Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for May 2023

Pikniku i parë shqiptar madhështor në Staten Island, New York

by

Nga Keze Kozeta Zylo/

Shumë shoqata të Komunitetit Shqiptar në New York dhe veçanërisht ato me seli në Staten Island si “Ana e Malit”, “Kraja”, “Rrënjët Shqiptare”, “Ulqini”, “Rozafa “Shkodra Association” etj, organizuan Piknik madhështor, më 28 Qershor në Wolfe’s Pond Park në Staten Island, New York. Kryetarët e shoqatave dhe z. Mark Gjonaj “Nderi I Kombit” ftuan të gjithë Komunitetin për të marrë pjesë dhe për t’u argëtuar së bashku në këtë ditë të bukur.

Amerika e ka festë zyrtare dhe fundjavën e fundit të Majit e ka Memorial Day. Ajo u bë një festë zyrtare federale në vitin 1971, për të kujtuar të gjithë ata që ranë heroikisht në shërbim të Shteteve të Bashkuara. Sipas Byrosë së Regjistrimit të SHBA-së, Dita e Përkujtimit nderon më shumë se 1 milion burra dhe gra që kanë vdekur në shërbimin ushtarak që nga fillimi i Luftës Civile në 1861.

Në këtë ditë Shoqatat shqiptaro amerikane kishin zënë vendet me tendat e tyre duke filluar qysh në orën 11 paradite me banerat perkatës të varur në tenda, çka tregonte interesimin e tyre të madh dhe dëshirën për të qenë bashkë.

Wolfe’s Pond Park është ndër vendet më të mira për të kaluar një ditë të diel në Staten Island, vecanërisht kur në Amerikë është Memorial Day. Aty ka diçka për të shijuar të gjithë vizitorët.

Ndodhen kënde lojërash, vend per pistën e gjelbërt të vallëzimit dhe me bandën e muzikës para saj, fusha basketbolli dhe tenisi, si dhe shtigje të shumta ecjeje dhe çiklizmi, fusha të hapura dhe një plazh i vogël në Gjirin Raritan.

Pothuajse ne kemi qenëatje çdo 4 korrik, pasi parku organizon një shfaqje me fishekzjarre, me vende argëtimi dhe ushqimi të drejtpërdrejtë. Kjo shfaqje popullore tërheq çdo vit qindra banorë të Staten Island nga South Shore dhe gjetkë.

Si banorë prej gati 2 dekadash në këtë ishull të bukur doemos e patëm kënaqësi të merrnim pjesë aktivisht jo vetëm fizikisht, por dhe si media TV “Alba Life”.

Në këtë aktivitet nderoi me pjesëmarrjen e tij z.Vito John Fossella Jr. i cili është një politikan amerikan dhe që shërben si President i qytetit të Staten Island që nga viti 2022.

Gjatë intervistave të shumta me njerëz të thjeshtë dhe kryetar shoqatash ata shprehën fjalë miradie për organizimin dhe kënaqësinë që ishim bashkë si shqiptarë. Z. Ismet Kurti ish kryetar i Shoqatës së mirënjohur “Ana e Malit” tha midis të tjerash se gjithmonë pikniqet kanë të përbashkët se grumbullojnë shqiptarët dhe ndajmë së bashku ushqimet tradicionale, vallet, këngët e shumë të tjera. Komuniteti ynë është vital dhe ne duhet t’i tregojmë politikanëve tanë amerikanë se sa të organizuar jemi dhe sa fuqi kemi me votën tonë. Z. Marko Kepi President i Organizatës “Rrënjët Shqiptare” ishte i lumtur për ardhjen e njerëzve dhe tha se në datën 9 qershor do të kemi 15 Vjetorin e Organizatës, do te jete Gala si dhe Paradën më 10. Ne ndeorojmë Memorial Day, nderojmë të rënët që dhanë jetën për Lirinë e Amerikës dhe të vendeve të ndryshme në botë.

Kryetari i Shoqatës “Kraja” z. Samih Kanaqi tha se ndihej i nderuar të sillte pjesëmarrës në këtë piknik dhe të festonim së bashku.

Studiuesi i mirënjohur Hamid Alaj foli para kamerave për pasurinë e traditës si dhe për disa nga librat e tij që doemos e pasurojnë horizontin për kulturën krajane. Librat janë si : “ Zhvillimi i shkollave dhe arsimi në trevën e Krajës dhe të Shestanit”, Dasma krajane dhe ceremoniali i saj” “Veshja e nusënisë krajane”, etj.

