Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for February 2016

MESAZH DREJTUAR FAMILJES KUPI NGA KRYETARI I LEGALISTEVE Z. SULEJMAN GJANA

by

E nderuar Familja Kupi,/

Në emër të Partisë “Lëvizja e Legalitetit” dhe të gjithë Legalistëve shqiptar, ju shprehim ngushëllimet tona më të sinqerta dhe të përzemërta për humbjen e njeriut tuaj të dashtun dhe ikonës së rezistencës kundër diktaturës komuniste, të ndjerit Fatbardh Abaz Kupi.I lindur dhe rritur në një familje patriotike dhe biri i kryepatriotit Gjeneral Abaz Kupit, i ndjeri Fatbardh Kupi mishëroi qysh në moshë të re vlerat fisnike të të parëve të tij dhe të gjithë atyre që kishin vendosur të mbronin me vetëmohim dinjitetin e tyre, emrin e të parëve të tyre si dhe të atyre që ata përfaqësonin.Gjatë jetës së tij, Fatbardh Kupi nuk bëri asnjë mëkat për të merituar vitet e burgut, internimet dhe torturat përgjatë më shumë se 50 vitesh. Përkundrazi ! Ai ishte pinjolli i një familjeje atdhetare dhe nacionaliste, ishte i biri i Heroit të Rezistencës së 7 Prillit ‘39 kundër pushtimit të vendit, ishte një njeri me karakter, besë e burrni, ishte i dashur për farefisin, miqtë dhe dashamirët dhe i mëshirshëm ndaj kundërshtarëve, ishte një bashkëshort dhe prind shembullor. Por mbi të gjitha, Ai ishte një atdhetar i pamposhtur dhe një shqiptar i ndershëm që besonte në vlerat e lirisë dhe demokracisë.

Dhe pikërisht, për këta arsye, ata që dhunuan atdheun dhe kombin tonë për një gjysmë shekulli dhe që përfaqësonin anti-vlerat e shqiptarizmit dhe patriotizmit, shkatërruan kaq shumë jetë shqiptarësh tëndershëm dhe të pafajshëm, ndër të cilat atë të të ndjerit Fatbardh Kupi dhe të familjarëve të tij.Por i ndjeri Fatbardh Kupi, në traditën e të parëve të tij, diti tu rezistojë pa u përkulur asnjëherëkundërshtarëve të vet politikë si dhe armiqve të familjes dhe të kombit shqiptar. Ai rezistoi duke u mbijetuar kryelartë vuajtjeve dhe dhimbjeve të pallogaritshme sepse ishte i bindur se qëndresa e vet ishte e drejtë dhe se diktatura komuniste do të perëndonte një ditë e bashkë me të edhe mitet dhe gënjeshtrat e tyre kundër nacionalistëve dhe patriotëve shqiptarë. Sikur për të jetësuar shprehjen e shkrimtarit francez të fillim-shekullit të kaluar, Henri Jeanson, kur thoshte se “Kemi vetëm një liri: lirinë për të luftuar për të fituar lirinë”, Fatbardh Kupi luftoi gjithë jetën e tij derisa triumfoi dhe u çlirua nga prangat e diktaturës komuniste në fillim të viteve 90.

Ndonëse forca dhe vendosmëria e vet e mundësuan të përjetojë fundosjen e regjimit komunist, i ndjeri Fatbardh Kupi e kishte kuptuar se demokracia shqiptare ishte e cunguar dhe e kurdisur mbrapsht. Ai arriti të shijojë lirinë dhe demokracinë e plotë vetëm kur u bashkua në SHBA me familjarët e vet prej të cilëve ishte ndarë 60 vite më parë dhe ku jetoi vitet e fundit të jetës së tij.

Për legalistët shqiptarë dhe për të gjithë ata që besojnë në vlerat e lirisë dhe demokracisë, rezistenca e të ndjerit Fatbardh Kupi ndaj diktaturave fashiste, naziste dhe komuniste; dashuria e tij për liri, demokraci e drejtësi; përkushtimi i tij ndaj Atdheut dhe Kombit; besnikëria e tij ndaj legjitimitetit dhe Mbretit, janë dhe do të mbeten shembuj frymëzimi në përpjekjet tona të përditshme derisa të realizojmë amanetin e Gjeneral Abaz Kupit, të patriotëve të tjerë dhe të gjithë atyre që sakrifikuan jetën e tyre për Shqipërinë.Në këto ditë zi e pikëllimi për Familjen Kupi dhe mbarë familjen legaliste e nacionaliste shqiptarë, ju shprehim edhe njëherë ngushëllimet tona më të thella për humbjen e të ndjerit Fatbardh Kupi.

