Archives for March 2023

RRËFIME TË VEPRIMTARISË KOMBËTARE TË EKREM BARDHA

March 21, 2023 by s p

Me shqiptarët në Amerikë

Skënder Karaçica

Në një emission (Top Channel, Tiranë), veprimtari i njohur i çështjes shqiptare në diasporën në Amerikë, Ekrem Bardha, në rrëfimet e tij ndër të tjera hedh dritë për një ngjarje të kohës në Nju Jork në vitin 1960, ku mori pjesë në selinë e OKB-së ish udhëheqësi i dytë i partisë së punës dhe njeriu i qeverisë shqiptare Mehmet Shehu. Me të dëgjuar se në selinë e OKB-së në Nju Jork kishte ardhur njeriu i qeverisë shqiptare Mehmet Shehu, thotë në rrëfimet e tij Ekrem Bardha, u organizuam nga Çikago, Nju Jorku, Detroiti dhe të qendrave tjera në Amerikë dhe shkuam para selisë së OKB-së duke brohoritur: Poshtë Mehmet Shehu, Poshtë Komunizmi në Shqipëri!

Derisa ne brohorisnim kundër regjimit komunist në Shqipëri, nga ana tjetër e qytetit në Nju Jorkut, vinte në drejtimin tonë një mase e madhe sa dyfishi ynë i mërgimtarëve grekë, që, me parolla në dorë kërkonin Korçën dhe Gjirokastrën tonë, thotë në rrëfimet e tij Ekrem Bardha. Kur turma greke afrohej afër nesh, ne harruam Mehmet Shehun dhe regjimin komunist dhe, ai na u bë si “vëlla” dhe pa një pa dy iu vërsulëm me çka patëm turmës greke dhe provokuese kundër Shqipërisë tonë. Dhe, i rrafëm dhe i dërmuam grekët provokues deri në përgjakje, kurse gazeta “New York Times” pati shkruar për këtë ngjarje të kohës para selisë së OKB-së në Nju Jork për përleshjen shqiptaro-greke për shkak të provokimeve me parullat “Na jepni Korçën dhe Gjirokastrën” për shtetin helen në Athinë, ky ishte një rëfim i shqiptarëve në Amerikë, që, tash e një shekull janë në ballë të veprimtarisë për çështjen shqiptare në hapësirën etnike në Ballkan. I veçantë në ketë udhë të madhe kombëtare është veprimtari i njohur nga Detroiti, Ekrem Bardha.