Mirsad Kovaci ish Kryetar i Shoqates “Kraja” tha se së bashku ne arrijmë qëllimet tona atdhetare dhe patriotike.

Z. Dash Miftari kryetar i Shoqates “Dibra” ndihej shumë i lumtur që merrte pjesë në këtë organizim dhe tha se doemos që duhet të bëhet traditë e përvitshme. Aktivisti I shquar ish kryetari I shoqatës Atdhetare Dibra z. Ibrahim Kolari tha se politikanët shqiptarë duhet të marrin shembull për organizimin e Diasporës. Natyrshëm vazhdoi ata duhet ta kuptojnëse ne jemi pjesëe trugut arbëror dhe pse jemi larg ne jemi shumë pranë tyre.

Z. Eddie Drishti Kryetar i shoqatës Shqiptaro Amerikane “Rozafa”, Shkodra Association si dhe komandant në forcat e rendit të policisë amerikane u shpreh se ështënjë ditë shumë e bukur përvecse nga Zoti qe na dhuroi diell është dhe me shumë shqiptarë Unë kam sponssorizuar dhe kam sjellë pica për anëtaret që të kënaqemi dhe të argëtohemi sa më shumë.

Z. Xhemo Lanica kryetar I Shoqates “Ulqini” u shpreh entuziast per kete piknik dhe tha se nuk do te ndalemi asnjehere per ta vazhduar kete tradite te mrekullueshme.

Shumë krenar u shfaqën para kamerave “Sons of Illyria” me xhaketat e zeza dhe simbolet kombëtare kuq e zi qe i bënin të dalloheshin dukshëm nga shumë të tjerë. Organizimi i tyre është i mahnitshëm pasi janë nga të gjitha trevat do të thoste z. Ekrem Prekazi, djali nga Prekazi, vendi i legjendarit Adem Jasharit, Heroit të Kosovës dhe Kombit.

TV “Alba Life” me president dhe producent z. Qemal Zylo së shpejti do të sjellë kronikën e përgatitur për ta transmetuar në medien televizive.

28 Maj, 2023

Staten Island, New York

DUKE PRITUR TË HËNËN E MEMORIES – ABDULLA RAMI – PËRTEJ HARRIMIT

by

Ines Angeli Murzaku*/

*Profesoreshë e Religjionit, Drejtoreshë e Departamentit dhe Programit të Studimeve Katolike – Seton Hall University, Neë Jersey, USA

Ndërsa Dita e Dëshmorëve/Përkujtesës 2023 po afron, e gjej veten duke menduar shumë për rëndësinë e të kujtuarit, rëndësinë e mos-harresës. Këtë të Hënë më 29 Maj, Amerikanët do të kujtojnë ato gra dhe burra që dhanë jetën duke i shërbyer Amerikës. Familjet do të kujtojnë njerëz të dashur, do të shkojnë në varreza të vënë flamurë dhe lule. Kështu ata që kanë shkuar mbesin në kujtesë. E tillë është fuqia e të kujtuarit dhe kujtesës. E tillë është fuqia që dikush tjetër të kujtojë diçka për ne dhe për historinë tonë të përbashkët.

Kujtesa është themeli i kulturës dhe identitetit të një populli, dhe kapaciteti ynë njerezor për të kujtuar e respektuar kujtesën na ndan nga të gjitha krijesat e tjera. Identiteti është i rrënjosur në njohjen dhe kujtimin e origjinës dhe historisë sonë. Identiteti dhe kuptimi forcohen kur mblidhemi dhe ndajmë historitë tona qofte të dhimshme apo të lumtura. Siç ka thënë laureati i Cmimit Nobelit që i mbijetoi Holokaustit, Elie Ëiesel: “Pa kujtesë, nuk ka kulturë. Pa kujtesë, nuk do të kishte qytetërim, shoqëri, dhe të ardhme”.

Është pikërisht “kujtesa-përtej harresës” që na ofron libri i autores Ermira Xhomaqi-Godo dedikuar gjyshit të saj Abdullah Ramit, intelektualit që vuajti në burgjet komuniste për 19 vjet. Libri është një biografi e informuar dhe e bazuar në burime arkivore nga Kosova dhe Shqipëria, në shkrime të ndryshme të botuar në shtypin zyrtar dhe jozyrtar, në dokumenta të arkivit të Ministrisë së Punëve të Brendshme, dhe kujtime personale të njerëzve të afërm që e kanë njohur personalist Abdullah Ramin.

