Archives for February 2024

Filmi dokumentar Bekim Fehmiu, legjenda shqiptare e artit hollivudian u shfaq në Manhattan, në zemer të botës

February 19, 2024 by s p

Nga Keze Kozeta Zylo/

Dokumentari artistik rreth jetës dhe veprës së jashtëzakonshme të aktorit hollivudian me regjisor Valmir Tertini u shfaq në Manhattan në “Producer Club” me pronar Alfred Tollja për të cilin më duhet të theksoj se vazhdimisht e ka mbështetur artin dhe kulturën shqiptare.

Shfaqja e filmit dokumentar në zemër të botës në Manhattan u bë në saje të bashkëpunimit të TV “Alba Life” me themelues dhe producent z. Qemal Zylo, Shoqatës Shqiptaro Amerikane “Skënderbej” Inc. nën kujdesin e z. Fation Zogiani, Bashkim Shehu anëtarë të bordit me president të Shoqatës z. Mark Qehaja dhe kryetar z. Gëzim Lamcaj, organizator dhe moderator artistin dhe regjisorin Diar Xani anëtar i kryesisë, etj.

Në flyer ishin publikuar sponsorët si TV “Alba Life”, Shoaqata Shqiptaro Amerikane “Skenderbej” Inc., gjeneral Asllan Bushati, Z. Agim Aliçkaj, BrightSide Adult Center, Sergios Restorante, Paesano of Mulberry Street etj.

Veprimtarë të çështjes kombëtare, artistë, biznesmenë, personalitete të larta, diplomatë, zunë vendet për të pare dokumentarin rreth Legjendës së artit shqiptarin e madh Bekim Fehmiu.

Në hyrje mirëprisnin artistët e njohur si Arens Leka etj. Para fillimit të shfaqjes së dokumentarit z. Diar Xani përshëndeti të pranishmit dhe iu uroi atyre: “Gëzuar Ditën e Pavarësisë së Kosovës” dhe ndihej krenar që ky dokumentar shfaqej në këtë ditë të shenjtë të Kosovës. Diplomati dhe Konsulli i Kosovës në Manhattan z. Fatmir Zajmi në emër të Konsullatës së Përgjithshme përshëndeti të pranishmit, regjisorin Valmir Tartini dhe iu uroi Ditën e Pavarësisë. Regjisori Valmir Tertini ardhur enkas për këtë ditë nga Shqipëria së bashku me bashkëshorten e tij simpatike u mirëprit me duartrokitje nga artdashësit dhe i falënderoi ata për pjesëmarrjen për të ndjekur së bashku dokumentarin Bekim Fehmiu me skenar nga gazetari Fahri Musliu. Ai falënderoi Qendrën Kombëtare të Kinematografisë Shqiptare për financimin për të realizuar këtë dokumentar artistik.

Në ekran u shaq Dokumentari i plotë i cili dhimbshëm dhe trishtueshëm nëpërmjet bashkëshortes së tij Branka Petriç Fehmiu solli përjetimet emocionale rreth vdekjes tragjike.

Tek sa shihja dhe dëgjoja Brankën në ekran kujtoja lajmet që u dhanë atë vit në mediet shqiptare dhe botërore se si Bekim Fehmiu u gjet i vdekur në banesën e tij në Zvezdar, Beograd, ndërsa Ministri i Brendshëm serb Ivica Dacic tha se dyshohet për vetëvrasje, pasi të shtënat kanë ardhur nga arma e zjarrit tip pistoletë e regjistruar në emër të tij, Ai vdiq ne moshen 74-vjeçare.

Vëllai i tij plot fisnikëri dhe kulturë, atdhetari Arsim Fehmiu tregoi për historinë e familjes, saga e familjes Fehmiu, një narrativë e shkëlqyer sjellë nga skenaristi Fahri Musliu.

Në ekran të rrëmbente magjia e roleve te tij me artistë të jashtëzakonshem nga rolet dramatike deri në rolet artistike intime me artisten botërore Klaudia Kardinale etj. si dhe vlerësimet nga artistë të mëdhenj të Kombit si Roza Anagnosit, Timo Flloko, Piro Milkani, Enver Petrovci, Goran Markoviç etj.

Ai mbeti ndër të vetmit aktorë shqiptar i cili arriti të luajë në filma dhe seritë më të njohura botërore, sikurse në serinë “Odiseu”, filmat: Aventurierët”, “Rruga”, “Vitet e nxehta”, “Dezertori”, etj.

Pas shfaqjes TV “Alba Life” me të drejtën ekzkluzive të këtij promovimi mori disa intervista si me regjisorin e dokumentarit Valmir Tertini i cili ndërmjet të tjerash tha: se ai ishte frymëzuar nga libri i Fahri Musliut, i cili është nje gazetar i mirënjohur, korrespondent shumëvjeçar i Rilindjes dhe medieve të tjera të Prishtinës nga Beogradi.

Ne punuam fort per ta sjelle këtëdokumentar në publikun shiqptar dhe botëror rreth jetës së ikonës së kinematografisë botërore Bekim Fehmiut. U takuam me bashkëshorten e tij Brankën, vëllain, hulumtuam nëpër arshiva të ndryshme. Ai luajti disa role të mëdha filmi “Mbledhësit e puplave”, i nominuar edhe për “Oskar”, mori famë të madhe, kurse seriali televiziv “Odiseu” (1968) e ngjiti në piedestal duke e quajtur Aktor Homerik dhe duke u vlerësuar nga personalitetet më të fuqishme të artit.

Regjisori Tertini me origjinë nga Kosova tregoi shkurtimisht dhe për jetën e tij dhe si eci drejt rrugës së artit. Valmir Tertini është fitues i disa çmimeve të rëndësishme ndërkombëtare për filmat e tij. Ai ka lindur në Gjakovë, më 26 prill 1993.

Ai tha se ka projekte të tjera për të realizuar dhe po punon për t’i përfunduar.

Para kamerave të TV “Alba Life” u ftuan dhe artistët e shquar si Blerim Gjoci ardhur nga Los Angelo,s Hollivud, i cili tha se e kishte takuar ditë me radhë Bekim Fehmiun dhe kishte pirë kafe me të. Unë frymëzohesha nga madhështia e tij si shqiptar, nga idetë e tij, nga mësimet e tij. Jam krenar që e kam njohur nga afër dhe tejet krenar që shqiptari ynë nga Kosova arriti majat më të larta të artit botëror.

Aktori i mirënjohur Luan Bexheti falënderoi regjisorin Tertini për këtë dokumentar të arrirë dhe solli kujtime me Bekim Fehmiun dhe djalin e tij Uliskin. Ai kishte luajtur filma me të birin dhe tha se Uliski ishte shumë shqiptar në shpirt dhe zemër. Luan Bexheti është i vetmi aktor shqiptar që është përfshirë në antologjinë për aktorë “Actor`s Handbook”, shkruar nga Sherry Eaker.

Artisti tjetër plot perspektivë Shpend Xani solli kujtimet e tij dhe frymëzimin që ka marrë nga legjenda Bekim Fehmiu. Ne kemi mësuar për rolet e tij në Universitet dhe pohoj se Bekim Fehmiu në kinematografi dhe Aleksandër Moisiu në teatër janë dy gjenitë e artit shqiptar që deri më sot nuk ka arritur asnjë artist shqiptar.

Artsti dhe regjisori Diar Xani si organizator pohoi para kamerave se ndjehej krenar që ky film dokumentar u shfaq në “Producer Club” dhe do të vazhdojë më tej për projektet e tij të radhës.

Fation Zogejani si një ndër organizatorët tha për punën dhe përkushtimin që u bë për ta promovuar dokumentarin artistin e madh Bekim Fehmiu, në 16-të Vjetorin e Pavarësisë së Kosovës. Ai shprehu dhe keqardhjen e madhe, pengun e shqiptarëve që Bekim Fehmiut nuk i ishte dhënë mundësia për luajtjen në ndonjë film shqiptar.

