Archives for February 2018

Kongresisti amerikan Engel në festën e 10 vjetorit të pavarësisë së Kosovës

February 17, 2018 by dgreca

-SHBA-të kanë njohur pavarësinë e Kosovës në orët e para pas shpalljes, në ditëlindjen e Engel/

-Eliot Engel në 16 qershor të vitit historik 2008 në seancën solemne të Kuvendit të Kosovës: Kur u deklarua pavarësia me 17 Shkurt, unë u preka aq shumë duke shikuar në televizion festimet në Prishtinë dhe Kosovë. Isha posaçërisht i prekur nga fakti që me mijëra shtetas tuaj e valëvitnin flamurin Amerikan në rrugët e Kosovës. Ditën tjetër kur ishte edhe ditëlindja ime, Shtetet e Bashkuara e pranuan Kosovën. Kjo ishte dhurata më e mirë që e kam fituar ndonjëherë për ditëlindje/
PRISHTINË, 17 Shkurt 2018-Gazeta DIELLI-Behlul Jashari/ Kongresisti amerikan Eliot Engel në Prishtinë në 10 vjetorin e pavarësisë së Kosovës uroi sot kosovarët duke shprehr mbështetjen e tij në rrugën e vendit drejt zhvillimit ekonomik, demokratik dhe konsolidimit të shtetndërtimit.

Kryeministri i Republikës së Kosovës, Ramush Haradinaj, në kuadër të takimeve të shumta në shënim të përvjetorit të dhjetë të shtetësisë së Kosovës, sot priti në takim mikun e madh të shqiptarëve, kongresistin amerikan Eliot Engel, i cili shoqërohej nga Jason Steinbaum, ambasadori amerikan në Kosovë, Greg Delawie, shqiptaro-amerikani Haxhi Bajraktari dhe personalitete të tjera. Kryeministri falënderoi kongresistin për përkushtimin e tij të pakursyer në rrugën drejt pavarësisë së Kosovës.

“Në kohën kur po festojmë 10 vjetorin e shtetësisë, dua të shpreh falënderimet e popullit tonë për punën e palodhur dhe ndihmën e pakursyer që ju dhatë, në ndërtimin tonë si shtet. Ju besuat në ne, besuat në kauzën tonë për liri. Faleminderit mik i shqiptarëve. Faleminderit Eliot Engel”, u shpreh kryeministri Haradinaj.

Kongresisti amerikan Eliot Engel, ka qenë në Kosovë shumë herë, dhe një nga vizitat ishte në qershorin e vitit historik 2008, kur në 16 qershor duke foluuur në seancën solemne të Kuvendit të Kosovës, i duartrokitur shumë here, tha se njohja e pavarësisë së Kosovës nga SHBA-të në ditën e ditëlindjes së tij ishte dhurata më e mirë që e kishte fituar ndonjëherë.

“Kur u deklarua pavarësia me 17 Shkurt, unë u preka aq shumë duke shikuar në televizion festimet në Prishtinë dhe Kosovë. Isha posaçërisht i prekur nga fakti që me mijëra shtetas tuaj e valëvitnin flamurin Amerikan në rrugët e Kosovës. Ditën tjetër kur ishte edhe ditëlindja ime, Shtetet e Bashkuara e pranuan Kosovën. Kjo ishte dhurata më e mirë që e kam fituar ndonjëherë për ditëlindje”, është shprehur Engel në seancën solemne të Kuvendit kosovar të mbajtur për nder të tij.

Shtetet e Bashkuara të Amerikës Pavarësinë e Kosovës e kanë njohur në orët e para – ditën e parë pas shpalljes në 17 Shkurtin historik 2008.

Kosovë-Qeveria mbledhje solemne në 10 vjetorin e pavarësisë

February 17, 2018 by dgreca

-Kryeministri Ramush Haradinaj: Kosova në këtë dhjetëvjetor ka të arritura të mëdha, por edhe shumë sfida, për të cilat besoj se në një unitet politik e institucional do t’i kapërcejmë/

-Në vijim të mbledhjes kryeministri prezantoi para kabinetit qeveritar aneks marrëveshjen e nënshkruar ndërmjet presidentit të Republikës së Kosovës, Hashim Thaçi dhe presidentit të Malit të Zi, Filip Vujanoviç, për rishikimin dhe korrektimin e drejtimit të Çakorrit dhe Kullës, e cila mori aprovimin e kabinetit qeveritar për t’ia përcjellë Kuvendit të Kosovës për miratim/

Gazeta DIELLI nga korrespondenti në Kosovë Behlul Jashari/PRISHTINË, 17 Shkurt 2018/ Qeveria e Kosovës, e drejtuar nga kryeministri Ramush Haradinaj zhvilloi sot mbledhje solemne për shënimin 10 vjetorit të shpalljes së pavarësisë, ku fillimisht nderoi të rënët për liri e pavarësi edhe me një minutë heshtje.