Libri, është një dedikim i një mbese të devotshme për gjyshin, që jeton për të treguar dicka që gjyshi nuk mundi ose nuk arriti ta tregonte – një jetë të rëndë në kalvarin e tre burgjeve – Burgun e Tiranës, Burgun e Shtatë Penxhereve dhe Burgun e Burrelit, dhe internim që ishte një zgjatim i burgosjes. Por, Abdullah Rami, diti të vazhdojë jetën intelektuale – mbase e vetmja rrugë për të mbijetuar dhe jetuar nëpërmjet njerëzve dhe historive të tyre që ai me mjeshtëri i përktheu. Çfarë kujtese dhe trashëgimie la Abdullah Rami për ne sot? Përgjigjja është e thjeshtë: shembullin e njeriut që edhe në kushte çnjerëzore të burgjeve famëkeqe mundi të edukojë me prezencë dhe kulturë, duke mos pranuar të keqën që kishte gllabëruar vendin por duke shikuar përtej të keqës. Kjo filozofi jete i dha Abdullahut forcën për të jetuar e përkthryer disa nga kryeveprat e letërsisë botërore. Ai diti të shikojë përtej të keqës.

Pra, vlerat e ketij libri janë optimiste – si të gjesh kuptim në jetë dhe në jetesë përtej dhunës dhe errësirës së kampeve. Është më lehtë të jesh optimist në një vend të bukur o të begatë. Por të gjesh dashurinë per jetën, për të kërkuar e përkthyer nën hijen e vdekjes është një mrekulli. Do të ishte shumë e kuptueshme nëse Abdullai i rrethuar nga errësira do të kishte hequr dorë nga jeta intelektuale ose nga jeta e marrëdhëniet me njerezit. Aftësia e tij për të vazhduar jetën intelektuale në burg është shembull i dëshirës për jetën që i lejoi atij të dilte nga burgu me vlera dhe humanizëm. Pra libri është filozofik dhe teologjik përsa i përket thelbit të jetës.

Libri Përtej Harrimit‛ është një studim I rëndësishëm për të gjithë ata që duan të njihen me historinë e persekutimit intelektual në Shqipëri; për ata që e kanë jetuar por edhe për brezat e rinj që nuk e njohin diktaturën ose kanë iluzione për komunizmin.

“Kurrgjâ në mos kjosh i zoti me bâ, rrno vetëm për me tregue. A e kupton shka due me t’thanë? Mbaruen të tjerët, mbarojmë na, mbaron edhe ti: të gjithë shkojmë si qeni në rrush po nuk kje dikush me kallxue se si kje puna. Kush të teprojë le të kallxojë! Nuk duhet të mbarojmë për nesër e për shekujt e ardhshëm. Un jam sot për sot Superjor: po të jap urdhën: ik, rrno! Vetëm për me tregue! – E un rrnova… e mora si detyrim… nuk e di a ia kam mrritë!” – shkruan At Zef Pellumbi, një prift françeskan që kaloi më shumë se dy dekada në burgjet famëkeqe të Shqipërisë, në librin e tij “Rrno për me tregue.”

Po, autorja, Ermira Xhomaqi-Godo, kërkoi, tregoi dhe na mësoi të mos harrojmë kurrë këtë histori të dhimshme të kombit tonë. Për këtë i jemi mirënjohës! Ndërsa e Hëna e Dëshmorëve po vjen, ne jemi mirënjohës për një dëshmor të ri – Abdullah Ramin. Kujtimi qoftë i përhershëm.

Unioni i Gazetarëve Shqiptarë apel organizatave ndërkombëtare të gazetarëve për kërcënimet ndaj gazetarëve në detyrë në Kosovë

by

Tiranë më 29.05.2023/

Unioni i Gazetarëve Shqiptarë denoncon aktet vandale dhe kërcënimet ndaj gazetarëve gjatë episodeve të ditëve të fundit, në zonën veriore të Kosovës dhe sidomos gjatë ditës së sotme, e hënë më 29.05.2023.

Goditjet e dhunshme dhe sjelljet vandale të protestuesve, mbi automjetin e gazetarëve të Top Channel, në të cilin ndodheshin edhe kolegë të tjerë në Zveçan, përbën një incident të rrezikshëm.

Katër kolegët e ndodhur në këtë automjet, të përballur me klithma dhe sjellje agresive ultranacionaliste serbe, kanë përjetuar një moment të pazakontë sigurie për jetën e tyre fizike.

