Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for June 2023

Shkolla Shqipe në Boston, piknik për të festuar përfundimin e vitit shkollor 22-23

by

Shkolla Shqipe Boston/

Shkolla Shqipe në Boston organizoi në datën 11 Qershor 2023 një piknik për të festuar përfundimin me sukses të vitit shkollor 22/23. Ky aktivitet u zhvillua në parkun e bukur të Houghton Pond në Milton MA. Ky park i madh dhe i gjelbert me pemë, liqen dhe sheshe lojërash ofroi një ambient argëtues për të gjithë nxënësit dhe familjarët e tyre për të luajtuar e biseduar dhe në shijimin e gatimeve tradicionale. Atmosfera e piknikut ishte e gëzuar dhe relaksuese. Për kënaqësinë e të gjithë prindërve dhe të familjarëve të tyre, nxënësit e Shkollës Shqipe kishin përgatitur një program të shkurtër me vjersha dhe këngë kushtuar festës (mbarimit) të Abetares. Më pas të gjithë u arkëtuan me praninë e një magjistari i cili magjepsi fëmijët me numrat e tij magjikë. Gjithashtu dora e një artisteje pikturoi fytyrat e bukura të fëmijëve me karakteret e tyre më të te preferuara.

Fëmijëve iu shpërndanë dhe certifikatat e përfundimit me sukses të programit të abetares, të valles si dhe të klasës së parashkollorëve.

Pikniku ishte një aktivitet i bukur që na ndihmoi të kalonim disa orë të këndshme në praninë e nxënësve, familjarëve dhe komunitetit shqiptar në Boston, dhe një mundësi për të krijuar kujtime të paharrueshme dhe shoqëri të reja mes nxënësve.

“HISTORIA, IDENTITETI DHE KULTURA SHQIPTARE”

by

Prof. Teki Kurti/

Aktivitet madhështor i organizuar nga Lidhja e Arsimtarëve dhe Prindërve Shqiptar” Naim Frashëri” Aargau- Zvicër (LAPSH). Në Zvicër janë mbi 300.000 mijë shqiptarë. LAPSH-i ka vite që është angazhuar për hapjen e shkollave suplimentare të mësimit të gjuhës shqipe. Në përfundim të vitit mësimor, LAPSH-i organizoi një Tryezë shkencore me temë: “HISTORIA, IDENTITETI DHE KULTURA SHQIPTARE”. Tryezën e hapi me fjalën përshëndetëse Kryetari i LAPSH-it Riza Demaj, gjithashtu përshëndeti Ambasadori i Republikës së Kosovës në Zvicër z. Sami Ukelli dhe Sekretari i Parë i Ambasadës së Republikës së Shqipërisë Valon Gashi. Tryezën shkencore e hapi Akademik Frashër Demaj nga Akademia e Shkencave dhe Arteve të Kosovës ku trajtoi temën: “Historia dhe Identiteti”. Prof. Dr. Zymer Neziri trajtoi temën : “Etnokultura dhe identiteti ynë: Vështrim për rolin e epikës historike”. Nga Tirana, Prof. Asoc. Dr. Teki Kurti trajtoi temën: “Munomentet kulturore-historike, simbole të identitetit kombëtar”. Nga Universiteti i Tetovës, Prof. Zeqirja Rexhepi trajtoi temën: “Shqiptarët midis integrimit eropian dhe bashkimit kombëtar”. Prof. Binak Ulaj trajtoi temën : “Gjuha etnike dhe identiteti kombëtar” dhe Prof. Hasan Hasani trajtoi temën: “Kosova Lindore pjesë e pandarë e historisë kombëtare shqiptare”. Ditën e dytë e morën fjalën nxënësit e shkollës shqipe. Emocione të fuqishme, ata të veshur bukur me kostume kombëtare nga prindërit e tyre e të përgatitur mirë nga mësuesit sollën me interpretimet e tyre vargje nga Naim Frashëri, Pashko Vasa, Gjergj Fishta, Migjeni, Fan Noli, Ndre Mjeda, etj. Vallja e grupit “Shota”,e këngët e bukura shqipe e bënë aktivitetin elektrizues. Përgjatë dy ditëve mbetëm plot mbresa të pashlyera pasi përkujdesi në detaje ndaj nesh nga Visari familiarisht, Naimi, Rexhepi, Bajrami e Daj Riza ishte i jashtëzakonshëm. Faleminderit të gjithëve.