“Përulemi me respekt para sakrificës së rënëve për liri e pavarësi të Kosovës”, u shpreh kreu i qeverisë.Kryeministri u uroi 10 vjetorin e pavarësisë së Kosovës të gjithë qytetarëve të vendit dhe shqiptarëve kudo që janë.“Kosova, në shënimin e dekadës së parë të pavarësisë është sot një shtet, shtëpi për qytetarët e saj e ngritur me flijimin e shumë brezave, një shtet që ndërton paqe në një shoqëri të të gjithëve, që ec në liri me miqtë e vet të shtrenjtë, në miqësi të përhershme me SHBA-në dhe e rreshtuar me Perëndimin, por e hapur për të gjithë ato kombe që e njohin dhe e respektojnë”, u shpreh kryeministri Haradinaj.

Ne, vijoi kru i qeverisë së Kosovës, po ndërtojmë një shtet model, ku secili qytetar, grup etnik ose fetar, gra dhe burra, me diversitet etnik, kulturor e gjuhësor si dhe në pluralizëm politik dhe ideor, e projektojnë vullnetin e tyre për të jetuar së bashku në një shtet, pra me unitet shtetëror dhe kohezion shoqëror, duke krijuar vepra të mëdha që na mbajnë bashkë në shtet.

“Dhjetë vjet pavarësi të Kosovës dhe 19 vjet liri, do të thotë mbyllje e konfliktit të tmerrshëm që rrënoi shumë jetë njerëzish dhe nisje e një jete të re”, u shpreh ai.

Kryeministri Haradinaj theksoi se, Kosova e pavarur do të thotë një shtet më shumë në hartën gjeopolitike të globit, një shtet pretendent për t’u anëtarësuar në OKB, NATO dhe BE si dhe në të gjitha organizatat tjera ndërkombëtare që i shërbejnë paqes dhe mirëkuptimit ndërmjet njerëzve e kombeve.

“Kosova në këtë dhjetëvjetor ka të arritura të mëdha, por edhe shumë sfida, për të cilat besoj se në një unitet politik e institucional do t’i kapërcejmë”, tha ai.

Kosova, vijoi kryeministri, është një vend i vogël por Republikë zemërgjerë, që respekton dhe nderon aleatët, që i kanë qëndruar afër në kohë të vështira dhe që i qëndrojnë afër edhe tash në festë.

“Andaj jemi të nderuar me të gjithë që sot festojnë bashkë me ne në Kosovë”, tha ai.

Në vijim Haradinaj vlerësoi se, shteti i Kosovës e ka përmbushur kërkesën e njerëzve të vet për liri dhe po e përmbush përcaktimin për një jetë të përbashkët të të gjithë qytetarëve të Kosovës, pa dallim të të gjithë atyre që Kosovën e shohin si shtëpi të tyre.

“Jemi të vetëdijshëm se ende nuk janë përmbushur në tërësi pritjet e qytetarëve për një shtet modern, por jemi në një rrugë të pakthyeshme, që bashkërisht me partnerët tanë, të mbërrijmë aty! Të ndjekim të drejtën për lumturi! Kosova e këtyre idealeve do të bëhet, sepse atdhedashuria dhe besnikëria e qytetarëve tanë për shtetin është e lartë”, u shpreh më tej kryeministri.

Kosova, vijoi ai, sot po promovon vlerat demokratike, të një shteti të barabartë për të gjithë, ku liritë dhe të drejtat e njeriut si dhe barazia përpara ligjit janë themelet e palëkundura të tij.

“Kosova në dekadën e dytë të jetës së saj do ta arrijë stadin zhvillimor, që do thotë një vend pune për secilin që dëshiron një punë dhe një perspektivë e dinjitet për secilin.

T’ia besojmë lirinë ligjit!
T’i japim dashuri e besnikëri atdheut tonë Republikës së Kosovës!
Zoti e bekoftë Kosovën dhe qytetarët e saj!
Zoti i bekoftë shqiptarët kudo që janë!
Zoti i bekoftë miqtë e Kosovës!
Me fat dhjetëvjetori i Kosovës-shtet”, përfundoi fjalënHaradinaj në mbledhjen solemne të qeverisë.