Unioni i Gazetarëve Shqiptarë shpreh solidaritetin e plotë me gazetarët e Top Channel dhe gjithë kolegët e Kosovës, si dhe me gjithë rrjetin e reporterëve, operatorëve dhe fotoreporterëve që raportojnë për mediat kombëtare dhe ato rajonale, duke kërkuar prej tyre maturi, objektivitet, kurajo dhe guxim profesional. Ne apelojmë për kolegët që gjatë raportimeve, të respektojnë normat dhe ligjet në fuqi, të Republikës së Kosovës.

UGSH u bën apel të gjitha organizatave rajonale, europiane dhe ndërkombëtare të gazetarëve në përgjithësi, reagojnë dhe dënojnë me forcë, aktet vandale të ekstremistëve nacionalistë ndaj gazetarëve. Të gjitha organizatat duhet të shprehin solidaritetin me gazetarët në detyrë, në këtë pjesë të Kosovës, ku po përballen me agresivitet grupesh kriminale, kërcënime ekstremistësh nacionalistë, dhe që inspirohen nga qarqe të caktuara që synojnë tension dhe destabilizim të rajonit.

UGSH kërkon nga përfaqësuesit e lartë dhe institucionet ndërkombëtare që janë prezent në Kosovë, veçanërisht: NATO, KFOR-i dhe EULEX Kosovë, që të mundësojnë garantimin dhe mbrojtjen e jetës dhe së drejtës për ushtrim të raportimit të lirë nga gazetarët dhe mediat në Kosovë.

Zyra Informuese

Unioni i Gazetarëve Shqiptarë

QEVERIA RAMA KAP GJITHÇKA, DO TË KONTROLLOJË EDHE KËRKIMIN SHKENCOR

by

Dr. Paulin Marku/

Mbyllja e Akademisë së Studimeve Albanologjike është një dëshmi e qartë se rrenjët e komunizmit po rigjenerohen në Shqipëri. Në vend që studiuesit shkencorë të kenë mbeshtetje financiare, investime në fushën e kërkimit shkencor, projekte të sponsorizuara nga qeveria, infrastrukturë për të lehtësuar punën që të jenë sa më komod, etj. , sot arrihet në vendimin ekstrem të mbylljes së një institucioni elitar të Albanologjisë në Shqipëri.

Ndjej keqardhje të madhe kur kolegët e nderuar me shpenzimet personale udhëtojnë për të bërë kërkime, për  të botuar në revista Ndërkombëtare, për të marrë pjesë në konferenca shkencore, workshop, e shumë shpenzime të tjera.

Pa llogaritur librat, udhëtime, shpenzime per ushqim dhe fjetje kur janë në aktivitete ndërkombëtare. Mbaj mend kur u morën zyrat me urdhër të Qeverisë Rama, për t’ia kaluar Ministrisë së Integrimit (e cila sot nuk ekziston si ministri) dhe studiuesit u nxorën nga zyrat me afat kohor disa orësh.

Askujt nuk i interesonte se ku do të punonin këta kërkues shkencorë që u nxorën nga godina pa iu gjetur një sistemim tjetër, mjaftonte të zbatohet urdhëri i qeverisë Rama.

Edhe ato pak zyra që ASA kishte, të cilat ishin të pamjaftueshme sepse punonjësit shkencore ishin tre, katër, apo edhe pesë veta në një zyrë, pa marrë në konsideratë se këto ambiente ishin pa sistem ngrohje e ftohje, të pamjaftueshme për të gjithë punonjësit shkencor duhet që në mënyrë urgjente të linin zyrat dhe të largoheshin brenda pak orësh.

Mbaj mend që kur vinte dimri ambientet ishin akull dhe nganjëherë duhej me patjetër që të ndiznin një ngrohëse për të thyer të ftohtin, dhe sapo ndiznim ngrohjen,  binte automati i godinës. Nuk po flas për air të kondicionuar se është problem tjetër.

Dhe sot, sikur të mos mjaftonin të gjitha këto probleme që përmenda më lart, e shumë e shumë të tjera, kërkohet mbyllja e Akademisë së Studimeve Albanologjike. Te vjetrit dikur thonin ” o Zot mbaj dorën”. Ndërsa, unë sot do të shtoja “Zot mbaj dorën dhe mos t’ia japë mendja Kryeministrit Edi Rama të vetëshpallet Mbret i Shqipërisë”.