I paharruar qoftë kujtimi i Tij.

Sulejman Gjana

Kryetar i PLL

 

 

E KAM PERJETUAR FEMIJ SKENEN E ARRESTIMIT TE BARDH KUPIT

by

NGA HAKIK MENA*/

E nderuar familja Kupi!

I nderuar Imam!

Me dt 23 Shkurt 2016, mbasdite, nga nji telefonatë e shokut tim të fëmijërisë, Sokolit, me të cilin u rritëm në kampin e internimit të Gradishtës, mora lajmin e hidhur që babai i tij Fatbardh Abaz Kupi, ose xhaxh Bardhi, siç i drejtoheshim ne në fëmijëri, kishte ndrruar jetë!

Nuk e di, por për momentin u shtanga, më kapi nji trishtim i kuptueshëm dhe m’u rikujtua ajo skena e tmerrshme e arrestimit të dytë të xhaxh Bardhit. Një skenë që kurrë nuk më del nga mendja; sidomos mënyra e të ecurit me pranga në duar e xhaxh Bardhit ditën e arrestimit! Krejt i qetë, tepër kryenaltë, me një figurë e hapa gjithë dinjitet. Athua po i bënin ndonji nderim apo dekorim, ndërkohë ende pa u bërë gjyqi, dihej se do e dërgonin në burgjet e llahtarshme të komunizmit!

Ky gjest dinjiteti njerëzor, për njerëzit që nuk kanë shumë dijeni se çfarë ka qenë komunizmi, duket si një akt personal, por në fakt nuk ishte thjesht një qendrim personal i një burri trim e krenar. Xhaxh Bardhi kishte nji familje, të cilës fatkeqësisht po i kthente shpinën! Ai po braktiste tashmë 4 fëmijët e tij të parritur, Lisën, Sokolin, Jonën e Buçin si dhe bashkëshorten fisnike, teta Lirien, e cila gjithashtu është larguar para pak kohësh prej kësaj bote! Fati i fëmijëve, grave e familjarëve ishin sprova dhe tortura më e tmerrshme për ata burra, të cilëve u ra pjesa e mundimshme e përballimit të dhunës dhe padrejtësisë së komunizmit! Sepse komunizmi nuk dënonte persona, por dënonte familje, fise, madje edhe krahina të tëra!

Ajo skenë e arrestimit të xhaxh Bardhit, ishte shfaqur bukur shpesh nëpër sektorët e internimeve, në atë kapërcyell të viteve ’70-‘80, me burrat e klasës sonë, të cilët arrestoheshin në seri, me të njëjtën akuzë: – për agjitacion e propagandë. Skenarët e arrestimeve ishin të njejtë dhe synonin terrorizimin e gjithë klasës sonë si dhe ngulitjen e psikozës te të gjithë të rinjtë e asaj kohe, se shpejt do t’u vinte radha edhe atyre. Kemi fakte dhe dëshmi “pa fund” të këtij skenari, që synonte të prodhonte fajtorë të pafajshëm, me qëllim dënimin e viktimës së radhës.

Dhe nën atë torturë psiqike, gjeste të tilla kurajoze si qendrimi i xhaxh Bardhit para xhelatëve të Sigurimit, ishin si një dritë orientuese për sytë, mendjet dhe zemrat tona. Ai qendrim ishte si një mesazh i qartë se komunizmi, sado të mundohej, nuk mund të na nëpërkëmbte dinjitetin si njerëz! Vetëdija për origjinën, krenaria për patriotizmin e të parëve tanë dhe shpërfillja e frikës përballë sadizmit komunist ishin praktikisht një formë e kundërshtimit të regjimit, të cilën ata e ndienin dhe kuptonin fare mirë. Zyrtarët e ndryshëm komunistë përmendnin shpesh herë atë shprehjen: “nuk vjen më koha juaj!” athua se kërkonin të bindnin veten për frikën që u shkaktonte ajo ditë. E pikërisht, qendrimet dinjitoze të prindërve tanë, sfidat si ajo e xhaxh Bardhit që ende i kam para syve, ishin një burim force dhe ngushllimi për mua dhe gjithë të rinjtë e djemtë e brezit tim.