Së shpejti TV “Alba Life” me kameraman anëtarin e stafit, gazetarin e mirënjohur nga Kosova Valon Gërbeshi do të sjellin kronikën e realizuar enkas për këtë ditë të shënuar të promovimit të dokumentarit Bekim Fehmiu për ta transmetuar në kanalet televizive.

Aktrimi nga legjenda Bekim Fehmiu

Rolet e tij sipas Wikipedias jane: në “Prova speciale”, “Odiseja”, “Aventurieri”, “Rruga”, “Vitet e nxehta”, “Dezertori”, përmenden si kryevepra. Nga filmat e para ka qenë “Ko puca otvorice mu se”, “Vitet e nxehta”, “Protesta”, “Eskadrionet e partizanëve” dhe “Të kuq dhe të zinjë”. Ai ka bashkëpunuar me John Huston, Olivia de Havilland, Ava Gardner, Robert Show, Dirk Bogart, Sharl Aznavur, Irene Papas, Claudia Cardinale etj. Ka interpretuar në shqip, sërbisht, maqedonisht, turqisht, në gjuhën rome, në spanjisht, anglisht, frëngjisht dhe italisht.

Bekim Fehmiu është një nga artistët më të mëdhenj shqiptarë. Nga viti 1987, kur në mënyrë demonstrative braktisi shfaqjen “Madame Kolontine” të Anete Playel, ku luante Leninin dhe Stalinin, në teatrin jugosllav të dramës, ai i dha lamtumirën aktivitetit artistik në Jugosllavi.

Pas disa kohësh mori dhe vendimin për t’i dhënë fund karrierës edhe në aktivitetet artistike botërore. Pak kohė më parë në Jugosllavi është botuar libri me kujtime i Bekim Fehmiut, “Shkëlqim dhe frikë”, në të cilin përshkruhet periudha që nga lindja e tij në Sarajevë, duke përfshirë gjithëçka deri në vitin 1955, kur u pranua në teatrin e dramës së Prishtinës.

17 shkurt, 2024

Manhattan, New York

Në Philadelphia valon flamuri i Republikës së Kosovës

February 19, 2024 by s p

Shqiptarët në Philadelphia organizuan ceremoninë e ngritjes solemne të flamurit të Kosovës në bashki.

Nga dr. Sadik Elshani

Fotot: Eva Dori, gazetare

Pas shpalljes së pavarësisë së shqipërisë më 28 nëntor 1912, shpallja e pavarësisë së Kosovës është ngjarja më e rëndësishme në historinë e popullit tonë. Më 1912 shqiptarët fituan një shtet të cunguar, më shumë se gjysma e trojeve tona dhe të popullsisë sonë mbetën jashtë kufijve shtetëror. Por, ëndrrat, përpjekjet mbinjerëzore të brezave të tërë të shqiptarëve nuk u shuan kurrë. Për më shumë se një shekull Kosova kaloi një kalvar të mundimshëm, duke u kanosur edhe nga zhdukja e faqës së dheut. Prandaj, shpallja e Kosovës shtet i lirë e i pavarur, i njohur nga fuqitë e mëdha e demokracitë më të përparuara të botës, është një ngjarje madhështore, shumë e gëzueshme që vështirë mund të përshkruhet me fjalë. Shkurt, në Kosovë ka ndodhur nje mrekulli, një ringjallje. Një Feniks i vërtetë, është ringjallur Dardaniia e lashtë në një shtet të ri.

Shoqata jonë, “Bijtë e shqipes”, gumëzhonte nga gëzimi në ditën që u shpall pavarësia e Kosovës më 17 shkurt 2008. Pastaj ajo vazhdimisht me shumë veprimtari e ka shënuar çdo përvjetor të pavarësisë së saj. Nga viti i kaluar kemi filluar edhe me organizimin e ngritjes së flamurit të Kosovës në bashkinë e qytetit të Philadelphias. Nuk ka vend më solemn për ta festuar pavarësinë e një vendi sesa në Philadelphia, vendlindjen e Shteteve të Bashkuara të Amerikës, ku lindi një shtet i ri dhe një epokë e re për njerëzimin. Eshtë ky një nder i jashtëzakonshëm për komunitetin tonë, Kosovën, kombin tonë – është afirmim i vlerave të përbashkëta për liri, pavarësi, paqe, drejtësi e përparim.

Në sheshin e bashkisë ishin mbledhur bashkatdhetarët e gëzuar e të qeshur për të festuar këtë Ditë të Madhe për Kosovën e kombin tonë. Mbretëronte atmosferë festive, ngazëllyese: valonin flamujt e Kosovës, kuqezi e amerikanë; jehonte kënga e vallja shqiptare, ku mbizotëronin ato me motive nga Kosova dhe ngjarjet e lavdishme të historisë së saj: “Po ku je Adem Jashari…” Në këtë ceremoni merrte pjesë edhe ambasadori i Kosovës në ShBA, z. Ilir Dugolli, i shoqëruar nga këshilltari i kësaj ambasade, z. Drilon Gashi, si dhe kapiteni Lulzim Krasniqi, atashe i Policisë së Kosovës. Merrnin pjesë ehde këshilltarët e Këshillit Bashkiak të qytetit të Philadelphias, zotërinjtë: Michael Driscol, Mark Squilla dhe Curtis, Jones Jr. Nga Zyra për Çështjet e Emigrantëve merrte pjesë z. Alain Joinville, drejtor për Komunikime Strategjike e Programe. Ishte i pranishëm edhe z. Christopher Chaplin, kryetari i Organizatës së Konsujve të Nderit në Philadelphia.

Këtë ceremoni e hapi z. Dritan Matraku, kryetar i Shoqatës Mbarëshqiptare “Bijtë e shqipes”, i cili i përshëndet të pranishmit, duke ua uruar Festën e Pavarësisë së Kosovës. Gjithashtu ai i përshëndeti dhe u dëshiroi mirëseardhjen mysafirëve të cekur më lart. Pastaj u luajtën himnet kombëtare të Amerikës dhe Kosovës. Gjatë luajtjes së himnit të Kosovës ngrihej në shtizë edhe flamuri i saj. Flamuri u ngrit nga z. Avdi Osmanollaj, 81 vjeçari nga Hasi i Prizrenit, i shoqëruar nga çifti nga Kosova, Sahadete e Lumni Shurdhiqi. është ky një nderim që shoqata u ben anëtarëve të saj të dalluar. Në emër të shoqatës “Bijtë e shqipes” përshëndeti anëtari i Këshillit Drejtues, biznismeni i ri e i suksesshëm, z. Leotrim Osmanollaj. Në fjalën e tij të përgatitur bukur z. Osmanollaj foli për rëndësinë e kësaj ngjarje të shënuar të historisë sonë, përpjekjet e sakrificat e shqiptarëve ndër vite për liri e pavarësi: “Teksa sot festojmë 16 vjet pavarësi, ne përulemi përpara gjakut dhe sakrificës së qindra mijëra grave e burrave që ndër shekuj luftuan pa kursyer edhe jetën e tyre, vetëm më një qëllim, një qëllim madhor që një ditë në Kosovë të valvitet flamuri i lirisë; që të jetojmë të lirë e të pavarur në trojet tona të lashta ilire…Liria është e shtrenjtë dhe tepër e brishtë. Edhe sot, 16 vite pas shpalljes së pavarësisë, atdheu na kërkon të jemi vigjilentë e të kujdesshëm” – u shpreh ndër të tjera z. Osmanollaj. Ai për të pranishmit solli edhe një citat nga ish-presidenti amerikan, Roland Regan: “Liria nuk është kurrë më shumë se një brez larg zhdukjes. Duhet të luftohet dhe të mbrohet.”