Në vijim të mbledhjes kryeministri Haradinaj prezantoi para kabinetit qeveritar aneks marrëveshjen e nënshkruar ndërmjet presidentit të Republikës së Kosovës, Hashim Thaçi dhe presidentit të Malit të Zi, Filip Vujanoviç, për rishikimin dhe korrektimin e drejtimit të Çakorrit dhe Kullës, e cila mori aprovimin e kabinetit qeveritar për t’ia përcjellë Kuvendit të Kosovës për miratim.

Kryeministri Haradinaj tha se kjo është një e arritur e institucioneve të Kosovës, në këtë rast e të gjithëve që ishin përfshirë në këtë temë. “Mendoj se me këtë deklaratë të përbashkët të presidentëve, si aneks i marrëveshjes së mëhershme janë krijuar rrethanat dhe mundësitë që e drejta e Kosovës në territor të respektohet në tërësi dhe bazuar në këtë po ashtu janë krijuar rrethanat që Parlamenti i Kosovës të jetë unik dhe të votoj marrëveshjen për demarkacionin me Malin e Zi”, tha kryeministri Haradinaj, duke theksuar se kjo marrëveshje si e tillë ka po ashtu një element shumë të rëndësishëm që është vullneti politik i institucioneve të Kosovës por edhe atyre të Malit të Zi që vërtet rishikimi dhe korrektimi të jetë substancial dhe të respektohen të drejtat e bazuara në të gjeturat e trupave punuese, në këtë rast të Komisionit të Ri shtetëror të Kosovës dhe njëkohësisht krijimi i trupës së përbashkët Kosovë-Mali i Zi.

Kryeministri Haradinaj përgëzoi Kosovën për këtë marrëveshje të arritur, duke theksuar se institucionet po e tregojnë zotësinë që të gjitha temat e vështira në tavolinë t’i zgjidhin duke e respektuar të drejtën e popullit të Kosovës.

FESTOHET 10 VJETORI I KOSOVËS SHTET

February 17, 2018 by dgreca

-Në jubilen e 10 vjetorit të pavarësisë së Kosovës, të shpallur në 17 Shkurtin historik 2008, sot është një ditë e madhe feste e shqiptarëve kundo në trojet etnike dhe në gjithë botën/

-Vitet më të rëndësishme e më të suksesshme të Kosovës pas shpalljes së pavarësisë…/

-Presidenti i SHBA, Donald Trump: Gjatë dhjetë vjetëve të fundit, Kosova ka bërë hapa të mëdhenj në forcimin e sovranitetit dhe demokracisë shumetnike. Ndërkohë që duhet bërë edhe më shumë punë, ne përgëzojmë përparimin tuaj/

Gazeta DIELLI nga korrespondenti në Kosovë Behlul JASHARI/

PRISHTINË, 17 Shkurt 2018/ Një ditë e madhe feste është sot në Kosovë dhe për shqiptarët kudo në trojet etnike dhe në gjithë botën. Kosova 10 vjet shtet, sot feston jubileun e parë të pavarësisë së shpallur në 17 Shkurtin historik 2018, pas arritjes së lirisë në 12 Qershor 1999, kur nisën të hyjnë forcat paqeruajtëse shpëtimtare të NATO-s e të vendoset Misioni i Administratës së Përkohshme të Kombeve të Bashkuara, pas luftës me mëse 12 mijë të vrarë, 6 mijë të zhdukur e afër një milionë shqiptarë të dëbuar nga forcat serbe në fushatën e egër të spastrimit etnik, gjatë së cilës ua kishin vënë flakën mëse 400 fshatrave e qyteteve, 120 mijë shtëpive.

Simboli i Pavarësisë së Kosovës, Newborn, në Sheshin Medlin Olbrajt në kryeqytet, Prishtinë, i vendosur para 10 viteve, e i zhvendosur para festës së 10 vjetorit, është rikthyer në vendin e vet me pamje të re të festimeve të ditës së madhe të 17 Shkurtit e përgjithmonë.“Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran”, theksonte Deklarata e Pavarësisë, e cila hartës së botës ia shtoi një shtet, e lexuar nga atëherë kryeministri Hashim Thaçi, tash president i Republikës, të dielën e 17 Shkurtit të para dhjetë viteve, në Kuvendin e Kosovës në mbledhjen e jashtëzakonshme solemne, të nisur në orën 15:00.
Pak para kësaj ore, parase 109 deputetë të pranishëm në Kuvend të votonin në unanimitet shpalljen e Pavarësisë së Kosovës, presidenti i atëhershëm Fatmir Sejdiu në zyrën e tij, në afmosferë feste e përzemërsie, në intervistën ekskluzive për Agjencinë Telegrafike Shqiptare deklaronte se “ne nuk kemi frikë nga e ardhmja” dhe se “nga kjo ditë do të jetë një Kosovë e bekuar”.
17 Shkurti 2008 i Pavarësisë së Kosovës, dita më e madhe shqiptare pas 28 Nëntorit 1912 të Pavarësisë së Shqiprisë, e vlerësuar kështu në ballinën e botimit të jashtëzakonshëm festiv të gazetës historike Rilindja, në festën e madhe të gjithë shqiptarëve u përmbyll me fishekzjarret më të shumta e më të shkëlqyera që janë parë ndonjëherë mbi Prishtinë, kryeqytetin e shtetit të ri evropian, të saposhpallur.

