Archives for October 2015

Histori Sportive: “Duel në xhungël”

October 26, 2015 by dgreca

PERSONAZH/ Flet gazetari sportiv, opinionisti sportiv, Uvil Zajmi: Ja si u përjetua në Shqipëri ndeshja e shekullit midis dy boksierëve, Kasius Klei dhe Xhorxh Foreman/
Më 30 tetor të 1974, në Kinshasa të Zaires u zhvillua ndeshja sportive e konsideruar, si më e madhja e shekullit/
E kanë quajtur “Duel në xhungël”, takimin e boksit Klei-Foreman/
-Kryesisht në Tiranë, kishte kureshtje dhe ankth. Aq më shumë si do të ndiqej ai takim./
-Dëshira për ta parë ishte e madhe, por mundësitë minimale. Kjo për faktin, se jemi në vitin 1974, kulmi i tensioneve e situatave politike./
– Zotëronte një heshtje, njerëz të shtangur, të kufizuar dhe frikë/
– Kanalet televizive të Rai-t ishin mbyllur, lejoheshin vetëm lajmet e mbrëmjes së orës 8, pastaj sinjali hiqej/
-Nuk kishin dalë akoma “kanoçet” e famshme/
– Jo të gjithë kishin televizorë, me prodhimet e UEM të markës “Butrinti”, “Dajti” apo “Iliria”
-Shqiptarët e kanë parë atë takim dhe gjithçka iu besua televizionit italian, atij jugosllav
-Pas orës 22 e 30 minuta në të njëjtën frekuencë “te 10-ta quhej” ,por me antenë horizontale nga veriu, mundësohej shikimi i Rai 1 nga një transmetues në Mal të Zi
– Pas orës 10:30 në errësirë thuajse të gjithë shqiptarët janë ngjitur në tarracat e pallateve duke ndryshuar drejtimin e antenës
– Ka qenë ditë e martë dhe ndeshja fillonte në orët e para të mëngjesit, kohë e keqe me shi.Shumë njerëz u futën nëpër shtëpi tek njëri-tjetri, për ta parë në grup para orës dhjetë, duke mos rënë në sy/
– Komenti ka qenë i telekronistit italian, Paolo Rozi, i famshëm në të tilla evenimente/
– Për atë takim flitej edhe në burgje, kampe internimi, çdo familje/
Nga Albert Z. ZHOLI/
Pikërisht më 30 tetor të 1974, në Kinshasa të Zaires është zhvilluar ndeshja sportive, e konsideruar më e madhja e shekullit, ajo midis dy boksierëve Kasius Klei dhe Xhorxh Foreman. Ndonëse vitet kalojn, në çdo 30 tetor opinioni sportiv botëror i rikthehet gjithmonë asaj sfide pa kufi, si në atë ditët tetori të një gjysmë shekulli më parë. Po në Shqipëri si është pritur e ndjekur ajo përballje titanësh? Si i kujton sot Uvil Zajmi, opinionist, gazetar sportiv, ato orë të para të së martës të 30 tetorit të vitit 1974?
Zajmi, si u përjetua në Shqipëri kjo sfidë sportive?
-Kryesisht në Tiranë, kishte kureshtje dhe ankth. Aq më shumë si do të ndiqej ai takim. Dëshira për ta parë ishte e madhe, por mundësitë minimale. Kjo për faktin, se jemi në vitin 1974, kulmi i tensioneve e situatave politike. Zotëronte një heshtje, njerëz të shtangur, të kufizuar dhe frikë. Natyrisht që për takimin flitej kudo, në punë, shkollë, rrugë me miq e shokë. Por kanalet televizive të Rai-t ishin mbyllur, lejoheshin vetëm lajmet e mbrëmjes së orës 8, pastaj sinjali hiqej nga një mekanizëm në qendrën e antenave të Dajt. Pra, vështirësia ishte e madhe, ndonëse pasioni dhe dëshira qëndronte mbi kufizimin dhe frikën për ta parë.
Si u pa takimi?
-Ndonëse jo të gjithë kishin televizorë, me prodhimet e UEM të markës “Butrinti”, “Dajti” apo “Iliria” shqiptarët e kanë parë atë takim. Nuk kishin dalë akoma “kanoçet” e famshme, dhe gjithçka iu besua televizionit italian dhe atij jugosllav. U informuam se ndeshja do të transmetohej nga Rai, dhe ky kanal mund të shihej, pasi TVSH mbyllte transmetimet. Zakonisht pas orës 22:30-të në të njëjtën frekuencë “te 10-ta quhej”, por me antenë që duhet detyrimisht ta drejtoje horizontalisht nga veriu, mundësohej shikimi i Rai 1 nga një transmetues në Mal të Zi. Pas orës 10:30 në errësirë thuajse të gjithë shqiptarët janë ngjitur në tarracat e pallateve duke ndryshuar drejtimin e antenës, për ta drejtuar nga “10-ta”(Ende nuk funksionojnë zhurmuesit). Ka qenë ditë e martë dhe ndeshja fillonte në orët e para të mëngjesit, kohë e keqe me shi. Shumë njerëz u futën nëpër shtëpi tek njëri-tjetri për ta parë në grup para orës dhjetë, duke mos rënë në sy. Problem ishte dhe drita e banesës, gjë që u zgjidh duke i vënë një batanije dritares. Deri në orën 4 të mëngjesit kur fillonte transmetimi është qëndruar pa lëvizur e bërë zhurmë, duke luajtur me letra e pirë duhan. Pastaj me zë të ulët e në heshtje është ndjekur sfida. Kujtoj që komenti ka qenë i telekronistit italian Paolo Rozi, i famshëm në të tilla evenimente.
Pse nga Tirana në Durrës, Krujë apo në Mal të Dajtit?
-Për të garantuar mundësinë e shikimit të sfidës, secili kishte programuar i vetëm apo me miq, mënyrën si do të vepronte. Kujtoj miq e shokë, me reokupacionin më të madh se ku do e shinin takimin, në kërkim të një vendi dhe televizori që siguronte sinjalin. Një pjesë e madhe e rinisë kanë udhëtuar në Durrës, me trenin e fundit, pasi qyteti bregdetar jepte mundësi, nuk kishte pengesa për të parë direkt Italinë. Por, një pjesë kanë marrë rrugën për në Krujë, pasi lartësia e qytetit garantonte më shumë se çdo vend tjetër shikim të kanalit italian. Po kështu edhe në Mal të Dajtit, në ato shtëpi ku kishin televizorë, kanë qëndruar gjatë natës mjaft kryeqytetas.
Si e kujtoni përballjen?
-Donim që të fitonte Klei, edhe pse Fereman pas triumfit të paparë ndaj Frezer në 71 ishte si një mal para tij. Para takimit u kënduan himnet e Amerikës dhe të Zaires, Klei me të bardha, ndërsa Foreman me të kuqe. Ajo që dinim ishte se Klei duhet ta shtynte takimin sa më shumë për ta lodhur, pasi Foreman flitej se ishte boksier olimpiadash, pra nuk duronte më shumë se tre katër raunde. Dhe ashtu ndodhi. Pas disa raundeve, Foreman dukej i lodhur pa forcë, kjo në raundin e 6 e 7. Në të tetin, në fundin e tij, Klei shfrytëzoi një moment në këndin e ringut duke e goditur shpejt dhe saktë direkt në fytyrë, për ta shtrirë në tokë. Ka qenë një moment shokues për të gjithë të shihje Foreman në tokë, pa mundur të ngrihej më as pas 9 sekondave të numërua nga arbitri. Kujtoj se nga specialistët ndeshja u cilësua si një ndër takimet me strategji taktike më të studiuar deri në atë kohë, me një plan taktik të jashtëzakonshëm të aplikuar nga Klei dhe stafi I tij. KLei demonstroi një forcë fizike dhe interpretim inteligjent të paparë deri në atë kohë në boksin e tij.
Pas ndeshjes, cili ishte reagimi?