Nga ana tjetër duke kujtuar atë ditë, përtej trishtimit dhe keqardhjes për lajmin e ndarjes përgjithmonë me njeriun tonë të dashur, u ndjeva disi i çliruar e i lehtësuar nga fakti që Bardh Kupi ka qenë dhe do të mbahet mend si një ikonë e qëndresës dhe e dinjitetit përballë dhunës së shkaktuar nga sistemi sllavo-komunist. Pikërisht kjo forcë morale që ai ka demonstruar ndaj veglave qorre të sistemit, na bëjnë krenarë sot e sa të jetë jeta, se pavarësisht vuajtjes gati gjysëm-shekullore, emri i xhaxh Bardhit, do të jetë i shkruar gjithmonë me germa të arta në librin e nderit të këtij kombi. Figura e tij ishte në harmoni të plotë me emrin, i pastër dhe i bardhë si kristal, pavarësisht helmit, llumit e dhunës së pandërprerë me anë burgjesh, internimesh e përndjekjesh të pareshtura.

***

Me këtë rast, më lejoni të përshkruaj fare shkurt, disa momente kulmore në pikëpamjen time, nga jeta e këtij burri, prindi e antikomunisti të pamposhtur!

Së pari, Fatbardh Abas Kupi është “ilustrim manuali” se si nji sistem do të sterroste për 45 vjet, duke e persekutuar në mënyrë konstante dhe të pa mëshirshme, të birin për shkak të të atit! Pa bërë asnjë faj, pa asnjë shkelje ligji, pa asgjë me të cilën mund të dënohej dikush. Thjesht një farë “trashgimi” të dënimit! Paradoksi më i madh qendron në faktin se i ati, ishte arkitekti i rezistencës së parë kombëtare, institucionale të 7 prillit 1939 ndaj pushtimit fashist italian. Pikërisht këtu nis dhe odiseja e vuajtjeve të Bardhit, të cilat fatkeqësisht nuk do t’i ndahen, deri në rënien e Murit të Berlinit. Bardhi, jo vetëm që nuk do ta jepte veten për vuajtjet e tij, të cilat do vazhdonin zinxhir duke filluar me internimin prej fashizmit në Himarë dhe më vonë në Itali e deri tek internimi i fundit në Gradishtë, por nuk kishte as më të voglin pendim.

Se dyti, me instalimin e diktaturës sllavo-komuniste, do të niste edhe kalvari i vuajtjeve të papërshkrueshme të tij, duke provuar burgun e parë, duke vazhduar me internimin në Tepelenë, Berat, Kuç, Porto Palermo, Çorovodë, Savër, Gjazë, Grabian, Gradishtë.!… Më tej me burgun e dytë në Ballsh e Qafë Bari, ku ai do të shprehej: “gjithçka e kam bërë me vetëdije se ia vlen të vuaj për një babë hero!” Dmth ishte nder që po vuante për babën e tij, emri i të cilit i jepte frymëzim, forcë, shpresë, kurajo, vetëbesim për të përballuar gjithçka, pavarësisht vështirësive. Ne fakt, kjo është një nga karakteristikat më të spikatura të Bardhit: – gatishmëria për vetësakrifikim për hir të emrit të të atit, të cilin e kishte idhull!

Së treti, Fatbardhi, përveç personalitetit të papërkulshëm që rrezatonte dhe krenarisë së të qenit bir i Abaz Kupit, nji arsye tjetër qe do të forconte karakterin të tij, ishte edhe betimi që i kishte bërë babës, për t’u kujdesur për nënën dhe motrat e tij e për të mos i lënë kurrë vetëm! Porosi që ai e konsideroi të shenjtë dhe që e kreu përsosmërisht, bash si djalë hallalli! Fati nuk i buzëqeshi ta takonte të atin që t’ia thonte gojarisht: “Babë, porosinë ta kam kry!” dhe ky ishte nji peng për Bardhin sa ishte në këtë botë! Dashtë i madhi Zot dhe i bashkon në atë dynja me njëri-tjetrin…

Së katërti, dëshiroj të kujtoj se kam pasë fatin të takohem e bisedoj shpesh me Bardhin sidomos mbas viteve ’90. Kujtoj se ai ishte i zhgënjyer me rrjedhën e ngjarjeve politike në Shqipëri, e sidomos me fatin e së djathtës së vërtetë. E kishte brengë faktin që klasa jonë nuk arriti ta gjejë vetveten në këto 25 vite vorbullash politike. Me atë urtësinë dhe qetësinë e tij të jashtëzakonhme dhe me forcën e argumentit, përherë na nxiste ne të rinjve, për të qenë më aktivë në drejtim të forcimit të së djathtës. Gjithashtu jetonte me problemet e Kosovës, dhe në optikën e tij, ajo nuk kishte dallim nga pjesa “zyrtare” e shtetit shqiptar.