Në mbështetje të kolegëve të Akademisë së Studimeve Albanologjike,

Me keqardhje të madhe për situatën në vendin tim,

Dr. Paulin Marku

DEKLARATË PËR SHTYP

Senati i Akademisë së Studimeve Albanologjike

Tiranë, më 27.05.2023

Senati i Akademisë së Studimeve Albanologjike u mblodh sot me urgjencë për të diskutuar raportin përfundimtar të Ministrisë së Arsimit dhe Sportit “Mbi kontrollin e pajtueshmërisë së veprimtarisë së Akademisë së Studimeve Albanologjike me aktet ligjore dhe nënligjore në fuqi” i datës 25.05.2023, i cili rekomandon mbylljen e veprimtarisë së këtij institucioni si institucion i arsimit të lartë të llojit “Akademi”. Veç kësaj, nga dita e djeshme ka qarkulluar në media një formë e Projektvendimit të Këshillit të Ministrave “Për Mbylljen e Veprimtarisë së Akademisë së Studimeve Albanologjike dhe Riorganizmin e Njësive kryesore të saj”. Për sa më sipër, Senati i Akademisë së Studimeve Albanologjike, pas mbledhjes së sotme doli me një deklaratë për shtyp ku sqarohet se Projektvendimi për Mbylljen e Veprimtarisë së Akademisë së Studimeve Albanologjike dhe Riorganizminn e Njësive kryesore të saj shkakton sa më poshtë:

1. Shkelet ligji për Arsimin e Lartë dhe Kërkimin Shkencor në Shqipëri, duke krijuar precedentin e rrezikshëm të mbylljes së pabazuar të një Institucioni Publik të Arsimit të Lartë dhe Kërkimit Shkencor dhe për më tepër sot, të së vetmes Akademi Albanologjike. Konkretisht ASA nuk është njoftuar për këtë Projektvendim, dhe së dyti, sipas Ligjit për Arsimin e Lartë dhe Kërkimin Shkencor në Shqipëri, është Senati i ASA-s, i vetmi  institucion që duhet të shprehet për fatin juridik të ASA-s. Deklarojmë se Senati vijimisht si dhe sot, është shprehur dhe shprehet kundër mbylljes së ASA-s.

2. Mbyllja e ASA-s shkakton pushimin e mbi 45 marrëveshjeve ndërkombëtare, ku ky institucion është palë si IAL, dhe asnjë institucion tjetër nuk ka tagër t’i mbartë.

3. Shuhen Institutet duke i shndërruar ato në njësi kërkimore, që sipas nenit 19 të ligjit për Akademinë e Shkencave, janë ose njësi dyvjeçare ose afatgjata, pra me kohë të kufizuar.

4. Vendosjen nën kontroll të dijes akademike në lëmejt e albanologjisë, pasiqë struktura organizative e Akademisë së Shkencave të Shqipërisë (ASHSH), është krejtësisht e centralizuar në duar të Kryesisë së Akademisë së Shkencave.

5. Ndërpret karrierën e afro 100 studiueve, pasiqë Ligji për Akademinë e Shkencave, nr. 53, 2019 nuk parashikon në asnjë klauzolë as procedurën e punësimit në Akademinë e Shkencave, e jo më vijimin e karrierës akademike.

6. Ndërpret studimet doktorale të studentëve pranë ASA-s.

7. Referimi te neni 19, është i pabazë kur bëhet me propozim nga MAS, pasi ky nen nuk parashikon të merret si referencë ligjore nga një institucion jashtë Akademisë së Shkencave.

Sa më sipër, konstatojmë se ky Projektvendim shkel rëndë Ligjin nr. 80, për Arsimin e Lartë dhe Kërkimin Shkencor në Shqipëri, si dhe vetë Ligjin për Akademinë e Shkencave, nr. 53, 2019. Shkel parimet e lirisë akademike, shkakton një akt të rëndë antikombëtar duke shuar Akademinë e Studimeve Albanologjike e bashkë me to dhe institutet pjesë përbërëse të saj.

Senati i Akademisë së Studimeve Albanologjike

Frank Shkreli merr titullin ‘Qytetar Nderi’ i Malësisë së Madhe

by

Nga Gazeta Telegraf/

Ish Drejtori i VOA-a për Euro-Azinë,Frank Shkreli me rastin e pranimit të Dekoratës, “Qytetar Nderi” i Malësisë së Madhe: Vlerat morale e kombëtare që e kanë shoqëruar gjithmonë Malësinë e Madhe dhe Kombin shqiptar.