Njohjet e para Kosovës iu bënë në orët e para – ditën e parë pas shpalljes së pavarësisë, nga Mbretëria e Bashkuar, Franca, Shtetet e Bashkuara të Amerikës, Turqia, Shqipëria, Afganistani dhe Kostarika. Kosova në prag të ditës së 10 vjetorit të pavarësisë mori edhe njohjen e 116-të nga shtetet anëtare të OKB-së, nga Barbadosi.

Dy ditë para se të mbusheshin katër muaj pas 17 Shkurtit të shpalljes së Pavarësisë, në 15 Qershor 2008 hyri në fuqi Kushtetuta e Republikës së Kosovës, e cila ishte miratuar në Kuvend në 9 Prill, dhe që në nenin 1 përcaktonte se,“Republika e Kosovës është shtet i pavarur, sovran, demokratik, unik, dhe i pandashëm”.

Flamuri shtetëror i Kosovës ishte shpalosur që në ditën e shpalljes së Pavarësisë në seancën solemne të Kuvendit, i cili në një seancë të veçantë në 11 Qershor 2008 miratoi edhe Himnin Shtetëror.

Gjatë 10 viteve, Republika e Kosova ka vendosur marrëdhënie diplomatike me 88 shtete, është anëtarësuar në më shumë se 60 organizata rajonale, evropiane dhe ndërkombëtare, ka hapur gati 40 misione diplomatike dhe poste konsullore dhe ka të akredituar ambasadorë jo-rezidentë në rreth 60 shtete.

Në këto 10 vite të pavarësisë Kosova ka mbajtur edhe gjashtë palë zgjedhje të lira e demokratike, tre parlamentare dhe tre lokale.

Ndërsa, vitet më të rëndësishme e më të suksesshme të Kosovës pas shpalljes së pavarësisë ishin 2010-ta, 2012-ta dhe së bashku 2015-ta e 2016-ta.

Në vitin 2010 ishin dy ngjarje shumë të rëndësishme drejt njohjes së plotë ndërkombëtare të shtetit më të ri evropian: Legjitimimi i pavarësisë së Kosovës nga Gjykata Ndërkombëtare e Drejtësisë në 22 Korrik dhe Rezoluta e 9 Shtatorit e Asamblesë së Përgjithshme të OKB-së, e cila me respekt e merr në konsideratë opinionin e Gjykatës Ndërkombëtare të Drejtësisë.

Kuvendi i Republikës së Kosoves në seancën e veçantë të datës 23 Korrik 2010 ka miratuar solemnisht një deklaratë ku shprehte kënaqësinë dhe aprovimin për opinionin e Gjykatës Ndërkombëtare të Drejtësisë për legalitetin ndërkombëtar të shpalljes së pavarësisë së Kosovës dhe zotohej për respektimin e tij.

Gjykata Ndërkombëtare e Drejtësisë kishte filluar të shqyrtojë legalitetin e shpalljes së pavarësisë së Kosovës pasi Asambleja e Përgjithshme e OKB-së kishte miratuar një kërkesë të Serbisë në tetor të vitit 2008.

Menjëherë pas këtij zhvillimi me rëndësi historike, në një deklaratë të anëtarëve të Grupit Drejtues Ndërkombëtar për mendimin këshillues të Gjykatës Ndërkombëtare të Drejtësisë rikonfirmohej mbështetjetja e palëkundur për pavarësinë e pakthyeshme të Kosovës dhe bëhej thirrje për njohje.