Së fundi, Fatbardh Kupi, ishte i pa shok për sa i përket thjeshtësisë. Ai i urrente njerëzit që vuanin prej delirit të madhështisë. Ai ishte nji njeri i përkryer e me zemër të madhe. Atë kurrë nuk e dëgjoje të fliste për veten, apo të ankohej, pavarësisht se kishte kalu vuajtje të tmerrshme. Ai do të mbahet mend si njeriu model për sa i përket, qendresës, urtësisë e bujarisë dhe pa frikë e them që është mishërimi më i plotë i fisnikërisë shqiptare.

Ngushllimet më të sinqerta familjes për humbjen e njeriut të tyre të dashtun e të shtrenjtë!

Ngushllimet më të sinqerta bashkëvuejtësve të burgjeve dhe të internimeve për humbjen e vëllait e mikut të paharrueshëm!

Ngushllimet më të sinqerta Legalistëve për humbjen e nji bashkidealisti të devotshëm!

Ngushllimet më të sinqerta dashamirëve dhe miqve për humbjen e njeriut model!

I përjetshëm qoftë kujtimi i tij!

* Kryetar i Partise Levizja e Legalitetit, Dega e Amerikes. Ngushellimi i percjelle gjate ceremonise percjellse te Bardh Kupit, ne Shtepine Mortore “Schwartz Brothers-Jeffer Memorial Chapel” ne Queens.

Reagime pas zgjedhjes së Thaçit: Duhet mençuri për të bashkuar kosovarët

by

Ambasadorët e QUINT-it, urojnë zgjedhjen e Presidentit të Kosovës, Hashim Thaçi. Ata kërkojnë nga presidenti i ri i Kosovës të ketë fuqinë dhe mençurinë për të bashkuar kosovarët.

Ambasadorja e Gjermanisë në Kosovë, Angelika Viets, ka uruar zgjedhjen e Presidentit të Kosovës, duke besuar që Presidenti Thaçi, do ta ketë fuqinë për të bërë bashkë qytetarët e Kosovës. “Kuvendi i Kosovës zgjodhi Presidentin e ri të Republikës së Kosovës. Zgjedhja e Presidentit është një procedurë qendrore në demokraci. Ishte inkurajuese të shohësh të gjitha partitë që përfaqësohen në Parlamentin e demokracisë më të re në Evropë që të debatojnë. Për fat të keq, debati nuk ishte i qetë. Sërish, kishte përpjekje për të bllokuar Kuvendin me dhunë. Do të doja t’i përsëris thirrjet e mia të mëhershme dhe të kërkoj nga të gjithë përfaqësuesit e popullit që të përkrahin procedurat demokratike në përputhje me Kushtetutën dhe ligjet e Kosovës. Urojmë që Presidenti i ri të ketë mençurinë dhe fuqinë për të bashkuar të gjithë kosovarët”, thotë në deklaratën e saj ambasadorja e Gjermanisë në Kosovë, Angelika Viets.

E vetë Hashim Thaçi, me t’u zgjedhur në postin e presidentit të Kosovës, u zotua se do të punojë në interes të shtetit dhe qytetarëve të Kosovës. “Të jeni të sigurt se do të punoj edhe më fuqishëm për dialogun institucional. Në këtë moment madhështor dhe të veçantë edhe për mua dëshiroj të përkujtoj herozimin e Adem Jasharit dhe të gjithë dëshmorëve dhe presidentin historik Ibrahim Rugova dhe të gjithë njerëzit që kontribuan për shtetin e Kosovës”, tha Hashim Thaçi.