“Shqiptarët kurrë nuk kanë qenë më të lirë se sot. Jemi këtu në Kryeqendrën e Malësisë së Madhe në Koplik si dikur të parët tanë, “në log të Kuvendit. Anëtarë partish të ndryshme ndoshta, por edhe si malësorë që mendojmë e ndiejmë së bashku për një të ardhme më të lumtur për këto troje kreshnike, plot vlera e atdhedashuri.”
Mes miqve, kolegëve, qytetarëve të Malësisë së Madhe dhe shumë dashamirësve, u zhvillua ceremonia e dhënies së titullit “Qytetar Nderi” e ish- Drejtorit të VOA, Frank Shkreli. Këshilli i Bashkisë së Malësisë së Madhe i akordoi titullin “Qytetar Nderi” me motivacionin: Për vlerat e larta në fushën e gazetarisë, kontributin me shkrimet e tij për t’i bërë jehonë çështjes kombëtare.

Kryetari i Bashkisë “Malësi e Madhe”, Tonin Marinaj, tha gjatë ceremonisë se, vlerësimi për Frank Shkrelin si Qytetar Nderi është vazhdim i përpjekjeve për të vlerësuar figurat më në zë të Malësisë, të cilët kanë dhënë kontribut të shquar për lartësimin e emrit të Malësisë së Madhe, kulturës, traditave dhe atdhetarizmit të kësaj treve.

“Telegraf” zbardh fjalën e Frank Shkelit i cili e nisi me një falenderim për të pranishmit.

Zotni Tonin Marinaj, Kryetar i Bashkisë Malësi e Madhe, anëtarë të Këshillit Bashkiak, miq, dashamirës e kolegë, zonja e zotërinj mirë se u kam gjetë këtu në Malësi të Madhe. Jam thellësisht i kënaqur që jam në mesin tuaj. Ju falënderoj për pjesëmarrjen.

Plot emocione sa herë që vizitoj Shqipërinë! Sot jam këtu në kryeqendrën e Malësisë së Madhe me përvujtëni dhe me një përkushtim mirënjohjeje, për vendimin tuaj vëllazëror, fisnik e bujar për të më nderuar me titullin prestigjoz, “Qytetar Nderi i Malësisë së Madhe”.

Ndonëse më shumë se një gjysëm shekulli në Shtetet e Bashkuara të Amerikës, sot e ndiej veten më shumë se kurrë më parë, siç është shprehur me një rast edhe poeti e shkrimtari i madh i këtyre anëve, Martin Camaj se: “Unë jam i juaji, e ju jeni të mijtë.”

Baba e Gjysh nga Shkreli, Nënën nga Vermoshi! Megjithëse larg jush, atje përtej oqeanit në Amerikën e madhe e të bekuar: Për mua, Malësia E Madhe -me të gjitha të mirat dhe vlerat e saj shekullore ka qenë gjithmonë dhe vazhdon të jetë qendra e universit tim e ekzistencës dhe identitetit tim prej malësori! Si i tillë, me sinqeritetin më të madh dhe me mirënjohjen më të thellë e pranoj këtë nderim prej jush – në emër të Malësisë së Madhe – trollit tonë të përbashkët.

Pasi ky titull me jepet, pjesërisht, për punën time 30-vjeçare në Zërin e Amerikës, e pranoj dekoratën edhe në shenjë kujtimi për ish-kolegët e mi, me të cilët kam punuar në Zërin e Amerikës për dekada… Sidomos, në kujtim të atyre kolegëve, që nuk jetojnë më, e të cilët nuk patën fatin të shihnin shembjen e komunizmit barbar të Enver Hoxhës në këtë vend dhe çlirimin e Kosovës, as lirinë dhe Pavarësinë, që gëzon sot Dardania.

Shqiptarët kurrë nuk kanë qenë më të lirë se sot. Jemi këtu në Kryeqendrën e Malësisë së Madhe në Koplik si dikur të parët tanë, -“në log të Kuvendit” – shokë e miq! Ndoshta edhe kundërshtarë politikë, por jo armiq. Anëtarë partish të ndryshme ndoshta, por edhe si malësorë që mendojmë e ndiejmë së bashku për një të ardhme më të lumtur për këto troje kreshnike, plot vlera e atdhedashuri.