“Grupi Drejtues Ndërkombëtar rikonfirmon mbështetjen e palëkundur të tij për pavarësinë e pakthyeshme të Kosovës demokratike dhe shumetnike në kufijtë e saj të tanishëm dhe i bën thirrje shteteve tjera që të njohin Kosovën. Ai po ashtu përshëndet përkushtimin e vazhdueshëm të Kosovës dhe progresin e konsiderueshëm në zbatimin e Propozimit Gjithëpërfshirës për Statusin dhe do të vazhdojë të mbështesë Kosovën në punën për realizimin e perspektivës së saj evropiane”, theksohej në deklaratë.Grupi Drejtues Ndërkombëtar (ISG) për Kosovën, i cili përbëhej nga vendet që e kanë njohur Pavarësinë, ishte formuar më 28 Shkurt të vitit 2008 dhe synonte të orientojë dhe mbikëqyrë zhvillimin demokratik të Kosovës, të nxisë qeverisjen e mirë dhe shumetnicitetin, bazuar në Propozimin Gjithëpërfshirës të emisarit të posaçëm të OKB-së, kryenegociatorit për statusin, Martti Ahtisaari.Në vitin 2012 Kosova përmbylli fazën e Pavarësisë së Mbikëqyrur Ndërkombëtare dhe hyri në një fazë te re të perspektivës euroatlantike.Në 7 Shtator Kuvendi kosovar miratoi amendamentet në Kushtetutën e që kishin të bëjnë me përfundimin e mbikëqyrjes ndërkombëtare të pavarësisë së Kosovës, të propozuara nga qeveria.

Në 10 shtator Grupi Drejtues Ndërkombëtar deklaroi përfundimin e mbikëqyrjes së Kosovës. “Përmbyllja e mbikëqyrjes është vlerësimi më i lartë ndërkombëtar, që i është bërë shtetit të Kosovës pas shpalljes së Pavarësisë”, u vlerësua atëherë.Më herët, në 2 Korrik 2012 është mbajtur në Vjenë takimi i pesëmbëdhjetë i Grupit Drejtues Ndërkombëtar për Kosovën, i cili “ka konstatuar se Propozimi Gjithëpërfshirës për Zgjidhjen e Statusit është zbatuar në mënyrë substanciale dhe me këtë autorizohen hapat përfundimtar për përmbyllje të pavarësisë së mbikëqyrur dhe mbyllje të Zyrës Civile Ndërkombëtare (ICO)”.

Në vitin 2016, në 1 Prill, nisi zbatimi i Marrëveshjes së Stabilizim Asociimit në mes të Kosovës dhe Bashkimit Evropian, e nënshkruar në 27 Tetor 2015 në Strasburg dhe e ratifikuar në Parlamentin kosovar pas pak ditësh, në 2 Nëntor.

Marrëveshja për Stabilizim Asociim, e cila krijon për herë të parë marrëdhënie kontraktuale me BE-në, është vlerësuar ngjarja më e rëndësishme e Kosovës që nga shpallja e pavarësisë.

Programi Kombëtar për zbatimin e Marrëveshjes së Stabilizim Asociimit me Bashkimin Evropian është miratuar në 10 Mars 2016 nga Kuvendi i Republikës së Kosovës.

Komisioni Parlamentar për Stabilizim Asociim BE-Kosovë për herë të parë është mbledhur në Prishtinë në 16-17 Maj 2016, ndërsa së fundi takimin e katërt e zhvilloi në Strasburg në 17-18 Janar 2018.

Arritjet historike të Kosovës shtet janë vlerësuar edhe në urimet e shumta nga gjithë bota për 10 vjetorin.

“Gjatë dhjetë vjetëve të fundit, Kosova ka bërë hapa të mëdhenj në forcimin e sovranitetit dhe demokracisë shumetnike. Ndërkohë që duhet bërë edhe më shumë punë, ne përgëzojmë përparimin tuaj”, ka shkruar presidenti i SHBA-së, Donald Trump, në letrën e urimit dërguar presidentit Thaçi

“Ndërsa vendi juaj po hyn në dekadën e dytë të shtetësisë, Shtetet e Bashkuara janë të përkushtuara për të ndihmuar Kosovën që të ndërtojë themele të forta të parimeve të përbashkëta demokratike, bashkëpunimit rajonal dhe sundimit të së drejtës. Duke vepruar kështu, Kosova do të ndërmarrë hapa të mëtejshëm drejt integrimit në Komunitetin Perëndimor të Kombeve.

Ne e shikojmë Kosovën si një partnere të rëndësishme të Shteteve të Bashkuara. Në këtë rast historik i uroj gjithë të mirat qytetarëve të Kosovës”, theksohet në letrën e presidentit të SHBA-ve.