Këshilltarët Michael Driscoll e Mark Squilla u uruan të pranishmëve Ditën e Pavarësisë së Kosovës, duke theksuar përpjekjet dhe synimet e popujve për liri e pavarësi. U kujtuan atyre se një gjë e tillë kishte ndodhur më katër korrik 1776, vetëm disa blloqe më tutje nga ku po mbahej ceremonia e sotme. Ata cekën edhe 250 Vjetorin e Shpalljes së Pavarësisë së ShBA-ve që do të festohet në vitin 2026. Që të dy këshilltarët folën për rolin e emigrantëve në zhvillimin e Philadelphias. Ata posacërisht i vlerësuan emigrantët shqiptarë që në këtë qytet dhe anambanë Amerikës kanë sjellur talentet e tyre, vlerat familjare e njerëzore, etikën e lartë të punës e ndershmërisë. Nuk mungoi as porosia e tyre për ta ruajtur gjuhën, kulturën e traditat tona kombëtare.

Ambasadori Ilir Dugolli kishte përgatitur një fjalim të shkëlqyer, duke vlerësua lart simbolikën e mbajtjes së kësaj ceremonie pikërisht në qytetin e Philadelphias. Ai falenderoi komunitetin dhe qytetin për pritjen e ngrohtë që i ishte bërë vitin e kaluar, prandaj me shumë dëshirë kishte ardhur përsëri në mesin tonë. Zoti Dugolli në vazhdim foli për rëndësinë e kësaj dite në historinë e Kosovës, përpjekjet e shtetit e shoqërisë kosovare për t’u inkuadruar në organizata euroatlantike. Foli pastaj për vlerat e përbashkëta që ndajnë Amerika e Kosova. Gjithashtu ai shprehu mirënjohjen e falenderimet për ShBA-të dhe aleatët e saj për çlirimin e Kosovës, ruajtjen e lirisë e të pavarësisë së saj, ndihmesën e tyre të pakursyer për ndërtimin e institucioneve demokratike e zhvillimin ekonomik te shtetit të Kosovës.

Zoti Alain Joinville përshëndeti në emër të Zyrës për Çështjet e Emigrantëve (Office for Emigrant Affairs). Ai i njoftoi të pranishmit për punën që bën kjo zyrë për t’i ndihmuar emigrantët e rinj për t’u përshtatur në jetën e qytetit të Philadelphias. Po ashtu, ai e ceku se Philadelphia është qytet që i mirëpret zemërhapur emigrantët dhe ku emigrantët ndihen mire: të mirëpritur e të vlerësuar. Pastaj zoti Joinville lexoi pjesë nga Proklamata përmes së cilës kryebashkiakja Cherelle Parker e shpallte 16 shkurtin e vitit 2024, Ditën e Pavarësisë së Kosovës në Philadelphia. Një nder i madh ky për Kosovën, të gjithë shqiptarët dhe miqtë e tyre.

Me një përshëndetje të shkurtër të pranishmit i përshëndeti edhe zonjusha Dzana Badnjeviq, koordinatore për Ngjarje (events) e Projekte Speciale në Zyrën e Përfaqësuesit të Qytetit. Dzana Ka bërë edhe një punë të palodhshme për organizimin sa më të mirë të kësaj ceremonie. Ky program i ngritjes së flamujve të vendeve të origjinës së komuniteteve në Philadelphia është një program që duhet vlerësuar, sepse me ngritjen e flamurit të vendit të origjinës tënde ndihesh mirë, ndihesh i vlerësuar, i mirëseardhur për të punuar e jetuar për të rritur familjen tënde. Shoqata “Bijtë e shqipes” dhe komuniteti shqiptaro – amerikan kanë një bashkëpunim të shkëlqyer me bashkinë dhe me këtë rast ne i shprehim falenderimet tona për qytetin e Philadelphias, për Amerikën – vendin e mundësive të pa kufijshme.

Gëzuar Ditën e Pavarësisë Kosova jonë e dashur!

Philadelphia, më 16 shkurt 2024.

McGonigal dënohet me 28 muaj burg për marrjen e 225 mijë dollarëve, fshehjen e kontakteve me zyrtarët e Shqipërisë

February 19, 2024 by s p

Rafael Floqi/

Dy dënime me burg për ish-kreun e kundërzbulimit të FBI-së në Nju Jork, Charles McGonigal, i dhanë një sy të zi FBI-së.

Ish-gjuetari kryesor i spiunëve të FBI-së në Nju Jork u dënua në Uashington të premten me 28 muaj burg për fshehjen e të paktën 225,000 dollarëve në pagesa që kishte marrë nga një ish-zyrtar i inteligjencës shqiptare ndërsa punonte për këtë byro.

Charles McGonigal do të duhet të vuajë dënimin e tij në krye të një dënimi prej 50 muajsh burg që ai mori veçmas në Nju Jork vitin e kaluar për komplot të paligjshëm me një oligark rus që donte të hiqej nga lista e sanksioneve të SHBA.

McGonigal, 55 vjeç, është një nga agjentët e rangut më të lartë të FBI-së i dënuar ndonjëherë për akuza penale dhe prokurorët federalë të premten i kërkuan gjykatëses së qarkut të SHBA-së, Colleen Kollar-Kotelly, të grumbullojë dënimet pasi veterani 22-vjeçar i byrosë pranoi se kishte kryer krimin. shkeljet që ai ishte betuar të hetonte.

McGonigal ishte agjent special i ngarkuar me divizionin e kundërzbulimit të zyrës së FBI-së në Nju Jork nga viti 2016 deri në pensionimin e tij në shtator 2018. Ai pranoi se kishte fshehur nga FBI-ja marrjen e pagesave nga shqiptaro-amerikani Agron Neza, një ish-oficer i inteligjencës shqiptare dhe takimet e tij me zyrtarë të huaj, përfshirë kryeministrin e Shqipërisë Edi Rama. McGonigal tha se ai kërkoi të shmangte pyetjet në lidhje me një konflikt interesi midis detyrave të tij zyrtare dhe planeve private për të ndërtuar mundësitë e tij të biznesit pas daljes në pension në atë vend. McGonigal u akuzua veçmas për fshehjen e lidhjeve të tij me ish-zyrtarin shqiptar, një shtetas amerikan i natyralizuar që jetonte në Nju Xhersi. McGonigal ka thënë se ai mori hua 225,000 dollarë për të nisur një biznes konsulence sigurie pasi të pensionohej nga FBI. Ai nuk e ktheu kredinë. Në vitin 2017, McGonigal fluturoi në Shqipëri me bamirësin e tij dhe u takua me një ish-ministër shqiptar të energjisë dhe kryeministrin e vendit. Sipas prokurorëve, McGonigle paralajmëroi kryeministrin të shmangte dhënien e licencave për shpimin e fushës së naftës në Shqipëri për kompanitë ruse.

Ata thonë se shoqëruesi i udhëtimit të McGonigal dhe ministri i energjisë kishin aksione financiare në vendimet e qeverisë shqiptare për licencat e shpimit. McGonigal u deklarua fajtor shtatorin e kaluar për fshehjen e fakteve materiale, një akuzë e dënueshme me një dënim maksimal prej pesë vjetësh burg. Ai pranoi se nuk ka raportuar kredinë, udhëtimin e tij në Evropë me personin që i ka dhënë paratë hua apo kontaktet e tij me zyrtarë të huaj gjatë udhëtimeve. “Ai e vuri lakminë e tij mbi shërbimin ndaj vendit të tij,” tha të premten një prokurore, Elizabeth Aloi.

Në një ndjekje paralele federale në Manhattan, McGonigal pranoi më herët se kishte komplotuar për të pastruar para dhe për të shkelur sanksionet e SHBA-së që synonin të ndëshkonin miliarderin rus Oleg Deripaska, një oligark me lidhje me presidentin Vladimir Putin. Në rolin e tij në FBI, McGonigal ishte ngarkuar të hetonte Deripaska, aktakuza e të cilit për akuzat për shkelje të sanksioneve u zbulua disa muaj përpara asaj të McGonigal.

Akuzat kundër McGonigal tronditën botën e heshtur të kolegëve të tij zyrtarë të lartë të inteligjencës amerikane, duke pasur parasysh thellësinë e njohurive të tij për praktikat e spiunazhit të SHBA-së dhe aksesin e jashtëzakonshëm në informacione të ndjeshme. Shqetësues i veçantë ishte aksesi i tij në hetimet e spiunëve të huaj ose shtetasve amerikanë të dyshuar se punonin në emër të qeverive të huaja, si dhe humbja e agjentëve amerikanë jashtë shtetit.