-Impakti post sfide kaq enë imadh jo vetëm në Tiranë. Fundi, mbarimi i ndeshjes dhe dalja nga shtëpitë si klandestinë, në orët e para të mëngjesit, pa shkuar në shtëpi, ndonëse pa gjumë gjithë natën i janë drejtuar lokaleve, një kafe me fërnet, dhe pastaj në punë e shkollë. Komentet ishin të zjarrta në ndërmarrje, kudo të gjithë ata që e kishin pasur privilegjin për ta parë, por edhe ato që nuk kishin mundur. Në mbrëmje rrugëve, në bulevard kudo vetëm për atë takim flitej. Edhe në burgje, kampe internimi, çdo familje për atë ndeshje ka diskutuar, ndonëse informacioni nuk ishte i madh, vetëm çka merrej nga radiot e huaja, apo ndonjë kanal italian apo jugosllav. Ndërsa shtypi shqiptar asnjë koment. Simpatia për Klein ka qenë e madhe për shqiptarët, si një ndër boksierët simpatikë, argëtues, me një stil modern të boksuarit, jo agresiv, një boksier i bukur elegant.
E kanë quajtur evenimenti sportiv i shekullit, pse?
-I tillë ka qenë ai takim, ajo ndeshje. Nga vigjilja, zhurma, fama e dy boksierëve, kureshtja, para dhe post takimi. Edhe pse informacioni ishte i pakët, gjithçka në lidhje me atë përballje është marrë nga radiot kanalet e huaja me një pasion të jashtëzakonshëm nga shqiptarët për të pasur sa më shumë të dhëna për këtë takim. Kam mendimin se asnjë eveniment tjetër sportiv, si në shekullin e kaluar, por edhe këtë aktual që jetojmë nuk ka mundur t’i kalojë përmasat dhe limitet për zhurmën, famën dhe interesimin si ajo sfidë.
Keni parë dorezat e Kleit?
-Më është dhënë rasti të takoj, të njoh apo të jem prezent në evenimente të rëndësishme sportive. Por kur kam parë dorezat e Kleit, me te cilat është ndeshur ndaj Foreman kam ndjerë emocion të madh. Janë pikërisht ato, të atij takimi të ruajtura me shumë kujdes në Muzeun Historik të Amerikës, në Uashington. Janë ngjitur me xhaketën e Bob Dylan. Qëndron, i vështron dhe menjëherë të vjen në kujtesë dhe ne që e kemi jetuar e dimë mirë çfarë ka qenë ajo ndeshje. Sa herë që vjen ky fundtetori më rikthen tek natë magjike dhe kujtesa më dërgon në Kinshasa, Zaire, tek Foreman, Ali, televizori “Butriniti”, dhoma, shokët, si ajo mbrëmje, ai mëngjes i ftohtë, i asaj të marte 30 tetori i 1974. Mbetet unikale, e paharruar për shumë breza.
Ndeshja e quajtur “Duel në xhungël”
-E kanë quajtur “Duel në xhungël”, takimin e boksit Klei-Foreman, pasi i tillë ka qenë dhe mbetet. Është zhvilluar në Stade Tata Raphael, në Kinshasa Zaire në prani të 60.000 spektatorëve, në një ring të improvizuar, sfida ka qenë e vlefshme për titullin kampion bote në peshën e rëndë, në kategoritë ËBC dhe ËBA midis kampionit në fuqi Xhorxh Foreman dhe ish-kampionit Muhamed Ali, i njohur si Kasisus Klei. Foreman vinte me një bilanc të frikshëm: 40 ndeshja asnjë humbje, ndër të cilat 37 me KO. Ndërsa Ali, në 44 sfida kishte fituar 32 me KO duke humbur 2. Me një shtatlartësi të njëjtë, 1.91 cm dhe peshë trupore, Foreman 220 dhe Ali 216 kg. Mbetet një nga takimet më historik të boksit, sfidë kjo e zhvilluar në 30 tetor të vitit 1974, në Republikën e Kongos. Kasius Klei, ish kampion që kërkonte revanshin në këtë peshë, për tu bërë i dyti boksier pas Floid Paterson që rifitonte titullin. Kjo përballje ka edhe një moment tjetër historik që është e lidhur me të parin takim të organizuar nga maniaku Don King. Ai arriti të bindë dy boksierët Ali dhe Foreman të nënshkruajnë kontrata të ndara, duke i premtuar që çmimi do të ishte 5 milion dollar, ndonëse ai nuk e kishte këtë shumë, por arriti ta mbledhë nga sponsor e publiciteti që iu bë sfidës. Foreman ishte kuotuar si superfavorit nga Bookmakersat, kur Klei vinte pas humbjes shkaktuar nga Frezer në Mesdison Square Garden, në vitin 1971. Takimi filloi në orën 4 të mëngjesit për t’u transmetuar direkt për pasionantët sportivë në Amerikë, Europë dhe është ndjekur nga një shifër rekord teleshikuesish. Muhamed Ali kishte fituar simpatinë e publikut të Zaires, që gjatë takimit i këndonte “Ali bomaye” (Ali vrite), që më vonë u bë shumë popullore. Por, duhet thënë se gjatë takimit shumë të pranishëm luteshin që Foreman mos ta “vriste” Ali, kaq e sigurt ishte fundi i përballjes edhe për faktin se goditjet e shpejta e të forta të Ali nuk konsideroheshin më të rrezikshme për masën trupore dhe fizike të Foreman. Pas takimit, Foreman e pranoi humbjen duke deklaruar se e kanë helmuar para ndeshjes, duke akuzuar gjithashtu Ali dhe stafin e tij për trukun e lojës së litarëve duke lejuar boksierin e tyre të mbështetej mbi to për të amortizuar goditjet e Foreman. Pas disfatës së Kinshasë, Foreman kaloi një periudhë të gjatë depresioni edhe nga zbulimi, se familja e tij kishte vënë bast për fitoren e tij, një situatë financiare nga e cila ai doli me vështirësi. Shumë vite më vonë ka pranuar se në Kinshasa, Ali fitoi se “të paktën atë natë ai ishte më i fortë”.
Cilët ishin dhe çfarë bëjnë sot?
-Cassius Marcellus Clay Jr, lindi me 17 janar 1942 në Luisville, në Kentucky mori emrin e të atit, Cassius Marcellus Clay Sr, me profesion piktor dhe mësues në këtë fushë, ndërsa nëna e tij Odessa Lee Grady Clay (një afro-amerikane , angleze, irlandeze pak italiane) ishte shtëpiake. Kleit iu rekomandua të merrej me boks nga një polici Luisville, Joe E. Martin që e ka takuar kur ishte 18 vjeç, pasi i kishin vjedhur biçikletën dhe pasojat që kishte marrë vjedhësi prej grushteve të. Polici e këshilloi menjëherë të përgatitej duke e dërguar në palestrën Columbia, ku u evidentua talenti i tij që shoqërohet me një karrierë brilante, duke filluar nga medalja e artë në Olimpiadën e Romës, 1964, në peshën gjysmë të rëndë. Atë vit, kalon profesionist duke mundur Lamar Klark për KO. Në boksin e tij Ali, u dallua në lojën e këmbëve, atë dinamike, reflekset e shpejta në goditjen e kundërshtarëve në finalizim të sulmit. Pastaj takimet e paharruara ndaj Frezer, Evanxhelista, Shavers, Spinks, Norton, Horms, deri tek takimi I fundit më 11 dhjetor 1981 kundër Trevor Berbick që humbi me pikë pas dhjetë raundeve. Në këtë ndeshje Ali u shfaq në lëvizje shumë i ngadaltë dhe trajner i tij Angelo Dunde vuri re se ai fliste më ngadalë se zakonisht, që ishin simptomat e para të sindromi Parkinsonit. Në jetën e tij ai u martua katër herë dhe ka shtatë vajza dhe dy djem.