DOJA TË ISHA DHE UNË…

March 21, 2023 by s p

– Nga Visar Zhiti –

MESHA E SHENJTË E MINISTRIT TË JASHTËM TË VATIKANIT, PAUL RICHARD GALLAGHER, NË KATEDRALEN E RRËSHENIT…

Doja të isha dhe unë, patjetër, thashë dhe ashtu bëra…
Para Katedrales së Rëshenit, në sheshin me emrin e martires katolike, “Marie Tuci”, grumbulloheshin vazhdimisht njerëz si në festë, si në një ngjarje të madhe, qytetarë plot, mirditorë epikë, gra me veshje tradicionale, studente, fëmijë me lule ndër duar dhe një diell i ngrohtë marsi që përndriste mbi kambanoren e lartë po më dukej si të ishte një kambanë ari…
Dëgjoja bisedat përreth, lavdëronin Ipeshkëvin e tyre, Imzot Gjergj Meta, ka gjallëruar jetën e qytetit, thoshin, nëse jo të gjithë munden të venë në kishë, vjen kisha te ju, u thotë ai.
Ja, mbërritën veturat te sheshi, zbriti Shkëlqesia e tij, Imzot Paul Richard Gallagher, Sekretar i Shtetit të Vatikanit për Marrëdhëniet me Shtetet dhe Organizmat Ndërkombëtare ose Ministri i Jashtëm i Selisë së Shenjtë, po ngjiste shkallët e Katedrales. Ai do të kremtonte meshën e së dielës.
E si të mos merrja pjesë dhe unë. Pak më tutje ishte burgu i Spaçit, kisha qenë në burg dhe me klerikë dhe sikur ma kërkonin shpirtrat e tyre, të bashkëvuajtësve, që ishin vrarë apo vdekur brenda telave me gjëmba e varret andej-këndej humbnerave përreth s’u diheshin. Po unë dhe e njihja vetë Imzot Gallagher. Kur punoja në ambasadë në Vatikan, ishim takuar, po e adhuroja, po, po, u miqësuam.
Ipeshkëvi, Imzot Gjergj Meta i uroi mirëseardhjen në emër të gjithë bashkësisë dioqezane të Rrëshenit, duke thënë se vizitën e tij “e shihnim edhe si një përkujdesje të Atit tonë të Shenjtë, Papa Françeskut, për Kishën në Shqipëri” dhe falenderoi për praninë bashkëvëllezërit ipeshkvij, Kryetarin e Bashkisë së Rrëshenit, besimtarët aq të shumtë në numër, të ardhur nga fshatrat e ndryshëm të dioqezës, po edhe prej më larg, nga Kosova, nga Italia dhe deri nga SHBA.
Dhe nisi kori kishtar. Gjatë homelisë në Meshën e Shenjtë që po udhëhiqte Imzot Gallagher, tha se “Në një botë ku duket se mbizotërojnë dhuna, konflikti, rivaliteti dhe gënjeshtra, prania e të krishterëve vë përballë një forcë të shenjës së kundërt, e cila bëhet akuzë e këtyre veprave të vdekjes.”
…të mos shkurajohemi kurrë, – porositi, – t’iu përgjigjemi sfidave të kohës sonë me një qëndrim të përvuajtur dhe me një dialog që shoqërohet me gjeste mirësie dhe mirëkuptimi më të madh ndaj të gjithëve. Dhe shtoi:
“…ne e dimë mirë se të jetosh në këtë mënyrë ndonjëherë kushton, edhe me çmimin më të lartë, atë të jetës, siç e dëshmojnë ndër të tjera, 38 martirët e Shqipërisë, mes të cilëve gjendet vetëm një grua, e Lumja Marie Tuci, rishtare e re stigmatine dhe bijë e kësaj toke të Mirditës. Jeta e saj e shkurtër, por plot fe dhe guxim, është inkurajim dhe shenjë shprese për të gjithë ne e veçanërisht për të rinjtë. Amen.”
M’u nëpërmendën priftërinjtë në burgun e Spaçit, poezia që kisha shkruar fshehurazi, “Ikonat e arrestuara”, konferenca në Vatikan për persekutimin e klerit në Shqipëri, isha pranë Mons. Gallagher, kur po flisja, në një tryezë dhe prapë pas meshës në Rreshen, do të ishim pranë në drekën e shtruar në nderim të tij dhe Imzot Gjergj Meta më ftoi të jemi pranë.
Imzot Gallagher e dinte Spaçin, është mrekulli që ti je këtu tani, më tha, kujtuam takimet në Selinë e Shenjtë, në Washington, ftesat në shtëpi, librin e Edës time për Nënë Terezën, të botuar në Vatikan, më pyeti se si është dhe për romanin tim të ri. Duke shtrënguar duart, thamë se do të takoheshim sërish…
Si një lumë qiellor vazhdonte të rridhte dritë mbi Rrëshen, ndërsa Mati, si një lumë tokësor, i turbullt ikte duke këputur copa dherash si dhimbje, pemët që pasqyroheshin, bëheshin si kryqe… hije telash me gjëmba… gjurmë të burgosurish ribëheshin mbi baltë… mallkimi i tyre, jo, urimi i tyre më shumë, solli këto ditë kështu… ëndrra e popullit… bien martirë dhe ngrihen shenjtër… me rihapjen e tempujve të besimit… kambana dhe kjo meshë që s’do të harrohet… në Katedralen e Rrëshenit… ku duhej të vija patjetër.

DASH godet ashpër Serbinë për diskriminimin e vazhdueshëm shtetnor e institucional ndaj shqiptarëve të Luginës së Preshevës