Në dokumentet e dënimit, ndihmës avokatët amerikanë Elizabeth Aloi dhe Stuart D. Allen e quajtën fshehjen e pagesave nga McGonigal, “në thelb, korrupsion që minon transparencën dhe besimin në integritetin e Degës Ekzekutive të qeverisë”. Ata shtuan: “I pandehuri është betuar se do të hetojë dhe parandalojë krimet kundër Shteteve të Bashkuara, jo t’i kryejë ato”.

Sipas një marrëveshjeje për pranimin e fajësisë në rastin e tij të pagesave në Uashington, D.C., McGonigal pranoi një akuzë për fshehjen e provave materiale. Prokurorët hodhën poshtë tetë akuza të tjera: dy akuza për falsifikim të të dhënave ose dokumenteve në raportet e tij të zbulimit në FBI dhe gjashtë akuza të tjera për fshehjen e fakteve materiale ose dhënien e deklaratave të rreme për hetuesit.

Puna e McGonigal në emër të Deripaska filloi në vitin 2019, kur ai u punësua në mënyrë legjitime si konsulent dhe hetues nga një firmë ligjore që përpiqej të zhbënte listën e sanksioneve të SHBA-së të manjatit të aluminit. Por McGonigal pranoi se gjatë disa muajve në vitin 2021, ai mori detyra shtesë hetimore për të cilat ai mori ato që ai dinte se ishin pagesa të paligjshme nga një bankë e Qipros të filtruar përmes një kompanie të Nju Xhersit.

McGonigal kishte për detyrë të gërmonte papastërtitë mbi një oligark rival rus, Vladimir Potanin, me të cilin Deripaska kishte luftuar për kontrollin mbi kompanitë gjigante të metaleve industriale ruse, pasi ato u privatizuan në vitet 1990. Megjithatë, pas pushtimit të Krimesë nga Rusia, Deripaska u ndalua të bënte biznes me bankat amerikane dhe entitete të tjera. Sidoqoftë, McGonigal negocioi me një bashkëpunëtor të Deripaska-s për pagesa mujore prej 25,000 dollarësh që do të dërgoheshin në një llogari të kontrolluar nga Sergey Shestakov, një përkthyes për qeverinë amerikane, i cili ishte një ish-diplomat rus. Shestakov u akuzua për McGonigal dhe u deklarua i pafajshëm dhe do të përballet me gjyqin në qershor në Manhattan me akuza për komplot, shkelje të ligjit të sanksioneve të SHBA-së, pastrim parash dhe deklarata të rreme.

McGonigal kaloi më shumë se dy dekada në FBI, duke punuar në disa nga çështjet kryesore të sigurisë kombëtare, nga ndalimi i një komploti për të bombarduar metronë e qytetit të Nju Jorkut e deri te publikimi i një grumbulli dokumentesh të klasifikuara nga WikiLeaks. Ai u ngrit në gradat për t’u bërë shefi i saj i kundërzbulimit në Nju Jork përpara se të tërhiqej në vitin 2018.

Rënia e tij nga hiri filloi në vitin 2017 teksa përgatitej për pension, sipas dokumenteve të gjykatës. McGonigal i kërkoi ish-oficerit shqiptar të inteligjencës, i cili ishte bërë shtetas i natyralizuar i SHBA-së, një hua ndërsa diskutonin për mundësitë e biznesit. Kredia nuk u shlye kurrë. Të dy udhëtuan drejt Shqipërisë dhe vendeve të tjera ku individi kishte interesa biznesi dhe u takua me shtetas të huaj në shumë raste. Në një nga ato udhëtime, McGonigal u takua me kryeministrin e Shqipërisë për ta paralajmëruar kundër dhënies së licencave fitimprurëse të shpimit të naftës për kompanitë ruse – një çështje në të cilën ish-oficeri i inteligjencës kishte një interes financiar.

Në shenjë vlerësimi, McGonigal i dha kryeministrit një kapelë të FBI-së. Më pas ai udhëtoi në Kosovë mer “qëllim të dyfishtë për të mbledhur informacione që ishin potencialisht të dobishme si për FBI-në” dhe “planin e zhvillimit të biznesit personal të pazbuluar” të McGonigal, thanë prokurorët. Gjatë atij udhëtimi, ai i dha një kapelë tjetër të FBI-së një politikani në Kosovë.

Rreth një muaj më vonë, në një makinë të parkuar jashtë një restoranti në Nju Jork, ish-oficeri i inteligjencës i dorëzoi McGonigal rreth 80,000 dollarë para në dorë, si pjesë e kredisë që ai kishte kërkuar. Në vitin 2017, ai i dha McGonigal dy pagesa të tjera në shtëpinë e tij në New Jersey. Me nxitjen e McGonigal, byroja hapi një hetim për një lobist amerikan që punonte për një kundërshtar politik të kryeministrit shqiptar, në të cilin ish-oficeri i inteligjencës shërbeu si burim i FBI-së. Hetimi u mbyll menjëherë pasi McGonigal doli në pension, “pasi akuzat nuk u vërtetuan kurrë”, thanë prokurorët.

McGonigal shpreh keqardhje McGonigal kërkoi mëshirë në gjykatë të premten, duke i thënë gjykatësit se kishte një “ndjenjë të thellë pendimi dhe pikëllimi” për krimet e pranuara. “Po ju kërkoj me përulësi një shans të dytë”, tha ai, duke i kërkuar falje gruas së tij, dy fëmijëve të tyre dhe ish-kolegëve të tij të FBI-së. Në një deklaratë për gjykatësin përpara seancës dëgjimore të së premtes, McGonigal tha se veprimet e tij “të ndërmarra me qëllim të fitimit të parave pas daljes në pension nga FBI-ja mbizotëruan gjykimin dhe vlerat e mia të mira”.

Gruaja e tij Pamela, në një letër drejtuar gjykatësve federalë në Uashington dhe Nju Jork përpara dënimit të tij, tha se McGonigal “ishte ambicioz dhe po kërkonte të siguronte një jetë të mirë” për familjen e tij pas daljes në pension. “Unë besoj se kjo ambicie e la atë në rrugë të gabuar dhe e bëri atë të humbasë fokusin në realitetin e vendimmarrjes dhe veprimeve të tij,” shkroi ajo. McGonigal do të fillojë dënimin me burg më 18 mars.

NJË JETË NË SHËRBIM TË KOMBIT SHQIPTAR – KUSHTUAR VEPRIMTARISË PATRIOTIKE TË MEHMET PRISHTINËS

February 19, 2024 by s p

Nga: Hysen S. Dizdari

Studiues i historisë dhe i filatelisë shqiptare

Tiranë, më 29.01.2024

Patrioti dhe atdhetari Mehmet Prishtina lindi më 7 janar 1967, në fshatin Polacë, Drenicë, Komuna Skënderaj, të Kosovës, në një familje me tradita të mëdha patriotike.

Shkollën fillore e kreu po në fshatin e lindjes Polacë në vitet 1972–1975, më pas, duke qenë se babai i tij kishte emigruar në Gjermani, i mundësoi shkollimin atje në vitet 1975–1979.

Në vitin 1980 kthehet përsëri në Kosovë dhe përfundon shkollën e mesme me rezultate të larta, në vitet 1980–1984.