George Edëard Foreman, kampion olimpik dhe dy herë kampion bote në peshën e rëndë, me një stil të një boksieri goditës, gjithçka bazuar në forcën fizike të grushtave të tij që pak boksierë kanë mundur t’i rezistojnë. Pa taktikë të mirëfilltë, pak lojë më këmbët, sulmonte e godiste duke fituar pa problem ndeshjen, pa i dhënë asnjë mundësi kundërshtarëve. Por stili i tij, në të njëjtën kohë e vinte në vështirësi ndaj boksierëve inteligjentë nga pikëpamja taktike, si Klei, që me kalimin e raundeve duke shmangur goditjet e tij, e bënte të humbiste sigurinë, forcën duke e nervozuar në maksimum. Big George, ka një karriere të gjatë, madje në moshën 46-vjeçare u shpall kampioni më i vjetër i botës në historinë e këtij sporti duke mundur me KO Michael Moorer, duke rifituar titullin botëror, pasi e kishte humbur 20 vjet më pare me Klein. Baba i 10 fëmijëve, 5 djemtë e tij quhen të gjithë George: George Jr, George III, George IV, George V dhe George VI. Tre më të mëdhenjtë kanë nga një pseudonim: “Monk”, “Big Ëheel” dhe “Pak George”. Ai është aktualisht një sipërmarrës dhe pronari i “George Foreman Grill” që me shumën prej 250.000.000 $ ajo është një nga më të pasurat në botë. Ajo që veçohet, qëndron në faktin, se midis tyre ekziston një miqësi e madhe dhe në rastin e marrjes së Premio Oskar, gjatë shfaqjes së dokumentarit “When We Were King”, lidhur me ndeshjen në Zaire, Klei i goditur nga sëmundja e Parkinsonit pati vështirësi të ngjitej në podium, por u ndihmua të ngjisë shkallët pikërisht nga Foreman.