March 21, 2023 by s p

Faton Bislimi/

Departamenti i Shtetit të SHBA-ve ka publikuar Raportin për Praktikat e të Drejtave të Njeriut 2022. Në Raportin për Serbinë, në seksionin me titull “Dhuna dhe Diskriminimi Sistemik Racor apo Etnik” (faqe 30-32), raporti godet ashpër Serbinë për diskriminimin e vazhdueshëm shtetnor e institucional ndaj shqiptarëve të Luginës së Preshevës.
“Shqiptarët etnikë ishin subjekt i diskriminimit dhe papunësisë… Qeveria padrejtësisht i bëri shqiptarët subjekt të pasivizimit për të zvogëluar numrin e shqiptarëve etnikë që jetojnë në Serbi,” thuhet në Raport.
“Aplikimi i këtij ligji per të targetuar shqiptarët nënkupton spastrim etnik përmes masave administrative,” siç është potencuar edhe në raportin e Komisionit të Helsinkit të Serbisë, vazhdon tutje Raporti, duke potencuar se “autoritetet serbe duhet ndaluar të gjitha praktikat diskriminuese ndaj minoriteteve etnike,” përfshirë këtu edhe “gjuhën fyese e të urrejtjes,” kryesisht të përdorur publikisht nga zyrtarët shtetëror serb si Vulini psh.
Ende s’keni parë gjë akoma!
Puna jonë për Luginën e Preshevës përmes kontributit të paçmuar e të pazëvendësueshëm të Ligës Qytetare Shqiptaro-Amerikane do vazhdojë deri në realizimin e plotë të të drejtave të vëllezërve e motrave tona në Luginë!

DIBRA VAZHDON TË JETË E NJERKËS

March 21, 2023 by s p

A do ta ri-inagurojë Kryeministri Rama Rrugën e pambaruar të Arbërit në prag të zgjedhjeve lokale?!

Njoftim për mediat në 10 vjetorin e peticionit

Nga Grupi i Lobimit

Tiranë, më 18 Mars 2023

U mbushën 10 vite nga nisja e këtij peticioni, dhe çdo pritshmëri e nismëtarëve i ka kaluar kufijtë. Kur e nisëm atëherë peticionin synonim dy qëllime:

E para, depolitizimin e çështjes së Rrugës së Arbrit, heqjen e saj nga agjendat politike dhe vendosjen e saj si një agjendë kombëtare. Në parim, Partia Spocialiste dhe Partia Demokratike bënë sikur ranë dakord me këto kërkesa, por asnjëra palë nuk i mbajti premtimet.

E dyta, ishte rritja e presionit ndaj vendimmarrësve për të ndërtuar një rrugë me cilësi dhe standarde dhe premtimi ndaj publikut ishte se nuk do ta zbehim kurrë zërin dhe presionin tonë për arritjen e këtij qëllimi.

Grupi i Lobimit vazhdon t’u përmbahet këtyre parimeve ndërsa Kryeministri Edi Rama dhe tre Qeveritë e tij vazhdojnë ta injorojnë krejtësisht qëllimin tonë. Madje kanë dëshmuar një mungesë mjeranë në etikën e komunikimit, duke na akuzuar si “vegla të Saliu” dhe duke u krekosur se do ta ndërtojnë rrugën me standarde të tilla europiane, që do ta kishin zili edhe “peticionistat e Londrës”.

Për sqarim, peticioni filloi përpara zgjedhjeve parlamentare në Mars 2013, pra kur nuk dihej rezultati i tyre. Po kështu, Grupi i Lobimit nuk ka ndonjë anëtar në Londër. Ndërsa Kryeministri Rama, me sa duket, është mësuar të rrethohet nga temenaraxhinj dhe i do dibranët afër të jenë merhumë dhe anonimë, që t’i servirë si ‘përfaqësonjës’ të Dibrës dhe disaporës sipas lojës së tij, meqë nuk ka kurajo të përballet me elitën.

Kanë kaluar dhjetë vite nga nisja e peticionit dhe njerëzit e kanë parë çdo ditë në terren se çfarë është realizuar.

Ne e përshëndetëm nisjen e qarkullimit në rrugë në nëntor 2021. Ndryshimi i vetëm që nga ajo kohë është se, nga pagesat nën dorë për rojet, tani qarkullimi ishte i lirë. Edhe pas dy vitesh, standardet e rrugës janë, siç thonë dibranët, për ibret: rruga ka rrëshqitur në shumë vende, asfalti shpesh është i shqepur dhe sinjalistika e sigurisë nuk gjendet pothuajse gjëkundi.

Grupi i Lobimit ka vënë re në terren punime të ngadalësuara dhe pa cilësi dhe mungesa përsa i përket sigurisë. Aksidentet e fundit kanë treguar se ndërtuesit, apo nënkontraktorët, nuk u kanë kushtuar rëndësi dhe kjo, më shumë se shkelje e rregullave të ndërtimit, ka të bëjë me frymën e qeverisjes: bëj sikur punon, premto dhe bëj sikur mban premtimet, sepse, si gjithmonë, Dibra është e fundit.