Një rol të madh në edukimin e Mehmetit luajti i ati, Feriz (Mehmet) Aliuka i fisit Berisha, i cili e merrte në odën e burrave që kur ishte fëmijë. Në këtë odë mbruhen ndjenjat e atdhedashurisë e të patriotizmit, duke dëgjuar si familja e tij kontribuonte me çdo formë në luftën çlirimtare, për lidhjen prej tre a katër brezash me patriotin Hasan Prishtina, pasardhëse e të cilit ishte familja e tij. Fshati i tij i lindjes Polacë dhe krahina e Drenicës janë të njohura për historinë qindravjeçare në organizimin e kryengritjeve dhe të luftës çlirimtare kundër pushtuesve serbë, duke filluar me Mirosh Kopilin (Kopiliq), Azem e Shote Galicën e duke vazhduar me heronjtë e Kosovës Hasan Prishtina, Shaban Polluzha. Aty luftoi dhe u vra gjyshi i Mehmet Prishtinës (Mehmet Ramadan Aliuka, 1900–1945) në janar të 1945-s nga forcat çetnike serbe në Drenicë, si luftëtar i brigadës së Shaban Polluzhës, në mbrojtje të popullatës civile, së bashku me të vëllanë Miftarin e deri te themeluesi i UÇK-së, heroi i Kosovës Adem Jashari.

Në vitin 1984, Kosova ndodhej nën okupimin serb, në kuadër të Republikës Federative të Jugosllavisë dhe mundësitë e shkollimit të lartë në Kosovë ishin të pamundura, edhe për shkak se ai kishte prejardhjen nga një familje atdhetare e patriotike, të lidhura ngushtë me emrin e patriotit dhe atdhetarit Hasan Prishtina.

Duke qenë se babai i tij jetonte dhe punonte në Gjermani në atë kohë, zgjodhi që ta shkollonte në një nga universitetet më të mira, në universitetet e Heildelbergut dhe Paderbornit në Gjermani, të cilin e përfundoi me rezultate të larta në vitet 1986–1990, në degën Ekologji-Agronomi.

Patrioti Mehmet Prishtina, falë intelektit të tij shquhet edhe në njohjen e mirë të katër gjuhëve të huaja: gjermanisht, anglisht, turqisht, serbokroatisht. Në saje të dijeve të tij gjuhësore, filloi të punonte në Gjermaninë e viteve 1990–1999 si përkthyes dhe interpret gjyqësor në qytetin Munih të Bavarisë. Gjatë këtyre viteve u njoh dhe me veprimtarë të tjerë të shquar nga Kosova, që kishin emigruar në Gjermani. Këtu fillon edhe aktiviteti i tij patriotik dhe kontributi i tij për çështjen e Kosovës, ku ai u shqua dhe ndihmoi në organizimin e aktiviteteve politike, patriotike dhe humanitare, duke ndihmuar emigrantët shqiptarë të sistemoheshin me punë e me strehim.

Por, kontributi i tij kryesor është në organizimin e protestave masive të emigrantëve shqiptarë në qytetet më të mëdha të Gjermanisë, Zvicrës, Belgjikës, Holandës etj.

Në vitin 1996 themelon në qytetin e Munihut të Gjermanisë kompaninë “Arian Reisen und Handels” GmbH. Pikërisht në qytetin e Munihut fillon zhvillimi i aktiviteteve të rëndësishme humanitare dhe politike, duke i ndihmuar emigrantët nga Kosova e Shqipëria dhe trevat shqiptare me strehim dhe me punësimin e tyre.

Grupet e para të prira nga Adem Jashari, Zahir Pajaziti e Salih Çeku, të cilat kishin mbaruar stërvitjet ushtarake në Shqipëri e të gatshëm për luftën për çlirim në Kosovë, fillimisht u detyruan që të strehohen në Gjermani, pasi sigurimi serb kishte rënë në gjurmë të tyre. Pasi kishin ardhur në Munih aty kontaktin dhe ndihmën e parë në kampin për strehim të refugjatëve që kërkonin azil politik në Munih e gjenin te Mehmet Prishtina. Vlen të ceken vetëm disa prej emrave të tyre, që edhe sot publikisht i janë mirënjohës Mehmetit, si: Bashkim Leci, Xhemajl Hoxha, Nazmi Kelmendi, Naim Gashi, ushtarakët Ruzhdi Alija-Rudi, Hasan Balidemaj, Musa Dobra, por edhe dhjetëra e mijëra të tjerë që vinin për t’u strehuar në Gjermani.

Patrioti Mehmet Prishtina, zyrat e kompanisë së tij i vuri në dispozicion të zgjidhjes së çështjes së Kosovës, duke pritur dhe duke përkrahur politikanë, gazetarë, shkrimtarë nga Kosova e Shqipëria dhe trevat tjera shqiptare, si: Ibrahim Rugova, Bujar Bukoshi, Sali Berisha, Azem Shkreli, Ali Podrimja, Xhafer Shatri, Luan Malltezi, Thimi Nika, gazetari Bujar Muharremi, Afërdita Sokoli, Rustem Xhata, ambasadori i Shqipërisë atëherë në Gjermani Xhezair Zaganjori, avokatët Bajram dhe Nekibe Kelmendi, Fazli Bala, Esat Stavileci, Pajazit Nushi, Mahmut Bakalli, Pjetër Arbnori, Arbër Xhaferi, heronjtë dhe luftëtaret Ushtrisë Çlirimtarë të Kosovës Fehmi Lladrovci, Ilaz Kodra, Ramiz Lladrovci, Sami Lushtaku, Ibrahim Kelmendi, Jonuz Trstena, ish-ministër i brendshëm etj.

Mehmeti ishte në dispozicion për të gjitha grupacionet dhe organizatat politike, klubet, shoqatat humanitare pa dallime ideologjie, sepse ai e kishte kuptuar me kohë misionin e doktrinës hasaniste, për të cilën më vonë veprimtari i njohur Adem Demaçi publikisht për herë të parë, në vitin 2009 në Vushtri tha: “Unë nuk jam simbol, por jam një ushtar i devotshëm i papërkulshëm i Hasan Prishtinës dhe aty ku e la Hasani, aty do ta vazhdojë, por së bashku do ta vazhdojmë. Kur ta krijojmë shtresën tonë të hasanistëve, atëherë nuk ka fuqi që do të na dalë përpara.”

Në vitin 1996 përkrah dhe ndihmon vëllezërit Kuzhnini, duke mbështetur iniciativën e tyre për themelimin e shoqatës “Lidhja Shqiptare në Botë (LBSH)”, të cilën e regjistron në Bashkinë e Munihut ku ishte i punësuar.

Në vitin 1997, në kohën më të vështirë për Shqipërinë, së bashku me një grup atdhetarësh nga diaspora, të kryesuar nga Nermin Vlora Falaski, vëllezërit Kuzhnini, gjeneral Tom Berishaj, Mehmet Prishtina, Toni Marku, Martin Berishaj, avokatët Bajram dhe Nekibe Kelmendi, Fazli Bala, Esat Stavileci, Pajazit Nushi, Mahmut Bakalli, Pjetër Arbnori, Arbër Xhaferi, Mark Krasniqi, Milazim Krasniqi etj. vizituan Shqipërinë dhe patën takime me drejtuesit e shtetit dhe partitë politike, duke dhënë kontributin e tyre në tejkalimin e situatës së vështirë politike në Shqipëri.

Në vitet 1998–1999, disa muaj përpara se forcat e NATO-s të nisnin luftën për çlirimin e Kosovës, babai i tij Feriz Aliuka, i fisit Berisha, i brumosur që në vogëli me dashurinë për atdheun, megjithëse i moshuar dhe në pension, la jetën e rehatshme në Gjermani dhe me ndërgjegje të flaktë patriotike e atdhetare mori një vendim për t’u kthyer në Kosovë dhe për t’u bashkuar e për të luftuar në krah të UÇK-së, për çlirimin e Kosovës nga pushtuesit serbë. Por, fati e kishte shkruar që ky burrë trim, fisnik dhe atdhetar të vritej gjatë luftimeve me pushtuesin serb, vetëm pak ditë para se Kosova të çlirohej. Akti i tij heroik e vendos emrin e tij në Panteonin e Dëshmorëve për Lirinë e Kosovës. Gjatë ceremonisë përcjellëse të të atit, që kishte organizuar Mehmeti në Hotelin Wolf në qendër të Munihut, erdhën për ngushëllime për 3 ditë me radhë disa mijëra shqiptarë nga të gjitha trevat e Europës dhe aty në ballë i priste baca Rifat Jashari, duke e ngushëlluar Mehmetin me fjalët: “Të jesh krenar për babën! Edhe ai kishte mundësi të ishte këtu në mesin tonë në Gjermani, por ai zgjodhi luftën për liri, për të cilën se kurseu as jetën!” Këto fjalë Mehmetin e ngushëllonin shumë, sidomos kur kemi parasysh sakrificën e familjes së komandantit legjendar Adem Jashari, e cila u flijua në betejën për liri, me gjithsej 22 anëtarë të saj të ngushtë: nga Blerina Hamza Jashari, 6-vjeçare, e deri tek plaku 99-vjeçar.