Aaragu – Zvicër 24-25. 06.2023

#SiSot, më 27 qershor 1944, nisi akti i fundit i tragjedisë së shqiptarëve të Çamërisë

by

Drejtoria e Përgjithshme e Arkivave/

Forcat greke garantuan se në rast të dorëzimit të armëve asgjë e keqe nuk do t’u ndodhte shqiptarëve të Çamërisë, gjatë takimit që patën me myftiun, kryetarin e këshillit të bashkisë dhe drejtorin e arsimit të Paramithisë. Me arritjen e këtij pakti verbal, premtimi jo vetëm që nuk u mbajt nga forcat zerviste, por menjëherë pas mbërritjes në qytet, ata masakruan mbi 200 shqiptarë të Çamërisë. Kështu, masakra mbi popullsinë e pambrojtur vazhdoi për ditë me radhë. Gjatë sulmit mbi popullsinë civile, u dëbuan mbi 30 mijë shqiptarë myslimanë dhe u vranë mbi 3 mijë të tjerë. Ndërkaq, poullsia shqiptare ortodokse e Çamërisë u vendos nën terror për të mohuar identitetin duke vrarë parinë e saj e duke i lënë të varur në mes të qytetit për më shumë se tre ditë. Prej vitit 1994, shteti shqiptar e njeh këtë datë si “dita e genocidit ndaj shqiptarëve të Çamërisë nga forcat shoviniste greke”.

Më poshtë, një imazh nga eksodi i popullsisë çame pas vitit 1944, si edhe dokumenti i memorandumit të Komitetit Antifashist të Emigrantëve Çamë drejtuar Asamblesë së Përgjithshme të OKB-së më 25 shtator 1946.

#ArkivatFrymëzojnë

#ArkivatKujtojnë

#Çamëria

#AQSH

#FototekaAQSH

Trashëgimtar

by

Astrit Lulushi/

Kur vdiq, Aleksandri i Madh kishte vetëm një djalë, por nuk e la trashëgimtar. Pse? Në kohët e lashta, mosha e zakonshme për një burrë për t’u martuar ishte 30 vjeç. Sigurisht që një mbret mund të martohej edhe më herët nëse i duhej të nënshkruante një aleancë politikisht të rëndësishme. Aleksandri u martua me Roksanën në vitin 327 pes, kur ishte 29 vjeç, paksa nën moshën e zakonshme të martesës. Kjo sepse në atë moment ai ishte i përshtatshëm të martohej me një vajzë të një sundimtari lokal që do t’i siguronte kontrollin e tij mbi një vend të padisiplinuar. Aleksandri ishte gjithmonë në lëvizje, duke bërë fushatë, kështu që nuk kishte shumë kohë për të jetuar një jetë familjare. Megjithatë u martua me 2 zonja të tjera, kur ishte 32 vjeç. Ai i la 2 gratë e tij shtatzënë dhe pati 2 fëmijë. Njëri prej tyre, i Roksanës ishte djalë, kështu që Aleksandri do të kishte trashëgimtarin e tij. Tjetri, dyshohet se u vra nga Roksana, kështu që Aleksandri përfundoi me vetëm 1 fëmijë, kur vdiq në moshën 33 vjeçare.

Mendohet se në atë kohë, mosha mesatare e jetesës ishte 40 vjeç – mund të duket e ulët, por kjo ndodhte për shkak se shumë foshnja vdisnin në lindje, burra vriteshin në luftë etj. Deri në moshën 30 vjeçare njerëzit, të paktën shtresat e larta, ende arsimoheshin dhe përgatiteshin për jetën dhe biznesin e tyre publik. Platoni, rreth të 20-ve, ishte student i Sokratit në moshën 71-vjeçare.

Aleksandri nuk i tha askujt në mënyrë specifike që t’i jepte fronin djalit të tij. Ai ishte duke u përgatitur të nisej në ekspeditë kundër Arabisë, një ditë para vdekjes së tij. Babai i Aleksandrit, Filipi II, ishte bërë me gra në mesin e të 40-ve dhe kishte fëmijë. Filipi nuk e konsideronte veten të moshuar. Aleksandri do të bënte të njëjtën gjë, po të kishte jetuar më gjatë. Në moshën 32 vjeç, ai kishte 3 gra dhe 2 prej tyre ishin shtatzënë. Filipi nuk kishte përparësi për të nxjerrë një trashëgimtar. Ai e përdorte Aleksandrin sepse ishte djalë shumë i talentuar, ndërsa e shtyu mënjanë djalin tjetër, Arrideus, sepse nuk ishte i përshtatshëm për fron.. Siç shkruan Plutarku në kapitullin “Jeta e Aleksandrit”:

Grindja më e hapur u shkaktua nga Attalus në martesën e Kleopatrës, një vajzë të cilën Filipi po e merrte për grua, pasi kishte rënë në dashuri. Attalus, tani, ishte xhaxhai i vajzës, dhe mes të pirave u bëri thirrje maqedonasve të kërkonin nga perënditë që nga Filipi dhe Kleopatra të mund të lindte një pasardhës legjitim i mbretërisë. Në këtë rast Aleksandri u zemërua dhe tha: “Por unë ç’jam?”