Kosovo Präsidentenwahl Proteste in PristinaProtestat shoqërojnë zgjedhjen e presidentit

Ambasadori i SHBA: Urime dhe paralajmërime

Edhe ambasadori i SHBA-së Kosovë Greg Delawi, e ka përshendetur zgjedhjen e Presidentit të Kosovës, duke thënë se marrëdhëniet e mira ndërmjet SHBA-së dhe Kosovës do të vazhdojnë. “Uroj kuvendin e Kosovës për përfundimin me sukses të zgjedhjes së presidentit të ardhshëm. Ata që kanë hedhur koktej molotovi jashtë në rrugë dhe gaz lotsjellës në Kuvend nuk i kanë bërë asnjë të mirë Kosovës. Marrëdhëniet ndërmjet SHBA-së dhe popullit të Kosovës do të vazhdojnë”, tha ambasadori Delawie.

Në fundin e mandatit të saj, Presidentja e Kosoves, Atifete Jahjaga e ka uruar Hashim Thaçin për zgjedhjen President, duke i ofruar bashkëpunim të plotë për një tranzicion të sukseshëm të presidentëve. “Presidentja Jahjaga i ofroi z. Thaçi bashkëpunimin e plotë për një tranzicion të suksesshëm mes dy presidentëve, në përputhje me Kushtetutën dhe normat demokratike të cilat do të forcojnë institucionet demokratike të Kosovës dhe do të kontribuojnë në konsolidimin demokratik të vendit”, thuhet në deklaratën e publikuar nga zyra e Jahjagës.

Opozita: Kriza me zgjedhjen e Thaçit thellohet

Presidenti i ri i Kosovës, Hashim Thaçi, në postin e Presidentit betohet me 7 prill, në ditën kur e përfundon mandatin e saj, Presidentja Atifete Jahjaga. Partitë politike opozitare Vetëvendosja, AAK dhe Nisma, të cilat gjatë gjithë ditës së 26 shkurtit edhe në parlament edhe jashtë saj, kundërshtuan zgjedhjen e Hashim Thaçit President, thonë se “tashmë kriza politike në Kosovë është thelluar edhe më shumë”, për faktin që sipas tyre, Thaçi erdhi në krye të shtetit me votat e listës “Serpska”, që e ka mbështetjen e kryeministrit të Serbisë, Aleksander Vuciq. “Është konstatim i të gjithëve se regjimi Mustafa-Thaçi ka dështuar në politikën e jashtme dhe në anëtarësimin në UNESCO. Shkelësit e Kushtetutës do të ndëshkohen nga qytetarët. Kjo nuk është ngritje për Thaçin e Mustafën, por barrikadim i tyre. Jemi të vendosur të vazhdojmë deri në zmbrapsjen e këtyre që kanë kapur shtetin e Kosovës”, tha lideri i AAK-së Ramush Haradinaj, i cili ditë më parë dha dorëheqje nga posti i deputetit në kuvendin e Kosovës.

Edhe disa analistë politik thonë se zgjedhja e Hashim Thaçit President nën tensione politike dhe protesta të dhunshme në rrugë, vështirë që mund të cilësohet një proces i sukseshëm, por sipas tyre kjo vetëm mund ta thellojë krizën politike. Sidoqoftë, tri partitë politike opozitare, thonë se ato do të vazhdojnë protestat në rrugë për të “rrëzuar”, qeverinë e kryeministrit Isa Mustafa, sepse ata qeverinë e Kosovës e cilësojnë një ekzekutiv që ka shkelur Kushtetutën me nënshkrimin e dy marrëveshjeve, atë për bashkësinë e komunave serbe dhe demarkacionin me Malin e Zi.

ZGJEDHJA E PRESIDENTIT NE SHTETRRETHIM THELLON KRIZEN

by

Analistët skeptikë se zgjedhja e presidentit zbut krizën/

Zgjedhja e presidentit të Kosovës nën tensione e protesta, nga analistë të çështjeve politike vlerësohet në mënyra të ndryshme.Analisti i çështjeve politike Halili Matoshi në një prononcim për Radion Evropa e Lirë thekson se kjo mënyrë e zgjedhjes së presidentit të Kosovës mund të thellojë krizën politike e cila aktualisht është në vend

“Zgjedhja e zotit Thaçi për kryetar të shtetit, në shtet rrethimë, pa opozitë në Kuvend e thellon krizën edhe ashtu të gjatë në vend dhe kurrë nuk do të bëjnë shef të mirëfilltë të shtetit, por ai do të mbetet shef i pjesës më fanatike të Partisë Demokratike të Kosovës dhe i disa deputetëve të paqëndrueshëm dhe lehtë të shantazhuar të Lidhjes Demokratike të Kosovës”, thekson Matoshi.