Si i punësuar në Bashkinë e Munihut, Mehmeti arriti që të sigurojë një garanci të fortë për viza për të gjithë familjen Jashari, duke e siguruar këtë garanci edhe me kapitalin e vet. Një ditë, pas një bisede në banesën e bacës Rifat Jashari, këta së bashku shkojnë në Bashkinë e Munihut dhe marrin garancitë për viza dhe që të dy ishin të gëzuar se mund të shpëtonin jetën e fëmijëve të mitur të kësaj familjeje. Por, pas disa ditëve komunikimi në mes të bacës Rifat Jashari dhe vëllait të tij, komandantit legjendar Adem Jashari, ai ia thotë troç Mehmetit: “Faleminderit Bacës, por familja ka vendos që të mos braktisë Prekazin.” Sot baca Rifat është gjallë dhe e kujton edhe këtë rast: “Sikur ta dinin se gjaku i tyre do të na sillte lirinë që ne sot e gëzojmë.”

Akti heroik i babait të tij Ferizit me të vëllanë Idrizin dhe dy kushërinjtë Enverin dhe Avdylin që ranë dëshmorë për liri, u bë frymëzim për brezin e ri të Kosovës dhe në mënyrë të veçantë për të birin Mehmet Prishtina. I frymëzuar nga kjo ngjarje, gjatë luftës për çlirimin e Kosovës, ai u shqua, por dha një kontribut madhor në përkrahjen dhe organizimin e Luftës Çlirimtare të Kosovës, duke ndihmuar UÇK-në në mjete logjistike, armatim, veshmbathje, ushqime e çdo gjë tjetër që u duhej për organizimin dhe zhvillimin e luftës çlirimtare deri në çlirimin e Kosovës nga forcat e NATO-s, nga pushtuesi serb. Të gjitha strukturat e përfshira në luftën e UÇK-së kanë pasur nga kontributi i Mehmetit. E vërtetuar kjo edhe me dokumente, pasi Mehmetit i lindën shumë probleme në lidhje me furnizimin e UÇK-së në Gjermani. Ai i heshtur dhe me mençuri i kaloi të gjitha problemet dhe u kthye nga Gjermania pas luftës për të dhënë kontributin e tij në rindërtimin e Kosovës së çliruar me gjakun e dëshmorëve dhe të të rënëve për lirinë e Kosovës.

Në vitin 1999, pas çlirimit të Kosovës, ai fillon aktivitetin e tij filantropik të vullnetarizmit patriotik e atdhetar, ku shquhet duke dhënë një kontribut të veçantë për rindërtimin dhe zhvillimin e Kosovës, duke afruar dhe duke sjellë në Kosovë investitorë dhe kapital të huaj, si firmën e njohur “Calik Holding” Ltd. Ky investitor ka kryer investime kapitale në Kosovë, si hapjen e Bankës Kombëtare Tregtare (BKT) dhe në privatizimin e rrjetit energjetik, KEK-KESCO, si dhe në ndërmjetësimin e investimeve në Aeroportin e Prishtinës etj.

Pas çlirimit të Kosovës, Mehmeti, i etur për kulturë dhe dije, vazhdon rrugën e shkollimit dhe në vitet 2001–2003 përfundon Universitetin e Hagenit në Gjermani, në Shkencat Politike-Juridike, studime master. Në vitet 2009–2011 kryen studimet master në Marrëdhënie Ndërkombëtare – Diplomaci, Phd, në Shkenca Politike në Universitetin e Vjenës në Austri. Por, sukseset dhe arritjet e tij nuk ndalen këtu, sepse Mehmet Prishtina është dhe një biznesmen i suksesshëm.

Në vitin 2012, Mehmet Prishtina se bashku me bijtë e tij Arianin dhe Pleuratin, që të dy me studime master në ekonomi në universitetet prestigjioze të Munihut LMU dhe TU, themelon kompaninë e tij “New Prishtina Residence LLC” Real Estate, në Prishtinë: Kosovë.web.//www.newpr.biz

Ai ka fokusuar punën dhe biznesin e tij në zhvillimin e pasurive të patundshme (Real Estate) dhe deri më sot ka ndërtuar një lagje të re, me rreth 286 vila moderne në një nga zonat më të bukurat të qytetit të Prishtinës, të emërtuar lagjja dhe rruga “Hasan Prishtina”. Në hyrje të kësaj lagjeje, më 25.11.2023, ka vendosur edhe bustin e heroit kombëtar Hasan Prishtina, të derdhur në bronz. Gjatë këtyre viteve ka themeluar edhe disa kompani të tjera.

Në vitet 2007–2012 themeloi kompaninë “Swiss Kosova AG” Real Estate, Prishtinë, Kosovë.

Në vitet 2004–2007 themeloi EIC “Europe International Consulting LLC” dhe KS-Team Prishtinë, Kosovë, dhe në vitet 2003–2006 punoi si korrespondent i huaj për Kosovën, Shqipërinë, Maqedoninë e Veriut dhe Malin e Zi në kompaninë “Presdok AG by Hans-Ulrich-Helfer”, Politikat e Sigurisë në Europë, me bazën e saj në Cyrih, Zvicër.

Kontributi madhor i patriotit e i atdhetarit Mehmet Prishtina fillon me themelimin e Fondacionit “Hasan Prishtina” në vitin 2012, ku i udhëhequr nga vlerat e larta morale, me qëllimin atdhetar e patriotik me mision historik për ringjalljen e historisë së lavdishme të Kosovës dhe heroit të saj Hasan Prishtina dhe Adem Jashari. Veprimtaria e tij filantropike, me qëllime bamirësie, mund të krahasohet pa frikë me veprimtarinë bamirëse të shqiptares së madhe Nëna Tereza.

Në këtë veprimtari ai u frymëzua edhe nga vepra e paraardhësit të fisit tij, patriotit dhe heroit të Kosovës Hasan Prishtina dhe nga akti heroik i babait tij Feriz Aliuka – Berisha, si dëshmor i luftës së fundit të Kosovës.

Por, patrioti Hasan Prishtina është një nga figurat më të mëdha të kombit shqiptar dhe së bashku me Ismail Qemalin e patriotë të tjerë arritën të shpallin Pavarësinë e Shqipërisë më 28 Nëntor 1912. Duke qenë se jeta dhe vepra patriotike e atdhetare e Hasan Prishtinës, fatkeqësisht është më pak e njohur në trojet shqiptare, jo vetëm për shkak të harresës qëllimkeqe e antishqiptare, por edhe nga neglizhenca e organeve të shtetit në Shqipëri dhe në Kosovë, puna e patriotit Mehmet Prishtina dhe e Fondacionit të tij “Hasan Prishtina”, gjatë viteve 2012–2024 është përqendruar në ndriçimin e veprën e tij patriotike, me qëllime filantropike në bamirësinë kulturore, dhe ka si qëllim studimin, njohjen, ndriçimin dhe nxjerrjen nga pluhuri i harresës i jetës dhe i veprës së patriotit Hasan Prishtina.

Në saje të tij, të punës këmbëngulëse, me vullnetin e tij të hekurt, i frymëzuar nga veprimtaria patriotike dhe atdhetare e patriotit Hasan Prishtina, ai ka arritur që brenda një dekade të nxjerrë në dritë, punën madhore dhe veprimtarinë patriotike dhe atdhetare të Hasan Prishtinës. Veprimtaria e patriotit Mehmet Prishtina dhe e Fondacionit të tij “Hasan Prishtina” janë unike në të gjitha trojet shqiptare, prandaj ai duhet përkrahur dhe duhet njohur nga të gjithë shqiptarët kudo në botë.