Austria, pjesë e suksesit të Kosovës së re

October 26, 2015 by dgreca

-“Ju keni qenë shembull jo vetëm i mikpritjes, në kohë paqeje, gjatë bisedimeve për statusin e Kosovës, të përpjekjeve për ta bërë Kosovën të mëvetësishme, demokratike dhe përgjegjëse për fuqizimin dhe avancimin e të drejtave për të gjithë qytetarët e saj”, tha Presidentja Jahjaga duke uruar ambasadorin e Austrisë në Kosovë, Johann Brieger./
Nga Behlul Jashari/ PRISHTINË, 26 Tetor 2015/ “Austria është pjesë e pandashme e bashkësisë ndërkombëtare, që ndan suksesin e Kosovës së re së bashku me popullin dhe institucionet e saj”, tha sonte në Prishtinë Presidentja e Republikës, Atifete Jahjaga.
“Një Kosove të përkushtuar për të qenë pjesë e arkitekturës globale të sigurisë, besnike e vlerave të përgjithshme për paqe dhe zhvillim dhe kontribuuese në nismat për ndihmë atyre që sot bredhin rrugëve të botës, të shpërngulur me dhunë nga vendet e tyre”, u shpreh Jahjaga.
Presidentja e Republikës së Kosovës mbajti një fjalë me rastin e Ditës Kombëtare të Austrisë.
“Jemi mbledhur së bashku sonte për të shënuar 60 vjetorin e pavarësisë dhe të deklarimit të neutralitetit të përhershëm të Republikës së Austrisë dhe njëkohësisht po vlerësojmë përkushtimin e saj për paqen, sigurinë dhe demokracinë si vlera të çmuara të shoqërive kudo në botë. Mbi të gjitha, në këtë përvjetor të neutralitetit të përhershëm të këtij vendi, çmojmë dedikimin e tij në ndihmë të ndërtimit të mirëkuptimit ndërmjet njerëzve dhe popujve”, theksoi Presidentja e Kosovës.
Ndërkohë, vijoi ajo, “sot kur po e testojmë demokracinë tonë, kur po e sfidojmë kushtetutën tonë e njëkohësisht po piqemi politikisht – ju na qëndroni sërish pranë, si miq dhe përkrahës, të bindur se problemet në tranzicionin tonë mund të tejkalohen me dialog dhe mirëkuptim, duke ndërtuar ura bashkëpunimi dhe duke punuar fort në ndërtimin e një shteti të së drejtës, që shmang rrugën si zgjidhje, por që ofron zgjidhjen brenda vetë institucionit”.
Në kufi me Ballkanin Perëndimor dhe e afërt me këtë pjesë të Evropës, tha Jahjaga, Austria e ka kuptuar më së miri jo vetëm historinë e dhimbshme të rajonit, por edhe përpjekjen për t’u bërë pjesë e pandashme e kombeve të lira në një familje evropiane.
“Austria ka qëndruar afër nesh për të na ndihmuar në rrugëtimin jo aq të lehtë të ndërtimit të paqes”, theksoi Presidentja e Kosovës.
Ju, shtoi ajo, keni qenë pjesë e pandashme e historisë më të re të Kosovës, të përfshirë në dhënien fund të dhunës dhe luftës, në ndërtimin e një Kosove më ndryshe, më gjithëpërfshirëse, më demokratike, më të përparuar – një shtet i ndërtuar mbi parimin e drejtësisë.
“Ju keni qenë shembull jo vetëm i mikpritjes, në kohë paqeje, gjatë bisedimeve për statusin e Kosovës, të përpjekjeve për ta bërë Kosovën të mëvetësishme, demokratike dhe përgjegjëse për fuqizimin dhe avancimin e të drejtave për të gjithë qytetarët e saj”, tha Jahjaga duke uruar ambasadorin e Austrisë në Kosovë, Johann Brieger.
“I nderuar ambasador Brieger, puna dhe përkushtimi juaj në fuqizimin e lidhjeve ndërmjet dy vendeve tona ju ka bërë mikun më të mirë të qytetarëve të Kosovës. Ju do të ikni nga Kosova së shpejti, pak ditë pas vizitës zyrtare të mikut tim dhe të Kosovës, Presidentit Fischer të Austrisë, por besoj se do të mbani në kujtesë dhe në zemër këtë vend”, u shpreh Presidentja kosovare.