Vetë Filipi II mori fronin nga nipi i tij, Amyntas IV. Pra, marrja e fronit të Maqedonisë nuk ndiqte saktësisht një rregull të rreptë që një djalë të trashëgonte fronin e të atit. Ai duhej ta meritonte. Ishte një lojë fronesh. Fëmijët do të vriteshin gjithsesi. Prandaj, vetë Aleksandri me fjalët e tij të fundit i dha unazën e tij mbretërore “më të fortit”, duke parashikuar se do të kishte një luftë midis lojtarëve që do të luftonin për fronin. Djali i tij i vetëm, Aleksandri IV, u vra para se të arrinte moshën madhore – edhe nëse Aleksandri do t’ia kishte lënë fronin, princi do të ishte shumë i ri për të mbijetuar mes gjeneralëve ambicioz dhe të fuqishëm, siç e tregoi koha.

Vuçiq, kuptoje se Albin Kurti i Prishtinës nuk është antar i “Klubit Politik të Zemunit” të Beogradit

by

Nga Ramiz LUSHAJ – Tropojë

1.

Aleksandër Vuçiq, ti vërtet ke lindur në muajin mars, sikurse dhe Kurti, po dije se qëndrimet e veprimet tuaja për Lirinë, Pavarësinë e Shtetësinë e Kosovës, krahasimuar me Kurtin, janë me vitedritë larg, aq sa ç’janë Toka me planetin Mars.

Vuçiq, ju vërtetë jeni nja 5 vite moshe ma i madh se Kurti, po ju keni mbetur me shekuj jete larg, tek shek. XIV, bash tek Beteja e Fushë-Dardanisë, tek miti i fabrikuem e i rrejshëm serb për Kosovën.

Vuçiq, ju keni mbetë një vidovdanist sllav i përjetshëm, edhe kur shkoni në bisedime-dialog-negociata për Kosovën në Bruksel, Uashington, Ohër e kudo tjetër, edhe teksa flisni dhe veproni si “Dorë e Zezë” e Serbisë për ngjarjet në veri të Kosovës.

2.

Vuçiq, ju e njihni fort mirë komunën e Zemunit, sepse aty kreve dhe gjimnazin. Njëri “Klan i Zemunit” ishte një klan mafioz, kriminal, me mbi 10 mijë antarë, i lidhur me “Beretat e Kuqe” dhe “Tigrat e Arkanit”, të cilët vranë dhe kryeministrin serb Gjingjiq (2003).

Tjetri “Klan i Zemunit” ishte klani politik, që në most e dy klaneve, këtij politikut i përket me patjetër.

3.

Vuçiq, ju prej vitit 1993 jeni pjesë e “Klanit politik të Zemunit” në politikën sllave e ballkanike, sepse partia jote e parë e antarësimit politik ishte Partia Radikale Serbe (SRS), e themeluar në komunën Zemun të Beogradit, nga ish Presidenti yt, Nikoliq (2012-’17), ndërkohë që ti ishe Kryeministër i Serbisë (2014-’17), Zv/Kryeministër i Parë i Serbisë (2012-’14), Ministër i Mbrojtjes së Serbisë (2012-’13). Bashkëthemelues i kësaj partie SRS ishte dhe Vojisllav Sheshel- ish kryetari i komunës së Zemunit (1996-’98), ish Zv/Kryeministër i Serbisë (1998-2000) dhe Kryetar aktual i kësaj partie.

Vuçiq, kjo partia jote, SRS-Partia Radikale Serbe, e themeluar në Zemun të Beogradit, në ideologji e veprimtari, ishte vazhdimësi e Partisë Partisë Popullore Radikale Serbe të Pashiqit, ish Kryeministrit të Serbisë e Jugosllavisë, një nga antishqiptarët më të egër, gjakatar, genocidial, në historinë e kësaj toke e bote të derisotme.

5.

Vuçiq, ju si pjesë e “Klanit politik të Zemunit” të Beogradit, si vazhdim përditshmërie i Pashiqit, e bashkëthemeluet me Nikoliçin- partinë tjetër të re, me emër të ri e ideologji të vjetër serbe, Partinë Përparimtare Serbe (SNS, viti 2008). Ju ishit kryetar i kësaj partie (SNS) deri në maj 2023.

Po kush është nënkryetar i saj: Marko Gjuriq, stërnipi i Pashiqit, fakt e faktor tjetër i vazhdimësisë së Pashiqizmit sllav të platformave politike e genocidiale për “Serbinë e Madhe”.

Kjo tregon dhe nostalgjinë politike e lidhjet genetike të partisë tuaj me Pashiqin, sikurse me Millosheviçin e me Nikoliqin.

Ky Marko Gjyriqi yt, për lavdinë serbe e fatkeqësinë shqiptare është Ambasador i Serbisë në Shtetet e Bashkuara në Uashington D.C. dhe, para kësaj, ishte Drejtor i Zyrës Serbe për Kosovën në Beograd.

6.

Vuçiq, ju duhet ta kuptoni një herë e mirë dhe përgjithmonë, se nuk është dhe as nuk mundeni ta bani Kryeministrin e Kosovës, Albin Kurtin e Prishtinës, një antar politik të “Klanit Politik të Zemunit të Beogradit”!