Edhe në urimet e personaliteteve tjera nga bota vijnë fuqishëm vlerësimet dhe mbështetjet për Kosovën në 10 vjetorin e pavarësisë, i cili do festohet edhe me Seancën solemne të Kuvendit, që do mbahet të dielën, me pesëmarrje edhe të personaliteteve kombëtare e ndërkombëtare. Pjesë e festimeve 10 ditëshe do jetë edhe parakalimi i Forcës së Sigurisë së Kosovës dhe Policisë së Kosovës sheshet “Nëna Terezë” dhe “Zahir Pajaziti”.Në mbrëmjen e djeshme u njoftua se Presidenti i Republikës, Thaçi ka dekoruar me Medaljen Presidenciale në 10-vjetorin e Pavarësisë të gjithë deputetët që më 17 shkurt 2008 votuan dhe nënshkruan Deklaratën e Pavarësisë së Kosovës, si dhe personalitete kombëtare dhe ndërkombëtare, mes të cilëve kryeministrin e Shqipërisë, Edi Rama, pjesëmarrës në festime.

Në 10 vjetor të Republikës u bëhen nderimet më të larta të gjithë kombit heronjëve e dëshmorëve të lirisë dhe pavarësisë, si dhe presidentit historik Ibrahim Rugova, i cili që para më shumë se dy dekadave hapur përcaktonte pozicionin gjeopolitik kosovar dhe shpallte idenë për shtet, duke theksuar se zgjidhja më e mirë është Kosova e pavarur. “I vetmi kompromis për Kosovën është pavarësia, dhe ky është optimumi i gjithë shqiptarëve në rajon”, theksonte shumë prerë Rugova edhe në 6 tetor 2005, në takimin e parë me Grupin Negociator, formimi i të cilit me përfaqësim nga maxhoranca e opozita dhe shoqëria civile ishte një moment me shumë rëndësi për unitetin në vend si dhe për bisedimet për statusin e Kosovës të udhëhequra nga i dërguari i posaçëm i Sekretarit të Përgjithshëm të OKB-së, Presidenti Martti Ahtisaari, e pastaj edhe nga Treshja SHBA-BE-Rusi në angazhimet shtesë.

Në këtë ditë jubileut të 10 vjetorit të Pavarësisë, Kosova është e mbushur me plot flamuj dhe mes valimit të tyre njerzit në festën e madhe mbushin me defilime rrugët e sheshet. Një nga veprimtaritë në sheshet e kryeqytetit, Prishtinës, është edhe ekspozita “Rrënjët e Shtetit”, e cila paraqet 50 vjet të rrugëtimit të Kosovës, nga demonstratat e vitit 1968 me kërkesën “Kosova Republikë” deri në shpalljen e pavarësisë në 2008, përmes ballinave e faqeve të gazetave botërore që raportonin për zhvillimet në Kosovë.

Festimet për e 10 vjetorit të shpalljes së pavarësisë mbahen nën patronatin e presidentit të Republikës së Kosovës, Hashim Thaçi, i cili për jubileun e parë të shtetit iu adresua qeverisë, ku bëri tre propozime: Për ndërtimin e një Kompleksi rezidencial të institucioneve shtetërore, të Muzeut të Pavarësisë dhe Obeliskut të Lirisë në Prishtinë.Në axhendën e festimeve sot është edhe mbledhja solemne e qeverisë së Republikës së Kosovës, e drejtuar nga kryeministri Ramush Haradinaj, janë edhe aktiviteti sportiv i fëmijëve, koncerti i Rita Orës në sheshin “Skënderbeu” në Prishtinë në mbrëmje e gjatë ditës nëpër sheshe defilimi e koncerti i Ansamblit “Shota”, festivali me rreth 500 fëmijë dhe 105 animatorë dhe Koncerti i Xixëllonjave, si ekspozita “Kosova – nga historia në shtetësi” në Biblotekën Kombëtare të Kosovës.Nga shtetet fqinje vetëm Serbia ende nuk e ka njohur Kosovën, ndërkohë që në Bruksel zhvillohet procesi drejt normalizimit të marrëdhënieve mes dy shteteve, kryesuar nga Bashkimi Evropian e mbështetur nga Shtetet e Bashkuara të Amerikës. Edhe kjo njohje do të ndodhë…

NË FÖRSLÖV TË SUEDISË – EDHE FESTË EDHE KONTRIBUT

February 17, 2018 by dgreca

Nga Hysen IBRAHIMI/ Mbrëmë më 16 shkurt 2018 (e premte) në Förslöv të Suedisë në një atmosferë festive nën përkujdesjen e Shoqatës Kulturore Shqiptare ”Nëna Terezë” në Ängelholm të Suedisë, u organizua manifestim kulturor me rastin e 550 vjetorit të vdekjes së Gjergj Kastriotit Skënderbeut, 140 vjetorin e Lidhjes së Prizrenit dhe dhjetëvjetorin e Pavarësisë së Republikës së Kosovës.