Shqiptarët, e suksesshëm përsëri në “Tapetin e Kuq”, New York

October 26, 2015 by dgreca

Kësaj rradhe, do të përfitojë nga përfitimet dhe Fondi i Fëmijëve Shqiptarë me Autizëm i Dr. Shpresa Xhaklit/
Shkruan:Beqir SINA/
NEW YORK CITY : Rrugëtimi i nisur një vit më parë në Nju Jork, i vazhduar me udhëtimin e saj në Prishtinë dhe Podgoricë, mbërrriti dje në mbrëmje përsëri në mjedisin amerikanë, i përthekuar në katër fjalë: “Albanian American Success Stories – Histori Suksesi Shqiptaro Amerikane”.Mbi këtë titull dinjitoz dhe motiv – impresionues, e ka ndërtuar projektin e saj – Drejtoresha Ekzekutive e këtij projekti, zonja Vera Mjeku, projekt të cilin ajo do ta shpaloste së bashku me bashkëpuntorët e saj – të përkushtuar dhe të talentuar, në njërën prej ambienteve më të frekuentueshme në New York – qendrën turistike Battery Gardens, lokalin e njohur të shqiptaro amerikanit Paul Nicaj.
Projekti vazhdon të udhehiqet nga i njëjti Bord, një grup entuziast profesionistësh të fushave të ndryshme, si Mjeshtri i madh i fotografisë Fadil Berisha, sipërmarrësi Giorgio Kolaj, financieri Nick Markola, avokatja Beti Beno, Dr. Kujtim Balidemaj, Avni Mustafaj, Etrita Ibroci, Mark Kosmo, Blerta Alikaj, Ismer Mjeku e Simon Vukel dhe Drejtoreshën Ekzekutive Vera Mjeku.
Projekti Histori Suksesi Shqiptaro Amerikan, është produkt i gërshetimit të shanseve, që të jep edukimi dhe kultura perendimore, dhe atyre që vijnë nga vendorigjina e shqiptarëve të Amerikës, prej edhe nga kan ardhur ata; Shqipëria, Kosova, Maqedonia, Mali i Zi, Lugina e Preshevës, Çamëria, Arbereshët dhe disapora, dhe kan bër sukses dhe emër të madh në SHBA, në disa fusha të jetës.
Duke, e jetësuar kështu edhe ëndrrën amerikane, tashmë të hartuar edhe në projektet dhe idetë e tyre, agjendën e përditëshme, të këtyre njerëzve, shume të suksesshëme në jetën, punën dhe veprimtarinë e tyre në Shtetet e Bashkuara. Madje disa nga këta shqiptar pjes të histori suksesit, janë tani në vendin dhe mesin e atyre njerëzve, që i njeh gjithë bota – aty ku janë ngritur lart emra të njohur të fushave të ndryshme të suksesit, në SHBA, në biznes, afarist, art, muzik, kultur, sport, edukim dhe, politik, finance e teknologji bashkohore.
“Albanian American Success Stories – Histori Suksesi Shqiptaro Amerikane”, është projekti, më i madh, deri tani, ku janë mbledhur shumë shqiptarë që kan bër një histori suksesi, dhe, që tani ata e ndajnë atë me detaje dhe këshilla nga historia dhe rruga e suksesit të tyre për të qenë aty ku janë sot, me të gjithë shqiptarët anemban botës.
“Kjo, platformë e nxitjes se bashkepunimit midis profesionisteve, të rinjve dhe studentëve dhe krijimi i mediumeve dhe eventeve të tilla, ka thënë drejtoresha Ezkzekutive, e ketij projekti, zonja Vera Mjeku, është vendi ku ata mund të lidhen dhe bashkëpunojnë, por edhe të frymezohen i cili është shumë i rëndësishëm. Mbrëmja është ideuar me ecje në tapetin e kuq, intervista nga mediat, mundësi për të komunikuar me panelin e zgjedhur, argëtim, pjesëmarrje në ankand dhe mundësi për përfshirje direkte në hapjen e procesit të nominimit për raundin e dytë”.
Parakalimi i thjesht në “Reed Carpet – Tapetin e kuq”, i më shumë se 500 të ftuarve, personalitete dhe figura të njohura të komunitetit, dhe në SHBA, në “breshërin” e blitzve, të aparateve fotografike dhe kamerave, intervistat dhe mesazhet e tyre, ishin pik-kontakti i parë, dhe, më së vonë i “Shpërblimeve!” të kësaj veprimtarie të rëndësishme.
Madje, aty kishin ardhur jo vetëm shqiptar e amerikan nga zona e Tri- Shtetshit, por edhe shqiptarë të suksesshëm këta nga shtete të largta, si Teksasi – Dallas, Miçigan – Detroit, Illinoi – Çikago, Kalifornia – Los Angelos, Ohaio – Klevenland, Uashingtoni dhe Vixhinia, biznesmeni i suksesshëm dhe veprimtari i njohur nga Dallasi- me grupin e tij – zoti Nazar Mehmeti President i Unionit Global i Biznesmenëve Shqiptar në Botë, biznesmen që kan investuar në vendlindje si , z Ismet Smaji, sekretar i këtij Unioni, dhe Ylber Korça, nga Struga, së bashku me shqiptaro amerikanin Dr Naim Dedushaj – Drejtor për Diasporën në qeverinë e Kosovës, ideator dhe kreatori i Rrjetit të Bizneseve Shqiptare në DiasporëKëtë projekt të madh organizatori dhe ideatori i saj, e kishte konceptuar madje si një platformë e nxitjes se bashkepunimit midis profesionisteve, të rinjve dhe studentëve dhe krijimi i mediumeve dhe eventeve të tilla.
Çka, e ka pohuar edhe vet drejtoresha ezkzekutive, e ketij projekti, zonja Vera Mjeku, e cila thotë se ky :” është vendi ku ata mund të lidhen dhe bashkëpunojnë, por edhe të frymezohen – këta njerëz, i cili është shumë i rëndësishëm. Mbrëmja është ideuar me ecje në tapetin e kuq, intervista nga mediat, mundësi për të komunikuar me panelin e zgjedhur, argëtim, pjesëmarrje në ankand dhe mundësi për përfshirje direkte në hapjen e procesit të nominimit për raundin e dytë”.
Madje projetktin “Albanian American Success Stories – Histori Suksesi Shqiptaro Amerikane”, kësaj rradhe (mbrëm në Battery Park ), duke parkaluar në karpetin e kuq dhe intervistave – e ka përgëzuar për suksesin e shqiptarëve të Amerikës, edhe senatori demokrat i Nju Jorkut, Charl Shumer, si dhe asambleisti Mark Gjonaj, i cili është shqiptari i parë në historinë e disaporës në postin më të lart në politik – Asamblenë e Nju Jorkut. Mbrëmja u moderua nga aktorja dhe producentja e Hollywoodit Masiela Lusha, me pjesëmarrjen dhe një performancë nga diva e operës ndërkombëtare Ermonela Jaho përkrah një paneli profesionistësh, më zë në fusha të ndryshme si Dr. Dennis Dimitri, President i Shoqatës së Mjekëve të Massachusetts, Bankieri dhe flinatropisti i njohur Richard Lukaj, Gazetarja e Fox5 Lidia Curanaj, Profesori Peter Christopher, Stilistja Katerina Bocci dhe Sipërmarrësi në fushën e teknologjisë Dr. Donald Leka. Kurse, në vazhdën të përfitimit nga ky projekt, ndërsa vitin e kaluar përfitoi Fondi Kosovar për Arsim, ndërsa nga kjo mbrëmje përfitojë Fondi i Fëmijëve Shqiptarë me Autizëm i Dr. Shpresa Xhaklit. Nëpërmjet një ankandi që u zhvillua në ambjetet e Battery Park Restaurant, gjatë mbrëmjes nën udhëheqjen e Miss Massachusets 2015 u promovuan edhe stiliste shqiptare nëpërmjet stilimeve të tyre apo personazheve nga projekti me produktet e tyre të dhuruara.
Ambasadoria e autizmit në botë Dr. Shpresa Xhakli, deklaroi se ajo po punon me Organizatën Botërore të Autizmit në Doha – që Kosova shumë shpejt të pranohet në këtë organizat, si dhe shtoj që një tenor i famshëm i Kalifornia këto ditë do të jet në Kosovë në një koncert bamirësie per femijet kosovar me autizem.
Drejtoresha e këtij projekti Vera Mjeku, mendon se :”Impakti nga faza e parë kanë qenë shumë pozitiv dhe konstruktiv dhe kjo ka bërë që ky Projekt, të promovohet dhe në Kosovë dhe Mal të Zi, brenda këtij viti. Historitë e suksesit shqiptaro amerikan janë burim frymëzimi dhe bashkëpunimi edhe për shqiptarët në Ballkan dhe për këtë arësye në bashkëpunim me Ambasadat Amerikane në Prishtinë dhe Podgoricë u mbajtën panele në universitete, tryeza të rrumbullakta, vizita në investime shqiptaro dhe amerikane dhe qendra për fëmijë me aftësi të kufizuara për të parë mundësitë se si anëtarë të projektit të inkuadrohen e të ndihmojnë në fusha të ndryshme. Projekti, synon që të krijojë shkëmbime të vazhdueshme grupe profesionishtësh dhe grupe mentorësh për studentë dhe profesionistë të ri” ka pohuar znj Mjeku.
Projekti që synon evidentimin dhe promovimin e historive të suksesit dhe krijimin e një rrjeti bashkëpunues të profesionistëve dhe sipërmarrësve shqiptare, një Mbrëmje e tipit Gala, në raundin e dytë, në lokalin luksoz Battery Gardens në New York, pronë e shqiptaro amerikanit Paul Nicaj, u shqoërua edhe me këngë e valle shqiptare, ku nën shoqërinë e DJ Bex – nga Bekim Xhaferri dhe Aida Gashi – Radio Emigranti, muzikant dhe këngëtar të njohur Merita Halili – Raif Hyseni , tenori Ergin Oda, preformuan për këtë mbrëmje.
Albanian American Success Stories – Histori Suksesi Shqiptaro Amerikane, do të promovohet shumë shpejt në Washington DC në një mbrëmje me anëtarë të Kongresit dhe Senatit , vitin e ardhshëm me anëtarë të organizatave të rëndësishme në Washington dhe më pas në Tiranë në Pranverë të vitit të ardhshëm – 2016.

