuar vazhdon të veprojë në Shqipëri, ndërkohë që krimet e dhunshme vazhdojnë të kenë një prirje rënieje të vazhdueshme që nga viti 2011.
Raporti thekson se prirja e mëparshme e përdorimit të eksplozivëve, në veçanti shpërthimet e telekomanduara në makina dhe banesa ka rënë me rreth 15%, por është ende në nivele alarmuese, sidomos në zonën e Fushë-Krujës, vetëm 20 kilometra larg kryeqytetit të vendit. Sulmet vazhdojnë përgjithësisht të vënë në shënjestër individë të caktuar, në lidhje me mosmarrëveshje biznesi, ose aktivitet politik.
Ndër kërcënimet më të reja për Shqipërinë dhe për rajonin e Ballkanit, raporti përmend rrezikun në rritje nga të mbiquajturit “luftëtarë të huaj” që kthehen në rajon nga vende si Siria, të cilët në një masë të madhe janë të kombësisë shqiptare.
* Këshilli Konsultativ i Sigurisë (Overseas Security Advisory Council – OSAC) është krijuar në vitin 1985, me qëllimin për të nxitur bashkëpunimin në fushën e sigurisë ndërmjet interesave të sektorit privat amerikan në botë dhe Departamentit të Shtetit. Këshilli përbëhet nga 34 entitete private dhe publike, dhe anëtarët e tij përfaqësojnë industri të caktuara, ose agjensi qeveritare amerikane që veprojnë jashtë territorit amerikan. Byroja e Sigurisë Diplomatike, të Departamentit të Shtetit, mbështet aktivitetin e këtij këshilli me punë kërkimore, ofrimin e sistemeve të informacionit, si dhe nga aspekti logjistik.(VOA)

Gruevski: Kurrë nuk do të dorëzohemi!

May 19, 2015 by dgreca

Nga Isuf Kadriu/
“Maqedonia nuk dorëzohet, Maqedonia është e fuqishme”. Me këto fjalë kryeministri Nikolla Gruevski, ka nisur fjalimin ne mitingun e partisë së tij para Kuvendit të Maqedonisë, që vjen si përgjigje ndaj atij të opozitës të mbajtur të dielën para qeverisë.
Edhe në tubimin e Gruevskit, numri i pjesëmarrësve vlerësohet të ketë qenë dhjetëra mijëra, i ngjashëm me atë të opozitës.
Kryeministri Gruevski që drejton partinë VMRO-DPMNE, tha se pjesëmarrja masive e qytetarëve është përgjigja për kreun e opozitës, Zoran Zaev, i cili sipas Gruevskit, është vënë në shërbim të agjenturave të jashtme për destabilizimin e vendit.
Kreu i qeverisë tha se kurrë nuk do të dorëzohet para aferës së montuar të përgjimeve të opozitës, para kërcënimeve e shantazheve tjera.
“Nuk do të tërhiqemi, nuk do të përkulemi, Maqedonia është e fuqishme, Maqedonia është e vendosur. Zaev asnjëherë nuk do të bëhet kryeministër. Ai, madje nuk do të marrë besimin as si prefekt i qytetit të Strumicës. Afera e tij e përgjimeve është inskenim me ndihmën e shërbimeve të huaja. Bisedat janë të montuara, këtë të gjithë e kanë të qartë, kjo dëshmohet nga masiviteti i tubimit të sontëm“, ka deklaruar Gruevski duke përjashtuar çdo mundësi për të dhënë dorëheqje dhe zgjedhje të parakoshme parlamentare.

“Me ose pa LSDM-në, hapat pozitiv do të bëhen, kurse LSDM-ja dhe Zaevi do të vazhdojnë të izolohen nga veprimi i tyre destruktiv. Ne kemi plan reali për dalja nga kriza e tanishme politike që është nxitur nga LSDM-ja. Ne nuk do t’i lejojnë Zaevit që të rrënojë atë që e kemi ndërtuar me vite, atë që ky popull e ka pritur me vite, zhvillimin ekonomik të vendit, investime të jashtme e vende të shumta të punës“, është shprehur Gruevksi
Ai ka folur edhe për ngjarjet e Kumanovës, që sipas tij, ishin tentim për destabilizimin e Maqedonisë.
Gruevski për këtë akuzoi edhe opozitën për, siç tha, tentimet e saj për nxitjen e konfliktin ndërentike që u refuzua nga populli.
“Maqedonia nuk ka kapacitet për konflikt dhe destabilizim pasi populli nuk e do këtë. Të gjitha bashkësitë etnike duan prosperitet. Kjo u dëshmua edhe gjatë sulmit terrorist në Kumanovë ku edhe përkundër apeleve të shumta të terroristëve për ndihmë, askush nuk i mbështeti. Populli dëshmoi se nuk ishte konflikt ndërentik, por luftë mes policisë dhe një grupi klasik terrorist. Kjo, që në mënyrë qyqare dhe të mjerë po e bën Zoran Zaev do të përfundoj dhe shteti do të ecë sigurtë drejt prosperitetit“, deklaroi Gruevski.
Kryeministri foli edhe për çështjen emrit duke thënë se asnjëherë nuk do të pranojë ndryshimin e emrit kushtetues të Maqedonisë, pavarësisht se në bisedat e publikuara të opozitës ai dëgjohej duke biseduar me zyrtarët e partisë së tij për kompromise të ndryshme për arritjen e një zgjidhjeje me Greqinë.
Paralelisht me protestën e partisë së Gruevskit është mbajtuar edhe ajo e opozitës, por para Qeverisë ku qindra simpatizantë të Lidhjes Social-demokate kanë vazhduar qëndrimin në tenda.
Kreu i opozitës, Zoran Zaev ka thënë se tërheqje nuk do të ketë deri në dorëheqjen e qeverisë.