Duke e komentuar votimin që kanë bërë deputetët e Kuvendit të Kosovës në zgjedhjen e presidentit, Matoshi ka theksuar se vendi ka deputetë jo serioz.

“Shihet se Kuvendi i Kosovës është i përbërë nga njerëz jo kredibil, qytetarët e Kosovës kanë votuar njerëz të paqëndrueshëm, madje edhe injorantë, sepse prej raundit të parë, të dytë e të tretë pati aq shumë lëvizje qesharake, një herë voton, herën tjetër nuk votojnë, kjo është qesharake për një deputet serioz”, thekson Matoshi.

Sa i përket partive politike në opozitë, Lëvizja Vetëvendosje, Aleanca për Ardhmërinë e Kosovës dhe Nisma për Kosovën, Matoshi ka theksuar se duhet të shkëputen nga aktet e dhunës.

Në anën tjetër Analisti i çështjeve politike, Ismail Hasani, duke folur për Radion Evropa e Lirë, vlerëson se edhe përkundër rrethanave të tensionuara gjatë procesit të zgjedhjes së presidentit të Kosovës, është pozitive për vendin përmbyllja e këtij procesi.

“Populli i Kosovës më në fund ka ditur të menaxhojë vetveten dhe këtë situatë tejet të rëndë. Ajo çka do të thosha është që në këtë ditë në përgjithësi duhet t’i jemi falënderues popullit dhe policisë së Kosovës, që duke u përmbajtur dhe duke u përpjekur të menaxhojë situatën, arriti të pengojë manifestimin e dhunës që do t’i bënin dëm të madh Kosovës”, thekson Hasani.

Duke folur për procesin e zgjedhjes së presidentit, Hasani ka theksuar se Kuvendi i Kosovës,si asnjëherë më parë ka arritur ta menaxhojë situatën në mënyrë më të matur politikisht.

Përfundimisht, shton zoti Hasani jeta institucionale është e lënduar, por do të arrijë të marrë veten.

“Urojë që presidenti i ri i Kosovës të marrë vetveten dhe të jetë sinonim i unitetit, sinonim i politikës së unifikimit dhe i ndërtimit të jetës së mëtejme të jetës institucionale në Kosovë”, shton Hasani.

Procesi i zgjedhjes së presidentit të Kosovës është bërë nën tensione të shtuara politike dhe përplasje të dhunshme në Prishtinë.

Hashim Thaçi ka arritur të marrë votat e nevojshme për President të Kosovës vetëm në rrethin e tretë të votimit.

 

Luljeta Krasniqi- Veseli

MIRDITA NDERON KAMPIONIN E EUROPES

by

Nga Ahmet ZANI/ Kampioni i Europes ne kick boks Kristjan Prenga dhe trajneri i tij Ismail Keta jane nderuar ne Mirdite me titullin mirenjohje e qytetit. Ky vlersim ka ardhur nga bashkia e mirdites si nje nderim per sportistet te cilet po e prezantojne vendin tone denjesisht edhe ne arenen nderkombetare.Kryetari i bashkise mirdite Ndrec Deda eshte i bindur se edhe titulli kampion bote ne kick boks do te jete per ngjyrat kuq e zi dhe kristjan prengen. Sinkron: Ndrec DEDA Ndersa ka pranuar emocionet qe te percjell nje vlersim i tille, per trajnerin Ismail Keta te rinjte duhet te jene pjese e sportit pasi do te ishte zgjidhja me e mire per ta. Sinkron: Ismail KETA Trajner i Kristjan Prenges Prania ne sallen e mbushur me qytetare te mirdites ka qene me emocionuese se vete sfida ne te cilen u shpall kampion europe. Ky eshte perjetimi i sportit 26 vjecar kampion europe kristijan prenga ndersa nderohej me titullin mirenjohje e qytetit te mirdites. Ai shpreson qe fal punes shume shpejt te jete edhe kampioni i botes ne kick box. Sinkron: Kristjan PRENGA Kristjan Prenga eshte vlersuar me mirenjohje e qytetit Për titullin e lartë të fituar si Kampion Europe në Kikboks, duke nderuar ngjyrat kuq e zi dhe si promovues i suksesshëm i Mirditës dhe Shqipërisë, në arenën ndërkombëtare”, ndersa trajneri i tije Gjetan Keta Për nxitjen, frymëzimin dhe punën pasionante e profesionale si trajne, inspirues i shpirtit garues dhe promovues i shkëlqyer i vlerave sportive.