Kosova edhe një datë histrike: 27 tetor 2015

October 26, 2015 by dgreca

KOSOVA ME BASHKIMIN EVROPIAN NËSHKRUAN MSA-në/
Nga Behlul Jashari/ PRISHTINË, 26 Tetor 2015/ Një datë tjetër historike për Kosovën do jetë nesër, 27 tetor 2015, kur në Strasburg nënshkruan me Bashkimin Evropian Marrëveshjen për Stabilizim-Asociimin.
Marrëveshjen, nga Bashkimi Evropian do ta nënshkruajnë Përfaqësuesja e Lartë për Politikë të Jashtme dhe Siguri, Federica Mogherini dhe Komisioneri për Politikat Evropiane të Fqinjësisë dhe Negociatat e Zgjerimit, Johannes Hahn, ndërsa nga Kosova, në emër të qeverisë Kryeministri Isa Mustafa dhe ministri i Integrimit Evropian, Bekim Çollaku.
Qeveria kosovare vlerëson se MSA është një prej marrëveshjeve tepër të rëndësishme që po arrihet në këtë periudhë dhe një sukses i madh i Republikës së Kosovës.
“Me MSA, ne po arrijmë që të krijojmë marrëdhënie kontraktuale me Bashkimin Evropian për herë të parë. Me marrëveshje po përkufizohet edhe territori i Republikës së Kosovës në të cilin zbatohen rregullat e Bashkimit Evropian. Dhe, ne zhvillojmë negociata me Bashkimin Evropian në procesin e anëtarësimit tonë në BE, që në një formë e përkufizon edhe njohjen, edhe rolin që Bashkimi Evropian do ta ketë ndaj Kosovës në veçanti”, është shprehur kryeministri Mustafa.
Ministri i Intergimit, Çollaku ka theksuar edhe përfitimet ekonomike nga MSA, që nënkuptojnë liberalizimin e tregut me Bashkimin Evropian në tërësi, përpos disa produkteve specifike të përfshira në marrëveshje, rritjen e investimeve direkte në Kosovë.
Ai, Marrëveshjen Stabilizim Asocim e ka vlerësuar “të rëndësisë historike dhe jetike për integrimin politik, ligjor dhe ekonomik të Republikës së Kosovës në Bashkimin Evropian”.
Negociatat për marrëveshjen e Stabilizim-Asociimit, kanë nisur para dy vitesh, në 28 tetor të vitit 2013.
Më 22 tetor 2015 Këshilli i Bashkimit Evropian miratoi Marrëveshjen e Stabilizim Asociimit ndërmjet Kosovës dhe Bashkimit Evropian.
“Miratimi i MSA-së në Këshillin e BE-së shënon përfundimin e procesit të Marrëveshjes së Stabilizim Asociimit dhe hap rrugë për nënshkrimin e MSA-së në 27 tetor në Strazburg”, theksonte me këtë rat Ministria e Integrimit Evropian të Kosovës.
Në 24 tetor, nisma për lidhjen e Marrëveshjes për Stabilizim-Asociimin ndërmjet Bashkimit Evropian dhe Kosovës u miratua nga qeveria kosovare.
Marrëveshja ka strukturë dhe përmbajtje të njëjtë sikur marrëveshjet e të gjitha vendeve të rajonit dhe përfshinë të gjitha elementet e një bashkëpunimi të plotë politik, ekonomik ndërmjet Kosovës dhe Bashkimit Evropian. MSA, marrëveshja e parë kontraktuale ndërmjet Kosovës dhe Bashkimit Evropian, përmban 597 faqe, në X tituj, VII anekse dhe 5 protokolle.
Kosova, me pavarësinë e shpallur para 7 viteve, në 17 shkurtin historik 2008, është njohur deri tash nga mëse 110 shtete anëtare të OKB-së. Kosovën, nga shtetet fqinje, vetëm Serbia nuk e ka njohur ende, ndërkohë që nën kryesimin e BE-së e mbështetur nga SHBA, Prishtina e Beogardi kanë zhvilluar në Bruksel 29 raunde të dialogut në nivel të lartë kryeministror dhe kanë arritur disa marrëveshje të rëndësishme në procesin e dialogut drejt normalizimit të marrëdhënieve.