Që nga dita e nënshkrimit të kontratës në Mars të vitit 2018, informacione kontradiktore janë dhënë për financimin e saj. Nga 260 milionë euro për afro 80 kilometra rrugë, shifrat kanë shkuar në mbi 400 milionë euro. Një të katërtën e kësaj shumë e ka paguar qeveria deri më tani, por rruga nuk ka përfunduar megjithëse është inaguruar disa herë.

Gjithashtu, terri informativ mbizotëron mbi ecurinë e punimeve në Tunelin e Murrizit. “Edhe 700 metra tunel ka për tu hapur”, thoshte Ministrja e Infrastrukturës në verën e vitit të kaluar, por mediat raportojnë se afro 700 metra është aktualisht pa u hapur akoma!

Dy tunelet e tjera të Kardhiqit dhe Llogarasë nisën pas tunelit të Murrizit, por dy të parët mbaruan para kohe sepse, për Qeverinë, Dibra është akoma e njerkës.

Nga vëzhgimet e fundit në terren, duke parë çfarë është përfunduar, çfarë është në proces dhe çfarë nuk është filluar akoma, mund të themi pa rezerva se kjo rrugë nuk do të përfundojë, jo vetëm këtë viti, por as vitin e ardhshëm.

Qeveria kujtohet vetëm kur ka zgjedhje të merret me rrugën, gjë të cilën pritet ta bëjë edhe këtë vit, me hapjen e segmentit në Planin e Bardhë, e cila me letrat e Qeverisë ka mbaruar që në vitin 2011.

Në këtë 10-vjetor të peticionit, ajo që vëmë re është se nuk ka asnjë komunikim zyrtar ndërmjet Tiranës dhe Shkupit për vazhdimin e punime në Rrugën e Arbërit në Maqedoninë e Veriut. Dhe për ta ndihmuar këtë fakt, qeveria shqiptare e ka mbyllur Rrugën e Arbërit në një rrethrrotullim në Maqellarë jashtë çdo standardi.

Vitet po ikin dhe Qeveria në Tiranë dhe qeveritarët shqiptarë në Maqedoninë e Veriut duhet ta kuptojnë se nuk ka integrim të rajonit në Europë pa u integruar Dibra e copëtuar. Ndërprerja e këtij komunikimi ose lidhja e tyre dobët është nje nga plagët e hapura të hapsirës shqiptare.

Peticioni për Rrugën e Arbërit, që deri tani ka mbi 22,000 përkrahës, nga të cilët 2,000 në formularë, mund të nënshkruhet online: http://bitly.ws/BLHN

Kisha Katolike “Zoja e Shkodrës” Meshë dhe Darkë Solemne, për Katedralen Nëna Terezë në Prishtinë