Ai ka arritur që duke u udhëhequr nga idealet e larta njerëzore të bamirësisë kulturore e filantropisë të financojë shtatore madhore dhe buste të Hasan Prishtinës në qytetet kryesore shqiptare, si: Tiranë, Vlorë, Peshkopi, Kukës, Prishtinë dhe Shkup.

Disa nga arritjet e Fondacionit “Hasan Prishtina” gjatë viteve 2009–2024 janë:

Aktiviteteve të Fondacionit iu paraprin botimi i librit “Veprimtaria atdhetare Hasan Prishtina”, i autorit Bedri Tahiri nga Galica e Azem Bejt Galicës, i cili doli në dritë me ndihmën e Mehmet Prishtinës, pasi priti me vite të tëra në radhë për botim. Menjëherë, më 9 shtator 2009, me mbështetjen e Mehmet Prishtinës organizohen edhe ditët e Hasan Prishtinës nga Kuvendi i Komunës së Vushtrrisë, ku në këtë manifestim të shndërruar në traditë do të spikatej fjalimi i bacës Adem Demaçi

1. Në vitin 2011, me iniciativë dhe sponsorizim të tij, vendoset shtatorja e Hasan Prishtinës në Universitetin e Prishtinës “Hasan Prishtina”.

2. Më datë, 27.11.2012, në 100-vjetorin e Shpalljes Pavarësisë, me iniciativë dhe me sponsorizim të tij, vendoset shtatorja e Hasan Prishtinës në qytetin e Tiranës.

3. Më 14.10.2012, me iniciativë dhe me sponsorizim të tij, vendoset shtatorja e Hasan Prishtinës në qytetin e Shkupit.

4. Në vitin 2019 është ndare çmimi “Hasan Prishtina” për gazetarin e mirënjohur z. Marin Mema.

6. Në vitin 2021/22 me iniciativë dhe sponsorizim të tij është realizuar vepra “Muri i Kujtesës – Gjenocidi serb në Kosovë 99” në Parkun Hasan Prishtina në Han tw Elezit.

7. Më 7.5.2022, me iniciativë dhe me sponsorizim të tij, vendoset shtatorja e Hasan Prishtinës në qytetin e Vlorës.

8. Më 28.11.2022 vendoset shtatorja e Hasan Prishtinës dhe e Adem Jasharit në Mushetisht, të cilën Mehmet Prishtina e përkrahu. Vlen të theksohet se ky është projekti i parë i një monumenti pas atij në Vushtrri, që financohet me mjetet e shtetit të Kosovës dhe me angazhimin e Naim Sopit.

9. Më datë 25.11.2023, me iniciativë dhe me sponsorizim të tij, vendoset busti i Hasan Prishtinës në qytetin e Prishtinës.

10. Më datë 12.11.2023, me iniciativë dhe me sponsorizim të tij, vendoset busti i Hasan Prishtinës në qytetin e Kukësit.

11.Më datë 18.11.2023, me iniciativë dhe me sponsorizim të tij, vendoset shtatorja e Hasan Prishtinës në qytetin e Peshkopisë.

12. Nga data 12–14 tetor 2012, me iniciativë dhe me sponsorizim të tij, mbahet në qytetin e Shkupit konferencë shkencore ndërkombëtare “Mbi veprimtarinë atdhetare të Hasan Prishtinës” dhe me 14.10.2012 bëhet inaugurimi i shtatores Hasan Prishtina në qendër të Shkupit, para qendrës Mavrovasja.

13. Më datë 7.10.2012, me iniciativë dhe me sponsorizim të tij, mbahet në qytetin e Shkupit promovimi i botimit të librit “Veprimtaria atdhetare e Hasan Prishtinës”, me autorë: Skender Asani, Mehmet Prishtina, Sefer Tahiri.

14. Më datë 12 gusht 2012, në përvjetorin e Lidhjes së Prizrenit dhe në 100-Vjetorin e Çlirimit të Shkupit, me iniciativë dhe me sponsorizim të tij, në bashkëpunim me ITSHKSH-në, Shkup, organizon Marshimin e Çlirimit të Shkupit, duke i bashkuar të gjitha familjet e lidhjes së 1912-s e që nga ajo datë kjo lidhje quhet “Lidhja e 1912-s është gjallë”.

15. Më datë 12.8.2013, me iniciativë dhe me sponsorizim të tij, në bashkëpunim me ITSHKSH-në, dr. Skender Asani, Bujar Dugolli, Ibrahim Gashi, Blerim Reka, Arben Sylejmani, organizon Akademinë Përkujtimore në qytetin e Selanikut dhe vizitë në vendin ku u vra Hasan Prishtina nga shqiptari Ibrahim Çelo.

16. Në vitin 2023, me iniciativë dhe me sponsorizim të tij, botohet libri për fëmijë me titull “Me quajnë Hasan Prishtina”.

17. Në vitin 2024 i drejton kërkesë Bashkisë Shkodër për konservimin e Komitetit Mbrojta Kombëtare e Kosovës (KMK), i cili u themelua në vitin 1918 nga patriotët Hasan Prishtina, Hoxhë Kadria, Bajram Curri, Luigj Gurakuqi etj.

18. Në vitin 2024, në vazhdim të veprimtarisë tij filantropike dhe bamirësisë kulturore, ka planifikuar që më datë 7 mars 2024 të vendosë bustin e Hasan Prishtinës në oborrin e muzeut të Shkollës Normale në qytetin e Elbasanit. Pikërisht te kjo shkollë, patrioti Hasan Prishtina ka financuar shkollimin e nxënësve nga Kosova dhe trojet e tjera shqiptare.

19. Në vitin 2024, me iniciativë dhe me sponsorizim të tij, ka planifikuar vendosjen e bustit të patriotit Mehmet Pashë Derralla, në qytetin e Tetovës.

20. Në vitin 2024, me iniciativë dhe me sponsorizim të tij, ka planifikuar fillimin e punës së disa historianëve shqiptarë nga Shqipëria dhe nga Kosova, për të mbledhur, për të sistemuar, për të studiuar dhe për të botuar kolonën e plotë të veprës së patriotit Hasan Prishtina, kushtuar kombit shqiptar, dhe rolin e tij madhor në Shpalljen e Pavarësisë së Shqipërisë më 28 Nëntor 1912, kolonë e cila nuk ka arritur të botohet as nga shteti i Shqipërisë dhe as nga shteti i Kosovës, megjithëse kanë kaluar 150 vjet nga lindja e tij.

Të lutemi për paqe dhe të radhitemi si shqiptarë në krijimin e shtresës hasaniste nën moton e fjalëve të tij në Parlamentin Shqiptar 1921:

“Atdheu prej nesh pret çlirimin, lirinë dhe bashkëpunimin! Rroftë Shqipëria!”

COPËZA JETE USHTARAKE ME DREJTUES TË DARDANISË

February 19, 2024 by s p

Gjeneral Asllan Bushati/

Kur po shërbeja si komandant divizioni në Vlorë (tetor1992) mora një telefonatë nga Gjeneral Adem Copani, ish Këshilltari Ushtarak i Presidentit Sali Berisha, i cili më tha se në një nga vilat qeveritare po pushonte Presidenti i Kosovës, Dr Ibrahim Rugaova. Do të ishte mirë për ju si autoritetit ushtarak numër një në Vlorë, të shkonit e ta takonit. Këtë paraprakisht e kam biseduar me Presidentin dhe me Ministrin e Mbrojtjes Zotin Safet Zhulali. Jeni i autorizuar të bisedoni me te, për cdo gjë që ai ju pyet dhe që ju e dini se është e nevojëshme të ja bëni me dije.