Mustafa: MSA-ja hap rrugën e Kosovës për anëtarësim në BE

October 26, 2015 by dgreca

-Procesi i nënshkrimit të Marrëveshjes për Stabilizim Asociim është fillimi i një rruge të gjatë, që do të bëhet për t’iu ofruar Bashkimit Evropian/
PRISHTINË, 26 Tetor 2015/ Kryeministri i Republikës së Kosovës, Isa Mustafa, mori pjesë në takimin e Forumit të Nivelit të Lartë, në të cilin është prezantuar Raporti Vjetor i donatorëve për vitin 2014 si dhe prioritetet e ardhshme të qeverisë së Kosovës.
Kryeministri Mustafa, para të pranishmëve tha se Republika e Kosovës, ka bërë progres të jashtëzakonshëm viteve të fundit në çdo sferë të shoqërisë dhe se ky progres u realizua falë bashkëpunimit dhe ndihmës së vazhdueshme të partnerëve ndërkombëtarë.
“Kam kënaqësi të veçantë që sot të marrë pjesë në hapjen e takimit të Forumit të Nivelit të Lartë për koordinimin e donacioneve. Veçmas jam i lumtur që këtë po e bëjmë një ditë para se të shkoj në Strasburg, së bashku me ministrin e Integrimeve Evropiane, për të nënshkruar Marrëveshjen e Stabilizim Asociimit, që është një Marrëveshje tepër e rëndësishme për ne, sepse hap dyert tona që ne të kemi marrëdhënie kontraktuale me Bashkimin Evropian, dhe të kemi një cilësi krejt tjetër të bashkëpunimit ekonomik me vendet e Bashkimit Evropian”, theksoi kryeministri Mustafa.
Ai shprehu përkushtimin e qeverisë së Kosovës për të vazhduar me reformat e gjithmbarshme për të mirën e qytetarëve dhe për një perspektivë të qartë për anëtarësim në Bashkimin Evropian.
Kryeministri Mustafa, po ashtu tha se procesi i nënshkrimit të Marrëveshjes për Stabilizim Asociim është fillimi i një rruge të gjatë, që do të bëhet për t’iu ofruar Bashkimit Evropian. “Një rrugë për të cilën ne nuk kemi alternativë tjetër, sepse kjo alternativë është përkrahur dhe përqafuar nga qytetarët tanë dhe nga gjithë miqtë tanë ”, theksoi kryeministri Mustafa./b.j/
Fjala e plotë e kryeministrit Isa Mustafa në Forumin e Nivelit të Lartë
Kam kënaqësi të veçantë që sot të marrë pjesë në hapjen e takimit të Forumit të Nivelit të Lartë për koordinimin e donacioneve.
Veçmas jam i lumtur që këtë po e bëjmë një ditë para se të shkoj në Strasburg, së bashku me ministrin e Integrimeve Evropiane, për të nënshkruar Marrëveshjen e Stabilizim Asociimit, që është një marrëveshje tepër e rëndësishme për ne, sepse hap dyert tona që ne të kemi marrëdhënie kontraktuale me Bashkimin Evropian, dhe të kemi një cilësi krejt tjetër të bashkëpunimit ekonomik me vendet e Bashkimit Evropian.
Ne kemi bërë një progres të jashtëzakonshëm viteve të fundit dhe ky progres është arritur falë partneritetit dhe bashkëpunimit që kemi pasur me ju së bashku.
Dëshiroj të nënvizoj përkushtimin tonë për të vazhduar me reformat e gjithmbarshme për të mirën e qytetarëve të Republikës së Kosovës, dhe për një perspektivë të qartë të Kosovës në Bashkimin Evropian.
Jemi të vetëdijshëm që procesi i nënshkrimit të Marrëveshjes për Stabilizim dhe Asociim, është një fillim i një rruge të gjatë, që do ta bëjmë për t’iu ofruar Bashkimit Evropian, në një rrugë për të cilën ne nuk kemi alternativë tjetër, sepse kjo alternativë është përkrahur dhe përqafuar nga qytetarët tanë dhe nga gjithë miqtë tanë.
Qeveria e Republikës së Kosovë ka miratuar Programin e saj qeverisës dhe ne kemi vendosur zhvillimin ekonomik në epiqendër të punës tonë. Çdo resurs në dispozicion, e kemi vendosur në shërbim të përmirësimit të jetës së qytetarëve, përmes zhvillimit ekonomik, arsimit, shëndetësisë dhe integrimeve euroatlantike.
Reformat e para të cilat ne i kemi bërë, kanë dhënë rezultatet e para. Kemi përmbyll një fazë të rëndësishme të reformave fiskale, të cilat kanë hyrë në fuqi nga shtatori i këtij viti; kemi arritur marrëveshje me Fondin Monetar Ndërkombëtar e cila krijon kushte që të kemi investime kapitale më të mëdha dhe llogarisim se investimet kapitale do t’i shtojmë për 400 milionë euro në vitet e ardhshme; kemi aprovuar dhe kemi filluar implementimin e Ligjit për Faljen e Borxheve Publike, deri më 31 dhjetor të vitit 2008, dhe këtë ligj tani po e zbatojmë; po e bëjmë ndryshimin e ligjit për Prokurimin Publik dhe Ligjit mbi Financat Publike, dhe jemi të gatshëm që nga data 1 janar i vitit të ardhshëm të fillojmë me prokurimin elektronik; kemi zbatuar pagesën e përvojës në punë, dhe përmes kësaj kemi arrit që të ardhurat reale personale t’i rrisim mesatarisht 6 për qind, mirëpo ka diferencë në këto të ardhura, varësisht nga