Kolorit të shkëlqyer i dhaneë rinia me veshë kombëtare të prirë nga Ahmet Ahmeti (koreograf), me këngët dhe vallët e tyre. Kurse nga Kosova kishte ardhur këngëtari z. Ylli Demaj si dhe këngëtari në Suedi z. Gazmend Kelmendi dhe Robert Hoti (të gjithë pa pagës).

Për këtë ngjarje historike, mbajtën fjalë Rrahman Rrahmani kryetar i Shoqatës Kulturore Shqiptare ”Nëna Terezë” në Ängelholm dhe Hysen Ibrahimi, kryetar i Shoqatës së Shkrimtarëve dhe Artistëve Shqiptarë ”Papa Klementi XI Albani”, Suedi. Këshilli organizativ i udhëqur me shumë sukses nga kryetari z. Robert Hoti, i cili gjatë fjalës së tij ngriti atmosferë të jashtëzakonshme, para bashkatdhetarëve kur tha: ”Të gjitha shpenzimet e këtij koncerti të cilat janë grumbulluar deri në këto momente e që pritet që aksioni të vazhdoj edhe më tutje, do të dedikohen për ndërtimin e shtëpisë së z. Qaush Musaj nga Peja, ish ushtar i Ushtrisë Çlrimitare të Kosovës, i cili ka luftuar për pavarësinë e Republikës së Kosovës”.

Shuma deri në këto momente është grumbulluar 69.636 korona suedeze (në vlerë prej rreth 7.000€) dhe 100 € (mjete këto nga Kosova). Aksioni mbetet i hapur edhe më tutje deri në arritjen e grumbullimit të shumës së nevojshme për ndërtimin e shtëpisë në fjalë.

Mesazhi kryesor nga ky tubim doli:

”Ta duam kombin Shqiptar duke i kontribuar në të gjitha sferat e jetës, kudo që jemi dhe kudo që ndodhemi”.

Për kontribuesit si: Ylli Demaj, Gazmend Kelmendi, Viola Sylaj Rexhaj, Gazmend Shabani, Sylejman Dushica dhe Haradin Osmanaj u ndanë ”MIRËNJOHJE”, nga Shoqata e Shkrimtarëve dhe Artistëve Shqiptarë ”Papa Klementi XI Albani”, Suedi, Shoqatës Kulturore Shqiptare ”Nëna Terezë” në Ängelholm dhe Këshilli Organizativ.

Manifestimi zgjati deri në orët e vona pas mesnate.

Vogëlushja kosovare dhe…një gur varri i trishtuar në Vlorë

February 17, 2018 by dgreca

1-gezim-llojdia

Nga Gëzim Llojdia/

1.Në varrezat civile të Vlorës një gurë varri i trishtuar. Sipër me bojë të zezë shkruar:kosovare. Në faqen ballore j:Ferjale Spasoli 1990-1999.

-Vogëlushe ti ike nga vatra jote në atë orë e trishtuar. Në të kobshme orë. Orë e fjalë kambanash binin në erë. Morte.Plagë. Gjak ende kullonin krahët e prerë të kombit kirurgjikisht nga trupi amë. Shenjë të thella në trupin e Shqipërisë,c’prej 1912.

-Të përzunë cetnikët,ushtarët e një shteti agresor. Të përzunë me dhunë me armë kallashë,bomba,krisma,zjarre,sharje,ulurima. Le trojet ,shtëpinë,avllinë,djepin që të përkundi,kopshtajat gjithçka ngase ora e hasmit ishte në lëvizje. Ndërkaq ky mot i zi mbrinte. Ikën fshatra të tërë me vargan,ngarkuar mjeteve të punës.Pas era e flakës.pishës dhe xixës së hasmit. Ndonëse i tillë, nga thellësia e kraharorit nxore mallkimin.Nga iridet e syve:solli lotin. Nga buzët dëshpërimi. Nga zemra: rruzuj mallkimi.

-Ti ardhe në shtetin amë . Ti u nise dhe erdhe në qytetin e Flamurit .Ti ardhe atëherë kur shteti amë kishte dalë vetë nga ëndrra e keqe’ 97.

Vështirë se më parë në Shqipërinë e një tranzicioni të mundimshëm, mund të gjeje kushte. Qytetet e shtetit amë sapo kishin dalë nga luftërat e tyre. Fshatrat si në mesjetë.

-Çfarë ishte lufta e 97 në shtetin amë?

Burokratët, ziliqarët, pushtetmbajtësit , burracakët me një fjalë përvijonin fytyrën e një shteti,që po gremisej çdo ditë në humnerë,madje për ta shpejtuar këtë ata i dhanë dorën e fundit drejt honit më të thellë. Kundërshtarët të vendosur në rrugën e tyre.U dha,për në pushtet shkonte nëpër një pyllishteje më flakë e armë. Kjo ishte vogëlushe ‘97.