March 21, 2023 by s p

Nga Beqir SINA/

150 mijë dollarë nga shqiptarët e Amerikës : 50 mijë dollarë dhuroi Anton Raja, 25 mijë dollarë deklaroi Kryetari i Federatës PanShqiptare Vatra, zoti Elmi Berisha, me 10 mijë, dhe 5 mijë dollarë ishin disa familje, e biznesmen, ndërkohë, që edhe filantropi i njohur Harry Bajraktari, dhuroi një çek 3 mijë dollarëSlideshow https://youtu.be/3pHU2kqZbJkBRONX NY : Ditën e diel,(më 19 Mars, në mesdrekë), në kishën Katolike Zoja e Shkodrës në Hartsdale – New York, bashkëmeshojë në Meshën e së Dielës, prelatët e Kishës Katolike nga trojet tona: Imz. Rrok Gjonlleshaj, Arqipeshkëv i Tivarit; Imz. Dodë Gjergji, Ipeshkëv i Kosovës, , Dom Lush Gjergji, Dom Pjetër Popaj, Famullitari i Famullisë Zoja e Shkodrës, Hartsdale, New York dhe meshtarë të tjerë nga vendlindja dhe diaspora.Ndërkohë, një darkë solemne, u mbajtë për nder të mysafirëve të shtrenjtë, në lokalin Villa Barone Manor, në Bronx, NY, për grumbullimin e ndihmave financiare për ndërtimin e “Kullës” së dytë të Kumbanores së Katedrales “Nënë Tereza” në Prishtinë.Me këtë rast besimtarët katolik shqiptar në Nju Jork, u njohën me emërimin e ri të Papës, për Imzot Rrok Gjonlleshaj, Administrator Apostolik tё Kotorit. Ati i Shenjtë u tha në këtë mbrëmje, emëroi Administrator Apostolik sede vacante ( nё selinё vakante) të dioqezës sё Kotorit shkëlqesinë e tij Imzot Rrok Gjonleshaj, kryeipeshkёv i Tivari (Mal tё Zi).Shqiptarët në Amerikë të cilët kanë dhënë mbështetjen e tyre në dollarë për ndërtimin e Katedrales “Nënë Tereza” në Prishtinë, prej kur u hodhën themelet e saj me më shumë se 2 milion dollarë, mblodhën mbrëmë rreth 150 mijë dollar për “Kullën” e dytë të Kumbanores së Katedrales “Nënë Tereza” në Prishtinë. Kjo mbrëmje modeste solli mirësi, dashuri, lutje e bekim fetar, kushtuar katedrales së Nëna Terezes, në Prishtinë, simbolit të shqiptarëve në botën e qytetëruar. Dom Pjetër Popaj, Famullitari i Famullisë Zoja e Shkodrës, dha bekimin e darkës solemne, të cilën e moderói shkrimtari Mëhill Velaj, dhe argëtojë të pranishmit me muzik nga të gjitha trevat “Mjeshtri i Madh”, Gëzim Nika, the grupi i tij muzikor.Ndërsa, mbrëmjen e mbledhjes së fondeve financiare e përcollën me fjalën e tyre, nëpërmjet mesazheve faleminderuese dhe vlerësuese, ish kongresisiti Joe DioGuardi, kryetar i Lidhjes Qytetare Shqiptaro – Amerikane, biografi i të Shejtes “Nena Tereze”, Dom Lush Gjergj, Imzot Rrok Gjonlleshaj, “President Nderi” i Federatës PanShqiptare “Vatra” z. Agim Rexha, dhe Kryetari i Vatrës zoti Elmi Berisha, si dhe aktivisiti Mhill Gjuraj, e tjer.Ipeshkvi i Ipeshkvisë së Kosovës, Imzot Gjergji në përmbyllje të kësaj mbremje solmne për grumbullimin e fondve për Katedralen Nëna Tereze në Prishtinë, mbasi i bekoi të gjithë donatorët, falënderoi dhe vlerësoi lart të gjitha kontributet e shqiptarve të Amerikës.Mbrëmja solemne për grumbullimin e fondeve për “Kullën’” e dytë të Katedrales “Nëna Tereza” në Prishtinë, u inicua nga Anton Raja dhe Kisha Katolike “Zoja e Shkodrës” në Nju Jork, si një gjest dashurie për tërë komunitetin katolik shqiptar, kudo që ai jeton në Kosovë, Shqipëri, dhe viset tjera shqiptare.Në këtë mbrëmje, tha Anton Raja u mblodhën rreth 150 mijë dollarë nga shqiptarët e Amerikës, nga këto donacione 50 mijë dollarë dhurojë nga Anton Raja, 25 mijë dollarë deklaroi Kryetari i Federatës PanShqiptare Vatra, zoti Elmi Berisha, me 10 mijë, dhe 5 mijë dollarë ishin disa familje, e biznesmen, ndërkohë që edhe filantropi i njohur Harry Bajraktari dhurojë një çek 3 mijë dollarë.Një chek 10 mijë dollarë dhurojë Zef (Zekë) Gjon Kalaj, i cili është dhe i vetëmi donator me rreth 600 mijë dollarë, të Shtatores së heroit tonë kombëtar Gjergjë Kastriotit – Skëndërbeut, një vepër e jashtzakonshme, kjo që ngrihet madhështore, në një ambjent të mrekullueshem, oborrin e Kishës Katolike Zoja e Shkodrës, për karshi shtatores së të Shejtës Nëna Tereze”.Për grumbullimin e ndihmave financiare për ndërtimin e “Kullës” së dytë të Kumbanores së Katedrales “Nënë Tereza” në Prishtinë, e cila kushtonë reth 800 mijë dollarë, Ipeshkvia e Kosovës, me delegacionin e saj – prelatët e Kishës Katolike nga trojet tona: Imz. Rrok Gjonlleshaj, Arqipeshkëv i Tivarit; Imz. Dodë Gjergji, Ipeshkëv i Kosovës, , Dom Lush Gjergji, dhe meshtarë të tjerë nga vendlindja dhe diaspora, do të shkojnë këtë javë në Detroid – Michigan.