Me mendime të ndryshme, por me qëllime të përbashkëta. Sepse objektivat e përbashkëta jetësore, në interes madhor të Kombit, nuk duhet të njohin parti as armiqësi. Se mbi çdo interes partiak e personal, duhet të jetë gjithmonë interesi kombëtar i Shqipërisë, i Malësisë së Madhe dhe i mbarë Kombit shqiptar. Kështu mendonin të parët tanë malësorë!

Të gjithë jemi të vetëdijshëm për sfidat me të cilat përballet sot Shqipëria, Malësia e Madhe dhe mbarë Kombi shqiptar për shkak të rrethanave fatmjera shekullore, por është ndihma e të Madhit Zot, vlerat morale e kombëtare që e kanë shoqëruar gjithmonë Malësinë e Madhe dhe Kombin shqiptar. Unë besoj me At Gjergj Fishtën se: më në fund, dhe përballë të gjitha sfidave, “Punën e Shqipnisë e ka Zoti në dorë, prandaj domosdo Shqypnija do të dalë në dritë…Zoti ka me e mbajtë Shqypninë më kambë, me nderë e me lumni.”

Le të shpresojmë që shqiptarët të jenë bartës të denjë të vuajtjeve, sakrificave dhe luftërave të malësorëve dhe të gjithë shqiptarëve gjatë historisë, duke jetuar sipas trinomit në bazë të cilit jetonin dhe vepronin të parët tanë malësorë: besa- nderi – burrënia, të bindur se këto vlera bazë janë edhe udhëzimi drejt një jetese të ndershme, të kënaqshme të drejtë e të begatë për të gjithë Kombin. Bazuar në këto vlera, duhet të jemi të vetëdijshëm se Kombi shqiptar ka nevojë urgjente për një kthesë të re historike!

Shpresoj dhe lutem gjithashtu që liria që gëzojnë sot shqiptarët, anë e mbanë trojeve tona, të çojë në një përmirësim të gjithanshëm të jetës politike dhe ekonomike. Mbi të gjitha, është i nevojshëm një diskurs më i denjë politik dhe shoqëror për zgjidhjen e sfidave për një jetë më të lumtur dhe më të begatë për Shqipërinë, për Malësinë e Madhe dhe për të gjithë shqiptarët.

Në këtë udhëtim të shenjtë, drejt një jete më të mirë, për të gjithë dhe pa dallim ju uroj së bashku me Fan Nolin: “Paçi uratën e Perëndisë”.

Falënderimet e mia më të përzemërta, Kryetar Tonin Marinaj dhe Këshillit të Bashkisë Malësi e Madhe për dekoratën dhe për këtë pritje vëllazërore.

Qofshi gjithmonë me faqe të bardhë!

*Në fund, desha të them dy tre fjalë për Kryetarin e Bashkisë, Zotin Marinaj dhe për fushatën mbresëlënëse që zhvilloi. Një frymë e re në politikën shqiptare se si duhet të zhvillohet një fushatë, duke u përqendruar në sfidat me të cilat përballet elektorati dhe në zgjidhjen e tyre. Dihet se politika shqiptare është një sport i kategorisë së rëndë. Por më ka lënë përshtypje fushata e Zotit Marinaj, një fushatë pa ofendime e sharje ndaj kundërshtarëve politikë. Për këtë ju përshëndes Zotni Kryetar dhe uroj që të jetë një shembull i zhvillimit të fushatave të ardhshme këtu në Malësinë e Madhe dhe përtej.

Ndërkaq, më lejoni të falënderoj poetin dhe shkrimtarin tonë të njohur e të dashur në Amerikë dhe në mbarë botën, Profesor Gjekë Marinaj, i cili ka marrë iniciativën për të më propozuar për këtë dekoratë dhe universitetin ku ai punon. Nuk di se sa e ndjekni ju punën dhe veprimtarinë e tij, por Gjeka na bën krenarë. Ne këtu që e njohim, por edhe Malësinë e Madhe dhe mbarë shqiptarizmën. E përshëndes dhe i uroj shëndet dhe bekimet e Zotit, në jetë dhe në punë!

ME MOTIVACIONIN: FRANK SHKRELI –

“Për vlerat e larta në fushën e gazetarisë, sidomos tek media më e njohur e ndërkombëtare, Zëri i Amerikës, VOA. Publicist, që me shkrimet e tij i ka bërë dhe i bën jehonë çështjes kombëtare duke qenë faktor shumë i rëndësishëm i komunitetit shqiptar në Amerikë, si dhe për rolin në lidhjet ndërkulturore mes shqiptarëve dhe popullit të vet kudo nëpër botë duke forcuar vazhdimisht kontributin e tij atdhetar në lartësimin e trevës tonë — Malësi e Madhe dhe më gjërë.”