Ti ardhe në shtetin amë kur tiparet e tyre ishin :ngjyra e verdhë e syve të ngrirë.Pra sapo kishin dalë nga lufta e çuditshme .Diagrami i rrahjeve të zemrës ishte tregues i një lufte ,që s’merrej vesh kush luftonte,me kë luftonte.

Jo pak qytetarët e qytetit të Flamurit kishin mbushur varrezat civile të Babicës me arkëmorti.Si rrallë shqiptarët nuk vdisnin nga Zoti,që u kishte dhënë jetën,por vriteshin ditën me diell në qytetin historik,nga kallashët e plumbave rrëmintar. Mirëpo cilado qoftë e vërteta,shkaqet e saj për ju o politikanë të kësaj kohe dhe të gjithë krahëve,për ju projektues të zinj. Për ju ndërtues e zbatues varrezash. U shtrembërofshi këmbë e kurriz,djall e bijë djallësh.Bukë,o Zot i madh ,mos u dhënçin në pleqëri të thellë. Strehë,mos gjeçi në ditë të zezë.

2.Kështu ti ardhe në qytetin e Flamurit.Ti erdhe në shtetin amë aty ku dielli muzgjeve tè shumèpritura qielli pèrflaket.Vogëlushe ti ardhe në qytetin tonë pèrpara njè sinfoni të brishtè,aty ditènetèt e gjata,me zèrin e dridhur tingujve pèrhumben. Ishujve tè vecuar pèrhapet largèsia,duke u tretur dalèngadalè heshtjes sè saj,krahève tè zgjatur mbetet njè shpresè.Ti ardhe pikërishtë për këtë shpresë vogëlushe!Dhe një ditë befasisht ti u sëmure ,pra cfarë të ngjau?Si ndodhi që jeta jote upërmbys. Vogëlushe ike për ti shpëtuar një tmerri pa fund. Shpresoje dhe ëndërroje të ishe larg plumbave. Shpresoje dhe ëndërroje që një ditë ,që tmerri të mbetej pas. Ëndërroje të riktheheshe në vatrën tënde .Ëndërroje të ishe e qeshur, lumturisht.

Ardhja jote ,qiellin e pastër brenda vetes shpalosje. Ti solle pranë çdo cicërimë dhe fëshfërime gjethesh,erën e ngrohté shpërndaje kudo,té ndërroj fushëpamjen e muzgut zbehur. Pranverat e ikura klithin njëzëri,duke marré me vete çdo ankim,té gjitha ngjyrat kërkojnë koloret e tyre. Brenda teje buronin ujëvarë,rrjedhshmërinë e saj duket se diçka e ndali, ,ndërfutur mes një hapësire e zbrazét,ti u ende drejtimesh qé si kupton as vet. Dhe një ditë të vitit 1999 defitnitivisht ,sytë i mbylle. Karvani i mortorëve u ngjit te kodrina,përjetësisht aty flenë të ikurit nga kjo botë. Dhe rapsodi një miku im Nertesi Asllani këndonte dhimbshëm me vargje plumbi:“Eh, Babice, Babice,/C’dhimbje mba mbi vete,/ Sa pak jete të plote! Sa shume copra jete!Karvanë me lule, /Krushq të qetë, pa zhurmë, /Tabutet mbi supe,/ Dhendurret në gjumë”…….

-Një lutje prano ti udhëtar te dërrasa e këtij varri të vetmuar ,aty hidh një lule mbi dheun e butë.

-Vogëlushe, hasmi iku detyrimisht nga toka dhe vatra?Po ti pamundësish nuk u ktheve në trojet e tua. Stacioni i fundit i jetës ishte këtu në tokën amë .Perëndia të dha jetë,hasmi ta ndërpreu në 9 vite.Mbetur përjetësisht në këtë qytet vogëlushe,si kohë dhe tregues i një lufte, që shkau ka bërë me shqiptarët .Nëse në folklor thuhet:Ku ka rrjedhur do pikojë do vej soji më soj…që dmth shqiptarët do kenë trojet e tyre, që u ka dhënë Perëndia, si një lindje që pas perëndimit vjen.Për ardhacakët udhët dihen ,nga sytë këmbët drejt muzgjeve ,ngricave pa fund nga ku nisën me taborët dhe ulërimë .Le të kthehen në ditënetët e tyre .Atje të luten për mëkatet e tyre .Perëndia gjithsesi i mëshiroftë për krimet e tyre.