Kjo ishte një telefonatë shumë e rëndësishme dhe domethënëse për mu se do të më jepte mundësinë më pas, të bisedoja gjashtë herë (në gjykimin tim) me njerin nga njerzit më të mëdhej e më të rëndësihëm të Kombit tonë. Kisha dëgjuar e lexuar për te, shumë shkrime e artikuj shkencor në fushën e historisë letërsisë por edhe artikuj për diplomacinë e vecanërisht për Dardaninë. Tashmë zyrtarisht kisha lejen të takohem e të bisedoj me njeriun e madh të së ardhmes së Dardanisë Zotin Ibrahim Rugova.

Që në takimin e parë Presidenti Rugova, më pyeti se cfarë lidhje ka origjina juaj nga Mati dhe mbiemri Bushati i pashallëkut të Shkodrës? I thashë se unë jam brezi gjashtë i lindur në Mat, por i përkasim familjes Bushatlinjëve të Shkodrës. Kjo ka ndodhur se në luftën e Babunës ku ushtaraku numër një ishte Mustafa Pash Bushati dhe zëvëndësi tij ishte Zenel Pash Bushati (katra,katragjyshi im). Sic dihet luftën e fituan turqit, si rezultat edhe i tradhëtisë që bënë serbeve në betejë dhe Sulltani me dekret i shpalli të parët e mi armiq të perandorisë. Që nga ajo kohë, të parë e mi blenë toka, livadhe, kullota e kojrije në Midhë të Matit ku jetojmë edhe sot. Më pas biseduam për luftën që po zhvillohej në ish Jugosllavi. Në këtë takim isha i vetëm me Presidentin Rugova, ku tek dera takova vetëm Adnan Merovcin.

Takimin tjetër ma kërkoi Presidenti Rugova, ku pasi pimë nga një kafe në vilë, më njohu edhe me Mehmet Krajën, Skënder Zogaj, Adnan Merovcin. Më tha se sot ju jeni i ftuari ynë për drekë në një nga vilat qeveritare të Dhërmiut. E mirprita me kënaqësi ftesën dhe udhëtova në të njejtën makinë me Presidentin nga Vlora për në Dhërmi në të cilën ishin edhe shoferi e Adnan Merovci . Kur arritëm në destinacion, patëm kohë të bisedonim bashkërisht me shoqëruesit e Presidentit për probleme të historisë luftrave duke hequr paralele me kohën. Ishin biseda me të vërtetë intelektuale dhe të rëndësishe. Presidenti Rugova ndiqte bisedën tonë me vëmendje dhe ndërhynte fare pak në mënyrë që ne të flisnim më të pavarur. Nuk do ta harroj kurrë kur nga fundi duke ju drejtuar Mehmet Krajës e Skënder Zogajt tha ”shteti i formon dhe i trimërin specialistët e vet. E shikoni sa lirshëm me argument e kompetencë flet Asllani? Ne na duhet me doemos shteti ynë”.

Më 28 Nëntor 1992, Presidenti Rugova gjatë ceremonisë së 80 vjetoirit të pavarsisë së Shqipërisë në Vlorë, me prezantoi me disa personalitete të Dardanisë së asaj kohe si: Dr Bujar Bukoshi, Prof. Femi Agani, Prof. Mark Krasniqi, Prof. Zekeria Cana, Prof. Ali Aliu e shumë intelektualë të tjerë. Unë nuk bëja pjesë në protokollin zyrtar të Presidentit të Shqipërisë (si komandant divizioni që isha), por me kërkesën e Presidentit Rugova pata tri ftesa radhazi për pritjet e Presidentit Berisha në pallatin e Brigatave në Tiranë. Në njerën prej tyre në një qoshe vecmas pata një bisedë krejt ushtarake me Prof. Aganin. Ai më pyeti se cfarë dinim ne për arsenalin kimik të Serbisë? I thashë se është i madh dhe i frikshëm, ku përvec të dhënave tona, partnerët amerikanë na kanë dhënë edhe disa dokumenta që i disponojnë kroatët, dhe besohet se këta të fundit e dinë saktësisht sasinë, llojin dhe idetë e përdorimit të tyre nga serbët. Në vazhdim i thashë se në depot tona ushtarake kemi si rezervë të paprekëshme (me synim për ju) kundërgaze, paketa individuale kundërkimike, corape e doreza mbrojtëse.

Në një mbrëmje të shkurtit 1994, kur isha kthyer përsëri në Ministrinë e Mbrojtjes në Tiranë si drejtues i Armkontrollit, Gjeneral Adem Copani më tha me porosi të Presidentit Sali Berisha jeni i lutur të takoheni për një kafe me dy personalitete të nderuara të Kosovës: Mark Krasniqi e Zekeria Cana. I thashë gjeneralit se janë të mirseardhur dhe se unë ndjehem shumë i nderuar ta pimë kafen në shtëpinë time. Nuk vonoi as një cerek ore dhe ata arritën. Duke u future në dhomën e pritjes i thashë duke qeshur Prof. Zekerias se biblikotekën personale akoma nuk e kam pastruar akoma nga “mbeturinat marksiste-leniniste”, prandaj po të paralalmëroj se ndoshta të merren mend që në një faqe e gjysëm të dhomës ka akoma shumë libra të kohës diktaturës. Prpfesori me shumë seriozitet ma këtheu:”librat janë pasuri shumë e madhe. Do të bësh krim intelektual në se i hedh në plehra. Edhe ato të Hitlerit e të Duces duhen ruajtur për efekt studimi”.

Në atë kohë ishim shumë të varfër dhe i prita intelektualët e nderuar me nga një gotë raki dhe pak sallatë, turshi, gjizë dhe nga dy qofte për person. Sot më vjen turp ta kujtoj, por kjo është e vërtetë se varfëria ishte e pranishme në cdo vatër shqipare të asaj që quhet londineze. Me profesorët e nderuar biseduam për gati pesë orë për problem të luftës, të mundësisë së zbritjes saj nga Bosnja në Dardani, rreziqet që bartëte për popullatën dhe cfarë mund të bënte Shqipëria në një situatë të tillë.

Me Kryetarin e Qeverisë Kosovës në mërgim Dr. Bujar Bukoshi , bisedova tek hotel Rogner dhe tek lokali i Ekrem Bardhës (përballë Muzeut Kombëtar në Tiranë) ditën e mbylljes veprimtarisë së rivarrimit të eshtrave të Faik Konicës.

Me Muhamet Shatrin, drejtues i fondmbledhjes Qeverisë Bukoshi me banim në Suedi, Pjetër Coli me banim në Gjermani, Gani Hoxha në Zvicër, Avdyl Ceka në Austri, e Skënder Zogaj (përgjegjës i zyrës Kosovës) u takuam në Tiranë në prillë 1994. Pas një vizite që bëmë së bashku tek familja e oficerit Fatmir Shehu dhe ushtarit Arsen Gjini të cilave ju dhuruan nga 5 mijë marka sejcilës famije në emër të qeverisë Kosovës sepse të dy këta ushtarakë (në vartësi të Ministrisë Brendëshme) u vranë nga një komando greke më 10 prill 1994. Pas vizitës u mblodhëm në shtëpinë time ku diskutuam për luftën e ardhëshme në Dardani.

Në prill 1997 në zyrën e Shefit Shtabit Përgjithshëm të Ushtrisë Shqiptare u takuam dhe biseduam për tri orë me Ministrin e Mbrojtjes Kosovës, Kolonel Ahmet Krasniqi. Ky takim ishte sekret dhe mbahej me porosi të Presidentit Sali Berisha në të cilën mori pjesë Gjeneral Adem Copani dhe unë. Në këtë takim Kolonel Krasniqit ju dorëzuan celsat e dy depove mbi tokësore e një depo tunel. Aty shkëmbyem shumë mendime të veprimtarisë luftarake të së ardhmes.

Pas largimit tim për në SHBA, përvec atyre që përmenden tek Batalioni Atllantiku, kam patur rastin të takoj si përfaqësues i Vatrës edhe ish Presidentët: Fatmir Sejdiu, Atifete Jahjaga e Hashim Thaci. Kryeministrat Ramush Haradinaj e Avdulla Hoti si dhe shumë ministra të mbrojtjes, jashtëm e diasporës, me të cilët kam shkëmbyer mendime për problem të sigurisë së Dardanisë.