Frank Shkreli – Biografi e shkurtër

Frank Shkreli, fillimisht, ka qenë gazetar dhe redaktor në “Zërin e Amerikës”, seksioni shqip nga viti 1974 deri në vitin 1984. Më pas po tek “Zëri i Amerikës”, Shkreli ka qenë shef i seksionit shqip (1984-1986). Nga viti 1985 deri në vitin 1990 ka shërbyer këshilltar i lartë programacioni në Divizionin Europian të “Zërit të Amerikës”. Ju kujtojmë që në këtë periudhë, duhej punuar në kushtet e Luftës së Ftohtë. Nga viti 1990 deri në vitin 1994 ka qenë zëvendës drejtor i Euroazisë në “Zërin e Amerikës”, ent ku përfshihej edhe Bashkimi Sovjetik, që ndërkohë u shpërbë. Nga viti 1994 deri në vitin 2003, zoti Shkreli ka qenë drejtor i Divizionit Europian të “Zërit të Amerikës”, një ent nga i cili, përveç pothuaj 20-gjuhëve të ndryshme evropiane, varej, veç të tjerash edhe seksioni shqip i kësaj radioje të financuar nga qeveria federale e Shteteve të Bashkuara.

Frank Shkreli ka qenë anëtar i delegacionit të parë diplomatik amerikan në Shqipëri në mars/prill të vitit 1991, me rastin e hapjes të ambasadës amerikane, ndërkohë që u hodhën hapat e parë të rivendosjes së marrëdhënieve amerikano-shqiptare pas pothuaj 50-vjetësh. Mori pjesë si vëzhgues në zgjedhjet e para pluraliste të atij viti, në atë vend. Ai ka vizituar shpesh Shqipërinë dhe Kosovën si pjesë e delegacioneve të ndryshme të Shteteve të Bashkuara, qëllimi i të cilave ishte përforcimi i mëtejshëm i marrëdhënieve të ngushta dhe miqësore midis popullit amerikan dhe Kombit shqiptar.

Pas daljes në pension nga detyra qeveritare, pas 30-vjetësh, z. Frank Shkreli ka shërbyer si drejtor i Këshillit Kombëtar Shqiptaro-Amerikan: një organizatë jo-qeveritare që punonte për mbrojtjen e interesave të shqiptarëve në Shtetet e Bashkuara të Amerikës si dhe për promovimin e paqës dhe zhvillimit ekonomik në trojet shqiptare në Ballkan, e vetmja organizatë shqiptare lobiste me prezencë në Uashington DC, në atë kohë. Vazhdon të merret me publicistikë, ndërkohë që shkrimet, komentet dhe analizat e tij botohen dhe lexohen në dyzina gazeta dhe portale interneti, në të gjitha trojet shqiptare dhe në diasporë.

Gjatë karierës së tij, Shkreli është dekoruar, herë pas here, për punën e tij 30-vjeçare në Zërin e Amerikës. Presidenti i Republikës së Shqipërisë, Bujar Nishani i ka akorduar titullin: “Kalorës i Urdhërit të Skënderbeut”, me motivacionin “Në vlerësim të veprimtarisë së tij të shquar atdhetare”. Komuna Shkreli i ka dhënë titullin, “Qytetar Nderi”! për përkushtimin dhe atdhetarizmin me të cilin punoi për mbrojtjen e të drejtave të shqiptarëve kudo që ata jetojnë, për lartësimin e traditave të Malësisë dhe të Kombit Shqiptar dhe për frymën e përçuar nga Zëri i Amerikës duke frymëzuar bashkëkombasit në përpjekjet e tyre për shembjen e komunizmit dhe ndërtimit të Denokracisë. Ndër të tjera dekorata, qyteti i Nju Jorkut i ka akorduar dekoratën me motivacionin, “Për shërbimet shembullore ndaj komunitetit shqiptaro-amerikan, nëpërmjet arritjeve unike personale dhe të veprimtarisë së tij profesionale…” Ndërsa Shoqata Shqiptaro-Amerikane, Skënderbej Inc ka shprehur mirënjohjen e saj për Shkrelin me dekoratën për punën dhe veprimtarinë e tij shumë vjeçare në, “promovimin me atdhedashuri të vlerave të lirisë e demokracisë.”