përvoja e punës, kështu që edhe me këtë kemi bërë përmirësimin e standardit të individëve që punojnë në shërbimin civil, në arsim, në shëndetësi dhe në fusha të tjera; kemi siguruar mjetet për rritjen e ndihmave sociale për rreth 25 për qind, dhe kemi përfshirë një numër të madh të familjeve që janë në gjendje të pavolitshme sociale, dhe po ashtu kemi siguruar mjetet për vitin e ardhshëm që të bëjmë rritjen e pensioneve për kontributdhënësit, dhe kjo rritje e përgjithshme është rreth 30 për qind në krahasim me mjetet që kemi pasur deri më tani, mirëpo natyrisht do të shfrytëzohet për të gjitha shtyllat e kontributdhënësve, për individët, për familjet, dhe për pensionet invalidore.
Prandaj, mbetet që më vonë komisionet tona, së bashku me pensionistët, të përcaktojnë rangimin e njerëzve për shfrytëzimin e këtyre mjeteve në bazë të këtyre shtyllave.
Më e rëndësishmja është se të dhënat tregojnë se ekonomia ka filluar të marrë rrugën e duhur. Kemi një rritje ekonomike e cila është solide dhe të cilën dëshirojmë që ta rrisim edhe më tutje në vitet në vijim. Dhe unë mendoj se përmes politikave fiskale dhe masave tjera ne do t’i arrijmë synimet tona sa i përket rritjes ekonomike e cila mundëson që të përballojë fluksin e të papunëve që çdo vit hynë në tregun tonë të punës.
Jemi në fazën përfundimtare për Strategjinë Kombëtare për Zhvillim, e cila do të shërbej si udhërrëfyese për zhvillimin ekonomik në të ardhmen, përmes së cilës ne do t’i përcaktojmë prioritetet e prioriteteve në zhvillimin ekonomik.
Dëshiroj t’ju falënderojë gjithë juve që kemi ofruar një përkrahje të madhe në përcaktimin dhe definimin e kësaj strategjie të cilën e kemi në vijim.
Ne jemi të interesuar që t’i ndërmarrim të gjitha masat e reformave të nevojshme për të tërhequr më shumë investitorë të jashtëm. Po punojmë në Ligjin për Investime Strategjike, mirëpo edhe këtë Ligj do ta bashkërendisim me ju në mënyrë që ai t’i plotësojë të gjitha standardet që parashihet nga BE dhe nga vendet tjera, me të cilat dëshirojmë të kemi marrëdhënie ekonomike dhe të kemi tërheqje të investimeve.
Jemi të interesuar që të hapim vende të reja të punës, të kemi shërbime më cilësore publike, të kemi kujdes më të mirë shëndetësor, të kemi arsim cilësor, e po ashtu të kemi mundësi që të rinjve tanë t’u sigurojmë perspektivë në Kosovë.
Falënderoj ministritë tonë që drejtpërdrejtë kanë punuar në këtë fushë, Ministrinë e Integrimeve Evropiane për punën e madhe dhe Ministrinë e Financave, dhe shpreh gatishmërinë tonë që si Qeveri të përkrahim gjithë këto nisma dhe këtë punë që po bëhet. Kemi angazhuar çdo resurs për këtë qëllim. Tani po hartojmë Buxhetin për vitin 2016. Fondet e BE-së janë duke mbështetur sektorët kyç të zhvillimit tonë, siç është energjia, bujqësia, rritja e konkurrencës. Për herë të parë, BE-ja do t’i ofrojë Kosovës mbështetje direkte buxhetore në vlerë prej 25 milionë euro. Në këtë kuadër, Këshilli Kombëtar për Investime po bënë përgatitje të Listës Prioritare të Projekteve Infrastrukturore për financimin në Institucionet Financiare Ndërkombëtare.
Po punojmë edhe në realizimin e projekteve tona në kuadër të iniciativës së gjashtë vendeve të Ballkanit Perëndimor, e cila ka të bëjë me sigurinë e infrastrukturës e cila na bie në nivel të njëjtë me vendet e BE-së në të ardhmen. Të gjitha reformat që ne po i bëjmë, nuk janë të lehta. Por, as progresi që e kemi arritur gjatë kësaj periudhe nuk ka qenë i lehtë. E kemi bërë bashkë me ju dhe jemi të bindur se do t’ia dalim t’i realizojmë edhe gjitha synimet tona.
Jemi të interesuar për paqe në rajon, jemi të interesuar për partneritet të qëndrueshëm në skenën ndërkombëtare dhe për partneritet të plotë edhe me Shtetet e Bashkuara të Amerikës dhe me të gjitha vendet e Bashkimit Evropian, sepse ne vlerësojmë kontributin që këto vende kanë dhënë në zhvillimin demokratik të Kosovës, deri më tash.
Jemi të vendosur të vëmë themelet e zhvillimit të qëndrueshëm ekonomik, të krijimit të një infrastrukture të domosdoshme moderne, të mbështesim sa më shumë dhe me të gjitha masat zhvillimin e sektorit privat, të mbështesim sistemin e pavarur gjyqësor, në mënyrë që ky sistem të sigurojë kushte stabile për funksionimin e ekonomisë dhe kushte të barabarta për të gjitha bizneset dhe qytetarët.
Në fund, shpreh mirënjohjen e Qeverisë së Republikës së Kosovës për përkrahjen e juaj të vazhdueshme dhe dëshiroj që sukseset e ardhme të jenë suksese tona të përbashkëta.